ဧဝရက်တောင်ရှုခင်းကြည့် လေယာဉ်ခရီးစဉ် Mount Everest Flight

February 25, 2023March 2, 2023Posted in Asia, nepal, UncategorizedTagged Asia, himalayas, mount everest, mountain flight, nepalLeave a comment

နီပေါနိုင်ငံဆိုလျှင် ကမ္ဘာ့အမြင့်ဆုံး ဧဝရက်တောင် (Mount Everest) နှင့် တွဲမြင်လေ့ရှိကြပေသည်။ ဧဝရက်တောင်အပါအဝင် ကမ္ဘာ့အမြင့်ဆုံးတောင်ထိပ် ၁၀ ခုအနက် ၈ ခုက နီပေါနိုင်ငံတွင် တည်ရှိနေကြသဖြင့် နီပေါနိုင်ငံကို ကမ္ဘာ့ခေါင်မိုးဟုလည်း တင်စားခေါ်ဝေါ်ကြသည်။ နိုင်ငံ၏မြောက်ဘက် တစ်လျှောက်တွင် ဆီးနှင်းဖုံးနေသည့် ဟိမဝန္တာတောင်တန်းများက နေရာယူထားပေသည်။ နီပေါနိုင်ငံသို့ သွားရောက်လည်ပတ်ပါက ဟိမဝန္တာတောင်တန်းများ အထူးသဖြင့် ဧဝရက်တောင်ကို မမြင်ခဲ့ရလျှင် ခရီးပြီးပြည့်စုံလိမ့်မည်မဟုတ်ပေ။ နှစ်စဉ် ကမ္ဘာတစ်ဝှမ်းမှ ထောင်ပေါင်းများစွာသော ခရီးသွားများသည် ဧဝရက်တောင်နှင့် ဟိမဝန္တာတောင်တန်းများကို မြင်တွေ့နိုင်ရန် တောင်တက်ခရီးစဉ်အတွက် နီပေါသို့ လာရောက်လည်ပတ်ကြသည်။

ဧဝရက်တောင်တက်ရန် ခက်ခဲသလို ကျွမ်းကျင်မှုရှိရန်လိုအပ်ပေသည်။ သို့သော်လည်း တောင်တက်ရန် အချိန်မရှိသူများ၊ တောင်တက်မကျွမ်းကျင်သူများအတွက် ဧဝရက်တောင်ကို မြင်တွေ့နိုင်မည့် အခြားသောနည်းလမ်းတစ်ခုရှိပါသည်။ ယင်းမှာ ဧဝရက်တောင် ရှုခင်းကြည့် လေယာဉ်ခရီးစဉ်ဖြစ်ကာ ဧဝရက်တောင်နှင့် အခြားဟိမဝန္တာတောင်တန်းများ၏ ရှုခင်းများကို ခံစားနိုင်ရန် သက်သက် ဧဝရက်တောင်အနီးသို့ ပျံသန်းပြေးဆွဲပေးနေခြင်းဖြစ်သည်။ တောင်တက်ရန်မလိုဘဲ ဧဝရက်တောင်ကို တစ်နာရီအတွင်း အနီးကပ်မြင်ချင်သူများအတွက် အကောင်းဆုံးနည်းလမ်းဖြစ်သည်။

ဧဝရက်တောင်သည် နီပေါနိုင်ငံမြို့တော် ခတ္တမန္ဒူမြို့၏ အရှေ့မြောက်ဘက်တွင် တည်ရှိကာ Yeti Airlines၊ Buddha Air နှင့် Shree Airlines ကဲ့သို့ နီပေါ ပုဂ္ဂလိကလေကြောင်းလိုင်းများသည် နေ့စဉ်နေ့တိုင်း မနက်စောစောတွင် ခတ္တမန္ဒူလေဆိပ်မှ ဧဝရက်တောင်ကြည့်လေယာဉ်ခရီးစဉ်များကို ပျံသန်းပြေးဆွဲပေးနေပါသည်။

လေယာဉ်စီးချိန်အစအဆုံး တစ်နာရီခန့်ကြာကာ ခရီးစဉ်အတွင်း ဧဝရက်တောင်အပါအဝင် ရေခဲတောင်ထိပ်ပေါင်း ၂၀ ကျော်ကို ၃၆၀ ဒီဂရီ မြင်တွေ့နိုင်မည်ဖြစ်ကာ ခတ္တမန္ဒူမြို့၊ ဗုဒ္ဓနတ်စေတီ၊ ရေခဲတောင်များနှင့် ရေကန်များကိုလည်း တွေ့မြင်နိုင်ပေသည်။ အရင်ဆုံး ခတ္တမန္ဒူမြို့နှင့် အနီးဆုံး Langtang Lirung တောင်ထိပ်ကို မြင်တွေ့ရကာ ထိုမှ ရှေ့ဆက်သွားလျှင် ဧဝရက်တောင်ကို ကျော်ဖြတ်ပြီး နောက်ဆုံး Chamlang တောင်ထိပ်အရောက် လေယာဉ်ပြန်လှည့်သဖြင့် ဧဝရက်တောင်ကို အသွားအပြန် ၂ ကြိမ်မြင်တွေ့နိုင်မည်ဖြစ်သည်။

လေယာဉ်မှာ လျှောက်လမ်းတစ်ဖက်ကို နှစ်ခုံစီရှိသည့်လေယာဉ်အသေးဖြစ်ပြီး ခရီးသည်တိုင်းကို ပြတင်းပေါက်ခုံရအောင် စီစဉ်ပေးထားသဖြင့် ရှုခင်းမမြင်ရမှာကို စိုးရိမ်စရာမရှိပါ။ ဟိမဝန္တာတောင်ထိပ်များ၏ မြေပုံကိုလည်း ခရီးသည်တိုင်းကို ပေးထားရာ ကိုယ်မြင်ရသည့် တောင်ထိပ်များကို မြေပုံနှင့် ကိုက်ကြည့်နိုင်ပေသည်။ ထို့အပြင် လေယာဉ်မယ်များကလည်း လမ်းတစ်လျှောက်မြင်ရသည့် ရှုခင်းများနှင့် တောင်များ၏ အမည်များကို ပြောပြပြီး ဧဝရက်တောင်ကိုလည်း ညွှန်ပြပေးပါသည်။ ဧည့်သည်တိုင်းကို လေယာဉ်၏ရှေ့မှ ဟိမဝန္တာရှုခင်းများကို ကြည့်ရှုခံစားနိုင်ရန် လေယာဉ်မှူးခန်းထဲသို့ ခေတ္တခဏ ဝင်ခွင့်ပေးပါသည်။

ဟိမဝန္တာတောင်တန်းများကို ကောင်းကင်ယံမှ မြင်ရသည့်မြင်ကွင်းမှာ အံ့အားသင့်စရာကောင်းလှသလို တစ်သက်မမေ့နိုင်စရာပင်ဖြစ်သည်။ ဟိမဝန္တာတောင်တန်းများကို တမျှော်တခေါ်ကြီးတွေ့ရသည့်မြင်ကွင်းကို အခြားမည်သည့်နေရာတွင်မှ မြင်တွေ့နိုင်မည် မဟုတ်ပေ။ အပြန်ခရီးမှာ ဧဝရက်တောင်မြင်ရသည့် အောင်ပွဲအဖြစ် ရှန်ပိန်တိုက်ပြီး နာမည်ရေးထိုးထားသည့် ဂုဏ်ပြုမှတ်တမ်းလွှာကို အမှတ်တရသိမ်းထားရန် ပေးပါသည်။

ဧဝရက်တောင်ကြည့် ခရီးစဉ်သည် ဈေးနှုန်းအားဖြင့် နိုင်ငံခြားသားများအနေဖြင့် အမေရိကန်ဒေါ်လာ ၂၀၀ ခန့်ကျသင့်ပြီး နီပေါနိုင်ငံသားများနှင့် အိန္ဒိယနိုင်ငံသားများမှာမူ ဈေးပိုသက်သာပါသည်။ တောင်တက်လေယာဉ်များကို တစ်နှစ်ပတ်လုံး ပြေးဆွဲနေသော်လည်း စက်တင်ဘာလမှ ဧပြီလအကြားသည် ဆောင်းရာသီဖြစ်သောကြောင့် ရေခဲတောင်များကို ကြည့်ရှုခံစားရန် အကောင်းဆုံးအချိန်ဖြစ်သည်။
နီပေါနိုင်ငံတွင် ရှုခင်းကြည့်သည့် အခြားရဟတ်ယာဉ်ခရီးစဉ်များလည်းရှိပါသေးသည်။ ယင်းတို့မှာ ဧဝရက်တောင်ခြေစခန်းသို့ ပို့ဆောင်ပေးသည့် ရဟတ်ယာဉ်ခရီးစဉ်၊ ခတ္တမန္ဒူမြို့ရှုခင်း၊ Langtang တောင်ကြားနှင့် Gosaikunda Lake တို့၏ ရှုခင်းများကို အနီးကပ်ကြည့်ရှုနိုင်မည့် Langtang တောင်ကြား ရဟတ်ယာဉ် ခရီးစဉ်၊ သခင် Shiva နှင့် သူ၏ကြင်ယာတော်တို့၏ နေထိုင်ရာဟု ယူဆရသည့် မြင့်မြတ်သော Gosaikunda ရေကန်သို့ ပျံသန်းသည့် Gosaikunda ရဟတ်ယာဉ်ခရီးစဉ်၊ ကမ္ဘာ့ဒဿမမြောက် အမြင့်ဆုံးတောင်ထိပ် Annapurna တောင်ခြေစခန်းရဟတ်ယာဉ်ခရီးစဉ်၊ မြင့်မြတ်သော မုခ်တီနတ်ဘုရားကျောင်း Muktinath Temple သို့ ဘုရားဖူးခရီးစဉ်ဖြစ်သည့် Muktinath Helicopter Tour တို့ဖြစ်သည်။

ကလောမှာ ဘယ်တွေသွားပြီး ဘာတွေ စားကြမလဲ

October 20, 2022March 2, 2023Posted in Asia, Myanmar, Shan, ShanTagged Asia, Myanmar, Nu Myat, Nu Myat around the World, ShanLeave a comment

ကလောရောက်နေတဲ့သူတွေအတွက် နုမြတ်ရောက်ဖူးခဲ့တဲ့ ကလောက နေရာလှလှလေးတွေအကြောင်း ပို့စ်တစ်ခု တင်ပေးဖူးပါတယ်။ အခုက နေရာအသစ်တွေပေါ်လာလို့ ထပ်ဖြည့်ပြီး တင်ပေးလိုက်ပါတယ်။ ဒီပို့စ်မှာ သွားစရာနေရာတွေအပြင် စားစရာဆိုင်လေးတွေပါ သိသလောက် ထည့်ရေးပေးထားပါတယ်။

1. ကလောဘူတာ

—————————

သိပ်လှတဲ့ ကလောဘူတာရုံအဟောင်းလေးဆီတော့ ရထားစီးစီး မစီးစီးရောက်အောင်သွားခဲ့ကြပေါ့။ ဗုံးဒဏ်ကြောင့် အဆောက်အအုံ ၂ ခြမ်းကွဲတဲ့နေရာလေးကို ပြင်ဆောက်ထားတာကလွဲရင် ဟိုးအရင်ခေတ်ကအတိုင်းလေးပါပဲ။ ရထားလာတဲ့အချိန် ရထားပေါ်တက်ကြဆင်းကြနဲ့ ယောက်ယက်ခတ်နေတဲ့မြင်ကွင်းလေးကလည်း ရသတစ်မျိုးခံစားရမှာပါ။

2. နာရီစင်

—————————

ကလောမြိုရဲ့ နာရီစင်လေးကလည်း မြို့လည်မှာ ဝံ့ဝံ့ကြွားကြွားလေးနေရာယူနေတာဆိုတော့ ကလောသွားတိုင်း အမြဲဖြတ်သွားရတဲ့နေရာပါ။ ဓာတ်ပုံရိုက်မယ်ဆို ကားနဲ့ဆိုင်ကယ်ကြည့်ရှောင်ပေါ့နော်။ ဓာတ်ပုံထဲ လူရော နာရီစင်ရောပါချင်ရင် နာရီစင်နားကပ်မရိုက်ဘဲ ကားလမ်းဘေးကပ်ပြီး ခပ်ဝေးဝေးကရိုက်ပါနော်။

3. ထင်းရူးတော

—————————

ထင်းရူးမြို့တော် ကလောမှာ ထင်းရူးပင်တန်းကြီးတွေနဲ့ ဓာတ်ပုံရိုက်ချင်ရင် ဝေးဝေးလံလံ သွားစရာမလိုပါဘူး။ မြို့ထဲမှာတင်ရှိပါတယ်။ နာရီစင်ဘေး မေမြေဦး ပန်းခြံထဲက ထင်းရူးတောထဲ ဝင်ရိုက်လို့ရပါတယ်။ ဒီပန်းခြံက ကလောမြို့ မီးရှော်တိုင်ပွဲကျင်းပတဲ့ နေရာလည်းဖြစ်ပါတယ်။

4. Kalaw Heritage Hotel

———————————–

မြန်မာနိုင်ငံရဲ့ ဒုတိယသက်တမ်းအရင့်ဆုံး Kalaw Heritage ဟိုတယ်လေးကတော့ ဥရောပရောက်သွားသလိုပါပဲ။ အပင်လေးတွေတွယ်တက်နေတဲ့ နံရံစိမ်းစိမ်းလေးရှိတဲ့ ရှေးဟောင်းအဆောက်အအုံကြီးတွေရယ်၊ အရှေ့မှာ ပန်းခင်းဖြူဖြူလေးတွေခင်းထားတဲ့ ဘိုဆန်ဆန်တိုက်ဖြူဖြူလေးတွေရယ်နဲ့ သိပ်ကိုလှပါတယ်။ ညမအိပ်လည်း ကော်ဖီဝင်သောက် မုန့်ဝင်စားရင် ဓာတ်ပုံရိုက်လို့ရပါတယ်။

5. ရေယောင်းမ View Point

———————————–

အရမ်းလှတဲ့ ရှုခင်းတွေမြင်ရမယ့် View Point ပါ။ ကလောအတက်လမ်းဘေးချိုးလိုက်ရင် ရောက်ပါတယ်။ ဧရာမ လခြမ်းကြီးတွေ၊ အသည်းပုံတွေနဲ့ ဓာတ်ပုံရိုက်စရာနေရာတွေ ဖန်တီးပေးထားပါတယ်။

အဲဒီမှာ View Point ကြည့်ရမယ့်နေရာ ၂ ခုရှိပါတယ်။ ရှန်ဗဲလားကတော့ မူလလက်ဟောင်း လခြမ်းပုံကြီးရှိတဲ့နေရာပါ။ အထဲနည်းနည်းထပ်ဝင်ရပါတယ်။ သိရိစန္ဒာအပန်းဖြေစခန်းကတော့ လမ်းမနဲ့ပိုနီးပြီး ဝင်ရလွယ်ပါတယ်။

6. Kalaw City View စားသောက်ဆိုင်

———————————–

Kalaw City view လို့ခေါ်တဲ့စားသောက်ဆိုင်လေးက Sunset ကြည့်လို့လှတဲ့ နေရာလေးပါ။ Tree House လိုမျိုးလေးတွေ ဆောက်ထားပြီး ဓာတ်ပုံရိုက်စရာေနေရာလေးတွေလည်း ရှိပါတယ်။ ကလောမြို့ သုမောင်ထမင်းဆိုင်ဘေး သိမ်တောင်ပေါ် တက်တဲ့လမ်းကနေ သွားလို့ရပါတယ်။

7. နှီးဘုရား

—————————

ကလောရောက်ရင် နှစ်ပေါင်း (၅၀၀) ကျော်သက်တမ်းရှိတဲ့ နှီးဘုရားဝင်ဖူးခဲ့ကြပါဦး။ နှီးနဲ့ယက်လုပ်ထားတဲ့ ဘုရားဆင်းတုကြီးက သပ္ပါယ်လှပါတယ်။ နှီးဘုရားကို ရှမ်းလူမျိုးတွေပဲ ယက်လုပ်တတ်ကြပြီး ဘုရားဆင်းတုယက်လုပ်သူ အယောက်တိုင်းဟာ သတ်သတ်လွတ်စားပြီး အဓိဌာန်ဝင်ရပါတယ်တဲ့။

8. နှစ်တစ်ရာ သက်တမ်းရှိ Church ကျောင်း

——————————————————

ကလောမြို့က နှစ်တစ်ရာသက်တမ်းရှိပြီဖြစ်တဲ့ Roman Catholic Church ကျောင်းကြီးကလည်း ဖြူလွလွကျောက်တုန်းတွေစီထားတဲ့ နံရံံအမြင်ကြီးတွေ၊ ရောင်စုံမှန်ကူကွက်တွေနဲ့ အရမ်းလှတာပါပဲ။ ဘုရားကျောင်းဆိုတော့ အသံဆူညံလို့တော့ မရပါဘူးနော်။

9. လိမ္မော်ရောင်သော်ကပန်းရုံ

—————————

ပန်းချစ်သူတွေ ဓာတ်ဖမ်းနေကြနေရာလေး။ ရိုးရိုးနံရံမှာ တွယ်ကပ်နေတဲ့ ပန်းရုံဖြစ်ပေမဲ့ ဓာတ်ပုံရိုက်လို့ သိပ်လှလို့ ကလောရောက်သူတိုင်း လမ်းဘေးကားရပ်ပြီးဆင်းရိုက်လေ့ရှိကြပါတယ်။ Main လမ်းမကြီးပေါ်က Winner Hotel မျက်စောင်းထိုးမှာရှိတာပါ။

10. ရထားလမ်း

——————-

ဘူတာနားက မြို့ထဲ Pinewoods ဟိုတယ်လေးကပ်ရပ်က ရထားလမ်းလေးပါ။ ကြည့်လိုက်ရင် ရိုးရိုးရထားလမ်းလေးလိုပေမဲ့ အပင်တွေပါပါအောင် ရိုက်မယ်ဆိုရင် အပင်တွေ အုပ်အုပ်ဆိုင်းဆိုင်းနဲ့ ရထားလမ်းလေးက ပုံထဲမှာ လှသွားပါတယ်။

11. ကလောမြို့မဈေး

——————–

ကလောရောက်တိုင်း ကလောဈေး ဝင်ဖြစ်တယ်။ အဲဒီက မုန့်ဆိုင်တန်းက ရှမ်းခေါက်ဆွဲ၊ တို့ဖူးနွေး၊ ငါးထမင်းနယ်၊ တို့ဖူးကြော်တို့က သိပ်စားကောင်းလို့ပါ။ ဈေးကလည်း တော်တော်တန်ပါတယ်။ ကလောဈေးထဲ နေကြာစေ့၊ မုန်ညင်းချဉ်နဲ့ ဒေသစာတွေ အပြန်လက်ဆောင်အဖြစ် ဝင်ဝယ်နိုင်ပါတယ်။

12. Kalaw Pine Loft

——————————————

ကလောမှာ အခုနောက်ပိုင်း ဟိုတယ်တွေထက်စာရင် လုံးချင်းအိမ်လေး ငှားပြီးနေကြပါတယ်။ ကိုယ့်အိမ်လေးထဲ အပန်းဖြေနေရသလို ခံစားရလို့ပါ။ Kalaw Pine Loft ကတော့ ခုနောက်ပိုင်း ကလောရောက်တိုင်း နေဖြစ်တဲ့ အိမ်လေးပါ။ ထင်းရှူးတောထဲ မှန်အပြည့်ကာထားတဲ့ A ပုံစံအိမ်လေးက ချစ်စရာလေးပါ။ ထင်းရူးသား ထင်းရူးနံ့နဲ့ ကလောအငွေ့အသက်ကို ကောင်းကောင်းခံစားရတဲ့ အိမ်လေးပါ။

13. Pine Land Oasis Hotel

——————————————

Kalaw Pine Loft အိမ်ရှိတဲ့ Pinewood Villa အိမ်ရာနဲ့ တစ်ဆက်တည်းရှိတဲ့ ဟိုတယ်ဝန်းပါ။ ကလောမြို့မရောက်ခင် အင်းပြင်မှာရှိပြီး တောင်ကုန်းပေါ်ဆိုတော့ရှုခင်းလှပါတယ်။ ထမင်းဝင်စားရင်း ရှုခင်း ကြည့်နိုင်ပါတယ်။

14. Hill Top Villa Resort

—————————

ကလောမြို့ထဲ တောင်ထိပ်ပေါ်မှာရှိလို့ နေရာကောင်းမှာရှိတဲ့ ဟိုတယ်ပါ။ ဟိုတယ်ရဲ့ စားသောက်ဆိုင်ကနေ ကလောမြို့ကို လှမ်းမြင်ရပါတယ်။ View ကောင်းလို့ တစ်ခုခုမှာစားရင်း ရှုခင်းသွားကြည့်လို့ရပါတယ်။

15. Mobile Coffee ဆိုင်

—————————

ကားကော်ဖီဆိုင်လှလှလေးတွေကို ကလောမြို့နဲ့ အနီးတဝိုက်မှာ တွေ့ကြမှာပါ။ ကော်ဖီဝယ်သောက်ရင်း ဓာတ်ပုံရိုက်လို့လှတဲ့ကော်ဖီဆိုင်လေးတွေပါ။

16. မြင်းက

—————————

ကလောမြို့အဝင် မြင်းကမှာ ဆိုင်းဘုတ်နဲ့အတူ မြင်းစီးပြီး အမှတ်တရ ဓာတ်ပုံရိုက်လို့ရပါတယ်။

——————————————-

ကလောမြို့ အနီးတဝိုက် လည်စရာတွေ

——————————————-

1. ပန်းခင်း

—————

ဆောင်းရောက်ရင် ကလောတဝိုက် မျက်စိတစ်ဆုံးမြင်ရတဲ့ ပန်းနှမ်းခင်းတွေ ပေါပါတယ်။ မြင်းမူကုန်းနားမှာလည်း ရှိပါတယ်။ ပန်းခင်းတွေနဲ့ ဓာတ်ပုံရိုက်ရင် ပန်းတွေကို မခူးပါနဲ့။ အပင်တွေကိုလည်း မနင်းမိအောင် သတိထားပါ။ ပန်းပင်တွေ ပျက်စီးရင် စိုက်ခင်းပိုင်ရှင်တွေ ထိခိုက်လို့ပါနော်။

ဒါကတော့ မြင်းမူကုန်းနားမှာ ပန်းခင်းတွေ့လို့ ဆင်းရိုက်ထားတဲ့ပုံတွေပါ။

2. မြင်းမထိ သဘာဝလှိုဏ်ဂူ

——————————————

ကလောရောက်ရင် မြင်းမထိဂူလည်း သွားလို့ရပါတယ်။ နှစ်ဖက်ပွင့်ဂူဆိုတော့ အဝင်ကနေအထွက်ထိ ၁၀၂၈ပေရှိပြီး ၁၅မိနစ်လောက်လျှောက်ရပါတယ်။ လမ်းတလျှောက်မှာ လှူထားတဲ့ ဘုရားတွေအများကြီးပါပဲ။ ဂူထဲမှာလွန်ခဲ့တဲ့နှစ်ပေါင်း ၂၃၀၀ ကျော်က သီရိဓမ္မာသောကမင်းကြီးတည်ခဲ့တဲ့ ဥဏ္ဏလုံမွေရှင်တော် ရှေးဟောင်းစေတီလည်းရှိပါတယ်။ ဂူလေးက ခပ်ကျဉ်းကျဉ်းနဲ့ မျက်နှာကျက်တွေက နိမ့်နိမ့်လေးတွေပါ။ ဒါပေမဲ့ ၂ဖက်ပွင့်ဆိုတော့ လေဝင်လေထွက်ကောင်းပါတယ်။ ဂူတလျှောက်အရုပ်ပုံအမျိုးမျိုးဖြစ်နေတဲ့ ကျောက်တွေလည်း တွေခဲ့ရပါသေးတယ်။

3. ဗျိုက်တောင်

——————–

ကလောကနေ မြင်းမထိဂူသွားတဲ့လမ်းမှာ ကားလမ်းပေါ်ကနေလှမ်းမြင်ရတဲ့ သဲကျောက်တောင်ကြီးက အရမ်းလှတာပါပဲ။ မုံးဝံတောင်လို့ခေါ်ပေမဲ့ ဗျိုက်ကြော်ငြာတဲ့ Calsome ကွေကာကြော်ငြာ အဲ့မှာရိုက်သွားလို့ ဗျိုက်တောင်လို့လည်း သိကြတယ်တဲ့လေ။

ကလောကနေ ဟဲဟိုး၊ ရွာငံ၊ ပင်းတယ၊ တောင်ကြီး၊ အင်းလေး နေ့ချင်းပြန်သွားလည်လို့လည်းရပါတယ်။

——————————–

ကလောမှာ ဘယ်မှာစားမလဲ

——————————–

ဒီဆိုင်တွေကတော့ ကလောမှာ စားဖူးခဲ့တဲ့ဆိုင်တွေပါ။

ရှမ်းခေါက်ဆွဲ၊ တို့ဖူးနွေးစားချင်ရင် ကလောမြို့မဈေးထဲက ဆိုင်တွေမှာ စားပါတယ်။ Main လမ်းမကြီးပေါ်က #ပြည့်ပြည့် ဆိုင်မှာလည်း စားကောင်းပါတယ်။

မြန်မာစာစားချင်ရင် Main လမ်းမကြီးပေါ်က #သုမောင် စားသောက်ဆိုင်မှာ စားပါတယ်။ ကလောရဲ့ နာမည်ကြီးဆိုင်ပါ။

#အောင်ငြိမ်းချမ်းအောင် ဆိုင်မှာလည်း မြန်မာစာ၊ တရုတ်စာ အစုံရလို့ အမြဲစားဖြစ်ပါတယ်။ ဘူတာလမ်းမှာ ရှိပါတယ်။ ဈေးသင့်တင့်ပါတယ်။

ရှမ်းစာ၊ ဒေသစာကို အေးဆေးစားချင်ရင်တော့ #ThiriGayhar Restaurant (or) 7 Sisters Restaurant မှာ စားဖြစ်ပါတယ်။ ပြည်ထောင်စုလမ်းဘေးမှာရှိတဲ့ အဖြူရောင်ကျောက်တုံးအဆင့်ဆင့်နဲ့ အိမ်လှလှလေးပါ။ အရင်နေရာကနေ နေရာအသစ်ပြောင်းဖွင့်ထားတာပါ။

နောက် ကလောရောက်တိုင်း စားဖြစ်တဲ့ ဆိုင်ကတော့ #Everest Nepali Indian Restaurant ပါ။ ချာပါတီ၊ ပူရီ၊ နို့ခဲဟင်းအရမ်းအရသာရှိလို့ အမြဲစားဖြစ်တဲ့ဆိုင်လေးပါ။ မြို့ထဲ အောင်ချမ်းသာလမ်းထဲမှာ ရှိပါတယ်။

#Kalaw Bamboo House မှာလည်း စကောထမင်းဟင်းတွေ စားလို့ကောင်းပါတယ်။ ထမင်းကို အရောင်စုံမှာလို့ရတာ ဒိဆိုင်ရဲ့ ထူးခြားချက်ပါ။ နှီးဘုရားလမ်းမှာရှိတဲ့ ရိုးရာစားသောက်ဆိုင်ပါ။

နှီးဘုရားလမ်းမှာရှိတဲ့ နောက်တစ်ဆိုင်ကတော့ #Cafe_Kalaw ပါ။ ပီဇာ၊ ဘာဂါ၊ Sandwich ဘိုစာကောင်းသလို ရှမ်းစာလည်းရပါတယ်။ ဆိုင်ခွဲသစ်ဖွင့်ထားတဲ့ဆိုင်ဆို ကျယ်ပြီး ရှုခင်းကြည့်လို့လည်း ကောင်းတယ်။

#Maluca Villa Restaurant and Bar ကတော့ ကလောက ဖန်လုံအိမ်လေးနဲ့ဆိုင်လေးပေါ့။ ဆိုင်ထဲဝင်လိုက်တာနဲ့ နိုင်ငံခြားရောက်သွားသလို ဘိုဆန်ဆန် အငွေ့အသက်ခံစား ရမှာပါ။ ဆိုင်ထဲမှာရော ခြံဝန်းထဲမှာပါ ဓာတ်ပုံလှလှလေးတွေ ရိုက်လို့ရတဲ့နေရာလေးတွေ အများကြီးပါပဲ။

Heritage Hotel နားက #Kalaw-ish နဲ့ ရွှေဥမင်လမ်းပေါ်က #Rangoon to Kalaw ဆိုင်လည်း မရောက်ဖူးပေမဲ့ မဆိုးဘူးလို့ ကြားတယ်။

ကလောမှာ ညဘက်ထိုင်ဖို့ ဘားလှလှလေးတွေလည်း ရှိပါသေးတယ်။ Hi Bar ၊ Red House၊ Heritage 21 ၊ 126 Bar၊ Chill Bar တို့ကတော့ ကိုယ်ကြားဖူးတဲ့ ကလောက ဘားတွေပါ။

ဒါကတော့ ကလောမှာ နုမြတ်ရောက်ဖူးခဲ့ပြီး အလွယ်တကူသွားလို့ရတဲ့ နေရာလေးတွေပါ။ တခြားနေရာလှလှလေးတွေ ရှိရင်လည်း ပြောပြဦးနော်။ နောက်တစ်ခါ ကလောရောက်ရင် ဝင်လည်လို့ရအောင်ပေါ့။

ချစ်ခင်လျှက်

Nu Myat

မြစ်ထဲ ဖောင်ပေါ်က ဟိုတယ်လေးကန်ချနာဘူရီ က Jungle Raft

October 18, 2022Posted in Adventure, Asia, ThailandTagged Asia, ThailandLeave a comment

မြစ်ထဲ ဖောင်ပေါ်က ဟိုတယ်လေး
ကန်ချနာဘူရီ က Jungle Raft

ကန်ချနာဘူရီဆိုတာ ဘန်ကောက်ကနေ သုံးနာရီလောက်မောင်းရင် ရောက်တဲ့နေရာလေးပါ။ ကန်ချနာဘူရီက အမျိုးသားဥယျာဉ်တွေ၊ မြစ်တွေ၊ ရေတံခွန်တွေလို သဘာဝအလှတရားအပြင် သေမင်းတမာန်ရထားလမ်းကြောင့်လည်း နာမည်ကြီးပါတယ်။
ကန်ချနာဘူရီမှာ မြစ်တွေ၊ ဆည်တွေမှာ ဆောက်ထားတဲ့ ရေပေါ်ဟိုတယ်တွေက နာမည်ကြီးပါတယ်။ နုမြတ် ကန်ချာနာဘူရီ ရောက်ခဲ့တုန်းကလည်း ရေပေါ်ဟိုတယ်တွေမှာ တည်းဖြစ်ခဲ့ပါတယ်။ အဲဒီထဲကမှ နာမည်အကြီးဆုံးဖြစ်တဲ့ Jungle Raft လေးက ထူးခြားလို့ အဲဒီဟိုတယ်အကြောင်းပြောပြချင်ပါတယ်။

တောတွင်း ဖောင်ဟိုတယ် Jungle Raft

Jungle Raft ဆိုတာ မြစ်ထဲ ရေပတ်လည်ဝန်းရံနေတဲ့ ရေပေါ်ဟိုတယ်လေးပါ။ ကွေးမြစ်လည်က ဖောင်တန်းကြီးပေါ်မှာ အခန်းတွေ ဖွဲ့ဆောက်ထားတာပါ။ တကယ့်ကို တိတ်ဆိတ်ငြိမ်သက်ပြီး သဘာဝနဲ့ တစ်သားတည်းကျတဲ့ တောတွင်းနေရာလေးလို့ပြောရပါမယ်။

အဲဒီဟိုတယ်မှာ မီးမရှိ၊ အဲကွန်းမရှိ၊ Wifi မရှိပါဘူး။ အဲဒီလိုမရှိတာကိုက သူ့ရဲ့ Attraction ဖြစ်နေတာပါ။ သဘာဝတရားကို ကောင်းကောင်းခံစား အနားယူနိုင်ဖို့ မထားထားတာပါတဲ့။ အဲဒီလိုမရှိပေမဲ့ တည်းစားရိတ်က ဈေးမနည်းပါဘူး။ ပုံမှန်အခန်းကို တစ်ည USD ၁၀၀ ကျော်ပါတယ်။ ကျသင့်ငွေထဲမှာ အခန်းခအပြင် မနက်စာ၊ နေ့လည်စာ၊ ညစာနဲ့ လှေဆိပ်ကနေ ဟိုတယ်အကြိုအပို့လည်း ပါပါတယ်။

ဟိုတယ်ကိုရောက်ဖို့ စက်လှေနဲ့ သွားရပါတယ်။ မြစ်တစ်လျှောက်မှာ Jungle Rafts လို ရေပေါ်ဟိုတယ်တွေ တန်းစီတွေ့ခဲ့ရပါတယ်။ အခန်းရှေ့မှာ ဧည့်သည်တွေ ရေကူးဝတ်စုံကိုယ်စီနဲ့ အနားယူသူကယူ၊ မြစ်ထဲရေကူးသူကကူးနဲ့ ပျော်စရာကြီးပါ။

အခန်း Facility

ဟိုတယ်အခန်းက သိပ်မကျယ်ပေမဲ့ သပ်သပ်ရပ်ရပ်ရှိပါတယ်။ အခန်းထဲမှာ၂ ယောက်အိပ် ကုတင် တစ်လုံးနဲ့ ၁ ယောက်အိပ် ကုတင်တစ်လုံးထည့်ပေးလို့ ၃ ယောက်ထိတည်းလို့ရပါတယ်။ အခန်းထဲ ရေချိုးခန်း၊ အိမ်သာတွဲရက်ပါပါတယ်။ အိမ်သာက ဘိုထိုင်အိမ်သာဖြစ်ပြီး သန့်ပါတယ်။ ဘေစင်နဲ့ ရေပန်းပါလို့ အဆင်ပြေပါတယ်။ အခန်းထဲမှာ မီးမရှိတော့ ညဘက်မှာ မီးအိမ်လေးတွေပဲ အသုံးပြုရပါတယ်။ မီးမရှိ အဲကွန်းမရှိပေမဲ့ ရေစီးနေလို့လားမသိ။ ခြင်မကိုက်ပါဘူး။ အိပ်ယာမှာလည်း ခြင်ထောင်ထားပေးထားပါတယ်။ လေတဖြူးဖြူးနဲ့ဆိုတော့ အိုက်လည်းမအိုက်ပါဘူး။

ဟိုတယ်မှာ အကြိုက်ဆုံးက ကြိုးပုခက်လေးတွေပါ။ အခန်းရှေ့မှာ ဘုံသုံးကြိုးပုခက်ရှိသလို အခန်းနောက်က ဝရံတာမှာလည်း ကိုယ်ပိုင်ကြိုးပုခက် တပ်ပေးထားပါတယ်။ အခန်းရှေ့ မြစ်ဘေးကွပ်ပျစ်ပေါ်က ပက်လက်ကုလားထိုင်မှာ လှဲအိပ်ရင်းလည်း ရှုခင်းခံစားလို့ရပါတယ်။

မွန်အငွေ့အသက်ပြည့်နေတဲ့ဟိုတယ်

ကန်ချနာဘူရီက မြန်မာနိုင်ငံနဲ့ နီးတော့ ဟိုတယ်ဝန်ထမ်းတွေက မွန်လူမျိုးတွေ များပါတယ်။ ဝန်ထမ်းတိုင်း မွန်ထမီ၊ မွန်ပုဆိုး ဝတ်ထားတာတွေ့ရပါတယ်။ ဟိုတယ်အနားမှာ မွန်ရွာလည်းရှိပြီး သွားလည်လို့ရပါတယ်။

နေ့လည်စာ၊ ညစာစားချိန် အချိန်ကျပြီဆိုရင် တုံးမောင်းခေါက်ပါတယ်။ အဲဒီအချိန်ဆို ဧည့်သည်တွေအကုန် စားသောက်ဆောင်မှာ စုပြီး စားကြရပါတယ်။ ညစာစားပြီးချိန် ဖျော်ဖြေရေးအဆောင်မှာ ညဘက် Activity အဖြစ် မွန်ရိုးရာ၊ မြန်မာရိုးရာအက ကပြပါတယ်။ အကကြည့်ဖို့ဆိုရင် ဝင်ကြေး ဘတ် ၁၆၀ ထပ်ပေးရပါတယ်။

မြစ်ထဲခုန်ဆင်း ရေဆော့

အဲဒီမှာ လူကြိုက်များတဲ့ Activity က အခန်းရှေ့ကနေ မြစ်ထဲခုန်ချပြီး ရေဆော့တာပဲ ဖြစ်ပါတယ်။ ဟိုတယ်ရဲ့ အစွန်းတစ်ဖက်ကနေ မြစ်ထဲခုန်ချပြီး မြစ်ရေစီးကြောင်းအတိုင်းမျှောလိုက်သွားရတာ ပျော်စရာကြီးပါ။ ဟိုတယ်ရဲ့ အခြားတစ်ဖက်အစွန်ဆုံး ပြန်ရောက်မှ လှေဆိပ်က တွဲလောင်းချထားတဲ့ ကြိုးကို လှမ်းဆွဲပြီး လှေကားကနေ ပြန်တက်ရတာပါ။ လှေဆိပ်ကို ပြန်မကပ်နိုင်ဘဲ မြစ်ထဲမျောသွားလည်း မစိုးရိမ်ရပါဘူး။ ဟိုတယ်ဝန်ထမ်းတွေက စက်လှေနဲ့ အမြန်လိုက်ပြီး ဆယ်ပေးပါတယ်။ ကလေးလေးတွေကအစ ရေထဲ တဗွမ်းဗွမ်းခုန်ချပြီး မြစ်ထဲ မျှောနေကြတာ။ ပျော်ဖို့သိပ်ကောင်းပါတယ်။ Life Jacket လည်း အလုံအလောက်ရှိပါတယ်။

တခြား Activity တွေ

တခြား Activity တွေအနေနဲ့ ဖောင်စီးတာ၊ အနီးအနားက ဆင်စခန်းသွားတာ၊ တောတွင်းလမ်းလျှောက်တာ၊ မွန်ရွာသွားလည်တာ၊ သစ်ပင်တစ်ပင်နဲ့ တစ်ပင်သွယ်ထားတဲ့ ကြိုးတန်းလျှောက်တာ၊ Zipline စီးတာတို့လည်း လုပ်လို့ရပါတယ်။

တခြားမြစ်ပေါ်ဟိုတယ်တွေ

ကွေးမြစ်တစ်လျှောက်မှာ Jungle Raft အပြင် အခြားမြစ်ပေါ်ဟိုတယ်တွေ၊ မြစ်ကမ်းစပ် ဟိုတယ်တွေ အများကြီးရှိပါတယ်။ အဲဒီအထဲ နာမည်ကြီး ဟိုတယ်တွေက River Kwai Resotel၊ River Kwai Village Hotel၊ The Float House River Kwai နဲ့ Wangnokkaew Park View တို့ပါ။

ကန်ချနာဘူရီရောက်ဖြစ်ခဲ့ရင် မြစ်ထဲက ရေပေါ်ဟိုတယ်တည်းကြည့်ဖို့ Recommend ပေးချင်ပါတယ်။ အတွေ့အကြုံအသစ်ရပြီး ပျော်ဖို့ကောင်းလို့ပါ။ Jungle Raft က တကယ့်ကို သဘာဝနဲ့ တစ်သားထဲကျနေသလို ခံစားရတဲ့နေရာလေးပါ။ Jungle Raft မှာ အဲကွန်းမရှိ မီးမရှိပေမဲ့ တခြားဟိုတယ်တွေမှာတော့ ရှိလို့ ကိုယ်က အဲဒါတွေ မရှိရင် မနေတတ်ဘူးဆိုရင်တော့ တခြားဟိုတယ်တွေကို ရွေးသင့်ပါတယ်။

With Love,

Nu Myat

ဘူတန်နိုင်ငံရှိ စေတီပုံဆန်းများ

September 27, 2021August 7, 2022Posted in Asia, bhutanTagged Asia, bhutan, culture, TravelLeave a comment

ဘူတန်နိုင်ငံက စေတီတွေက တခြားနိုင်ငံက စေတီတွေလို ပိရမစ်ပုံ၊ အခုံးပုံမဟုတ်ဘဲ လေးထောင့်ပုံစံတွေများပါတယ်။ နုမြတ်အနေနဲ့ လွန်ခဲ့တဲ့ ၂နှစ်က ဘူတန်နိုင်ငံရောက်တုန်းက ဘူတန်စေတီတချို့ကို ဖူးမြော်ခွင့်ရခဲ့ပါတယ်။

စေတီကို အင်္ဂလိပ်လို Stupa လို့ခေါ်ကြပေမဲ့ ဘူတန်က စေတီတွေကိုတော့ Chroten လို့ ခေါ်လေ့ရှိပါတယ်။

ဘူတန်မှာက မကောင်းတဲ့အရာတွေကနေ ကာကွယ်ဖို့မြစ်ဆုံတွေ၊ လမ်းဆုံလမ်းခွတွေ၊ တောင်ကျော်လမ်းတွေ၊ တံတားတွေမှာ စေတီတွေ တည်ထားလေ့ရှိကြပါတယ်။

ဘူတန်ရောက်ရောက်ချင်းနေ့က မြို့တော်သင်ဖူးကနေ ပူနာခါမြို့ဆီ အသွား မြစ်ဆုံတစ်ခုမှာ မတူညီတဲ့ စေတီပုံစံသုံးမျိုးကို တန်းစီပြီး တည်ထားတာကို တွေ့ခဲ့ရပါတယ်။ ဘူတန်မှာက ဒီလိုစေတီ ပုံစံ ၃ မျိုး တွေ့ရလေ့ရှိတယ်တဲ့လေ။ စေတီတွေကို ဘူတန်ပုံစံအပြင် နီပေါပုံစံ၊ တိဘက်ပုံစံပါ တည်ထားလေ့ရှိကြပါတယ်။ ဘူတန်ရောက်တုန်း ဒီစေတီပုံစံအမျိုးမျိုးကို တွေ့မြင်ဖူးမြော်ခဲ့ရပြီး တစ်ခုနဲ့တစ်ခု မတူတာကို သတိထားမိခဲ့ပါတယ်။

#ဘူတန်ပုံစံစေတီက စတုရန်းလို ထောင့်မှန်စတုဂံလို လေးထောင့်ကျောက်တိုင်ပေါ်မှာ အမိုးလိုရှိနေပြီး ထိပ်မှာ အချွန်ရှိနေတတ်ပါတယ်။ တချို့စေတီတွေထိပ်မှာ နေနဲ့လကို ကိုယ်စားပြုတဲ့အနေနဲ့ အလုံးနဲ့အခြမ်းရှိနေတတ်တယ်လို့ သိရပါတယ်။

ဘူတန်စတိုင်စေတီကို မြို့တော် သင်ဖူးကနေ ပူနာခါမြို့ဆီသွားတဲ့လမ်းမှာ ဖြတ်ရတဲ့ တောင်ကျော်လမ်းတစ်နေရာမှာ ဖူးမြော်ခဲ့ရပါတယ်။ Dochular Pass လို့ခေါ်တဲ့ ဘူတန်ရဲ့ နာမည်ကျော်တောင်ကျော်လမ်း အမြင့်ဆုံးနေရာမှာ စေတီပေါင်း ၁၀၈ ဆူတည်ထားတာပါ။ ၂၀၀၃ ခုနှစ်က စစ်ပွဲမှာ ကျဆုံးသွားတဲ့ စစ်သား ၁၀၈ ယောက်အတွက် ရည်စူးပြီး တည်ထားခဲ့တာတဲ့လေ။

#တိဘက်စတိုင်ကလည်း လေးထောင့်ပေါ်မှာ အခုံးပုံရှိပေမဲ့ အပေါ်ကို ကားသွားတဲ့ အခုံးပုံမျိုးပါ။ ဘူတန်နိုင်ငံမြို့တော် သင်ဖူးမြို့ရှိ National Memorial Chroten က တိဘက်ပုံစံဖြစ်ပြီး သင်ဖူးရောက်တုန်း ဖူးမြော်ခဲ့ရပါတယ်။

#နီပေါစတိုင် စေတီကတော့ အခုံးပုံပါပဲ။ ပုထိုးတော်လိုမျိုးလို့ ပြောလို့ရပါတယ်။ လေးဖက်လေးတန်မှာတော့ ဗုဒ္ဓရဲ့ အလုံးစုံသိမြင်နိုင်တဲ့မျက်လုံးပုံ ရွေးဆွဲထားလေ့ရှိပါတယ်။ နီပေါပုံစံစေတီကို ဘူတန်မှာ အဝေးကသာ ဖူးမြော်ခဲ့ရပေမဲ့ နီပေါနိုင်ငံရောက်တုန်းကတော့ နာမည်ကျော် Boudhanath စေတီနဲ့ Swayambhunath စေတီတို့ကို ဖူးမြော်ခဲ့ဖူးပါတယ်။

အခုတလော Facebook Memories မှာ ဘူတန်သွားလည်ခဲ့တဲ့ အမှတ်တရပုံတွေတက်လာသလို..

ဘူတန်ရောက်တုန်း ဒီစေတီပုံစံတစ်ခုနဲ့တစ်ခု မတူတာကို သတိထားမိခဲ့လို့ ဗဟုသုတရအောင် ပြောပြပေးတာပဲဖြစ်ပါတယ်…

အားလုံးစိတ်ချမ်းမြေ့နိုင်ကြပါစေ

နုမြတ်

ခရစ်ယာန်ဘာသာကို ပထမဆုံးကျင့်သုံးခဲ့သည့် အာမေးနီးယား Armenia

May 24, 2021August 7, 2022Posted in armenia, Asia, Heritage, Travel, UncategorizedTagged armenia, Asia, Europe, TravelLeave a comment

ခရစ်ယာန်ဘာသာကို ပထမဆုံးကျင့်သုံးခဲ့သည့် အာမေးနီးယား

Written and Photo by Dr. Nu Myat Theingi Oo

အာမေးနီးယားနိုင်ငံသည် ရှည်လျားသော သမိုင်းကြောင်း၊ လှပသောရှုခင်းများနှင့်ပြည့်စုံသည့် အာရှတိုက်အနောက်မြောက်ပိုင်းရှိ ကုန်းတွင်းပိတ်နိုင်ငံငယ်လေး ဖြစ်သည်။ အနောက်ဘက်တွင် တူရကီ၊ မြောက်ဘက်တွင် ဂျော်ဂျီယာ၊ တောင်ဘက်တွင် အီရန်၊ အရှေ့ဘက်တွင် အဇာဘိုင်ဂျန်၊ အနောက်တောင်ဘက်တွင် အဇာဘိုင်ဂျန်၏ကိုယ်ပိုင်အုပ်ချုပ်ခွင့်ရဒေသ Nakhchivan တို့နှင့် နယ်နိမိတ်ထိစပ်နေပါသည်။

အာမေးနီးယားသည် ကော့ကေးဆပ်တောင်တန်းကြီး၏ တောင်ဘက်တွင်တည်ရှိကာ တောင်ထူထပ်သောနိုင်ငံဖြစ်သည်။ ပျမ်းမျှအမြင့်သည် ပင်လယ်ရေမျက်နှာပြင်အထက် ပေ ၅၉၀၀ ဖြစ်ကာ မြေနိမ့်နိမ့်မရှိပါ။ တောင်ထူထပ်သောနိုင်ငံဖြစ်သည့်အားလျော်စွာ ရှုခင်းအမျိုးမျိုးနှင့် အသေးစား ရာသီဥတုအမျိုးမျိုးကို ဖန်တီးပေးနေသည်။ နိုင်ငံ၏အကျယ်အဝန်းမှာမူ ၁၁၄၈၄ စတုရန်းမိုင်သာ ကျယ်ဝန်းပါသည်။
အာမေးနီးယားသည် လူမျိုးစုတစ်စုတည်းဖြင့်သာ ဖွဲ့စည်းထားသည့် နိုင်ငံအနည်းငယ်အနက် တစ်ခုဖြစ်သည်။ လူဦးရေ၏ ၃% မှလွဲ၍ ကျန်လူဦးရေသည် အာမေးနီးယန်းလူမျိုးများဖြစ်သည်။ အာမေးနီးယားတွင် လူဦးရေပေါင်း ၃ သန်းရှိပြီး လက်ရှိတွင် နိုင်ငံတွင်းနေထိုင်သော အာမေးနီးယန်း လူမျိုးများထက် ပြင်ပသို့သွားရောက်နေထိုင်သူများ ပိုများပါသည်။ ၁၉၁၅ ခုနှစ် အာမေးနီးယား လူမျိုးတုံး သတ်ဖြတ်မှုတွင် အားမေးနီးယားလူမျိုး တစ်သန်းကျော် သေဆုံးခဲ့ပြီးနောက် ပထမကမ္ဘာစစ်အပြီးတွင် လူအများအပြားသည် နိုင်ငံတွင်းမှ ထွက်ပြေးခဲ့ခြင်းဖြစ်သည်။ အာမေးနီးယားလူမျိုးများသည် ချောမောလှပကာ ဆွဲဆောင်မှုရှိကြပြီး ကမ္ဘာကျော် ကာဒစ်ရှန်ညီအစ်မများသည် အာမေနီးယန်းသွေးနှောများဖြစ်ကြသည်။

အာမေးနီးယားသည် နှစ်ထောင်ပေါင်းများစွာ တည်ရှိခဲ့သည့် သက်တမ်းအရင့်ဆုံး ရှေးဟောင်းနိုင်ငံများအနက် တစ်ခုဖြစ်သည်။ အာမေးနီးယားတွင် တွေ့ရှိခဲ့သည့် ကမ္ဘာ့သက်တမ်းအရင့်ဆုံး သားရေဖိနပ်သည် ဘီစီ ၃၅၀၀ ကတည်းက ပြုလုပ်ခဲ့ခြင်းဖြစ်ကြောင်း သိရသည်။ အာမေးနီးယားသည် ခရစ်ယာန်ဘာသာကို ပထမဆုံးကျင့်သုံးခဲ့သောနိုင်ငံဖြစ်ပြီး ယနေ့ထိတိုင် ခရစ်ယာန်နိုင်ငံဖြစ်ဆဲဖြစ်သည်။ အေဒီ ၃၀၁ တွင် အာမေးနီးယား၌ ခရစ်ယာန်ဘာသာကို နိုင်ငံဘာသာအဖြစ် ပထမဆုံးသတ်မှတ်ခဲ့သည်။

ထောင်စုနှစ်များစွာသက်တမ်းရှိ ဘုန်းတော်ကြီးကျောင်းများမှသည် ပြိုလဲနေသော ဘုရားရှိခိုးကျောင်းများအထိ အာမေးနီးယားတွင် ခရစ်ယာန်ဘာသာ ဝတ်ပြုပူဇော်ရာ ကျောင်းပေါင်းများစွာ ရှိပါသည်။ ထို့ကြောင့်လည်း “ဘုရားကျောင်းများရှိရာမြေ” ဟုခေါ်ဆိုခြင်းဖြစ်ပေလိမ့်မည်။ ဘုရားကျောင်းများ အားလုံးသည် ခမ်းနားလှပလှပြီး ထိုဘုရားကျောင်းများအနက် ၉ ရာစုက ဆောက်ထားသည့် Tatev ဘုန်းကြီးကျောင်းမှာ လှပသည့်ရှုမျှော်ခင်းများ ဝန်းရံထားသည့် ရှေးဟောင်းအဆောက်အဦး တစ်ခုဖြစ်သည်။ ထိုဘုန်းကြီးကျောင်းနှင့် Halizor ရွာကို ဆက်သွယ်ထားသည့် ကောင်းကင်ရထားလမ်းသည် ကမ္ဘာ့အရှည်ဆုံး တစ်ဆက်တည်းသွားသော ကောင်းကင်ရထားလုံး အဖြစ် ဂင်းနစ်စံချိန်ချိုးထားပါသည်။

အာမေးနီးယားတွင် ကမ္ဘာ့အမွေအနှစ်နေရာသုံးခုရှိပြီး ယင်းတို့မှာ Geghard ဘုန်းတော်ကြီးကျောင်း၊ Sanahin နှင့် Haghpat ဘုန်းတော်ကြီးကျောင်းများနှင့် ကမ္ဘာ့သက်တမ်းအရှည်ဆုံး ဘုရားကျောင်း တစ်ခုဖြစ်သည့် Echmiadzin ဘုရားကျောင်း တို့ဖြစ်သည်။ အာမေးနီးယား၏ အမျိုးသားသင်္ကေတတစ်ခုဖြစ်ပြီး မြင့်မြတ်သည်ဟု ယူမှတ်ကြသည့် တူရကီနိုင်ငံရှိ အာရာရက်တောင်ရှုခင်းကိုကောင်းစွာ လှမ်းမြင်နိုင်သည့် Khor Virap ဘုန်းတော်ကြီးကျောင်းနှင့် Zvartnots ဘုရားကျောင်း၊ Garni ဘုရားကျောင်းနှင့် Noravnak ဘုန်းတော်ကြီးကျောင်းတို့မှာလည်း ထင်ရှားသည်။ အာမေးနီးယားတွင် ယူနက်စကို ယဉ်ကျေးမှုအမွေအနှစ်အဖြစ် စာရင်းသွင်းခံခဲ့ရသည့် အစားအစာလည်းရှိကာ အာမေးနီးယား ရိုးရာအစားအစာဖြစ်သည့် Lavash ပေါင်မုန့်အပြားဖြစ်ပါသည်။

အာမေးနီးယားတွင် ဆာဗန်အမည်ရှိ ရေကန်ကြီးက နိုင်ငံ၏ ၆ ပုံတစ်ပုံခန့်ကိုနေရာယူထားပါသည်။ စိမ်းပြာကြည်လင်နေသော ရေပြင်၊ ကမ်းခြေကဲ့သို့ဖြစ်နေသော မြစ်ကမ်းတို့ကြောင့် အာမေးနီးယားလို ကုန်းတွင်းပိတ်နိုင်ငံအတွက် ပင်လယ်သဖွယ်ဖြစ်နေကာ အပန်းဖြေသူများနှင့် စည်ကားလျှက်ရှိပါသည်။ တောင်များသည့် အာမေးနီးယားတွင် နှင်းလျှောစီးစခန်းများရှိပြီး နာမည်အကျော်ဆုံးမှာ Tsakhkadzor နှင်းလျှောစီးအပန်းဖြေစခန်းဖြစ်သည်။ Dilijin အမျိုးသားဥယျာဉ်၊ Aragats တောင်၊ Arpi ရေကန်၊ Shaki ရေတံခွန်တို့မှာ အာမေးနီးယားရှိ ထင်ရှားသည့် သဘာဝအလှတရားတချို့ဖြစ်သည်။

အာမေးနီးယား၏မြို့တော်မှာ ယာရာဗန် (Yeravan) မြို့ဖြစ်ကာ ကမ္ဘာ့သက်တမ်းအရှည်ဆုံး မြို့ကြီးများအနက် တစ်မြို့ဖြစ်သည်။ မြို့ထဲ အဆောက်အအုံအတော်များများက ပန်းရောင်သန်းသဖြင့် “ပန်းရောင်မြို့တော်”ဟုလည်း ရည်ညွှန်းကြပါသည်။ ရှေးဟောင်းအဆောက်အအုံများစွာရှိသည့် ဒုတိယအကြီးဆုံးမြို့ Gyumri၊ ရေပူစမ်းများစွာရှိသည့် Spa မြို့ Jermuk၊ အရသာရှိသည့်ဝိုင်များစွာ ထုတ်လုပ်ရာ Areni ရွာ၊ သက်တမ်းနှစ်ပေါင်း ၁၆၀၀ ရှိ အာမေးနီးယားအက္ခရာ အမှတ်တရအဖြစ် ဖန်တီးထားသော အာမေးနီးယားအက္ခရာပုံသဏ္ဏာန်ရုပ်တုများ၊ Amberd ခံတပ်ကြီး၊ ဗြိတိန်နိုင်ငံရှိ Stonehenge ကဲ့သို့ ကျောက်တုံးပေါင်း ၂၂၃ ခုကို စက်ဝိုင်းသဏ္ဏာန်ထောင်ထားသည့် Karahunj Observatory တို့မှာ အာမေးနီးယားရောက် ကမ္ဘာလှည့်ခရီးသည်များ သွားရောက်လည်ပတ်လေ့ရှိသည့်နေရာများဖြစ်ကြသည်။

ဒေါက်တာနုမြတ်သိင်္ဂီဦး

ဝိုင်အစပြုရာ ဂျော်ဂျီယာမှ လည်စရာများ (Attractions of Georgia)

April 27, 2021April 27, 2021Posted in Asia, Europe, Heritage, Natural Wonder, UncategorizedTagged Asia, Europe, georgiaLeave a comment

ဝိုင်အစပြုရာ ဂျော်ဂျီယာမှ လည်စရာများ

အာရှတိုက်နဲ့ ဥရောပတိုက်အကြား ကော့ကေးဆပ်တောင်တန်းတွေပေါ်မှာ တည်ရှိတဲ့ ဂျော်ဂျီယာနိုင်ငံလေးက မြို့တော်ဟောင်းတွေ၊ ယူနက်စကို အသိအမှတ်ပြုထားတဲ့ နေရာတွေ၊ နှင်းဖုံးတဲ့တောင်တန်းတွေ၊ လှပတဲ့ရှုမျှော်ခင်းတွေ၊ အရသာရှိလှတဲ့ဝိုင်တွေကြောင့် ကမ္ဘာလှည့်ခရီးသွားတွေ လာရောက်ရာ နိုင်ငံလေးဖြစ်လို့နေပါတယ်။

ဂျော်ဂျီယာက ကမ္ဘာပေါ်မှာ ရှေးအကျဆုံးဝိုင်ထုတ်လုပ်တဲ့ နိုင်ငံပါ။ လွန်ခဲ့တဲ့ နှစ်ပေါင်း ၁သောင်းလောက်ကစပြီး ဝိုင်ချက်ခဲ့ကြပါတယ်။ မြေအောက်အိုးထဲ သိမ်းထားတဲ့ စပျစ်သီးတွေ မတော်တဆ အချဉ်ဖောက်သွားရာကနေ ဝိုင်အရသာကို စတင်သိရှိခဲ့ကြတာတဲ့လေ။ ဂျော်ဂျီယာဝိုင်ဖောက်နည်းကလည်း သူများထက်ထူးတဲ့ ရှေးကျတဲ့သဘာဝနည်းပါ။ မြေအိုးထဲ စပျစ်သီးအရည်တွေညှစ်ထည့်ကာ အခွံတွေ၊ အရိုးတွေ၊ အစေ့တွေပါထည့်ပြီး မြေအောက်ထဲ ၅လ ၆လလောက်ထည့်မြှုပ်ပြီး အချဉ်ဖောက်တဲ့နည်းပါ။ ထည့်မြှုပ်တဲ့ မြေအိုးပုံကလည်း ဆန်းပါတယ်။ မြေထဲထည့်မြှုပ်ရ အဆင်ပြေအောင် ဘဲဥပုံကို ဖင်နေရာမှာ ချွန်ထားပါတယ်။ အဲ့ဒီလိုဖင်ချွန်းမြေအိုးဝိုင်းကို သူတို့ဘာသာစကားနဲ့ Kvevri လို့ ခေါ်ပါသတဲ့။ ဒီလို Kvevri လို့ခေါ်တဲ့ ရိုးရာဝိုင်ဖောက်နည်းက ယူနက်စကိုက အသိအမှတ်ပြုရတဲ့အထိ ရှေးကျပါတယ် ။ ဝိုင်ပေါတဲ့နိုင်ငံဖြစ်တဲ့အလျှောက် ဝိုင်ခြံတွေကို သွားလေ့လာလို့ရပြီး ဝိုင်အလကားအမြည်းတိုက်တဲ့ဆိုင်တွေ အများကြီးကိုလည်း စာရေးသူတို့ဂျော်ဂျီယာနိုင်ငံ သွားလည်ခဲ့တုန်းက တွေ့ခဲ့ရပါတယ်။

ဂျော်ဂျီယာနိုင်ငံရဲ့မြို့တော်ကတော့ တီဘလီဆီ(Tiblisi)ဖြစ်ပြီး ဂျော်ဂျီယာဘာသာစကားနဲ့ဆိုရင် နွေးထွေးတဲ့မြို့လို့ အဓိပါယ်ရပါတယ်။ မြို့သူမြို့သားတွေက ပြုံးရွှင်ပြီး တကယ်လည်း နွေးထွေးကြပါတယ်။ မြစ်ကမ်းဘေးမှာရှိပြီး တောင်တွေဝန်းရံနေတဲ့ တီဘလီဆီမြို့က သိပ်လှပါတယ်။ ဥရောပ၊ အာရှနဲ့ အရှေ့အလယ်ပိုင်းဒေသတွေရဲ့ ဟန်ပန်ယဉ်ကျေးမှုတွေ ရောနှောနေတဲ့မြို့လေးပါ။ မြို့ဟောင်းဘက်က လမ်းတွေထဲ လျှောက်ကြည့်ရင် အရောင်အသွေးစုံတဲ့ အိမ်လေးတွေ၊ ရိုးရာအစားအစာတွေရောင်းတဲ့ စားသောက်ဆိုင်တွေအပြင် ရှေးခေတ် ဘုရင်တွေ ရေချိုးတဲ့ ရှေးဟောင်းအမိုးခုံး ရေပူစမ်း ရေချိုးဆောင်တွေပါ တွေ့ရမှာပါ။ မြို့လည်က တောင်ပေါ်ကို ကောင်းကင်ရထား Cable Car နဲ့တက်ကြည့်ရင်တော့ တောင်ပေါ်ကနေ မြို့ဟောင်းရော မြို့သစ်ရောရှုခင်း လှမ်းမြင်ရမှာပါ။

သဘာဝအလှတွေခံစားချင်ရင်တော့ မြို့တော်ရဲ့မြောက်ဘက်ကို သုံးနာရီပိုင်းလောက်မောင်းရတဲ့ Kazbegi တောင်ပေါ်မြို့လေးဆီကို သွားသင့်ပါတယ်။ အနားက Gergiti Trinity ဘုရားကျောင်းလေးက တောင်အထပ်ထပ်ကြားက တောင်ပေါ်မှာတည်ရှိပြီး ရှုခင်းသိပ်လှလို့ ကမ္ဘာကျော်ပါတယ်။ လမ်းမှာ Gudauri နှင်းလျှောစီးစခန်းမြို့လည်းရှိပြီး လမ်းတလျှောက်မြင်ရတဲ့ ရှုခင်းတွေကလည်း သိပ်သာယာပါတယ်။ ဂျော်ဂျီယာမှာ ရေခဲတောင်တွေရှိသလို ကမ်းခြေလည်းရှိပါသေးတယ်။ ကမ်းခြေတွေထဲမှာ ပင်လယ်နက်ကမ်းရိုးတန်းမှာရှိတဲ့ Batumi ကမ်းခြေက သွားလည်ဖို့အကောင်းဆုံးပါ။ သဘာဝအလှတွေပြည့်နေတဲ့ ဂျော်ဂျီယာမှာ ကမ္ဘာ့အနက်ဆုံးဂူလည်းရှိပြီး Veryovkina ဂူလို့ခေါ်ပါတယ်။ အနက်ပေပေါင်း ၇၂၅၇ ပေရှိတာကြောင့် ဂူအောက်ခြေထိရောက်ဖို့ဆိုရင် ၂၇ရက်လောက်ကြာပါတယ်။

ဂျော်ဂျီယာမှာ လှပတဲ့ရှုခင်းတွေ၊ ဂူတွေအပြင် အလယ်ပိုင်းခေတ်က ဘုရားကျောင်းတွေနဲ့ ယူနက်စကိုက အသိအမှတ်ပြုထားတဲ့ ကမ္ဘာ့အမွေအနှစ်နေရာတွေလည်း ရှိပါတယ်။ Bagrati နဲ့ Gelati ဘုရားကျောင်းတွေရှိတဲ့ ရှေးဟောင်းမြို့တော် Mtskheta က ဘာသာရေးမြို့တော်အဖြစ်လည်း ကျော်ကြားပါတယ်။ အဲ့ဒီမြို့မှာရှိပြီး မြစ်နှစ်စင်းဆုံရာကို တောင်ပေါ်ကနေလှမ်းမြင်ရတဲ့ Jvari Monastery က ယူနက်စကိုကအသိအမှတ်ပြုထားတဲ့နေရာပါ။ Aragvi မြစ်ကမ်းဘေးက Anauri ရှေးဟောင်းရဲတိုက်ကြီးကတော့ ၁၃ရာစုကတည်းက ဆောက်လုပ်ခဲ့တာဆိုတော့ အတော်ကို ရှေးကျတဲ့ သမိုင်းဝင်အဆောက်အအုံကြီးပါ။

ကျောက်ဂူမြို့တော်Uplistsikhe ကလည်း လွန်ခဲ့တဲ့ နှစ်ပေါင်း ၃၀၀၀ ခန့်က ကျောက်ဂူတွေ ဥမင်လှိုဏ်ခေါင်းတွေထဲ လူပေါင်း နှစ်သောင်းကျော် နေထိုင်ခဲ့ကြတဲ့နေရာဖြစ်လို့ စိတ်ဝင်စားဖို့ကောင်းပါတယ်။ အနီအနားက ဂိုရီမြို့လေးကတော့ ဆိုဗီယက်ခေါင်းဆောင်ကြီး စတာလင်ရဲ့ ဇာတိမြို့လေးအဖြစ် ကျော်ကြားပြီး စတာလင်ပြတိုက်နဲ့ စတာလင်မွေးရာအိမ်လေးဆီကိုပါ သွားလေ့လာနိုင်ပါတယ်။

ဒီနေရာတွေကတော့ ဂျော်ဂျီယာနိုင်ငံရောက်ခဲ့စဉ်က စာရေးသူတို့ သွားရောက်လည်ပတ်ဖြစ်ခဲ့တဲ့နေရာတွေနဲ့ စိတ်ဝင်စားစရာ နေရာတွေပါ။ တောလမ်းလျှောက်၊ တောင်တက်၊ နှင်းလျှောစီး၊ မြင်းစီးတို့လို သဘာဝနဲ့ဆက်စပ်နေတဲ့ ခရီးစဉ်တွေကနေ ရဲတိုက်ကြီးတွေ ရှေးဟောင်းဘုရားကျောင်းကြီးတွေ သွားလည်ရတဲ့ခရီးစဉ်တွေအထိ ဂျော်ဂျီယာက ခရီးသည်တိုင်းကို ကျေနပ်စေမှာပါ။

ပျော်ရွှင်ခြင်းနိုင်ငံ ဘူတန်ရဲ့ ထူးခြားချက် (၁၂)ချက် (12 Interesting Facts about Bhutan)

November 16, 2019August 7, 2022Posted in Adventure, Animals, Asia, bhutan, Heritage, Leisure, UncategorizedTagged adventure, Asia, Experience, Travel2 Comments

ပျော်ရွှင်ခြင်းနိုင်ငံ ဘူတန်ရဲ့ ထူးခြားချက် (၁၂)ချက်

ဘူတန်တဲ့…. ဘူတန်ဆိုတာကြားတာနဲ့တင် အေးချမ်းလှတဲ့ နိုင်ငံလေးကို မြင်ယောင်ကြမှာပါ။ ဒဏ္ဏာရီလာနိုင်ငံလေးတစ်ခုလို ဖြစ်နေတဲ့ နိုင်ငံလေးက တကယ်ဆို ပေါ်လာတာ နှစ်၁၀၀ ပဲ ရှိသေးတာတဲ့လေ။ ဘူတန်မှာ ရှုခင်းတွေက သာယာလှပသလို လူတွေကလည်း ပျော်ရွှင်ငြိမ်းချမ်းနေပုံပေါက်ကြပါတယ်။ ဗုဒ္ဓဘာသာကို ယုံကြည်ကိုးကွယ်ကြပြီး ဗုဒ္ဓရဲ့ အဆုံးအမကို နာခံကြတာကြောင့်ပါ။ ဒါကြောင့်လည်း ပျော်ရွှင်ခြင်းနိုင်ငံလို့ တင်စားခေါ်ဝေါ်ကြတာပေါ့။

ကမ္ဘာ့ဆင်းရအခက်ဆုံးလေဆိပ်၊ ကမ္ဘာမှာ လူမတက်ရသေးတဲ့အမြင့်ဆုံးတောင်၊ ကမ္ဘာ့တစ်ခုတည်းသော မီးပွိုင့်မရှိတဲ့နိုင်ငံ စတဲ့ ကမ္ဘာ့စံချိန်ချိုးထားတဲ့ နိုင်ငံတစ်ခုလည်းဖြစ်တယ်တဲ့လေ။ ချောမောလှပငယ်ရွယ်တဲ့ ပညာတတ်ဘုရင်နဲ့မိဖုရားတို့ရဲ့ အချစ်ဇာတ်လမ်း၊ ရိုးရာဝတ်စုံတွေဝတ်ပြီး ရိုးရာအိမ်လေးတွေမှာနေထိုင်ကြတဲ့ နိုင်ငံသူနိုင်ငံသားတွေစတဲ့ ဘူတန်နိုင်ငံရဲ့ ထူးခြားပြီး စိတ်ဝင်စားဖို့ကောင်းတဲ့ အချက်တွေရယ်…. သွားလည်သင့်တဲ့နေရာတွေရယ်ကို တင်ပေးလိုက်ပါတယ်နော်။

စက်တင်ဘာလတုန်းက Mighty Travels နဲ့ သွားခဲ့တဲ့ ဘူတန်ခရီး Review အတိုချုံးပြီးတင်မယ်စိတ်ကူးပေမဲ့ ဘူတန်နိုင်ငံက တအားစိတ်ဝင်စားဖို့ကောင်းလို့ သေသေချာချာလေးရေးလိုက်တာ နည်းနည်းတော့ ရှည်သွားတယ်။ စိတ်ဝင်စားရင် ဖတ်ကြည့်ကြပါနော်။

(1) ပျော်ရွှင်ခြင်းနိုင်ငံ
————————–

ဘူတန်ကို ပျော်ရွှင်ခြင်းနိုင်ငံလို့ တင်စားခေါ်ဝေါ်ကြတာဟာ ဘူတန်က တခြားနိုင်ငံတွေလို လူတစ်ယောက်ချင်းစီရဲ့ ဝင်ငွေပေါ်မတိုင်းတာဘဲ ပျော်ရွှင်မှုကိုသာတိုင်းတာတဲ့ နိုင်ငံလေးမို့လို့ပါ။ Gross National Happiness (GNH) ကို တိုင်းတဲ့ နိုင်ငံဖြစ်လို့ ဘူတန်မှာတွေ့ရတဲ့ လူအတော်များများ အေးချမ်းပျော်ရွှင်နေကြတာကို တွေ့ရပါတယ်။ ဒါဟာ ချမ်းသာကြွယ်ဝနေလို့မဟုတ်ပေမဲ့ ရောင့်ရဲတင်းတိမ်တတ်တဲ့စိတ်၊ ရိုးရှင်းစွာနေထိုင်တတ်တဲ့စိတ်တွေကြောင့် စိတ်ချမ်းသာ ပျော်ရွှင်ကြရတာပါ။

(2) မိုးကြိုးနဂါးနိုင်ငံ
————————–

ဘူတန်ရဲ့ အဓိပ္ပါယ်က Land of Thunder Dragon မိုးကြိုးနဂါးတိုင်းပြည် ပါ။ ဘူတန်မှာ မိုးခြိမ်းရင် ကြောက်စရာကောင်းတော့ မိုးခြိမ်းတာက နဂါးတို့ရဲ့ အရိပ်အရောင်လို့ ယူဆကြပြီး ဒီလို နာမည်ပေးခဲ့ကြပါတယ်။ ဒါကြောင့် ဘူတန်ရဲ့ အလံမှာ သာသနာ့အရောင်ဖြစ်တဲ့ အဝါနဲ့လိမ္မော်တြိဂံ ၂ခုဆက်ထားတဲ့အပေါ် နဂါးရုပ်ကြီးထပ်ထားတာပါ။

(3) Tourism ကန့်သတ်ထားတဲ့နိုင်ငံ
—————————————-

ဘူတန်ကိုသွားလည်ချင်ရင် တခြားနိုင်ငံတွေလို Budget Trip သွားလို့မရပါဘူး။ ဘာကြောင့်လဲဆိုတော့ အစိုးရက Tourist တွေအနေနဲ့ တစ်ရက်ကို US$ 250 (မြန်မာငွေ ၄သိန်းနီးပါး) အနည်းဆုံးသုံးဖို့ ကန့်သတ်ထားလို့ပါ။ အဲ့ထဲမှာ 3 star အဆင့်ရှိတဲ့ ဟိုတယ်၊ အစားအသောက်၊ အကြိုအပို့၊ ဝင်ကြေး အကုန်ပါပါတယ်။ ဒီလိုဈေးတင်ထားရတာဟာ နိုင်ငံထဲကို အပြင်လူတွေအများကြီးဝင်လာရင် ယဉ်ကျေးမှုအမွေအနှစ်တွေ၊ သဘာဝပတ်ဝန်းကျင်တွေ ပျက်စီးမှာစိုးတာကြောင့်ပါတဲ့။ Idea လေးမဆိုးဘူးနော်။ အဲ့လိုလေး ချေထားလို့လည်း နိုင်ငံကို ပိုစိတ်ဝင်စားလာကြတာပါ။

(4) ဘုရင်အုပ်ချုပ်တဲ့နိုင်ငံ
—————————-

ဘူတန်အကြောင်းပြောရရင် ဘူတန် ဘုရင်မိသားစုအကြောင်းချန်ထားလို့မရပါဘူး။ လက်ရှိဘုရင်နဲ့ မိဖုရားရယ်၊ သားတော်လေးရယ်က ချောမွေ့လှပလွန်းလို့ ကမ္ဘာကျော်နေတာပါ။ ဘုရင်ကြီးရဲ့အသက်က ၃၈နှစ်ပဲရှိသေးပြီး မိဖုရားလေးက ဘုရင်ကြီးနဲ့ အသက်(၁၀)နှစ်ကွာပါတယ်။ ၂ယောက်လုံးက ကမ္ဘာကျော်တက္ကသိုလ်တွေက ဘွဲ့ရပညာတတ်တွေတဲ့လေ။ သားတော်လေးဆို အသက် ၃နှစ်ကျော်ကျော်လေးပဲရှိတယ်။ အရမ်းချစ်ဖို့ကောင်းတာပဲ။

ဘူတန်နိုင်ငံ က ဘုရင်တွေ အုပ်ချုပ်တဲ့ ဒဏ္ဏာရီလာနိုင်ငံလေးလို ဖြစ်နေပေမဲ့ သက်တမ်းက ပြောရမယ်ဆိုရင် နှစ် ၁၀၀ ပဲရှိသေးတာပါ။ တိဘက်နဲ့ အိန္ဒိယက ပြည်နယ်စုတွေပေါင်းစည်းပြီး Kingdom of Bhutan ဆိုပြီး ၁၉၀၇ခုနှစ်ကမှ စတင်တည်ထောင်ခဲ့တာပါတဲ့။ ဘုရင်မင်းဆက်ဆိုလည်း အခုမှ ၅ဆက်မြောက်ပဲ ရှိပါသေးတယ်။ ၂၀၀၈ခုနှစ်က နန်းတက်ခဲ့တဲ့ ၅ဆက်မြောက်ဘုရင်နာမည်က ဂျေမီ ခေဆာ နမ်ကျယ် ဝမ်ချူး တဲ့။ ဝမ်ချူမိသားစုကဆင်းသက်လာတော့ အတိုကောက်အနေနဲ့ ဂျေမီဝမ်ချူးကို မှတ်ထားလို့ရတယ်။ ဂျေမီဝမ်ချူးဆိုတာ ဘုရင်တိုင်းမှာရှိတဲ့ နာမည်ပေါ့။ ခလယ်ကနာမည်တွေပဲ ပြောင်းသွားတာပါ။

(5) ရိုးရာအဆောက်အအုံတွေပဲ ဆောက်ခွင့်ရှိတဲ့နိုင်ငံ
———————————————————-

ဘူတန်မှာထူးခြားတာက အဆောက်အအုံတွေပါ။ ရိုးရာ အဆောက်အအုံတွေနေရာတိုင်းမှာတွေ့ရတယ်။ လေဆိပ်က အစ ရိုးရာအငွေ့အသက်လွှမ်းခြုံနေတယ်။ ဘူတန်မှာ အထပ်မြင့်ဆောက်ခွင့်မရှိဘူး။ အမြင့်ဆုံးမှ ၆ထပ်အထိပဲရှိတာ။ အဆောက်အအုံတွေကိုလည်း ရိုးရာစတိုင်နဲ့ပဲဆောက်ခွင့်ရှိတယ်တဲ့။ International Company တွေ ဟိုတယ်တွေကအစ ထူးခြားပြီး ဆောက်လို့မရဘူးတဲ့လေ။
နောက်သတိထားမိတာတစ်ခုက အိမ်ခေါင်မိုးတွေပေါ် ကျောက်ခဲတွေခင်းထားတာကိုပါ။ ဘူတန်မှာက တောင်ကြားကိုဖြတ်တိုက်လာတဲ့လေက အရမ်းပြင်းလို့ ခင်းထားရတာပါတဲ့လေ။

(6) ရိုးရာဝတ်စုံဝတ်ကြတဲ့ နိုင်ငံ
———————————-

ဘူတန်မှာသတိထားမိတာ လူအတော်များများ ရိုးရာဝတ်စုံဝတ်ကြတယ်။ အစိုးရဝန်ထမ်းတွေရယ်၊ ခရီးသွားလုပ်ငန်းလုပ်နေတဲ့သူတွေရယ်၊ ကျောင်းသားကျောင်းသူတွေရယ်အနေနဲ့ ရိုးရာဝတ်စုံကို မဝတ်မနေရလို့ သတ်မှတ်ထားကြတယ်။ဘူတန်ရိုးရာဝတ်စုံတွေမှာ ယောကျာ်းဝတ်ကို Gho ဂိုလို့ခေါ်တယ်။ ဂါဝန်လိုလို၊ ကုတ်အရှည်လိုလိုအပေါ်ဝတ်ကို အောက်ကဘောင်းဘီရှည်မဝတ်ဘဲ ခြေအိတ်အရှည်ရယ် ရှူးဖိနပ်ရယ်နဲ့တွဲဝတ်ရတာပါ။

မိန်းမဝတ်ကိုတော့ Kira ကီရာလို့ခေါ်ပါတယ်။ ရှမ်းဝတ်စုံနဲ့ဆင်ပြီး ပိုးလို ဖဲလိုခပ်ပြောင်ပြောင်အစနဲ့ အပေါ်ဝတ်အင်္ကျီလက်ရှည်ကို အောက်က ထမီလိုရိုးရာအစနဲ့တွဲဝတ်တာပါ။ ထမီနဲ့ဆင်ပေမဲ့ ဝတ်ပုံဝတ်နည်းမတူပါဘူး။ အနောက်ကနေပြန်ပတ်ပြီး ကပ်ခွာတွေရော ချိတ်တွေရောသုံးပြီးဝတ်ရပါတယ်။ ဝတ်စုံတွေကလည်း ဈေးအမျိုးမျိုးရှိတယ်။ ထမီအဆင်တွေက လက်နဲ့ယက်ကြတာဆိုတော့ ဈေးကြီးကြတယ်။ တစ်စုံကို တစ်သိန်းဝန်းကျင်လောက်ရှိတယ်။ တစ်ထည်ကို ၂၃သိန်းတန်ထမီတောင်တွေ့ခဲ့ရပါတယ်။

oznor

cof

ptr

Mighty Travels က ဧည့်သည်တွေကို ရိုးရာဝတ်စုံတွေ တစ်စုံဆီ လက်ဆောင်ပေးတာဆိုတော့ သင်ဖူးပွဲတော်သွားတက်တဲ့အခါ ကိုယ်တွေက ရိုးရာဝတ်စုံကို ဝတ်ပြီး ပွဲတက်ခဲ့ကြတယ်။ ဒါပေမဲ့ ရိုးရာဝတ်စုံဝတ်မယ်ဆိုရင် ဖြစ်ကတတ်ဆန်းပေးမဝတ်ပါဘူး။ ဝတ်စုံပြည့်ဝတ်မှ ရမှာတဲ့။ ဥပမာ- မိန်းကလေးတွေဆို အပေါ်ကရိုးရာပုဝါတင်ပြီး ဝတ်ရတယ်။ ယောကျာ်းလေးတွေဆိုလည်း ခြေအိတ်ရှည်နဲ့ဝတ်ရတယ်။ ဝတ်စုံပြည့်မဝတ်ရင် မလေးစားရာကြတယ်ဆိုလို့ လိုအပ်တဲ့ Accessories တွေထပ်ဝယ်ခဲ့ပြီး ဝတ်စုံပြည့်ပွဲတက်ခဲ့ကြပါတယ်။

LRM_EXPORT_109875346775419_20180921_155422351

(7) ဘာသာရေးလိုက်စားတဲ့ နိုင်ငံ
————————————-

ဘူတန်က ဘာသာရေးကို လေးလေးနက်နက်ယုံကြည်ကြပါတယ်။ မဟာယာန ဗုဒ္ဓဘာသာကိုးကွယ်တဲ့ နိုင်ငံဖြစ်ပြီး တချို့ကျေးရွာတွေမှာ နတ်ကိုးကွယ်တာလည်းတွေ့ခဲ့ရပါတယ်။ သာသနာပိုင်းမှာ ခေါင်းဆောင်ဆရာတော်က ဘုရင့်လောက်နီးနီး သြဇာရှိပါတယ်။ ဗုဒ္ဓဘာသာကိုယုံကြည်သက်ဝင်တဲ့နိုင်ငံ ဖြစ်တဲ့အလျောက် Criminal Case လည်း အရမ်းနည်းပါတယ်။

ဘူတန်စေတီက လေးထောင့်ပုံစံ စေတီပါ။ စေတီကို ချော်တန် လို့ခေါ်ပါတယ်။ အောက်ဆုံးလေးထောင့်ပုံက မြေကြီးဓာတ်ဖြစ်ပြီး အပေါ်မှာ ရေဓာတ်၊ မီးဓာတ်၊ လေဓာတ် အဆင့်ဆင့်တင်ထားတာပါ။ အောက်ဆုံးလေးထောင့်က လောကစောင့်နတ်ကြီးလေးပါးကို ကိုယ်စားပြုပါတယ်။ အပေါ်က စေတီအဝိုင်း လေးခုက ပွင့်ပြီးသားဘုရားလေးဆူကို ကိုယ်စားပြုပြီး ၁ခုပဲဆို နောင်ပွင့်မယ့်ဘုရားကို ကိုယ်စားပြုပါတယ်။ ဘုရားစေတီတွေကိုပတ်မယ်ဆိုရင် လက်ယာရစ် ပတ်လေ့ရှိကြပါတယ်။

Prayer Wheel လို့ခေါ်တဲ့ လက်နဲ့လှည့်ရတဲ့ ခေါင်းလောင်းတွေရယ်၊ Prayer Flag လို့ခေါ်တဲ့ မကောင်းဆိုးဝါးတွေကိုနှင်တဲ့ ဂါထာမဌာန်တွေရေးထားတဲ့ အလံအဖြူ or အလံရောင်စုံတွေရယ်ကိုလည်း နေရာအတော်များများမှာတွေ့ရလေ့ရှိပါတယ်။

rpt

LRM_EXPORT_2777422045927_20180925_184924072

dav

(8) သက်ရှိတွေ ကာကွယ်တဲ့ နိုင်ငံ
————————————–

ဘူတန်မှာ အပင်ရော၊ တိရစ္တာန်ရော လွတ်လပ်စွာရှင်သန်ခွင့်ရှိတယ်။ အပင်တွေကို သက်ရှိလို့ သတ်မှတ်တဲ့အတွက် ဘူတန်ရောက်ရင် ပန်းတွေလှလို့မခူးပါနဲ့။ အာပတ်သင့်ပါလိမ့်မယ်။

ဘူတန်မှာ အကောင်တွေသတ်တာကိုလည်း ပြင်းပြင်းထန်ထန်တားမြစ်ပါတယ်။ ရှားပါးတိရစ္ဆာန်ဖြစ်တဲ့ ဘူတန်မှာပဲ တွေ့ရတဲ့ လည်တံမည်းကြိုးကြာငှက်ကို သတ်ရင် ထောင်ဒဏ်တစ်သက်တစ်ကျွန်းကျတဲ့အထိ အပစ်ကြီးပါတယ်။ အဲ့ငှက်တွေ ကျက်စားလေ့ရှိတဲ့နေရာမှာဆို အစားအသောက်ကောင်းအောင် ရေမြေထိန်းသိမ်းပေးထားတာတဲ့။ ငှက်တွေထိခိုက်မှာဆိုးလို့ အဲ့နေရာတဝိုက် ဓာတ်ကြိုးတွေတောင် သွယ်ခွင့်မရှိဘဲ မြေအောက်ကနေသွယ်ရတယ်တဲ့လေ။

(9) ကမ္ဘာပေါ်မှာလူမတက်ရသေးတဲ့ အမြင့်ဆုံးတောင်ရှိတဲ့ နိုင်ငံ
———————————————————————–

Buhtan အမြင့်ဆုံးတောင်ထိပ် Gangkhar Puensum က ကမ္ဘာပေါ်မှာ ၄၀ခုမြောက်အမြင့်ဆုံးတောင်ပါတဲ့။ ဒါပေမဲ့ ကမ္ဘာပေါ်မှာလူမတက်ရသေးတဲ့တောင်ထိပ်မှာ အမြင့်ဆုံးပါပဲ။ ဘာကြောင့်လည်းဆိုတော့ ဘူတန်တွေက အယူသည်းပြီး တောင်ပေါ်ပေးမတက်တာကြောင့်ပါ။ လူတွေတောင်ထိပ်ပေါ်တက်ရင် ရာသီဥတုပျက်မယ်၊ စိုက်ပျိုးရေးမဖြစ်ထွန်းဘဲ အစာရေစာခေါင်းပါးမယ်ဆိုပြီး အယူရှိလို့ပေးမတက်တာပါတဲ့။

(10) ကမ္ဘာ့ဆင်းရအခက်ဆုံးလေဆိပ်ရှိတဲ့ နိုင်ငံ
—————————————————-

ဘူတန်ကိုသွားချင်ရင် တိုက်ရိုက်သွားလို့ မရပါဘူး။ ဘန်ကောက်ကတဆင့် Butan Airlineနဲ့ သွားရပါတယ်။ ဘန်ကောက်ကနေ ဘူတန်အသွားလေယာဉ်မှာ ဘယ်ဘက်ထိုင်ခုံရအောင်တောင်းပါ။ ရာသီဥတုသာယာရင် လမ်းမှာ ကမ္ဘာ့အမြင့်ဆုံး ဧဝရက်တောင်ကို လေယာဉ်ပေါ်က လှမ်းမြင်ရပါလိမ့်မယ်။ ဘူတန်ရဲ့ တစ်ခုတည်းသော အပြည်ပြည်ဆိုင်ရာလေဆိပ် Paro Airport က ကမ္ဘာ့ဆင်းရအခက်ဆုံးလေဆိပ်တွေထဲက တစ်ခုပါ။ တောင်တွေကို ဖြတ်ပြီး တောင်ကြားထဲက လေဆိပ်ကို ဆင်းရတာ ပညာသားပါပါတယ်။ Well Trained Pilot တွေသာဆင်းနိုင်တာပါ။ ဒါကြောင့်လည်း လေဆိပ်ကို ချောချောမွေ့မွေ့ဆိုက်ရောက်တဲ့အခါ လေယာဉ်စီးခရီးသည်တွေ လက်ခုပ်တီး ဂုဏ်ပြူကြတာကို တွေ့ခဲ့ရတာပါ။

(11) မီးပွိုင့်မရှိတဲ့ နိုင်ငံ
————————–

ကမ္ဘာပေါ်မှာ မီးပွိုင့်မရှိတဲ့ နိုင်ငံကိုပြပါဆို ဘူတန်ကိုပဲပြရမှာပါ။ ဘူတန်မြို့တော် သင်ဖူးက ကမ္ဘာပေါ်မီးပွိုင့်မရှိတဲ့ မြို့တော်၂ခုထဲကတစ်မြို့ပါ။ နောက်တစ်မြို့ကတော့ မြောက်ကိုရီးယားမြို့တော် ပြုံးယမ်းပါတဲ့။ သင်ဖူးမြို့မှာ မီးပွိုင့်မရှိတော့ ကားအရမ်းရှုပ်တဲ့ လမ်းဆုံလမ်းခွတစ်ခုမှာတော့ ယဉ်ထိန်းရဲတစ်ယောက်ကို တာဝန်ချထားရပါတယ်တဲ့လေ။

(12) TV နဲ့ Internet နောက်အကျဆုံးသုံးတဲ့ နိုင်ငံ
——————————————————-

ဘူတန်မှာအရင်တုန်းက TVနဲ့ အင်တာနက်တွေကို ပိတ်ပင်တားမြစ်ထားပြီး လွန်ခဲ့တဲ့ ၁၉နှစ်ကျော် ၁၉၉၉ခုနှစ်မှာမှ TV တွေ Internet တွေ အသုံးပြုခွင့်ပေးလိုက်တာတဲ့လေ။

————————–
Quick Facts
————————–

• အိမ်နီးချင်းနိုင်ငံ – တရုတ်နဲ့ အိန္ဒိယ
• လူဦးရေ – ၇သိန်းကျော်
• မြို့တော် – သင်ဖူး
• ငွေကြေး – Nu နူ လို့ခေါ်ပါတယ်။ ၁ နူကိုမြန်မာငွေ ၂၂ကျပ်ကျပါတယ်။
• ရာသီဥတု – နွေဦး၊ နွေ၊ ဆောင်းဦး၊ ဆောင်း ဆိုပြီး ၄မျိုးရှိပါတယ်။ ကိုယ်တွေရောက်ခဲ့တဲ့ Spetember လကတော့ နွေအကုန် ဆောင်းဦးအကူး ကာလမို့လို့ အရမ်းမပူဘဲနေလို့ကောင်းပါတယ်။
• National Flower – တောင်ဇလပ်မျိုးနွယ်ဖြစ်ပြီး မေလလောက်ပွင့်လေ့ရှိပါတယ်။ Blue Poppy လို့ခေါ်တဲ့ ဘိန်းပန်းကိုလည်း National Flower အဖြစ်သတ်မှတ်ထားကြပါတယ်။
• National Animal – သားမင်းလို့ခေါ်တဲ့ နွားကိုယ်ဆိတ်ခေါင်းရှိပြီး ဒဏ္ဏာရီနဲ့ ဆက်စပ်တဲ့အကောင်ပါ။ အဲ့လိုအကောင်က ကမ္ဘာပေါ်မှာ ၄နိုင်ငံပဲရှိတာတဲ့။ မြန်မာ၊ နီပေါ၊ တရုတ်၊ ဘူတန်မှာပဲ တွေ့ရတာတဲ့လေ။
• National Bird – တောကျီးကန်းပါ။ ဘုရင်တွေဆောင်းတဲ့ ဥသျှောင်ထိပ်မှာတွေ့ရတဲ့ အကောင်ပါ။
• National Tree – Cyprus အပင်

အုပ်ချုပ်ရေး
————————–
အုပ်ချုပ်ရေးကတော့ Democracy & Constitutional Monarchy စနစ်နဲ့အုပ်ချုပ်ပါတယ်။ သူတို့ဆီမှာလွှတ်တော်ရှိပေမဲ့ ဘုရင်ကိုချစ်ကြောက်ရိုသေလို့ ဘုရင်ရဲ့ ဆုံးဖြတ်ချက်ကို အတည်ယူပါတယ်။

ကာကွယ်ရေး
————————–
ကာကွယ်ရေးပိုင်းအနေနဲ့ စစ်တပ်က ကိုယ်ပိုင်စစ်တပ်ရှိပေမဲ့ အိန္ဒိယကစစ်တပ်ကို အဓိကအားထားပါတယ်။ ကာကွယ်ရေးသာမက စီးပွားရေးမိတ်ဖက်အနေနဲ့ India ကို တည့်အောင်ပေါင်းထားပါတယ်။ အိန္ဒိယကို Hydro Power ရေအားလျှပ်စစ်ပြန်ရောင်းပေးပါတယ်။ တိဘက်ကို တရုတ်ကသိမ်းပြီးနောက် တရုတ်ကိုကြောက်သွားတာကြောင့် India နဲ့ မဟာမိတ်ဖွဲ့ထားတာပါတဲ့လေ။

စီးပွားရေး
————————–
နိုင်ငံရဲ့ အဓိကစီးပွားရေးက Tourism ပါ။ ရေစီးသန်တဲ့မြစ်တွေရှိလို့ ရေအားလျှပ်စစ်ရောင်းပြီးလည်း ဝင်ငွေရပါတယ်။ နိုင်ငံရဲ့ 60%က တောယာတွေမို့လို့ စိုက်ပျိုးရေးလည်း ဖြစ်ထွန်းပါတယ်။

ရိုးရာအစားအစာ
————————–
ကိုယ်တွေလိုမျိုး ထမင်းနဲ့ဟင်းစားပါတယ်။ သူတို့အစားအစာတွေက တရုတ်စာတွေနဲ့ဆင်ပေမဲ့ အသားအစားနည်းပါတယ်။ နိုင်ငံထဲမှာ အသားသတ်လို့မရတော့ အသားကို India နဲ့ Nepal ကနေ တင်သွင်းလေ့ရှိကြတယ်တဲ့လေ။ ဟင်းသီးဟင်းရွက်က ရေခံမြေခံကောင်းတော့အရမ်း လတ်ဆတ်ပါတယ်။ ချိစ်လည်း အစားများတယ်။ Yakလို့ခေါ်တဲ့ တိဘက်နွားနို့ကနေရတဲ့ ချိစ်ကို စားကြတယ်။

nfd

oznor

ptr

အကြိုက်ဆုံးကတော့ ဟီမာတာချီ လို့ခေါ်တဲ့ ငရုတ်သီး-ချိစ်ချက်ပါ။ ငရုတ်သီး ငပိချက်ဟုတ်ဘူး။ ချိစ်ချက်။ ငရုတ်သီးအတောင့်အစိမ်းကို ခွဲပြီး ချိစ်နဲ့ရောချက်စားတာ အီအီစပ်စပ်လေးနဲ့ကောင်းမှကောင်း။
ဘူတန်မှာ ကွမ်းလည်း စားကြတယ်။ ကွမ်းကိုဆေးတွေမထည့်ဘဲ ကွမ်းရွက်နဲ့ ကွမ်းသီးပဲစားကြတာပါ။ ဘူနန်ကွမ်းကို Dolma လို့ခေါ်ပါတယ်။

ဘာသာစကား
————————–
Dzongkha လို့ခေါ်တဲ့ ဘာသာစကားသုံးလေ့ရှိပြီး တခါတလေ နီပေါစကားပြောတတ်ကြပါတယ်။ အတော်များများက English လိုလည်း ပြောတတ်ကြတာကို တွေ့ခဲ့ရပါတယ်။ အသုံးဝင်မယ့် စကားစုတွေကတော့
• မင်္ဂလာပါ – ဂူဇူဇမ်ဘိုလာ
• ကျေးဇူးတင်ပါတယ် – ကတ်သရင်းချေလာ
• နှုတ်ဆက်တဲ့အခါ – ကံကောင်းပါစေ – တာချီတလဲ

————————–
ဘယ်တွေလည်မလဲ
————————–

ဘူတန်က ဟိမဝန္တာတောင်ကြောတွေပေါ်တည်ထားတဲ့ နိုင်ငံဆိုတော့ မြို့လေးတွေကလည်း အေးချမ်းလှပါတယ်။ တောင်ကြားထဲ စီးဆင်းနေတဲ့ မြစ်တလျှောက် လမ်းဖောက်ထားတဲ့ ကားလမ်းအတိုင်း တစ်မြို့နဲ့ တစ်မြို့ကို ကားနဲ့သွားရပါတယ်။ ကားမူးတတ်တဲ့သူတွေဆိုရင်တော့ Novomin တို့လို အမူးအမော်ပျောက်ဆေးတွေ ဆောင်ထားသင့်ပါတယ်။
မြို့တွေမှာတော့ ဖူးမြော်စရာ စေတီတွေ၊ ဘုရားကျောင်းတွေ၊ ဗိမာန်တော်တွေရှိကြတယ်။ ဘူတန်ကို အဓိကသွားတာကတော့ ရှုမြော်ခင်းတွေနဲ့ သူတို့ရဲ့ Unique Culture ကြောင့်ပါ။ ဘူတန်ရောက်ခဲ့တဲ့ ၄ရက်အတွင်း မြို့၃မြို့ရောက်ခဲ့တယ်။ အဲ့ဒီ ၃မြို့နဲ့ လည်ပတ်စရာနေရာတွေကတော့….

ပါရိုမြို့
————————–

ဘူတန်မှာ အပြည်ပြည်ဆိုင်ရာလေဆိပ်ရှိတဲ့တစ်ခုတည်းသောမြို့ပါ။ ဘူတန်ကိုလာချင်ရင် ဒီမြို့ကိုအရင်ဆုံးရောက်ပါလိမ့်မယ်။ ဘူတန်ရဲ့ အထင်ကရ Tiger Nest ကျားသိုက်ကျောင်းတော်ကြီးရှိတဲ့ မြို့ဆိုလည်း မမှားပါဘူး။ Tiger Nest က ကျောက်တောင်ကြီးရဲ့ ကမ်းပါးမှာ ၁၆ရာစုခန့်ကတည်ဆောက်ခဲ့တဲ့ ဘုန်းကြီးကျောင်းပါ။ ဘုန်းကြီးကျောင်းရောက်ဖို့ တောင်တက်လမ်းအတိုင်း ၄-၅နာရီလောက်ကြာ အတက်အဆင်းလုပ်ရတာဆိုတော့ ခြေထောက်မကောင်းတဲ့ လူကြီးတွေအနေနဲ့တော့ သွားဖို့ မသင့်တော်ပါဘူး။ မသွားနိုင်ရင် အဲ့ဒီအစားမြို့ထဲက အထင်ကရနေရာတွေကို လိုက်ပို့ပေးပါတယ်။ မြင်းနဲ့လမ်းရဲ့ ၃ပုံတစ်ပုံလောက်တော့တက်လို့ရပေမဲ့ ကျန်တာက လမ်းလျှောက်တက်ရပါတယ်။ မြင်းနဲ့ဆင်းလို့လည်းမရပါဘူး အတက်ပဲရတာပါ။

LRM_EXPORT_189274295957054_20180923_095332099

LRM_EXPORT_189089910806040_20180923_095027713

LRM_EXPORT_200332712953804_20180923_130357063

သင်ဖူးမြို့
————————–

သင်ဖူးကတော့ လက်ရှိမြို့တော်ဖြစ်ပြီး နွေရာသီမြို့တော်လို့လည်းခေါ်ကြပါတယ်။ ရာသီဥတုက အေးစိမ့်စိမ့်လေးရှိတာကြောင့်ပါ။ သင်ဖူးမှာ ဘူတန်ဘုရင်နန်းတော်နဲ့ သင်ဖူးဗိမာန်တော်၊ အောက်မေ့ဖွယ်စေတီ၊ Changnakha ဘုန်းတော်ကြီးကျောင်း၊ အကြီးဆုံး ထိုင်တော်မူကြေးသွန်းဘုရား၊ သားမင်းတွေမွေးမြူထားတဲ့ ဥယျာဉ်တွေဆီ သွားရောက်လေ့လာနိုင်ပါတယ်။

dav

rhdr

cof

cof

ဘူတန်မှာပွဲတော်တွေကို နိုင်ငံအနှံ့ လစဉ်ကျင်းပတာ သင်ဖူးမြို့တော်မှာ ကျင်းပတဲ့ သင်ဖူပွဲတော်ကတော့ အကြီးကျယ်အခမ်းနားဆုံးပေါ့။ မြို့တော်မှာကျင်းပတဲ့ပွဲဆိုတော့ တချို့နှစ်တွေမှာ ဘုရင်ကိုယ်တိုင်ကြွလာပြီး အားပေးလို့ ကံကောင်းရင် ဘုရင်ကိုတောင် တွေ့နိုင်ပါတယ်။

ကိုယ်တွေသွားတဲ့အချိန်နဲ့ ကြုံလို့ သင်ဖူးပွဲတော်တက်ရောက်ခဲ့သေးတယ်။ တကယ့်ကို ဒဏ္ဏာရီထဲ ရောက်သွားသလိုပါပဲ။ မြို့နေလူတွေရော အနီးအနားရွာကလူတွေပါ ပွဲတော်ကို ရိုးရာဝတ်စုံကိုယ်စီနဲ့ ဝတ်ကောင်းစားလှတွေ ဝတ်ပြီး လာတက်ကြတာ ဘူတန်အကယ်ဒမီပေးပွဲရောက်နေသလိုပဲ။ မြင်မြင်သမျှလှနေကြတာ။ ပွဲတော်မှာ တစ်နေကုန် အကအလှတွေနဲ့ ဖျော်ဖြေတော့ ပွဲတော်လာတဲ့ ပရိသတ်တွေလည်း ဝင်လာမစဲ တသဲသဲရယ်ပေါ့။ ဘူတန်သွားမယ်ဆိုရင် ပွဲတော်ရက်နဲ့ တိုက်သွားဖို့ အကြံပေးချင်ပါတယ်။ တကယ့်ကို ဆန်းသစ်တဲ့ အတွေ့အကြုံကို ခံစားရမှာပါ။

ပူနားခါး
————————–

ပူနားခါးမြို့ကတော့ ၁၉၅၅ခုနှစ်အထိ မြို့တော်ဖြစ်ခဲ့တဲ့ မြို့လေးဖြစ်ပြီး အခုချိန်မှာတော့ ဆောင်းရာသီမြို့တော်လို့ တင်စားထားပါတယ်။ ဘာကြောင့်လဲဆိုတော့ ဆောင်းရာသီတခြားနေရာမှာအေးနေတဲ့အခါ ဒီမှာနွေးနေတတ်တာကြောင့်ပါ။

rhdr

cof

cof

ဖိုချူးနဲ့ မိုချူး အဖေမြစ်နဲ့ အမေမြစ်ဆုံရာ နေရာမှာ ရှိတဲ့ ပူနားခါးက ဂျုံ (Dzhong)လို့ခေါ်တဲ့ ကျက်သရေဆောင်ဗိမာန်တော်ကြီးကတော့ လှလွန်းလို့ ပို့စကတ်တွေမှာ ခဏခဏမြင်ရတဲ့ အဆောက်အအုံပါ။ ဘုရင်မင်းဆက် အဆက်ဆက်က Cronation နန်းတက်ပွဲ၊ လက်ထပ်ထိမ်းမြားပွဲတွေကျင်းပရာနေရာဖြစ်သလို သာသနာ့ နာယကကျောင်းထိုင်ရာ ကျောင်းလည်းဖြစ်ပါတယ်။ အုပ်ချုပ်ရေးပိုင်းဆိုင်ရာအဆောက်အအုံ၊ ခံတပ်၊ နန်းတော်အနေနဲ့ အသုံးပြုခဲ့ကြတဲ့နေရာပါ။ သူတို့လူမျိုးတွေအနေနဲ့ ဂျုံထဲဝင်ရောက်တဲ့အခါ အရိုအသေပေးတဲ့အနေနဲ့ ရိုးရာဝတ်စုံပေါ် အဖြူရောင်ပုဝါကိုပတ်ပြီးဝင်ကြတာကိုတွေ့ခဲ့ရပါတယ်။

သားဆုပန်နတ်ကွန်း
————————–

ပူနားခါးမြို့နားမှာ သားသမီးရအောင် ဆုပန်တဲ့ နတ်ကွန်းတစ်ခုရှိတယ်။ အဲ့နတ်ကွန်းရှိတဲ့ ရွာလေးကလည်း အရမ်းထူးဆန်းတာပဲ။ ရိုးရာအိမ်တွေရဲ့ နံရံတွေမှာ အမျိုးသားလိင်အင်္ဂါပုံကို ကာတွန်းပုံ၊ ပန်းချီပုံ အရောင်စုံဆွဲပြီး အလှဆင်ထားကြတာ။ သားသမီးရဖို့ အဆောင်အယောင်လို့ သဘောထားပြီး အလှဆင်ထားတာတဲ့။ ပုံတူရုပ်တု လေးတွေတောင် Size စုံ၊ အရောင်စုံ ရောင်းလို့ အမှတ်တရ ဝယ်သွားလို့ရတယ်နော့။

Dochular Pass
————————–

ပါရိုကနေ ပူနားခါး အသွားလမ်းမှာရှိတဲ့ တောင်ပေါ်မှာတည်ထားတဲ့ ဘူတန်ရိုးရာ လေးထောင့် စေတီ ၁၀၈ဆူပါ။ တတိယဘုရင်က ဆေးလိပ်အရမ်းသောက်လို့ အဆုတ်ကင်ဆာရောဂါဝေဒနာခံစားရတဲ့အခါမှာ ဘုရင်ကြီးကျန်းမာရေးအတွက်ရည်စူးပြီး စေတီတွေတည်ထားခဲ့ကြတာပါ။ ဘုရင်ကြီးဆုံးပြီးနောက် သားတော် စတုတ္ထဘုရင်လက်ထက်မှာ ဆေးလိပ်ကို စိတ်နာလို့ ဆေးလိပ်နဲ့ ပတ်သက်ပြီး ပိတ်ပင်တားမြစ်ခဲ့ကြတယ်တဲ့လေ။ ဒီတောင်ပေါ်ဘုရားနားက စားသောက်ဆိုင်က ရှုခင်းတွေလှသလို စားလို့လည်း သိပ်ကောင်းပါတယ်။ ရာသီဥတုသာယာတဲ့အခါ ဒီတောင်ပေါ်ကနေ ဘူတန်ရဲ့ အမြင့်ဆုံးတောင်ထိပ်အပါအဝင် နှင်းတွေဖုံးနေတဲ့ တခြားတောင်ထိပ်တွေကိုပါ လှမ်းမြင်ရပါတယ်။

ဒါကတော့ စက်တင်ဘာလတုန်းက သွားရောက်ခဲ့တဲ့ ဘူတန်ခရီးစဉ်မှာတွေ့ခဲ့ ကြုံခဲ့ရတာလေးတွေရယ်၊ စိတ်ဝင်စားဖို့ကောင်းတာလေးတွေရယ်ကို ပြန်ပြောပြထားတာပါ။ ပုံလေးတွေမှာလည်း ရှင်းပြထားလို့ ဝင်ကြည့်ကြပါနော်။ နုမြတ်တို့ မိသားစုကတော့ ဒီတစ်ခေါက်ဘူတန်ခရီးကို ဘူတန်ခရီးစဉ်တွေ စီစဉ်လေ့ရှိတဲ့ Mighty Days နဲ့သွားခဲ့တာပါ။ နောက်ထပ်လည်း ခရီးစဉ်တွေ ထွက်ဖို့ရှိတော့ စိတ်ဝင်စားရင် Mighty Days မှာ စုံစမ်းနိုင်ပါတယ်နော်။

သီတင်းကျွတ်အခါသမယမှာ ပျော်ရွှင်ကြည်နူးချမ်းမြေ့ကြပါစေ
ချစ်ခင်လျှက်
မနုမြတ်
Nu Myat around the World

လာအိုကို ဘန်ကောက်ကနေ ညရထားနဲ့သွားမယ် (Bangkok to Laos by Train)

August 20, 2019April 20, 2021Posted in Adventure, Asia, Travel, UncategorizedTagged adventure, Asia, food, laos, Nature, TravelLeave a comment

လာအိုကို ဘန်ကောက်ကနေ
ညရထားနဲ့သွားမယ်

ကိုယ်တွေရဲ့ အိမ်နီးချင်းနိုင်ငံလေး လာအိုဟာ နီးရက်နဲ့ဝေးနေတဲ့ နိုင်ငံလေးပါ။ သူ့ဆီ မြန်မာနိုင်ငံကနေ တိုက်ရိုက်လေကြောင်းလိုင်းမရှိတော့ လွယ်လွယ်ကူကူသွားလို့မရဘူးဖြစ်နေတာပေါ့။ လာအိုကိုသွားချင်ရင် တခြားနိုင်ငံကနေတဆင့်သွားမှ ရမှာပါ။ များသောအားဖြင့် ထိုင်းကနေ တဆင့်သွားကြပါတယ်။

ထိုင်းကနေ လာအိုဆီ လေယာဉ်နဲ့သွားနိုင်သလို ရထားရယ်၊ ကားရယ်နဲ့လည်းသွားလို့ရပါတယ်။ ကျွန်မတို့ကတော့ ထိုင်းနိုင်ငံ ဘန်ကောက်ကနေ ညအိပ်ရထားစီးပြီး လာအိုနိုင်ငံကိုသွားခဲ့တာပါ။ ဘန်ကောက်ရောက်တုန်း လာအိုဘက်ပါ သွားလည်မယ်ဆိုပြီး လာအိုမြို့တော်ဗီယန်ကျင်းမြို့နဲ့ Adventure တွေအများကြီးလုပ်လို့ရတဲ့ သဘာဝမြို့လေး ဗန်ဗီယန်းမြို့ကို သွားလည်ခဲ့တာပါ။

ညရထားအမျိုးအစားနဲ့ ဈေးနှုန်း

ဘန်ကောက်ကနေ လာအိုကို ရထားနဲ့သွားမယ်ဆိုရင် ထိုင်း-လာအိုနယ်စပ်မြို့ဖြစ်တဲ့ နွန်းခိုင်မြို့(Nong Khai) ကနေတဆင့် သွားမှရမှာပါ။ Bangkok – Nong Khai ရထားလက်မှတ်ကို ဘန်ကောက်မြို့ထဲက Hua Lumpong ဘူတာကြီးမှာ သွားဝယ်ရပါတယ်။ နုမြတ်တို့ကတော့ အဲ့တုန်းက Baiyoke Sky မှာတည်းတော့ ဟိုတယ်ဘေးက Travel Agent မှာ ဝယ်ခဲ့ပါတယ်။

နွန်းခိုင်သွားတဲ့ ရထားတွေထဲမှာ ညအိပ်စင်ပါတဲ့ ညရထား၂မျိုးရှိပါတယ်။ ည ၈နာရီထွက်တဲ့ Special Express အမျိုးအစား Number 25 က ပိုကောင်းပြီး ပိုသန့်ပါတယ်။ အဲ့ရထားလက်မှတ် မရှိတော့လို့ ည၈း၄၅ ထွက်တဲ့ Rapid အမျိုးအစား Number 133 ကိုပဲ စီးခဲ့ရပါတယ်။

ည၈နာရီထွက်တဲ့ ရထားမှာ ၂ယောက်သီးသန့် အိပ်ခန်း 1st Class ရှိပြီး အပေါ်ခုံ ၁၁၅၇ဘတ် (၄၆၀၀၀ကျပ်) အောက်ခုံ ၁၃၅၇ဘတ် (၅၄၀၀၀ကျပ်) ကျသင့်ပါတယ်။ 2nd class ကတော့ အိပ်စင်ပါတဲ့ ဘုံအခန်းဖြစ်ပြီး အပေါ်ခုံ ၇၄၈ဘတ်(၃၀၀၀၀ကျပ်) အောက်ခုံ ၈၃၈ဘတ် (၃၃၅၀၀ ကျပ်)ပါ။ အဲကွန်းပါပါတယ်။

ည၈း၄၅ထွက်တဲ့ရထားမှာတော့ အဲကွန်းပါတဲ့ 2nd Class အိပ်စင်ဘုံခန်းက အပေါ်ခုံဆို ၆၁၈ဘတ်(၂၅၀၀၀ကျပ်) နဲ့ အောက်ခုံဆို ၆၈၈ (၂၇၅၀၀ကျပ်) ဘတ်ပါ။ အဲကွန်းမပါတဲ့ ထိုင်ခုံတွဲတွေလည်းရှိပါတယ်။ 2nd Class ဆို ၃၄၈ဘတ် (၁၄၀၀၀ကျပ်) နဲ့ 3rd Class ဆို ၂၁၃ ဘတ် (၈၅၀၀ကျပ်) ပဲကျမှာပါ။

နုမြတ်တို့ သွားခဲ့တာက ၃ယောက်ဆိုတော့ 2nd Classမှာ အောက်၂ခုံ ပေါ်တစ်ခုံ ယူလိုက်ပါတယ်။ ၁ဘတ်ကို ၄၀ကျပ်နဲ့ တွက်မယ်ဆိုရင်တော့ အပေါ်ခုံက ၂၅၀၀၀ ကျပ်နဲ့ အောက်ခုံက ၂၇၅၀၀ ကျပ်ဝန်းကျင်လောက်ကျသင့်မှာပါ။

ရထားစီးအတွေ့အကြုံ

Hua Lumpong ဘူတာကြီးဆီကို မြို့ထဲ Pratunam ဝန်းကျင်ကနေသွားမယ်ဆိုရင် ၁၀မိနစ်လောက်ပဲကြာပါတယ်။ ၁နာရီကျော်လောက် ကြိုအရောက်သွားပြီး ကိုယ့်ရထားတွဲကို သေချာရှာပြီး ခုံတွေမှာနေရာချရပါမယ်။ ရထားပေါ်တက်တက်ချင်း ရိုးရိုးထိုင်ခုံတွေလိုပါပဲ။ ရထားမောင်းပြီး ခဏအကြာမှာမှ အိပ်ယာလာပြင်ပေးပါတယ်။ အိပ်စင်က အပေါ်နဲ့ အောက် ၂ဆင့်လိုဖြစ်ပြီး အပေါ်တက်ဖို့ လှေကားလေးတွေလည်းရှိပါတယ်။သဘောကျတာလေးတစ်ခုက ပြတင်းပေါက်ဘေးတင်မဟုတ် လျှောက်လမ်းဘေးမှာပါ လိုက်ကာလေးတွေ ကာပေးထားတော့ ကိုယ်အိပ်တဲ့အခါမှာ Privacy ရှိတာကိုပါ။

ရထားက ည၈နာရီရထားလောက်တော့ မသန့်ပါဘူး။ ဒါပေမဲ့ အဲကွန်းခန်းနဲ့ဆိုတော့ သူ့ဟာနဲ့ သူတော့ အဆင်ပြေပါတယ်။ Luggage တွေပါလာရင်လည်း ကိုယ့်အိပ်စင်နားမှာ ထားလို့ရတယ်။ ဖုန်းအားသွင်းဖို့ အပေါက်လည်းပါပါတယ်။ အိမ်သာကတော့ ဘုံအိမ်သာပေါ့။ ရေချိုးခန်းမပါပေမဲ့ ဘေစင်တော့ပါတယ်။ ရထားက အရမ်းမလှုပ်တော့ အိပ်ရတာအဆင်ပြေပါတယ်။

ရထားပေါ်မှာ ကိုယ်တွေဆီမှာလိုပဲ မနက်စောစောမှာ ဈေးသည်တွေတက်ရောင်းပါတယ်။ မနက်မှာလာရောင်းတဲ့ ကြက်ကင်နဲ့ ကောက်ညှင်းကောင်းမှကောင်းပဲ။ ကြက်ကင်အကြီးကြီး တစ်ကောင်လုံးမှ ဘတ်၆၀ပဲပေးရတယ်။ အရမ်းအရသာရှိတာပဲ။ သွားဖြစ်ရင် ဝယ်စားကြည့်နော်။

ထိုင်း-လာအိုနယ်စပ်

မနက် ၈း၃၅မှာ နွမ်းခိုင်မြို့ဘူတာကို ရောက်ပြီး ဘူတာကနေ ထိုင်းနယ်စပ်ဖြတ်ကျော်ဂိတ်ဆီ တုပ်တုပ် ၁၀မိနစ်လောက်စီးသွားရပါတယ်။ ထိုင်း Immigration Gate ကနေ Passport ပြပြီးထွက်ကာ ထိုင်း-လာအို ချစ်ကြည်ရေးတံတားဖြတ်သွားရပါတယ်။ ဒီတံတားဖြတ်ဖို့ ဘတ်စ်ကားတွေရှိပါတယ်။ ၅မိနစ်လောက် မောင်းရပြီး တစ်ယောက်ကို ဘတ်၂၀ ပေးရပါတယ်။ မြစ်တစ်ဖက်ရောက်တဲ့အခါ လာအို Immigration Gate ကိုဖြတ်ပြီး လာအိုကိုသွားနိုင်ပါတယ်။ လာအိုနိုင်ငံတွင်း ဝင်ရောက်ဖို့ Passport ပဲလိုပြီး Visa မလိုပါဘူး။

သတိထားရမှာကတော့ လာအိုကနေ ထိုင်းကိုပြန်ဝင်မယ်ဆိုရင် ကုန်းလမ်းကဝင်ရင် ထိုင်းဗီဇာလိုပါလိမ့်မယ်။ လေကြောင်းနဲ့ဆိုရင်တော့ မလိုပါဘူး။ ဒါကြောင့် လာအိုအသွားကို ကြိုက်သလို သွားလို့ရပေမဲ့ လာအိုကနေအပြန်ကတော့ လေယာဉ်ပျံနဲ့ဲပြန်တာပိုကောင်းမှာပါ။ ကုန်းကြောင်းက ပြန်ရင်လည်း ထိုင်းဂိတ်မှာ Re-entry Visa ပြန်လျှောက်ရင်ရပါတယ်။ ဘတ်၁၀၀၀ (၄၀၀၀၀ကျပ်) လောက်တော့ကျပါလိမ့်မယ်။ ကိုယ်တွေကတော့ အပြန်ကို လေယာဉ်နဲ့ပဲပြန်ခဲ့ပါတယ်။ Bangkok Transit ဖြစ်ပေမဲ့ ထိုင်းထဲမဝင်တော့ဘဲ ရန်ကုန်တိုက်ရိုက် ပြန်ခဲ့ပါတယ်။

လာအိုရောက်ပြီ

လာအိုနိုင်ငံ Immigration ကိုကျော်ပြီးတဲ့အခါမှာတော့ လာအိုနိုင်ငံတွင်းမြို့အသီးသီးဆီသွားလို့ရတဲ့ ကားဂိတ်တွေ တွေ့ရပါတယ်။ အဲ့ဒီကနေ ဗန်ဗီယန်းမြို့ကို ကားဂိတ်ကနေ တန်းသွားခဲ့ကြတာပါ။ နယ်စပ်ဂိတ်ကနေ ဗန်ဗီယန်းမြို့ကို ကားနဲ့ ၄နာရီလောက်ပဲမောင်းရပြီး ကားခ တစ်ယောက်ကို မြန်မာငွေ၈၀၀၀ကျပ်လောက်ပဲ ကျပါတယ်။ မြို့တော် ဗီယန်ကျန်းကိုဆိုရင် နာရီဝက်လောက်ပဲကြာမှာ ဖြစ်ပြီး လောင်ပရာဖန်ကို တန်းသွားမယ်ဆိုရင်တော့ ၈နာရီကြာမှာပါ။ နုမြတ်တို့ကတော့ ဗန်ဗီးယန်း မြို့ကို အရင်သွားခဲ့တယ်။ အပြန် ဗီယန်ကျင်းကနေ လေယာဉ်နဲ့ပြန်မှာဆိုတော့ စိတ်ချရအောင်ပေါ့။

Van Vieng မြို့

ဗန်ဗီယန်းက တကယ်တော့ တောတောင်တွေ ဝန်းရံနေတဲ့ နယ်မြို့သေးသေးလေးပါ။ မြို့ထဲမှာလမ်းဆိုလို့ လမ်းသုံးလမ်းရယ်၊ ဈေးရယ်၊ အဝေးပြေးဂိတ်ရယ်ပဲရှိလို့နေတာပါ။ ထူးခြားတာကတော့ အဲ့ဒီ နယ်မြို့သေးသေးလေးမှာ နိုင်ငံခြားသားတွေ ပြည့်နေတာကိုပါ။ အထူးသဖြင့် အနောက်နိုင်ငံသားတွေနဲ့ ကိုရီးယားတွေ အလာများပါတယ်။ ဧည့်လာများတဲ့မြို့ဖြစ်တော့ ဒေသခံတွေထက်တောင် ဧည့်သည်က ပိုလို့တောင်များနေပါတယ်။ မြို့ထဲဘာမှသိပ်မရှိပေမဲ့ အကောင်းစား ဟိုတယ်ကြီးတွေ၊ Resort တွေ၊ တည်းခိုခန်းတွေ၊ Backpacker တွေအတွက် Hostel အဆောင်တွေ၊ စားသောက်ဆိုင်တွေ၊ ဘားတွေနဲ့ ပြည့်လို့နေပါတယ်။

ဗန်ဗီယန်းကို ဧည့်သည်တွေလာကြတဲ့ အဓိကအချက်ကတော့ တောတောင်မြစ်ချောင်း သဘာဝတရားတွေကြောင့်ပါ။ ဧည့်သည်တွေက မြို့ကို ဖြတ်စီးနေတဲ့ နမ်ဆန်မြစ်ထဲ Kayak လှေလှော်ကြတယ်။ Tubing လို့ခေါ်တဲ့ ဘောကွင်းပေါ်ထိုင်ပြီး ရေစီးကြောင်းအတိုင်း မြောကျတယ်။ ဂူတွေထဲစီးဝင်နေတဲ့ ဂူအောက် မြစ်ထဲ ဘောကွင်းစီးကြတယ်။ ရေပြာအိုင်တွေထဲ ရေစိမ်ကြပြီး ရေပြာအိုင်ပေါ်အုပ်မိုးနေတဲ့ သစ်ပင်ရဲ့ သစ်ကိုင်းတွေပေါ်ကနေ ရေပြာအိုင်ထဲ တဗွမ်းဗွမ်းနဲ့ ခုန်ဆင်းကြတယ်။ ကျောက်တောင်တွေတက်ကြတယ်။ ကျောက်ဂူတွေထဲဝင်ကြတယ်။ စပါးခင်းတွေထဲလမ်းလျှောက်ကြတယ်။ စက်ဘီးလေးတွေ ဆိုက်ကယ်တွေကိုယ်တိုင်မောင်းပြီး ဟိုဒီလျှောက်သွားကြတယ်။ သစ်ပင်တစ်ပင်နဲ့တစ်ပင်ကြား Zipline တွေစီးကြတယ်။ မြစ်ကမ်းစပ်ကတဲလေးတွေမှာ အကင်တွေစားပြီး လေညှင်းခံကြတယ်။ သဘာဝတရားထဲ သဘာဝအတိုင်းပျော်မွေ့နိုင်ကြလို့ လူငယ်တွေ တအားကြိုက်ကြပါတယ်။

ညဘက်ဆိုလည်း မြို့ထဲဘားတွေ၊ ကလပ်တွေမှာ လူစည်လွန်းလို့ လူငယ်တွေပျော်မွေ့ရာ ပါတီမြို့၊ ကျောပိုးအိတ်တစ်လုံးထဲလွယ်ပြီးလျှောက်သွားကြတဲ့ လူငယ်တွေအလာများလို့ Backpacker မြို့၊ စွန့်စွန့်စားစားအရာတွေ လုပ်လို့ရလို့ Adventure မြို့လေး အဖြစ် လူသိများပါတယ်။

ဘာတွေလုပ်ခဲ့လဲ

နုမြတ်တို့ ဗန်ဗီယန်းမြို့လေးကို ညနေလောက်ရောက်တာဆိုတော့ ဟိုတယ်မှာ Check In ဝင်ပြီး အလင်းရောင်ရှိတုန်း မြို့ထဲ ဟိုကြည့်ဒီကြည့်လျှောက်ကြည့်ခဲ့တယ်။ ကိုယ်တွေတည်းတာ Grandview Riverside Hotel ပါ။ နာမည်က အပျံစားဖြစ်ပေမဲ့ မိုတယ်အဆင့်လောက်ပါပဲ။ မြစ်ကမ်းဘေး ၃ယောက်ခန်းကို US$ ၅၀ ကျော်လောက်ပဲကျတယ်ဆိုတော့လည်း သူ့ဈေးနဲ့သူ မဆိုးဘူးပြောရမှာပါ။ ဒါပေမဲ့ ဟိုတယ်ထဲဝင်ရင် ဖိနပ်ချွတ်ဝင်ရတာကတော့ တော်တော်မနိပ်ပါဘူး။ ဟိုတယ် Location ကောင်းလို့ရယ် Website က ပုံလေးတွေက မဆိုးတော့လည်း ရွေးဖြစ်ခဲ့တာပါ။ ဟိုတယ်ကမြစ်ဘေးတင်ဆိုတော့ မြစ်ထဲကရှုခင်းတွေကိုလည်း လှမ်းမြင်ရတာပေါ့။တောတောင်တွေနောက်ခံနဲ့ မြစ်ရှုခင်းကတော်တော်သာယာပါတယ်။ မြစ်ထဲမှာလည်း Speed Boat စီးတဲ့သူတွေ Kayak လှေလှော်သူတွေနဲ့ ပြည့်နေတာ။ မြို့ထဲစနည်းနာပြီး နောက်နေ့အတွက် Tour တွေစုံစမ်းနေတာနဲ့ နေဝင်ချိန်ကိုတောင်မခံစားလိုက်ရဘူး။ ဟိုရောက်ရင်လည်ပတ်ဖို့ စိတ်မပူနဲ့။ ဟိုတယ်ကထွက်လိုက်တာနဲ့ လမ်းဘေးဝဲယာမှာ Tour Agent တွေ တပုံကြီး။ ကြိုက်တဲ့ Activities လုပ်ဖို့ ကြိုက်တာရွေးဝယ်လို့ရတယ်။ နောက်နေ့ နေ့တဝက်နေမှာဆိုတော့ Half Day Tour ဝယ်လိုက်တယ်။ အဲ့ညမှာတော့ မြစ်တစ်ဖက်ကမ်းကို ဝါးတံတားလေးနဲ့ကူးပြီး မြစ်ဘေးက တဲလေးတွေမှာ အကင်စားပြီး အေးဆေးလေညှင်းခံခဲ့ကြတယ်။ တဲတွေမှာ လင်းထိန်နေပြီး သီချင်းတွေအကျယ်ကြီး ဖွင့်ထားတာ ပျော်ဖို့ကောင်းပါတယ်။ မြစ်ကမ်းဘေးမှာတော့ တချို့က မီးပုံးပျံတွေ လွှတ်တဲ့သူကလွှတ်ပေါ့။

နောက်တစ်ရက်မှာတော့ ဟိုတယ်ကို Tour က ကားနဲ့လာခေါ်ပြီး Activities တွေလုပ်မယ့်နေရာကို ပို့ပေးပါတယ်။ စစချင်း Cave Tubing လို့ခေါ်တဲ့ ဂူထဲဘောကွင်းစီးဝင်ခဲ့တယ်။ ဘောကွင်းပေါ်ထိုင်ပြီး ဂူအောက်မြစ်ထဲ ရေစီးအတိုင်းဝင်ရတာ။ မှောင်ထဲမဲထဲဆိုတော့ စိတ်လှုပ်ရှားဖို့တော့ကောင်းတာပေါ့။ ရေဆုံးတဲ့အခါ ဂူထဲ လမ်းလျှောက်ဝင်ရတယ်။ အစအဆုံးစီးရမယ်ထင်ပြီး ဖိနပ်ချွတ်ထားခဲ့မိတော့ ခြေထောက်တွေ အသေစူးပေါ့။အချိန်ရရင် မြစ်ထဲလှေလှော်တဲ့ Kayaking ပါလုပ်မယ့်ဟာကို မလုပ်လိုက်ရဘူး။ Cave Tubing မှာ ခေါင်းမှာတပ်ရမယ့် Headlight ကို သွားယူနေတာကို အကြာကြီးစောင့်နေရလို့ မလုပ်လိုက်ရတာ။

Blue Lagoon လို့နာမည်ကြီးတဲ့ ရေပြာအိုင်ရောက်ဖို့ ကားနဲ့နည်းနည်းသွားရတယ်။ ရေကတော့ တကယ်ပြာပါတယ်။ ပြာလဲ့နေတာ။ အေးလည်းအရမ်းအေးတယ်။ ဒါပေမဲ့ သူက ကားပါကင်ဘေးတင်ရှိတာဆိုတော့ အိုင်ဘေးပတ်လည်ကနေလူတွေထိုင်ပြီး ကြည့်နေကြတာ။ ရေပြာအိုင်ထဲကို သစ်ကိုင်းပေါ်ကနေခုန်ချတာကို အားပေးနေကြတာလေ။ မသိရင် ပွဲကြည့်နေသလိုပဲ။ ခုန်ချပြီးတာနဲ့ လက်ခုပ်တွေဝိုင်းတီးကြတာ။ သစ်ကိုင်းက ၂ဆင့်ရှိတယ်။ အပေါ်တဆင့်က တော်တော်မြင့်တယ်။ ရောက်လက်စနဲ့မထူးဘူးဆိုပြီး အားတင်းပြီး ခုန်ချခဲ့သေးတယ်။

ရေပြာအိုင်ထဲမှာ ဒန်းလိုမျိုးတွေလည်း လုပ်ထားသေးတယ်။ ကန်ဘေးကနေ ကြိုးတွေခုန်ပြီး ခုန်ချတာမျိုးလည်းလုပ်ကြတယ်။ ဒါပေမဲ့ လူအရမ်းရှုပ်လို့ အေးဆေးမနေရပါဘူး။ နောက်ထပ်ရေပြာအိုင်တစ်ခုကတော့ ပိုကြီးတယ်တဲ့။ ဒါပေမဲ့ အချိန်မရှိတော့ ဒီမှာပဲ ရေဆော့ခဲ့ရတယ်။ မြို့ထဲပြန် Lunch စားပြီးတော့ Vientiane ကို ကားနဲ့ဆက်ကူးခဲ့ပါတယ်။ ကားတွေက Hi Ace လိုကားမျိုးတွေမှာ တခြားလူတွေနဲ့ လိုက်စီးရတာပါ။ ကား ၄နာရီလောက်မောင်းရပါတယ်။

ဗီယန်ကျန်းမြို့

မြို့တော် ဗီယန်ကျင်း(Vientianne) ကတော့ ထိုင်းနိုင်ငံနယ်စပ်နားရှိ မဲခေါင်မြစ်ကမ်းမှာရှိပြီး စန္ဒကူးမြို့တော် (သို့) လမြို့တော်လို့အဓိပ္ပါယ်ရပါတယ်။ ၂၀၁၅ခုနှစ် စစ်တမ်းများအရ လူဦးရေ ၇သိန်း၆သောင်းကျော်ပဲရှိတဲ့ မြို့လေးပါ။ ကျွန်မတို့ရဲ့အကြီးဆုံးမြို့ ရန်ကုန်မှာ လူဦးရေ ၇သန်းကျော်ရှိတာဆိုတော့ ရန်ကုန်နဲ့ယှဉ်ရင် ၁၀ပုံ ၁ပုံလောက်ပဲရှိပါတယ်။

သမိုင်းတလျှောက်မှာ ဗီယန်ကျင်းမြို့က တစ်ချိန်က မြို့ပျက်ကြီး ဖြစ်ခဲ့ဖူးပါတယ်။ ၁၇၀၇ ခုနှစ်က လာအိုမင်းနေပြည်တော်ရဲ့ မြို့တော်အဖြစ်စတင်သတ်မှတ်ခံခဲ့ရပေမဲ့ ၁၈၂၇ခုနှစ်မှာ ထိုင်းလူမျိုးတို့ ကျူးကျော်သိမ်းပိုက်ပြီး ဖျက်စီးခဲတာကြောင့် မြို့ပျက်ကြီးဖြစ်သွားခဲ့ရပါတယ်။ ၁၈၉၃ခုနှစ်မှာ လာအိုနိုင်ငံ ပြင်သစ်ကိုလိုနီလက်အောက်ကျရောက်ပြီးနောက် ၁၈၉၉ခုနှစ်ရောက်မှ လာအိုနိုင်ငံရဲ့မြို့တော်အဖြစ် ပြန်လည်သတ်မှတ်ခံခဲ့ရတာပါ။ ပြင်သစ်ကိုလိုနီလက်အောက်ကျရောက်ခဲ့ဖူးလို့ အဆောက်အအုံတချို့က ပြင်သစ်ဗိသုကာလက်ရာတွေဖြစ်နေတာကို တွေ့ခဲ့ရပါတယ်။

သွားလည်ရမယ့်နေရာများ

ဗီယန်ကျင်းမြို့ရောက်ရင် မသွားမဖြစ်နေရာအဖြစ် အကျော်ကြားဆုံးကတော့ မြို့ထဲကနေ ၁နာရီလောက်မောင်းရတဲ့ Buddha Park (ဗုဒ္ဓပန်းခြံ) ပဲဖြစ်ပါတယ်။ ၁၉၅၈ခုနှစ်က လာအိုဘုန်းတော်ကြီးတစ်ပါးဦးဆောင်ပြီး ပန်းခြံထဲမှာ ဘာသာရေးဆိုင်ရာ ရုပ်တုပေါင်း ၂၀၀ကျော် ထုဆစ်ထားရှိခဲ့တာပဲဖြစ်ပါတယ်။ ဟိန္ဒူဘာသာနဲ့ ဗုဒ္ဓဘာသာ ဇာတ်နိပါတ်တော်တွေထဲက နတ်ဘုရားရုပ်တုတွေကို ထုဆစ်ထားရှိရာမှာ ၄၀မီတာအမြင့်ရှိတဲ့ လျောင်းတော်မူဘုရား၊ အဝင်ဝနားရှိ ဖရုံသီးသဏ္ဏာန် ၃ထပ်အဆောက်အအုံ၊ ဦးခေါင်းသုံးလုံးပါ ဆင်နတ်ဘုရား၊ ဦးခေါင်း ၁၂လုံးပါနတ်ဘုရားစတဲ့ ရုပ်တုတွေက ထင်ရှားပါတယ်။

မြို့ထဲရှိ ထင်ရှားတဲ့အဆောက်အအုံတစ်ခုကတော့ Patuxai Victory Monument မော်ကွန်းတိုင်ကြီးပဲဖြစ်ပါတယ်။ ပြင်သစ်နိုင်ငံ ပဲရစ်မြို့ရှိ နာမည်ကျော် Arc de Triomphe မော်ကွန်းတိုင်နဲ့ဆင်ပြီး ဟိန္ဒူနတ်ဘုရားရုပ်တွေနဲ့ ဒီဇိုင်းဆင်ထားတဲ့ လာအိုဗိသုကာလက်ရာတွေကိုပါ တွေ့မြင်နိုင်ပါတယ်။ စစ်ပွဲများမှာ ကျဆုံးခဲ့သူများကို ရည်စူးပြီး ဆောက်လုပ်ထားရှိခဲ့တယ်လို့ သိရပါတယ်။

လာအိုက ဗုဒ္ဓဘာသာကိုးကွယ်တဲ့ နိုင်ငံဖြစ်တဲ့အလျှောက် မြို့တော်ဗီယန်ကျင်းမှာ ဖူးမြော်စရာ ဘုရားစေတီတွေများစွာရှိပါတယ်။ တန်ခိုးအကြီးဆုံး နာမည်အကြီးဆုံးကတော့ That Luang စေတီပါ။ ရွှေရောင်လွှမ်းနေတဲ့စေတီက လာအိုဗိသုကာလက်ရာနဲ့ တည်ထားကိုးကွယ်ခဲ့တာဖြစ်ပြီး လာအိုနိုင်ငံရဲ့ အထင်ကရအဆောက်အအုံအဖြစ်လည်း ထင်ရှားပါတယ်။

အခုလက်ရှိ ထိုင်းနိုင်ငံဘန်ကောက်မြို့ရှိ နာမည်ကျော် မြဘုရားဆင်းတုကို အပူဇော်ခံထားရှိခဲ့ဖူးတဲ့ ကျောင်းတော်ကြီး Wat Ho Phra Keo ကတော့ မြို့ထဲမှာရှိပြီး လှပတဲ့ ရိုးရာဗိသုကာလက်ရာတွေကြောင့် ကျော်ကြားပါတယ်။ မြဘုရားဆင်းတုကို ထိုင်းနိုင်ငံမြောက်ပိုင်းကနေ လာအိုဘုရင်သိမ်းပိုက်ခဲ့စဉ်တုန်းက ထားရှိကိုးကွယ်ခဲ့တာဖြစ်ပြီး နောက်ပိုင်း ထိုင်းစစ်တပ်က ပြန်လည်ပင့်ဆောင်သွားခဲ့တယ်လို့ သိရပါတယ်။

လွန်ခဲ့တဲ့ နှစ်ပေါင်း ၄၀၀ကျော်က ဘုရားကျောင်းဆောင်တည်ဆောက်ရာမှာ ယာဇ်အပူဇော်ခံခဲ့ရတဲ့ ကိုယ်ဝန်ဆောင်အမျိုးသမီး ဆီမောင်းကို အစွဲပြုပြီး မှည့်ခေါ်ခဲ့တဲ့ Wat Si Muang ကျောင်းဆောင်ကလည်း ဘုရားဖူးသူတွေနဲ့ စည်ကားနေပါတယ်။

ထိုင်းကျူးကျော်ခဲ့စဉ်တုန်းက မပျက်စီးခဲ့တဲ့ တစ်ခုတည်းသောကျောင်းဆောင် Wat Si Saket ကတော့ နှစ်ပေါင်း၂၀၀နီးပါးသက်တမ်းရှိပြီး မြို့ထဲသမ္မတအိမ်တော်ရာနားမှာရှိကာ ဗုဒ္ဓဆင်းတုငယ်ပေါင်း အရွယ်စုံ ပုံစံစုံ ၆၈၀၀ကျော်ရှိလို့ ထင်ရှားပါတယ်။

ဘာတွေလုပ်ခဲ့လည်း

Vientiane မြို့ရောက်တဲ့အခါမှာတော့ မြို့ထဲက Khampiane Boutique Hotel မှာ Check in ဝင်ပြီး အနီးအနားက ဘုရားတွေဆီလမ်းလျှောက်သွားကြည့်ခဲ့တယ်။ ဒါပေမဲ့ ညနေစောင်းပြီဆိုတော့ ဘုရားတွေပိတ်နေပါပြီ။ လမ်းမှာလည်း လူတွေတအားရှင်းတာပဲ။ ကားဌားဖို့ Taxi လည်းမတွေ့။ တုပ်တုပ်လည်းမတွေ့။ လာအိုမြို့တော်ဖြစ်ပြီး လူရှင်းလိုက်တာလို့တောင် တွေးမိသေးတယ်။ ကံကောင်းချင်တော့ လမ်းအတော်လျှောက်ပြီးတဲ့အခါ တုပ်တုပ်တစ်စီးရပ်ထားတာတွေ့တာနဲ့ ဌားပြီး ကမ်းနားက ညဈေးထွက်ခဲ့တယ်။ ညဈေးနားမှာတော့ ကားတွေရော လူတွေရော စည်လို့ရယ်ပေါ့။ ထိုင်းက အဝတ်အစားတွေများပေမဲ့ ဈေးသက်သာတော့ ဝယ်ပျော်ပါတယ်။ နောက်တနေ့မှာတော့ နေ့တဝက်စာ ကားဌားထားပြီး မြို့ထဲကနေ ၁နာရီလောက်မောင်းရတဲ့ Buddha Park ရယ် လာအိုနိုင်ငံရဲ့ နာမည်အကြီးဆုံး That Luang စေတီရယ် Victory Monument ရယ်သွားခဲ့ပါတယ်။ ဘန်ကောက်ကို ထွက်တဲ့ Air Asia လေယာဉ်ချိန်က နေ့လည်၁း၄၅ဆိုတော့ နေ့လည်စာစားပြီး လေဆိပ်ထွက်ကာ ပြန်လာခဲ့ကြပါတယ်။

ခရီးစဉ်ဆွဲမယ်

ကိုယ်တွေသွားတုန်းကတော့ အချိန်မရှိလို့ တစ်မြို့ကိုတစ်ညနှုန်းနဲ့ နှစ်ညအိပ် နှစ်မြို့သွားခဲ့တယ်။ အချိန်ရရင်တော့ ၄ညအိပ်လောက်သွားသင့်တယ်။ အချိန်ပိုရရင်ရင်တော့ ၆ရက်လောက်နေပြီး လောင်ပရာဘန်မြို့ပါဆက်သွားလို့ရပါတယ်။ေ လာင်ပရာဘန်မှာဆိုလည်း လည်စရာ ရေတံခွန်တွေ၊ တောင်တွေရှိပါတယ်။ နောက်တစ်ခါသွားဖြစ်ရင်တော့ လောင်ပရာဘန်ပါရောက်အောင်သွားရမယ်။

ကုန်ကျစားရိတ်

ကုန်ကျစားရိတ်က ဘန်ကောက်ကနေ ရထားနဲ့သွား လေယာဉ်နဲ့ပြန်ခဲ့တာဆိုတော့ အားလုံးတွက်ကြည့်လိုက်တဲ့အခါမှာ ၂ညအိပ်ခရီးကို မြန်မာငွေ ၂သိန်းခွဲလောက်ပဲကျခဲ့ပါတယ်။ ထိုင်းမှာ ထိုင်းဘတ်သုံးခဲ့ပြီး လာအိုရောက်တဲ့အခါမှာတော့ လာအိုပိုက်ဆံ Kip ကို သုံးခဲ့ပါတယ်။ လာအိုပိုက်ဆံ 1000 Kip က မြန်မာငွေ 163ကျပ်နဲ့ ညီမျှပါတယ်။

လာအိုအစားအစာ

လာအိုအစားအစာက ထိုင်းမြောက်ပိုင်းအစာနဲ့ဆင်ပါတယ်။ Larb လို့ခေါ်တဲ့ အသားစင်းကောကို အရွက်တွေနဲ့ သုတ်ထားတဲ့ဟင်း၊ သင်္ဘောသီးထောင်း၊ ငါးပေါင်း၊ ကြက်ကင် စတာတွေကို ကောက်ညှင်းနဲ့တွဲစားလေ့ရှိပါတယ်။ ကောက်ညှင်းလေးကို လက်နဲ့ဖဲ့ပြီး အလုံးသေးသေးကျစ်ကျစ်လေးဖြစ်အောင် လုံးပြီးမှ ဟင်းတွေနဲ့တွဲစားတာပါ။ ပြင်သစ်လက်အောက်ရောက်ခဲ့တော့ ပြင်သစ်စာဖြစ်တဲ့ ပေါင်မုန့်လုံးလုံးရှည်ရှည်ထဲ အသားတို့ ဝက်ပေါင်ခြောက်တို့ကို အရွက်တွေ ရောညှပ်စားတဲ့ Baguette ဟာလည်း လာအိုလမ်းဘေးအစားအစာအဖြစ်ထင်ရှားပါတယ်။

လည်ပတ်ဖို့အကောင်းဆုံးအချိန်

လာအိုက မြန်မာနိုင်ငံနဲ့ရာသီဥတုဆင်တော့ လာအိုနိုင်ငံဆီ သွားရောက်လည်ပတ်ဖို့အကောင်းဆုံးအချိန်က နိုဝင်ဘာလနဲ့ ဧပြီလအကြား အေးမြတဲ့ရာသီဥတုမှာပဲဖြစ်ပါတယ်။

ဒီလောက်ဆိုရင်တော့ လာအိုအကြောင်း အကြမ်းဖျဉ်းသိလောက်ပြီထင်ပါတယ်။ လာအိုက ချစ်စရာကောင်းတဲ့ အိမ်နီးချင်းနိုင်ငံလေးပါ။ သဘာဝအလှတွေနဲ့ အေးချမ်းပါတယ်။ သွားလည်လို့လည်းကောင်းပါတယ်။ ဒါပေမဲ့ စိတ်မကောင်းတာက ကိုယ်တွေရဲ့ မြန်မာနိုင်ငံမှာ ဒီထက်ပိုလှတဲ့ ရှုခင်းတွေ၊ ပိုဆန်းကြယ်တဲ့ ရှေးဟောင်းသမိုင်းဝင်နေရာတွေ၊ ယဉ်ကျေးျွှုအမွေအနှစ်တွေ၊ လူမျိုးစုတွေ ရှိနေရက်နဲ့ ဒီနိုင်ငံသေးသေးလေးနဲ့ ယှဉ်လိုက်တဲ့အခါမှာ နိုင်ငံခြားခရီးသွားဝင်ရောက်မှုတွေ ပိုနည်းနေတာကိုပါ။ သူတို့ရဲ့ မြို့တော်က ပဲခူးမြို့သာသာလောက်ပဲရှိပြီး ခရီးသွားတွေ အမြဲမပြတ်စည်ကားနေတဲ့ ဗန်ဗီယန်းမြို့ဆိုရင်လည်း ကလောမြို့လေးလိုပါပဲ။ ဒီလို လည်စရာ ၃-၄မြို့ပဲရှိတဲ့ လာအိုက မြန်မာထက် ခရီးသွားပိုများနေတာ တကယ်စိတ်မကောင်းပါဘူး။ အဓိကကတော့ Tourist တွေအသွားများတဲ့ ထိုင်း၊ ဗီယက်နမ်နဲ့ ကမ္ဘောဒီးယားတို့ကနေ ကုန်းကြောင်းကနေ အလွယ်တကူဝင်ရောက်နိုင်တာကြောင့် ဖြစ်ပါလိမ့်မယ်။ သိပ်မကြာခင်မှာလည်း ကိုယ်တွေရဲ့ မြန်မာနိုင်ငံအလှနဲ့ ယဉ်ကျေးအမွေအနှစ်တွေ ကမ္ဘာကျော်လာပြီး ခရီးသွားအများကြီးဝင်ရောက်လာပြီး ခရီးသွားလုပ်ငန်းကြီး တိုးတက်လာမယ်လို့တော့ မျှော်လင့်ရတာပဲနော်။
ချစ်ခင်လျှက်

Dr.Nu Myat

တူရကီက ကမ္ဘာ့ပထမဆုံး စိတ်ရောဂါကုဆေးရုံကြီး (World’s First Psychiatric Hospital in Turkey)

August 20, 2019March 2, 2023Posted in Asia, Europe, Middle East, Travel, Turkey, UncategorizedTagged Asia, Europe, TravelLeave a comment

တူရကီက ကမ္ဘာ့ပထမဆုံး စိတ်ရောဂါကုဆေးရုံကြီး

ရှေးခေတ်က ယဉ်ကျေးမှုအဆင့်အတန်းမြင့်မားခဲ့တဲ့ တူရကီနိုင်ငံမှာ ရှေးဟောင်းမြို့ကြီးတွေ အဆောက်အအုံကြီးတွေရှိနေသလို ကမ္ဘာ့ပထမဆုံး စိတ်ရောဂါကု ဆေးရုံကြီးလည်း ရှိနေပါတယ်။
ဒီဆေးရုံကြီးကတော့ တူရကီအနောက်ပိုင်း Izmir ပြည်နယ် Bergama မြို့နားက Pergamon မြို့ဟောင်းမှာရှိတဲ့ Asklepion (အက်စ်ကလီပီယွန်)ဆိုတဲ့ ရှေးဟောင်း ဂရိဆေးရုံကြီးပါ။

ဘယ်လောက်တောင်ရှေးကျလည်းဆိုရင် ဘီစီ ၄ရာစုကတည်းက တည်ဆောက်ခဲ့တာဆိုတော့ နှစ်ပေါင်း ၂၅၀၀ကျော် သက်တမ်းရှိနေပါပြီ။ ရှေးခေတ်က ဂရိတွေရဲ့နာမည်ကြီး ဆေးကုသမှုစင်တာဖြစ်ပြီး ကုသမှုဆိုင်ရာ ဂရိနတ်ဘုရား Asklepio ကို ရည်စူးပြီးဆောက်လုပ်ခဲ့တာတဲ့လေ။ တူရကီနိုင်ငံ ရောမလက်အောက်ရောက်နေတဲ့ အေဒီ ၂ရာစုမှာ ရောမလူမျိုးတွေအကြား အကောင်းဆုံး ဆေးကုသမှုစင်တာတစ်ခုအဖြစ် ထင်ရှားလာခဲ့ပါတယ်။

ဘယ်လိုကုထုံးတွေနဲ့ ကုတာလဲ
————————————-
နုမြတ်တို့ တူရကီနိုင်ငံသွားလည်ခဲ့တုန်းက ဒီဆေးရုံကြီးကိုရောက်ခဲ့ပါသေးတယ်။ Asklepion ကြီးက ဆေးရုံ ဆေးခန်းထက်စာရင် Wellness Center တို့ Spa နဲ့တောင်တူနေပါသေးတယ်။ ဘာလို့လဲဆိုတော့ ကုထုံးတွေက ရွှံ့ရည်စိမ်ရတာတို့၊ တေးဂီတဖျော်ဖြေပွဲတို့၊ နှိပ်နယ်တာတို့ဆိုတော့လေ။ မိုက်တယ်နော်… အဲ့ဒီကုထုံးတွေအပြင် အစားအစာကုထုံး၊ စိတ်ရောဂါကုထုံး၊ ဆေးဘက်ဝင်အပင်ကုထုံး၊ ရေစိမ်ကုထုံး၊ အိပ်မက်ဖတ်ကုထုံးစတဲ့ ကုထုံးတွေကိုလည်း အသုံးပြုခဲ့ကြတာတဲ့။ ဒါကြောင့်လည်း အခုခေတ်လိုမဟုတ်ဘဲ အဲ့ဒီခေတ်က ဆေးရုံတက်ချင်သူတွေ များမှများပဲလို့ သိရပါတယ်။

ဘယ်လိုပုံစံရှိလဲ
——————
ဆေးရုံကြီးက တောင်ကုန်းတွေကြားမှာရှိတော့ တည်နေရာကတင် အေးချမ်းသာယာလှပါတယ်။ေ ဆးကုသမှုခံယူလိုသူတွေအနေနဲ့ ဆေးရုံကြီးဆီကို ၂၆၉၀ပေရှည်ပြီး တိုင်တွေစီတန်းပြီးရှိနေတဲ့ ခမ်းနားလှတဲ့ လမ်းကြောင်းကနေ ဝင်ရပါတယ်။ ဒီလမ်းကြောင်းကြီးက ရှေးခေတ်ဂရိတောင်ပေါ်မြို့နဲ့ ဆေးရုံကြီးကြားဆက်သွယ်ပေးတဲ့ လမ်းကြောင်းကြီးပေါ့။ လမ်းကြောင်းအဆုံးမှာ ပြိုကျနေတဲ့ ဂိတ်ဝကြီးရှိပါတယ်။

ဂိတ်ပေါက်ကနေ ဝင်ဝင်ချင်းတွေ့ရတဲ့ ဝင်းထဲမှာတော့ အခုခေတ်ဆေးပညာရဲ့ သင်္ကေတအမှတ်တံဆိပ် မြွေရုပ်ပုံ ထွင်းထုထားတဲ့တိုင်လုံးကြီးရှိပါတယ်။ ဝင်းရဲ့ ညာဘက်က အင်ပါယာဘုရင်အခန်းဖြစ်ပြီး စာကြည့်တိုက်အဖြစ်လည်း သုံးခဲ့ကြပါတယ်။ အနီးအနားမှာ စက်ဝိုင်းပုံ အမိုးခုံး ကျောင်းဆောင်ကြီး ရှိခဲ့တယ်လို့လည်း သိရပါတယ်။

အိပ်မက်ဥမင်
————-
အဲဒီကနေဆက်သွားရင် မြေအောက်ဥမင်လှိုဏ်ခေါင်းကြီးရှိပါတယ်။ ဥမင်လှိုဏ်ခေါင်းကို ကုထုံးအခန်းတွေ အဖြစ်ရော အိပ်ခန်းတွေအဖြစ်ပါ သုံးခဲ့ကြပါတယ်။ ဒီအိပ်ခန်းတွေက အိပ်မက်တွေကို ဖမ်းဆုပ်နိုင်တဲ့ အိပ်ခန်းတွေဖြစ်ပြီး ညကမက်တဲ့ အိပ်မက်တွေကို အဓိပ္ပါယ်တွေကောက်ကာ သင့်တော်တဲ့ ကုထုံးတွေ ရွေးချယ်ပေးပါတယ်။ ရှေးခေတ်ဂရိတွေက Asklepios နတ်ဘုရားက အိပ်မက်လာပေးတာလို့ ယူဆတာကြောင့် အိပ်မက်တွေဟာ ရောဂါကုသရာမှာအရေးပါတယ်လို့ မှတ်ယူထားကြပါတယ်။

အစွမ်းထက်ရေ
——————
ဝန်းထဲမှာ ရေကန်နဲ့ ရေပန်းပေါင်း ၃ခုရှိပြီး ဒီရေတွေကို သောက်ရေ၊ စိမ်ရေအပြင်၊ ကုထုံးတွေမှာ သုံးခဲ့ကြပါတယ်။ အဆောက်အအုံတွေ ပြိုကျပျက်စီးနေပေမဲ့ ရေပူစမ်းရေပန်းက ရေတွေ ခုထိစိမ့်ထွက်စီးဆင်းနေတုန်းပဲလေ။ ရာစုနှစ်ပေါင်းများစွာ အသုံးပြုခဲ့တဲ့ ဒီရေပူစမ်းက ရေတွေက ရေဒီယိုသတ္တုကြွဂုဏ်သတ္တိရှိတယ်ဆိုတာကို နောက်ပိုင်းမှာ ရှာဖွေတွေ့ရှိခဲ့ပြီး အခုချိန်ထိ တချို့ရောဂါတွေကို ကုသပေးနိုင်တုန်းပဲတဲ့လေ။ ရေစိမ် ရွှံ့စိမ်တဲ့ Bathtub တွေကလည်း မိုက်မှမိုက်။ ရေစိမ်ကန်တွေကိုဆောက်ထားတဲ့ အုတ်တွေဆိုအကြီးကြီးတွေပဲ…

DCIM100MEDIADJI_0223.JPG

ဂီတကုထုံး
————
စာကြည့်တိုက်နဲ့ ကဇာတ်ရုံကြားထဲ တိုင်ကြီးတွေ စီတန်းပြီးရှိနေပါတယ်။ ကဇာတ်ရုံဆိုတာကြီးကလည်း အကြီးကြီးပဲရော။ လူပေါင်းထောင်ချီပြီး ကြည့်လို့ရတာတဲ့လေ။ တောင်စောင်းမှာရှိတာဆိုတော့ တောင်စောင်းအဆင့်ဆင့်ထိုင်ခုံတွေ စီတန်းထားတာ အခုထိအကောင်းတိုင်းရှိနေဆဲပဲ။ ဂီတကုထုံးနဲ့ ကုသဖို့အတွက် ဂီတဖျော်ဖြေပွဲတွေ လုပ်ပေးတယ်တဲ့လေ။ ဆေးရ့ုလာတက်တာ စတိတ်ရှိုးပါ ကြည့်ရတယ်။ မိုက်တယ်ရော…

ရှေးခေတ်ဂရိတွေက စိတ်ရောကိုယ်ပါကျန်းမာမှ ကျန်းမာရေးကောင်းမယ်လို့ ယူဆထားကြလို့ ဒီလို ကုထုံးတွေအသုံးပြုခဲ့ကြတာတဲ့လေ။ တချို့ကုထုံးတွေဆိုရင် အခုခေတ်မှာ တဖန်ပြန်လည်ခေတ်စားလာတာကြောင့် တကယ် အစွမ်းထက်မယ်ဆိုတာ မယုံမရှိပေါ့လေ။
အဲ့ဒီလိုသာ အိပ်လိုက်စားလိုက်၊ ရေစိမ်လိုက်၊ အနှိပ်ခံလိုက်၊ သီချင်းနားထောင်လိုက်နဲ့ ကုသရမယ်ဆိုရင် စိတ်ချမ်းသာတာနဲ့ ရောဂါတစ်ဝက်လောက်ပျောက်နေပြီနော်… ဟုတ်တယ်ဟုတ် ???

ချစ်တဲ့

Dr.Nu Myat

အင်ဒိုနီးရှားရဲ့ လှပသာယာတဲ့နေရာသစ်..မော်ရတိုင်းကျွန်းတွေဆီ… 🏝 (Morotai Island, the Pearl of Pacific Ocean; the charm of Indonesia)

August 20, 2019August 7, 2022Posted in Adventure, Asia, indonesia, Travel, UncategorizedTagged Asia, Beach, indonesia, Island, morotai, TravelLeave a comment

အင်ဒိုနီးရှားရဲ့ လှပသာယာတဲ့နေရာသစ်…
Morotai ကျွန်းတွေဆီ… 🏝

ဒီကျွန်းလေးက ပစိဖိတ်သမုဒ္ဒရာရဲ့ ပုလဲရတနာတဲ့လေ….

နုမြတ်တို့ဆီမှာ အင်ဒိုနီးရှားဆိုရင် ဘာလီနဲ့တွဲသိကြတာများပါတယ်။ ဘာလီအပြင် မြို့တော် ဂျာကာတာနဲ့ဂျော့ဂျာကာတာတို့ကိုပါ သွားလေ့ရှိကြတယ်။ တကယ်တော့ အင်ဒိုနီးရှားက ကမ္ဘာပေါ်မှာ ကျွန်းအများဆုံးနိုင်ငံပါ။ အာရှတိုက်နဲ့သြစတြေးလျတိုက်အကြား ပစိဖိတ်နဲ့ အိန္ဒိယသမုဒ္ဒရာတွေပေါ် တည်ရှိနေတဲ့ကျွန်းပေါင်း ၁၇၀၀၀ ကျော်တောင်ရှိပါတယ်။ အဲဒီတော့ ဘယ်သူမှသိပ်မရောက်ဖူးသေးတဲ့ ကျွန်းတွေလည်း အများကြီးရှိသလို Tourist တွေ ရှာဖွေမတွေ့ရှိသေးတဲ့ ကျွန်းတွေလည်း ရှိနေတုန်းပါပဲ။ Morotai က တော့ အဲ့လိုကျွန်းတွေထဲက တစ်ခုပါ။ ဘာလီကျွန်းလို Tourist တွေနဲ့ ပြည့်နှက်မနေဘဲ သဘာဝနဲ့ တသားတည်းကျနိုင်တဲ့ ကျွန်းလေးပါ။

အင်ဒိုနီးရှားကနေရာသစ်မိတ်ဆက်တဲ့အနေနဲ့ အာဆီယံနိုင်ငံတွေနဲ့ ဂျပန်နိုင်ငံက နာမည်ကြီး Social Influencer တစ်ယောက်ဆီကို ဖိတ်ခေါ်ပြီး လိုက်ပို့ပေးလို့ မြန်မာနိုင်ငံကိုယ်စားပြု Social Influencer အဖြစ် အင်ဒိုနီးရှားရဲ့ အရမ်းလှတဲ့ Moratai ကျွန်းတွေဆီရောက်ခဲ့ရပါတယ်။

Morotai ကျွန်းက အင်ဒိုနီးရှား ခရီးသွားလုပ်ငန်းမှာ နေရာသစ်ဖြစ်ပြီး လူတွေသိပ်မသိကြသေးတော့ လူရှင်းပါတယ်။ တခြားနိုင်ငံတွေက ကမ်းခြေတွေ ကျွန်းတွေလို နေရာတိုင်း Tourist တွေနဲ့ပြည့်မနေပါဘူး။ ဆူဆူညံညံမရှိဘူး။ မတိုးရဘူး။ သဘာဝတရားကြီးကို အပြည့်အဝခံစားလို့ရပါတယ်။

လူတွေရှင်းတာမှ ဘယ်သွားသွား ကိုယ်တွေပဲရှိတာပါ။ လူအလာနည်းတာရဲ့ တစ်ဘက်ဆိုးကျိုးကတော့ Tourist တွေအတွက် Facility တွေ ကောင်းကောင်းမရှိတာပေါ့။ ဥပမာ-ဟိုတယ်တွေနည်းပါတယ်။ Resort ၂ခုပဲရှိပြီး ဟိုတယ်အသေးစားနည်းနည်းပဲရှိပါတယ်။ ကျွန်းတွေမှာဆိုလည်း ဆိုင်မရှိပါဘူး။ ဆိုင်ရှိရင်လည်း ဝယ်စားစရာ ဆိုင်တွေတစ်ဆိုင်လောက်ပဲရှိပါတယ်။ အဲ့ဒီတော့ ကျွန်းတွေသွားမယ်ဆို ကိုယ့်အတွက်အစားအစာတွေကို ကိုယ်တိုင်သယ်လာမှရပါမယ်။

ဘယ်လိုသွားရလဲ

———————-

Moratai ကျွန်းတွေက ရှုခင်းလှသလောက် သွားရတာတော့ခက်ပါတယ်။ အင်ဒိုနီးရှားက ကျွန်းတွေများသလောက် နိုင်ငံကတအားကျယ်တော့ တစ်နေရာနဲ့ တစ်နေရာ သွားရတာဝေးပါတယ်။ Morotai ကျွန်းက နိုင်ငံရဲ့ အရှေ့မြောက်ဘက်မှာ ရှိတာဆိုတော့ ဂျာကာတာကနေ သွားရင်တောင် လေယာဉ် ၂ဆင့်စီးရပါတယ်။ Jakarta ကနေ Manando ကို အရင်သွားပြီးမှ Manando ကနေ Moratai ကိုလေယာဉ်ထပ်စီးရပါတယ်။ ကြားထဲမှာ ကျွန်းပတ်ပြီးတစ်နေရာခဏရပ်ပါသေးတယ်။

ရန်ကုန်ကနေ ဂျာကာတာကိုလည်း direct flight မရှိတော့ Singapore, Thai နဲ့ Malaysia တစ်ခုခုကို Transit လုပ်ရတာဆိုတော့ အဲ့ဒီမှာလည်း လေယာဉ်၂ဆင့်စီးရပါတယ်။ အဲဒီတော့ ရန်ကုန်ကနေ Morotai သွားဖို့ဆို လေယာဉ် ၄ဆင့်စီးမှရောက်မှာပါ။ ကိုယ်တွေတုန်းကတော့ Malaysia Airlines နဲ့ မလေးရှားကို Transit ဝင်ပြီး ဂျာကာတာကို အရင်သွားကာ ရောက်လက်စနဲ့ ဂျာကာတာကိုပါ ၁ရက်ဝင်လည်လိုက်ပါတယ်။ Jakarta မသွားချင်ရင် ဘာလီတို့ Yogyakarta တို့နဲ့တွဲသွားရင်လည်း အဆင်ပြေပါတယ်။

ဘာတွေလုပ်စရာရှိလဲ

————————–

ဒီကျွန်းကို အဓိကလာလည်ကြတာ နူးညံ့တဲ့ သဲတွေရှိတဲ့၊ စိမ်းပြာလဲ့နေတဲ့ ရေတွေရှိတဲ့ ကမ်းခြေတွေ၊ ကျွန်းတွေကြောင့်ပါ။ ရေအောက်ရှုခင်းတွေလည်းလှလို့ ရေငုပ်တဲ့သူတွေအကြိုက်တွေ့ကြပါတယ်။ ရေအောက်မှာ လင်းပိုင်တွေ၊ ငါးမန်းသေးသေးလေးတွေတောင် တွေ့နိုင်ပါတယ်တဲ့။ အဲဒီတော့ ဒီကို လာတဲ့သူတွေက ရေငုပ်ကြတယ်။ Snorkeling လုပ်ပြီး ရေအောက်ရှုခင်းကြည့်ကြတယ်။ ကျွန်းပတ်ကြတယ်။ ကမ်းခြေမှာရေဆော့ကြတယ်။ ပြတိုက်သွားလေ့လာကြပါတယ်။ စားသောက်ဆိုင်တွေ များများမရှိသလို Nightlife တွေ Night Market တွေလည်း ဒီမှာမရှိပါဘူး။

ကျွန်းပတ်ခရီး

ကျွန်းမကြီးကနေ Speed Boat နဲ့ အနီးအနားရှိ ကျွန်းတွေဆီသွားလို့ရပါတယ်။ Morotai ကို အဓိကလာကြတဲ့ ရည်ရွယ်ချက်က ကျွန်းတွေဆီ သွားချင်ကြလို့ပါ။ Speed Boat ဌားမယ်ဆို တစ်နေကုန်ကို တစ်စီးကို သူတို့ငွေ တစ်သန်းလောက် ပေးရပါတယ်။ မြန်မာငွေနဲ့ဆို ၁သိန်းကျပ်လောက်ရှိပါတယ်။ လူအယောက် ၂၀ လောက်ဆန့်ပါတယ်။ ကိုယ်ကြိုက်တဲ့ ကျွန်းသွားခိုင်းရုံပါပဲ။ နုမြတ်တို့သွားခဲ့တဲ့ကျွန်းတွေကတော့ ….

Dodola Island

ဒီကျွန်းက Morotai မှာ နာမည်အကြီးဆုံးပါ။ ကျွန်းကြီးနဲ့ ကျွန်းငယ် ၂ ခုရှိပြီး ကျွန်း၂ ခုက တစ်ဆက်ထဲဖြစ်နေတာပါ။ သဲသောင်လေးခြားထားတော့ ရေကျတဲ့အချိန်ဆို လမ်းလျှောက်ကူးလို့ရပါတယ်။ နုမြတ်တို့ရောက်တော့နေ့လည်၁ နာရီမှာ ကျွန်းကူးတာ ခြေသလုံးတစ်ဝက်လောက်ရေတက်နေပါပြီ။ ဒါပေမဲ့ လမ်းလျှောက်ကူးလို့ရပါတယ်။ ရေထဲဖြတ်လျှောက်ရတာ ပိုတောင်ပျော်ဖို့ကောင်းပါသေးတယ်။

Interesting Travel Destinations on Morotai Island That are Rich in Natural Resources

ကျွန်းကြီးဘက်မှာ ညအိပ်ညနေတည်းလို့ရအောင် အဆောင်တွေဆောက်ထားတာတွေ့ရတယ်။ ကမ်းခြေမှာ ထီးလေးတွေ အဆောင်လေးတွေ ထိုင်ခုံလေးတွေလည်း ထားပေးထားပါတယ်။ ပြေးလွှားဆော့ကစားပြီး Adventure နှစ်သက်သူတွေအတွက် ရေပြင်ကျယ်ကြီးပေါ်မှာ ရေပေါ်ကစားကွင်းလည်း ထားပေးထားပါတယ်။ တစ်နာရီမှ ၂၅၀၀ ကျပ်လောက်ပဲပေးရတယ်။ ရေလွှာလျှောစီးတွေရော၊ ဧရာမဖော့တုံးကြီးတွေပေါ်ဆော့ရတာတွေရော စုံနေတာပဲ။ ကိုယ်တွေဆီမှာလည်း အဲ့လိုထားပေးရင် ကောင်းမယ်နော်။ တခြား Water Activities တွေအနေနဲ့ Speed Boat, Banana Boat နဲ့ Kayaking လှေလှော်တာတွေလည်း လုပ်လို့ရပါတယ်။

ကျွန်းသေးမှာတော့ အဲ့ဒါတွေမရှိဘူး။ အသည်းပုံလေးပါတဲ့ DoDoLa ဆိုတဲ့ဆိုင်းဘုတ်လေးပဲတွေ့ရတာပါ။ ဒါပေမဲ့ အဲ့ကျွန်းကသဲတွေက အရမ်းနူးညံ့တာပဲ။ အင်ဒိုနီးရှားမှာအနူးညံ့ဆုံးသဲဆိုပဲ။ တကယ်လည်း နူးညံ့တာကိုတွေ့ခဲ့ရတယ်။ အဲ့ဘက်မှာ ညအိပ်ညနေတည်းမယ်ဆိုရင်တော့ Tent ထိုးပြီးတည်းလို့ရတယ်တဲ့လေ။

အဲ့ကျွန်းမှာ အချိန်ပေးပြီး အနားယူသင့်ပါတယ်။ ကျွန်းဆိုပေမဲ့ အရမ်းကြီးတဲ့ကျွန်းတွေမဟုတ်တော့ အရှေ့ဘက်ကြည့်လည်းပင်လယ်ပြင်ကြီးနဲ့ကောင်းကင်ပြာ၊ အနောက်ဘက်လှည့်ကြည့်လည်း ပင်လယ်ပြင်ကြီးနဲ့ကောင်းကင်ပြာဆိုတော့ သိပ်ကိုသာယာပါတယ်။ ကျွန်း၂ ကျွန်းဆက်နေတဲ့နေရာကလည်း အရမ်းလှပါတယ်။ တတ်နိုင်ရင် Drone သယ်သွားပြီးရိုက်သင့်ပါတယ်။ ရေတွေကလည်း စိမ်းပြာလဲ့နေပြီး ကြည်စိမ့်နေတော့ ရေကူးလို့လည်းရတယ်လေ။

Kokoya Island

ဒီကျွန်းလေးကတော့ တစ်ကျွန်းလုံးမှာမှ လူတစ်ယောက်ထဲနေတဲ့ကျွန်းပါ။ အဲ့လူကတော့ အဲဒီကျွန်းကိုပိုင်တဲ့ ကျွန်းပိုင်ရှင်ပါတဲ့။ ကျွန်းပိုင်ရှင်က ဟိုးအရင်ကတည်းက အဲ့ဒီကျွန်းမှာနေလာတော့ ကျွန်းကိုပိုင်သွားတာတဲ့။ ကျွန်းကနေစွန့်ခွာသွားရင် ကျွန်းမပိုင်တော့မှာစိုးလို့လည်းနေမယ်နော်။ ကျွန်းမှာတစ်ယောက်ထဲနေနေရတာ။ လိုအပ်တာရှိရင်တော့ မြို့ထဲ မော်တော်ဘုတ်နဲ့သွားဝယ်တယ်တဲ့ ။

ကျွန်းလေးကတော့ တော်တော်သာယာပါတယ်။ အုန်းကပင်လေးတွေ အပင်လေးတွေနဲ့စိမ်းစိမ်းစိုစို သာသာယာယာရှိလှတယ်။ ရေလေးတွေဆို စိမ်းပြာလဲ့နေတာပဲ။ ရေတွေထဲငါးတွေ ကူးနေတာ အုပ်လိုက်အုပ်လိုက်။ ရေတွေမဲနေတဲ့နေရာက ငါးအုပ်တွေရှိနေလို့ ငါးအရောင်ကြောင့်မဲနေတာ။ ငါးအကောင်ကြီးတစ်ကောင်ရောက်လာရင် ငါးတွေထွက်ပြေးကြလို့ မဲနေတဲ့နေရာက ချက်ချင်းကွက်ပြီးစိမ်းသွားတာ။ ကြည့်ရတာ သိပ်ပျော်ဖို့ကောင်းတာပဲ။

Pasir Timbul Island

ပစိဖိတ်သမုဒ္ဒရာကြီးထဲ သောင်တင်နေတဲ့ကျွန်းလေးပေါ့။ ရေလည်ခေါင်သောင်ထွန်း နတ်သမီးနေတဲ့ကျွန်းဆိုတာ ဒီလိုကျွန်းလေးပေါ့။ တကယ်ကို စိမ်းလဲ့ပြာနေတဲ့ ရေပြင်ကျယ်ကြီးထဲမှာ သဲဖြူကျွန်းလေးက ထင်းနေတာပဲ။ ကျွန်းပေါ် ဘာအပင်မှမရှိ ဘာကျောက်ဆောင်မှမရှိ ဘာအကောင်မှမရှိ သဲဖြူလေးတွေပဲရှိတယ်… ပင်လယ်ကြီးနဲ့ ကောင်းကင်ကြီးဆိုတာ တကယ့်မြင်ကွင်းကျယ်ကြီး။ တမျှော်တခေါ်ကြီးကို လှမ်းမြင်နေရတာ။ ရေလေးတွေလည်း ကြည်နေတာပဲလေ။ ဒီကျွန်းကို နေသိပ်မပြင်းတဲ့ မနက်စောစောနဲ့ ညနေစောင်းလောက်သွားရင်အဆင်ပြေလောက်မယ်။

65865161_1363754557108219_6907610778149542298_n — Pasir Timbul Island Credit to AyokeMorotai Instagram

Batu Kopi (Roi Island)

ကော်ဖီနံ့ရတဲ့ကျောက်တုံးကြီးရှိတဲ့ကျွန်းပေါ့။ ကမ်းခြေမှာရှိတဲ့ သဘာဝကျောက်ဆောင်ကြီးက ကော်ဖီနံ့အလိုလိုရနေတာတဲ့။ လူကောင်းတွေပဲ အနံ့ရပြီး မကောင်းတဲ့လူဆို အနံ့မရဘူးတဲ့လေ။ ကိုယ်တွေဆို ကော်ဖီနံ့ရပါ့မလားဆိုပြီး အချင်းချင်းနောက်နေကြတာပေါ့။ တချို့ဆို စက်လှေပေါ်ကတည်းက အနံ့ရနေပြီတဲ့လေ။ Mocha တွေရော၊ Cappucငino တွေရောစုံနေတာပဲ။ အရမ်းကို လူကောင်းဖြစ်ချင်နေကြတာ။ 😛

အဲ့လိုတွေ လျှောက်နောက်ကြလို့လားတော့မသိ။ တကယ်တမ်း ကျွန်းပေါ်ရောက်လို့ ကျောက်တုံးကြီးဆီ အပြေးအလွှားသွားရှုကြည့်ကြတဲ့အခါမှာတော့ ဘယ်သူမှအနံ့မရကြဘူးလေ။ အနားကပ်ရှုလည်းမရ၊ ကျောက်ဆောင်အောက်ခြေကို ရှုကြည့်လည်းမရနဲ့ ဘာအနံ့မှမရကြပါဘူး။ ဒါပေမဲ့ ခပ်ဝေးဝေးမှာနေကြည့်တဲ့အခါမှာတော့ တစ်ချက်တစ်ချက်ကော်ဖီနံ့လေး ပျံ့လာတာကို တချို့တလေရကြပါတယ်။ ကိုယ်လည်း မရှုကြည့်တော့တဲ့အခါမှ ကော်ဖီနံ့လေးတစ်ချက်ရသွားတော့ တကယ်အံ့သြသွားတယ်။

သူက တချို့အချိန်တွေဆို အနံ့ပိုရတယ်တဲ့လေ။ မနက်စောစောနဲ့ ညနေပိုင်းအချိန်တွေဆိုပိုရတတ်တယ်တဲ့။ ညနေ၃နာရီဆို အနံ့အပြင်းဆုံးတဲ့လေ။ ကိုယ်တွေရောက်တဲ့အချိန်က နေ့လည်နေ့ခင်းဆိုတော့ အနံ့မရကြတာလည်းဖြစ်နိုင်ပါတယ်။ ဘာပဲဖြစ်ဖြစ် ကော်ဖီစိုက်ခင်းတွေမရှိတဲ့ ကော်ဖီဆိုင်တွေမရှိတဲ့ ကမ်းခြေက ကျောက်တုံးကြီးကနေ ကော်ဖီနံ့ ရတယ်ဆိုတာတော့ အတော်ဆန်းတယ်နော်။

ကော်ဖီကျောက်တုံးကြီးရဲ့ ရာဇဝင်ကလည်းရှိနေသေးပြန်ရော။ အင်ဒိုနီးရှားကို ဒတ်ချ်လူမျိုးတွေ လာကျူးကျော်တုန်းက ဒီကျွန်းကြီးပေါ်ကိုပါရောက်လာကြသတဲ့။ ကျွန်းကဒေသခံတွေနဲ့ တိုက်ခိုက်ကြတဲ့အခါ ကျွန်းပေါ်က ကော်ဖီလုပ်ငန်းလုပ်ကိုင်သူတွေက ဒီကျောက်တုံးကြီးနားမှာ ရုတ်တရက် ကိုယ်ပျောက်သွားကြသတဲ့။ သူတို့က သေသွားတာမျိုးမဟုတ်ဘဲ တခြားကမ္ဘာမှာ ပိတ်မိနေတာမျိုးဖြစ်နေတော့ သူတို့လုပ်ရိုးလုပ်စဉ်အတိုင်း မနက်တစ်ခါ ညနေတစ်ခါ ကော်ဖီဖျော်ကြတဲ့အခါမှာ ကော်ဖီနံ့တွေရတာလို့ သိရပါတယ်။

ကော်ဖီကျောက်တုံးကျွန်းကို သွားဖို့တော့ နည်းနည်းခက်ပါတယ်။ ၂နာရီကြာကားမောင်းပြီး စက်လှေနဲ့ မိနစ် ၂၀ မောင်းရတယ်။ သူ့ဆီသွားမယ်ဆိုရင်တော့ နေ့တစ်ဝက်အချိန်ကုန်တယ်။ အပေါ်က ကျွန်း၃ကျွန်းနဲ့လည်း မနီးတော့ နောက်နေ့သက်သက်ထက်သွားရပါတယ်။ သွားရခက်ပေမဲ့ ကျောက်တုံးကြီးက ဆန်းကြယ်တာရယ်၊ ကော်ဖီနံ့မရရင်တောင်မှ ကမ်းခြေကသာယာပြီး ရေတွေက ကြည်စိမ့်ပြာလဲ့နေတာကြောင့် သွားရကျိုးနက်ပါတယ်။ ဒီကျွန်းကတော့ နည်းနည်းကြီးတော့ ဒေသခံရွာတွေ ရွာသားတွေလည်းရှိပါတယ်။ ညအိပ်တည်းဖို့တည်းခိုဆောင်တွေလည်း ရှိနေပြီး အနောက်နိုင်ငံသားစုံတွဲတစ်တွဲ အေးအေးဆေးဆေးလာတည်းနေတာတွေ့ခဲ့ရပါတယ်။ ဘယ်သူနဲ့မတွေ့ချင်ဘဲ အေးအေးဆေးဆေးလာပြီး အပန်းဖြေလိုတဲ့သူတွေအတွက်တော့ တကယ်လှတဲ့ ကျွန်းလေးပါ။

Zum-Zum Island

ဒီကျွန်းကို ဇွမ်းဇွမ်းကျွန်းလို့ခေါ်သလို Douglas McArthur Island လို့လည်းခေါ်ပါတယ်။ အမေရိကန်စစ်ဗိုလ်ချုပ်ကြီးကို အစွဲပြုမှည့်ခေါ်ထားတဲ့နာမည်ဖြစ်ပြီး သူ့ရုပ်တုကြီးလည်း ဒီကျွန်းမှာရှိပါတယ်။ ဖိလစ်ပိုင်နိုင်ငံကို ဂျပန်လက်အောက်ကနေ တိုက်ထုတ်ခဲ့တုန်းက အမေရိကန်စစ်တပ်တွေ စခန်းချခဲ့တဲ့ ကျွန်းဖြစ်လို့ ဗိုလ်ချုပ်ရုပ်တုကြီး အမှတ်တရထားထားတာပါ။

ပြတိုက်တွေ

တည်နေရာအရ ဒုတိယကမ္ဘာစစ်အတွင်း စစ်ရေးအရအရေးပါခဲ့တဲ့ ကျွန်းပါ။ ဂျပန်စစ်တပ်တွေ အခြေချခဲ့တဲ့ ကျွန်းတစ်ကျွန်းဆိုတော့ စစ်သမိုင်းပြတိုက်တွေ သွားလေ့လာလို့ရပါတယ်။ မြို့ထဲမှာ ဒုတိယကမ္ဘာစစ်ပြတိုက်ကြီးရှိသလို Batu Kopi ဆီသွားတဲ့ လမ်းမှာလည်း Swadaya ဒုတိယကမ္ဘာစစ်ပြတိုက်ကို ဝင်ကြည့်နိုင်ပါသေးတယ်။ ပြတိုက်အသေးလေးပါ။ ဒေသခံတစ်ယောက်က သူရှာဖွေတွေ့ရှိခဲ့တဲ့ သမိုင်းဝင်ပစ္စည်းတွေကို သူ့အိမ်မှာပဲပြတိုက်လိုလေးပြထားတာပါ။

ဘယ်လိုလျှောက်လည်မလဲ

———————————-

စက်ဘီးတွေ ဆိုင်ကယ်တွေသုံးကြတာများပါတယ်။ အဲဒီမှာသုံးကြတဲ့ ဆိုက်ကားကလည်းဆန်းပါတယ်။ ကိုယ်တွေဆီမှာလို ဘေးတွဲမဟုတ်ဘဲ ခရီးသည်ကိုအရှေ့မှာထားပြီး နင်းသူကနောက်မှာပါ။ ဟိုတယ်ကနေ ဆိုင်ကယ်ဌားမယ်ဆိုရင် ၂နာရီကို မြန်မာငွေတစ်သောင်းလောက်ကျပါတယ်။ ဟိုတယ်ကနေ ကားဌားရင်လည်းရပါတယ်။ လူများရင်ကားဌားစီးတာပိုကောင်းပါတယ်။ လေဆိပ်ကနေဟိုတယ်အထိကို ၁၅၀၀၀ကျပ်၊ မြို့ထဲ City Tour ဆို ၁၀နာရီမှ ၅သောင်းကျပ်လောက်ပါပဲ။

ဘယ်မှာတည်းကြမလဲ

———————————-

လူအလာနည်းသေးတဲ့အလျှောက် ဟိုတယ်တွေလည်းမများပါဘူး။ ကမ်းခြေ Resort ကြီး ၂ခုပဲရှိသေးပြီး ဟိုတယ်အသေးလေးတွေနဲ့ တည်းခိုခန်းနည်းနည်းတော့ရှိပါတယ်။

ကိုယ်တွေတည်းခဲ့တာကတော့ D’Aloha Resort ပါ။ တစ်ညကို $50 လောက်ပဲကျပါတယ်။ ဘန်ဂလိုလေးတွေပုံစံဆောက်ထားတာဖြစ်ပြီး ဘန်ဂလိုတစ်လုံးမှာ အိပ်ခန်း၂ခန်း၊ ရေချိုးခန်းအိမ်သာနဲ့ ဧည့်ခန်းပါပါတယ်။ ကမ်းခြေနဲ့ကပ်နေတော့ အချိန်မရွေးရေဆင်းကူးလို့ရပါတယ်။ လှိုင်းမရှိတော့ ကိုယ်တွေဆီမှာလိုတော့ လှိုင်းစီးလို့မရဘူးပေါ့။ D’ALoha Resort ရဲ့ Email က resortdaloha@gmail.com ပါ။

ဒီထက်ပိုကောင်းတာကတော့ Moro Ma Doto Resort & Spa ပါ။ သူလည်း ကမ်းခြေမှာရှိတဲ့ Resort ပါပဲ။ ရေကူးကန်ပါပါပြီး ဟိုတယ်ရဲ့ Facility ပိုကောင်းသလို ဈေးကလည်း နှစ်ဆလောက်ရှိပါတယ်။ Email က info@moromadoto.com ပါ။

ဒီတော့ အင်ဒိုနီးရှားမှာ သူများတွေ သွားလေ့မရှိတဲ့ နေရာသစ်လည်း သွားချင်တယ်။ လူရှင်းပြီး သဘာဝနဲ့ တစ်သားထဲကျနေတဲ့နေရာကို သွားချင်တယ်။ ၂ယောက်ထဲ ဟန်းနီးမွန်းထွက်ပြီး အေးအေးဆေးဆေး အနားယူချင်တယ်ဆိုရင်တော့ Morotai ကျွန်းကိုလည်း စာရင်းထဲထည့်ထားသင့်ပါတယ်။ ဒါပေမဲ့ Tourist နည်းတဲ့နေရာဖြစ်တဲ့အလျောက် ညဈေးတွေ၊ ရှော့ပင်းဆိုင်တွေ၊ ဘားတွေ၊ ကလပ်တွေ ရှိမယ်လို့တော့ မမျှော်လင့်ပါနဲ့။ စိမ်းပြာရောင် ကြည်လဲ့နေတဲ့ ရေတွေ၊ ဖြူလွလွသည်းတွေ၊ အဆုံးအစမရှိတဲ့ကောင်းကင်နဲ့ ရေပြင်ကျယ်ကို အေးအေးဆေးဆေးခံစားလိုတဲ့သူတွေနဲ့မှ ကိုက်မှာပါ။

အားလုံးစိတ်ချမ်းသာ ကိုယ်ကျန်းမာရှိကြပါစေနော်

ချစ်တဲ့

Dr.Nu Myat

#WonderfulIndonesia #AyokeMorotai #Morotai #MorotaiIndoneisa
#NuMyataroundtheWorld

Website
http://www.numyataroundtheworld.com
Youtube
https://www.youtube.com/…/UCEECmxgvJAEfQsIX1cbF5xQ/featured…

ထူးဆန်းသော သဘာဝတရားများ၊ မြင့်မားသော သမိုင်းကြောင်းများနှင့် တူရကီ (Turkey, a Unique Country)

August 20, 2019March 2, 2023Posted in Asia, Europe, Middle East, Photo Essay, Travel, Turkey, UncategorizedTagged Asia, Europe, Experience, Travel, TurkeyLeave a comment

ထူးဆန်းသော သဘာဝတရားများ၊
မြင့်မားသော သမိုင်းကြောင်းများနှင့်
တူရကီ

တူရကီနိုင်ငံက သမိုင်းဝင်အဆောက်အအုံတွေ၊ မြေအောက်မြို့တွေ၊ နန်းတော်တွေ၊ ရှေးဟောင်း မြို့ပျက်ကြီးတွေနဲ့ ပြည့်နေတဲ့နိုင်ငံပါ။ အရောင်အသွေးစုံတဲ့ ယဉ်ကျေးမှုတွေ၊ အရသာရှိတဲ့ စားသောက်ဖွယ်ရာတွေ၊ အံ့သြဖွယ်ရာ ဆန်းပြားလှတဲ့ ရှုမျော်ခင်းတွေကိုလည်း တွေ့မြင်ရနိုင်ပါတယ်။ ရှေးခေတ် ကုန်သွယ်ရေးမှာ အရေးပါခဲ့တဲ့ ပိုးလမ်းမလမ်းတလျှောက်မှာ အင်မတန် အချက်အချာကျတဲ့ နေရာမှာရှိတဲ့ နိုင်ငံပါ။ ဘာကြောင့်လဲဆိုတော့ အာရှနဲ့ ဥရောပတိုက် (၂)တိုက်လုံးမှာ ရှိတဲ့ နိုင်ငံဖြစ်နေလို့ပါ။ နိုင်ငံရဲ့ ၉၇%က အာရှမှာရှိပြီး ၃%က ဥရောပမှာရှိနေပါတယ်။ တိုက်နှစ်တိုက်ကြားမှာရှိတဲ့ ဘော့စ်စဖရပ်ရေလက်ကြားမှာ အာရှနဲ့ ဥရောပကိုဆက်သွယ်ပေးတဲ့ တံတား(၃)စင်းနဲ့ ရေအောက် ဥမင်လှိုဏ်ခေါင်း (၂)ခုရှိပါတယ်။

အကြီးဆုံးမြို့ဖြစ်တဲ့ အစ္စတန်ဘူလ်မြို့(Istanbul)ကလည်း တိုက်နှစ်တိုက်ကို ခွထားတဲ့မြို့ပါ။ အစ္စတန်ဘူလ်က နှစ်ပေါင်း ၂၀၀၀ ကျော်ကြာ ရောမ၊ အော်တမန်နဲ့ ဘိုင်ဇန်တိုင်း အင်ပါယာသုံးဆက်တိုင်အောင် မြို့တော်ဖြစ်ခဲ့ဖူးတဲ့ နာမည်ကျော်မြို့ပါ။ အခုလက်ရှိမှာတော့ မြို့တော်က အန်ကာရာ(Ankara)ဖြစ်ပြီး အစ္စတန်ဘူလ်မြိုကတော့ အကြီးဆုံးမြို့ဖြစ်နေပါတယ်။ တတိယအကြီးဆုံးမြို့ကတော့ အစ်ဇမဲမြို့(Izmir)ပါ။

တူရကီမှာကမ္ဘာ့ ရှေးဟောင်းအမွေအနှစ်နေရာပေါင်း (၁၀)ခုကျော်ပိုင်ဆိုင်ထားပြီး ကမ္ဘာ့ရှေးဟောင်းအံ့ဖွယ်(၇)ခုထဲက နှစ်ခုလည်း ရှိပါတယ်။ အဲ့ဒီထဲကမှ တစ်ခုဖြစ်တဲ့ Temple of Artemis ကျောင်းဆောင်ကြီးရှိရာ ရှေးဟောင်းဂရိမြို့တော်ကြီး Ephesus က ကြီးကျယ်ခမ်းနားလှပါတယ်။ ကမ္ဘာ့တတိယအကြီးဆုံး စာကြည့်တိုက်ကြီးဖြစ်ခဲ့ဖူးတဲ့ Library of Celsius၊ လူပေါင်း ၂၄၀၀၀ ကျော်ဆန့်တဲ့ ကဇာတ်ရုံကြီး၊ ရှေးခေတ်က အကြီးဆုံး ဈေးဝယ်စင်တာကြီးတွေလည်း မြို့ထဲမှာ ရှိခဲ့ဖူးတာတဲ့လေ။

အပျိုစင်မယ်တော်မာရီရဲ့ နောက်ဆုံးရက်တွေကို ကုန်ဆုံးခဲ့တဲ့ ဘုရားကျောင်းလည်း ဒီမြို့မှာ ရှိပါတယ်။ ဘာဂမာမြို့ (Bergama)မှာတော့ ရှေးခေတ်က ရောမတို့ရဲ့ဆေးရုံဖြစ်ခဲ့တဲ့ ကမ္ဘာ့ပထမဆုံးစိတ်ရောဂါကုဆေးရုံရှိပါတယ်။

တူရကီမှာ ရှေးဟောင်း အမွေအနှစ်တွေအပြင် ဆန်းကြယ်တဲ့ သဘာဝတရားတွေလည်း ရှိလို့နေပါတယ်။ ထုံးရေပြာအိုင်လေးတွေ အဆင့်ဆင့်ဖြစ်နေတဲ့ Pamukkale နယ်မှာရှိတဲ့ Cotton Castle လေးက သိပ်လှပြီး တူရကီမှာ ကမ္ဘာလှည့်ခရီးသည်အလာအများဆုံးနေရာပါ။ ဟိုးရှေးတုန်းက မီးတောင်ကြောင့် တောင်စောင်းမှာ ကန်လေးတွေ အဆင့်ဆင့်ဖြစ်နေတဲ့အပြင် တောင်ပေါ်ကရေပူစမ်းကနေ စီးကျနေတဲ့ ရေတွေက ကန်လေးတွေထဲစိမ့်ဝင်တော့ ရေအိုင်လေးတွေ အဆင့်ဆင့်ဖြစ်နေတာပါ။ ရေထဲမှာ ထုံးဓာတ်လည်းပါတော့ အနည်ထိုင်ပြီး ရေအိုင်လေးတွေဖြူနေတာကလည်း ဒီနေရာကို ပိုပြီးဆန်းသစ်စေပါတယ်။

ရှေးနှစ်သန်းပေါင်းများစွာက မီးတောင်ပေါက်ကွဲမှုတွေကြောင့် တစ်နယ်လုံး ကျောက်တောင်အချွန်းတွေနဲ့ ဆန်းကြယ်လှတဲ့ Cappadocia နယ်ကလည်း ကမ္ဘာပေါ်မှာ မီးပုံးပျံစီးဖို့ အလှဆုံးနေရာအဖြစ်ထင်ရှားပါတယ်။ ထူးဆန်းလှတဲ့ကျောက်ဆောင်ချွန်ချွန်ကြီးတွေ ပြန့်ကျဲနေတဲ့အပေါ်မှာ ရောင်စုံမီးပုံးပျံတွေ ရာနဲ့ချီ ပျံသန်းတာ အတော်ကိုလှတဲ့ မြင်ကွင်းပါ။ Cappadocia မှာ ကျောက်ဂူထဲထွင်းဆောက်ထားတဲ့ဘုရားကျောင်းပေါင်း၂၀၀ လောက်ရှိတဲ့ထဲက Göreme Open Air Museum မှာတော့ ကျောင်းပေါင်း ၁၀ကျောင်းကို တစုတဝေးထဲတွေ့ရမှာပါ။ ကျောက်ဂူတွေမှာနေထိုင်ခဲ့တဲ့ ကျောက်ဂူလူသားတွေအတိုင်း နေထိုင်နိုင်မယ့် ကျောက်ဂူဟိုတယ်တွေလည်း များစွာရှိပါတယ်။

ကမ္ဘာအနှံ့မှာ မြေအောက်မြို့တွေအနှံ့အပြားရှိပေမဲ့ တူရကီမှာ မြေအောက်မြို့ပေါင်း ၂၀၀ ကျော်တောင်ရှိတာတဲ့လေ။ အဲ့ထဲက Derinkuyu မြို့ဆိုရင် လူပေါင်း ၂၀,၀၀၀ ကျော်တောင် နေခဲ့တဲ့
အကြီးဆုံးမြေအောက်လှိုဏ်ဂူမြို့ကြီးပေါ့။ မြေအောက် ၁၈ထပ်၊ ပေ ၂၀၀ ကျော်ထိနက်ပြီး မြေပြင်ပေါ်ကနေ ဝင်ပေါက်ကလည်း ၆၀၀ ကျော်တောင် ရှိတာတဲ့။ မြေအောက်မြို့ထဲမှာ ဘုရားကျောင်းတွေရော စာသင်ကျောင်းတွေပါတစ်ခါထဲထည့်ဆောက်ထားလို့ သိရပါတယ်။

ဒီလို ထူးခြားဆန်းပြားလှတဲ့ နေရာတွေ၊ အဆင့်အတန်းမြင့်မားခဲ့တဲ့ သမိုင်းကြောင်းတွေကြောင့်လည်း တူရကီနိုင်ငံက ကမ္ဘာလှည့်ခရီးသည်တွေ အလာများတဲ့ နိုင်ငံဖြစ်လို့နေတာပဲဖြစ်ပါတယ်။

ဒေါက်တာနုမြတ်သိင်္ဂ ီဦး

ကမ္ဘာ့အမြင့်ဆုံးဧဝရက်တောင်ကြီးရှိရာနီပေါသို့ … Nepal where Mt.Everest exists

November 21, 2017April 22, 2021Posted in Adventure, Asia, Heritage, Travel, UncategorizedTagged Asia, Mt.Everest, nepal, Nu Myat around the World, Travel1 Comment

ကမ္ဘာ့အမြင့်ဆုံးဧဝရက်တောင်ကြီးရှိရာနီပေါသို့ …

🌳မြတ်စွာဘုရား ဖွားတော်မူရာ လုမ္ဗိနီဥယျာဉ်ကြီးရှိရာ…

🏔ဧဝရက်တောင်အပါအဝင် ကမ္ဘာ့အမြင့်ဆုံးတောင် ၈တောင်ရှိရာ..

🏯ဟိန္ဒူဘာသာဝင်တိုင်း သွားရောက်ဖူးမြော်သင့်တဲ့ ကျောင်းတော်ကြီးရှိရာ…

🏯တတိယမျက်လုံးလို့တင်စားခေါ်ဝေါ်ကြတဲ့ ဗုဒ္ဓမျက်လုံးရှိရာ…

👸ကုမ္မာရီလို့ခေါ်တဲ့ ကမ္ဘာ့တစ်ဦးတည်းသော သက်ရှိနတ်ဘုရားမကိုးကွယ်ရာ…

🤺ရဲရင့်တဲ့ ဂေါ်ရခါးစစ်သားတွေရှိရာ…

နီပေါနိုင်ငံဟာ အရမ်းလည်းလှသလို အရမ်းလည်း စိတ်ဝင်စားဖို့ကောင်းပါတယ်…

နီပေါရောက်တုန်း
-ဗုဒ္ဓမြတ်စွာဘုရား ဖွားမြင်ရာနေရာကို ဖူးမြော်ခဲ့ရတယ်
-နှင်းတွေဖုံးနေတဲ့ ရေခဲတောင်တန်းကြီးကိုကြည့်ရင်း နိုးထလာခဲ့ရတယ်…
-ဟိမဝန္တာတောင်တန်းတွေကြား Paragliding လုပ်ပြီး ငှက်လိုလေဟုန်စီးခဲ့ရတယ်…
-ဧဝရက်တောင်နဲ့ ကမ္ဘာ့အမြင့်တကာအမြင့်ဆုံး ရေခဲတောင်တွေပေါ်ကနေ Mountain Flight စီးခဲ့ရတယ်…
ဒီအတွေ့အကြုံတွေက ဘယ်လိုမှ မေ့မရနိုင်မယ့် ဘဝမှတ်တိုင်တွေလို့ ဆိုရမှာပါ

နီပေါဆိုတာ

နီပေါနိုင်ငံက မြန်မာတွေအတွက်မစိမ်းတဲ့နိုင်ငံပါ။ ရဲရင့်တဲ့ ဂေါ်ရခါးစစ်သည်တွေကို ဒုတိယကမ္ဘာစစ်က အင်္ဂလိပ်တွေ မြန်မာနိုင်ငံကို ခေါ်ဆောင်လာလို့ ဂေါ်ရခါးမျိုးဆက်တွေ မြန်မာမှာ အများကြီးရှိနေပါသေးတယ်။ဂေါတမ မြတ်စွာဘုရားဖွားတော်မူရာ လုမ္ဗိနီဥယျာဉ်တော်ကြီးဆီ ဗုဒ္ဓဂါယာ ဘုရားဖူးသွားရင်းလည်း ရောက်ဖူးကြမှာပါ။

နိုင်ငံမြောက်ဘက်မှာ တရုတ်နိုင်ငံနဲ့ ဟိမဝန္တာတောင်တန်းကြီးခြားထားပြီး တောင်ပိုင်းမှာတော့ အိန္ဒိယနိုင်ငံနဲ့ ထိစပ်နေတာပါ။ ဟိန္ဒူဘာသာဝင်အများစုဖြစ်ပြီး ဗုဒ္ဓဘာသာဝင်တွေက ဒုတိယအများဆုံးပါ။ နီပေါရဲ့ အလံကလည်း ထူးဆန်းလှပါတယ်။ တြိဂံ၂ခုဆင့်ထားတဲ့ ပုံစံဖြစ်နေလို့ ကမ္ဘာ့တစ်ခုတည်းသော ထောင့်မှန်စတုဂံပုံ မဟုတ်တဲ့ အလံလို့ ဆိုရမှာပါ။

ဘယ်တွေလည်စရာရှိလဲ

ခတ္တမန္ဒူမြို့ (Kathmandu)

ဟိမဝန္တာတောင်တန်းတွေဝန်းရံထားတဲ့ ချိုင့်ဝှမ်းထဲက မြို့တော်ခတ္တမန္ဒူဟာ ရှေးနှစ်ပေါင်းများစွာကတည်းက ဆောက်ခဲ့တဲ့ ဘုရားကျောင်းတွေ အဆောက်အအုံတွေနဲ့ လဟာပြင်ပြတိုက်တစ်ခုလိုပါပဲ။ မြို့က ငလျင်ကြောမှာရှိလို့ တိုက်တွေ သိပ်မမြင့်ဘူးရယ်။ ကြည့်လိုက်တိုင်း ၂ ထပ် ၃ ထပ်လောက်ပဲရှိကြတာ။ အထပ်အမြင့်ဆုံးရယ်မှ ၁၇ထပ်တဲ့လေ။

-ခတ္တမန္ဒူမှာက ဗုဒ္ဓနတ်(Buddhanath) လို့ခေါ်တဲ့ စေတီပုထိုးရှိတယ်။ ထူးခြားတာက စေတီပေါ်မှာ ဗုဒ္ဓမျက်လုံးလို့ခေါ်တဲ့ ဧရာမမျက်လုံး၂လုံးကို လေးဘက်လေးလန်မှာ ရေးဆွဲထားပြီးခလယ်မှာ အင်္ဂလိပ်အက္ခရာ 9 လိုပုံရှိတဲ့ နီပေါလို နံပါတ် ၁ ကို နှာခေါင်းအဖြစ်ရေးဆွဲထားတယ်။ တရားရတော်မူရာ Enlightenment သင်္ကေတလို့သိရပြီး ဒါကြောင့် တတိယမျက်လုံးလို့လည်း ခေါ်ကြပါတယ်။ နီပေါရဲ့ဘုရားတွေမှာတွေ့ရလေ့ရှိပြီး နီပေါနိုင်ငံရဲ့ သင်္ကေတလို့လည်း ဆိုရမှာပါ။ ဘုရားဝန်းကျင်မှာ တိဘက်လူမျိုးတွေ နေများလို့ Little Tibet လို့လည်း ခေါ်ကြတယ်တဲ့။

-တောင်ထိပ်ပေါ်မှာရှိတဲ့ ဆွာယန်ဘူနတ်စေတီ Swayambhunath temple မှာ မျောက်တွေများလို့ Tourist တွေကြား Monkey Temple လို့လည်းခေါ်ကြတယ်။ အဲ့တောင်ကုန်းပေါ်တက်တဲ့ ဘုရားစောင်းတန်းလှေကားထစ်ပေါင်း ၃၆၅ထစ်ရှိပြီး တောင်ပေါ်က မြင်ရတဲ့ ခတ္တမန္ဒူမြို့ရှုခင်းကလည်း အရမ်းလှတယ်။

-ဟိန္ဒူဘာသာဝင်တွေ အထွတ်အမြတ်ထားရာ ပရှူးပသီနတ် (Pashupathinath) ဘုရားကျောင်းဆိုတာလည်း ရှိသေးတယ်။ ဟိန္ဒူဘာသာဝင်တိုင်း ဘဝမှာတစ်ကြိမ်ရောက်သင့်တဲ့ ဘုရားကျောင်းလို့ဆိုပါတယ်။ ဟိန္ဒူဘာသာဝင်တွေ သေဆုံးတဲ့အခါ အလောင်းတွေကို အဲ့ ဘုရားကျောင်းဘေးက ဘက်ဂ်မာတီ (Bagmati) မြစ်ကမ်းမှာ မီးသဂြိုဟ်လေ့ရှိပြီး ပြာတွေ မြစ်ထဲမြောချလေ့ရှိကြတယ်။ အဲ့မြစ်ကိုလည်း Holy River အဖြစ်သတ်မှတ်ထားပြီး အဲ့လို သဂြိုဟ်ခြင်းအားဖြင့်နောင်ဘဝရှိမလာတော့ပဲ သံသရာဝဋ်ဆင်းရဲကနေကင်းလွတ်တယ်လို့ အဆိုရှိကြတယ်။
ပရှူးပသီနတ် ရောက်တုန်းလွှင့်ခဲ့တဲ့ Live Video link https://www.facebook.com/numyataroundtheworld/videos/1836358436603517/

-ဘက်ခ်တာပါဒါဘာရင်ပြင် (Bukdapur Durbur Square) ကတော့ ခတ္တမ္ဒူကနေ ၁နာရီလောက်ကားမောင်းရင်ရောက်တဲ့ ဘက်ခ်တာပါမြို့မှာ ရှိတဲ့ ရင်ပြင်ပါ။ နီပေါနိုင်ငံရဲ့ မြို့တော်ဟောင်း ဖြစ်ပြီး နန်းတော်ဟောင်းလည်းတွေ့မြင်ရမှာပါ။ ၂၀၁၅တုန်းက နီပေါမှာ လှုပ်ခဲ့တဲ့ ငလျင်ဒဏ်ကြောင့် ရှေးဟောင်း အဆောက်အအုံတွေ အများကြီး အုတ်ပုံဘဝရောက်နေတာ မြင်ရတော့ စိတ်မကောင်းဘူးရယ်။ မြို့ထဲမှာ Kathamandu နဲ့ Patan ဆိုတဲ့ ရင်ပြင်တွေ ရှိသေးတယ်။ ကံကောင်းရင် ကမ္ဘာ့တစ်ပါးတည်းသော သက်ရှိနတ်ဘုရားမ ကုမ္မာရီနေတဲ့ အဆောက်အအုံပြတင်းပေါက်ကနေ နတ်ဘုရားမ လက်ပြနှုတ်ဆက်တာကို မြင်တွေ့နိုင်တယ်။

-Thamel ဆိုတဲ့နေရာကတော့ နေ့ရောညပါ စီကားတဲ့ ဈေးဆိုင်တန်းတွေရယ်ပါ။ ညဘက်ဆို နီပေါ Nightlife ကို အဲ့မှာ ခံစားလို့ရတယ်လေ။

-ဧဝရက်တောင်အပါအဝင် ကမ္ဘာ့အမြင့်ဆုံးတောင်ထိပ်၈ခုကို လှမ်းမြင်ရအောင် သီးသန့်ထွက်ပေးတဲ့ Mountain Flight ဆိုတာလည်းရှိတယ်။ လေဆိပ်ကနေ ထွက်ပေးတာ။ တစ်ယောက်ကို $200 ကျတယ်။
Mountain Flight Video Link က ဒီမှာပါ။https://www.facebook.com/numyataroundtheworld/posts/1838824249690269

ညအိပ်မယ်ဆိုရင်
Maya Manor Boutique Hotel လေးက မြို့ထဲမှာရှိပြီး ဟိုတယ်ဆောက်ထားပုံလေးက ချစ်စရာပါ။ ဈေးလည်း သင့်တင့်ပါတယ်။

ပိုခါရာမြို့ (Pokhara)

ပိုခါရာမြို့လေးက မြို့တော် ခတ္တမန္ဒူပြီးရင် ဒုတိယမြောက်Tourist အလာဆုံးမြို့ပါ။ မြို့လေးက အရမ်းကိုလှပါတယ်။ ဟိမဝန္တာတောင်တန်းတွေအလယ်က ရေကန်ကြီးဘေးမှာ ဆောက်ထားတဲ့မြို့လေးဆိုတော့ ရှုခင်းတွေက တအားလှပေါ့…

ရေခဲတောင်တွေကို မြို့ထဲကနေလှမ်းမြင်ရသလို တောင်တွေကြားထဲက နေထွက်လာတဲ့ ရှုခင်းတွေကလည်း အရမ်းလှပါတယ်။ Sunrise၊ Sunset ကြည့်လို့ရတဲ့ View Point တွေလည်း အများကြီးရှိလို့နေပါတယ်။ ဆာရန်ကော့တောင်ကတော့ Sunrise ကြည့်ဖို့ နာမည်ကြီးပါတယ်။

ပိုခါရာမြို့လေးကတော့ Adventure မြို့တော်လို့ဆိုရမှာပါ။ အဲ့မှာ တောင်တွေပေါ်ကနေ လေဟုန်စီးနိုင်တဲ့ Paraglidingလုပ်နိုင်သလို ကောင်းကင်ပေါ်ကနေ ရှုခင်းကြည့်နိုင်တဲ့ Pilot နဲ့ကိုယ်နဲ့ ၂ယောက်ထဲစီးရတဲ့ Ultralight Flight နဲ့ ရေခဲတောင်တွေပေါ်ဖြတ်ပြီး ပျံသန်းတဲ့ Mountain Flight ဆိုတာလည်းရှိတယ်။ တောင်တွေလည်းများတော့ Trekking တို့ Hiking တို့လည်း လုပ်လို့ရတယ်။ Annapura ရေခဲတောင် Base Camp ကိုလည်း အသွားများကြတယ်။

မြို့လည်ရှိ Phewa ရေကန်ကြီးထဲ ခြေနင်းလှေစီးလို့ရသလို လှေလှော်လို့လည်းရတယ်။ ရေစီးသန်တဲ့ မြစ်တွေထဲလည်း Rafting လုပ်လို့ရတယ်။
Paragliding လုပ်တဲ့ Video က ဒီမှာပါ။ https://www.facebook.com/numyataroundtheworld/videos/1839864816252879/
Paragliding လုပ်တဲ့ Review ကတော့ ဒီမှာပါ။

ညအိပ်မယ်ဆိုရင်
Raniban Retreat နဲ့ Himalaya Front Hotel တို့က တောင်ပေါ်မှာ ရှိလို့ မြို့အလှကို အပေါ်စီးက လှမ်းမြင်ရတယ်။ အဲ့က မြင်ရတဲ့ နေထွက်ချိန်ရှုခင်းတွေက သိပ်လှတာပဲ။ ရေခဲတောင်တွေကိုလည်း လှမ်းမြင်ရတယ်လေ။

Fishtail Resort နဲ့ Waterfront Hotel တွေကတော့ ရေကန်ဘေးမှာ ရှိပြီး ရာသီဥတုသာယာရင် ဟိုတယ်ကနေ ရေခဲတောင်တွေလှမ်းမြင်ရပါတယ်။
Temple Tree ဟိုတယ်ကတော့ မြို့ထဲမှာရှိပြီး သွားရလာရ လွယ်ကူပါတယ်။

လုမ္ဗိနီမြို့ (Lumbini)

ဂေါတမမြတ်စွာဘုရား ဖွားတော်မူရာ လုမ္ဗိနီဥယျာဉ်ရှိပြီး မြတ်စွာဘုရားမွေးဖွားတဲ့နေရာအစစ်ကို အသိအမှတ်ပြုထားတဲ့ကျောက်တုံးရယ်၊ ဗောဓိပင်ရယ်၊ မယ်တော်မာယာမီးဖွားခါနီးကိုယ်လက်သန့်စင်ရာ၊ မီးဖွားပြီးသိန္ဒဿမင်းသားကို ဆေးကြောသန့်စင်ရာ ရေအိုင်တော်ရယ်၊ မယ်တော်မာယာဒေဝီကျောင်းဆောင်ကြီးရယ်၊ အာသောကမင်းကြီး တည်ထားခဲ့တဲ့ ကျောက်စာတိုင်ရယ် ရှိပါတယ်။ ဗုဒ္ဓဘာသာဝင်တိုင်း သွားရောက်ဖူးမြော်သင့်တဲ့ မွန်မြတ်တဲ့ နေရာပါ။

ညအိပ်မယ်ဆိုရင်
Lumbini Hokke Hotel အခန်းတွေက ကျယ်ကျယ်ဝန်းဝန်းရှိပါတယ်။ ဂျပန်တွေအတည်းများတော့ ဂျပန်စတိုင်အခန်းလေးတွေလည်းရှိတယ်။
မြန်မာဘုန်းကြီးကျောင်းတွေလည်းရှိပြီး ဘုန်းကြီးကျောင်းမှာတည်းမယ်ဆိုရင် မြန်မာငွေ ၅၀၀၀ ပဲလှူရမှာပါ။ သက်သက်လွတ်ထမင်းဟင်းတွေပါကျွေးပါတယ်။

နာဂါကော့မြို့ (Nagarkot)

ခတ္တမန္ဒူကနေ ၁နာရီလောက်မောင်းရင်ရောက်တဲ့ တောင်ပေါ်မြို့လေးပါ။ နေဝင်နေထွက်ရှုခင်းတွေ အရမ်းလှတယ်လို့ နာမည်ကြီးပါတယ်။ မြို့လေးသွားတဲ့တောင်ပေါ်လမ်းလေးက ထင်းရှုးပင်လေးတွေနဲ့ သိပ်ကိုလှပါတယ်။
ဒီမြို့မှာလည်း Hiking, Mountain Biking, Paragliding စတဲ့ Activities တွေ လုပ်လို့ရပါတယ်။

ညအိပ်မယ်ဆိုရင်
Hotel Country Villa Resort ဆိုတဲ့ ဟိုတယ်လေးရွေးသင့်ပါတယ်။ ရှုခင်း တမြော်တခေါ်ကြီး မြင်ရတဲ့ တောင်စောင်းပေါ်ဆောက်ထားပြီး ဈေးကလည်း $80-100 လောက်ပါပဲ။
Himalaya Club ဟိုတယ်ကတော့ အခန်းတွေပိုကျယ် ပိုကောင်းပြီး View တွေလည်း သိပ်ကိုလှပါတယ်။ ရေကူးကန်ကြီးလည်းရှိတယ်။ ဈေးကတော့ $160 လောက်ရှိမယ်။
တောင်စောင်းက အိမ်လေးတွေမှာ Homestay လည်း နေလို့ရလောက်တယ်။ လမ်းတလျှောက် Homestay ဆိုပြီး ဆိုင်းဘုတ်လေးတွေ တွေ့ရလို့ပါ။

ချန်ဒရာဂီရိ (Chandragiri)

ဒီမြို့ကလည်း ခတ္တမန္ဒူမြို့ကနေ ၁နာရီကျော်လောက်စီးရုံနဲ့ရောက်တယ်။ Cable Car စီးပြီးတောင်အမြင့်ကြီးပေါ်တက်ရတာ။ တောင်ပေါ်မှာ ဘုရားကျောင်းရှိပြီး တောင်ပေါ်က မြင်ရတဲ့ရှုခင်းတွေက အရမ်းကိုလှတာ။ တောင်ပေါ်က ကော်ဖီဆိုင်မှာ အေးအေးဆေးဆေး Lunch စား နီပေါစတိုင် မာဆလာလက်ဖက်ရည်လေးသောက်နဲ့ ဇိမ်ကိုကျနေရော။ နောက်ဆို ကစားကွင်းတွေ Zipline တွေလည်း လုပ်ဦးမှာဆိုတော့ ပိုပြီး ပျော်ဖို့ကောင်းမှာပါ။

ချန်ဒရာဂီရိ Live Video က ဒီမှာပါ

နီပေါကိုဘယ်လိုသွားရမလဲ

နီပေါနိုင်ငံ ခတ္တမန္ဒူမြို့နဲ့ ရန်ကုန်ကို Himalaya Airlines ကနေ တိုက်ရိုက်ပြေးဆွဲနေပါပြီ။ လေယာဉ်ပျံသန်းချိန်က ၃နာရီနီးပါးရှိပြီး အသွားအပြန်မှ US$350 ဝန်းကျင်လောက်ပဲရှိပါတယ်။

ခတ္တမန္ဒူကနေ ပိုခါရာကို လေယာဉ်စီးရင်စီး၊ မစီးရင်ကားနဲ့သွားလို့ရပါတယ်။ ကားက Tourist Bus ဆိုတဲ့လိုင်းကားရှိတယ်။ ကားအမျိုးအစားနဲ့ Service ပေါ်မူတည်ပြီး ဈေးက 7$ ကနေ $25 ထိရှိတယ်။ $25 တန်ဆိုရင် ကားပေါ် အိမ်သာပါသလို lunch လည်းကျွေးပါသတဲ့။ ကားစီးချိန်ကတော့ ၇နာရီလောက်ကြာပါမယ်။
လုမ္ဗိနီဆီကိုတော့ ပိုခါရာကနေ ကားနဲ့သွားမှရပါမယ်။ ခတ္တမန္ဒူကဆိုရင်တော့ လေယာဉ်လည်းရှိပါတယ်။

အစားအသောက်

နီပေါစာက အိန္ဒိယအစာနဲ့ ဆင်ပါတယ်။ ထမင်းနဲ့ ကြက်သားဟင်း အဓိကစားပြီး ပဲဟင်းအစားများပါတယ်။ ထမင်းကို ဒိန်ချဉ်စမ်း ဆားနဲ့နယ်စားရတာ သိပ်အရသာရှိတာပဲ။ စမူဆာတွေကလည်း အကြီးကြီး၊ ပူရီ၊ ချာပါတီ၊ နံပြား စားလို့ကောင်းမှကောင်း။ အထူးအဆန်းအနေနဲ့ Momo ဆိုတာ ဖက်ထုပ်ကို ပဲအနှစ်တို့စားရတာဖြစ်ပြီး တရုတ်နဲ့ကုလား ၂မျိုးပေါင်းထားတဲ့ Fusion လို့ဆိုရမှာပါ။ နီပေါမှာ မာဆလာလက်ဖက်ရည် Masala Tea ကိုတော့ အရမ်းကြိုက်သွားမိတယ်။ နေ့တိုင်း အဲ့ဒါပဲ မှာသောက်တာ။ လက်ဖက်ရည်ကို ဟင်းခတ်အမွှေးအကြိုင်ရယ် နို့ရယ်ထည့်ကြိုပေးတာ သိပ်အရသာရှိတာပဲ။ Masala Cola ဆိုတာလည်းရှိတယ်တဲ့ ကိုကာကိုလာထဲ ဟင်းခတ်အမွှေးအကြိုင် ထည့်သောက်တာတဲ့။ အဆန်းကြီးတွေနော်။

ဆောင်ရန်ရှောင်ရန်

– US$ 1$ = နီပေါရူးပီး 102-108 လောက်ရယ်ပါ။ မြန်မာငွေတွက်မယ်ဆို နီပေါရူပီးကို အကြမ်းဖျဉ်းအားဖြင့် ၁၀နဲ့ မြှောက်ရုံပဲပေါ့ ။ ဒေါ်လာအကြွေတွေရှိလည်း ဆောင်သွားပါ။ ဒေါ်လာနဲ့ ပေးလည်း လက်ခံကြပါတယ်။

-Visa က လေဆိပ်မှာ Arrival Visa လျှောက်လို့ရပါတယ်။ 25$ ပါ။ Passport ပုံ လိုပါလိမ့်မယ်။

-Passport ဓာတ်ပုံ အပိုဆောင်သွားပါ။ ဖုန်းကတ်ဝယ်ရင် ပုံပေးပြီး ဖောင်ဖြည့်ရပါတယ်။ ဖုန်းကတ်ကို လေဆိပ်မှာပဲဝယ်ပါ။ မြို့ထဲမှာ ရှာရခက်ပါတယ်။ 100 MB ကို 800ရူပီး နဲ့ 300 MB ကို 1000ရူပီး ကျပါတယ်။

– တောင်တွေ ထူထပ်တဲ့ နိုင်ငံမို့လို့ ရာသီဥတုအေးပါတယ်။ နွေးနွေးထွေးထွေးဖြစ်စေမယ့် အဝတ်အစားတွေ ယူသွားပါ။ ညဆိုတော်တော်အေးပါတယ်။ အိန္ဒိယနဲ့ နီးတဲ့ လုမ္ဗိနီမြို့မှာသာ ရာသီဥတုနွေးပါတယ်။

-လေယာဉ်စီးရင် အသွား ညာဘက်၊ အပြန်ဘက်ဘက် Window seat မှာစီးပါ။ ရာသီဥတုကြည်လင်တဲ့ အချိန်ဆို ဧဝရက်တောင်အပါအဝင် ရေခဲတောင်တွေကို လေယာဉ်ပေါ်ကနေ တမြော်တခေါ်ကြီး လှမ်းတွေ့ရမှာပါ။

-လေယာဉ်က တစ်ပတ်မှာ တစ်ကြိမ်ပဲထွက်တော့ ၇ညအိပ် ၈ရက်ခရီးသွားရပါမယ်။ အဲ့ရက်နဲ့ဆို အပေါ်မှာ ပြောထားတာတွေ အကုန်ရောက်ပါတယ်။ တချို့ကတော့ ၂နိုင်ငံဖြစ်အောင် နီပေါနဲ့ နီးတဲ့ ဘူတန်ကိုပါ တွဲသွားပါတယ်။

အပြီးထိ စိတ်ဝင်တစား ဖတ်ရှုလို့ ကျေးဇူးပါ။ အားလုံး စိတ်သွားတိုင်းကိုယ်ပါနိုင်ကြပါစေ။

နုမြတ်

Share this:

Like this:

——————————————-

ကလောမြို့ အနီးတဝိုက် လည်စရာတွေ

——————————————-

——————————–

ကလောမှာ ဘယ်မှာစားမလဲ

——————————–

Share this:

Like this:

မြစ်ထဲ ဖောင်ပေါ်က ဟိုတယ်လေးကန်ချနာဘူရီ က Jungle Raft

တောတွင်း ဖောင်ဟိုတယ် Jungle Raft

အခန်း Facility

မွန်အငွေ့အသက်ပြည့်နေတဲ့ဟိုတယ်

မြစ်ထဲခုန်ဆင်း ရေဆော့

တခြား Activity တွေ

တခြားမြစ်ပေါ်ဟိုတယ်တွေ

Share this:

Like this:

Share this:

Like this:

ခရစ်ယာန်ဘာသာကို ပထမဆုံးကျင့်သုံးခဲ့သည့် အာမေးနီးယား

Share this:

Like this:

ဝိုင်အစပြုရာ ဂျော်ဂျီယာမှ လည်စရာများ

Share this:

Like this:

ပျော်ရွှင်ခြင်းနိုင်ငံ ဘူတန်ရဲ့ ထူးခြားချက် (၁၂)ချက်

————————– Quick Facts ————————–

————————– ဘယ်တွေလည်မလဲ ————————–

Share this:

Like this:

လာအိုကို ဘန်ကောက်ကနေ ညရထားနဲ့သွားမယ်

ညရထားအမျိုးအစားနဲ့ ဈေးနှုန်း

ရထားစီးအတွေ့အကြုံ

ထိုင်း-လာအိုနယ်စပ်

လာအိုရောက်ပြီ

Van Vieng မြို့

ဘာတွေလုပ်ခဲ့လဲ

ဗီယန်ကျန်းမြို့

သွားလည်ရမယ့်နေရာများ

ဘာတွေလုပ်ခဲ့လည်း

ခရီးစဉ်ဆွဲမယ်

ကုန်ကျစားရိတ်

လာအိုအစားအစာ

Share this:

Like this:

တူရကီက ကမ္ဘာ့ပထမဆုံး စိတ်ရောဂါကုဆေးရုံကြီး

Share this:

Like this:

အင်ဒိုနီးရှားရဲ့ လှပသာယာတဲ့နေရာသစ်… Morotai ကျွန်းတွေဆီ… 🏝

ဘယ်လိုသွားရလဲ

———————-

ဘာတွေလုပ်စရာရှိလဲ

————————–

ကျွန်းပတ်ခရီး

Dodola Island

Kokoya Island

Pasir Timbul Island

Batu Kopi (Roi Island)

ပြတိုက်တွေ

ဘယ်လိုလျှောက်လည်မလဲ

———————————-

ဘယ်မှာတည်းကြမလဲ

———————————-

Share this:

Like this:

ထူးဆန်းသော သဘာဝတရားများ၊ မြင့်မားသော သမိုင်းကြောင်းများနှင့် တူရကီ

Share this:

Like this:

ကမ္ဘာ့အမြင့်ဆုံးဧဝရက်တောင်ကြီးရှိရာနီပေါသို့ …

🌳မြတ်စွာဘုရား ဖွားတော်မူရာ လုမ္ဗိနီဥယျာဉ်ကြီးရှိရာ…

🏔ဧဝရက်တောင်အပါအဝင် ကမ္ဘာ့အမြင့်ဆုံးတောင် ၈တောင်ရှိရာ..

🏯ဟိန္ဒူဘာသာဝင်တိုင်း သွားရောက်ဖူးမြော်သင့်တဲ့ ကျောင်းတော်ကြီးရှိရာ…

🏯တတိယမျက်လုံးလို့တင်စားခေါ်ဝေါ်ကြတဲ့ ဗုဒ္ဓမျက်လုံးရှိရာ…

👸ကုမ္မာရီလို့ခေါ်တဲ့ ကမ္ဘာ့တစ်ဦးတည်းသော သက်ရှိနတ်ဘုရားမကိုးကွယ်ရာ…

🤺ရဲရင့်တဲ့ ဂေါ်ရခါးစစ်သားတွေရှိရာ…

နီပေါနိုင်ငံဟာ အရမ်းလည်းလှသလို အရမ်းလည်း စိတ်ဝင်စားဖို့ကောင်းပါတယ်…

နီပေါဆိုတာ

ဘယ်တွေလည်စရာရှိလဲ

မြစ်ထဲ ဖောင်ပေါ်က ဟိုတယ်လေး
ကန်ချနာဘူရီ က Jungle Raft

————————–
Quick Facts
————————–

————————–
ဘယ်တွေလည်မလဲ
————————–

လာအိုကို ဘန်ကောက်ကနေ
ညရထားနဲ့သွားမယ်

အင်ဒိုနီးရှားရဲ့ လှပသာယာတဲ့နေရာသစ်…
Morotai ကျွန်းတွေဆီ… 🏝

ထူးဆန်းသော သဘာဝတရားများ၊
မြင့်မားသော သမိုင်းကြောင်းများနှင့်
တူရကီ