ပျော်ရွှင်ခြင်းနိုင်ငံ ဘူတန်ရဲ့ ထူးခြားချက် (၁၂)ချက် (12 Interesting Facts about Bhutan)

ပျော်ရွှင်ခြင်းနိုင်ငံ ဘူတန်ရဲ့ ထူးခြားချက် (၁၂)ချက်

 

ဘူတန်တဲ့…. ဘူတန်ဆိုတာကြားတာနဲ့တင် အေးချမ်းလှတဲ့ နိုင်ငံလေးကို မြင်ယောင်ကြမှာပါ။ ဒဏ္ဏာရီလာနိုင်ငံလေးတစ်ခုလို ဖြစ်နေတဲ့ နိုင်ငံလေးက တကယ်ဆို ပေါ်လာတာ နှစ်၁၀၀ ပဲ ရှိသေးတာတဲ့လေ။ ဘူတန်မှာ ရှုခင်းတွေက သာယာလှပသလို လူတွေကလည်း ပျော်ရွှင်ငြိမ်းချမ်းနေပုံပေါက်ကြပါတယ်။ ဗုဒ္ဓဘာသာကို ယုံကြည်ကိုးကွယ်ကြပြီး ဗုဒ္ဓရဲ့ အဆုံးအမကို နာခံကြတာကြောင့်ပါ။ ဒါကြောင့်လည်း ပျော်ရွှင်ခြင်းနိုင်ငံလို့ တင်စားခေါ်ဝေါ်ကြတာပေါ့။

cof

ကမ္ဘာ့ဆင်းရအခက်ဆုံးလေဆိပ်၊ ကမ္ဘာမှာ လူမတက်ရသေးတဲ့အမြင့်ဆုံးတောင်၊ ကမ္ဘာ့တစ်ခုတည်းသော မီးပွိုင့်မရှိတဲ့နိုင်ငံ စတဲ့ ကမ္ဘာ့စံချိန်ချိုးထားတဲ့ နိုင်ငံတစ်ခုလည်းဖြစ်တယ်တဲ့လေ။ ချောမောလှပငယ်ရွယ်တဲ့ ပညာတတ်ဘုရင်နဲ့မိဖုရားတို့ရဲ့ အချစ်ဇာတ်လမ်း၊ ရိုးရာဝတ်စုံတွေဝတ်ပြီး ရိုးရာအိမ်လေးတွေမှာနေထိုင်ကြတဲ့ နိုင်ငံသူနိုင်ငံသားတွေစတဲ့ ဘူတန်နိုင်ငံရဲ့ ထူးခြားပြီး စိတ်ဝင်စားဖို့ကောင်းတဲ့ အချက်တွေရယ်…. သွားလည်သင့်တဲ့နေရာတွေရယ်ကို တင်ပေးလိုက်ပါတယ်နော်။

LRM_EXPORT_267578486840417_20180924_183751814.jpeg

စက်တင်ဘာလတုန်းက Mighty Travels နဲ့ သွားခဲ့တဲ့ ဘူတန်ခရီး Review အတိုချုံးပြီးတင်မယ်စိတ်ကူးပေမဲ့ ဘူတန်နိုင်ငံက တအားစိတ်ဝင်စားဖို့ကောင်းလို့ သေသေချာချာလေးရေးလိုက်တာ နည်းနည်းတော့ ရှည်သွားတယ်။ စိတ်ဝင်စားရင် ဖတ်ကြည့်ကြပါနော်။

LRM_EXPORT_153419686415129_20180929_171915832

(1) ပျော်ရွှင်ခြင်းနိုင်ငံ
————————–

ဘူတန်ကို ပျော်ရွှင်ခြင်းနိုင်ငံလို့ တင်စားခေါ်ဝေါ်ကြတာဟာ ဘူတန်က တခြားနိုင်ငံတွေလို လူတစ်ယောက်ချင်းစီရဲ့ ဝင်ငွေပေါ်မတိုင်းတာဘဲ ပျော်ရွှင်မှုကိုသာတိုင်းတာတဲ့ နိုင်ငံလေးမို့လို့ပါ။ Gross National Happiness (GNH) ကို တိုင်းတဲ့ နိုင်ငံဖြစ်လို့ ဘူတန်မှာတွေ့ရတဲ့ လူအတော်များများ အေးချမ်းပျော်ရွှင်နေကြတာကို တွေ့ရပါတယ်။ ဒါဟာ ချမ်းသာကြွယ်ဝနေလို့မဟုတ်ပေမဲ့ ရောင့်ရဲတင်းတိမ်တတ်တဲ့စိတ်၊ ရိုးရှင်းစွာနေထိုင်တတ်တဲ့စိတ်တွေကြောင့် စိတ်ချမ်းသာ ပျော်ရွှင်ကြရတာပါ။

received_303850437083193.jpeg

(2) မိုးကြိုးနဂါးနိုင်ငံ
————————–

ဘူတန်ရဲ့ အဓိပ္ပါယ်က Land of Thunder Dragon မိုးကြိုးနဂါးတိုင်းပြည် ပါ။ ဘူတန်မှာ မိုးခြိမ်းရင် ကြောက်စရာကောင်းတော့ မိုးခြိမ်းတာက နဂါးတို့ရဲ့ အရိပ်အရောင်လို့ ယူဆကြပြီး ဒီလို နာမည်ပေးခဲ့ကြပါတယ်။ ဒါကြောင့် ဘူတန်ရဲ့ အလံမှာ သာသနာ့အရောင်ဖြစ်တဲ့ အဝါနဲ့လိမ္မော်တြိဂံ ၂ခုဆက်ထားတဲ့အပေါ် နဂါးရုပ်ကြီးထပ်ထားတာပါ။

Bhutan 073.jpg

(3) Tourism ကန့်သတ်ထားတဲ့နိုင်ငံ
—————————————-

ဘူတန်ကိုသွားလည်ချင်ရင် တခြားနိုင်ငံတွေလို Budget Trip သွားလို့မရပါဘူး။ ဘာကြောင့်လဲဆိုတော့ အစိုးရက Tourist တွေအနေနဲ့ တစ်ရက်ကို US$ 250 (မြန်မာငွေ ၄သိန်းနီးပါး) အနည်းဆုံးသုံးဖို့ ကန့်သတ်ထားလို့ပါ။ အဲ့ထဲမှာ 3 star အဆင့်ရှိတဲ့ ဟိုတယ်၊ အစားအသောက်၊ အကြိုအပို့၊ ဝင်ကြေး အကုန်ပါပါတယ်။ ဒီလိုဈေးတင်ထားရတာဟာ နိုင်ငံထဲကို အပြင်လူတွေအများကြီးဝင်လာရင် ယဉ်ကျေးမှုအမွေအနှစ်တွေ၊ သဘာဝပတ်ဝန်းကျင်တွေ ပျက်စီးမှာစိုးတာကြောင့်ပါတဲ့။ Idea လေးမဆိုးဘူးနော်။ အဲ့လိုလေး ချေထားလို့လည်း နိုင်ငံကို ပိုစိတ်ဝင်စားလာကြတာပါ။

LRM_EXPORT_266944998228014_20180924_182718325.jpeg

(4) ဘုရင်အုပ်ချုပ်တဲ့နိုင်ငံ
—————————-

ဘူတန်အကြောင်းပြောရရင် ဘူတန် ဘုရင်မိသားစုအကြောင်းချန်ထားလို့မရပါဘူး။ လက်ရှိဘုရင်နဲ့ မိဖုရားရယ်၊ သားတော်လေးရယ်က ချောမွေ့လှပလွန်းလို့ ကမ္ဘာကျော်နေတာပါ။ ဘုရင်ကြီးရဲ့အသက်က ၃၈နှစ်ပဲရှိသေးပြီး မိဖုရားလေးက ဘုရင်ကြီးနဲ့ အသက်(၁၀)နှစ်ကွာပါတယ်။ ၂ယောက်လုံးက ကမ္ဘာကျော်တက္ကသိုလ်တွေက ဘွဲ့ရပညာတတ်တွေတဲ့လေ။ သားတော်လေးဆို အသက် ၃နှစ်ကျော်ကျော်လေးပဲရှိတယ်။ အရမ်းချစ်ဖို့ကောင်းတာပဲ။

LRM_EXPORT_41117295302578_20180920_141736161.jpeg

ဘူတန်နိုင်ငံ က ဘုရင်တွေ အုပ်ချုပ်တဲ့ ဒဏ္ဏာရီလာနိုင်ငံလေးလို ဖြစ်နေပေမဲ့ သက်တမ်းက ပြောရမယ်ဆိုရင် နှစ် ၁၀၀ ပဲရှိသေးတာပါ။ တိဘက်နဲ့ အိန္ဒိယက ပြည်နယ်စုတွေပေါင်းစည်းပြီး Kingdom of Bhutan ဆိုပြီး ၁၉၀၇ခုနှစ်ကမှ စတင်တည်ထောင်ခဲ့တာပါတဲ့။ ဘုရင်မင်းဆက်ဆိုလည်း အခုမှ ၅ဆက်မြောက်ပဲ ရှိပါသေးတယ်။ ၂၀၀၈ခုနှစ်က နန်းတက်ခဲ့တဲ့ ၅ဆက်မြောက်ဘုရင်နာမည်က ဂျေမီ ခေဆာ နမ်ကျယ် ဝမ်ချူး တဲ့။ ဝမ်ချူမိသားစုကဆင်းသက်လာတော့ အတိုကောက်အနေနဲ့ ဂျေမီဝမ်ချူးကို မှတ်ထားလို့ရတယ်။ ဂျေမီဝမ်ချူးဆိုတာ ဘုရင်တိုင်းမှာရှိတဲ့ နာမည်ပေါ့။ ခလယ်ကနာမည်တွေပဲ ပြောင်းသွားတာပါ။

Bjutan.jpg

(5) ရိုးရာအဆောက်အအုံတွေပဲ ဆောက်ခွင့်ရှိတဲ့နိုင်ငံ
———————————————————-

ဘူတန်မှာထူးခြားတာက အဆောက်အအုံတွေပါ။ ရိုးရာ အဆောက်အအုံတွေနေရာတိုင်းမှာတွေ့ရတယ်။ လေဆိပ်က အစ ရိုးရာအငွေ့အသက်လွှမ်းခြုံနေတယ်။ ဘူတန်မှာ အထပ်မြင့်ဆောက်ခွင့်မရှိဘူး။ အမြင့်ဆုံးမှ ၆ထပ်အထိပဲရှိတာ။ အဆောက်အအုံတွေကိုလည်း ရိုးရာစတိုင်နဲ့ပဲဆောက်ခွင့်ရှိတယ်တဲ့။ International Company တွေ ဟိုတယ်တွေကအစ ထူးခြားပြီး ဆောက်လို့မရဘူးတဲ့လေ။
နောက်သတိထားမိတာတစ်ခုက အိမ်ခေါင်မိုးတွေပေါ် ကျောက်ခဲတွေခင်းထားတာကိုပါ။ ဘူတန်မှာက တောင်ကြားကိုဖြတ်တိုက်လာတဲ့လေက အရမ်းပြင်းလို့ ခင်းထားရတာပါတဲ့လေ။

LRM_EXPORT_18892715282011_20180919_175742674.jpeg

(6) ရိုးရာဝတ်စုံဝတ်ကြတဲ့ နိုင်ငံ
———————————-

ဘူတန်မှာသတိထားမိတာ လူအတော်များများ ရိုးရာဝတ်စုံဝတ်ကြတယ်။ အစိုးရဝန်ထမ်းတွေရယ်၊ ခရီးသွားလုပ်ငန်းလုပ်နေတဲ့သူတွေရယ်၊ ကျောင်းသားကျောင်းသူတွေရယ်အနေနဲ့ ရိုးရာဝတ်စုံကို မဝတ်မနေရလို့ သတ်မှတ်ထားကြတယ်။received_677118129338680ဘူတန်ရိုးရာဝတ်စုံတွေမှာ ယောကျာ်းဝတ်ကို Gho ဂိုလို့ခေါ်တယ်။ ဂါဝန်လိုလို၊ ကုတ်အရှည်လိုလိုအပေါ်ဝတ်ကို အောက်ကဘောင်းဘီရှည်မဝတ်ဘဲ ခြေအိတ်အရှည်ရယ် ရှူးဖိနပ်ရယ်နဲ့တွဲဝတ်ရတာပါ။

LRM_EXPORT_2559842033461_20180919_203834803.jpeg
မိန်းမဝတ်ကိုတော့ Kira ကီရာလို့ခေါ်ပါတယ်။ ရှမ်းဝတ်စုံနဲ့ဆင်ပြီး ပိုးလို ဖဲလိုခပ်ပြောင်ပြောင်အစနဲ့ အပေါ်ဝတ်အင်္ကျီလက်ရှည်ကို အောက်က ထမီလိုရိုးရာအစနဲ့တွဲဝတ်တာပါ။ ထမီနဲ့ဆင်ပေမဲ့ ဝတ်ပုံဝတ်နည်းမတူပါဘူး။ အနောက်ကနေပြန်ပတ်ပြီး ကပ်ခွာတွေရော ချိတ်တွေရောသုံးပြီးဝတ်ရပါတယ်။ ဝတ်စုံတွေကလည်း ဈေးအမျိုးမျိုးရှိတယ်။ ထမီအဆင်တွေက လက်နဲ့ယက်ကြတာဆိုတော့ ဈေးကြီးကြတယ်။ တစ်စုံကို တစ်သိန်းဝန်းကျင်လောက်ရှိတယ်။ တစ်ထည်ကို ၂၃သိန်းတန်ထမီတောင်တွေ့ခဲ့ရပါတယ်။

 

Mighty Travels က ဧည့်သည်တွေကို ရိုးရာဝတ်စုံတွေ တစ်စုံဆီ လက်ဆောင်ပေးတာဆိုတော့ သင်ဖူးပွဲတော်သွားတက်တဲ့အခါ ကိုယ်တွေက ရိုးရာဝတ်စုံကို ဝတ်ပြီး ပွဲတက်ခဲ့ကြတယ်။ ဒါပေမဲ့ ရိုးရာဝတ်စုံဝတ်မယ်ဆိုရင် ဖြစ်ကတတ်ဆန်းပေးမဝတ်ပါဘူး။ ဝတ်စုံပြည့်ဝတ်မှ ရမှာတဲ့။ ဥပမာ- မိန်းကလေးတွေဆို အပေါ်ကရိုးရာပုဝါတင်ပြီး ဝတ်ရတယ်။ ယောကျာ်းလေးတွေဆိုလည်း ခြေအိတ်ရှည်နဲ့ဝတ်ရတယ်။ ဝတ်စုံပြည့်မဝတ်ရင် မလေးစားရာကြတယ်ဆိုလို့ လိုအပ်တဲ့ Accessories တွေထပ်ဝယ်ခဲ့ပြီး ဝတ်စုံပြည့်ပွဲတက်ခဲ့ကြပါတယ်။

(7) ဘာသာရေးလိုက်စားတဲ့ နိုင်ငံ
————————————-

ဘူတန်က ဘာသာရေးကို လေးလေးနက်နက်ယုံကြည်ကြပါတယ်။ မဟာယာန ဗုဒ္ဓဘာသာကိုးကွယ်တဲ့ နိုင်ငံဖြစ်ပြီး တချို့ကျေးရွာတွေမှာ နတ်ကိုးကွယ်တာလည်းတွေ့ခဲ့ရပါတယ်။ သာသနာပိုင်းမှာ ခေါင်းဆောင်ဆရာတော်က ဘုရင့်လောက်နီးနီး သြဇာရှိပါတယ်။ ဗုဒ္ဓဘာသာကိုယုံကြည်သက်ဝင်တဲ့နိုင်ငံ ဖြစ်တဲ့အလျောက် Criminal Case လည်း အရမ်းနည်းပါတယ်။

received_481242262382167.jpeg

ဘူတန်စေတီက လေးထောင့်ပုံစံ စေတီပါ။ စေတီကို ချော်တန် လို့ခေါ်ပါတယ်။ အောက်ဆုံးလေးထောင့်ပုံက မြေကြီးဓာတ်ဖြစ်ပြီး အပေါ်မှာ ရေဓာတ်၊ မီးဓာတ်၊ လေဓာတ် အဆင့်ဆင့်တင်ထားတာပါ။ အောက်ဆုံးလေးထောင့်က လောကစောင့်နတ်ကြီးလေးပါးကို ကိုယ်စားပြုပါတယ်။ အပေါ်က စေတီအဝိုင်း လေးခုက ပွင့်ပြီးသားဘုရားလေးဆူကို ကိုယ်စားပြုပြီး ၁ခုပဲဆို နောင်ပွင့်မယ့်ဘုရားကို ကိုယ်စားပြုပါတယ်။ ဘုရားစေတီတွေကိုပတ်မယ်ဆိုရင် လက်ယာရစ် ပတ်လေ့ရှိကြပါတယ်။

LRM_EXPORT_20877136746292_20180919_185103626.jpeg

LRM_EXPORT_2528047084508_20180919_203803008.jpeg

Prayer Wheel လို့ခေါ်တဲ့ လက်နဲ့လှည့်ရတဲ့ ခေါင်းလောင်းတွေရယ်၊ Prayer Flag လို့ခေါ်တဲ့ မကောင်းဆိုးဝါးတွေကိုနှင်တဲ့ ဂါထာမဌာန်တွေရေးထားတဲ့ အလံအဖြူ or အလံရောင်စုံတွေရယ်ကိုလည်း နေရာအတော်များများမှာတွေ့ရလေ့ရှိပါတယ်။

LRM_EXPORT_202267443005592_20180923_135017153.jpeg

(8) သက်ရှိတွေ ကာကွယ်တဲ့ နိုင်ငံ
————————————–

ဘူတန်မှာ အပင်ရော၊ တိရစ္တာန်ရော လွတ်လပ်စွာရှင်သန်ခွင့်ရှိတယ်။ အပင်တွေကို သက်ရှိလို့ သတ်မှတ်တဲ့အတွက် ဘူတန်ရောက်ရင် ပန်းတွေလှလို့မခူးပါနဲ့။ အာပတ်သင့်ပါလိမ့်မယ်။

ဘူတန်မှာ အကောင်တွေသတ်တာကိုလည်း ပြင်းပြင်းထန်ထန်တားမြစ်ပါတယ်။ ရှားပါးတိရစ္ဆာန်ဖြစ်တဲ့ ဘူတန်မှာပဲ တွေ့ရတဲ့ လည်တံမည်းကြိုးကြာငှက်ကို သတ်ရင် ထောင်ဒဏ်တစ်သက်တစ်ကျွန်းကျတဲ့အထိ အပစ်ကြီးပါတယ်။ အဲ့ငှက်တွေ ကျက်စားလေ့ရှိတဲ့နေရာမှာဆို အစားအသောက်ကောင်းအောင် ရေမြေထိန်းသိမ်းပေးထားတာတဲ့။ ငှက်တွေထိခိုက်မှာဆိုးလို့ အဲ့နေရာတဝိုက် ဓာတ်ကြိုးတွေတောင် သွယ်ခွင့်မရှိဘဲ မြေအောက်ကနေသွယ်ရတယ်တဲ့လေ။

LRM_EXPORT_22983226696491_20180919_193934909.jpeg

LRM_EXPORT_22529886120519_20180919_193201569.jpeg

(9) ကမ္ဘာပေါ်မှာလူမတက်ရသေးတဲ့ အမြင့်ဆုံးတောင်ရှိတဲ့ နိုင်ငံ
———————————————————————–

Buhtan အမြင့်ဆုံးတောင်ထိပ် Gangkhar Puensum က ကမ္ဘာပေါ်မှာ ၄၀ခုမြောက်အမြင့်ဆုံးတောင်ပါတဲ့။ ဒါပေမဲ့ ကမ္ဘာပေါ်မှာလူမတက်ရသေးတဲ့တောင်ထိပ်မှာ အမြင့်ဆုံးပါပဲ။ ဘာကြောင့်လည်းဆိုတော့ ဘူတန်တွေက အယူသည်းပြီး တောင်ပေါ်ပေးမတက်တာကြောင့်ပါ။ လူတွေတောင်ထိပ်ပေါ်တက်ရင် ရာသီဥတုပျက်မယ်၊ စိုက်ပျိုးရေးမဖြစ်ထွန်းဘဲ အစာရေစာခေါင်းပါးမယ်ဆိုပြီး အယူရှိလို့ပေးမတက်တာပါတဲ့။

LRM_EXPORT_142932840937042_20180922_062528328.jpeg

(10) ကမ္ဘာ့ဆင်းရအခက်ဆုံးလေဆိပ်ရှိတဲ့ နိုင်ငံ
—————————————————-

ဘူတန်ကိုသွားချင်ရင် တိုက်ရိုက်သွားလို့ မရပါဘူး။ ဘန်ကောက်ကတဆင့် Butan Airlineနဲ့ သွားရပါတယ်။ ဘန်ကောက်ကနေ ဘူတန်အသွားလေယာဉ်မှာ ဘယ်ဘက်ထိုင်ခုံရအောင်တောင်းပါ။ ရာသီဥတုသာယာရင် လမ်းမှာ ကမ္ဘာ့အမြင့်ဆုံး ဧဝရက်တောင်ကို လေယာဉ်ပေါ်က လှမ်းမြင်ရပါလိမ့်မယ်။ ဘူတန်ရဲ့ တစ်ခုတည်းသော အပြည်ပြည်ဆိုင်ရာလေဆိပ် Paro Airport က ကမ္ဘာ့ဆင်းရအခက်ဆုံးလေဆိပ်တွေထဲက တစ်ခုပါ။ တောင်တွေကို ဖြတ်ပြီး တောင်ကြားထဲက လေဆိပ်ကို ဆင်းရတာ ပညာသားပါပါတယ်။ Well Trained Pilot တွေသာဆင်းနိုင်တာပါ။ ဒါကြောင့်လည်း လေဆိပ်ကို ချောချောမွေ့မွေ့ဆိုက်ရောက်တဲ့အခါ လေယာဉ်စီးခရီးသည်တွေ လက်ခုပ်တီး ဂုဏ်ပြူကြတာကို တွေ့ခဲ့ရတာပါ။

dav

(11) မီးပွိုင့်မရှိတဲ့ နိုင်ငံ
————————–

ကမ္ဘာပေါ်မှာ မီးပွိုင့်မရှိတဲ့ နိုင်ငံကိုပြပါဆို ဘူတန်ကိုပဲပြရမှာပါ။ ဘူတန်မြို့တော် သင်ဖူးက ကမ္ဘာပေါ်မီးပွိုင့်မရှိတဲ့ မြို့တော်၂ခုထဲကတစ်မြို့ပါ။ နောက်တစ်မြို့ကတော့ မြောက်ကိုရီးယားမြို့တော် ပြုံးယမ်းပါတဲ့။ သင်ဖူးမြို့မှာ မီးပွိုင့်မရှိတော့ ကားအရမ်းရှုပ်တဲ့ လမ်းဆုံလမ်းခွတစ်ခုမှာတော့ ယဉ်ထိန်းရဲတစ်ယောက်ကို တာဝန်ချထားရပါတယ်တဲ့လေ။

LRM_EXPORT_179343300871590_20181024_224249924.jpeg

(12) TV နဲ့ Internet နောက်အကျဆုံးသုံးတဲ့ နိုင်ငံ
——————————————————-

ဘူတန်မှာအရင်တုန်းက TVနဲ့ အင်တာနက်တွေကို ပိတ်ပင်တားမြစ်ထားပြီး လွန်ခဲ့တဲ့ ၁၉နှစ်ကျော် ၁၉၉၉ခုနှစ်မှာမှ TV တွေ Internet တွေ အသုံးပြုခွင့်ပေးလိုက်တာတဲ့လေ။

LRM_EXPORT_201866006541070_20180923_134335716

 

————————–
Quick Facts
————————–

• အိမ်နီးချင်းနိုင်ငံ – တရုတ်နဲ့ အိန္ဒိယ
• လူဦးရေ – ၇သိန်းကျော်
• မြို့တော် – သင်ဖူး
• ငွေကြေး – Nu နူ လို့ခေါ်ပါတယ်။ ၁ နူကိုမြန်မာငွေ ၂၂ကျပ်ကျပါတယ်။
• ရာသီဥတု – နွေဦး၊ နွေ၊ ဆောင်းဦး၊ ဆောင်း ဆိုပြီး ၄မျိုးရှိပါတယ်။ ကိုယ်တွေရောက်ခဲ့တဲ့ Spetember လကတော့ နွေအကုန် ဆောင်းဦးအကူး ကာလမို့လို့ အရမ်းမပူဘဲနေလို့ကောင်းပါတယ်။
• National Flower – တောင်ဇလပ်မျိုးနွယ်ဖြစ်ပြီး မေလလောက်ပွင့်လေ့ရှိပါတယ်။ Blue Poppy လို့ခေါ်တဲ့ ဘိန်းပန်းကိုလည်း National Flower အဖြစ်သတ်မှတ်ထားကြပါတယ်။
• National Animal – သားမင်းလို့ခေါ်တဲ့ နွားကိုယ်ဆိတ်ခေါင်းရှိပြီး ဒဏ္ဏာရီနဲ့ ဆက်စပ်တဲ့အကောင်ပါ။ အဲ့လိုအကောင်က ကမ္ဘာပေါ်မှာ ၄နိုင်ငံပဲရှိတာတဲ့။ မြန်မာ၊ နီပေါ၊ တရုတ်၊ ဘူတန်မှာပဲ တွေ့ရတာတဲ့လေ။
• National Bird – တောကျီးကန်းပါ။ ဘုရင်တွေဆောင်းတဲ့ ဥသျှောင်ထိပ်မှာတွေ့ရတဲ့ အကောင်ပါ။
• National Tree – Cyprus အပင်

dav

အုပ်ချုပ်ရေး
————————–
အုပ်ချုပ်ရေးကတော့ Democracy & Constitutional Monarchy စနစ်နဲ့အုပ်ချုပ်ပါတယ်။ သူတို့ဆီမှာလွှတ်တော်ရှိပေမဲ့ ဘုရင်ကိုချစ်ကြောက်ရိုသေလို့ ဘုရင်ရဲ့ ဆုံးဖြတ်ချက်ကို အတည်ယူပါတယ်။

ကာကွယ်ရေး
————————–
ကာကွယ်ရေးပိုင်းအနေနဲ့ စစ်တပ်က ကိုယ်ပိုင်စစ်တပ်ရှိပေမဲ့ အိန္ဒိယကစစ်တပ်ကို အဓိကအားထားပါတယ်။ ကာကွယ်ရေးသာမက စီးပွားရေးမိတ်ဖက်အနေနဲ့ India ကို တည့်အောင်ပေါင်းထားပါတယ်။ အိန္ဒိယကို Hydro Power ရေအားလျှပ်စစ်ပြန်ရောင်းပေးပါတယ်။ တိဘက်ကို တရုတ်ကသိမ်းပြီးနောက် တရုတ်ကိုကြောက်သွားတာကြောင့် India နဲ့ မဟာမိတ်ဖွဲ့ထားတာပါတဲ့လေ။

rhdr

စီးပွားရေး
————————–
နိုင်ငံရဲ့ အဓိကစီးပွားရေးက Tourism ပါ။ ရေစီးသန်တဲ့မြစ်တွေရှိလို့ ရေအားလျှပ်စစ်ရောင်းပြီးလည်း ဝင်ငွေရပါတယ်။ နိုင်ငံရဲ့ 60%က တောယာတွေမို့လို့ စိုက်ပျိုးရေးလည်း ဖြစ်ထွန်းပါတယ်။

LRM_EXPORT_40326937936032_20180920_140425804.jpeg

ရိုးရာအစားအစာ
————————–
ကိုယ်တွေလိုမျိုး ထမင်းနဲ့ဟင်းစားပါတယ်။ သူတို့အစားအစာတွေက တရုတ်စာတွေနဲ့ဆင်ပေမဲ့ အသားအစားနည်းပါတယ်။ နိုင်ငံထဲမှာ အသားသတ်လို့မရတော့ အသားကို India နဲ့ Nepal ကနေ တင်သွင်းလေ့ရှိကြတယ်တဲ့လေ။ ဟင်းသီးဟင်းရွက်က ရေခံမြေခံကောင်းတော့အရမ်း လတ်ဆတ်ပါတယ်။ ချိစ်လည်း အစားများတယ်။ Yakလို့ခေါ်တဲ့ တိဘက်နွားနို့ကနေရတဲ့ ချိစ်ကို စားကြတယ်။


အကြိုက်ဆုံးကတော့ ဟီမာတာချီ လို့ခေါ်တဲ့ ငရုတ်သီး-ချိစ်ချက်ပါ။ ငရုတ်သီး ငပိချက်ဟုတ်ဘူး။ ချိစ်ချက်။ ငရုတ်သီးအတောင့်အစိမ်းကို ခွဲပြီး ချိစ်နဲ့ရောချက်စားတာ အီအီစပ်စပ်လေးနဲ့ကောင်းမှကောင်း။
ဘူတန်မှာ ကွမ်းလည်း စားကြတယ်။ ကွမ်းကိုဆေးတွေမထည့်ဘဲ ကွမ်းရွက်နဲ့ ကွမ်းသီးပဲစားကြတာပါ။ ဘူနန်ကွမ်းကို Dolma လို့ခေါ်ပါတယ်။

ဘာသာစကား
————————–
Dzongkha လို့ခေါ်တဲ့ ဘာသာစကားသုံးလေ့ရှိပြီး တခါတလေ နီပေါစကားပြောတတ်ကြပါတယ်။ အတော်များများက English လိုလည်း ပြောတတ်ကြတာကို တွေ့ခဲ့ရပါတယ်။ အသုံးဝင်မယ့် စကားစုတွေကတော့
• မင်္ဂလာပါ – ဂူဇူဇမ်ဘိုလာ
• ကျေးဇူးတင်ပါတယ် – ကတ်သရင်းချေလာ
• နှုတ်ဆက်တဲ့အခါ – ကံကောင်းပါစေ – တာချီတလဲ

LRM_EXPORT_201443678814572_20180923_133633388

————————–
ဘယ်တွေလည်မလဲ
————————–

ဘူတန်က ဟိမဝန္တာတောင်ကြောတွေပေါ်တည်ထားတဲ့ နိုင်ငံဆိုတော့ မြို့လေးတွေကလည်း အေးချမ်းလှပါတယ်။ တောင်ကြားထဲ စီးဆင်းနေတဲ့ မြစ်တလျှောက် လမ်းဖောက်ထားတဲ့ ကားလမ်းအတိုင်း တစ်မြို့နဲ့ တစ်မြို့ကို ကားနဲ့သွားရပါတယ်။ ကားမူးတတ်တဲ့သူတွေဆိုရင်တော့ Novomin တို့လို အမူးအမော်ပျောက်ဆေးတွေ ဆောင်ထားသင့်ပါတယ်။
မြို့တွေမှာတော့ ဖူးမြော်စရာ စေတီတွေ၊ ဘုရားကျောင်းတွေ၊ ဗိမာန်တော်တွေရှိကြတယ်။ ဘူတန်ကို အဓိကသွားတာကတော့ ရှုမြော်ခင်းတွေနဲ့ သူတို့ရဲ့ Unique Culture ကြောင့်ပါ။ ဘူတန်ရောက်ခဲ့တဲ့ ၄ရက်အတွင်း မြို့၃မြို့ရောက်ခဲ့တယ်။ အဲ့ဒီ ၃မြို့နဲ့ လည်ပတ်စရာနေရာတွေကတော့….

ပါရိုမြို့
————————–

ဘူတန်မှာ အပြည်ပြည်ဆိုင်ရာလေဆိပ်ရှိတဲ့တစ်ခုတည်းသောမြို့ပါ။ ဘူတန်ကိုလာချင်ရင် ဒီမြို့ကိုအရင်ဆုံးရောက်ပါလိမ့်မယ်။ ဘူတန်ရဲ့ အထင်ကရ Tiger Nest ကျားသိုက်ကျောင်းတော်ကြီးရှိတဲ့ မြို့ဆိုလည်း မမှားပါဘူး။ Tiger Nest က ကျောက်တောင်ကြီးရဲ့ ကမ်းပါးမှာ ၁၆ရာစုခန့်ကတည်ဆောက်ခဲ့တဲ့ ဘုန်းကြီးကျောင်းပါ။ ဘုန်းကြီးကျောင်းရောက်ဖို့ တောင်တက်လမ်းအတိုင်း ၄-၅နာရီလောက်ကြာ အတက်အဆင်းလုပ်ရတာဆိုတော့ ခြေထောက်မကောင်းတဲ့ လူကြီးတွေအနေနဲ့တော့ သွားဖို့ မသင့်တော်ပါဘူး။ မသွားနိုင်ရင် အဲ့ဒီအစားမြို့ထဲက အထင်ကရနေရာတွေကို လိုက်ပို့ပေးပါတယ်။ မြင်းနဲ့လမ်းရဲ့ ၃ပုံတစ်ပုံလောက်တော့တက်လို့ရပေမဲ့ ကျန်တာက လမ်းလျှောက်တက်ရပါတယ်။ မြင်းနဲ့ဆင်းလို့လည်းမရပါဘူး အတက်ပဲရတာပါ။

LRM_EXPORT_200213670518405_20180923_130158021

သင်ဖူးမြို့
————————–

သင်ဖူးကတော့ လက်ရှိမြို့တော်ဖြစ်ပြီး နွေရာသီမြို့တော်လို့လည်းခေါ်ကြပါတယ်။ ရာသီဥတုက အေးစိမ့်စိမ့်လေးရှိတာကြောင့်ပါ။ သင်ဖူးမှာ ဘူတန်ဘုရင်နန်းတော်နဲ့ သင်ဖူးဗိမာန်တော်၊ အောက်မေ့ဖွယ်စေတီ၊ Changnakha ဘုန်းတော်ကြီးကျောင်း၊ အကြီးဆုံး ထိုင်တော်မူကြေးသွန်းဘုရား၊ သားမင်းတွေမွေးမြူထားတဲ့ ဥယျာဉ်တွေဆီ သွားရောက်လေ့လာနိုင်ပါတယ်။

rhdr

ဘူတန်မှာပွဲတော်တွေကို နိုင်ငံအနှံ့ လစဉ်ကျင်းပတာ သင်ဖူးမြို့တော်မှာ ကျင်းပတဲ့ သင်ဖူပွဲတော်ကတော့ အကြီးကျယ်အခမ်းနားဆုံးပေါ့။ မြို့တော်မှာကျင်းပတဲ့ပွဲဆိုတော့ တချို့နှစ်တွေမှာ ဘုရင်ကိုယ်တိုင်ကြွလာပြီး အားပေးလို့ ကံကောင်းရင် ဘုရင်ကိုတောင် တွေ့နိုင်ပါတယ်။

oznor

ကိုယ်တွေသွားတဲ့အချိန်နဲ့ ကြုံလို့ သင်ဖူးပွဲတော်တက်ရောက်ခဲ့သေးတယ်။ တကယ့်ကို ဒဏ္ဏာရီထဲ ရောက်သွားသလိုပါပဲ။ မြို့နေလူတွေရော အနီးအနားရွာကလူတွေပါ ပွဲတော်ကို ရိုးရာဝတ်စုံကိုယ်စီနဲ့ ဝတ်ကောင်းစားလှတွေ ဝတ်ပြီး လာတက်ကြတာ ဘူတန်အကယ်ဒမီပေးပွဲရောက်နေသလိုပဲ။ မြင်မြင်သမျှလှနေကြတာ။ ပွဲတော်မှာ တစ်နေကုန် အကအလှတွေနဲ့ ဖျော်ဖြေတော့ ပွဲတော်လာတဲ့ ပရိသတ်တွေလည်း ဝင်လာမစဲ တသဲသဲရယ်ပေါ့။ ဘူတန်သွားမယ်ဆိုရင် ပွဲတော်ရက်နဲ့ တိုက်သွားဖို့ အကြံပေးချင်ပါတယ်။ တကယ့်ကို ဆန်းသစ်တဲ့ အတွေ့အကြုံကို ခံစားရမှာပါ။

cof

ပူနားခါး
————————–

ပူနားခါးမြို့ကတော့ ၁၉၅၅ခုနှစ်အထိ မြို့တော်ဖြစ်ခဲ့တဲ့ မြို့လေးဖြစ်ပြီး အခုချိန်မှာတော့ ဆောင်းရာသီမြို့တော်လို့ တင်စားထားပါတယ်။ ဘာကြောင့်လဲဆိုတော့ ဆောင်းရာသီတခြားနေရာမှာအေးနေတဲ့အခါ ဒီမှာနွေးနေတတ်တာကြောင့်ပါ။


ဖိုချူးနဲ့ မိုချူး အဖေမြစ်နဲ့ အမေမြစ်ဆုံရာ နေရာမှာ ရှိတဲ့ ပူနားခါးက ဂျုံ (Dzhong)လို့ခေါ်တဲ့ ကျက်သရေဆောင်ဗိမာန်တော်ကြီးကတော့ လှလွန်းလို့ ပို့စကတ်တွေမှာ ခဏခဏမြင်ရတဲ့ အဆောက်အအုံပါ။ ဘုရင်မင်းဆက် အဆက်ဆက်က Cronation နန်းတက်ပွဲ၊ လက်ထပ်ထိမ်းမြားပွဲတွေကျင်းပရာနေရာဖြစ်သလို သာသနာ့ နာယကကျောင်းထိုင်ရာ ကျောင်းလည်းဖြစ်ပါတယ်။ အုပ်ချုပ်ရေးပိုင်းဆိုင်ရာအဆောက်အအုံ၊ ခံတပ်၊ နန်းတော်အနေနဲ့ အသုံးပြုခဲ့ကြတဲ့နေရာပါ။ သူတို့လူမျိုးတွေအနေနဲ့ ဂျုံထဲဝင်ရောက်တဲ့အခါ အရိုအသေပေးတဲ့အနေနဲ့ ရိုးရာဝတ်စုံပေါ် အဖြူရောင်ပုဝါကိုပတ်ပြီးဝင်ကြတာကိုတွေ့ခဲ့ရပါတယ်။

LRM_EXPORT_22637160126752_20180919_193348843.jpeg

သားဆုပန်နတ်ကွန်း
————————–

ပူနားခါးမြို့နားမှာ သားသမီးရအောင် ဆုပန်တဲ့ နတ်ကွန်းတစ်ခုရှိတယ်။ အဲ့နတ်ကွန်းရှိတဲ့ ရွာလေးကလည်း အရမ်းထူးဆန်းတာပဲ။ ရိုးရာအိမ်တွေရဲ့ နံရံတွေမှာ အမျိုးသားလိင်အင်္ဂါပုံကို ကာတွန်းပုံ၊ ပန်းချီပုံ အရောင်စုံဆွဲပြီး အလှဆင်ထားကြတာ။ သားသမီးရဖို့ အဆောင်အယောင်လို့ သဘောထားပြီး အလှဆင်ထားတာတဲ့။ ပုံတူရုပ်တု လေးတွေတောင် Size စုံ၊ အရောင်စုံ ရောင်းလို့ အမှတ်တရ ဝယ်သွားလို့ရတယ်နော့။

rhdr

rhdrFB_IMG_1545901254672

LRM_EXPORT_41229950990582_20180920_141928817.jpeg

Dochular Pass
————————–

ပါရိုကနေ ပူနားခါး အသွားလမ်းမှာရှိတဲ့ တောင်ပေါ်မှာတည်ထားတဲ့ ဘူတန်ရိုးရာ လေးထောင့် စေတီ ၁၀၈ဆူပါ။ တတိယဘုရင်က ဆေးလိပ်အရမ်းသောက်လို့ အဆုတ်ကင်ဆာရောဂါဝေဒနာခံစားရတဲ့အခါမှာ ဘုရင်ကြီးကျန်းမာရေးအတွက်ရည်စူးပြီး စေတီတွေတည်ထားခဲ့ကြတာပါ။ ဘုရင်ကြီးဆုံးပြီးနောက် သားတော် စတုတ္ထဘုရင်လက်ထက်မှာ ဆေးလိပ်ကို စိတ်နာလို့ ဆေးလိပ်နဲ့ ပတ်သက်ပြီး ပိတ်ပင်တားမြစ်ခဲ့ကြတယ်တဲ့လေ။ ဒီတောင်ပေါ်ဘုရားနားက စားသောက်ဆိုင်က ရှုခင်းတွေလှသလို စားလို့လည်း သိပ်ကောင်းပါတယ်။ ရာသီဥတုသာယာတဲ့အခါ ဒီတောင်ပေါ်ကနေ ဘူတန်ရဲ့ အမြင့်ဆုံးတောင်ထိပ်အပါအဝင် နှင်းတွေဖုံးနေတဲ့ တခြားတောင်ထိပ်တွေကိုပါ လှမ်းမြင်ရပါတယ်။

LRM_EXPORT_142949252074018_20180922_062544738.jpeg

ဒါကတော့ စက်တင်ဘာလတုန်းက သွားရောက်ခဲ့တဲ့ ဘူတန်ခရီးစဉ်မှာတွေ့ခဲ့ ကြုံခဲ့ရတာလေးတွေရယ်၊ စိတ်ဝင်စားဖို့ကောင်းတာလေးတွေရယ်ကို ပြန်ပြောပြထားတာပါ။ ပုံလေးတွေမှာလည်း ရှင်းပြထားလို့ ဝင်ကြည့်ကြပါနော်။ နုမြတ်တို့ မိသားစုကတော့ ဒီတစ်ခေါက်ဘူတန်ခရီးကို ဘူတန်ခရီးစဉ်တွေ စီစဉ်လေ့ရှိတဲ့ Mighty Days နဲ့သွားခဲ့တာပါ။ နောက်ထပ်လည်း ခရီးစဉ်တွေ ထွက်ဖို့ရှိတော့ စိတ်ဝင်စားရင် Mighty Days မှာ စုံစမ်းနိုင်ပါတယ်နော်။

သီတင်းကျွတ်အခါသမယမှာ ပျော်ရွှင်ကြည်နူးချမ်းမြေ့ကြပါစေ
ချစ်ခင်လျှက်
မနုမြတ်
Nu Myat around the World

LRM_EXPORT_153419686415129_20180929_171915832

လာအိုကို ဘန်ကောက်ကနေ ညရထားနဲ့သွားမယ် (Bangkok to Laos by Train)

လာအိုကို ဘန်ကောက်ကနေ
ညရထားနဲ့သွားမယ်

 
ကိုယ်တွေရဲ့ အိမ်နီးချင်းနိုင်ငံလေး လာအိုဟာ နီးရက်နဲ့ဝေးနေတဲ့ နိုင်ငံလေးပါ။ သူ့ဆီ မြန်မာနိုင်ငံကနေ တိုက်ရိုက်လေကြောင်းလိုင်းမရှိတော့ လွယ်လွယ်ကူကူသွားလို့မရဘူးဖြစ်နေတာပေါ့။ လာအိုကိုသွားချင်ရင် တခြားနိုင်ငံကနေတဆင့်သွားမှ ရမှာပါ။ များသောအားဖြင့် ထိုင်းကနေ တဆင့်သွားကြပါတယ်။

ထိုင်းကနေ လာအိုဆီ လေယာဉ်နဲ့သွားနိုင်သလို ရထားရယ်၊ ကားရယ်နဲ့လည်းသွားလို့ရပါတယ်။ ကျွန်မတို့ကတော့ ထိုင်းနိုင်ငံ ဘန်ကောက်ကနေ ညအိပ်ရထားစီးပြီး လာအိုနိုင်ငံကိုသွားခဲ့တာပါ။ ဘန်ကောက်ရောက်တုန်း လာအိုဘက်ပါ သွားလည်မယ်ဆိုပြီး လာအိုမြို့တော်ဗီယန်ကျင်းမြို့နဲ့ Adventure တွေအများကြီးလုပ်လို့ရတဲ့ သဘာဝမြို့လေး ဗန်ဗီယန်းမြို့ကို သွားလည်ခဲ့တာပါ။

 

IMG_1632

ညရထားအမျိုးအစားနဲ့ ဈေးနှုန်း

ဘန်ကောက်ကနေ လာအိုကို ရထားနဲ့သွားမယ်ဆိုရင် ထိုင်း-လာအိုနယ်စပ်မြို့ဖြစ်တဲ့ နွန်းခိုင်မြို့(Nong Khai) ကနေတဆင့် သွားမှရမှာပါ။ Bangkok – Nong Khai ရထားလက်မှတ်ကို ဘန်ကောက်မြို့ထဲက Hua Lumpong ဘူတာကြီးမှာ သွားဝယ်ရပါတယ်။ နုမြတ်တို့ကတော့ အဲ့တုန်းက Baiyoke Sky မှာတည်းတော့ ဟိုတယ်ဘေးက Travel Agent မှာ ဝယ်ခဲ့ပါတယ်။

IMG_1086

နွန်းခိုင်သွားတဲ့ ရထားတွေထဲမှာ ညအိပ်စင်ပါတဲ့ ညရထား၂မျိုးရှိပါတယ်။ ည ၈နာရီထွက်တဲ့ Special Express အမျိုးအစား Number 25 က ပိုကောင်းပြီး ပိုသန့်ပါတယ်။ အဲ့ရထားလက်မှတ် မရှိတော့လို့ ည၈း၄၅ ထွက်တဲ့ Rapid အမျိုးအစား Number 133 ကိုပဲ စီးခဲ့ရပါတယ်။

ည၈နာရီထွက်တဲ့ ရထားမှာ ၂ယောက်သီးသန့် အိပ်ခန်း 1st Class ရှိပြီး အပေါ်ခုံ ၁၁၅၇ဘတ် (၄၆၀၀၀ကျပ်) အောက်ခုံ ၁၃၅၇ဘတ် (၅၄၀၀၀ကျပ်) ကျသင့်ပါတယ်။ 2nd class ကတော့ အိပ်စင်ပါတဲ့ ဘုံအခန်းဖြစ်ပြီး အပေါ်ခုံ ၇၄၈ဘတ်(၃၀၀၀၀ကျပ်) အောက်ခုံ ၈၃၈ဘတ် (၃၃၅၀၀ ကျပ်)ပါ။ အဲကွန်းပါပါတယ်။

ည၈း၄၅ထွက်တဲ့ရထားမှာတော့  အဲကွန်းပါတဲ့ 2nd Class အိပ်စင်ဘုံခန်းက အပေါ်ခုံဆို ၆၁၈ဘတ်(၂၅၀၀၀ကျပ်) နဲ့ အောက်ခုံဆို ၆၈၈ (၂၇၅၀၀ကျပ်) ဘတ်ပါ။ အဲကွန်းမပါတဲ့ ထိုင်ခုံတွဲတွေလည်းရှိပါတယ်။ 2nd Class ဆို ၃၄၈ဘတ် (၁၄၀၀၀ကျပ်) နဲ့ 3rd Class ဆို ၂၁၃ ဘတ် (၈၅၀၀ကျပ်) ပဲကျမှာပါ။

နုမြတ်တို့ သွားခဲ့တာက ၃ယောက်ဆိုတော့ 2nd Classမှာ အောက်၂ခုံ ပေါ်တစ်ခုံ ယူလိုက်ပါတယ်။ ၁ဘတ်ကို ၄၀ကျပ်နဲ့ တွက်မယ်ဆိုရင်တော့ အပေါ်ခုံက ၂၅၀၀၀ ကျပ်နဲ့ အောက်ခုံက ၂၇၅၀၀ ကျပ်ဝန်းကျင်လောက်ကျသင့်မှာပါ။

IMG_1223

ရထားစီးအတွေ့အကြုံ

Hua Lumpong ဘူတာကြီးဆီကို မြို့ထဲ Pratunam ဝန်းကျင်ကနေသွားမယ်ဆိုရင် ၁၀မိနစ်လောက်ပဲကြာပါတယ်။ ၁နာရီကျော်လောက် ကြိုအရောက်သွားပြီး ကိုယ့်ရထားတွဲကို သေချာရှာပြီး ခုံတွေမှာနေရာချရပါမယ်။ ရထားပေါ်တက်တက်ချင်း ရိုးရိုးထိုင်ခုံတွေလိုပါပဲ။ ရထားမောင်းပြီး ခဏအကြာမှာမှ  အိပ်ယာလာပြင်ပေးပါတယ်။ အိပ်စင်က အပေါ်နဲ့ အောက် ၂ဆင့်လိုဖြစ်ပြီး အပေါ်တက်ဖို့ လှေကားလေးတွေလည်းရှိပါတယ်။သဘောကျတာလေးတစ်ခုက ပြတင်းပေါက်ဘေးတင်မဟုတ် လျှောက်လမ်းဘေးမှာပါ လိုက်ကာလေးတွေ ကာပေးထားတော့ ကိုယ်အိပ်တဲ့အခါမှာ Privacy ရှိတာကိုပါ။

ရထားက ည၈နာရီရထားလောက်တော့ မသန့်ပါဘူး။ ဒါပေမဲ့ အဲကွန်းခန်းနဲ့ဆိုတော့ သူ့ဟာနဲ့ သူတော့ အဆင်ပြေပါတယ်။ Luggage တွေပါလာရင်လည်း ကိုယ့်အိပ်စင်နားမှာ ထားလို့ရတယ်။ ဖုန်းအားသွင်းဖို့ အပေါက်လည်းပါပါတယ်။ အိမ်သာကတော့ ဘုံအိမ်သာပေါ့။ ရေချိုးခန်းမပါပေမဲ့ ဘေစင်တော့ပါတယ်။ ရထားက အရမ်းမလှုပ်တော့ အိပ်ရတာအဆင်ပြေပါတယ်။

ရထားပေါ်မှာ ကိုယ်တွေဆီမှာလိုပဲ မနက်စောစောမှာ ဈေးသည်တွေတက်ရောင်းပါတယ်။ မနက်မှာလာရောင်းတဲ့  ကြက်ကင်နဲ့ ကောက်ညှင်းကောင်းမှကောင်းပဲ။ ကြက်ကင်အကြီးကြီး တစ်ကောင်လုံးမှ ဘတ်၆၀ပဲပေးရတယ်။ အရမ်းအရသာရှိတာပဲ။ သွားဖြစ်ရင် ဝယ်စားကြည့်နော်။

ထိုင်း-လာအိုနယ်စပ်

မနက် ၈း၃၅မှာ နွမ်းခိုင်မြို့ဘူတာကို ရောက်ပြီး ဘူတာကနေ ထိုင်းနယ်စပ်ဖြတ်ကျော်ဂိတ်ဆီ တုပ်တုပ် ၁၀မိနစ်လောက်စီးသွားရပါတယ်။ ထိုင်း Immigration Gate ကနေ Passport ပြပြီးထွက်ကာ ထိုင်း-လာအို ချစ်ကြည်ရေးတံတားဖြတ်သွားရပါတယ်။ ဒီတံတားဖြတ်ဖို့ ဘတ်စ်ကားတွေရှိပါတယ်။ ၅မိနစ်လောက် မောင်းရပြီး တစ်ယောက်ကို ဘတ်၂၀ ပေးရပါတယ်။ မြစ်တစ်ဖက်ရောက်တဲ့အခါ လာအို Immigration Gate ကိုဖြတ်ပြီး လာအိုကိုသွားနိုင်ပါတယ်။ လာအိုနိုင်ငံတွင်း ဝင်ရောက်ဖို့ Passport ပဲလိုပြီး Visa မလိုပါဘူး။

သတိထားရမှာကတော့ လာအိုကနေ ထိုင်းကိုပြန်ဝင်မယ်ဆိုရင် ကုန်းလမ်းကဝင်ရင် ထိုင်းဗီဇာလိုပါလိမ့်မယ်။ လေကြောင်းနဲ့ဆိုရင်တော့ မလိုပါဘူး။ ဒါကြောင့် လာအိုအသွားကို ကြိုက်သလို သွားလို့ရပေမဲ့ လာအိုကနေအပြန်ကတော့ လေယာဉ်ပျံနဲ့ဲပြန်တာပိုကောင်းမှာပါ။ ကုန်းကြောင်းက ပြန်ရင်လည်း ထိုင်းဂိတ်မှာ Re-entry Visa ပြန်လျှောက်ရင်ရပါတယ်။ ဘတ်၁၀၀၀ (၄၀၀၀၀ကျပ်) လောက်တော့ကျပါလိမ့်မယ်။ ကိုယ်တွေကတော့ အပြန်ကို လေယာဉ်နဲ့ပဲပြန်ခဲ့ပါတယ်။ Bangkok Transit ဖြစ်ပေမဲ့ ထိုင်းထဲမဝင်တော့ဘဲ ရန်ကုန်တိုက်ရိုက် ပြန်ခဲ့ပါတယ်။

IMG_1184

လာအိုရောက်ပြီ

လာအိုနိုင်ငံ Immigration ကိုကျော်ပြီးတဲ့အခါမှာတော့ လာအိုနိုင်ငံတွင်းမြို့အသီးသီးဆီသွားလို့ရတဲ့ ကားဂိတ်တွေ တွေ့ရပါတယ်။ အဲ့ဒီကနေ ဗန်ဗီယန်းမြို့ကို ကားဂိတ်ကနေ တန်းသွားခဲ့ကြတာပါ။ နယ်စပ်ဂိတ်ကနေ ဗန်ဗီယန်းမြို့ကို ကားနဲ့ ၄နာရီလောက်ပဲမောင်းရပြီး ကားခ တစ်ယောက်ကို မြန်မာငွေ၈၀၀၀ကျပ်လောက်ပဲ ကျပါတယ်။ မြို့တော် ဗီယန်ကျန်းကိုဆိုရင် နာရီဝက်လောက်ပဲကြာမှာ ဖြစ်ပြီး လောင်ပရာဖန်ကို တန်းသွားမယ်ဆိုရင်တော့ ၈နာရီကြာမှာပါ။ နုမြတ်တို့ကတော့ ဗန်ဗီးယန်း မြို့ကို အရင်သွားခဲ့တယ်။ အပြန် ဗီယန်ကျင်းကနေ လေယာဉ်နဲ့ပြန်မှာဆိုတော့ စိတ်ချရအောင်ပေါ့။

 

Van Vieng မြို့

ဗန်ဗီယန်းက တကယ်တော့ တောတောင်တွေ ဝန်းရံနေတဲ့ နယ်မြို့သေးသေးလေးပါ။ မြို့ထဲမှာလမ်းဆိုလို့ လမ်းသုံးလမ်းရယ်၊ ဈေးရယ်၊ အဝေးပြေးဂိတ်ရယ်ပဲရှိလို့နေတာပါ။ ထူးခြားတာကတော့ အဲ့ဒီ နယ်မြို့သေးသေးလေးမှာ နိုင်ငံခြားသားတွေ ပြည့်နေတာကိုပါ။ အထူးသဖြင့် အနောက်နိုင်ငံသားတွေနဲ့ ကိုရီးယားတွေ အလာများပါတယ်။ ဧည့်လာများတဲ့မြို့ဖြစ်တော့ ဒေသခံတွေထက်တောင် ဧည့်သည်က ပိုလို့တောင်များနေပါတယ်။ မြို့ထဲဘာမှသိပ်မရှိပေမဲ့ အကောင်းစား ဟိုတယ်ကြီးတွေ၊ Resort တွေ၊ တည်းခိုခန်းတွေ၊ Backpacker တွေအတွက် Hostel အဆောင်တွေ၊ စားသောက်ဆိုင်တွေ၊ ဘားတွေနဲ့ ပြည့်လို့နေပါတယ်။

IMG_1339

ဗန်ဗီယန်းကို ဧည့်သည်တွေလာကြတဲ့ အဓိကအချက်ကတော့ တောတောင်မြစ်ချောင်း သဘာဝတရားတွေကြောင့်ပါ။ ဧည့်သည်တွေက မြို့ကို ဖြတ်စီးနေတဲ့ နမ်ဆန်မြစ်ထဲ Kayak လှေလှော်ကြတယ်။ Tubing လို့ခေါ်တဲ့ ဘောကွင်းပေါ်ထိုင်ပြီး ရေစီးကြောင်းအတိုင်း မြောကျတယ်။ ဂူတွေထဲစီးဝင်နေတဲ့ ဂူအောက် မြစ်ထဲ ဘောကွင်းစီးကြတယ်။ ရေပြာအိုင်တွေထဲ ရေစိမ်ကြပြီး ရေပြာအိုင်ပေါ်အုပ်မိုးနေတဲ့ သစ်ပင်ရဲ့ သစ်ကိုင်းတွေပေါ်ကနေ ရေပြာအိုင်ထဲ တဗွမ်းဗွမ်းနဲ့ ခုန်ဆင်းကြတယ်။ ကျောက်တောင်တွေတက်ကြတယ်။ ကျောက်ဂူတွေထဲဝင်ကြတယ်။ စပါးခင်းတွေထဲလမ်းလျှောက်ကြတယ်။ စက်ဘီးလေးတွေ ဆိုက်ကယ်တွေကိုယ်တိုင်မောင်းပြီး ဟိုဒီလျှောက်သွားကြတယ်။ သစ်ပင်တစ်ပင်နဲ့တစ်ပင်ကြား Zipline တွေစီးကြတယ်။ မြစ်ကမ်းစပ်ကတဲလေးတွေမှာ အကင်တွေစားပြီး လေညှင်းခံကြတယ်။ သဘာဝတရားထဲ သဘာဝအတိုင်းပျော်မွေ့နိုင်ကြလို့ လူငယ်တွေ တအားကြိုက်ကြပါတယ်။

ညဘက်ဆိုလည်း မြို့ထဲဘားတွေ၊ ကလပ်တွေမှာ လူစည်လွန်းလို့ လူငယ်တွေပျော်မွေ့ရာ ပါတီမြို့၊ ကျောပိုးအိတ်တစ်လုံးထဲလွယ်ပြီးလျှောက်သွားကြတဲ့ လူငယ်တွေအလာများလို့ Backpacker မြို့၊ စွန့်စွန့်စားစားအရာတွေ လုပ်လို့ရလို့ Adventure မြို့လေး အဖြစ် လူသိများပါတယ်။

ဘာတွေလုပ်ခဲ့လဲ

နုမြတ်တို့ ဗန်ဗီယန်းမြို့လေးကို ညနေလောက်ရောက်တာဆိုတော့ ဟိုတယ်မှာ Check In ဝင်ပြီး အလင်းရောင်ရှိတုန်း မြို့ထဲ ဟိုကြည့်ဒီကြည့်လျှောက်ကြည့်ခဲ့တယ်။ ကိုယ်တွေတည်းတာ Grandview Riverside Hotel ပါ။ နာမည်က အပျံစားဖြစ်ပေမဲ့ မိုတယ်အဆင့်လောက်ပါပဲ။ မြစ်ကမ်းဘေး ၃ယောက်ခန်းကို US$ ၅၀ ကျော်လောက်ပဲကျတယ်ဆိုတော့လည်း သူ့ဈေးနဲ့သူ မဆိုးဘူးပြောရမှာပါ။ ဒါပေမဲ့ ဟိုတယ်ထဲဝင်ရင် ဖိနပ်ချွတ်ဝင်ရတာကတော့ တော်တော်မနိပ်ပါဘူး။ ဟိုတယ် Location ကောင်းလို့ရယ် Website က ပုံလေးတွေက မဆိုးတော့လည်း ရွေးဖြစ်ခဲ့တာပါ။ ဟိုတယ်ကမြစ်ဘေးတင်ဆိုတော့ မြစ်ထဲကရှုခင်းတွေကိုလည်း လှမ်းမြင်ရတာပေါ့။တောတောင်တွေနောက်ခံနဲ့ မြစ်ရှုခင်းကတော်တော်သာယာပါတယ်။ မြစ်ထဲမှာလည်း Speed Boat စီးတဲ့သူတွေ Kayak လှေလှော်သူတွေနဲ့ ပြည့်နေတာ။ မြို့ထဲစနည်းနာပြီး နောက်နေ့အတွက် Tour တွေစုံစမ်းနေတာနဲ့ နေဝင်ချိန်ကိုတောင်မခံစားလိုက်ရဘူး။ ဟိုရောက်ရင်လည်ပတ်ဖို့ စိတ်မပူနဲ့။ ဟိုတယ်ကထွက်လိုက်တာနဲ့ လမ်းဘေးဝဲယာမှာ Tour Agent တွေ တပုံကြီး။ ကြိုက်တဲ့ Activities လုပ်ဖို့ ကြိုက်တာရွေးဝယ်လို့ရတယ်။ နောက်နေ့ နေ့တဝက်နေမှာဆိုတော့ Half Day Tour ဝယ်လိုက်တယ်။ အဲ့ညမှာတော့ မြစ်တစ်ဖက်ကမ်းကို ဝါးတံတားလေးနဲ့ကူးပြီး မြစ်ဘေးက တဲလေးတွေမှာ အကင်စားပြီး အေးဆေးလေညှင်းခံခဲ့ကြတယ်။ တဲတွေမှာ လင်းထိန်နေပြီး သီချင်းတွေအကျယ်ကြီး ဖွင့်ထားတာ ပျော်ဖို့ကောင်းပါတယ်။ မြစ်ကမ်းဘေးမှာတော့ တချို့က မီးပုံးပျံတွေ လွှတ်တဲ့သူကလွှတ်ပေါ့။

နောက်တစ်ရက်မှာတော့ ဟိုတယ်ကို Tour က ကားနဲ့လာခေါ်ပြီး Activities တွေလုပ်မယ့်နေရာကို ပို့ပေးပါတယ်။ စစချင်း Cave Tubing လို့ခေါ်တဲ့ ဂူထဲဘောကွင်းစီးဝင်ခဲ့တယ်။ ဘောကွင်းပေါ်ထိုင်ပြီး ဂူအောက်မြစ်ထဲ ရေစီးအတိုင်းဝင်ရတာ။ မှောင်ထဲမဲထဲဆိုတော့ စိတ်လှုပ်ရှားဖို့တော့ကောင်းတာပေါ့။ ရေဆုံးတဲ့အခါ ဂူထဲ လမ်းလျှောက်ဝင်ရတယ်။ အစအဆုံးစီးရမယ်ထင်ပြီး ဖိနပ်ချွတ်ထားခဲ့မိတော့ ခြေထောက်တွေ အသေစူးပေါ့။အချိန်ရရင် မြစ်ထဲလှေလှော်တဲ့ Kayaking ပါလုပ်မယ့်ဟာကို မလုပ်လိုက်ရဘူး။ Cave Tubing မှာ ခေါင်းမှာတပ်ရမယ့် Headlight ကို သွားယူနေတာကို အကြာကြီးစောင့်နေရလို့ မလုပ်လိုက်ရတာ။

IMG_1369

Blue Lagoon လို့နာမည်ကြီးတဲ့ ရေပြာအိုင်ရောက်ဖို့ ကားနဲ့နည်းနည်းသွားရတယ်။ ရေကတော့ တကယ်ပြာပါတယ်။ ပြာလဲ့နေတာ။ အေးလည်းအရမ်းအေးတယ်။ ဒါပေမဲ့ သူက ကားပါကင်ဘေးတင်ရှိတာဆိုတော့ အိုင်ဘေးပတ်လည်ကနေလူတွေထိုင်ပြီး ကြည့်နေကြတာ။ ရေပြာအိုင်ထဲကို သစ်ကိုင်းပေါ်ကနေခုန်ချတာကို အားပေးနေကြတာလေ။ မသိရင် ပွဲကြည့်နေသလိုပဲ။ ခုန်ချပြီးတာနဲ့ လက်ခုပ်တွေဝိုင်းတီးကြတာ။ သစ်ကိုင်းက ၂ဆင့်ရှိတယ်။ အပေါ်တဆင့်က တော်တော်မြင့်တယ်။ ရောက်လက်စနဲ့မထူးဘူးဆိုပြီး အားတင်းပြီး ခုန်ချခဲ့သေးတယ်။


ရေပြာအိုင်ထဲမှာ ဒန်းလိုမျိုးတွေလည်း လုပ်ထားသေးတယ်။ ကန်ဘေးကနေ ကြိုးတွေခုန်ပြီး ခုန်ချတာမျိုးလည်းလုပ်ကြတယ်။ ဒါပေမဲ့ လူအရမ်းရှုပ်လို့  အေးဆေးမနေရပါဘူး။ နောက်ထပ်ရေပြာအိုင်တစ်ခုကတော့ ပိုကြီးတယ်တဲ့။ ဒါပေမဲ့ အချိန်မရှိတော့ ဒီမှာပဲ ရေဆော့ခဲ့ရတယ်။  မြို့ထဲပြန် Lunch စားပြီးတော့ Vientiane ကို ကားနဲ့ဆက်ကူးခဲ့ပါတယ်။ ကားတွေက Hi Ace လိုကားမျိုးတွေမှာ တခြားလူတွေနဲ့ လိုက်စီးရတာပါ။ ကား ၄နာရီလောက်မောင်းရပါတယ်။

ဗီယန်ကျန်းမြို့

မြို့တော် ဗီယန်ကျင်း(Vientianne) ကတော့ ထိုင်းနိုင်ငံနယ်စပ်နားရှိ မဲခေါင်မြစ်ကမ်းမှာရှိပြီး စန္ဒကူးမြို့တော် (သို့) လမြို့တော်လို့အဓိပ္ပါယ်ရပါတယ်။ ၂၀၁၅ခုနှစ် စစ်တမ်းများအရ လူဦးရေ ၇သိန်း၆သောင်းကျော်ပဲရှိတဲ့ မြို့လေးပါ။ ကျွန်မတို့ရဲ့အကြီးဆုံးမြို့ ရန်ကုန်မှာ လူဦးရေ ၇သန်းကျော်ရှိတာဆိုတော့ ရန်ကုန်နဲ့ယှဉ်ရင် ၁၀ပုံ ၁ပုံလောက်ပဲရှိပါတယ်။

IMG_1754IMG_1758

သမိုင်းတလျှောက်မှာ ဗီယန်ကျင်းမြို့က တစ်ချိန်က မြို့ပျက်ကြီး ဖြစ်ခဲ့ဖူးပါတယ်။ ၁၇၀၇ ခုနှစ်က လာအိုမင်းနေပြည်တော်ရဲ့ မြို့တော်အဖြစ်စတင်သတ်မှတ်ခံခဲ့ရပေမဲ့ ၁၈၂၇ခုနှစ်မှာ ထိုင်းလူမျိုးတို့ ကျူးကျော်သိမ်းပိုက်ပြီး ဖျက်စီးခဲတာကြောင့် မြို့ပျက်ကြီးဖြစ်သွားခဲ့ရပါတယ်။ ၁၈၉၃ခုနှစ်မှာ လာအိုနိုင်ငံ ပြင်သစ်ကိုလိုနီလက်အောက်ကျရောက်ပြီးနောက် ၁၈၉၉ခုနှစ်ရောက်မှ လာအိုနိုင်ငံရဲ့မြို့တော်အဖြစ် ပြန်လည်သတ်မှတ်ခံခဲ့ရတာပါ။ ပြင်သစ်ကိုလိုနီလက်အောက်ကျရောက်ခဲ့ဖူးလို့ အဆောက်အအုံတချို့က ပြင်သစ်ဗိသုကာလက်ရာတွေဖြစ်နေတာကို တွေ့ခဲ့ရပါတယ်။

 

သွားလည်ရမယ့်နေရာများ

IMG_2097

ဗီယန်ကျင်းမြို့ရောက်ရင် မသွားမဖြစ်နေရာအဖြစ် အကျော်ကြားဆုံးကတော့ မြို့ထဲကနေ ၁နာရီလောက်မောင်းရတဲ့  Buddha Park (ဗုဒ္ဓပန်းခြံ) ပဲဖြစ်ပါတယ်။ ၁၉၅၈ခုနှစ်က လာအိုဘုန်းတော်ကြီးတစ်ပါးဦးဆောင်ပြီး ပန်းခြံထဲမှာ ဘာသာရေးဆိုင်ရာ ရုပ်တုပေါင်း ၂၀၀ကျော် ထုဆစ်ထားရှိခဲ့တာပဲဖြစ်ပါတယ်။ ဟိန္ဒူဘာသာနဲ့ ဗုဒ္ဓဘာသာ ဇာတ်နိပါတ်တော်တွေထဲက နတ်ဘုရားရုပ်တုတွေကို ထုဆစ်ထားရှိရာမှာ ၄၀မီတာအမြင့်ရှိတဲ့ လျောင်းတော်မူဘုရား၊ အဝင်ဝနားရှိ ဖရုံသီးသဏ္ဏာန် ၃ထပ်အဆောက်အအုံ၊ ဦးခေါင်းသုံးလုံးပါ ဆင်နတ်ဘုရား၊ ဦးခေါင်း ၁၂လုံးပါနတ်ဘုရားစတဲ့ ရုပ်တုတွေက ထင်ရှားပါတယ်။

မြို့ထဲရှိ ထင်ရှားတဲ့အဆောက်အအုံတစ်ခုကတော့ Patuxai Victory Monument မော်ကွန်းတိုင်ကြီးပဲဖြစ်ပါတယ်။ ပြင်သစ်နိုင်ငံ ပဲရစ်မြို့ရှိ နာမည်ကျော် Arc de Triomphe မော်ကွန်းတိုင်နဲ့ဆင်ပြီး ဟိန္ဒူနတ်ဘုရားရုပ်တွေနဲ့ ဒီဇိုင်းဆင်ထားတဲ့ လာအိုဗိသုကာလက်ရာတွေကိုပါ တွေ့မြင်နိုင်ပါတယ်။ စစ်ပွဲများမှာ ကျဆုံးခဲ့သူများကို ရည်စူးပြီး ဆောက်လုပ်ထားရှိခဲ့တယ်လို့ သိရပါတယ်။

2018_04_02_10_58_IMG_1896.JPG

လာအိုက ဗုဒ္ဓဘာသာကိုးကွယ်တဲ့ နိုင်ငံဖြစ်တဲ့အလျှောက် မြို့တော်ဗီယန်ကျင်းမှာ ဖူးမြော်စရာ ဘုရားစေတီတွေများစွာရှိပါတယ်။ တန်ခိုးအကြီးဆုံး နာမည်အကြီးဆုံးကတော့  That Luang စေတီပါ။ ရွှေရောင်လွှမ်းနေတဲ့စေတီက လာအိုဗိသုကာလက်ရာနဲ့ တည်ထားကိုးကွယ်ခဲ့တာဖြစ်ပြီး လာအိုနိုင်ငံရဲ့ အထင်ကရအဆောက်အအုံအဖြစ်လည်း ထင်ရှားပါတယ်။

IMG_2098

အခုလက်ရှိ ထိုင်းနိုင်ငံဘန်ကောက်မြို့ရှိ နာမည်ကျော် မြဘုရားဆင်းတုကို အပူဇော်ခံထားရှိခဲ့ဖူးတဲ့ ကျောင်းတော်ကြီး Wat Ho Phra Keo ကတော့ မြို့ထဲမှာရှိပြီး လှပတဲ့ ရိုးရာဗိသုကာလက်ရာတွေကြောင့် ကျော်ကြားပါတယ်။ မြဘုရားဆင်းတုကို ထိုင်းနိုင်ငံမြောက်ပိုင်းကနေ လာအိုဘုရင်သိမ်းပိုက်ခဲ့စဉ်တုန်းက ထားရှိကိုးကွယ်ခဲ့တာဖြစ်ပြီး နောက်ပိုင်း ထိုင်းစစ်တပ်က ပြန်လည်ပင့်ဆောင်သွားခဲ့တယ်လို့ သိရပါတယ်။

လွန်ခဲ့တဲ့ နှစ်ပေါင်း ၄၀၀ကျော်က ဘုရားကျောင်းဆောင်တည်ဆောက်ရာမှာ ယာဇ်အပူဇော်ခံခဲ့ရတဲ့ ကိုယ်ဝန်ဆောင်အမျိုးသမီး ဆီမောင်းကို အစွဲပြုပြီး မှည့်ခေါ်ခဲ့တဲ့ Wat Si Muang ကျောင်းဆောင်ကလည်း ဘုရားဖူးသူတွေနဲ့ စည်ကားနေပါတယ်။

ထိုင်းကျူးကျော်ခဲ့စဉ်တုန်းက မပျက်စီးခဲ့တဲ့ တစ်ခုတည်းသောကျောင်းဆောင် Wat Si Saket ကတော့ နှစ်ပေါင်း၂၀၀နီးပါးသက်တမ်းရှိပြီး မြို့ထဲသမ္မတအိမ်တော်ရာနားမှာရှိကာ ဗုဒ္ဓဆင်းတုငယ်ပေါင်း အရွယ်စုံ ပုံစံစုံ ၆၈၀၀ကျော်ရှိလို့ ထင်ရှားပါတယ်။

IMG_1752

ဘာတွေလုပ်ခဲ့လည်း

Vientiane မြို့ရောက်တဲ့အခါမှာတော့ မြို့ထဲက Khampiane Boutique Hotel မှာ Check in ဝင်ပြီး အနီးအနားက ဘုရားတွေဆီလမ်းလျှောက်သွားကြည့်ခဲ့တယ်။ ဒါပေမဲ့ ညနေစောင်းပြီဆိုတော့ ဘုရားတွေပိတ်နေပါပြီ။ လမ်းမှာလည်း လူတွေတအားရှင်းတာပဲ။ ကားဌားဖို့ Taxi လည်းမတွေ့။ တုပ်တုပ်လည်းမတွေ့။ လာအိုမြို့တော်ဖြစ်ပြီး လူရှင်းလိုက်တာလို့တောင် တွေးမိသေးတယ်။ ကံကောင်းချင်တော့ လမ်းအတော်လျှောက်ပြီးတဲ့အခါ တုပ်တုပ်တစ်စီးရပ်ထားတာတွေ့တာနဲ့ ဌားပြီး ကမ်းနားက ညဈေးထွက်ခဲ့တယ်။ ညဈေးနားမှာတော့ ကားတွေရော လူတွေရော စည်လို့ရယ်ပေါ့။ ထိုင်းက အဝတ်အစားတွေများပေမဲ့ ဈေးသက်သာတော့ ဝယ်ပျော်ပါတယ်။ နောက်တနေ့မှာတော့ နေ့တဝက်စာ ကားဌားထားပြီး မြို့ထဲကနေ ၁နာရီလောက်မောင်းရတဲ့ Buddha Park ရယ် လာအိုနိုင်ငံရဲ့ နာမည်အကြီးဆုံး That Luang စေတီရယ် Victory Monument ရယ်သွားခဲ့ပါတယ်။ ဘန်ကောက်ကို ထွက်တဲ့ Air Asia လေယာဉ်ချိန်က နေ့လည်၁း၄၅ဆိုတော့ နေ့လည်စာစားပြီး လေဆိပ်ထွက်ကာ ပြန်လာခဲ့ကြပါတယ်။

2018_04_01_18_32_IMG_1711.JPG

ခရီးစဉ်ဆွဲမယ်

ကိုယ်တွေသွားတုန်းကတော့ အချိန်မရှိလို့ တစ်မြို့ကိုတစ်ညနှုန်းနဲ့ နှစ်ညအိပ် နှစ်မြို့သွားခဲ့တယ်။ အချိန်ရရင်တော့ ၄ညအိပ်လောက်သွားသင့်တယ်။ အချိန်ပိုရရင်ရင်တော့ ၆ရက်လောက်နေပြီး လောင်ပရာဘန်မြို့ပါဆက်သွားလို့ရပါတယ်။ေ လာင်ပရာဘန်မှာဆိုလည်း လည်စရာ ရေတံခွန်တွေ၊ တောင်တွေရှိပါတယ်။ နောက်တစ်ခါသွားဖြစ်ရင်တော့ လောင်ပရာဘန်ပါရောက်အောင်သွားရမယ်။

2018_04_01_17_15_IMG_1761.JPG

ကုန်ကျစားရိတ်

ကုန်ကျစားရိတ်က ဘန်ကောက်ကနေ ရထားနဲ့သွား လေယာဉ်နဲ့ပြန်ခဲ့တာဆိုတော့ အားလုံးတွက်ကြည့်လိုက်တဲ့အခါမှာ ၂ညအိပ်ခရီးကို မြန်မာငွေ ၂သိန်းခွဲလောက်ပဲကျခဲ့ပါတယ်။ ထိုင်းမှာ ထိုင်းဘတ်သုံးခဲ့ပြီး လာအိုရောက်တဲ့အခါမှာတော့ လာအိုပိုက်ဆံ Kip ကို သုံးခဲ့ပါတယ်။ လာအိုပိုက်ဆံ 1000 Kip က မြန်မာငွေ 163ကျပ်နဲ့ ညီမျှပါတယ်။

လာအိုအစားအစာ

လာအိုအစားအစာက ထိုင်းမြောက်ပိုင်းအစာနဲ့ဆင်ပါတယ်။ Larb လို့ခေါ်တဲ့ အသားစင်းကောကို အရွက်တွေနဲ့ သုတ်ထားတဲ့ဟင်း၊ သင်္ဘောသီးထောင်း၊ ငါးပေါင်း၊ ကြက်ကင် စတာတွေကို ကောက်ညှင်းနဲ့တွဲစားလေ့ရှိပါတယ်။ ကောက်ညှင်းလေးကို လက်နဲ့ဖဲ့ပြီး အလုံးသေးသေးကျစ်ကျစ်လေးဖြစ်အောင် လုံးပြီးမှ ဟင်းတွေနဲ့တွဲစားတာပါ။ ပြင်သစ်လက်အောက်ရောက်ခဲ့တော့ ပြင်သစ်စာဖြစ်တဲ့ ပေါင်မုန့်လုံးလုံးရှည်ရှည်ထဲ အသားတို့ ဝက်ပေါင်ခြောက်တို့ကို အရွက်တွေ ရောညှပ်စားတဲ့ Baguette ဟာလည်း လာအိုလမ်းဘေးအစားအစာအဖြစ်ထင်ရှားပါတယ်။

လည်ပတ်ဖို့အကောင်းဆုံးအချိန်

လာအိုက မြန်မာနိုင်ငံနဲ့ရာသီဥတုဆင်တော့ လာအိုနိုင်ငံဆီ သွားရောက်လည်ပတ်ဖို့အကောင်းဆုံးအချိန်က နိုဝင်ဘာလနဲ့ ဧပြီလအကြား အေးမြတဲ့ရာသီဥတုမှာပဲဖြစ်ပါတယ်။

2018_04_02_10_45_IMG_1899

ဒီလောက်ဆိုရင်တော့ လာအိုအကြောင်း အကြမ်းဖျဉ်းသိလောက်ပြီထင်ပါတယ်။ လာအိုက ချစ်စရာကောင်းတဲ့ အိမ်နီးချင်းနိုင်ငံလေးပါ။ သဘာဝအလှတွေနဲ့ အေးချမ်းပါတယ်။ သွားလည်လို့လည်းကောင်းပါတယ်။ ဒါပေမဲ့ စိတ်မကောင်းတာက ကိုယ်တွေရဲ့ မြန်မာနိုင်ငံမှာ ဒီထက်ပိုလှတဲ့ ရှုခင်းတွေ၊ ပိုဆန်းကြယ်တဲ့ ရှေးဟောင်းသမိုင်းဝင်နေရာတွေ၊ ယဉ်ကျေးျွှုအမွေအနှစ်တွေ၊ လူမျိုးစုတွေ ရှိနေရက်နဲ့ ဒီနိုင်ငံသေးသေးလေးနဲ့ ယှဉ်လိုက်တဲ့အခါမှာ နိုင်ငံခြားခရီးသွားဝင်ရောက်မှုတွေ ပိုနည်းနေတာကိုပါ။ သူတို့ရဲ့ မြို့တော်က ပဲခူးမြို့သာသာလောက်ပဲရှိပြီး ခရီးသွားတွေ အမြဲမပြတ်စည်ကားနေတဲ့ ဗန်ဗီယန်းမြို့ဆိုရင်လည်း ကလောမြို့လေးလိုပါပဲ။ ဒီလို လည်စရာ ၃-၄မြို့ပဲရှိတဲ့ လာအိုက မြန်မာထက် ခရီးသွားပိုများနေတာ တကယ်စိတ်မကောင်းပါဘူး။ အဓိကကတော့ Tourist တွေအသွားများတဲ့ ထိုင်း၊ ဗီယက်နမ်နဲ့ ကမ္ဘောဒီးယားတို့ကနေ ကုန်းကြောင်းကနေ အလွယ်တကူဝင်ရောက်နိုင်တာကြောင့် ဖြစ်ပါလိမ့်မယ်။ သိပ်မကြာခင်မှာလည်း ကိုယ်တွေရဲ့ မြန်မာနိုင်ငံအလှနဲ့ ယဉ်ကျေးအမွေအနှစ်တွေ ကမ္ဘာကျော်လာပြီး ခရီးသွားအများကြီးဝင်ရောက်လာပြီး ခရီးသွားလုပ်ငန်းကြီး တိုးတက်လာမယ်လို့တော့ မျှော်လင့်ရတာပဲနော်။
ချစ်ခင်လျှက်

Dr.Nu Myat

ထိုင်းနိုင်ငံ၏ ဆွစ်ဇာလန်လေး ချင်းမိုင်ရောက်နေ့ရက်များ (Chiang Mai)

ထိုင်းနိုင်ငံ၏ ဆွစ်ဇာလန်လေး

ချင်းမိုင်ရောက်နေ့ရက်များ

IMG_8562

ထိုင်းဆိုရင် မြို့ပြဆန်တဲ့ ဘန်ကောက်၊ ဘန်ကောက်ကနေ နေ့ချင်းပြန်သွားလို့ရတဲ့ ပတ္တရား၊ အယုဒ္ဓယ၊ ဖူးခက်ကမ်းခြေစတာတွေပဲ သွားလေ့ရှိပါတယ်။ နောက်ပိုင်းမှာ မြန်မာခရီးသွားတွေ သွားလာကြတာကတော မြောက်ပိုင်းက တောင်ပေါ်မြို့လေး ချင်းမိုင်ပါ။ ချင်းမိုင်က ရာသီဥတုသာယာသလို ပန်းပေါင်းစုံဖူးပွင့်သာယာလို့ အပူပိုင်းဒေသကလာတဲ့ နုမြတ်တို့အကြိုက်ပေါ့။ ရှမ်းပြည်နဲ့ ကပ်ရပ်မှာ ရှိပြီး မြန်မာတွေက ဇင်းမယ်လို့လည်း သိထားကြပါတယ်။ တချိန်က မြန်မာတွေ လက်အောက်ရောက်ခဲ့ဖူးပြီး မြန်မာပြည်နဲ့ အနီးအနားမှာ ရှိလို့ မြန်မာအငွေ့အသက်တွေ များစွာရှိလို့နေပါတယ်။

ချင်း မိုင်မှာက တန်ခိုးကြီး ရှေးဟောင်းဘုရားစေတီတွေရှိသလို၊ လည်ပတ်စရာတွေ၊ Adventure လုပ်စရာတွေလည်း ရှိလို့နေပါတယ်။ ချင်းမိုင်ကို ဒီဇင်ဘာလတုန်းက ၄ညအိပ်၅ရက်ခရီးထွက်ခဲ့ပါတယ်။ ပုံမှန်ဆို ၂ညအိပ် ၃ရက်နဲ့ လောက်ပေမဲ့ ထိုင်းနိုင်ငံရဲ့ အမြင့်ဆုံးတောင် Doi Inthanon ဘက်ပါ ခရီးဆက်မှာ ဖြစ်လို့ နောက်ထပ် ၂ရက်ဆက်နေတာပါ။ မြန်မာနဲ့ နယ်စပ်မြို့ ချင်းရိုင်နဲ့ မြန်မာ၊ ထိုင်း၊ လာအို သုံးနိုင်ငံ ထိစပ်နေတဲ့ ရွှေတြိဂံနယ်မြေတွေဆိ သွားမယ်ဆိုရင်လည်း နောက်ထပ် ၂ရက် ထပ်နေမှ ရမှာပါ။ ချင်းမိုင်ကို ကိုယ့်အစီအစဉ်နဲ့ကိုယ် သွားလိုသူတွေ အတွက် ကျွန်မတို့ရဲ့ ခရီးစဉ် အကြမ်းဖျဉ်းလေးကို ရေးသား ဖော်ပြလိုက်ပါတယ်။

Day 1 ရန်ကုန်-ချင်းမိုင်- Night Safari

ရန်ကုန်ကနေ ချင်းမိုင်ကို တိုက်ရိုက်လေကြောင်းလိုင်းတွေ ရှိနေလို့ ဘန်ကောက်ကနေ တဆင့်သွားစရာ မလိုတော့ပါဘူး။ နုမြတ်တို့ကတော့ Bangkok Airways နဲ့သွားပါတယ်။ Bkk Airways ထွက်တဲ့ အချိန်ရယ်၊ အစားအသောက်ရယ်၊ Service ရယ် ကြိုက်လို့ သွားဖြစ်တာပါ။ နေ့လည် ၁း၄၀ ထွက်ပြီး ချင်းမိုင်ကို ထိုင်းအချိန် ၃း၄၀ pmမှာရောက်ပါတယ်။ ချင်းမိုင်မှာ ကြိုစီစဉ်ထားတဲ့ Tour Guide ရယ်၊ ၈ယောက်ဆန့်တဲ့ Van Car ရယ် အသင့်လာကြိုနေပါတယ်။

ချင်းမိုင်မှာက Taxi တွေ ရှားတော့ လူများရင် ကား ဌားထားမှ အဆင်ပြေမှာပါ။ ကားက van ကားဆို တစ်နေ့ကို ၁၈၀၀-၂၀၀၀ ဘတ်ကျပါတယ်။ ဓာတ်ဆီမပါဘဲ Driver ပါအပြီးပေါ့။ ရက်များရင် လျော့ပေးပါတယ်။ Tour Guide ကတော့ သိပ်မလိုပါဘူး။ ခေါ်ချင်ရင်တော့ တစ်ရက်ကို ဘတ်၁၅၀၀ ကနေ ၃၀၀၀ ထိ ဘာသာစကားကျွမ်းကျင်မှုပေါ်မူတည်ပြီး အစားစားရှိပါတယ်။
Taxi ဆိုရင်တော့ လေဆိပ်ကနေ မြို့ထဲ နေရာပေါ်မူတည်ပြီး ဘတ် ၁၅၀ ကနေ ၃၀၀ပါ။ Shuttle Bus လည်းရှိပြီး တစ်ယောက်ကို ဘတ်၆၀လောက်ကျမှာပါ။

20161216_164537_mix01-01

လေယာဉ်ကွင်းကနေ အရင်ဆုံး Hotel မှာ Check in ဝင်ပါတယ်။ Hotel ကတော့ မြစ်ဘေးကပ်ရပ် Maraya Resort ပါ။
ကျယ်ဝန်းလှတဲ့ အခန်းကြီးရယ် အခန်းကနေလှမ်းမြင်ရတဲ့ မြစ်နဲ့ တစ်ဖက်ကမ်းက ဘုရားနဲ့ အတော်လေးကို သာယာပါတယ်။ ဒီ Resortလေး က အခန်းဖွဲ့စည်းပုံရယ်၊ မနက်စာစားတဲ့နေရာလေးကိုလည်း သိပ်သဘောကျပါတယ်။

20161217_082929-02

20161217_081941-01-01

Night Safari
ဝင်ကြေး- လူကြီး ဘတ်၈၀၀၊ ကလေး ဘတ် ၄၀၀

Hotel မှာ ပစ္စည်းချပြီးတာနဲ့ Night Safari ကို တန်းသွားကြပါတယ်။ Night Safari က ချင်းမိုင်ရဲ့ အဓိက Attraction ထဲမှာပါပြီး ရှားပါးတိရစ္ဆာန်လေးတွေကို တစုတစည်းထဲ ပြထားတဲ့ နေရာလေးပါ။ တိရစ္ဆာန်တွေကို သဘာဝအတိုင်း အမှောင်ချထားတဲ့ တောကြီး မျက်မည်းထဲ ဘေးနှစ်ဖက်ပွင့်ကားကြီးတွေနဲ့ သွားရတာ စိတ်လှုပ်ရှားဖွယ်ရာပါ။ Night Safari မှာ အရိုင်းနဲ့ အယဉ် ၂ပိုင်းခွဲထားပြီး ည ၇နာရီကနေ ၁၀နာရီကြား ၁၅မိနစ်တစ်ကြိမ် ကားထွက်တာကြောင့် ကိုယ်ကြိုက်တဲ့ဘက် အရင်သွားကြည့်နိုင်ပါတယ်။ တစ်ကြောင်းကို တစ်နာရီလောက် ကြာနိုင်ပါတယ်။

20161216_174302_mix01-02

Night Safari မှာ တိရစ္ဆာန်ပေါင်း ကျော်ရှိပြီး တချို့ အန္တရာယ်ရှိတဲ့ တိရစ္ဆာန်တွေကိုတော့ ကားတွေနားမလာနိုင်အောင် လျှိုမြောင်တွေ ချိုင့်ဝှမ်းတွေ ခံပေးထားပြီး အကာအကွယ်တွေ ထားပေးထားပါတယ်။ ဒရယ်တို့၊ သစ်ကုလားအုတ်တို့၊ သားပိုက်ကောင်တို့၊ မြင်းကျားတို့ကတော့ ကားတွေနားထိရောက်လာပြီး အစာတောင်းလို့ ပျော်စရာကြီးပါ။

FB_IMG_1482250529578-01
ဒါ့အပြင် ဖြူကောင်တွေ၊ ကျားပေါက်လေးတွေ၊ သာလိကာလေးတွေ၊ ဇီးကွက် မျက်ပြူးကြီးတွေနဲ့ လည်း ဓာတ်ပုံရိုက်နိုင်ပါသေးတယ်။ Show အနေနဲ့ကတော့ ည၇နာရီမှာ White Tiger Show (ကျားဖြူပြပွဲ)နဲ့ ည၈နာရီနဲ့ ၉နာရီတို့မှာ Musical Fountain Water Screen Laser Light Show လေဆာရေပန်းဂီတပြပွဲ ကြည့်လို့ရပါတယ်။

Day 2

Wat Prathet Doi Suthep

ဒီနေ့ကတော့ စောစောစီးစီး ဘုရားသွားတဲ့နေ့ပါ။ Doi Suthep တောင်ပေါ်က Wat Prathet စေတီကို မနက်စာစားပြီးတာနဲ့ သွားပါတယ်။ ချင်းမိုင်ကနေ ၁နာရီကြာမောင်းရပြီး တောင်တက်ကားလမ်းအတိုင်း တောင်ပေါ်ကို ဆက်တက်ရပါတယ်။ ဘုရားမုခ်ဦးကနေ ရင်ပြင်ပေါ်ကို လှေကားထစ် ၂၀၀ရှိ နာမည်ကြီးလှေကားနဲ့ တက်နိုင်သလို ကြိုးဆွဲ ရထားနဲ့ တက်နိုင်ပါတယ်။ ဓာတ်လှေကားကို ဒေါင်လိုက်မဟုတ်ဘဲ ၄၅ဒီဂရီလောက် ခပ်စောင်းစောင်းတက်ရတာမျိုးပါ။ တစ်ယောက်ကို ဘတ် 20 ပေးရပါတယ်။
Wat Prathet (ပရာသတ်စေတီ) က မြတ်စွာဘုရားရဲ့ ပုခုံးရိုးတော် ဌာပနာထားတဲ့ စေတိ ဖြစ်ပြီး ထိုင်းရဲ့ တန်ခိုးကြီး ရှေးဟောင်းစေတီတော်ဖြစ်ပါတယ်။ တောင်ပေါ်က နေ ချင်းမိုင်မြို့အလှကိုလည်း လှမ်းမြင်နိုင်ပါတယ်။ နုမြတ်တို့ရောက်တုန်းက မိုးဖွဲကျ မြူတွေဆိုင်းနေလို့ မမြင်ခဲ့ရပါဘူး။ စေတီ ရင်ပြင်တော်မှာ စကျင်ကျောက်ဘုရား၊ မြဘုရား၊ သလင်းဘုရားစတဲ့ ကျောက်ပေါင်းစုံနဲ့ ထုစစ်ထားတဲ့ ဆင်းတုတွေ တွေ့ခဲ့သလို၊ စေတိကို လက်ဝဲရစ် သုံးပတ်ပတ်ကာ ဘုရားစာ ရွတ်ဖတ်ပူဇော်နေသူတွေလည်းတွေ့ခဲ့ရပါတယ်။ ဘုရားမှာ ကိုယ့်နာမည်ထိုးကာ ခေါင်းလောင်းလည်း လှူနိုင်ပါတယ်။ ခေါင်းလောင်းတစ်လုံးကို ဘတ် ၃၀ (ကျပ်၁ထောင်ကျော်) ပါ။

ဒီ LIVE video link ထဲမှာ ဘုရားဖူးနိုင်သလို ဘုရားသမိုင်းကို သေချာ အသေးစိတ်ရှင်းပြထားပါတယ်။

20161217_112454_mix01-01

Local Markets

နေ့လည်စာကို ချင်းမိုင်စာတွေရောင်းချတဲ့ ဒေသဆိုင်မှာ တဝတပြဲစားပြီးနောက် ဈေးဝယ်ထွက်ကြပါတယ်။ Warorot Market နဲ့ To Lam Yai Market လို့ခေါ်တဲ့ ချင်းမိုင်ဈေးတွေပါ။ ဒေသခံတွေရဲ့ ဈေးဖြစ်တဲ့ အလျောက် local products တွေ စားသောက်ကုန်တွေပေါပါတယ်။ Tourist တွေလည်းလာလို့ အမှတ်တရ ပစ္စည်း အရောင်းဆိုင်တွေလည်း ရှိပါတယ်။ ကိုယ်တွေကတော့ ကလေးကျောပိုးထားတဲ့ ချင်းမိုင်ရိုးရာ အရုပ်လေးရယ်၊ ဟင်းခတ်အမွှေးအကြိုင်အစုံ အစာသွပ်ထားတဲ့ ချင်းမိုင် ဝက်အူချောင်းကြော်စပ်စပ်လေးရယ် အိမ်အပြန်လက်ဆောင် ဝယ်သွားပါတယ်။

Wat Ket

အဲ့ဈေးတွေကနေ တစ်ဖက်ကမ်းကို တံတားနဲ့ ကူးတဲ့ အခါမှာ Wat Ket ရပ်ကွက်လို့ခေါ်တဲ့နေရာရောက်ပါတယ်။ အဲ့မှာ ရှေးနှစ်ပေါင်း ၅၀၀ကျော် ၆၀၀လောက်က မြန်မာတွေ တည်ထားခဲ့တဲ့ Wat Ket ဘုရားနဲ့ ရှေးဟောင်းပစ္စည်းတွေပြသထားရာ ပြတိုက်တစ်ခုရှိပါတယ်။ အဲ့မှာ မြန်မာ ပိုက်ဆံတွေရော မြန်မာရှေးဟောင်း ကြိုးကြီးချိတ်ထမီတွေ၊ မြန်မာရှေးဟောင်းပစ္စည်းတွေပါ ပြသထားတာကို တွေ့ခဲ့ရပါတယ်။

Oasis Spa

တစ်နေကုန်ပင်ပန်းထားကြတော့ ချင်းမိုင်ရဲ့ နာမည်ကြီး Luxury Spa ဖြစ်တဲ့ Oasis Spa ကို ရောက်သွားကြပါတယ်။ ချင်းမိုင်မှာ Spa တွေ massage တွေ နာမည်ကြီးပြီး ဆိုင်တွေ များစွာ ရှိတဲ့ထဲက တကယ့်ထိပ်တန်းဆိုင်လို့ သိရပါတယ်။ King of Oasis နာမည်ရှိတဲ့ Treatment ကို ယူဖြစ်ပါတယ်။ ဘတ် 4000 ကျော်ကျပါတယ်။ ထိုင်းရိုးရာ အပူပေးပြီး ဆေးစိမ်ထားတဲ့ ကြပ်ပူနဲ့ ကိုယ်အနှံ့လိုက်ထိုးပေးတာ အတော့်ကိုကောင်းပါတယ်။ စပါးလင်အနံ့လေးသင်းနေတဲ့ အဆီနဲ့ တကိုယ်လုံးကို လိမ်းပြီး နှိပ်နယ်ပေးတော့ အကြောအချဉ်တွေ တကယ်ပြေသွားပါတယ်။ ၂နာရီကြာတဲ့ Treatment အပြီးမှာ တကိုယ်လုံးပေါ့ပါးပြီး ညဈေးတွေ ပတ်ဖို့ အသင့်ဖြစ်နေကြပြီပေါ့။
ညဈေးမပတ်ခင် Oasis Spa နားက Wat Pra Singha ဘုရားကျောင်းမှာလည်း ဘုရားဝင်ဖူးခဲ့ပါသေးတယ်။

20161217_163230_mix01-01

Night Markets

ချင်းမိုင်မှာ ညဈေးအများကြီးရှိပါတယ်။ ရှေးဟောင်းမြို့ဖြစ်တဲ့ ချင်းမိုင်မှာ မြို့ရိုးတွေလည်း ရှိနေပါသေးတယ်။ မြို့လေးဘက်မှာ ဂိတ်လေးခုရှိတဲ့အနက် Chiang Mai Gate နဲ့Chang Puak North Gate တို့မှာ Night Market တွေ ညတိုင်းရှိပါတယ်။ ဒါ့အပြင် Weekends တွေမှာ Saturday Walking Street? Sunday Walking Street ဆိုပြီးတော့လည်း ရှိပါသေးတယ်။ Night Bazzar တွေ Night Plaza တွေနဲ့ ညဘက်လည်ပတ်စရာတွေ အများကြီးပါ။

20161217_193537_mix01-01

20161216_220716_mix01-01

Day 3

ဒိနေ့ကတော့ ထိုင်းနိုင်ငံရဲ့ အမြင့်ဆုံးတောင် Doi Inthanon ကို တက်မှာမို့လို့ ချင်းမိုင် ဟိုတယ်ကနေ မနက်ကတည်းက Check Out လုပ်ရပါတယ်။

Royal Park Rajapruek
ဝင်ကြေး ဘတ်၁၀၀

တော်ဝင်ပန်းခြံဟာလည်း ပန်းမြို့တော် ချင်းမိုင်မှာ သွားသင့်တဲ့နေရာလေးပါ။ ပန်းပေါင်းမျိုးစုံရှိတဲ့ပန်းခင်းတွေ၊ သစ်ခွခြံတွေ၊ထင်းရူးတောတွေရှိသလို ပန်းခြံအလည်မှာ နတ်ရွာစံသွားတဲ့ ဘုရင်ကြီးကို ရည်စူးဆောက်လုပ်ထားတဲ့ ပြသာဒ်ဆောင်ကြီးလည်း ခမ်းနားစွာ ရှိလို့နေပါတယ်။ ချင်းမိုင်ရိုးရာအိမ်တွေ၊ Culture တွေနဲ့ တခြားလေ့လာစရာ ဓာတ်ပုံရိုက်စရာနေရာတွေလည်း ရှိလို့ အနည်းဆုံး ၁နာရီလောက်တော့ကြာမယ်နော်။ ပန်းခြံကို ပတ်နေတဲ့ ကားလည်း ရှိပြီး အဲ့ကားနဲ့ လိုက်စီးကာ ကိုယ်လေ့လာချင်တဲ့နေရာမှာ ဆင်းလေ့လာရုံဆိုတော့ အတော်အဆင်ပြေပါတယ်။

20161218_102445_mix01-01

Royal Park Live video link က https://www.facebook.com/numyat/videos/10154260246928412/

Elephant Camp

ဆင်စခန်းတွေကလည်း ချင်းမိုင်မှာ များမှများပါ။ နုမြတ်တို့ကတော့ ဆင်စခန်းတစ်ခုကိုခဏဝင်လေ့လာခဲ့တယ်။ ဆင်ပေါက်လေးတွေလည်းတွေ့ရပြီး ဆင်လေးတွေက လူတွေယဉ်နေတယ်။ ဆင်အနမ်းတောင်ခံလိုက်ရသေးတယ်။ ဆင်စခန်းမှာရိုက်ထားတဲ့ LIVE video နဲ့ ဆင်နမ်းနေတဲ့ Video file လေးကို ဒီLink တွေမှာ ကြည့်နိုင်ပါတယ်။ ဆင်စီးချင်လည်း စီးလို့ရတယ်။ https://www.facebook.com/numyat/videos/10154260539593412/

IMG_20161220_064500-01

Wat Pra That Jom Thong

တောင်အသွားလမ်းမှာ ဘုရားဝင်ဖူးပြီး ချည်ထည်တွေဗိုင်းငင် ရက္ကန်းရက်တဲ့ ရက္ကန်းရုံကိုလည်း ဝင်ရောက်လေ့လာခဲ့ပါတယ်။ အင်သာနုံဘုရင်ပိုင်ခဲ့တဲ့ ပျဉ်ထောင်အိမ်ကြီးကို အိမ်ပေါ်မှာပြတိုက် အိမ်အောက်မှာ ရက္ကန်းရုံအဖြစ်ရက်လုပ်နေဆဲပါ။

20161218_132804_mix01-01

20161218_152052_mix01-01

တောင်ပေါ်က ဟိုတယ်လေးက တော့ Touch Star Resort ပါ။ ဘန်ဂလိုလေးတွေနဲ့ ချစ်စရာ ဟိုတယ်လေးပါ။ ဝက်ရုပ်လေးတွေနဲ့ အလှဆင်ထားတာ အရမ်းချစ်ဖို့ကောင်းပါတယ်။ ဟိုတယ်ကို ညနေ ၄နာရီလောက်ကတည်းက ရောက်နေပေမဲ့ နောက်နေ့မနက် ၄နာရီ ထရမှာကြောင့်ရော ခရီးပန်းနေပြီမို့လို့ရော ဘယ်မှ မသွားတော့ပဲ ဟိုတယ်မှာပဲ ညစာစားပြီး နောက်နေ့အတွက်အားမွေးခဲ့ကြပါတယ်။

Day 4
Doi Inthanon National Park
ဝင်ကြေး – Tourist ဘတ် 300. Local ဘတ် 100
ဒီတောင်ကို ထိုင်းနိုင်ငံရဲ့ မျက်နှာကျက်လို့လည်းခေါ်ကြပါတယ်။ အမြင့်ပေ ၈၀၀၀ကျော်မှာရှိပြီး ထိုင်းနိုင်ငံရဲ့ အမြင့်ဆုံးတောင်မို့လို့ပါ။ ရှမ်းရိုးမတောင်တန်းတွေနဲ့ တဆက်တည်းရှိပြီး မြန်မာတောင်တန်းတွေအနေနဲ့ဆိုရင်တော့ အရမ်းမြင့်တယ်လို့ မဆိုသာပါဘူး။ ဒီတောင်ပေါ်က မြင်ရတဲ့ နေထွက်ချိန်ရှုခင်းကတော့ စာဖွဲ့လို့ မရလောက်ပါဘူး။ မနက် ၅နာရီကတည်းက ဟိုတယ်ကနေထွက်ကာ တောင်ပေါ်ကို ကားနဲ့ တက်ခဲ့ကြပါတယ်။ နေထွက်ချိန်ကြည့်တဲံနေရာက တောင်ထိပ်မှာ မဟုတ်ဘဲ တောင်တက်လမ်းတစ်နေရာမှာပါ။ ကားလမ်းဘေး ကားရပ်ထားကြပြီး ကားလမ်းဘေးတစ်ဖက်ကနေ နေထွက်ချိန်ကို လာကြည့်ကြတာပါ။ မနက်စောစာစီးစီး ရာသီဥတုကလည်းအေးတော့ ဘယ်သူမှ မရှိလောက်ဘူး မထင်ပါနဲ့။ ကြိတ်ကြိတ်တိုးကြည့်ရတာပါ။ တစ်နေရာရအောင် မနည်းတိုးခဲ့ရတာပါ။
တိုး၇တာနဲ့တော့တန်ပါတယ်. နေထွက်လာတာတော်တော်လေးကို လှတယ်ရော… ရောင်နီလင်းလာတဲ့ ပုစါန်ဆီရောင်ကောင်းကင်ရှေ့မှာ တိမ်ဖြူဖြူတွေ အလိပ်လိုက် အလိပ်လိုက်ရှိနြေ့ပီး အဲ့တိမ်တွေထဲက အနီရဲရဲ နေလုံးပေါက်စလေးက အောက်ကနေအပေါ်ကို တရွေ့ရွေ့ ထိုးဖောက်ထွက်လာတာ အရမ်းကြည့်လို့ကောင်းပါတယ်။

IMG_1804-02

IMG_1826_mix01-01

တောင်ရဲ့အမြင့်ဆုံးနေရာမှာ တောလျှောက်လမ်းလုပ်ထားပြီး အမှတ်အသားဆိုင်းဘုတ်လည်းထားရှိပါတယ်။ အင်သာနုံပြည်နယ် ဘုရင်ရဲ့ အုတ်ဂူလည်းရှိလို့နေပါတယ်။ တောင်ထိပ်နားက သဘာဝတောလျှောက်လမ်းလေးမှာလည်း လျှောက်သင့်ပါတယ်။ တကယ်ကို တောထဲ ရောက်နေသလို နေပြောက်လေးတွေကလည်း တချက်တချက်ထိုးနေပြီး အေးချမ်းလျပါတယ်။ နာရီဝက်လောက်ပဲကြာမှာပါါ။ အဲ့မှာ ထိုင်းနိုင်ငံရဲ့ အသက်သွေးကြော ကျောက်ဖရားမြစ် မြစ်ဖျားခံရာ စမ်းချောင်းလေးလည်းတွေ့ခဲ့ရပါတယ်။
တောင်ထိပ် နေထွက်ချိန်ရှုခင်း၊ သဘာဝတောလျှောက်လမ်းလေး Video ကတော့ ဒီမှာပါ။

နေထွက်ချိန်ကြည့်တဲ့နေရာနားမှာ နတ်ရွာစံသွားတဲ့ ဘုရင် သက်တော် ၆၀ပြည့်က ဘုရင်ကြီးနဲ့ မိဖုရားကြီးကို ရည်စူးပြီးတည်ထားတဲ့ စေတီ၂ဆူကပ်လျှက်ရှိပါတယ်။ ဒီစေတီတွေပေါ်က မြင်ရတဲ့ တိမ်တွေတောင်တွေရှုခင်းက လှပလွန်းလို့ သွားသင့်ပါတယ်။ တိမ်ပင်လယ်ကြီးတွေကိုယ့်အောက်မှာ ရောက်နေသလို ခံစားရတဲ့ ရှုခင်းပါ။ တောင်ပေါ်ဘုရားပေါ်က Live Video ကတော့ ဒီမှာပါ။

နောက်ပြီး တောင်ပေါ်မှာ Royal Project လို့ခေါ်တဲ့ ပန်းခြံတွေ၊ Organic စိုက်ခင်းတွေ၊ Resort တွေလည်းရှိပါတယ်။ ရေတံခွန်တွေလည်းရှိပြီး Wachiratan Waterfallကတော့ သွားရလွယ်ပြီး လှပကြီးမားတဲ့ ရေတံခွန်ကြီးပါ။ ရေတံခွန်ကြီးရဲ့ LIVE video က ဒီမှာပါ

ဒီနေ့လည်း ဟိုတယ်ကို စောစော ပြန်ရောက်ပါတယ်။ ညနေ၄နာရီလောက်ပါ။ တောင်ပေါ်မှာ ဘာမှ လုပ်စရာမရှိလို့ စောစောစီၤးစီးအနားယူကာ အိပ်ခဲ့ရပါတယ်။

Day 5

ဒီနေ့ကတော့ရန်ကုန်ပြန်တဲ့နေ့ပါ။ တောင်ပေါ်ကနေ လေဆိပ်ကို တစ်ခါတည်းတန်းဆင်းပါတယ်။

တခြားသွားစရာများ

နုမြတ် ချင်းမိုင်ကိုရောက်တာ ဒါ ဒုတိယမြောက်ပါ။ ပထမတစ်ကြီမ်တုန်းက ချင်းမိုင်ရိုးရာ အကအလှတွေနဲ့ ဖျော်ဖြေတဲ့ Khum Khan Toke စားသောက်ဆိုင်ကို ရောက်ဖြစ်ခဲ့ပါတယ်။ အဲ့နေရာလည်း ချင်းမိုင်သွားတဲ့ သူတွေ မရောက်မဖြစ်နေရာပါပဲ။ ဟင်းပွဲတွေကို ဆွမ်းတော်အုပ်နဲ့ ချကျွေးတာပါ။
ငလျင်ဒဏ်ကြောင့် တဝက်ပြိုကျသွားတဲ့ ထုထည်ကြီးမားတဲ့ Wat Chedi Luang ကိုလည်း သွားရောက်ဖူးမြော်သင့်ပါတယ်။
အထူးအဆန်းတွေ စိတ်ဝင်စားရင် World Insects Museum သွားကြည့်ပါ။
အပျော်ဓာ်ပုံရိုက်ချင်ရင်တော့ 3D Art Museum ကို သွားပါ။
Adventure စိတ်ဝင်စားရင် တောတါင်းသားတာဇံလို သစ်ပင်တစ်ပင်နဲ့ တစ်ပင်ကြိုးနြ့ ကူးရတဲ့ Zipline Adventure တို့ Flight of Gaboon ဆိုတာတွေလည်းရှိပါသေးတယ်။
ဂေါက်ရိုက်ဝါသနာ ပါသူတွေအတွက် သာယာလှပတဲ့ ဂေါက်ကွင်းတွေလည်း အများကြီးပါ။

20161216_204752_mix01-01

Extra Tips

Night Safari မှာ အစာကျွေးတဲ့ အခါ Zebra ကို သတိထားပါ။ သွားတွေက ချွန်ထက်နေတာကြောင့် လက်နဲ့ ကျွေးလို့ ကိုက်မိရင် လက်ပြတ်သွားနိုင်ပါတယ်။
Walking Street က တော်တော့်ကို ရှည်ပါတယ်။ ကိုယ်ကြိုက်တာလေးတွေ တွေ့ရင် ဝယ်ထားလိုက်ပါ။ နောက်ပြန်လှည့်ဝယ်ဖို့ဆိုတာ မဖြစ်နိုင်လို့ပါ။ ပေါပေါလောလောတွေ့ရတဲ့ ပစ္စည်းလေးတွေကို တော့ Walking Sreet ထိပ်နားမှာ မဝယ်ပါနဲ့။ ဈေးပိုကြီးလို့ပါ။ ဆုံးခါနီးလေ ဈေးသက်သာလေပါ။
လူများရင် တောင်ပေါ်က Royal Project ထဲက Resort မှာ ညအိပ်ပါ။ လူ၅ယောက်ဆန့်တဲ့ တစ်အိမ်လုံးမှ ဘတ် 7500 လောက်သာရှိတာပါ။
Doi Inthanon တောင်ပေါ်ကဆင်းတဲ့နေ့မှာ တောင်ပေါ်မှာ မအိပ်ပါနဲ့။ ချင်းမိုင်ပြန်အိပ်ပါ။ ချင်းမိုင်မှာ လည်စရာတွေ အများကြီး ရှိလို့ပါ။ တောင်ပေါ်မှာက ညဘက်ဘာမှ လုပ်စရာမရှိပါဘူး။

အားလုံးကို ကျေးဇူးတင်ပါတယ်။ ချင်းမိုင်အကြောင်းသိချင်တာတွေ ရှိရင်လည်း လှမ်းမေးနိုင်ပါတယ်။ သိသလောက်ဖြေပါ့မယ်။ ဒီ Post ကိုလည်း Share နိုင်ပါတယ်။ ပုံတွေထဲမှာလည်း ရှင်းပြထားပါသေးတယ်။

ပျော်ရွှင်ကျန်းမာအောင်မြင်တဲ့ နှစ်သစ်ကိုပိုင်ဆိုင်နိုင်ကြပါစေနော်။

With Best wishes
Nu Myat
http://www.numyataroundtheworld.com

#numyataroundtheworld
#BangkokAirways #TAT
#MarayaResort #OasisSpa

မြန်မာပြည်တောင်ဘက်စွန်း မြိတ်ကျွန်းစုမှ နေသာသာ ရေပြာပြာ နေ့ရက်များ (Sunny days in Southernmost Part of Myanmar)

“မြန်မာပြည်တောင်ဘက်စွန်း

မြိတ်ကျွန်းစုမှ
နေသာသာ ရေပြာပြာ နေ့ရက်များ”

20161125_130117_017_mix01-01
Jumping on Satan Island

🌞မြန်မာပြည်ထဲမှာ အရမ်းလှတဲ့ ရေအောက်ရှုခင်းတွေ စရိတ်သက်သက်သာသာနဲ့ ကြည့်ခဲ့တယ် … 🌊စိမ်းပြာရောင်အသည်းပုံလေးဖြစ်နေတဲ့ ကျွန်းလေးထဲက အသည်းပုံပင်လယ်လေးထဲလည်း ရေဝင်ကူးခဲ့တယ်

🌞မြန်မာတောင်ဘက်အကျဆုံး ဘုရင့်နောင်အငူလည်းရောက်ခဲ့တယ် … 🌊ဖြူလွှနူးညံ့နေတဲ့သဲသောင် ကမ်းခြေလှလှလေးမှာလည်း ခုန်ပေါက်ခဲ့တယ် …

ဒီလောက်လှတဲ့ အရာတွေ မြန်မာပြည်တွင်းမှာ ရှိနေတာ ဂုဏ်ယူစရာပါ။ ကော့သောင်းခရီးစဉ်ကလည်း တကယ်ကို ပျော်ဖို့ကောင်းပါတယ်။ အဲ့အတွေ့အကြုံတွေကို ခုလို ဆောင်းပါးလေးရေးပေးထားတယ်နော့… စိတ်ဝင်စားရင် ဖတ်ကြည့်နိုင်ပါကြောင်း…
စာဖတ်ပျင်းသူတွေအတွက် ဆောင်ရန် ရှောင်ရန်နဲ့ သွားမယ့်လမ်းကြောင်းတွေ၊ အချက်အလက် အကျဉ်းချုပ်တွေပါ နောက်ဆုံးမှာ ရေးပေးထားတယ်။

DCIM100MEDIA
Underwater of Kyat Mout Island

🌞ပထမနေ့ (Day 1 )

(ရန်ကုန်-ကော့သောင်း-မလိဝမ်းရေတံခွန်- သဘာဝရေပူစမ်း- သူဌေးကျွန်း)
✈ဘယ်လိုသွားမလဲ
ရန်ကုန်ကနေဆိုရင် ကော့သောင်းကို လေယာဉ်နဲ့ သွားလို့ရပါတယ်။ Air KBZ, MNA စတဲ့ Airline တွေ ပြေးဆွဲလေ့ရှိပါတယ်။ ကျွန်မတို့ကတော့ စီစဉ်တာရက်ကပ်လို့ လက်မှတ်ရတဲ့ Air KBZ နဲ့ သွားဖြစ်ပါတယ်။ မွန်းတည့် ၁၂ထွက်ပြီး ညနေ၃နာရီမှာ ရောက်ပါတယ်။ ကြားမှာ ထားဝယ်နဲ့ မြိတ်တို့မှာ ၂ခါရပ်ပါတယ်။ ၁ခါရပ် ၁၅မိနစ်လောက်သာကြာတာပါ။ ခဏခဏ ရပ်ပေမဲ့ လေယာဉ်တစ်ခါတက်တိုင်း မုန့်နဲ့ အအေးတစ်ခါ ထပ်ကျွေးတော့ မစားနိုင်တော့တဲ့ အထိပါပဲ။
လေယာဉ်ပေါ်က မြင်ရတဲ့ ထားဝယ်ရှူခင်းတွေ မြိတ်ရှူခင်းတွေ ကလည်း သွားလည်ချင်စရာပါ။  ကော့သောင်းနားရောက်လေလေ လေယာဉ်ပေါ်က မြင်ရတဲ့ ရှူခင်းတွေက ပိုပို လှလာလေပါ။ တောင်တွေနားကပ်လာပြီး တောင်တွေ ကျော်လာတဲ့ အခါ မြင်ရတဲ့ ရှူခင်းတွေက အံ့အားသင့်စရာပါ။ စိမ်းပြာရောင်ရေပြင်ကျယ်ကြီးတွေ ကြားက ကျွန်းစုလေးတွေ ဟိုတစ်ကွက် ဒီတစ်ကွက်နဲ့ ဆင်းခါနီးလေ ရင်ခုန်လေပါပဲ။
🏡မလိဝမ်းရေတံခွန်နဲ့ ရေပူစမ်း
ကော့သောင်းလေဆိပ်ကို Grand Andaman Hotel က ကားနဲ့လာကြိုပေးပါတယ်။ လေဆိပ်ကနေ မလိဝမ်းကျေးရွာနားရှိ မလိဝမ်းရေတံခွန်ကို တန်းသွားပါတယ်။ မလိဝမ်းကို ကော့သောင်းကနေ ၁နာရီလောက်မောင်းရပါတယ်။ အစီအရီပေါက်နေတဲ့ ရာဘာတောကြီးတွေ၊ ဆီအုန်းပင်ကြီးတွေကို တရိပ်ရိပ် ဖြတ်ကျော်လာပြီးနောက်မှာ ရောက်ပါပြီ။ ရေတံခွန်ဆီ မရောက်မီ ရေတံခွန် အပေါက်နားကနေမြင်ရတဲ့ ကုန်းမြင့်စိမ်းလေးပေါ်က ဘန်ဂလို ဖြူဖြူလေးဆီ သွားတဲ့ လမ်းလေးက လှလွန်းလို့ ဓာတ်ပုံတွေ အပြိုင်အဆိုင် ရိုက်ကြပါရော။ ဂိတ်ဝ၊နားနေလေသာဆောင်၊ စားသောက်ဆိုင်လေးတွေ၊ တံတားလေးတွေ ဖြတ်ကျော်လာပြီးနောက် ရေတံခွန်အောက်ခြေနား ရောက်ပါပြီ။ ရေတံခွန် အသေးလေးတွေ ရှိနေတဲ့ ရေပြင်ထဲ ဘောကွင်းနဲ့ ရေဆော့သူတွေလည်း တွေ့နေရပြီ။ လှေနီနီလေးတွေလည်း စီတန်းထားရဲ့။ ကျွန်မတို့လည်း ဘေးနားက ကျောက်ဆောင်ပေါ်မှာဓာတ်ပုံလေးတွေ ရိုက်ကြ ရေလေးတွေကို လက်နဲ့ဆော့ကြပေါ့။ တကယ့်ရေတံခွန်ကြီးသွားမယ်ဆိုရင် မိနစ်၂၀လောက် တောလမ်းအတိုင်းလျှောက်ရမယ်တဲ့။ အဲ့နေရာက အများကြီး ပိုလှတာ ပုံတွေထဲ မြင်ဖူးပေမဲ့လည်း အချိန်မရှိလို့ မသွားတော့ဘဲ နောက်တစ်နေရာကို ကူးကြရပြန်ပါတယ်။

20161124_162218_mix01-01
Maliwun Waterfall gate
20161124_162358_mix01
Maliwun Waterfall , Myanmar
20161124_163735_mix01
Maliwun Waterfall Myanmar

မလိဝမ်းသဘာဝရေပူစမ်းက ရေတံခွန်နဲ့ ကပ်ရပ်မှာ မဟုတ်ဘဲ အဲ့ရောက်ဖို့ ကားနဲ့ ၁၅မိနစ်လောက်ထပ်သွားရပါတယ်။ ရေပူစမ်းကလည်း အံ့သြစရာပါ။ စက်ဝိုင်းပုံစံ ရေကန်ထဲ စက်ဝိုင်းအလည်ကို ဗဟိုပြုကာ အကန့် ၃ကန့်ခွဲထားပါတယ်။ ၁ကန့်နဲ့ ၁ကန့် ရေအပူချိန်မတူပါဘူး။ 40C 45C 55C ဆိုပြီး အပူချိန်ကွဲနေပါတယ်။ ကျွန်မတို့ကတော့ ခုမှရောက်လို့ 40C မှာသာ ခြေထောက်စိမ်ဖြစ်ပါတယ်။ ခဏတာသာ စိမ်ခဲ့ပေမဲ့ အညောင်းအညာတွေ ပြေသွားတာတော့ အမှန်ပါပဲ။

20161124_171401_mix01
Maliwun natural spring
img_20161124_205922
Rubber Trees near Kaw Thaung

မလိဝမ်းသဘာဝရေပူစမ်းက ရေတံခွန်နဲ့ ကပ်ရပ်မှာ မဟုတ်ဘဲ အဲ့ရောက်ဖို့ ကားနဲ့ ၁၅မိနစ်လောက်ထပ်သွားရပါတယ်။ ရေပူစမ်းကလည်း အံ့သြစရာပါ။ စက်ဝိုင်းပုံစံ ရေကန်ထဲ စက်ဝိုင်းအလည်ကို ဗဟိုပြုကာ အကန့် ၃ကန့်ခွဲထားပါတယ်။ ၁ကန့်နဲ့ ၁ကန့် ရေအပူချိန်မတူပါဘူး။ 40C 45C 55C ဆိုပြီး အပူချိန်ကွဲနေပါတယ်။ ကျွန်မတို့ကတော့ ခုမှရောက်လို့ 40C မှာသာ ခြေထောက်စိမ်ဖြစ်ပါတယ်။ ခဏတာသာ စိမ်ခဲ့ပေမဲ့ အညောင်းအညာတွေ ပြေသွားတာတော့ အမှန်ပါပဲ။

လှေဆိပ်ကနေ ကျွန်းပေါ်အဝင်မှာ လူဝင်မှုကြီးကြပ်ရေးဌာနတွေ့လို့လည်း အံ့သြမိပါရဲ့။ သူဌေးကျွန်းက ထိုင်းနိုင်ငံရနောင်းမြို့နဲ့လည်း နီးတော့ ရနောင်းကလာရင် ၇မိနစ်ထဲမောင်းရပါတယ်။ ထိုင်းတွေ မကြာခဏလာလည်လို့ လူဝင်မှု ကြီးကြပ်ရေးဌာန ထားပေးရတာပါ။ ဟိုတယ်က ထင်ထားတာထက်ပို ခမ်းနား ပိုပြည့်စုံနေတာ အမှန်ပါ။ ပင်လယ်ကိုလှမ်းမြင်ရတဲ့ ရေကူးကန်ကြီးကလည်း ဟိုတယ်ကြီးရဲ့ အလှကို ပံ့ပိုးနေလေရဲ့။ Dinner Buffet ကလည်း ကောင်းမှကောင်း။ ထိုင်းစာကြိုက်တဲ့သူတွေ အတွက်တော့ ရှယ်ပေါ့။ ပင်လယ်စာတွေကို ထိုင်းစတိုင်ချက်ထားတာ ပြန်တွေးရင်တောင် တံတွေးမြိုမိတဲ့အထိ။ ညစာ Buffet က ဘတ် ၃၅၀ပါ။
ဟိုတယ်က ၂ယောက်ခန်းကို ၁ညကို $120 ကနေ $400 ထိ အစားစားရှိပါတယ်တဲ့။
🌞ဒုတိယနေ့ (Day 2 )

(သူဌေးကျွန်း- မြင်းခွာကျွန်း-ကြက်မောက်ကျွန်း-စေတန်ကျွန်း-ဇာဒက်ကြီးကျွန်း )
🛥Speed Boat
ထိုင်းအချိန် မနက် ၉နာရီမှာ ကျွန်းလေးကျွန်းပတ် ထွက်ဖို့ Lobby မှာ လူစုပါတယ်။ ဟိုတယ်မှာ တည်းတဲ့သူတွေရော မတည်းတဲ့ သူတွေပါ သူဌေးကျွန်းလှေဆိပ်မှာ ဆုံပြီး ထွက်ရပါတယ်။ ကျွန်းလေးကျွန်းခရီးစဉ် Package ကို ဒီ Hotel ကပဲစီစဉ်ပြီး လိုက်ပို့ပေးတာမို့လို့ လှေဆိပ်မှာ လိုက်မယ့်သူတော်တော်များပါတယ်။ ကျွန်မတို့ထွက်မယ့်နေ့မှာ အယောက် ၁၀၀လောက်ရှိပါတယ်။ Speed Boat တွေ ၃စီး ခွဲပြီး သွားရပါတယ်။ ကျွန်းသွားတဲ့ Package ကို ဘတ် ၃၉၀၀ (ကျပ်၁သိန်းခွဲနီးပါး) နဲ့ ရောင်းပြီး ကျွန်းပေါ်က နေ့လည်စာ၊  ဟိုတယ်က ညစာ Buffet ရယ်၊ ဟိုတယ်ပြန်ရောက်တဲ့အခါ ရေကူးကန်သုံးခွင့် Sauna သုံးခွင့်တွေပါပါပါတယ်။ Speed Boat ခရော၊ Snorkeling လုပ်တဲ့အခါ အသုံးပြုတဲံ ရေအောက်ကြည့်မျက်မှန်၊ Life Jacket၊ နည်းပြ၊ ရေ၊ အအေး၊ သစ်သီး Facility အစုံပေးထားပါတယ်။ Speed Boat မှာ အိမ်သာလည်းပါလို့ အတော်အဆင်ပြေပါတယ်။

20161125_091022_mix01
Speed boat to go islands

အရင်ဆုံးသွားမယ့်ကျွန်းတွေနဲ့ ခရီးစဉ်ကို ဂိုက်က မြေပုံနဲ့ တကွ ရှင်းပြပေးပါတယ်။ သူဌေးကျွန်းကနေ အဲ့ကျွန်းတွေရောက်ဖို့ ၁နာရီလောက် မောင်းရပေမဲ့ အဲ့ကျွန်းတွေက တစ်ကျွန်းနဲ့ တစ်ကျွန်း Speed boat နဲ့ ၁၀မိနစ်လောက်သာ သွားရတာပါ။ အရင်ဆုံး စေတန်ကျွန်းမှာ ကပ်ပြီး Lunch စားဖို့ အတွက် ပြင်ဆင်ဖို့ ယူလာတဲ့ အစားအစာတွေ အရင်ချပါတယ်။ ပင်လယ်ကနေ လှမ်းမြင်ရတဲ့ ကမ်းခြေရှုခင်းက အတော်လေးလှပါတယ်။ ပြာလဲ့နေတဲ့ကောင်းကင်ပြင်ကြီး နောက်ခံမှာ စိမ်းညှို့နေတဲ့ တောအုပ်လေးရယ် သူ့ရှေ့မှာ ဖြူလွှလွှသဲသောင်ပြင်ရယ် စိမ်းပြာရောင် ကြည်လင်လှတဲ့ ပင်လယ်ကြီးရယ်နဲ့ လှချင်တိုင်းကို လှနေတာပါ။ စေတန်ကျွန်းလေးက ခုပဲ ပြေးဆင်းချင်လာအောင် ဆွဲဆောင်နေပေမဲ့ အရင်ဆုံး တခြားကျွန်းတွေမှာ Snorkeling လုပ်မယ်ဆိုတော့ ဆန္ဒတွေ ပြန်မျိုချခဲ့ရပါတယ်။

🏞မြင်းခွာကျွန်း
ပထမဆုံးသွားတာက မြင်းခွာကျွန်းပါ။ အဲ့ကျွန်းကမ်းခြေက မြင်းခွာပုံ ရှိနေလို့ မြင်းခွာကျွန်းလို့ ခေါ်တာပါတဲ့။ အဲ့ကျွန်းမှာ ကမ်းခြေဆီ မကပ်ပဲ ကျွန်းနားက ရေထဲ Snorkeling လုပ်ကာ ငါးကြည့်ဖို့ ရပ်ပေးပါတယ်။ ရေထဲမဆင်းမီ Snorkeling ရေအောက်ငါးကြည့်မျက်မှန်တပ်နည်း၊ ပါးစပ်နဲ့ အသက်ရှူနည်းတွေ သေချာသင်ပေးပါတယ်။ စစချင်းတော့ ခက်သလိုရှိပေမဲ့ အကျင့်ရှိသွားရင် ရှူရတာ လွယ်လွယ်လေးပါ။

received_1106252092762692_mix01
Horse shoe island

ရေမကူးတတ်သူတွေဆိုလည်း မပူပါနဲ့။ ဂိုက်က ရေကူးရေငုပ် ကျွမ်းကျင်ပြီး အသက်ကယ်အင်္ကျီအပို၂စုံလောက်ချပေးထားလို့ အဲ့ဒါကို ကိုင်ပြီး ရေပေါ်ပေါ်ကာ အသာလေး လိုက်သွားရုံပါပဲ။ ဂိုက်ကရေအောက် သန္တာကျောက်တန်းတွေ လှတဲ့ ဘက်ကို အုပ်စုလိုက် ဆွဲခေါ်သွားပေးတော့ ရေအောက် ရှူခင်းတွေ ကြည့်ပြီး အသာအယာ လိုက်ရုံလေးပါပဲ။ စစချင်းရေထဲဆင်းရင်တော့ ကြောက်လိမ့်မယ်။ ကိုယ့်အောက်က ကြမ်းပြင်ကြီးက အနက်ကြီးကိုး။ ရေတွေကလည်း ကြည်နေတော့ အောက်ထိ တိုးလျှိုပေါက် မြင်နေရတာ ရင်ထိတ်စရာပါ။ အဲ့ ကြောက်စိတ်လေးတွေ ဖျောက်နိုင်ရင်ရပြီ။ တချို့ဆို ဆင်းဆင်းချင်း တအားကြောက်ပြီး Speed Boat ပေါ် ပြန်တက်သွားတော့ ရေအောက်အလှတွေ မကြည့်ရတော့ဘူးပေါ့။ မတန်ဘူးပေါ့။ ဒါကြောင့် ခဏတာဖြစ်ပေါ်လာတဲ့  ကြောက်စိတ်လေးတွေ ဖျောက်ပြီး ပျော်ပျော်ကြီး လိုက်သွားကြပါလို့။ ရေမကူးတတ်တဲ့ သူတွေတောင် Snorkeling အရသာတော်တော်တွေ့သွားကြတယ်လေ။

screenshot_20161125-155804_mix01-01
Us underwater of Andaman Sea

ရေမကူးတတ်သူတွေဆိုလည်း မပူပါနဲ့။ ဂိုက်က ရေကူးရေငုပ် ကျွမ်းကျင်ပြီး အသက်ကယ်အင်္ကျီအပို၂စုံလောက်ချပေးထားလို့ အဲ့ဒါကို ကိုင်ပြီး ရေပေါ်ပေါ်ကာ အသာလေး လိုက်သွားရုံပါပဲ။ ဂိုက်ကရေအောက် သန္တာကျောက်တန်းတွေ လှတဲ့ ဘက်ကို အုပ်စုလိုက် ဆွဲခေါ်သွားပေးတော့ ရေအောက် ရှူခင်းတွေ ကြည့်ပြီး အသာအယာ လိုက်ရုံလေးပါပဲ။ စစချင်းရေထဲဆင်းရင်တော့ ကြောက်လိမ့်မယ်။ ကိုယ့်အောက်က ကြမ်းပြင်ကြီးက အနက်ကြီးကိုး။ ရေတွေကလည်း ကြည်နေတော့ အောက်ထိ တိုးလျှိုပေါက် မြင်နေရတာ ရင်ထိတ်စရာပါ။ အဲ့ ကြောက်စိတ်လေးတွေ ဖျောက်နိုင်ရင်ရပြီ။ တချို့ဆို ဆင်းဆင်းချင်း တအားကြောက်ပြီး Speed Boat ပေါ် ပြန်တက်သွားတော့ ရေအောက်အလှတွေ မကြည့်ရတော့ဘူးပေါ့။ မတန်ဘူးပေါ့။ ဒါကြောင့် ခဏတာဖြစ်ပေါ်လာတဲ့  ကြောက်စိတ်လေးတွေ ဖျောက်ပြီး ပျော်ပျော်ကြီး လိုက်သွားကြပါလို့။ ရေမကူးတတ်တဲ့ သူတွေတောင် Snorkeling အရသာတော်တော်တွေ့သွားကြတယ်လေ။

image-0-02-06-ac5133975a0c8c8c5d5f95ab4550ce6d306ea89aeb60a86548baded5dd6bb6a0-v_mix01
Heart shaped Island, Cock Island ၾကက္ေမာက္ကၽြန္း Myanmar Andaman Sea

ကျွန်းမှာ ကမ်းမရှိဘူး။ ကျွန်းလယ်က အသည်းပုံထဲ ရောက်ဖို့ ရေကျချိန်မှာ ကျောက်ဆောင်အောက် ကျောက်ဆောင်အောက်ကနေ ဝင်ရပါတယ်။ Speed Boat ကနေ ကျွန်းလယ်ထဲထိ ကြိုးဆွဲပေးထားလို့ ကြိုးကိုင်ပြီး သွားရတာလွယ်တယ်။ ရေကြောက်လို့ တခြားနေရာမှာ မဆင်းရဲရင်တောင် ဒီကျွန်းမှာတော့ ဆင်းကြည့်သင့်ပါတယ်။ ရေအောက်က သိပ်မနက်ဘူး။ အသည်းပုံထဲ တချို့နေရာတွေဆို အရပ်မြင့်သူတွေ ခြေဖျားထောက်လို့တောင်ရတယ်။ ချစ်သူ၂ဦးတူတူလာရင် တစ်သက်မကွဲဘူးတဲ့လေ။ Honeymoon ခရီးစဉ်မှာ အသည်းပုံကျျွန်းလေးဆီသွားရင် Very Romantic ပေါ့။ စိတ်ကူးယဉ်ကြည့်တာပါ 😀

received_1275602462535793_mix01_mix01-01
Going inside the heart

🏖စေတန်ကျွန်း
ကျွန်းတွေမှာ ရေငုပ် ငါးကြည့်ပြီးတော့ ဗိုက်တော်တော်ဆာနေပါပြီ။ စေတန်ကျွန်း Dunkin Island မှာ ကြိုဆင်းနေတဲ့အဖွဲ့က ထမင်းစားဖို့ အသင့်ပြင်ထားပေးတယ်။ အဲ့ ကျွန်းမှာ လူမနေတော့ အားလုံးက သဘာဝဆန်ဆန် အရိုင်းဆန်ဆန်လှနေတာ။ အမှိုက်တွေ ဆိုလည်း ဘာဆိုဘာမှမရှိ။ သန့်နေတာပဲ။ Grand Andaman ရဲ့ ဂရုတစိုက် ထိန်းသိမ်းမှုကြောင့်လည်းပါမယ်။ နောက်ပိုင်းမှာ အဲ့ကျွန်းမှာ Tent ထိုးပြီး အိပ်လို့ရအောင် စီစဉ်နေတယ်ဆိုပဲ။

အဲ့ကျွန်းမှာ အထူးခြားဆုံးကတော့ သဲသောင်ပြင်လေးပါ။ Speed Boat ပေါ်က ဆင်းဆင်းခြင်း သိသိသာသာကြီးကို သဲတွေ က အိစက်နေတာပါ။ တကယ်ကို မွမွလေးတွေ။ ပြောရမယ်ဆိုရင် ကရေကရာမုန့်က အမှုန်လေးတွေလို နူးနူးညံ့ညံ့လေး။ စားချင်စိတ်တောင်ပေါက်တယ်။ တကယ်။ 😛

20161125_140341_mix01-01
soft white sand of Dunkin Island Myanmar
20161125_130117_017_mix01-01
Happy Jump on Dunkin Island or Satan Island

သဲလေးတွေ မွမွလေးတွေဆိုတော့ ကလေးတွေလို ခုန်ပေါက်ချင်ပြီပေါ့။ ကျွန်မတို့ အရွယ်တွေတင် မဟုတ် အတူပါလာတဲ့ ၆၀ကျော် အရွယ် ဖေဖေတို့မေမေတို့ Uncle တို့စုံတွဲတာင် ခုန်ပေါက်ပြီး ဓာတ်ပုံတွေ အရိုက်ခံနေကြတာ တကယ် လူငယ်လေးတွေလိုပဲ။ သူတို့ကိုကြည့်ပြီး အပျော်တွေတောင်ကူးစက်မိတယ်။ တကယ်။ 😀
စေတန်ကျွန်းမှာ ကျောက်ဆောင်လေးတွေကလည်းလှ၊ သစ်ပင်တွေမှာ ဒန်းလေးတွေလည်း လုပ်ပေးထားတော့ ကျွန်မတို့လို ပဲမမတွေ အကြိုက်ပေါ့လေ

20161125_134736_mix01-01-01
Swing like an islander
img1480156513229-01
rocks on Dunkin Island

🏞ဇာဒက်ကြီးကျွန်း
ဒီကျွန်းကတော့ နောက်ဆုံးပိတ် အိတ်နဲ့ လွယ်ဆိုသလို ရေအောက်ရှုခင်းတွေ အလှဆုံးပါတဲ့။ ညွှန်းသလောက် တကယ်လည်း လှပါရဲ့။ ကျောက်ခတ်တွေ သန္တာကျောက်တန်းတွေဆို ကိုယ်နဲ့ နီးနီးလေးလိုပဲ။ ရင်သက်ရှုမော စရာပါ။

ဟိုတယ်ကို ပြန်ရောက်တော့ ညနေစောင်းပြီ။ ဟိုတယ်မှာ မတည်းတဲ့ သူတွေ ကိုပါ ကျွန်းခရီးစဉ်လိုက်ရင် ရေကူးကန်နဲ့ Sauna သုံးခွင့်ပေးထားတော့ အုံးအုံးကြွက်ကြွက်ကို စည်ကားနေတာ။ ရောက်ရောက်ချင်း ပင်လယ်ရေတွေ ဆေးချ ရေချိုးပြီး အညောင်းအညာပြေအောင် Sauna ထဲ ဝင်ထိုင် ပြီးမှ ရေတစ်ခါပြန်ချိုး အဝတ်အစားလဲပြီး ညစာ သွားစားကြတယ်။ Massage လုပ်ချင်ပေမဲ့ လူတွေ များနေတော့ မလုပ်လိုက်ရဘူး။ အဲ့နေ့ကတော့ တကယ်အိပ်လို့ကောင်းတယ်။
🌞Day 3 တတိယနေ့

(Grand Andaman Adventure Club- ကော့သောင်း-ဘုရင့်နောင်အငူ-ပြည်တော်အေးစေတီ-ငါးသုံးလုံးတောင်-ရန်ကုန်)
🏍Adventure Club
ဒီ Grand Andaman Hotel ကို ကြိုက်တဲ့ အချက်နောက်တစ်ချက်က နိုင်ငံခြားမှာလို Adventure တွေမျိုးစုံ လုပ်လို့ရလို့ပါ။ သူဌေးကျွန်းလယ်တောင်ပေါ်က Adventure Club ကို ကားနဲ့တက်သွားလို့ရတယ်။ အဲ့မှာ တာဇံလို အရှိန်နဲ့ ကြိုးခိုပြီး စီးရတဲ့ Zip Line ရှိတယ်။ အမြင့်ကြီးကနေ ဟိုး…မျက်စိတဆုံးအထိ စီးရတာနော်။  သစ်ပင် တစ်ပင်နဲ့ တစ်ပင် ကြိုးတံတားတွေ ဘောကွင်းတွေ ဘားတန်းတွေ နဲ့ အမျိုးမျိုး စွန့်စွန့်စားစား သွားရတာလည်းရှိတယ်။ ကိုယ့်အောက်မှာ တောအုပ်တွေဆိုတော့ ရင်တထိပ်ထိပ်ပေါ့။ ပင်လယ်ပြင်ရှုခင်းနောက်ခံပြီး စွန့်စွန့်စားစားတွေ လုပ်နေရတော့ တာဇံလိုလို၊ ကျွန်းပေါ်သောင်တင်နေသူလိုလို Feeling က တအားမိုက် 😀

img1480158362891-01
Adventure on Tha Htay Island
20161126_110506_mix01-01
Zipline Adventure

ကျွန်းအနှံ့ ဘီးအကြီးကြီးတပ်ထားတဲ့ တောနင်းယာဉ် (ATV) ကိုယ်တိုင်မောင်းလို့လည်းရတယ်။ မမောင်းတတ်ရင် သူတို့လိုက်မောင်းပို့ပေးတယ်။ ATV စီးပြီး View Point မှာ ရပ်ပေးတော့ မြင်ရတဲ့ ရှူခင်းက ရင်သပ်ရှူမောဖွယ်ရာပါ။ ကော့သောင်းမြို့အပြင် ထိုင်းနိုင်ငံဘက်က တောင်တန်းလေးတွေပါ ပြပြလေး လှမ်းမြင်နေရတာ… View Point နားက သစ်ပင်တွေကလည်း ထူးဆန်းတယ်။  သစ်ကုလားအုပ်လို ဖြစ်နေတာ။ Adventure Club မှာ Activities တွေ လုပ်မယ်ဆိုရင်တော့ ဘတ် ၁၅၀၀   (မြန်မာငွေ ၅သောင်းဝန်းကျင်လာက်) ကျပါမယ်။ ကျွန်းပေါ်မှာ Organic စိုက်ခင်းတွေလည်း ရှိပြီး နောက်ဆို Hotel မှာ ကျွေးတဲ့ ဟင်းသီးဟင်းရွက်တွေ၊ သုံးတဲ့ ဆပ်ပြာတွေ အကုန် ကျွန်းထွက် ပစ္စည်းတွေနဲ့ပဲ Organic လုပ်မှာတဲ့..

20161126_111519-01
Adventure club
20161126_103443_mix01-01
Grand Andaman Viewpoint

🏙ကော့သောင်းမြို့

Hotel မှာပဲ Buffet Lunch စားပြီးတော့ လေဆိပ်မဆင်းခင် ကော့သောင်းမြို့ထဲ သွားလည်ခဲ့ကြတယ်။ မြန်မာနိုင်ငံရဲ့ တောင်ဘက်အကျဆုံးကုန်းမြေဖြစ်တဲ့ ဘုရင့်နောင်အငူ (အရင် ဝိတိုရိယအငူ) ကိုတော့ မရောက်မဖြစ်ပေါ့။ ငါဟာ အမိမြန်မာပြည်ရဲ့ ခြေချောင်းထိပ်လေးဆီ ရောက်နေတာပါလားဆိုတဲ့ Feeling လေးက တစ်မျိုးလေးပါပဲ… ဒုတိယမြန်မာနိုင်ငံတော် တည်ထောင်ခဲ့တဲ့ ဘုရင့်နောင်ရုပ်တုကြီးကလည်း ငါတို့ မြေကို လာမထိနဲ့ ဆိုပြီး ပင်လယ်ဘက်ကို မျှော်ကာ ရန်သူတွေကို ကာကွယ်ပေးနေသယောင်ယောင် ထင်မှတ်မိလေရဲ့ …

ကျွန်မတို့က ၂ညအိပ် ၃ရက်ပဲ အချိန်ရတော့ ဒီနေရာလေးတွေပဲ လည်ဖြစ်ပါတယ်။ ဒီထက်ပိုပြီး အချိန်ရမယ် ဆိုရင် ကော့သောင်းမြို့နားက ပုလုံးတုံးတုံး ကမ်းခြေက တအားလှတယ်ဆိုပဲ။ ညောင်ဦးဖီးကျွန်းနဲ့ အနားတဝိုက်က ကျွန်းတွေကလည်း  သွားရတာ ဝေးပေမယ့် သာယာတယ်လို့ ဆိုကြပါတယ်။ ထိုင်းနိုင်ငံဘက်ကို ကူးပြီး ရနောင်းမြို့ သွားလည်လည်း ရပါတယ်။ တခြားလည်စရာ နေရာတွေ သိလည်း Comment မှာ အကြံပေးကြပါဦးနော်။

received_10154253854287123_mix01
Kaw Thaung

Tips!
-ရေမကူးတတ်လို့၊ ရေ ကြောက်လို့ဆိုပြီး ရေထဲ မဆင်းဘဲ မနေပါနဲ့။ ရေမကူးတတ်လည်း ဆင်းလို့ရပါတယ်။ မဆင်းလိုက်ရရင် နောင်တရနေမှာနော်

-ရေကူးတတ်ပေမဲ့လည်း ကိုယ့်ဟာကိုယ်ကူးမနေပဲ ရေငုပ်သမားခေါ်သွားတာနောက်လိုက်ပါ။ သူတို့က ဘယ်နေရာမှာ ဘာရှိလဲ ဆိုတာ သိနေတတ်လို့ပါ။ သူတို့တွေ ရေထဲ ငုပ်ငုပ်သွားတာ ကြည့်ရတာလည်း ဆပ်ကပ်ကြည့်နေရသလိုပါပဲ

-ထိုင်းတွေ အလာများလို့ ထိုင်းဘတ်တွေ သုံးပါတယ်။ ကိုယ့်မှာ ဘတ်ငွေတွေ ရှိရင် ယူသွားပါ။ သုံးလို့ရပါတယ်။ လက်ရှိ ဘတ်ငွေပေါက်ဈေး ၁ဘတ် = ၃၇ကျပ်

-အချိန်ကလည်း ထိုင်းနဲ့ နီးလို့ ထိုင်း အချိန်ကို ယူတတ်ကြပါတယ်။ ထိုင်းအချိန်က မြန်မာအချိန်ထက် နာရီဝက်စောပါတယ်။ ဥပမာ- မြန်မာမှာ မနက်၉နာရီဆို ထိုင်းအချိန်က ၉နာရီခွဲပါ။ ဒီတော့ အချိန်ပြောရင် ထိုင်းအချိန်လား မြန်မာ အချိန်လားဆိုတာကို သေချာအောင်မေးပါ

-ဖုန်းကတ်က MPT သာမိလို့ MPT card ရှိရင်ယူသွားပါ။ Ooredoo ကတော့ တစ်ခါတလေ မိပါတယ်။

-ရေအောက်ရိုက်တဲ့ ကင်မရာရှိရင် ယူသွားပါ။ ရေအောက်ရှုခင်းတွေ တအားလှပါတယ်။ ဖုန်းတွေကိုလည်း ရေစိုခံအိတ်နဲ့ ထည့်ထားပါ။

-နေအရမ်းပြင်းတော့ အသားနေမလောင်အောင် နေပူခံ ရေစိုခံ Sunscreen တွေ ဆောင်သွားပါ။

-Hotel က Thai Massage Spa မှာ နှိပ်တဲ့သူ ၄ယောက်ပဲရှိလို့ ကျွန်းသွားတဲ့နေ့တွေမှာ ပင်ပန်းပြီး အနှိပ်ခံတဲ့သူများလို့ လူကျတတ်တယ်။ Massage ကြိုက်ရင် ကြိုပြီး Booking တင်ထားပါ။

-Hotel မှာ တည်းရင် တစ်ရက်ကို ကျွန်းပတ်ခရီးစဉ်နဲ့ တွဲယူပါ။ ပိုသက်သာလို့ပါ။ ကျွန်းပတ်ခရီးစဉ်နဲ့တွဲယူရင် တစ်ယောက်ကို ဘတ် 1000 ပဲ ပိုပေးရတော့ ၂ယောက်ဆို ဘတ် 2000 (ကျပ် ၇၅၀၀၀ လောက်) သာကျမှာပါ။ ပုံမှန်က ဟိုတယ်တစ်ညကို $120 ( ကျပ် ၁သိန်းခွဲကျော်) ပေးရတော့ ထက်ဝက်ကျော်သက်သာလို့ပါ။

DCIM100MEDIA
DCIM100MEDIA

Quick facts
ကုန်ကျစရိတ် – ၂သိန်းကျော်မှ ၆သိန်းထိ

ခရီးစဉ်ရက် – ၂ညအိပ် ၃ရက် or 3ညအိပ် ၄ရက်

သွားသင့်သောနေရာများ

ကော့သောင်းမြို့ – ဘုရင့်နောင်အငူ၊ ဘုရင့်နောင်ရုပ်တု၊ ပြည်တော်အေးစေတီတော်၊ ငါးသုံးလုံးတောင်၊ ပုလုံးတုံးတုံးကမ်းခြေ

သူဌေးကျွန်း၊ ကြက်မောက်ကျွန်း၊ စေတန်ကျွန်း၊ ညောင်ဦးဖီးကျွန်း

မလိဝမ်းရေတံခွန်၊ မလိဝမ်း သဘာဝရေပူစမ်း

ရနောင်းမြို့

received_10154253857982123_mix01
Pretty Pink

ကော့သောင်းမြိတ်ကျွန်းစုလှတယ်သာသိတာ။ ဒီလောက် သွားလာရလွယ်မယ်။ တိုးတက်နေမယ်လို့ မထင်ထားတာ အမှန်ပါ။ ခုလို ပွင့်လင်းရာသီမှာ Honey Moon ထွက်လိုတာပဲ ဖြစ်ဖြစ်၊ မိသားစုလိုက် ပျော်ပျော်ကြီး သွားလိုတာပဲ ဖြစ်ဖြစ်၊ Anniversary ရက်တွေ တူတူ ဆင်နွှဲလိုတာပဲဖြစ်ဖြစ်၊ သူငယ်ချင်းတွေနဲ့ အတူတူကဲလိုတာပဲဖြစ်ဖြစ်၊ ပင်လယ်နဲ့ ကမ်းခြေကို ချစ်ပြီး ရေအောက်အလှတွေ မြင်တွေ့လိုတာပဲဖြစ်ဖြစ် နိုင်ငံခြားကို ဈေးကြီးပေးပြီး သွားစရာ မလိုဘဲ ကိုယ့်နိုင်ငံထဲမှာပဲ နိုင်ငံတကာ အဆင့်မီ သွားလည်နိုင်တာ ကျေနပ်စရာပါ။ နိုင်ငံခြားသားတွေတောင် တကူးတကလာပြီး Snorkeling လုပ်ရတယ်ဆိုတော့ စိတ်ကြီးဝင်မိပြီပေါ့။ တချို့ဆို တစ်ရက်နဲ့ မဝလို့ နောက်တစ်ရက်တောင် ထပ် Join တယ်ဆိုပဲ။ 😀

20161125_130233_011_mix01

အားလုံးပဲ ကျန်းမာပျော်ရွှင်တဲ့နေ့ရက်တွေ ပိုင်ဆိုင်နိုင်ပါစေနော်…
#NuMyat

https://www.facebook.com/numyataroundtheworld/
ဒီ Post ကို လွတ်လပ်စွာ Share နိုင်ပါတယ်။ ပုံနဲ့ စာတွေ ယူသုံးခြင်းတော့ ခွင့်မပြုပါ။

Drone ပုံတွေ အသုံးပြုခွင့်ပေးပြီး ကော့သောင်းမြို့ကို လာလည်ဖို့ ဖိတ်ခေါ်ခဲ့တဲ့ သွားခဲ့တဲ့ရက်တိုင်းမှာလည်း ဧည့်ဝတ်ကျေပွန်ခဲ့တဲ့ Grand Andaman Hotel မှ တာဝန်ရှိသူများကို ကျေးဇူးအထူးတင်ရှိပါတယ်။
All photos with Nu Myat around the World logo are taken and copyrighted by Nu Myat. Feel free to share this post. But not allow to use the photos and words without my permission.

ကမ္ဘာတလွှားမှ စုံတွဲများ ဟန်းနီးမွန်းထွက်ရာ မော်ဒိ(ဗ်)ကျွန်းနိုင်ငံ (The Honeymoon Paradise, Maldives)

ကမ္ဘာတလွှားမှ စုံတွဲများ

Honey Moon ထွက်ရာ

Maldives ကျွန်းနိုင်ငံသို့

အလည်တစ်ခေါက်

Nu Myat at Club Med Resort, Maldives
Nu Myat at Club Med Kani Resort, Maldives
Club Med from bird eye view
Club Med from bird eye view
Nu Myat just outside the Lagoon suite of Club Med
Nu Myat just outside the Lagoon suite of Club Med

စိမ်းပြာရောင်သန်းပြီး ကြည်လင်ရှင်းသန့်သော ရေပြင်၊ ဖြူလွှဝင်းပသော သဲသောင်ပြင်၊ သမုဒ္ဒရာကို ဖြတ်သန်းတိုက်ခတ်လာသည့် သန့်ရှင်းလတ်ဆတ်သော လေကောင်းလေသန့်၊ ရေပေါ်ရေအောက် လှပသော ရှုခင်းများ၊ စိတ်ကူးယဉ်ဆန်စွာ ဆောက်လုပ်ထားကြသည့် အပန်းဖြေစခန်းဟိုတယ်များကြောင့် ကမ္ဘာတစ်ဝှမ်းမှ စုံတွဲများ ပျားရည်ဆမ်းခရီး Honey Moon ထွက်ရာ၊ ကမ်္ဘာလှည့် ခရီးသည်များ အနားယူအပန်းဖြေရာ ကျွန်းနိုင်ငံအဖြစ် နာမည်ကြီးနေသော Malvides (မော်ဒိဗ်စ်)နိုင်ငံအကြောင်းကို စာအုပ်၊ ရုပ်ရှင်နှင့် ဓာတ်ပုံများ၌သာ တွေ့ ဖူးပြီး သဘောကျနေမိခဲ့ပါသည်။ ထိုကဗျာဆန်သော နိုင်ငံသို့ တစ်နေ့နေ့တစ်ချိန် ချိန်မှာ အရောက်သွားမည်ဟုလည်း စိတ်ကူးယဉ်မိဖူးခဲ့ပါသည်။

Sailing Activites
Sailing Activites

စိတ်ကူးထဲမှာ ရွက်လွှင့်သွားဖြစ်ခဲ့သော ထို Malvides နိုင်ငံသို့ Sun Far Travels & Tours ၊ Bangkok Airways နှင့် ထိုနိုင်ငံရှိ Club Med Kani ဟိုတယ်တို့၏ ဖိတ်ကြားချက်အရ 2014 ခုနှစ် မတ်လ ၃၀ ရက်မှ ဧပြီလ ၁ ရက်နေ့အထိ စာရေး သူ သုံးရက်တာသွားရောက် လည်ပတ်လေ့လာခဲ့ရပါသည်။ Malvides နိုင်ငံနှင့် Club Med Kani ဟိုတယ် အကြောင်း မြန်မာမှာ ပိုပြီးသိရှိရင်းနှီးစေဖို့ ရည်ရွယ်ပြီး မြန်မာမီဒီယာများကို ဖိတ်ကြားခဲ့သည်ဖြစ်ရာ စွယ်စုံမီဒီယာဂရု(ပ်) (The Chic Magazine) မှ ကျွန်မ ဒေါက်တာနုမြတ်သိင်္ဂီဦးနှင့်အတူ အခြား မီဒီယာများဖြစ်ကြသော Forever Group (MRTV-4) ၊ ရန်ကုန်မီဒီယာဂရု(ပ်) Inforithm Maze မီဒီယာ၊ Asia Fame မီဒီယာဂရု(ပ်)၊ မြန်မာတိုင်း(မ်)ဂျာနယ်၊ Travellers ဂျာနယ်နှင့် မန်္တလေးနေ့စဉ်သတင်းစာတို့မှ မီဒီယာသမားများ သွား ရောက်လေ့လာခဲ့ကြခြင်းဖြစ်သည်။

Myanmar Media group & Bangkok Airways team
Myanmar Media group & Bangkok Airways team

Malvides နိုင်ငံသည် အိန်္ဒိယသမုဒ္ဒရာတွင်း အာရှတိုက်ထဲမှာရှိသော အာ ရှနိုင်ငံဖြစ်သော်လည်း မြန်မာခရီးသွားများနှင့် သိပ်ပြီး အကျွမ်းတဝင်မရှိကြသေးပါ။ Malvides နိုင်ငံသို့ ဝင်ရောက်မည့် ခရီးသွားများအနေဖြင့် ဗီဇာမလိုအပ်သဖြင့် သွားလာရလွယ်ကူပြီး ထိုင်းနိုင်ငံမှတစ်ဆင့် Bangkok Airways လေကြောင်း ဖြင့် သွားရောက်နိုင်ပါသည်။ ထိုင်းနိုင်ငံမှ Malvides သို့လေယာဉ်ပျံသန်းချိန်မှာ လေးနာရီကျော်သာ ကြာမြင့်ပြီး မြို့တော် Male (မာလေး)၏ ကပ်လျက်ကျွန်းရှိ လေဆိပ်မှ တည်းခိုမည့်ဟိုတယ်သို့ ဟိုတယ်၏ အစီအစဉ်ဖြင့် Speed Boat များဖြင့် သွားရောက်နိုင်ပါသည်။

Maldive international airport. A separate island for an airport
Maldive international airport. A separate island for an airport
Speed Boat welcoming the customers
Speed Boat welcoming the customers

သီရိလင်္ကာနိုင်ငံ၏ အနောက်တောင်ဘက် ၄၃၀ မိုင်အကွာနှင့် အိန်္ဒိယနိုင်ငံ အနောက်တောင်ဘက် ၂၅၀ မိုင်အကွာ အိန်္ဒိယသမုဒ်္ဒရာ ထဲတွင် တည်ရှိနေသော Malvides နိုင်ငံသည် ကျွန်းပေါင်း ၁၁၉၂ ကျွန်းဖြင့် ဖွဲ့စည်းထားသည့် ကျွန်းနိုင်ငံ ဖြစ်သည်။ ထိုကျွန်းများအနက် ကျွန်းပေါင်း ၁၉၂ ကျွန်းပေါ်မှာသာ လူနေထိုင်၍ တစ်နိုင်ငံလုံးလူဦးရေမှာ စုစုပေါင်း ၃၉၀၀၀၀ ကျော်သာရှိသည်။ နိုင်ငံအကျယ်အဝန်းမှာ ၁၁၅ စတုရန်းမိုင်သာရှိ၍ လူဦးရေအရရော အကျယ်အဝန်းအရပါ အာရှမှာ အသေးငယ်ဆုံးနိုင်ငံဖြစ်ကြောင်း သိရသည်။

Map of Maldives
Map of Maldives
Male, the capital of Maldives
Male, the capital of Maldivesl

နိုင်ငံ၏ ၉၉ ရာခိုင်နှုန်းမှာ ရေပြင်ဖြစ်ပြီး ကုန်းမြေအမြင့်မှာ ပျမ်းမျှအားဖြင့် ပင်လယ်ရေမျက်နှာပြင်မှ ၄ ပေ ၁၁ လက်မ အထက်သာမြင့်သဖြင့် ကမ္ဘာပေါ်မှာ မြေမျက်နှာပြင်အနိမ့်ဆုံးနိုင်ငံအဖြစ် သတ်မှတ်ခံထားရသည်။ အမြင့်ဆုံးနေရာမှာ ပင်လယ်ရေမျက်နှာပြင်အထက် ၇ ပေနှင့် ၁ လက်မခန့်သာရှိပါသည်။ ထိုသို့ မျက်နှာပြင်နိမ့်မှုကြောင့် များမကြာမီနှစ်များအတွင်း ပင်လယ်ရေအောက်ကို ရောက်ရှိသွားနိုင်သည့် နိုင်ငံအဖြစ်လည်း ခန့်မှန်းထားကြပါသည်။ ရာသီဥတု ပြောင်းလဲမှုနှင့် ကမ္ဘာကြီးပူနွေးလာမှုကြောင့် ရေလွှမ်းမိုးခံရနိုင်သည့် တတိယ မြောက်အန္တရာယ်အရှိဆုံးနိုင်ငံအဖြစ်လည်း သတ်မှတ်ထားကြသည်။ ထိုသို့ သဘာဝအန္တရာယ်များသောကြောင့်လည်း Malvides နိုင်ငံသည် ကမ်္ဘာပေါ်မှာ ထင်ရှားလာခဲ့ခြင်းဖြစ်သည်။ နောင်နှစ်အနည်းငယ်အတွင်း ကျွန်း များ ရေအောက်ရောက်မသွားခင်၊ သဘာဝအလှတရားများ ကွယ်ပျောက်မသွားခင် သွားရောက်လည်ပတ်လိုသောဆန်္ဒကြောင့် ကမ်္ဘာလှည့်ခရီးသည်များ တစ်နေ့ တခြားများပြားလာရခြင်းဖြစ်၏။ ၁၉၆၅ ခုနှစ် ဗြိတိသျှကိုလိုနီမှ လွတ်မြောက်ပြီး ကာလ ၁၉၇၅ ခုနှစ်က စတင်ကာ ဟိုတယ်များဆောက်လုပ်ခဲ့ပြီး ယခုအခါ ဟိုတယ်ပေါင်း ၂၀၀ ကျော်ရှိကြောင်းသိရ၏။ များသောအားဖြင့် ဟိုတယ်များကို တည်ဆောက်ရာမှာ ကျွန်းတစ်ကျွန်းကို ဟိုတယ်တစ်ခုစီ ဆောက်ထားခြင်းသည်လည်း Malvides နိုင်ငံ၏ ထူးခြားချက်တစ်ခုပင် ဖြစ်ပေသည်။

Couple at Sun Rising
Couple at Sun Rising

ထိုကဲ့သို့ Maldives(မော်ဒိဗ်)နိုင်ငံ၏ ကြယ်ငါးပွင့်အဆင့်ရှိ ဟိုတယ်များ၌ တစ်ခုအပါအဝင်ဖြစ်သော Club Med ဟိုတယ်သည် Kani(ကာနီ)ကျွန်းတစ်ကျွန်းလုံးပေါ်၌ ဆောက်လုပ်ထားခြင်းဖြစ်၍ မြို့တော် Male(မာလေး)အနီးရှိ အပြည်ပြည်ဆိုင်ရာ လေဆိပ်ရှိရာကျွန်းမှ မိနစ် ၂၀ ကြာ Speed Boat ဖြင့် သွားရောက်နိုင်သည်။ ဟိုတယ်၏ ဝန်ဆောင်မှုများအနက် လေဆိပ်မှ ဟိုတယ်သို့ အကြိုအပို့ပါရှိသည်ဖြစ်ရာ ဧည့်သည်များ လေယာဉ်ဆိုက်ရောက်သည့်အချိန်၌ ဟိုတယ်မှ Speed Boat ဖြင့် ဧည့်သည်များကို ဝန်ဆောင်မှုအပြည့်ပေးနိုင်ရန် ခန့်မှန်းထားသည့် G.O (Gentil Organisateurs)ဟု ပြင်သစ်လို အတိုကောက် ခေါ်သည့် ဖော်ရွေသော ဧည့်ကြိုများက လာရောက်ကြိုဆိုပေးပါ၏။

Speed Boat Ferry
Speed Boat Ferry

suite8 To repair lounge

Beach
Beach

Club Med ဟိုတယ်၏ ထူးခြားချက်များအနက် ထို G.O များလည်း ပါဝင် ၏။ အထူးကောင်းမွန်သော ဝန်ဆောင်မှုကို အခြေခံထားသည်ဖြစ်ရာ ကမ္ဘာလှည့် ခရီးသည်များအတွက် ယဉ်ကျေးဖော်ရွေသော G.O များကို အနယ်နယ်အရပ်ရပ်မှ ခန့်ထားပြီး Club Med လူမျိုးပေါင်း ၂၂ မျိုးရှိကြောင်း သိရ၏။ ထို G.O များသည် ဧည့်ဝတ်ကျေရုံမျှမက အဆို၊ အက ပညာရပ်များ၌ပါ ကျွမ်းကျင်ကြသည် ဖြစ်ရာ ညတိုင်း ဧည့်သည်များ မပျင်းရလေအောင် ခေါင်းစဉ်တစ်ခုစီဖြင့် တစ်နာရီကြာမျှ စင်မြင့်ထက်၌ ဖျော်ဖြေလေ့ရှိရာ တကယ့်ဝါရင့် အဆို၊ အကပညာရှင်များကဲ့သို့ ကျွမ်းကျင်ကြသည်ကို တွေ့ရ၏။

GO performing at the night party
G.O performing at the night party
G.Os invite all guests to dance together with them
G.Os invite all guests to dance together with them
Suite
Lagoon Suite Lounge

Club Med ဟိုတယ်၌ အခန်းအမျိုးအစား အမျိုးမျိုးရှိရာ ဈေးသက်သာ သော Superior Room ၁၃၅ ခန်း၊ ကမ်းခြေနှင့် ကပ်လျက်ရှိနေသည့် Beach Villa ၂၄ ခန်းနှင့် သမုဒ္ဒရာရေပေါ်ခြေတံရှည်အဆောင်များဖြင့် တည်ဆောက် ထားသည့် လူကြိုက်အများဆုံး Lagoon Suiteအခန်း ၇၅ ခန်းရှိကြောင်း သိရ၏။ မည် သည့်အခန်းမှာတည်းသည့် မည်သည့်ဧည့်သည်မဆို နံနက်စာ၊ နေ့လယ်စာနှင့် ညစာများကို နိုင်ငံတကာစားဖိုမှူးများ ချက်ပြုတ်ထားကြသည့် International  ဘူဖေးနှင့် ပင်လယ်စာများ ကြိုက်သလောက် သုံးဆောင်နိုင်ပါသည်။ ထို့ပြင် Sunset Bar နှင့်Iru Bar တို့၌ သစ်သီးဖျော်ရည်၊ အအေး၊ ကော့တေး၊ ဘီယာ နှင့် အရက်မျိုးစုံကို ကြိုက်သည့်အချိန်၌ စိတ်ကြိုက်သောက်သုံးနိုင်သဖြင့် ဧည့် သည်များအတွက် အထူးအဆင်ပြေလှ၏။

Lagoon Suite
Lagoon Suite
Lagoon Suite Lounge
Lagoon Suite Lounge
Mocktail on the beach
Mocktail from Sunset bar

ထို့ပြင် ကမ်းခြေ Activities များဖြစ်သည့် ရွက်လွှင့်ခြင်း၊ ရွက်လွှင့်သင်ခြင်း၊ လှေလှော်ခြင်း၊ သမုဒ်္ဒရာရေပြင်တွင်းရှိ ငါးများကြည့်ခြင်း(Snorkeling)၊ အက သင်ခြင်း၊ ယောဂကျင့်ခြင်း၊ ရေကူးကန်ထဲ၌ ဂိမ်းဆော့ခြင်း(Aqua Gym)အစီ အစဉ်များကို အခမဲ့ပြုလုပ်နိုင်သည့်အတွက် Resort မှာ အခန်းယူလိုက်သည် နှင့် တစ်ပြိုင်နက် အပိုငွေတောင် ဆောင်စရာမလိုသည်အထိ အဆင်ပြေလှပါ၏။

Aqua Gym Pool Games
Aqua Gym Pool Games
This is us underwater
This is us underwater

အကယ်၍ လှေစီးခြင်း၊  Jet Ski စီးခြင်း၊ ရေအောက်ငုပ်ခြင်း(Scuba Diving)၊ ရေဘောလုံးအတွင်း ဝင်ကစားခြင်း(Water Ball)၊ သမုဒ္ဒရာအတွင်း သင်္ဘောစီးကာ နေဝင်ချိန်အလှ ရှုစားခြင်း(Sunset Cruise)၊ မာလေးမြို့တော် သို့ သွားလည်ကာ ဈေးဝယ်ထွက်ခြင်းနှင့် Spaဝန်ဆောင်မှုများ စသည်တို့ကို ပြုလုပ်လိုပါကလည်း အခကြေးငွေ ထပ်ဆောင်းကာ ပြုလုပ်နိုင်ပါ၏။

Dolphins
Dolphins at Sunset Cruise
Yoga
Yoga Training

outside1

စုံတွဲများနှစ်သက်သည့် ရေပေါ် Suite အခန်းများ၏ ထူးခြားမှုများမှာ အခန်းများသည် ကြည်လင်သော စိမ်းပြာရောင် သမုဒ်္ဒရာရေပြင် ပေါ်တွင် ဆောက်လုပ်ထားခြင်း၊ အထူးလှပသော ရှုခင်းများကို အိပ်ရာထဲမှ မြင် တွေ့ရနိုင်ခြင်း၊ အခန်းထဲမှ ထွက်သည်နှင့် သမုဒ်္ဒရာထဲဆင်းနိုင်ရန် စီစဉ်ထား ခြင်း၊ ရှမ်ပိန်ပုလင်းနှင့် စားသောက်ဖွယ်ရာများ စိတ်ကြိုက်စားသောက်နိုင်ခြင်း၊ လှပဆန်းသစ်သော ဧည့်ဆောင်ရှိခြင်းစသည့်အချက်များပင် ဖြစ်သည်။

Just outside the lagoon suite
Just outside the lagoon suite
Before diving
Before diving
Underwater
Underwater

စုံတွဲများနှစ်သက်သည့် ရေပေါ် Suite အခန်းများ၏ ထူးခြားမှုများမှာ အခန်းများသည် ကြည်လင်သော စိမ်းပြာရောင် သမုဒ်္ဒရာရေပြင် ပေါ်တွင် ဆောက်လုပ်ထားခြင်း၊ အထူးလှပသော ရှုခင်းများကို အိပ်ရာထဲမှ မြင် တွေ့ရနိုင်ခြင်း၊ အခန်းထဲမှ ထွက်သည်နှင့် သမုဒ်္ဒရာထဲဆင်းနိုင်ရန် စီစဉ်ထား ခြင်း၊ ရှမ်ပိန်ပုလင်းနှင့် စားသောက်ဖွယ်ရာများ စိတ်ကြိုက်စားသောက်နိုင်ခြင်း၊ လှပဆန်းသစ်သော ဧည့်ဆောင်ရှိခြင်းစသည့်အချက်များပင် ဖြစ်သည်။

Welcome from Lagoon Suite
Welcome from Lagoon Suite
Inside Suite
Inside Suite
Bathroom
ရွဳ ခင္းမ်ားကို ခံစားႏိုင္ေသာ Bathroom

ထိုကဲ့သို့ အစစအရာရာ အဆင်ပြေအောင် စီစဉ်ထားခြင်းကြောင့်လည်း ကမ္ဘာအနှံ့အပြားမှ စုံတွဲများဧ။် Honey Moon Destination ဖြစ်လို့နေခြင်း ဖြစ်ပေလိမ့်မည်။ ဤကဲ့သို့ ဝန်ဆောင်မှု ကောင်းမွန်ပြီး လှပသာယာသည့် Club Med Kani Resort သို့ သွားရောက်အပန်းဖြေလိုသူ မြန်မာခရီးသွားများအတွက် Bangkok Airways  နှင့်Club med Kani တို့ပူးပေါင်းကာ အထူးသက်သာသော ဈေး နှုန်းများဖြင့် ၂ ညအိပ် ၃ ရက်ခရီး package များကို စီစဉ်ပေးလျက်ရှိကြောင်း သိရပါသည်။ ပုံမှန်ဈေးနှုန်း အခန်းအမျိုးအစားပေါ်မူတည်ပြီး အမေရိကန်ဒေါ်လာ ၁၆၀၀ မှ ၂၅၀၀ ကျော်ရှိရာမှ Promotion ကာလများတွင် အမေရိကန်ဒေါ်လာ ၁၂၀၀ ကျော်မှ ၁၉၀၀ ကျော်အထိ ဈေးလျှော့ပေးလေ့ရှိကြောင်း သိရသည်။

Nu Myat at Sunset
Nu Myat at Sunset
Sunset into India Ocean
Sunset into India Ocean

Words & Photographs by Nu Myat Theingi Oo

ကမ္ဘာ့အံ့ဖွယ် ဂရန်းကင်ညွန် ချောက်ကမ်းပါးကြီး (Grand Canyon, one of the 7 wonders of natural world)

ကမ္ဘာ့အံ့ဖွယ် ဂရန်းကင်ညွန် ချောက်ကမ်းပါးကြီး

 

Nu Myat at the Grand Canyon
Nu Myat at the Grand Canyon

ချောက်ကမ်းပါးပျက်ကြီးများ၊ နက်ရှိုင်းသောချောက်ကြီးများနှင့် အံ့သြဖွယ်ရာ လှပလှသော ဂရင်းကင်ညွန် (Grand Canyon) သည် အမေရိကန်ပြည်ထောင် စုအနောက်ဘက်ရှိ အယ်ရီဇိုးနား (Arizona)ပြည်နယ်တွင် တည်ရှိလျက်ရှိပါသည်။ ထူးခြားခမ်းနားလှသော သဘာဝအလှတရားရှုခင်းများကြောင့် ကမ္ဘာ့သဘာဝအံ့ဖွယ် ၇ ခုထဲ၌ တစ်ခုအပါအဝင်ဖြစ်နေသည့်ထို Grand Canyon သို့ ကျွန်မသည် 2014 ခုနှစ် ဇွန်လလယ်လောက်က ရောက်ရှိခဲ့ပါသည်။ အမေရိကန်နိုင်ငံ Woman in Public Services အဖွဲ့အစည်းမှ ဖိတ်ကြားသည့် နှစ်ပတ်ကြာသင်တန်းကို Massachusetts ပြည်နယ်ရှိ ကောလိပ်များ၌ တက်ရောက်ပြီးနောက် အမေရိကန်နိုင်ငံရှိ ထင်ရှားကျော်ကြားသည့် နေရာများသို့ မိမိအစီအစဉ်ဖြင့်သွားရောက်လည်ပတ်ခဲ့ရာ Grand Canyon သည် ကမ္ဘာ့အံ့ဖွယ်ဒေသဖြစ်၍ မဖြစ်မနေ သွားရောက်လေ့လာခဲ့ခြင်းဖြစ်ပါသည်။
grand canyon1

Eagle Point
Eagle PointIMG_5626

Grand Canyon သည် အရှည်အားဖြင့် ၂၇၇ မိုင်ရှည်ကာ အကျယ်အားဖြင့် ၁၈ မိုင်ထိရှိပြီး အနက်မှာမူ တစ်မိုင်ကျော်ရှိသည်။ Grand Canyonကို ဖြတ်သန်း စီးဆင်းနေသည့် ကော်လိုရာဒို(Colorado)မြစ်နှင့် မြစ်လက်တက်များ၏ တိုက် စားမှုကြောင့် တစ်လွှာပြီးတစ်လွှာဖြစ်ပေါ်ခဲ့ရာ နှစ်ပေါင်း သန်း ၂၀၀၀ နီးပါးအကြာ သက်တမ်းရှိ ကမ္ဘာ့ဘူမိဗေဒသမိုင်းကို ဖော်ပြနေသည့် ရင်သပ်ရှုမောဖွယ်ရာ ရှုခင်း များဖြစ်ပေါ်နေခြင်းဖြစ်သည်။

ထို Grand Canyon ချောက်ကြီးအတွင်းနှင့် ကျောက်ဂူများ၌ မူလအမေရိကန်တိုင်းရင်းသားမျိုးနွယ်စုများ နှစ်ပေါင်းထောင်ချီနေထိုင်ခဲ့ ဖူး၍ ၁၉၁၉ ခုနှစ် ဖေဖော်ဝါရီလမှစတင်ကာ အမျိုးသားဥယျာဉ်အဖြစ် သတ်မှတ်ခဲ့ ရာ ကမ္ဘာလှည့်ခရီးသည်များစွာ လာရောက်လေ့လာလျက်ရှိပြီး တစ်နှစ်လျှင် ပျမ်းမျှ ၅ သန်းခန့် လာရောက်သည်ဟု သိရသည်။

ခရီးသည်များအနေဖြင့် Grand Canyon ကို အရှေ့၊ အနောက်၊ တောင်၊ မြောက်ကမ်းပါးလေးခုမှ လေ့ လာနိုင်ရန်စီစဉ်ထားသော်လည်း သွားလာရခက်ခဲသည့် အရှေ့နှင့်မြောက်ကမ်းပါး များထက် ရှုခင်းပိုလှပြီး သွားရလွယ်ကူသည့် တောင်နှင့်အနောက်ကမ်းပါးများသို့ ပိုမိုသွားရောက်လေ့ရှိကြပါသည်။ ကျွန်မဆိုလျှင်လည်း လက်စ်ဗေးဂက်စ်(Las Vegas)မြို့မှတစ်ဆင့် သွားရောက်ခြင်းဖြစ်ရာ မြို့နှင့်အနီးဆုံးဖြစ်၍ ၃ နာရီအကြာ ကားဖြင့်သွားရောက်ရသည့် အနောက်ကမ်းပါး (West Rim)သို့ သွားရောက်ခဲ့ပါသည်။

Greeting center
Greeting center

Glass bridge at Eagle Point
Skywalk Glass bridge at Eagle Point

West Rim သည် Las Vegas နှင့်နီးသကဲ့သို့ အောက်ဘက် ပေ ၄၀၀၀ နီးပါးနက်ရှိုင်းသည့် ချောက်ကို တိုးလျှိုပေါက်မြင်နိုင်ရန် ကြမ်းခင်းကို မှန်ဖြင့်ပြု လုပ်ထားသည့် Sky Walk မှန်တံတားလည်းရှိခြင်းကြောင့် ကမ္ဘာလှည့်ခရီးသည်များ အသွားဆုံးကမ်းပါး ဖြစ်နေပါသည်။ ထိုမှန်တံတားတည်ရှိရာ Eagle Point သာမက နေဝင်ချိန်ကြည့်လေ့ရှိသည့် Guano Point တို့မှ တစ်မျှော်တစ် ခေါ် မြင်တွေ့ရသည့် အံ့ဖွယ်ရှုခင်းများကြောင့်လည်း ကမ္ဘာလှည့်ခရီးသည်များကြား ခေတ်စားလို့နေခြင်းဖြစ်သည်။

Look her pose. Scary! :)
Look her pose. Scary! 🙂

Tourists taking photos with the natives
Tourists taking photos with the natives

Canteen at the Guano Point
Canteen at the Guano Point

ခရီးသည်များအနေဖြင့် ရှုမျှော်ခင်းများကို ကြည့်ရုံ မျှမက အဆိုပါမှန်တံတားပေါ် အသည်းထိတ်ဖွယ် လမ်းလျှောက်ခြင်း၊ ချောက် ကမ်းပါးအပေါ်၌ ရဟတ်ယာဉ်ဖြင့် ရှုမျှော်ခင်းများကြည့်ခြင်း၊ ကော်လိုရာဒိုမြစ်ထဲ စက်လှေစီးခြင်း စသည်တို့ပြု လုပ်နိုင်သလို စွန့်စားလိုသူများအနေဖြင့် ရေစီး ကြမ်းသည့် မြစ်အပိုင်း၌လှေစီးခြင်း၊ ချောက်ကမ်းပါးအတွင်းတောင်တက်ခြင်း၊ ညအိပ်ညနေ Camp ထိုးခြင်း၊ ပေ ပေါင်း ၁၄၀၀၀ ကျော် အမြင့်ရှိ ရဟတ်ယာဉ် ပေါ်မှ လေထီးဖြင့် အမြင့်ခုန်ခြင်း စသည်များကိုပါ ပြုလုပ်နိုင်ကြောင်း သိရသည်။

Mr. Helicopter
Mr. Helicopter

Helicopter landing

Birdeye view of Grand Canyon from Helicopter
Birdeye view of Grand Canyon from Helicopter

Nu Myat on the cruise
Nu Myat on the cruise

Cruise on Colorado River
Cruise on Colorado River

ကျွန်မအနေဖြင့်မူ ကမ္ဘာ့အံ့ဖွယ်နေရာသို့ ရောက်တုန်းရောက်ခိုက် ရဟတ်ယာဉ်စီးကာ Grand Canyon များ၏ ရင်သပ်ရှုမောဖွယ်ရာရှုခင်းများကို အပေါ်စီး မှ ရှုစားဖြစ်ခဲ့ပါ၏။ ရဟတ်ယာဉ်စီးခမှာ ဒေါ်လာ ၂၀၀ ကျသင့်သော်လည်း ချောက် ကမ်းပါးကြမ်းပြင်၌ပါ ဆိုက်ကပ်ကာ ကော်လိုရာဒိုမြစ်ထဲ စက်လှေစီးရသည့် ဝန်ဆောင်မှုပါ ပါရှိခြင်းဖြစ်၍ မဆိုးလှဟု ဆိုရမည်။ ကမ္ဘာ့အံ့ဖွယ်တစ်ခုဖြစ်သော Grand Canyon ချောက်ကြီးသို့ အမေရိကန်နိုင်ငံကို အလည်သွားသူတိုင်း မဖြစ်မနေ သွားရောက် လေ့လာသင့်ကြောင်း စာရေးသူအနေဖြင့် အကြံပြုလိုက်ချင် ပါသည်။

Receiving certificate at the souvenir center
Receiving certificate for experiencing Hualapai culture at the souvenir center

IMG_5689

This is me, Nu Myat
This is me, Nu Myat

ဒူဘိုင်း သဲကန္တာရအတွင်းမှ သဲထိပ်ရင်ဖို အတွေ့အကြုံများ (Dubai Desert Safari)

ဒူဘိုင်း သဲကန္တာရအတွင်းမှ

သဲထိပ်ရင်ဖို အတွေ့အကြုံများ

Camel Riding in desert safari Camel Riding in desert safari

သဲကန္တာရ ဟင်းလင်းပြင်မှ တိုက်တာအဆောက်အအုံ ထိုးထိုးထောင် ထောင်အဖြစ်သို့ ပြောင်းလဲလာခဲ့သော ဒူဘိုင်းမြို့သို့ အလည်သွားမည်ဆိုလျှင် ခေတ်မီတိုက်တာ အဆောက်အအုံများကို လေ့လာသလို ဒူဘိုင်း၏ အနှစ်သာရဖြစ်သည့် သဲကန္တာရကိုလည်း ချန်ထား၍ မရနိုင်ပါ။ ထို့ကြောင့် ကျွန်မတို့ မိသားစု ယခုနှစ် သင်္ကြန် ရုံးပိတ်ရက်၌ ယူအေအီးနိုင်ငံသို့ အလည်သွားသည့်အခါမှာလည်း ဒူဘိုင်းသဲကန္တာရသို့ မဖြစ်မနေသွားရောက်ခဲ့ပါသည်။

With my family
With my family
Dune Driving like a roller coaster
Dune Driving like a roller coaster

Dubai Desert Safari Tour (ဒူဘိုင်းသဲကန္တာရခရီးစဉ်)တွင် အသုံးပြုသောယာဉ်များမှာ Land Cruiser များဖြစ် ၍ ခရီးသည်များရှိရာ ဒူဘိုင်းမြို့၏ မည်သည့်နေရာမဆို လာကြိုသည်။ သဲကန္တာရတွင်း သဲတောင်ပို့များကို ဖြတ် ကျော်၍ မောင်းနှင်ရမည်ဖြစ်ရာ ကျွမ်းကျင်သော ကားမောင်းသမားများနှင့် သဲမှာ ရုန်းထွက်နိုင်ရမည့်ကားများ ဖြစ်ရန်လိုသဖြင့် ခရီးစဉ်၌ ကန္တာရတွင်းမောင်းသည့် ကားများဖြင့် ဟိုတယ်သို့ အကြိုအပို့အစီအစဉ်ထည့်သွင်း ထားခြင်းဖြစ်သည်။ သဲကန္တာရတွင်း မောင်းသည့်သူမှာ ကားမောင်းကျွမ်းကျင်သူဖြစ်ဖို့ မည်မျှအရေးကြီးမှန်း သဲကန္တာရအတွင်း ခရီးစတင်လိုက်သည့်အခါမှာ သိလိုက်ရသည်။ မြေပြန့် မဟုတ်ဘဲ သဲများတောင်ပို့ကဲ့သို့ အပုံလိုက်ဖြစ်နေသည့် သဲကန္တာရထဲ တောင်တက် တောင်ဆင်းရသလို သဲထဲ ဘီးကျွန်မနေဖို့လည်း ဂရုစိုက်ရပါ သေးသည်။ သည်ကြားထဲ ကားမောင်းသမားများသည် ခရီးသည်များ စိတ်လှုပ်ရှားအောင် တမင်တကာ သဲ တောင်ပူစာများပေါ်သို့ ဝေ့ကာဝိုက်ကာ မောင်းပြကြသည်။ သဲတောင် ထိပ်အမြင့်တစ်နေရာမှာ ခဏရပ်ပြီး နောက် တစ်ရှိန်ထိုးဆင်းခြင်း၊ ကားတစ်ခြမ်းစောင်းကာ သဲမှုန်များလွင့်စင်သည်အထိ တောင်စောင်းတစ် လျောက် မောင်းခြင်း စသဖြင့် အစွမ်းပြကြ၏။

Happy jump in the desert Happy jump in the desert

It's so difficult to climb up to the camelIt’s so difficult to climb up to the camel

ဒူဘိုင်းသဲကန္တာရခရီးစဉ်၌ ဤသို့ Dune Driving ဟုခေါ်သည့် သဲတောင်ပူစာပေါ်၌ ကားမောင်းခြင်းကို သဲကန္တာရဖြတ်ကာ မိနစ် ၂၀-၃၀ ကြာပြုလုပ်ပြီးနောက် ကန္တာရတွင်း တည်ဆောက်ထားသည့် ရွက်ဖျင်တဲစခန်းသို့ ညစာစားရန် ပို့ဆောင်ပေးသည်။ ရွက်ဖျင်တဲစခန်း ဝန်းကျင်၌ ကန္တာရတွင်းသစ်ကုလားအုတ်စီးခြင်း၊သဲလျှောစီးခြင်း၊သဲပေါ်ရှပ် ယာဉ်စီးခြင်းများပြုလုပ်နိုင်သလို ကန္တရအတွင်း နေဝင်ချိန်ကိုစောင့်၍လည်း ဓာတ်ပုံအရိုက်ခံနိုင်ပါသည်။

Oasis before the show starts
Oasis before the show starts
Belly Dancer
Belly Dancer
Carpet sellers
Carpet sellers
Before the show starts in oasis
Before the show starts in oasis
Sand painting. My sister and I made with our names.
Sand painting. My sister and I made with our names.

ညစာစားရာ စခန်းသည်အဝိုင်းပုံဖြစ်၍ ကောင်းကင်က ကြယ်များ မြင်နိုင်အောင် အမိုးမပါရှိပါ။ အလယ်၌ ဖျော်ဖြေရေးစင်မြင့်အဝိုင်းရှိ၍ စင်မြင့်ပတ်လည်၌ စားပွဲပု လေးများနှင့် ဖင်ထိုင်ခေါင်းအုံးများအစီအရီချထား၏။ ညစာ မစားမီ စခန်းပတ်လည်ရှိ ရွက်ဖျင်တဲများ၌ ဒန်း ဆေးဆိုးခြင်း၊ အာရပ်ရိုးရာအဝတ်အစားများဝတ်ကာ ဓာတ်ပုံရိုက်ခြင်း၊ အာရပ်လူမျိုးများ၏ဓလေ့ Shisha ဟု ခေါ်သည့် အမွှေးရေငွေ့များကို ပိုက်ဖြင့်ရှုခြင်းစသဖြင့် နှစ်သက်ရာပြုလုပ်နိုင်၏။ ညစာမှာ အာရပ် ရိုးရာ အကင် ကို ဘူဖေးစနစ်ဖြင့် သုံးဆောင်ရပြီး ညစာစားသောက် နေစဉ်အတွင်း Belly Dancerများက ဗှိုက်လှုပ်အကဖြင့်ဖျော်ဖြေခြင်း ဂါဝန်ကားကားကြီးကို အဆက်မပြတ် လှည့်ကာလှည့်ကာ ကပြဖျော်ဖြေခြင်း အပါအဝင် အခြားဖျော်ဖြေရေးများဖြင့် ကပြဖျော်ဖြေခဲ့ကြ၏။ ည ၉ နာရီကျော်လောက် အားလုံးစားပြီးသောက်ပြီးသည့်အချိန်မှာ ခရီးစဉ်ပြီးဆုံး၍ Hotel သို့ပြန်ပို့ပေးပါသည်။ အကယ်၍ ကန္တာရအတွင်း ညအိပ် လိုလျှင် ရွက်ဖျင်တဲများ၌ညအိပ်နိုင်ရန် စီစဉ်ပေးပြီး ညနေဘက် မအားလပ်သူများအတွက် မနက်ဘက် သဲကန္တာရအတွင်း တောင်ပူစာပေါ်ကားမောင်းခြင်း အစီအစဉ်ကိုပါ ရွေးချယ်နိုင်ပါသည်။

ShishaShisha

Sunset in Desert Safari Sunset in Desert Safari

ဤကဲ့သို့ စိတ်လှုပ်ရှားမှုများပေးစွမ်းနိုင်သော သဲတောင်ပူစာဖြတ် ကားမောင်းခြင်း၊ သကန္တာရအတွင်း သစ်ကုလားအုတ်စီးခြင်း၊ ဗိုက်လှုပ်ကချေသည်များ၏ အကအလှ ကိုရှုစားကာ သဲကန္တာရစခန်း၌ အာရပ်ရိုးရာညစာစားခြင်းတို့ ပါဝင်သော ဤ ခရီးစဉ်သည် စိတ်ကျေနပ်မှုအပြည့်ပေးစွမ်းနိုင်သည့် အတွေ့အကြုံသစ်များရရှိ စေသောကြောင့် ယူအေအီးနိုင်ငံသို့ အလည်သွားသူတိုင်း မဖြစ်မနေသွားသင့် သည့်ခရီးစဉ်ဟု ညွှန်းဆိုလိုက်ချင်ပါတော့သည်။

ဒေါက်တာနုမြတ်

ဒီးဒုတ်သဘာဝလှိုဏ်ဂူ (Dee Doke Cave)

image

ဒီးဒုတ်သဘာဝလှိုဏ်ဂူ

ဒီးဒုတ်ရေပြာအိုင်နဲ့ရေတံခွန်သွားရာမှာ  တောင်တက်လမ်းအတိုင်း တစ်နာရီကျော်ကြာ တက်သွားလိုက်ရင် ရေတံခွန်အဆင့်ဆင့်ကျော်သွားပြီးနောက်   တောင်ထိပ်နားမှာ ဒီးဒုတ်သဘာဝလှိုဏ်ဂူအဝကို ရောက်ပါလိမ့်မယ်။

လျှို လို ဂလိုင်ပေါက်ဖြစ်နေတဲ့ သဘာဝလှိုဏ်ဂူကြီးဖြစ်လို့ ဂူထဲရောက်အောင် ကျောက်လှေကားကနေ ဆင်းခဲ့ရပါတယ်။ ဂူတွင်းမှာ ဖိုးသူတော် တစ်ပါး သီတင်းသုံးနေပြီး ဘုရားဆင်းတု အနည်းငယ်တွေ့ရပါတယ်။ လျှပ်စစ်မီးတွေ မသွယ်တန်းထားတာကြောင့် သဘာဝအလင်းရောင်နဲ့ သဘာဝအငွေ့အသက်တွေ လွှမ်းခြုံနေဆဲပါ။

ဒီးဒုတ္ သဘာ၀လႈိဏ္ဂူတြင္း

ဂူတွင်းမှာ သဘာဝအလျှောက်ဖြစ်ပေါ်နေတဲ့ အိပ်ခန်းတွေ ဟောခန်းတွေတွေ့ခဲ့ရပြီး ကျောက်ဂူကြီးရဲ့ ဟိုးအတွင်းဘက်ထဲ ဆက်ဝင်သွားရင် လေးဘက်ထောက်ဝင်ရတဲ့ အလိုလိုပူနေတဲ့ အပူခန်း၊ အလိုလိုအေးနေတဲ့ အအေးခန်းနဲ့ကျောက်နဂါးရုပ်ကြီးတွေ ရှိတယ်လို့သိရပါတယ်။