သက်ဦးဆံပိုင်ဘုရင်စနစ် သက်တမ်းအကြာဆုံးနိုင်ငံ ဒိန်းမတ် Denmark

သက်ဦးဆံပိုင်ဘုရင်စနစ် သက်တမ်းအကြာဆုံးနိုင်ငံ ဒိန်းမတ်


ဒိန်းမတ်နိုင်ငံက ဥရောပမြောက်ပိုင်းနိုင်ငံ စကန်ဒီနေးဗီးယန်းနိုင်ငံတွေထဲ အသေးဆုံးနဲ့ တောင်ဘက်အကျဆုံးနိုင်ငံပဲဖြစ်ပါတယ်။ ဆွီဒင်နိုင်ငံ အနောက်တောင်ပိုင်းနဲ့ နော်ဝေနိုင်ငံ တောင်ပိုင်းမှာရှိပြီး တောင်ဘက်မှာဂျာမနီနိုင်ငံ၊ အရှေ့တောင်ဘက်မှာ ဘယ်လ်တစ်ပင်လယ်၊ ကျန်တဲ့ဘက်တွေမှာ မြောက်ပင်လယ်နဲ့ နယ်နိမိတ်ထိစပ်နေပါတယ်။

မြို့တော်ကိုပေဟင်ဂင်ရှိ တော်ဝင်နန်းတော်


စကန်ဒီနေးဗီးယန်းနိုင်ငံတွေက တောင်တွေ ရေကန်တွေ၊ ကျောက်ကမ်းပါး ပင်လယ်ရေထွက်ပေါက်တွေနဲ့ သဘာဝအလှတရားတွေ ပိုင်ဆိုင်ထားတယ်လို့ သိထားကြပေမဲ့ ဒိန်းမတ်ကတော့ ဒါတွေမရှိတဲ့ သေးငယ်တဲ့နိုင်ငံပါ။ အကျယ်အဝန်းစတုရန်းမိုင်ပေါင်းက ၁၆၅၇၃မိုင်သာ ရှိပါတယ်။ ဒါပေမဲ့ ကျွန်းပေါင်း ၄၄၃ ကျွန်းပိုင်ဆိုင်ထားပြီး ကျွန်းပေါင်း ၇၀ကျော်မှာသာ လူနေထိုင်ကြပါတယ်။ အဲဒီကျွန်းတွေထဲမှာ ကိုယ်ပိုင်အုပ်ချုပ်ခွင့်ရကျွန်းတွေဖြစ်တဲ့ ဂရင်းလန်းကျွန်း(Greenland) နဲ့ ဖာရိုး(Faroe) ကျွန်းတွေလည်း ပါပါတယ်။

ဂရင်းလန်းကျွန်းက အရမ်းကြီးပြီး ကမ္ဘာပေါ်မှာ တိုက်အနေနဲ့ သီးသန့်ခွဲထွက်မနေတဲ့ အကြီးဆုံးကျွန်းပါ။ ကျွန်းရဲ့၈၀ရာခိုင်နှုန်းက နှင်းတွေဖုံးနေပြီး ကမ်းရိုးတန်းတလျှောက်ပဲ လူနေထိုင်ကြတာပါ။ ဂရင်းလန်းကျွန်းက ဘယ်လောက်တောင်ကြီးသလဲဆိုရင် ရေခဲမဖုံးတဲ့နေရာတောင် ဒိန်းမတ်တစ်နိုင်ငံလုံးထက် ဆယ်ဆလောက်ကြီးပါတယ်။ ဒါကြောင့် ဂရင်းလန်းကျွန်းနဲ့ ဖာရိုးကျွန်းတွေပါပါရင်တော့ ဒိန်းမတ်နိုင်ငံရဲ့ အကျယ်က စတုရန်းမိုင် ၈သိန်းခွဲကျော်အကျယ်ရှိပြီး ကမ္ဘာ့ ၁၂နိုင်ငံမြောက်အကြီးဆုံးအထိ ဖြစ်သွားပါတယ်။

Greenland (Photo-Credit)


ဒိန်းမတ်မှာ ကျွန်းတွေများတော့ ကမ်းရိုးတန်းတွေလည်း များပါတယ်။ ကမ်းရိုးတန်းအရှည်က ၄၅၄၅မိုင်အရှည် ရှိပါတယ်။ ဒါကြောင့် ဒိန်းမတ်နိုင်ငံမှာဆိုရင် ဘယ်နေရာကမှ ပင်လယ်ကနေ ၃၂မိုင်ကျော်တဲ့အထိ မဝေးပါဘူး။ မြို့တော် ကိုပေဟေဂင်မှာဆိုရင် ဆိပ်ကမ်းကရေတွေက သန့်လို့ ရေဆင်းကူးနိုင်တဲ့အထိပါ။ မြို့လယ်ကနေ မိနစ်၃၀အကွာအဝေးမှာတင် သဲသောင်တွေ ကမ်းခြေတွေရှိနေပါတယ်။ ရေတွေကသန့်လွန်းလို့ ရေဘုံဘိုင်ခေါင်းကရေတွေကိုတောင် သောက်နိုင်ပါတယ်။

Nyhavn ဆိပ်ကမ်း


ဒိန်းမတ်နိုင်ငံဟာ စကန်ဒီနေးဗီးယန်းနိုင်ငံတို့ရဲ့ ထုံးစံအတိုင်း ကမ္ဘာ့အပျော်ဆုံးနိုင်ငံတစ်ခုအဖြစ် UN ကမ္ဘာ့ပျော်ရွှင်ခြင်းစစ်တမ်းမှာ အမြဲလိုလိုထိပ်နားကပါတတ်ပါတယ်။ နှစ်နှစ်ဆက်တိုက်လည်း ကမ္ဘာ့အပျော်ဆုံးနိုင်ငံအဖြစ် အသိအမှတ်အပြုခံခဲ့ရပါတယ်။ လူဦးရေကတော့ စုစုပေါင်း ၅.၈သန်းရှိပြီး မြို့တော်မှာ ၁.၃သန်းရှိပါတယ်။


ဒိန်းမတ်က စက်ဘီးစီးတဲ့ဓလေ့နဲ့လည်း နာမည်ကြီးပါတယ်။ တစ်နိုင်ငံလုံးအနှံ့ စက်ဘီးလမ်းကြောင်းတွေ ၇၄၀၀မိုင်ကျော်တောင် ရှိပါတယ်။ စက်ဘီးစီးဖို့ စိတ်ချရပြီး မြေပြန့်ကာ တောင်တွေမရှိတော့ ကုန်းတက်တွေ မစီးရတော့ပါဘူး။ မြို့တော်ကိုပေဟေဂင်က မြို့သူမြို့သားတွေဆို အယောက်တစ်ဝက်ကျော်လောက်က အလုပ်သွားအလုပ်ပြန် စက်ဘီးစီးကြပါတယ်။ ပျမ်းမျှအနေနဲ့ တစ်ယောက်ကို တစ်နေ့ ၁.၈မိုင်နှုန်းစက်ဘီးစီးကြတယ်လို့ သိရပါတယ်။

LEGOLAND ကစားကွင်း (Photo – Credit)


ဒိန်းမတ်နိုင်ငံသားတွေက ကလေးတွေ အပန်းဖြေဖို့အတွက်လည်း စွန့်ဦးတီထွင်ခဲ့ကြပါတယ်။ ကမ္ဘာ့နာမည်ကျော်ပုံပြင်ရေးဆရာ Hans Christian Andersenက ဒိန်းမတ်နိုင်ငံသားပါ။ ကမ္ဘာတဝန်းက ကလေးတွေ အဆော့များတဲ့ LEGO အိမ်ဆောက်တုံးတွေကိုလည်း ဒိန်းမတ်က စတီထွင်ခဲ့တာဖြစ်ပြီး မူလပထမ LEGOLAND ကစားကွင်းနဲ့ LEGO အိမ်တွေကိုလည်း သွားလည်နိုင်ပါတယ်။ ဒါ့အပြင် ဒိန်းမတ်မှာ Bakken နဲ့ Tivoli Garden ဆိုတဲ့ ကမ္ဘာ့ရှေးအကျဆုံး ကစားကွင်း နှစ်ခုလည်းရှိပါတယ်။


ရှေးကျတဲ့အကြောင်းပြောရမယ်ဆိုရင် ဒိန်းမတ်အလံကလည်း ကမ္ဘာ့ရှေးအကျဆုံး အလံပါ။ အနီရောင်အောက်ခံပေါ်က အဖြူရောင်လက္ခဏာနဲ့ ဒိန်းမတ်အလံကို ၁၂၁၉ခုနှစ်ကတည်းက စတင်အသုံးပြုခဲ့လို့ ကမ္ဘာ့ရှေးအကျဆုံး နိုင်ငံပိုင်အလံအဖြစ် ဂင်းနစ်စံချိန်တင်ခဲ့ပါတယ်။ အလံထက်ပိုရှေးကျတာကတော့ ဒိန်းမတ်ရဲ့ သက်ဦးဆံပိုင်ဘုရင်စနစ်ပါ။ ၉၃၅ ခုနှစ်ကကျင့်သုံးလာတာ အခုထက်ထိပဲဆိုတော့ နှစ်ပေါင်း ထောင်ကျော်ကြာနေပါပြီ။ အခုလောလောဆယ် အုပ်ချုပ်နေတာကတော့ ဘုရင်မ မာဂရီသီ(၂)ပဲဖြစ်ပါတယ်။

Denmark Royal Family


ဒိန်းမတ်နိုင်ငံရဲ့ အထင်ကရနေရာတွေကတော့ မြို့တော်ကိုပေဟင်ဂင်မှာ တော်ဝင်နန်းတော်၊ Nyhavn ဆိပ်ကမ်းက ရောင်စုံအဆောက်အအုံတွေ၊ ကမ္ဘာ့ရှေးအကျဆုံး ကစားကွင်းတွေ၊ နာမည်ကျော် ရေသူမကြေးရုပ်၊ အမျိုးသားပြတိုက်၊ Frederiksborg နန်းတော်၊ အမျိုးသားသမိုင်းပြတိုက်တို့ပဲဖြစ်ပါတယ်။

ဒါ့အပြင် ဒုတိယအကြီးဆုံး Aarhus မြို့က မြို့ဟောင်းနေရာ၊ တတိယအကြီးဆုံး Odense မြို့က ဗိုက်ကင်းရဲတိုက်၊ Roskilde မြို့က ဗိုက်ကင်းသင်္ဘောပြတိုက်၊ Skagen မြို့က ကမ်းခြေတွေ၊ Odense မြို့က Hans Christian Andersen ပြတိုက်၊ Billund မြို့က LEGO House၊ Elsinore မြို့က Kronborg ရဲတိုက်နဲ့ တခြားရဲတိုက်တွေကိုလည်း သွားလည်နိုင်ပါတယ်။

Dr. Nu Myat Theingi Oo

(Nu Myat around the World)

မြို့တော်ကိုပေဟင်ဂင်

ယူအေအီးနိုင်ငံရှိ ကမ္ဘာ့စံချိန်များ (World Records of UAE)

ယူအေအီးနိုင်ငံရှိ ကမ္ဘာ့စံချိန်များ


အာရပ်စော်ဘွားများပြည်ထောင်စုနိုင်ငံ(United Arab Emirates)ကို အတိုကောက်အားဖြင့် ယူအေအီး (UAE)ဟု ခေါ်ဆိုကြပြီး အာရှတိုက်အနောက်ဘက်ရှိ အာရပ်ကျွန်းဆွယ်၏ အရှေ့တောင်ဘက်စွန်းတွင်တည်ရှိနေပါသည်။

ယူအေအီးဆိုလျှင် ဂင်းနစ်ကမ္ဘာ့စံချိန်နှင့်တွဲမြင်ရလောက်သည်အထိ ကမ္ဘာ့အကြီးဆုံး၊ အမြင့်ဆုံး၊ အကောင်းဆုံးဟူသမျှကို ပိုင်ဆိုင်ထားပါသည်။ နှစ်တိုင်းတစ်နေရာမဟုတ်တစ်နေရာတွင် စံချိန်ချိုးကာ တစ်နိုင်ငံလုံးအနေဖြင့် ကမ္ဘာ့စံချိန်ပေါင်း(၁၉၀)ထိ ပိုင်ဆိုင်ထားသည်ဟု သိရပါသည်။ ကမ္ဘာ့အကြီးဆုံးရှော့ပင်းစင်တာ၊ အမြင့်ဆုံးတိုက်၊ အမြင့်ဆုံးပလီ၊ အမြင့်ဆုံးစားသောက်ဆိုင်၊ အမြင့်ဆုံးရှုခင်းကြည့်နေရာ၊ ဒုတိယအကြီးဆုံးလူလုပ်ဆိပ်ကမ်းကအစ အကြီးဆုံးလက်ဆေးဇလုံ၊ ဆံပင်နှင့်ဆွဲသည့်ကမ္ဘာ့အလေးဆုံးယာဉ်၊ ကမ္ဘာ့အမြင့်ဆုံးချောကလက်ရုပ်တုအထိ တစ်ခုမဟုတ်တစ်ခုစံချိန်ချိုးလေ့ရှိပါသည်။

ကမ္ဘာ့အမြင့်ဆုံးအဆောက်အအုံ Burj Khalifa (Photo – Credit)


အထူးသဖြင့် ယူအေအီးနိုင်ငံ၏ နာမည်ကျော်မြို့ကြီးဖြစ်သည့် ဒူဘိုင်းမြို့တွင် ကမ္ဘာ့စံချိန်အများဆုံးရှိကာ ကိုယ်ပိုင် ဂင်းနစ်ကမ္ဘာ့စံချိန်ရုံး ထားရှိထားသည်အထိ စံချိန်ချိုးထားသည်များမှာ များပြားလှပါသည်။

ဒူဘိုင်းရှိ Burj Khalifa အဆောက်အအုံမှာ ကမ္ဘာ့အမြင့်ဆုံးအဆောက်အအုံဖြစ်ကာ အမြင့်ပေ ၂၇၁၇ပေထိမြင့်ပါသည်။

ကမ္ဘာ့အမြင့်ဆုံးဟိုတယ်ကြီးများအနက် ခြောက်လုံးမှာ ဒူဘိုင်းတွင်ရှိပြီး Gevora ဟိုတယ်သည် ကမ္ဘာ့အမြင့်ဆုံးဟိုတယ်ဖြစ်ပါသည်။

ဒူဘိုင်းမောလ်က ကမ္ဘာ့အကြီးဆုံးရှော့ပင်းမောလ်များအနက်တစ်ခုဖြစ်ကာ စတုရန်းမီတာပေါင်း ၁၂သန်းကျော်ထိ ကျယ်ဝန်းပြီးဆိုင်ခန်းပေါင်း ၁၂၀၀ ကျော်ရှိပါသည်။

ထိုရှော့ပင်းမောလ်မြေညီထပ်တွင် ကမ္ဘာ့အကြီးဆုံး ဆိုင်းထားသည့်ငါးပြတိုက်ဖြစ်သော ဒူဘိုင်းငါးပြတိုက်လည်း ရှိပြီး ရေလီတာပေါင်း ၁၀သန်းကျော်ထိဆန့်ကာ ရေသတ္တဝါမျိုးစိတ်ပေါင်း ၂၀၀ ကျော်၊ အကောင်ပေါင်း ၃၃၀၀၀ ကျော် ရှိပါသည်။

ကမ္ဘာ့အကြီးဆုံးလူလုပ်ကျွန်း The Palm Jumeirah ကျွန်း၊ ကမ္ဘာ့အကြီးဆုံးမိုးလုံလေလုံ ကစားကွင်း IMG Worlds of Adventure၊ ၄၉၂ ပေအမြင့်ရှိသည့် ကမ္ဘာ့အကြီးဆုံး ဓာတ်ပုံဘောင်၊ ပေပေါင်း ၁၆၄၀၀ကျော်အရှည်ရှိ ကမ္ဘာ့အရှည်ဆုံး လက်ဖြင့်ပြုလုပ်သည့် ရွှေချိန်းကြိုး တို့သည်လည်း ဒူဘိုင်းမြို့တွင် ရှိနေပါသည်။

ကမ္ဘာ့အကြီးဆုံးလူလုပ်ကျွန်း The Palm Jumeirah ကျွန်း Photo – Credit


ယူအေအီးနိုင်ငံတွင် လေဆိပ်ပေါင်း ၁၀ခုရှိသည့်အနက် အကြီးဆုံးဖြစ်သည့် ဒူဘိုင်းအပြည်ပြည်ဆိုင်ရာလေဆိပ်သည် ကမ္ဘာ့အပြည်ပြည်ဆိုင်ရာခရီးသည်အများဆုံးဝင်ရောက်သည့် လေဆိပ်အဖြစ် ခြောက်နှစ်ဆက်တိုက် သတ်မှတ်ခံထားရပါသည်။ အင်တာနက်လိုင်း အမြန်ဆုံးလေဆိပ်ဖြစ်သလို ထိုလေဆိပ်ရှိ Terminal 3 ဟာ ကမ္ဘာ့အကြီးဆုံးလေဆိပ် terminal ဖြစ်ပါသည်။ ရထားပေါင်း ၈၇စီးကို မိုင်ပေါင်း ၄၆မိုင်ကျော်ပြေးဆွဲပေးနေသည့် ဒူဘိုင်းရထားစနစ်က မောင်းသူမဲ့စနစ်ကိုအခြေခံကာ ကမ္ဘာ့အရှည်ဆုံးမောင်းသူမဲ့ရထားစနစ်လည်းဖြစ်ပါသည်။

ဒူဘိုင်းအပြည်ပြည်ဆိုင်ရာလေဆိပ် Photo – Credit


နိုင်ငံတွင်း ဒုစရိုက်မှုမရှိသလောက်နည်းကာ ယူအေအီးနိုင်ငံမြို့တော် အဘူဒါဘီမြို့က ကမ္ဘာ့အလုံခြုံဆုံးမြို့အဖြစ် သတ်မှတ်ခံထားရပါသည်။

အဘူဒါဘီရှိ The Sheikh Zayed Grand ပလီမှာ စတုရန်းပေပေါင်း ၆၀၀၀ ကျော်ရှိသည့် ကမ္ဘာ့အကြီးဆုံးလက်ယက်ကော်ဇောရှိပါသည်။

ဒါ့အပြင် မြို့ထဲတွင် ကမ္ဘာ့အစောင်းဆုံးအဆောက်အအုံဖြစ်သည့် The Capital Gateအဆောက်အအုံလည်း ရှိပါသည်။ အထပ်ပေါင်း ၃၈ထပ်ရှိကာ ၁၈ဒီဂရီထိတောင် တစ်ဖက်ကိုစောင်းနေပါသည်။

The Capital Gateအဆောက်အအုံ (Photo – Credit)


ကမ္ဘာ့ပထမဆုံးများကိုလည်း ပိုင်ဆိုင်ထားပါသေးသည်။

ယူအေအီးနိုင်ငံသည် ကမ္ဘာ့ပထမဆုံး Artificial Intelligence အတွက် ဝန်ကြီးဌာနထားရှိသည့်နိုင်ငံဖြစ်ပါသည်။

ကမ္ဘာ့ပထမဆုံး ရာသီဥတုကိုထိန်းချုပ်သည့်မြို့မှာ ဒူဘိုင်းမြို့ဖြစ်ဖြစ်ကာ Masdar မြို့သည် ကမ္ဘာ့ပထမဆုံး ကာဗွန်သုည၊ အမှိုက်သုည၊ ကားအသုံးမပြုသည့်မြို့ဖြစ်ပါသည်။
ကမ္ဘာ့ပထမဆုံး ကြယ်ခုနှစ်ပွင့်ဟိုတယ်မှာ ဒူဘိုင်းရှိ Burj Al Arab ဟိုတယ်ဖြစ်ကာ ကမ္ဘာ့အကောင်းဆုံးဟိုတယ်တစ်ခုဖြစ်ပါသည်။ ဟိုတယ်အတွင်းဘက်ကို ၂၄ကာရက်ရွှေစစ်စစ် အရွက်များဖြင့်တန်ဆာဆင်ထားပြီး ကိုယ်နှစ်သက်ရာ ခေါင်းအုံးအမျိုးအစားကိုလည်း ရွေးချယ်နိုင်သည်ဟု သိရပါသည်။

ဒူဘိုင်းရှိ The Ferrari World က ကမ္ဘာ့ပထမဆုံးဖရာရီအမှတ်တံဆိပ်ကစားကွင်းဖြစ်ကာ ထိုကစားကွင်းတွင် ကမ္ဘာ့အမြန်ဆုံးရိုလာကိုစတာလည်း ရှိပါသည်။

ကမ္ဘာ့ပထမဆုံး ကြယ်ခုနှစ်ပွင့်ဟိုတယ် Burj Al Arab Hotel (Photo – Credit)
ကမ္ဘာ့ပထမဆုံးဖရာရီအမှတ်တံဆိပ်ကစားကွင်း The Ferrari World (Photo – Credit)


ဒီအချက်များမှာ ယူအေအီးနိုင်ငံရှိ ကမ္ဘာ့စံချိန်ချိုးထားသည့် အချက်တစ်ချို့ဖြစ်ပြီး တခြားထူးခြားသည့်ယဉ်ကျေးမှုများ၊ နေရာများ၊ အဆောက်အအုံများလည်းရှိသဖြင့် စိတ်ဝင်စားစရာကောင်းသည့်နိုင်ငံတစ်နိုင်ငံပင်ဖြစ်ပါသည်။

ဒေါက်တာနုမြတ်သိင်္ဂီဦး

Nu Myat around the World

ရိုးရိုးလေးလှသည့် လာအို Laos

ရိုးရိုးလေးလှသည့် လာအို Laos


မြန်မာနိုင်ငံ၏ အိမ်နီးချင်းနိုင်ငံဖြစ်သည့် လာအိုနိုင်ငံသည် အရှေ့တောင်အာရှရှိ ကုန်းတွင်းပိတ်နိုင်ငံငယ်လေးတစ်ခုဖြစ်သည်။ အနောက်မြောက်ဘက်တွင် မြန်မာနိုင်ငံနှင့် တရုတ်နိုင်ငံ၊ အရှေ့ဘက်တွင် ဗီယက်နမ်နိုင်ငံ၊ တောင်ဘက်တွင် ကမ္ဘောဒီးယားနိုင်ငံ၊ အနောက်ဘက်တွင် ထိုင်းနိုင်ငံတို့နှင့် နယ်နိမိတ်ထိစပ်နေပါသည်။

ဗီယန်ကျင်းရှိ ဗုဒ္ဓပန်းခြံ


အနောက်ဘက်တွင် ထိုင်းနိုင်ငံနှင့် နယ်နိမိတ်ပိုင်းခြားပေးထားသည့် မဲခေါင်မြစ်က အရှေ့တောင်အာရှတွင် အရှည်ဆုံးမြစ်ဖြစ်ကာ လာအိုနိုင်ငံ၏ အသက်သွေးကြောမြစ်လည်းဖြစ်သည်။ မဲခေါင်မြစ်ကို ဒေသခံများက မဲနမ်ခေါင်ဟုခေါ်ကာ မြစ်များ၏မိခင်ဟု အဓိပ္ပါယ်ရပါသည်။ မဲခေါင်မြစ်သည် ကုန်းတွင်းပိတ်နိုင်ငံလာအိုအတွက် သွားလာရေး၊ သယ်ယူပို့ဆောင်ရေး၊ ကုန်သွယ်ရေး၊ ရေအားလျှပ်စစ်၊ စိုက်ပျိုးမွေးမြူရေးတို့တွင် အင်မတန်အားထားရပါသည်။ သို့သော် နိုင်ငံတောင်ပိုင်းတွင် မြစ်တလျှောက် ရေတံခွန်များပေါများသဖြင့် မဲခေါင်မြစ်မှတဆင့် ပင်လယ်ထွက်ပေါက်ဆီ ရောက်သည်ထိတော့ သွားလို့မရပါ။

စိမ်းပြာလဲ့နေသော ကောင်းစီရေတံခွန်ကြီး Photo – Credit


လာအိုနိုင်ငံ၏ မြေမျက်နှာသွင်ပြင်မှာ များသောအားဖြင့် တောင်ကုန်းတောင်တန်းများပါသည်။ ကုန်းတွင်းပိတ်နိုင်ငံဖြစ်သော်ငြား ကျွန်းပေါင်း ၄၀၀၀ ကျော်ရှိနေပါသည်။ အဘယ်ကြောင့်ဆိုသော် မဲခေါင်မြစ်သည် ဆီဖန်းဒွန်းဆိုသည့် တောင်ပိုင်းနေရာအရောက်တွင် ရေလမ်းကြောင်းများစွာ ဖြာထွက်သွားပြီး ကျွန်းအရွယ်အစား အမျိုးမျိုးဖြစ်ပေါ်လာခြင်းကြောင့်ဖြစ်သည်။ ဒဏ္ဏာရီအရ ကျွန်းပေါင်း ၄၀၀၀ ရှိကြောင်းသိရပြီး တောင်ပိုင်းရှိ ကမ္ဘောဒီးယားနိုင်ငံနယ်စပ်နားတွင် မြစ်ခွဲများပြန်လည်ပူးပေါင်းကာ မဲခေါင်မြစ်အဖြစ်ဆက်လက် စီးဆင်းသွားပါသည်။

သဘာဝအလှတရားများနှင့်ပြည့်စုံသည့် ဗန်ဗီယင်းမြို့


လာအိုနိုင်ငံသည် လူဦးရေနည်းပါးပြီး တစ်နိုင်ငံလုံးမှ လူဦးရေ ၇ သန်းခန့်သာ ရှိပါသည်။ အာရှနိုင်ငံများတွင် လူဦးရေအကျဲပါးဆုံးနိုင်ငံတစ်ခုဖြစ်ကာ တစ်စတုရန်းကီလိုမီတာတွင် လူဦးရေအယောက် ၃၀ လောက်သာ ရှိပါသည်။ လာအိုလူမျိုးများသည် ကမ္ဘာ့ဒုတိယအရပ်အပုဆုံးလူမျိုးများဖြစ်ကြကာ ပျမ်းမျှအရပ်အမြင့်မှာ ၅ ပေ ၁.၃၇ လက်မသာ ရှိပါသည်။ လူဦးရေအနက် ၇၀% မှာ အသက်၃၀အောက် လူငယ်များဖြစ်သဖြင့် အာရှနိုင်ငံများတွင် လူငယ်လူရွယ်အများဆုံးရှိသည့်နိုင်ငံဖြစ်သည်။ လူဦးရေ၏ ၉၈ ရာခိုင်နှုန်းမှာ ဗုဒ္ဓဘာသာကို ကိုးကွယ်ကြသည့် ဗုဒ္ဓဘာသာနိုင်ငံဖြစ်သည်။


သမိုင်းကြောင်းအားဖြင့် ၁၃၅၃ ခုနှစ်တွင် ပထမဆုံးလာအိုဘုရင့်နိုင်ငံတော်ကို ဘုရင်ဖာငွမ်က တည်ထောင်ခဲ့ပြီး Lan Xan (ဆင်ကောင်ရေသန်းချီရှိရာမြေ) ဟု အမည်တွင်ခဲ့ပါသည်။ ၁၈၉၃ ခုနှစ်တွင် ပြင်သစ်ကိုလိုနီအောက်ရောက်ကာ ၁၉၄၉ ခုနှစ်တွင် လာအိုဘုရင့်နိုင်ငံတော်အဖြစ် လွတ်လပ်ရေးရခဲ့ပါသည်။ နောက်ပိုင်းတွင် ပြည်တွင်းစစ်ဖြစ်လာပြီး ၁၉၇၅ ခုနှစ်မှစကာ လာအိုပြည်သူ့ ဒီမိုကရက်တစ် ရီပဘလစ်နိုင်ငံအဖြစ် ကွန်မြူနစ်ပါတီခေါင်းဆောင်အောက် တစ်ပါတီအုပ်ချုပ်ရေးစနစ် ကျင့်သုံးခဲ့ပါသည်။

Patuxai အောင်ပွဲခံမုခ်ဦး Photo – Credit


လာအိုနိုင်ငံသည် ပြင်သစ်ကိုလိုနီ လက်အောက်ကျရောက်ခဲ့ရသဖြင့် ပြင်သစ်ယဉ်ကျေးမှု ကူးစက်လွှမ်းမိုးခံထားရပါသည်။ မြို့တော်နှင့် အကြီးဆုံးမြို့ ဗီယန်ကျင်းရှိ ဒုတိယကမ္ဘာစစ်အတွင်း ကျဆုံးခဲ့သူများ အမှတ်တရ Patuxai အောင်ပွဲခံမုခ်ဦးမှာ ပြင်သစ်ရှိ Arc de Triomphe မုခ်ဦးနှင့် ဆင်တူနေပါသည်။


လာအိုနိုင်ငံသည် ဆင်းရဲသည့်နိုင်ငံဖြစ်သော်ငြား ဒေသတွင်းနိုင်ငံများနှင့် ယှဉ်ပါက လျင်မြန်စွာ တိုးတက်နေသည့် နိုင်ငံဖြစ်သည်။ ခရီးသွားလုပ်ငန်းက လာအို၏ အတိုးတက်ဆုံးကဏ္ဏဖြစ်သည်။ လှပသောရှုမျှော်ခင်းများ၊ ဖော်ရွေသောဒေသခံများကြောင့် ကမ္ဘာလှည့်ခရီးသည်များ အလာများလာပါသည်။


တန်ခိုးကြီးစေတီဘုရားများနှင့် ဗုဒ္ဓဥယျာဉ်ရှိရာ မြို့တော် ဗီယန်ကျင်း၊ စိမ်းပြာလဲ့နေသောရေအိုင်ငယ်လေးများနှင့် ရေတံခွန်အဆင့်ဆင့် လှပစွာဖြစ်ပေါ်နေသည့် ကောင်းစီရေတံခွန်ကြီးရှိရာ ယူနက်စကို ကမ္ဘာ့အမွေအနှစ်မြို့ လောင်ပရာဘန်၊ သဘာဝအလှတရားများနှင့်ပြည့်စုံပြီး စွန့်စားမှုအစုံပြုလုပ်နိုင်သည့် ဗန်ဗီယင်းမြို့၊ အရှေ့တောင်အာရှတွင် အကြီးဆုံးရေတံခွန်ဖြစ်သည့် ခုန်းဖာဖန်းရေတံခွန်၊ ရှေးအကျဆုံးကျောင်းဆောင်တစ်ခုဖြစ်သည့် ဝပ်ဖူဘုရားကျောင်း၊ ဗီယက်နမ်စစ်ပွဲအတွင်း လူပေါင်း ၂၀၀၀၀ ကျော် ပုန်းအောင်းနေထိုင်ခဲ့ကြသည့် ဂူပေါင်း ၄၅၀ အချိတ်အဆက်ရှိ ဂူစနစ်ဖြစ်သည့် ဗီယန်ဆိုင်းလှိုဏ်ဂူများ၊ ကမ္ဘာ့အမြင့်ဆုံး သစ်ပင်အိမ်ရှိရာ နမ်ခန်းအမျိုးသားဥယျာဉ်၊ အရှေ့တောင်အာရှမှာ ရှေးအကျဆုံး လူသားရုပ်ကြွင်းတွေ့ရှိရာ တန်ပလင်းဂူ၊ ဧရာမရှေးဟောင်းကျောက်ခရားပေါင်း ၂၅၀၀ ကျော် ပြန့်ကျဲနေသည့် ကျောက်ခရားမြေရှိရာ ဖွန်ဆာဗန်မြို့တို့မှာ လာအိုနိုင်ငံရှိ ထင်ရှားသောမြို့များနှင့် နေရာများဖြစ်ပါသည်။

လာအိုရှိဘုရားကျောင်းတစ်ခု

ဒေါက်တာနုမြတ်သိင်္ဂီဦး

Nu Myat around the World

ဘယ်ပန်းချီရေးလို့မမှီတဲ့ Switzerland

ဘယ်ပန်းချီရေးလို့မမှီတဲ့ Switzerland


အယ်လ်ပိုင်းတောင်တန်းကြီးတွေ နောက်ခံထားပြီး စိမ်းစိုလှပတဲ့ ရှုမြော်ခင်းတွေ၊ မှန်သားပြင်လို ကြည်လင်လွန်းလှတဲ့ ရေကန်ကြီးတွေနဲ့ ဆွစ်ဇာလန်နိုင်ငံရဲ့ သဘာဝအလှက ဘယ်ပန်းချီရေးမမှီပါဘူး။
ဆွစ်ဇာလန်နိုင်ငံမှာ ရေကန်ပေါင်း ၁၅၀၀ ကျော်ရှိပြီး မီတာ ၃၀၀၀ အထက် မြင့်တဲ့တောင်ပေါင်း ၂၀၈ တောင်ကိုလည်း ပိုင်ဆိုင်ထားလို့ တောင်တက်သမားတွေ အကြိုက်တွေ့ကြတဲ့နိုင်ငံလည်းပဲဖြစ်ပါတယ်။ ဆွစ်ဇာလန်နိုင်ငံရဲ့ နှင်းဖုံးတဲ့ ရေခဲတောင်တန်းကြီးတွေမှာ နှင်းလျှောစီး (Skiing) တာတွေ လုပ်လေ့ရှိကြပါတယ်။

Photo Credit


ဆွစ်နှင်းတောင်များ

နုမြတ်အနေနဲ့ နှင်းကိုပထမဆုံးမြင်ဖူးတာ ဆွစ်ဇလန်မှာပါ။ ၂၀၁၀ ခုနှစ်တုန်းက ဥရောပခရီးမှာ ဆွစ်ဇာလန်နိုင်ငံရဲ့ နာမည်ကြီး Mount Titlis ရေခဲတောင်ကိုလည်း ရောက်ခဲ့ပါတယ်။ အနှုတ်ပြနေတဲ့ ရေခဲမှတ်မှာ ပင်လယ်ရေမျက်နှာပြင်အမြင့် ပေပေါင်းတစ်သောင်းကျော်မှာရှိတဲ့ Mount Titlis တောင်ထိပ်မှာ နှင်းတွေ တဖွဲဖွဲကျနေတာပါ။ နှင်းတောထဲလျှောက်သွားရတာ အရမ်းပျော်ဖို့ကောင်းလှပါတယ်။


ဇာမတ် (Zermatt)မြို့ရှိ Matterhorn တောင်ကလည်း နှင်းရှာဖွေသူတို့ အကြိုက်တွေ့တဲ့ တောင်ထိပ်တစ်ခုပါပဲတဲ့လေ။ Matterhorn တောင်က Toblerone ချောကလက် အခွံမှာပါတဲ့ တောင်ပါ။
အမြင့်ဆုံးတောင်ကတော့ အီတလီနယ်စပ်မှာ ရှိတဲ့ Monte Rosa တောင်ပဲဖြစ်ပြီး ၄၆၃၄ မီတာမြင့်ပါတယ်။

Photo Credit


ကမ္ဘာ့အရှည်ဆုံးလှိုဏ်ခေါင်း


တောင်တန်းတွေပေါများတဲ့နိုင်ငံဆိုတော့ ကားလမ်း၊ ရထားလမ်းတွေအတွက် တောင်တန်းတွေကို ဖြတ်ဖောက်ရတဲ့ ဥမင်လှိုဏ်ခေါင်းတွေလည်း များစွာရှိလို့နေပါတယ်။ ဆွစ်ဇာလန်မှာရှိတဲ့ Gottahard လှိုဏ်ခေါင်းက ကမ္ဘာပေါ်မှာအရှည်ဆုံး လှိုဏ်ခေါင်းဖြစ်ပြီး ၅၇ မီတာရှည်ကာ အယ်လ်ပိုင်းတောင်တန်းတွေအောက် ၂.၃ ကီလိုမီတာအကွာမှာရှိပါတယ်။ ၁၇ နှစ်ကြာတည်ဆောက်ခဲ့ရပြီး ကမ္ဘာမှာ တည်ဆောက်စားရိတ် အကုန်ကျဆုံး လှိုဏ်ခေါင်းလည်းပဲဖြစ်ပါတယ်။

အထင်ကရမြို့ကြီးများ

ဆွစ်ဇာလန်နိုင်ငံမှာ မြို့တော် ဘန်း(Bern)၊ အကြီးဆုံးမြို့ ဇူးဝစ် (Zurich)၊ WHO ရုံးချုပ်နဲ့ ကြက်ခြေနီရုံးချုပ်ရှိရာ ဂျနီဗာမြို့ (Geneva)၊ အေးချမ်းဆိတ်ငြိမ်လှတဲ့ လူဆန်းမြို့ (Lucerne)၊ ဇာမတ်မြို့ တို့ဟာ သွားလည်သင့်တဲ့ မြို့တွေပါ။

စွန့်စားရတာဝါသနာပါသူတွေအတွက် အင်တာလေကန် (Interlaken)ဆိုတဲ့ မြို့လေးလည်း ရှိပါသေးတယ်။ ရေခဲတောင်တွေ နောက်ခံထားပြီး ဝေဟင်ပေါ်ကနေ မြေပြင်ပေါ် လေထီးနဲ့ ခုန်ချရတဲ့ Sky Diving ဆိုရင် အသည်းယားစရာပါ။

Photo Credit


နုမြတ်တို့ကတော့ ဇူးဝစ်မြို့နဲ့ လူဆန်းမြို့ကို ရောက်ခဲ့ပါတယ်။ ဇူးဝစ်မြို့ကနေ လူဆန်းမြို့ကို သွားတဲ့ ရထားလမ်းတလျှောက်က စိမ်းစိုနေတဲ့ရှုခင်းတမျှော်တခေါ်နဲ့ သိပ်ကို လှပပါတယ်။ လူဆန်းမြို့လေးမှာ ညအိပ်ပြီး Mount Titlis နှင်းတောင်ကို နေ့ချင်းပြန်သွားခဲ့ပါတယ်။ လူဆန်းမြို့လေးက သိပ်ကိုအေးချမ်းဆိတ်ငြိမ်လှတဲ့ မြို့လေးပါ။ မြို့လည်မှာ ရေကန်ကြီးရှိပြီး ရေကန်ကို ဖြတ်ဆောက်ထားတဲ့ ရှေးဟောင်းသစ်သားတံတားကြီးကလည်း နာမည်ကြီးပါတယ်။

အရည်အသွေးမြင့် ဆွစ်ဇာလန်ပစ္စည်းများ

ဆွစ်ဇာလန်နိုင်ငံရဲ့ ရှုမြော်ခင်းတွေက လှပသလို ဆွစ်ဇလန်နိုင်ငံထုတ်ပစ္စည်းတွေကလည်း အရည်အသွေးမြင့်ပါတယ်။
• Longines၊ Patek Philippe၊ Rolex၊ TAG Heuer နဲ့ Tissot အစရှိတဲ့ ကမ္ဘာကျော်နာရီ အမှတ်တံဆိပ်တွေက ဆွစ်ဇာလန်နိုင်ငံထုတ်ပါ။
• စနစ်ကျပြီး ယုံကြည်စိတ်ချရတဲ့ ဆွစ်ဇာလန်နိုင်ငံရဲ့ ဘဏ်စနစ်က ကမ္ဘာမှာနံပါတ်တစ်ပါ။
• လိုသလိုအသုံးပြုနိုင်တဲ့ ဆွစ်ဇာလန်က အိတ်ဆောင်ဓါးဆိုရင် သူ့နာမည်ကိုက Swiss Knife လို့ခေါ်ရတဲ့အထိ အထင်ကရဖြစ်စေပါတယ်။
• ဆွစ်ဇာလန်နိုင်ငံထုတ် ချောကလက်နဲ့ချိစ်တို့လည်း အရည်အသွေးမြင့်ပြီး နာမည်ကြီးပါတယ်။ ဆွစ်ဇာလန်နိုင်ငံကနေပြီး တစ်နှစ်ကို ချောကလက် တန်ပေါင်း ၂ သိန်းနီးပါး ထုတ်လုပ်လေ့ရှိပြီး ချိစ်အမျိုးပေါင်း ၄၅၀ ထိတောင် ထွက်ရှိနေတာပါတဲ့။


စတုရန်းပုံအလံ

ဆွစ်ဇာလန်က ကမ္ဘာပေါ်မှာ စတုရန်းပုံစံအလံရှိတဲ့ နိုင်ငံနှစ်ခုထဲက တစ်ခုပါ။ နောက်တစ်နိုင်ငံကတော့ ကမ္ဘာ့အသေးဆုံး ဗာတီကန်စီးတီးနိုင်ငံပါ။

ဆွစ်အလံက အနီရောင်စတုရန်းအလယ်မှာ အဖြူရောင် ကြက်ခြေခတ်နဲ့ပါ။ ကြက်ခြေနီအလံကတော့ ဆွစ်အလံကို အရောင်ပြောင်းပြန်လုပ်ထားတဲ့ ပုံစံပါ။
စေတနာ့ဝန်ထမ်းပေါင်း ၉၇ သန်းကျော်ရှိနေပြီဖြစ်တဲ့ ကြက်ခြေနီအသင်းကို ဂျနီဗာမြို့မှာ ၁၈၆၃ ခုနှစ်ကစတင်တည်ထောင်ခဲ့ပြီး ရုံးချုပ်က အဲ့ဒီမြို့မှာ ယနေ့ထက်ထိ ရှိနေဆဲပါ။

Photo Credit


ကမ္ဘာ့ပျော်ဖို့အကောင်းဆုံးနိုင်ငံတစ်ခု

ဆွစ်ဇာလန်က ပျော်ဖို့အကောင်းဆုံးနိုင်ငံထဲကတစ်ခုပါ။ ၂၀၁၅ ခုနှစ်မှာ ကမ္ဘာ့အပျော်ဆုံးနိုင်ငံအဖြစ် သတ်မှတ်ခံရပြီး ၂၀၁၈ ခုနှစ်မှာတော့ ပဉ္စမနေရာကို ရခဲ့ပါတယ်။ နေပျော်တော့လည်း နိုင်ငံသားတွေက အသက်ရှည်ကြပါတယ်။ ဆွစ်အမျိုးသားတွေဟာ ကမ္ဘာပေါ်မှာ သက်တမ်း Life expectancy အရှည်ဆုံးအမျိုးသားတွေပါ။ ၂၀၁၅ ခုနှစ်က WHO ရဲ့ စစ်တမ်းကောက်ချက်တွေအရ ဆွစ်အမျိုးသားတွေရဲ့ ပျမ်းမျှမျှော်မှန်းအသက်က ၈၁.၃နှစ်ဖြစ်ပြီး အမျိုးသမီးတွေကတော့ ၈၅.၃နှစ်ပဲဖြစ်ပါတယ်။


သန့်ရှင်းသပ်ရပ်ပြီး လူနေမှုအဆင့်အတန်းမြင့်မားလွန်းတဲ့ ဆွစ်ဇာလန်နိုင်ငံက နုမြတ်အကြိုက်ဆုံးနိုင်ငံတွေထဲက တစ်ခုပါ။ သူ့ရဲ့ စိမ်းစိုနေတဲ့ ရှုခင်းတွေကို မျက်စိထဲ စွဲနေလောက်တဲ့အထိကို ကြိုက်ပါတယ်။ နောက်ထပ်လည်း ပြန်သွားချင်ပါသေးတယ်။ နောက်တစ်ခါရောက်ဖြစ်ခဲ့ရင်တော့ ဇာမတ်မြို့ကို အရောက်သွားပါမယ်။ ဆွစ်ဇာလန်နိုင်ငံရဲ့ ရှုခင်းတွေကို တစ်ဝကြီးကြည့်လို့ရတဲ့ Scenic Train ရထားစီးပါမယ်။


ချစ်ခင်လျှက်
ဒေါက်တာနုမြတ်သိင်္ဂီဦး
Nu Myat around the World

လည်မယ်ပတ်မယ် နေပြည်တော်ဝယ်

လည်မယ်ပတ်မယ် နေပြည်တော်ဝယ်


ရုံးပိတ်ရက်တွေမှာ နေ့ချင်းပြန်ဖြစ်ဖြစ် ညအိပ်ဖြစ်ဖြစ် ခရီးထွက်ချင်တယ်ဆိုရင် နေပြည်တော်ကိုလည်း မမေ့သင့်ပါဘူး။ နေပြည်တော်က အချက်အချာကျတဲ့နေရာမှာရှိလို့ ရန်ကုန်ကနေပဲသွားသွား၊ မန္တလေးကနေပဲ သွားသွား နီးပါတယ်။နေပြည်တော်က မြန်မာပြည်ရဲ့ မြို့တော်ဖြစ်သလို မြို့သစ်ကြီးလည်းဖြစ်တော့ နေရာတိုင်းက သန့်ပြန့်ခမ်းနားနေပါတယ်။ နေပြည်တော်သွားမယ်ဆိုရင် တစ်ညအိပ်ဆို ကောင်းကောင်းလည်လို့လောက်ပါတယ်။ အစုံလည်းရောက်ချင်ပြီး အေးအေးဆေးဆေး သွားချင်ရင်တော့ နှစ်ညအိပ်လောက်သွားရပါမယ်။

ဥပါတသန္တိစေတီတော်


နေပြည်တော်မှာ ဖူးမြော်နိုင်တဲ့ ဘုရားစေတီတွေအနက် ဥပါတသန္တိစေတီတော်ရဲ့ အနက်အဓိပါယ်က “ဖြစ်ပေါ်ကြုံတွေ့လာသည့် ဘေးအန္တရာယ်အားလုံး ငြိမ်းအေးစေခြင်း”ပါတဲ့။ စေတီတော်ကို ရန်ကုန်မြို့ကရွှေတိဂုံစေတီတော်မြတ်ကြီးနဲ့ ပုံစံတူ ဉာဏ်တော်အမြင့်အောက်(၁)ပေလျှော့ပြီး တည်ထားခဲ့တာပါ။ အရှေ့ဘက်မုခ်မှာ ဆင်ဖြူတော်တွေ မွေးထားပါတယ်။

မဟာသကျရံသီ ရုပ်ရှင်တော်မြတ်ကြီးကတော့ ဉာဏ်တော်အမြင့် ၃၂ပေရှိတဲ့ ရပ်တော်မူရုပ်ပွားတော်ကြီးဖြစ်ပြီး စကျင်ကျောက်ရပ်တော်မူ ဆင်းတုတော်ကြီးတွေထဲမှာ ဉာဏ်တော်အမြင့်ဆုံးပါတဲ့။ တောင်ပေါ်မှာရှိလို့ တောင်ပေါ်ကနေလည်း နေပြည်တော်ရှုခင်းတွေ လှမ်းမြင်ရသလို ညနေနေဝင်ချိန်ရှုခင်းလည်းသိပ်လှပါတယ်။

ဥပါတသန္တိစေတီတော်


ဒါ့အပြင် ရန်အောင်ချမ်းသာဘုရား၊ ထာဝရငြိမ်းချမ်းရေးစေတီတော်နဲ့ ရန်အောင်မြင်စေတီတော်တို့ကိုလည်း ဖူးမြော်နိုင်ပါတယ်။ နေပြည်တော်ပုဂံဆိုတာကတော့ ရှေးဟောင်းစေတီတွေ စုပြီးရှိတဲ့နေရာမလို့ နေပြည်တော်ပုဂံလို့ တင်စားခေါ်ဝေါ်ကြတာပါ။ ညောင်ပင်စု ရှေးဟောင်းစေတီတွေလို့လည်း သိကြပါတယ်။

နေပြည်တော်ပုဂံ

နေပြည်တော် ဗုဒ္ဒဂါယာကတော့ အိန္ဒိယနိုင်ငံ ဂါယာမြို့က ဗုဒ္ဒဂါယာအတိုင်း ပုံစံတူ တည်ဆောက်ထားတာပါ။ ဘုရားဝန်းထဲမှာ မဟာဗောဓိစေတီတော်မြတ်ကြီးအပြင် ဗောဓိပင်နဲ့ ရွှေပလ္လင်တော်နဲ့ စင်္ကြန်တော် အပါအဝင် သတ္တသတ္တာဟ (၇)ဌာနတို့ကိုလည်း ဖူးမျှော်နိုင်ပါတယ်။ နေပြည်တော် ဗုဒ္ဓဂါယာမှာ “ဖွား၊ ပွင့်၊ ဟော၊ စံ” စတဲ့ သံဝေဇနိယ လေးဌာနလုံးကို ပုံစံတူဆောက်ထားပါတယ်။ မဟာဗောဓိစေတီတော်မြတ်ကြီးကတော့ အဲ့ဒီလေးဌာနထဲက မြတ်စွာဘုရားပွင့်တော်မူရာ ပွင့်စေတီဌာနပါ။ ဓမ္မစကြာတရားဦး ဟောကြားရာ မိဂဒါဝုန်တော ဟောစေတီဌာန၊ ပရိနိဗာန်စံတော်မူရာ ကုသိနာရုံ အင်ကြင်းဥယျာဉ်နဲ့ စံစေတီဌာန၊ မြတ်စွာဘုရားဖွားမြင်တော်မူရာ လုမ္မနီဥယျာဉ်တော် ဖွားစေတီဌာနတို့လည်းရှိပါတယ်။


ဥယျာဉ်ကြီးတွေ အနေနဲ့ကတော့ ညနေတိုင်း မီးရောင်စုံ၊ တေးသံသာတွေနဲ့ ရေပန်းအကတွေ ကပြတဲ့ ရေပန်းဥယျာဉ်ကြီးက မြို့လည်မှာရှိပါတယ်။ ရေတံခွန်တွေ၊ မျှော်စင်တွေ၊ ကြိုးတံတားတွေနဲ့ သာယာလှတဲ့ ဥယျာဉ်ကြီးပါ။ အခုလောလောဆယ် မတ်လကုန်အထိ ပန်းပွဲတော် ကျင်းပနေလို့ သွားကြည့်သင့်ပါတယ်နော်။

အမျိုးသားအထိမ်းအမှတ်ဥယျာဉ်ကတော့ မြန်မာပြည်မြေပုံအတိုင်း မြောက်ဖျားကနေ တောင်ဖျားအထိ အထိမ်းအမှတ်နေရာတွေကို သေချာဆောက်ထားတာပါ။

တိရစ္ဆာန်လေးတွေ ကြည့်ချင်ရင် တိရစ္ဆာန်တွေကို သဘာဝအတိုင်း လွှတ်ထားတဲ့ နေပြည်တော် ဆာဖာရီဥယျာဉ်ကြီးနဲ့ နေပြည်တော် တိရစ္ဆာန်ဥယျာဉ်ကို သွားကြည့်နိုင်ပါတယ်။

အမျိုးသားပရဆေးဥယျာဉ်ကတော့ ဆေးဖက်ဝင်အပင်တွေ စိုက်ထားတဲ့ ဧက ၂၀၀ခန့်ရှိဥယျာဉ်ကြီး ပါ။ ကျောက်စိမ်းတွေနဲ့ အလှဆင်ထားတဲ့ ကျောက်စိမ်းဥယျာဉ်လည်း ရှိပါတယ်။

နေပြည်တော် ရေပန်းဥယျာဉ်ကြီး
နေပြည်တော် ရေပန်းဥယျာဉ်ကြီး
နေပြည်တော် ရေပန်းဥယျာဉ်ကြီး

လေ့လာစရာ ပြတိုက်တွေအနေနဲ့ကတော့ မြို့ထဲမှာဆိုရင် အမျိုးသားပြတိုက်နဲ့ မြန်မာ့ကျောက်မျက်ရတနာပြတိုက်တို့ ရှိပါတယ်။ တပ်မတော် စစ်သမိုင်းပြတိုက်က တိရစ္ဆာန်ဥယျာဉ်နားမှာရှိပြီး နက္ခတာရာပြခန်းကတော့ တိရစ္ဆာန်ဥယျာဉ်ထဲမှာရှိတာပါ။

နေပြည်တော် ဆာဖာရီဥယျာဉ်


အနီးအနားက အပန်းဖြေစခန်းတွေအနေနဲ့ ပျဉ်းမနား-ပင်လောင်းကားလမ်းပေါ် တောင်ကျရွာအနီးမှာရှိတဲ့ နေပြည်တော် ရေပူစမ်း၊ ပေါင်းလောင်းမြို့ ကနေ လှေစီးပြီးသွားနိုင်တဲ့ နမ့်မွန်ကြီးရေတံခွန်၊ နေပြည်တော်ကနေ နာရီဝက်မောင်းရင်ရောက်တဲ့ လှေခွင်းတောင်နဲ့ တောင်ခြေမြစ်ဘေးကမ်းခြေအပန်းဖြေစခန်းတွေနဲ့ ငလိုက်ကန်သာ အပန်းဖြေဥယျာဉ်စခန်းတို့ကိုလည်း သွားရောက်နိုင်ပါတယ်။

နမ့်မွန်ကြီးရေတံခွန်
လှေခွင်းတောင်ခြေမြစ်ဘေးကမ်းခြေအပန်းဖြေစခန်း

ဒေါက်တာနုမြတ်သိင်္ဂီဦး
Nu Myat around the World

ကမ္ဘာကျော် ကူချီမြေအောက်လှိုဏ်ခေါင်းများ

ကမ္ဘာကျော် ကူချီမြေအောက်လှိုဏ်ခေါင်းများ

Cu Chi Tunnels of Vietnam

Entrance to Cu chi Tunnels


ဗီယက်နမ်နိုင်ငံ၏ နာမည်ကျော်နေရာဖြစ်သည့် ကူချီမြေအောက်လှိုဏ်ခေါင်းများ (Cu Chi Tunnels) သည် ဗီယက်နမ်စစ်ပွဲအတွင်း အသုံးပြုရန် တည်ဆောက်ထားသည့် လှိုဏ်ခေါင်းများဖြစ်သည်။ ဟိုချီမင်းမြို့မှ တစ်နာရီကျော် မောင်းလျှင်ရောက်သည့် ကူချီခရိုင်တွင် တည်ရှိသည်။ စစ်ပွဲအတွင်း ပိုအားသာနေသည့် အမေရိကန်နှင့် တောင်ဗီယက်နမ်တပ်များကို နှိမ်နင်းရန် ဗီယက်ကောင်း ကွန်မြူနစ်ပြောက်ကျားတပ်များက မြေအောက်ဥမင်လှိုဏ်ခေါင်းများကို တူးဖော်ခဲ့ခြင်းဖြစ်သည်။ လက်ရှိတွင် စစ်ပွဲအကြွင်းအကျန်ပြတိုက်အဖြစ် ပြသထားသဖြင့် ကမ္ဘာလှည့်ခရီးသည်များကို ဆွဲဆောင်ရာနေရာတစ်ခု ဖြစ်လာခဲ့ပါသည်။


ဤဥမင်လိုဏ်ခေါင်းသည် မိုင်ပေါင်း ၁၂၀ ကျော်ရှည်လျားပြီး အထပ် ၃ထပ်ရှိကာ စစ်ပွဲအတွင်း ဗီယက်ကောင်းပြောက်ကျားတပ်၏ ဌာနချုပ်ဖြစ်ခဲ့သည်။ တပ်ဖွဲ့ဝင်များနေထိုင်ရန်၊ သယ်ယူပို့ဆောင်ရေး ဆက်သွယ်ရေးနှင့် ထောက်ပံ့ရေးပစ္စည်းများ ထားရှိရန်၊ လက်နက်များပြုလုပ်ရန်၊ ထောင်ချောက်များဆင်ရန်၊ ချုံခိုတိုက်ခိုက်ပြီး ထွက်ပြေးပုံးခိုရ လွယ်ကူရန် တူးဖော်ထားခြင်းဖြစ်သည်။ မြေအောက်တွင် လမ်းကြောင်းများ၊ သိုလှောင်ခန်းများအပြင် အိပ်ခန်းများ၊ ဆေးရုံများ၊ ကျောင်းများ၊ ရုပ်ရှင်ရုံများနှင့် မီးခိုးတိတ်မီးဖိုချောင် တို့လည်းရှိသဖြင့် ရွာလေးတစ်ရွာသာမဟုတ်ဘဲ မြေအောက်မြို့ငယ်လေးအဖြစ်တောင် မြင်နိုင်ပါသည်။


ဤဥမင်လိုဏ်ခေါင်းစနစ်ကို ဖျက်စီးရန် အမေရိကန်စစ်တပ်က မျိုးစုံကြိုးပမ်းခဲ့သော်လည်း လုံးလုံးလျားလျား မဖျက်စီးနိုင်ခဲ့ပေ။ ဆိုင်ဂုံမြစ်အတွင်း ပေါက်သည့် အမျိုးမျိုးသောထွက်ပေါက်များ၊ ဗုံးခိုကျင်းများနှင့် ထောင်ချောက်များကြောင့် ဖျက်စီးရခက်ခဲခဲ့ပါသည်။


ကူချီဥမင်လိုဏ်ခေါင်းစနစ်တွင် တည်နေရာအမျိုးမျိုးရှိသလို ရန်သူများနှင့် အဆိပ်ဓာတ်ငွေ့များကို တားဆီးရန် အထူးပိတ်ထားသော တံခါးများလည်းရှိသည်။ ဥမင်လှိုဏ်ခေါင်းများအားလုံးသို့ မြေပြင်မှ ဝင်ပေါက်များရှိပြီး ထိုအပေါက်များရှိ လျှို့ဝှက်တံခါးများကို ရန်သူများမမြင်ရအောင် သစ်ရွက်များဖြင့် ဖုံးအုပ်ထားသည်။ ဝင်ပေါက်သည် အလွန်ကျဉ်းမြောင်းလှသည်။ အကောင်သေးသော ဗီယက်နမ်လူမျိုးများသာဝင်နိုင်ပြီး အကောင်ကြီးသော ရန်သူများအလွယ်တကူ မဝင်ရောက်နိုင်ရန်ဖြစ်သည်။

SAMSUNG CSC


လာရောက်လေ့လာသူများအနေဖြင့် မြေအောက်ဥမင်လှိုဏ်ခေါင်းများအတွင်းသို့ ဝင်ရောက်လေ့လာနိုင်ပါသည်။ ဝင်ပေါက်နှင့် လမ်းတလျှောက်ကျဉ်းသော်လည်း အထဲမှာ ကုန်းပြီးလမ်းလျှောက်လို့ရသည်အထိ ကျယ်ပါသည်။ တချို့နေရာတွင် လူတစ်ကိုယ်စာသာကျယ်သော်လည်း တချို့အခန်းတွေမှာမူ ကျယ်ကျယ်ဝန်းဝန်းရှိပါသည်။

SAMSUNG CSC


လှိုဏ်ခေါင်းဝင်ပေါက် အနီးတဝိုက် မြေပြင်ပေါ်တွင်လည်း ချွန်ထက်သောဝါးချောင်းများဖြင့် ဖုံးကွယ်ထားသော ကျင်းများကဲ့သို့ ထောင်ချောက်များစွာ ဖန်တီးထားသည်ကို တွေ့ခဲ့ရသည်။ ဝန်ထမ်းများက ထောင်ချောက်များ အလုပ်လုပ်ပုံကို သရုပ်ပြပါသည်။ ထိုခေတ်က ဗီယက်ကောင်း ပြောက်ကျားတပ်များ၏ နေ့စဉ်ဘဝကို သရုပ်ဖော်ထားသည့် ရုပ်တုများကိုလည်း တွေ့ခဲ့ရပါသည်။ ဗီယက်ကောင်းများစားသုံးခဲ့ရသည့် မီးခိုးတိတ်လက်ရာ အစားအစာများကိုလည်း မြည်းစမ်းခဲ့ရပါသည်။

SAMSUNG CSC


ကူချီမြေအောက်လှိုဏ်ခေါင်းများသို့ သွားရောက်လေ့လာလိုပါက Ben Dinh နှင့် Ben Duoc ဟူရ် အပိုင်းနှစ်ပိုင်းရှိပါသည်။ Ben Dinh အပိုင်းသည် ဆိုင်ဂုံမြစ်ဘေးတွင်တည်ရှိပြီး လှိုဏ်ခေါင်းအား ပြန်လည်တည်ဆောက် ချဲ့ထွင်ခဲ့သဖြင့် ခရီးသွားများ ပိုမိုလာရောက်လည်ပတ်လေ့ရှိကြပါသည်။ မြေအောက်အိပ်ခန်းများပါရှိသော ဥမင်လိုဏ်ခေါင်း ၄ ခုရှိသလို စစ်ပွဲအတွင်းအသုံးပြုသည့် သေနတ်များကို ကိုယ်တိုင်စမ်းသပ်ပစ်ခတ်နိုင်သည့် သေနတ်ကွင်းလည်းရှိသည်။ ထို့အပြင် ဆေးရောင်ထွက်သည့်သေနတ်များဖြင့် စစ်တိုက်သကဲ့သို့ ဆော့ကစားနိုင်သည့် Paintball Game ကို အဖွဲ့လိုက်ကစားခြင်း၊ မြစ်ထဲတွင် လှေလှော်ခြင်းနှင့် စက်ဘီးစီးခြင်းတို့ ပြုလုပ်နိုင်ပါသည်။

SAMSUNG CSC


Ben Duoc အပိုင်းတွင်မူ ဥမင်လိုဏ်ခေါင်းစနစ်က ကျဉ်းမြောင်းသဖြင့် လူအလာနည်းပါသည်။ Ben Dinh ထက် ငါးဆပိုကြီးသော Ben Duoc သည် ပိုမိုစွန့်စားလိုသူများအတွက် သင့်လျော်ပြီး Ben Duoc Memorial Temple နှင့် Hoang Cam Kitchen ကဲ့သို့သော စိတ်ဝင်စားဖွယ်နေရာများလည်း ရှိပါသည်။

SAMSUNG CSC


ဗီယက်နမ်နိုင်ငံရောက်ပါက လွတ်လပ်ရေးတိုက်ပွဲတွင် ကြီးမားသောအခန်းကဏ္ဍမှ ပါဝင်ခဲ့သည့် ကူချီမြေအောက်လှိုဏ်ခေါင်းများသို့ သွားရောက်လည်ပတ်ခြင်းဖြင့် မြေအောက်တွင် ရှင်သန်နေထိုင်ခဲ့ရသည့် ဘဝများကို တွေ့ကြုံခံစားနိုင်မည်ဖြစ်ပါသည်။ သို့ရာတွင် အသက်ရှုကျပ်တတ်သူ၊ အမှောင်ကြောက်သူ၊ အလုံပိတ်နေရာတွေ ကြောက်တတ်သူတွေကတော့ ဝင်မကြည့်သင့်ပါ။

Dr.နုမြတ်သိင်္ဂီဦး

(Dr.Nu Myat Theingi Oo)

Nu Myat around the World

မိုနာလီဇာပန်းချီကားရှိရာ ကမ္ဘာ့အကြီးဆုံး ပြတိုက်

မိုနာလီဇာပန်းချီကားရှိရာ ကမ္ဘာ့အကြီးဆုံး ပြတိုက်


ပြင်သစ်နိုင်ငံ ပဲရစ်မြို့၏ အထင်ကရ Louvre ပြတိုက်သည် ကမ္ဘာ့အကြီးဆုံးပြတိုက် ဖြစ်သည့်အပြင် တန်ဖိုးမဖြတ်နိုင်သော အနုပညာလက်ရာများ အထူးသဖြင့် မိုနာလီဇာပန်းချီကားကြောင့် ကျော်ကြားပါသည်။ နှစ်စဉ် ဧည့်သည်ဆယ်သန်းနီးပါး လာရောက်လေ့လာလေ့ရှိသဖြင့် ကမ္ဘာ့လူဝင်အများဆုံးပြတိုက်အဖြစ်လည်း နှစ်ပေါင်းများစွာတိုင် ဗိုလ်စွဲခဲ့သည်။ Louvre ပြတိုက်ကို ပြင်သစ်လို “လူဗာ”ဟု အသံထွက်ပြီး အမေရိကန်လိုဆိုလျှင်တော့ “လု(ဗ်)”ဟု အသံထွက်ပါသည်။


Louvre ပြတိုက်သည် ၁၅ ဧက အကျယ်ရှိပြီး အထပ်လေးထပ် ရှိပါသည်။ ပြတိုက်ဝင်ပေါက်ရှိရာ ပိရမစ်ပုံစံ အဆောက်အအုံကြီးသည် ပဲရစ်မြို့၏ အကျော်ကြားဆုံး အထင်ကရ အဆောက်အအုံတစ်ခုဖြစ်သည်။ မှန်နှင့်သတ္တုဖြင့ ်ပြုလုပ်ထားသည့် ထိုပိရမစ်အဆောက်အအုံကို တရုတ်-အမေရိကန်ဗိသုကာ I.M.Pei မှ တည်ဆောက်ခဲ့ခြင်းဖြစ်ပြီး ၁၉၈၉ ခုနှစ်တွင်ပြီးစီးခဲ့သည်။ ပြတိုက်ဝန်းထဲတွင် ပိရမစ်ပုံစံငယ်အဆောက်အအုံ သုံးခုလည်း ရှိပါသေးသည်။


Louvre ပြတိုက်ကို မူလက ၁၂ ရာစု မှ ၁၃ ရာစုအကြား ဖိလစ်ဘုရင် (၂) လက်ထက်တွင် ရဲတိုက်ကြီးအဖြစ် တည်ဆောက်ခဲ့ခြင်းဖြစ်သည်။ ၁၆ ရာစုတွင် တော်ဝင်နန်းတော်အဖြစ် ပြောင်းလဲကာ တော်ဝင်မိသားစုများစံမြန်းခဲ့ပြီးနောက် ၁၇၉၃ ခုနှစ်တွင်မှ ပြတိုက်အဖြစ် တိုးချဲ့ဖွင့်လှစ်ခဲ့ခြင်းဖြစ်သည်။ ပြတိုက်ကြီးသည် ဒုတိယကမ္ဘာစစ်အတွင်း နာဇီတို့ သိမ်းပိုက်ခဲ့သမျှ ပစ္စည်းများ သိမ်းဆည်းရာနေရာအဖြစ်လည်း အသုံးပြုခံခဲ့ရပါသည်။


ပြတိုက်တွင် အစောပိုင်းက တော်ဝင်မိသားစု စုဆောင်းထားသည့် ပန်းချီကားများကိုသာ ပြသခဲ့သော်လည်း နောက်ပိုင်းတိုးချဲ့ခဲ့ရာ ယခုအခါ အနုပညာလက်ရာပေါင်း ၃သိန်း၈သောင်းကျော်ရှိပြီဖြစ်သည်။ ပြတိုက်တွင် ထိုပစ္စည်း၏ ဆယ်ပုံတစ်ပုံခန့်ကိုသာ ခင်းကျင်းပြသထားသော်လည်း ပြတိုက်တစ်ခုလုံးကို တစ်ရက်တည်းအပြီး ကြည့်ရှုရန် မဖြစ်နိုင်ပါ။ တစ်လဆိုလျှင်တောင် မလုံလောက်ပါ။ အကယ်၍ အနုပညာလက်ရာတစ်ခုစီကို စက္ကန့် ၃၀ အချိန်ပေးခံစားမည်ဆိုပါက မအိပ်မစားဘဲ ဆက်တိုက်ဆိုလျှင်တောင် ရက်ပေါင်း ၁၀၀ ကျော် အချိန်ပေးရပါလိမ့်မည်။


ပြတိုက်တွင် ဥရောပ လက်ရာများသာမက အီဂျစ်၊ ဂရိ၊ ရောမ၊ အစ္စလာမ်၊ အရှေ့တိုင်းဆိုင်ရာ ပန်းချီကားများ၊ ပန်းပုများ၊ အနုပညာလက်ရာများနှင့် ရှေးဟောင်းပစ္စည်းများစွာ ရှိလို့နေပါသည်။ ပစ္စည်းများကို အပိုင်းရှစ်ပိုင်းခွဲကာ ပြသထားကာ ပန်းချီပြခန်းမှာ နာမည်အကြီးဆုံးဖြစ်သည်။ ပန်းချီပြခန်းတွင် ပန်းချီကားပေါင်း ၇၅၀၀ နီးပါးခန့်ရှိပြီး ၆၆ ရာခိုင်နှုန်းမှာ ပြင်သစ်အနုပညာရှင်များ၏ လက်ရာများဖြစ်သည်။ ကမ္ဘာကျော်ပန်းချီဆရာ လီယိုနာဒိုဒါဗင်ချီ၏ မိုနာလီဇာပန်းချီသည် ပြတိုက်၏ အကျော်ကြားဆုံးဆွဲဆောင်မှုဖြစ်ပြီး နှစ်စဉ်လူသန်းချီသော ဧည့်သည်တို့သည် မိုနာလီဇာအပြုံးကို မျက်ဝါးထင်ထင်မြင်ဖူးရန် ပြတိုက်ကို လာရောက်လေ့ရှိကြပါသည်။ ထိုပန်းချီကားကို ကျည်ကာမှန်ဖြင့် ဖုံးအုပ်ထားပြီး ကိုယ်ပိုင်လုံခြုံရေးများလည်းရှိကာ ပန်းချီကားကြည့်ရန် အကြာကြီးတန်းစီရပါသည်။


Louvre ပြတိုက်သည် ပြင်သစ်နိုင်ငံတွင်သာမက တခြားမှာလည်းရှိပါသေးသည်။ ၎င်းမှာ အဘူဒါဘီမြို့တွင် ၂၀၁၇ ခုနှစ်က ဖွင့်လှစ်ခဲ့သည့် ပြတိုက်ဖြစ်ပြီး အာရေဘီယန်ကျွန်းဆွယ်မှာ အကြီးဆုံးအနုပညာပြတိုက်ဖြစ်သည်။ ပြင်သစ်နှင့် ယူအေအီး နှစ်နိုင်ငံပေါင်း၍ အမေရိကန် ဒေါ်လာ ၁.၃ ဘီလီယျံတန် စာချုပ်ချုပ်ကာ တည်ဆောက်ခဲ့ပြီး Louvre ပြတိုက် အမည် အသုံးပြုခတင် သန်းပေါင်း ၅၂၀ ကုန်ကျခဲ့သည်ဟု သိရပါသည်။


Louvre ပြတိုက်သည် အနုပညာလက်ရာများကို တစ်နေရာထဲတွင် လေ့လာနိုင်သည့် နေရာဖြစ်သည်။ ပြင်သစ်ကိုရောက်ပြီး Louvre ပြတိုက်ကို မရောက်ပါက မပြည့်စုံဟုဆိုရပေမည်။ ပြတိုက်ဝင်ကြေးမှာ ပုံမှန်ဝင်ကြေးဆိုလျှင် ၁၅ ယူရို (မြန်မာငွေ သုံးသောင်းကျပ်နီးပါး) ကျသင့်ပါလိမ့်မည်။


ဒေါက်တာနုမြတ်သိင်္ဂ ီဦး

ကမ္ဘာ့ဒုတိယအသေးဆုံးနိုင်ငံ မိုနာကို (Monaco, Second Smallest Country)

ကမ္ဘာ့ဒုတိယအသေးဆုံးနိုင်ငံ

မိုနာကို (Monaco)သို့

ကမ္ဘာပေါ်မှာ နိုင်ငံပေါင်း ၁၉၇နိုင်ငံရှိတဲ့အနက် နယ်မြေဧရိယာအားဖြင့် အကြီးဆုံးနိုင်ငံက ရုရှားနိုင်ငံဖြစ်ပြီး အသေးဆုံးကတော့ အီတလီနိုင်ငံ ရောမမြို့ထဲရှိ ပုပ်ရဟန်းမင်းကြီးနေထိုင်တဲ့ Vactican City နိုင်ငံလေးပဲဖြစ်ပါတယ်။ ဒုတိယအသေးဆုံးနိုင်ငံကတော့ မိုနာကို(Monaco) နိုင်ငံပဲဖြစ်ပြီး သူလည်းပဲ ဥရောပနိုင်ငံတစ်ခုဖြစ်ပါတယ်။

မိုနာကိုနိုင်ငံကို Selena Gomez တို့ Leighton Meester တို့ သရုပ်ဆောင်ထားတဲ့ Monte Carlo ရုပ်ရှင်ဇာတ်ကားလေးထဲမှာကတည်းက သွားချင်နေတာ။ အဲဒါနဲ့ နုမြတ်တို့ ဒီသင်္ကြန် ဥရောပ (၈)နိုင်ငံ သွားလည်ခဲ့တုန်းက မိုနာကိုနိုင်ငံကိုပါ အရောက်သွားဖြစ်ခဲ့တယ်။

 

ဘယ်နေရာမှာရှိတာလဲ

မိုနာကိုက ဥရောပအရှေ့တောင်ဘက်ရှိ French Riviera လို့ခေါ်တဲ့ ပြင်သစ်ကမ်းရိုးတန်းမှာရှိပြီး အရှေ့ဘက်မှာမြေထဲပင်လယ်နဲ့ ကျန်သုံးဖက်မှာ ပြင်သစ်နိုင်ငံကဝန်းရံထားတဲ့ ကမ်းခြေနိုင်ငံလေးပါ။ ပြင်သစ်ထဲရောက်နေတော့ မသိတဲ့သူတွေကတော့ မိုနာကိုကို ပြင်သစ်လက်အောက်ခံလို့ထင်နေကြတယ်။ တကယ်က မဟုတ်ပါဘူး။ ကိုယ်ပိုင်အုပ်ချုပ်ခွင့်နဲ့ သီးသန့်နိုင်ငံအဖြစ်ရှိနေတာပါ။ မိုနာကိုရဲ့ အရှေ့ဘက် ၅မိုင်လောက်အကွာမှာ ပြင်သစ်-အီတလီနယ်စပ်ရှိလို့ အီတလီနိုင်ငံနဲ့လည်းတော်တော်နီးပါတယ်။

 

19601392_1907637489475611_1836150191848762831_n

ဘယ်လိုသွားလဲ

နိုင်ငံသေးတော့ လေယာဉ်ကွင်းတို့ ဘူတာရုံတို့ မရှိပါဘူး။ မိုနာကိုကို သွားမယ်ဆိုရင် အနောက်ဘက် ၁၂မိုင်ကျော်အကွာရှိ ပြင်သစ်အပန်းဖြေကမ်းခြေမြို့ နိ(စ်)(Nice) ကနေ တဆင့်သွားရမှာပါ။ နုမြတ်တို့သွားတုန်းက သြစတြီးယားနိုင်ငံ ဗီယာနာမြို့ကနေ နိ(စ်)ကို လေယာဉ်နဲ့သွားပြီး နိ(စ်)မှာပဲတည်းပြီး နိ(စ်)ကနေ မိုနာကိုကို ကားနဲ့သွားခဲ့ကြတာပါ။ မိုနာကိုကနိုင်ငံသေးတော့ ဟိုတယ်ခတွေက တအားဈေးကြီးတာ။ နိ(စ်)ကနေသွားရင် နာရီဝက်လောက်ပဲဆိုတော့ နိ(စ်)မြို့လေးကလည်း အရမ်းလှတော့ အဲ့မှာပဲ တည်းခဲ့ကြတာ။
နိ(စ်)က တိုးရစ်အလာများတဲ့မြို့ဆိုတော့ နိ(စ်)ကနေ Half Day Tour တွေ Full Day Tour တွေအများကြီးရှိတယ်။ နိ(စ်)ကနေ မိုနာကိုနိုင်ငံရယ်၊ ကန်း(Cannes) ရုပ်ရှင်ပွဲတော်ပြုလုပ်နေကျ ကန်းမြို့လေးရယ်၊ တခြားတောင်ပေါ်ရွာလေးတွေရယ် အကုန်လုံးကို တစ်နေတည်းနဲ့ အရောက်ပို့ပေးတယ်။ အဲဒီမြို့လေးတွေ၊ ရွာလေးတွေက တစ်ခုနဲ့တစ်ခု ကပ်ရပ်ပဲဆိုတော့ ခပ်သုတ်သုတ်သွားရင် တစ်နေ့တည်းနဲ့ အပြီးသွားလို့ရပါတယ်။ အချိန်ရရင်တော့ အေးဆေးသွားသင့်တယ်။ ကမ်းခြေမြို့တွေရော၊ တောင်ပေါ်ရွာတွေရောက အရမ်းကို သာယာလှပလွန်းလို့လေ။ နုမြတ်တို့တုန်းက တစ်ရက်ပဲ အချိန်ရတော့ တက်သုတ်ရိုက်သွားလိုက်ရတာ။

19642744_1907637876142239_2383244937588833038_n

ဒုတိယအသေးဆုံးနိုင်ငံ

မိုနာကိုနိုင်ငံလေးက ဘယ်လောက်များသေးငယ်လဲဆိုရင် အကျယ်အဝန်းစုစုပေါင်း စတုရန်းမိုင်၁.၂၄သာရှိတာပါ။ ပြောရမယ်ဆိုရင် မြို့သေးလေးတစ်မြို့စာလောက်ပဲရှိတာပါ။ နိုင်ငံတစ်ဖက်ကနေတစ်ဖက်ကို အရှေ့နဲ့အနောက်တည့်တည့်လမ်းလျှောက်မယ်ဆိုရင် တစ်နာရီပဲ ကြာလောက်တဲ့အထိ နိုင်ငံလေးကသေးငယ်ပါတယ်။

19665246_1907637316142295_4958108616544903633_n

အချမ်းသာဆုံးနိုင်ငံ

နိုင်ငံကသာသေးတာ အချမ်းသာဆုံးနိုင်ငံထဲမှာပါတယ်။ လူဦးရေရဲ့ ၃၀%က သန်းကြွယ်သူဌေးတွေပါ။ အလုပ်လက်မဲ့ဦးရေက သုညလို့သိရပါတယ်။ စာမတတ်သူလည်းမရှိပါဘူးတဲ့။ သူဌေးတွေနေတဲ့နိုင်ငံဆိုတော့ ကိုယ်ပိုင်ရွက်လှေတွေဆို ဆိပ်ကမ်းမှာ အပြည့်။ ကိုယ်ပိုင်ဟယ်လီကော်ပတာဆင်းဖို့ကွင်းတွေလည်းရှိပါတယ်။ ကားတွေ၊ လူတွေဆိုလည်း ပျံလန်နေတာ။

လူဦးရေအထူထပ်ဆုံးနိုင်ငံ

မိုနာကိုဟာကမ္ဘာ့လူဦးရေ အထူထပ်ဆုံးနိုင်ငံလည်းဖြစ်ပါတယ်။ နိုင်ငံကသေးတော့ လူဦးရေ ၃၈၀၀၀ ကျော်ပဲရှိတာတောင် အကျယ်အဝန်းနဲ့ယှဉ်လိုက်တဲ့အခါမှာ လူဦးရေထူထပ်သွားတာပါ။ လူဦးရေ ၄သောင်းနီးပါးမှာ ၅ပုံ၁ပုံကသာ ဒေသခံတွေဖြစ်ပြီး ကျန်တာက နိုင်ငံသားခံယူထားတဲ့ ပြည်ပကလာနေထိုင်တဲ့သူဌေးတွေပါ။

19748545_1907637529475607_792667272691772334_n

မွန်တီကာလို ကာစီနိုရုံ

လူဦးရေကနည်းပေမဲ့ ဧည့်သည်ပေါင်းက တစ်နှစ်ကို ၁.၅သန်းတောင်တဲ့။ အဲဒီတော့ အဓိက စီးပွားရေးက ခရီးသွားလုပ်ငန်းပေါ့။ ဘဏ်လုပ်ငန်းနဲ့ ကာစီနိုဝိုင်းတွေကလည်း ဝင်ငွေ အများဆုံးရပါတယ်။ နှစ်ပေါင်း၁၅၄နှစ်သက်တမ်းရှိ Monte Carlo (မွန်တီကာလို)ကာစီနိုရုံက မိုနာကိုနိုင်ငံရဲ့ Landmark တစ်ခုပါ။ ခမ်းနားလွန်းလို့ James Bond ဇာတ်ကား ၃ကားတောင်လာရိုက်ခဲ့ရပါတယ်။ ဒါပေမဲ့ နိုင်ငံသားတွေကိုတော့ ကာစီနိုရုံထဲ ဝင်ကစားခွင့်မပေးပါဘူး။

19665155_1907637356142291_6091106611809517819_n19601300_1907637332808960_1083805268568471563_n19665441_1907637726142254_8609791693858385404_n

Formula F1 ကားမောင်းပြိုင်ပွဲ

နောက်ပြီး Formula F1 ကားမောင်းပြိုင်ပွဲ Grand Prix ကျင်းပရာနေရာအဖြစ်လည်းနာမည်ကြီးပါသေးတယ်။ မိုနာကိုရဲ့ လမ်းကျဉ်းကျဉ်းလေးတွေ၊ ကမ်းခြေလမ်းတွေ၊ ဥမင်လှိုဏ်ခေါင်းတွေ ဖြတ်မောင်းရတဲ့ ဒီကားပြိုင်ပွဲကို ကမ္ဘာအနှံ့က လာရောက်အားပေးကြလေ့ရှိပါတယ်။ တချို့လမ်းတွေမှာ ပြိုင်ကားမောင်းလို့ရအောင်လမ်းဘေးမှာ သံဗန်းတွေကာထားပေးတာတွေ့ရပါတယ်။

19665265_1907637709475589_6551733608768842399_n

ဘုရင်စနစ်နဲ့ အုပ်ချုပ်တဲ့နိုင်ငံ

မိုနာကိုနိုင်ငံက ပြင်သစ်နိုင်ငံထဲရောက်နေတဲ့ နိုင်ငံသေးသေးလေးဆိုတော့ တချိုကက ပြင်သစ်လက်အောက်ခံနိုင်ငံလို့ထင်နေကြတယ်။ တကယ်တော့ ဖွဲ့စည်းပုံအခြေခံဥပဒေနှင့်အညီဖြစ်သော ဘုရင်စနစ်/မင်းသားအုပ်ချုပ်ခံနိုင်ငံဖြစ်ပြီး ဥရောပမှာရှေးအကျဆုံး ruling house ဖြစ်တဲ့ ဂရီမယ်လ်ဒီ(Grimaldi)မိသားစုမျိုးဆက်ကနေ အုပ်ချုပ်နေတဲ့နိုင်ငံဖြစ်ပါတယ်။ ဘုရင်စနစ်နဲ့ အုပ်ချုပ်ဆဲနိုင်ငံဖြစ်လို့ တော်ဝင်မိသားစုတွေ နေထိုင်နေဆဲ နန်းတော်တွေလည်းတွေ့ခဲ့ရပါတယ်။ မိုနာကိုနိုင်ငံက ရှေးခေတ်ကသြဇာကြီးခဲ့တဲ့ ဂျီနိုယာသမ္မတနိုင်ငံကနေ ၁၂၄၇ခုနှစ်မှာ လွတ်လပ်ရေးရပြီး နိုင်ငံတစ်ခုအဖြစ်ခွဲထွက်လာခဲ့တာပါ။

19601077_1907637569475603_5087545289254530947_n19642284_1907637456142281_1646704349631955041_n

မိုနာကိုရဲ့ ဒိုင်ယာနာ (သို့) ဂရေ့စ်ကယ်လီ

အင်္ဂလန်နိုင်ငံကို တော်ဝင်မင်းသမီးဒိုင်ယာနာနဲ့တွဲသိကြသလို မိုနာကိုနိုင်ငံကိုတော့ တော်ဝင်မင်းသမီး ဂရေ့စ်ကယ်လီနဲ့တွဲသိကြပါတယ်။ ချောမောလှပလွန်းတဲ့ အမေရိကန်ရုပ်ရှင်မင်းသမီး ဂရေ့စ်ကယ်လီဟာ မိုနာကိုနိုင်ငံမှာ ရုပ်ရှင်သွားရိုက်ရင်း ထိုစဉ်က မိုနာကိုတော်ဝင်မင်းသား ရိန်နီယာ III နဲ့ဖူးစာဆုံကာ ၁၉၅၆ခုနှစ်မှာ ထိမ်းမြားလက်ထပ်ခဲ့ပြီး ရုပ်ရှင်မင်းသမီးဘဝကနေ တော်ဝင်မင်းသမီးဘဝကိုရောက်ရှိခဲ့ပါတယ်။ ကလေး၃ယောက်ဖွားမြင်ခဲ့ပြီး ဒုတိယသားဖြစ်တဲ့ တော်ဝင်မင်းသား အဲလ်ဘတ်II ဟာ အခုလက်ရှိ မိုနာကိုနိုင်ငံကို အုပ်ချုပ်နေသူပဲဖြစ်ပါတယ်။ လူအများအားကျရခဲ့ပေမဲ့ မင်းသမီးဒိုင်ယာနာလိုပဲ မင်းသမီးဂရေ့စ်ကယ်လီရဲ့ဇာတ်သိမ်းက မလှပခဲ့ပါဘူး။ ၁၉၈၂ခုနှစ်က ကားအက်ဆီးဒင့်နဲ့ ဆုံးပါးသွားခဲ့ရတာကြောင့်ပါ။

19642687_1907637326142294_4362223258961771217_n

မိုနာကိုနိုင်ငံဟာ အကျယ်အဝန်းအားဖြင့်သေးငယ်ပေမဲ့ အတုယူစရာကောင်းပါတယ်။ အလုပ်လက်မဲ့မရှိ စာမတတ်သူမရှိလို့ လူသားဖွံ့ဖြိုးမှုညွှန်းကိန်း ၁အထက်မှာရှိတဲ့ တစ်ခုတည်းသောနိုင်ငံပါတဲ့။ အချမ်းသာဆုံးနိုင်ငံတစ်ခုဖြစ်ပြီး ကမ္ဘာပေါ်မှာ Life Expectancy အမြင့်ဆုံးနိုင်ငံလည်းဖြစ်ပါတယ်။ စိတ်ဝင်စားစရာတွေနဲ့ပြည့်နှက်နေလို့ ဥရောပရောက်ရင် သွားလည်ကြည့်သင့်ပါတယ်လို့။

အားလုံးစိတ်ချမ်းသာကိုယ်ကျန်းမာရှိကြပါစေ….

#NuMyat
#NuMyataroundtheWorld
#Monaco

ဘောလုံးအားကစားအစပြုရာ အင်္ဂလန်

ဘောလုံးအားကစားအစပြုရာ အင်္ဂလန်


အင်္ဂလန်နိုင်ငံသည် ယူနိုက်တက်ကင်းဒမ်း (United Kingdom) နိုင်ငံတစ်ခုဖြစ်ကာ ဥရောပတိုက်ကုန်းမကြီးအနောက်ဘက် မြောက်ပင်လယ်ရှိ ကျွန်းကြီးပေါ်တွင် တည်ရှိနေပါသည်။ ယူနိုက်တက်ကင်းဒမ်းဆိုသည်မှာ အင်္ဂလန်၊ ဝေလ၊ စကော့တလန်နှင့် မြောက်အိုင်ယာလန် လေးနိုင်ငံပေါင်းကာ အချုပ်အခြာအာဏာပိုင်နိုင်ငံအဖြစ် အသိအမှတ်ပြုထားသော နိုင်ငံတစ်နိုင်ငံဖြစ်သည်။ အင်္ဂလန်သည် အနောက်ဘက်တွင် ဝေလနယ်၊ မြောက်ဘက်တွင်စကော့တလန်တို့နှင့် နယ်နိမိတ်ချင်းထိစပ်နေကာ အရှေ့ဘက်တွင် မြောက်ပင်လယ်၊ အနောက်ဘက်တွင် အင်္ဂလိပ်ရေလက်ကြားတို့ရှိနေပါသည်။ အင်္ဂလန်နိုင်ငံသည် ဥရောပကုန်းမြေမကြီးမှ သီးခြားကွဲထွက်နေသည့် ကျွန်းပေါ်မှာရှိသော်လည်း ၂၁မိုင်အရှည်ရှိ ရေအောက်ဥမင်လိုဏ်ခေါင်းမှတစ်ဆင့် ဥရောပကုန်းမြေမကြီးရှိ ပြင်သစ်နိုင်ငံသို့ သွားရောက်နိုင်ပါသည်။


အင်္ဂလန်၏ လူဦးရေမှာ ၅၆ သန်းကျော်ရှိပြီး ယူနိုက်တက်ကင်းဒမ်းနိုင်ငံများအနက် လူဦးရေအထူထပ်ဆုံးနိုင်ငံဖြစ်သည်။ အဓိကတရားဝင်ဘာသာစကားဖြစ်သည့် အင်္ဂလိပ်စကားသည် ကမ္ဘာ့နိုင်ငံအများစုတွင် အသုံးများကြသည့် ဘာသာစကားဖြစ်ကာ ကမ္ဘာတစ်ဝှမ်းရှိ လူ ၁ ဘီလီယံသည် အင်္ဂလိပ်စကားပြောကြသည်။


အင်္ဂလန်နိုင်ငံ၏ အကျယ်အဝန်းမှာ စတုရန်းမိုင်ပေါင်း ၅၀၃၀၁ မိုင်ရှိပါသည်။ ပြည်နယ် ၉ ခုနှင့် စီရင်စု ၄၈ ခုရှိပြီး Isle of Wight နှင့် Hayling ကျွန်းကဲ့သို့ ကျွန်းငယ်များစွာလည်းရှိပါသည်။ အင်္ဂလန်နိုင်ငံ၏ အကြီးဆုံးမြို့နှင့်မြို့တော်မှာ လန်ဒန်ဖြစ်သည်။ လန်ဒန်သည် ဥရောပ၌ လူဦးရေအများဆုံးမြို့လည်းဖြစ်ကာ လူဦးရေ ၉ သန်းကျော်ရှိသည်။ အင်္ဂလန်နိုင်ငံ၏ ပထမဆုံးမြို့တော်မှာ ဝင်ချက်စတာမြို့ (Winchester) ဖြစ်ပြီး အခြားမြို့ကြီးများမှာ ဘာမင်ဂမ်၊ မန်ချက်စတာ၊ ရှက်ဖီးလ်၊ လီဗာပူးလ်၊ နယူးကာဆယ်နှင့် လိဒ်စ်တို့ဖြစ်သည်။

Britain’s Queen Elizabeth II (3L) stands with her husband Britain’s Prince Philip, Duke of Edinburgh (3R), her son Britain’s Prince Charles, Prince of Wales (2L) and his wife Britain’s Camilla, Duchess of Cornwall (L), and her grandson Britain’s Prince William, Duke of Cambridge (2R) and his wife Britain’s Catherine, Duchess of Cambridge, as they pose photo a photograph ahead of the annual evening reception for members of the Diplomatic Corps at Buckingham Palace, London on December 8, 2016. / AFP / POOL / Dominic Lipinski (Photo credit should read DOMINIC LIPINSKI/AFP/Getty Images)


အင်္ဂလန်နိုင်ငံ၏ အစိုးရမှာ ဖွဲ့စည်းပုံအခြေခံဥပဒေစည်းမျဉ်းခံ ဘုရင်စနစ်ဖြစ်သည်။ နန်းတက်ဘုရင်ရှိသော်လည်း နိုင်ငံရေးဆုံးဖြတ်ချက်များကို အစိုးရနှင့် ပါလီမန်ကသာ ချမှတ်လေ့ရှိပါသည်။ ၁၉၅၃ ခုနှစ်တွင် နန်းတက်ခဲ့သည့် အဲလစ်ဇဘက်ဘုရင်မကြီးသည် ကမ္ဘာ့နန်းသက်အရှည်ဆုံး ဘုရင်မကြီး ဖြစ်ပါသည်။ ဘုရင်မကြီး စံမြန်းရာနေရာတစ်ခုဖြစ်သည့် ဝင်ဆာရဲတိုက်ကြီး (Windsor Castle) သည် ၁၁ ရာစုကတည်းက ယခုထက်ထိ အသုံးပြုနေသည့် ကမ္ဘာ့သက်တမ်းအရှည်ဆုံးနှင့် အကြီးမားဆုံးရဲတိုက်ကြီးဖြစ်ကာ တချို့အပိုင်းတွေကို အများပြည်သူလေ့လာနိုင်ရန် ဖွင့်ပြထားပါသည်။
၁၇၆၀ ဝန်းကျင်က စတင်ခဲ့သော စက်မှုတော်လှန်ရေးအပြီး အင်္ဂလန်သည် ပထမဆုံးစက်မှုထွန်းကားသော နိုင်ငံတစ်နိုင်ငံဖြစ်ကာ စီးပွားရေးအင်အားကြီးမားပါသည်။ နိုင်ငံတွင်းအသုံးပြုသည့် ပေါင်စတာလင်သည် ကမ္ဘာပေါ်တွင် ယခုထက်ထိအသုံးပြုနေဆဲ သက်တမ်းအရင့်ဆုံးငွေကြေးဖြစ်ပါသည်။


အင်္ဂလန်နိုင်ငံတွင် ပညာရေးစနစ် အဆင့်မြင့်သောကြောင့် တက္ကသိုလ်များတွင် နိုင်ငံတကာကျောင်းသားများ လာရောက်ပညာသင်ယူလေ့ရှိကြပါသည်။ အောက်စ်ဖို့ဒ်တက္ကသိုလ်သည် ဗြိတိန်နိုင်ငံ၏ သက်တမ်းအရင့်ဆုံး အဆင့်မြင့်ပညာရေးဌာနဖြစ်သည်။ ဗြိတိန်စာကြည့်တိုက်သည် ကမ္ဘာ့ဒုတိယအကြီးဆုံးစာကြည့်တိုက်ဖြစ်ကာ စာအုပ်စာတန်းပေါင်း ၁၅၀ သန်းကျော်ရှိပါသည်။ လန်ဒန်တွင် ကြီးကျယ်ခမ်းနားသော ဗြိတိန်ပြတိုက်မှ သေးငယ်သော ယပ်တောင်ပြတိုက်ထိ လေ့လာစရာ ပြတိုက်ပေါင်း ၁၇၀ကျော်ရှိသည်။


အင်္ဂလိပ်လူမျိုးများသည် အားကစားဝါသနာပါကြကာ ဘောလုံး၊ တင်းနစ်၊ ခရစ်ကတ်နှင့်ရပ်ဘီကဲ့သို့ ကမ္ဘာ့အကျော်ကြားဆုံး အားကစားများသည် အင်္ဂလန်မှ စတင်ကစားခဲ့ခြင်းဖြစ်သည်။ အင်္ဂလန်တွင် လူကြိုက်အများဆုံး အားကစားမှာ ဘောလုံးဖြစ်သည်။


သြဇာလွှမ်းမိုးမှုရှိသော အင်္ဂလိပ်စာရေးဆရာများရှိခဲ့ပြီး နာမည်ကျော်ကြား လူကြိုက်အများဆုံးမှာ ရိုမီယိုနှင့် ဂျူလိယက်ကဲ့သို့ ဂန္ထဝင်ပြဇာတ်များကိုရေးသားခဲ့သည့် ဝီလျံရှိတ်စပီးယားဖြစ်သည်။ အင်္ဂလိပ်ကွန်ပျူတာသိပ္ပံပညာရှင် တင်(မ်)ဘာနာ(စ်)လီးသည် ကမ္ဘာ့အင်တာနက်ကွန်ယက် (World Wide Web) ကို တီထွင်ခဲ့သည်။ အခြား အင်္ဂလန်မှ ကျော်ကြားသူများမှာ ဝင်စတန်ချာချီ၊ သိပ္ပံပညာရှင် အိုင်းဆက်နယူတန်၊ ချားစ်ဒါဝင်၊ စတီဖင်ဟောကင်းနှင့် ဘောလုံးသမား ဒေးဗစ်ဘက်ခမ်း တို့ဖြစ်ပါသည်။


အင်္ဂလန်တွင် ကမ္ဘာကျော် အထင်ကရနေရာများစွာရှိပါသည်။ တော်ဝင်မိသားစုနေထိုင်ရာ ဘာကင်ဟမ်နန်းတော်၊ ကမ္ဘာပေါ်တွင်အမြင့်ဆုံး ရှုခင်းကြည့်ချားရဟတ် London Eye၊ လန်ဒန်တံတား၊ သိမ်းမြစ်နှင့် ဗြိတိသျှပြတိုက်တို့သည် လန်ဒန်တွင်တည်ရှိပါသည်။ လန်ဒန်ရှိ Big Ben ကို ကမ္ဘာ့အကျော်ကြားဆုံးနာရီအဖြစ် သိထားကြသော်လည်း တကယ်တမ်းမှာ ၁၃တန်အလေးချိန်ရှိ ခေါင်းလောင်းကြီးတစ်ခုသာဖြစ်သည်။


အင်္ဂလန်ရှိအခြားထင်ရှားသော နေရာများမှာ Stonehenge၊ York Minster၊ Millennium Dome အဆောက်အအုံ နှင့် Anwick ရဲတိုက်တို့ ဖြစ်ကြသည်။ Stonehenge သည် ကမ္ဘာပေါ်တွင် ရှေးအကျဆုံး အဆောက်အအုံတစ်ခုဖြစ်ကာ လွန်ခဲ့သောနှစ်ပေါင်း ၅၀၀၀ ကျော် ၃၀၀၀ ဘီစီမတိုင်ခင်ကတည်းက ဆောက်လုပ်ခဲ့သည်ဟု သိရသည်။

⛰ ကရင်ပြည်နယ်က သဘာဝလှိုဏ်ဂူကြီး (၆)ခု ⛰

⛰ကရင်ပြည်နယ်က သဘာဝလှိုဏ်ဂူကြီး (၆)ခု ⛰


ကရင်ပြည်နယ်က တကယ်ကို သဘာဝအလှတွေပြည့်စုံတဲ့ပြည်နယ်တစ်ခုပဲနော်။ တောတောင်တွေ၊ လှိုဏ်ဂူတွေနဲ့ ရေတံခွန်တွေပေါများတဲ့ ဒေသဆိုတော့လေ။ ဟုတ်တယ်ဟုတ်။

(1) ဆဒ္ဒန်ဂူ

ကရင်ပြည်နယ်က ဂူတွေအကြောင်းပြောရမယ်ဆို ဆဒ္ဒန်ဂူကတော့ ထိပ်ဆုံးကပေါ့။ ဆဒ္ဒန်ဂူသွားရင် သဘာဝအလှအပတွေရှုစားလို့ရနိုင်တဲ့အပြင် အတွေ့အကြုံ အသစ်အဆန်းတွေပါရနိုင်တာကြောင့်ပါ။ ဆဒ္ဒန်ဂူကြီးက နှစ်ဖက်ပိတ်ဂူကြီးဆိုတော့ တစ်ဖက်ဝင်ပေါက်ကနေ နာရီဝက်လောက်လမ်းလျှောက်ဝင်ပြီး ထွက်ပေါက်ကနေပြန်ထွက်ကာ ထွက်ပေါက်ကနေဝင်ပေါက်ဆီကိုတော့ ဂူအပြင်ဘက်ကနေ လှေတတန် ကုန်းကြောင်းတတန်ပြန်သွားရတာပါ။


ထုံးကျောက်ဂူကြီးထဲ ကျောက်ခတ်ပန်းဆွဲတွေ ကျောက်ဆိုင်တွေ အများစုက သဘာဝအတိုင်းရှိနေပြီး ဂူကြီးက အကျယ်ကြီးနဲ့ အကြီးကြီးပါ။ ကရင်ပြည်နယ်မှာ အရှည်ဆုံးလှိုဏ်ဂူဖြစ်ပြီး မြန်မာမှာ ပဉ္စမမြောက်အရှည်ဆုံးဂူပါတဲ့။ ဂူထဲ ဖိနပ်စီးလို့မရတော့ ခြေထောက်ခဲစူးမှာတော့ သတိထားသင့်ပါတယ်။ မှောင်လည်းမှောင်တော့ ဓာတ်မီးဆောင်သွားပါ။ တချို့နေရာမှာ လင်းနို့လေးတွေ ဂူမျက်နှာကျက်မှာ တွဲလောင်းခိုနေတတ်ပါတယ်။ ဂူထွက်ပေါက်နားမှာ အပြင်ထိပေါက်နေတဲ့ အပေါက်ကြီးထဲ နေရောင်ခြည်တွေဖြာကျနေတာသိပ်လှပါတယ်။ အများစုက အဲ့နေရာမှာ ဓာတ်ပုံရိုက်လေ့ရှိကြပါတယ်။


ဂူထွက်ပေါက်ကနေမြင်ရတဲ့ ရှုခင်းကလည်း သိပ်လှပေါ့။ တောတောင်တွေနောက်ခံမှာ ရေကန်ကြီးနဲ့ သိပ်သာယာတာ။ အဲ့ရေကန်ကြီးကို ဖြတ်ပြီးလှေစီးရတယ်။ လှေကလည်း ရိုးရိုးစီးရတာဟုတ်ဘူး။ ကျောက်တောင်ကြီးတစ်ခုအောက်ကနေ လည်း ဖြတ်စီးရတယ်။ ရေမျက်နှာပြင်မြင့်တက်နေတဲ့အချိန်ဆို ကျောက်တောင်ကြီးအောက် ဖြတ်တဲ့အချိန်လှေပေါ်ပက်လက်လှန်ပြီး စီးရတာတဲ့လေ။ တော်တော်ပျော်ဖို့ကောင်းပါတယ်။

တည်နေရာကတော့ ဇွဲကပင်တောင်ကြီးရဲ့ အစွန်ဆုံးနေရာမှာ တည်ရှိပြီး ဘားအံမြို့ကနေဆိုရင် တောင်ဘက် ၁၅ မိုင်လောက်အကွာမှာ ရှိပါတယ်။

(2) ကော့ဂွန်းဂူ

ကော့ဂွန်းဂူကလည်း ကရင်ပြည်နယ်ရဲ့ အံဖွယ်ထဲမှာ တစ်ခုအပါအဝင်ပဲပေါ့။ ဝင်ဝင်ချင်းမှာ တကယ်ကို ဆွံ့အသွားခဲ့တာ။ ဒီလိုရှေးဟောင်းအမွေအနစ်တွေရှိမှန်း ဟိုးအရင်တုန်းက မသိခဲ့ရပါလားလို့။ အမိုးလိုဖြစ်နေတဲ့ ကျောက်ကမ်းပါးနံရံကြီးတွေမှာ အုတ်ခွက် ဗုဒ္ဓဆင်းတုတော်တွေ ထွင်းထုထားတာမရေမတွက်နိုင်လောက်အောင်ပဲ။ ထုံးကျောက်တွေကိုထုဆစ်ထားတဲ့ ဗုဒ္ဓဆင်းတုတော်တွေလည်း ထိုင်တော်မူ ရပ်တော်မူ လျောင်းတော်မူ ပုံစံအမျိုးမျိုးနဲ့ အများကြီးဖူးမြော်နိုင်ပါတယ်။ ဆင်းတုတော်တွေရဲ့ လက်ရာတွေကတော့ ပုဂံခေတ်နှောင်းကာလ အေဒီ ၇ရာစု လက်ရာလို့သိရပါတယ်။


ကျောက်စာမှာ ထွင်းထားတဲ့ ရှေးခေတ်မွန်စာအရေးအသားတွေအရ မုတ္တမမိဖုရားကြီး လှူဒါန်းပူဇော်ထွင်းထုထားတာလို့သိရပါတယ်။ ပုဂံအနော်ရထာမင်းက သထုံမနုဟာမင်းကိုတိုက်ခိုက်ပြီး သထုံပြည်ပျက်တဲ့အခါမှာ ထွက်ပြေးလွတ်မြောက်လာတဲ့ မုတ္တမမိဖုရားက ကော့ဂွန်းဂူဆီ ရောက်သွားပြီး ပုန်းအောင်းနေခဲ့ပါသတဲ့။ ပုန်းအောင်နေစဉ်အတွင်း ကော့ဂွန်းဂူနဲ့ ဂူအနီးနားတစ်ဝိုက်မှာ စေတီ၊ဆင်းတု၊ရုပ်ကြွတွေကို ထွင်းထုလှူဒါန်းခဲ့လို့ အခုလိုရှေးဟောင်းလက်ရာတွေကို ဖူးမြော်နိုင်ခဲ့တာပါ။

တည်နေရာကတော့ ဘားအံမြို့ကနေ ၈ မိုင်ခန့်အကွာ သံလွင်မြစ်အနောက်ဘက် ကော့ဂွန်းကျေးရွာကနေဆို ၂ ဖာလုံခန့် အကွာရှိ ကော့ဂွန်းတောင်မှာ ရှိနေတာပါ။ ဂူအမျိုးအစားကတော့ တစ်ဖက်ပိတ်ထုံးကျောက်ဂူအမျိုးအစားပါ။

(3) ဘုရင့်ညီဂူ

ဘုရင့်ညီဂူကိုတော့ ဟိုးငယ်ငယ်လေးထဲက ကြားဖူးရောက်ဖူးခဲ့တာပါ။ မေမေက သထုံသူဆိုတော့ သထုံသွားရင်း ဝင်လည်ဖြစ်ခဲ့တာကြောင့်လည်းပါပါတယ်။ ဘုရင့်ညီဂူရဲ့ ထူးခြားချက်ကတော့ ထိုဂူှရှိတဲ့ တောင်အောက်ခြေမှာ ရေအိုင်ကြီးရှိပြီး ရေပူဖက်နဲ့ ရေအေးဖက်ဆိုပြီး နှစ်မျိုးဖြစ်နေတာပါ။ ရေတွေက အတူတူစီးဆင်းနေပေမဲ့ ရောသွားတာမျိုးမရှိဘဲ တစ်ဖက်က ပူနေပြီး အခြားတစ်ဖက်က အေးနေတာ တော်တော်ထူးခြားပါတယ်။ သဘာဝရေပူစမ်းက ကိုယ်အရေပြားရောဂါတွေကို ပျောက်ကင်းစေတယ်လို့လည်းအယူရှိပါတယ်။


ဘုရင့်ညီဂူမှာ အမည်တွေလည်း အမျိုးမျိုးတွင်ခဲ့တာတဲ့လေ။ ဟိုးရှေးခေတ်တုန်းက အမည်ကတော့ “မဟာပါသာဏရတနာလှိုဏ်ဂူ”ပါတဲ့။ နောက်ပိုင်းမှာ မဟိ ံသရာဇာဘုရင်ကြီး တရားထိုင်ခဲ့ရာဂူ ဖြစ်ခဲ့လို့ “ဘုရင်ကြီးဂူ”လို့ အမည်တွင်ခဲ့တယ်။ သထုံပြည်ရဲ့ ဘုရင့်သားတော်နှစ်ပါးဖြစ်တဲ့ သီဟကုမ္မာရနဲ့ စိတ္တကုမ္မာရ မင်းသား၂ပါး ပုန်းအောင်းခဲ့လို့လည်း “ဘုရင်ညီနောင်ဂူ”လို့လည်း နာမည်တွင်ခဲ့တယ်။ “ဘုရင်ညီဂူ” လို့ အခုလက်ရှိမှာ အမည်တွင်နေတာကတော့ မင်းသားညီနောင်၂ပါးမှာ နောင်တော် ဖမ်းစီးကွပ်မျက်ခံရပြီး ညီတော်၁ပါးသာ ကျန်ရစ်နေထိုင်ခဲ့လို့ပါတဲ့လေ။

တည်နေရာကတော့ သထုံကနေ မြိုင်ကလေးသွားရာလမ်းပေါ် သံလွင်မြစ်နဲ့ ဒုံသမိမြစ်အကြား မြေပြန့်ပေါ်မှာ ထီးထီးကြီး ထိုးထွက်နေတဲ့ ကျောက်တောင်ကြီးရဲ့ အတွင်းပိုင်းမှာ တည်ရှိနေတာပါ။

(4) လင်းနို့ဂူ

လင်းနို့ဂူထဲကနေ နေဝင်ချိန် ငါးနာရီခွဲ ခြောက်နာရီလောက်ဆို လင်းနို့ပေါင်း သောင်းချီ သိန်းချီပြီး အစာရှာဖို့ ပျံထွက်လာလေ့ရှိပါတယ်တဲ့။ နဂါးငွေ့တန်းကြီးလိုပဲ ကြည့်ရသိပ်လှတဲ့ လင်းနို့တွေ အစာရှာထွက်တာကို လင်းနို့ဂူဘေးကပ်ရပ်တောင်ပေါ်တက်ကာ တောင်ပေါ် View Point ကနေလှမ်းကြည့်ရတာပါ။ View Point ကနေပြီး သံလွင်မြစ်၊ သံလွင်တံတား၊ ဇွဲကပင်တောင်၊ ခုနှစ်ဆူတောင်(ကြာအင်းတောင်)နဲ့ ဖားပုတောင်တွေကို ပါ အပေါ်စီးကနေ လှမ်းမြင်နိုင်ပါတယ်တဲ့။ ညနေဆည်းဆာ နေဝင်ချိန်မှာ ဒီရှုခင်းနောက်ခံပြီး လင်းနို့တွေ အများကြီး ပျံတက်သွားတဲ့မြင်ကွင်းက သိပ်ကိုရင်သက်ရှုမောဖွယ်ကောင်းလွန်းလို့ နိုင်ငံခြားသားတွေအကြိုက်ပါ။

(5) ကော့ကသောင်ဂူ

ကော့ကသောင်ဂူကတော့ တစ်ဖက်ပိတ် ထုံးကျောက်ဂူပါတဲ့။ အဝကျယ်ပြီး အတွင်းမှာ ကျဉ်းသွားတဲ့ ဂူအမျိုးအစားပါ။ ဂူထဲမှာ ဘုရားတွေဆင်းတုတွေတည်ထားပါတယ်။ ဂူအဆုံးမှာ ရှေးရဟန်းတော်တွေရဲ့ ဓာတ်တော်တွေလည်း ဖူးမြော်နိုင်ပါတယ်။ အနီးအနားမှာ စိတ္တသုခကန်နဲ့ ရေတံခွန်လည်းရှိတယ်တဲ့။ ကော့ကသောင်ဂူဆီ မရောက်ဖူးသေးဘူး။ နောက်တစ်ခါ ကရင်ဘက်သွားရင်တော့ သွားကြည့်ဦးမယ်။ တခြားသူတွေ တင်ထားတာ ကော့ကသောင်ဂူ တဝိုက်လည်း သစ်ပင်တွေ အုံ့အုံ့ဆိုင်းဆိုင်းနဲ့ ရှုခင်းတွေလှပါတယ်။

(6) ရသေ့ပျံဂူ

ရသေ့ပျံဂူလို့ ခေါ်ရတဲ့ အကြောင်းကဒီလိုပါ။ ဂူအတွင်းမှာ မျက်နှာကျက်ကိုမော့ကြည့်ရင် ကောင်းကင်ကိုဖောက်ထွင်းမြင်ရတဲ့ အပေါက်တစ်ပေါက်ရှိပါတယ်။ ဒီအပေါက်ကနေ တရားထူးရတဲ့ ရသေ့ တစ်ပါးက တောင်ကိုဖေါက်ပြီး ကောင်းကင်ဆီ ဈာန်နဲ့ ပျံတက်သွားတဲ့ အပေါက်ပါတဲ့။ ဒါကြောင့် ရသေ့ပျံတောင်၊ ရသေ့ပျံဂူလို့ခေါ်တာပါတဲ့။
ရသေ့ပျံဂူမှာလည်း သမိုင်းဆိုင်ရာ အချက်အလက်တွေနဲ့ခေတ်အဆက်ဆက် ယဉ်ကျေးမှုတွေကိုပါ လေ့လာနိုင်ပါတယ်။ သဘာဝကျောက်လိုဏ်ဂူထဲမှာ ရှေးဟောင်းနံရံအုတ်ခွက်ဘုရားတွေနဲ့ ရှေးဟောင်း ရုပ်ပွားတော်တွေရှိတာကြောင့်ပါ။ ဂူအဝက၇၅ပေသာ ကျယ်ပေမယ့် ဂူတွင်းမှာ ပေ ၁၅၀ခန့်ထိကျယ်ဝန်းပါတယ်။

တည်နေရာကတော့ ကော့ဂွန်းဂူလမ်းအတိုင်းသွားရင် ရောက်နိုင်ပါတယ်။

တခြားလည်ပတ်စရာနေရာတွေ

တောင်တက်နိုင်တယ်ဆိုရင် ဇွဲကပင်တောင်နဲ့ တောင်ဝိုင်းကိုတက်ပါ။ ဇွဲကပင်တောင်ကလှေကားထစ်တွေများပြီး တောင်ဝိုင်းကတော့ လမ်းကြမ်းပါတယ်။ တောင်တွေပေါ်ကမြင်ရတဲ့ ရှုခင်းကတော့ အရမ်းလှပါတယ်။


ရေကန်ကြီးထဲမှာ ကျောက်ကလပ်လို ဖြစ်နေတဲ့ တောင်ပေါ်စေတီတည်ထားတဲ့ ကျောက်ကလပ်စေတီလည်း ရှုခင်းအရမ်းလှပါတယ်။ ရွှေရင်မျှော်စေတီနဲ့ လုမ္မနီဥယျာဉ်ကဘုရားစေတီတွေလည်း ဖူးမြော်နိုင်ပါတယ်။


အရမ်းလှတဲ့ ကျုံထော်ရေတံခွန်မှာ ရေကစားပြီး ချစ်သူမြိုင်ပန်းခြံနဲ့ လွန်းညရေပြာအိုင်တို့လည်း သွားလည်နိုင်ပါတယ်နော်။



With Love,
Ma Nu Myat

ရဲတိုက်များစွာရှိသည့် ဝေလနိုင်ငံ

ရဲတိုက်များစွာရှိသည့် ဝေလနိုင်ငံ


ယူနိုက်တက်ကင်းဒမ်း(ယူကေ)နိုင်ငံတစ်ခု ဖြစ်သည့် ဝေလ (Wales) နိုင်ငံသည် ရင်သပ်ရှုမောဖွယ် အမျိုးသားဥယျာဉ်များ၊ တောင်တန်းများ၊ ကြီးကျယ်ခမ်းနားသော ရဲတိုက်များ၊ လှပသော ရှုခင်းများကြောင့် ခရီးသွားများကြား ကျော်ကြားလှသည်။ ၎င်းသည် ဂရိတ်ဗြိတိန်ကျွန်း၏ အနောက်တောင်ဘက်တွင်ရှိကာ အရှေ့ဘက်တွင် အင်္ဂလန်နိုင်ငံနှင့် နယ်နိမိတ်ချင်း ထိစပ်နေသည်။ အနောက်မြောက်ဘက်တွင် အိုင်းရစ်ပင်လယ်ခြားကာ အိုင်ယာလန် သမ္မတနိုင်ငံရှိပြီး တောင်ဘက်တွင် Bristol ရေလက်ကြား ရှိသည်။ လန်ဒန်မြို့မှ ကားဖြင့်မောင်းပါက နှစ်နာရီသာကြာရောက်သည့်နေရာတွင်ရှိသဖြင့် လန်ဒန်သွားလည်ရင်း သွားလေ့ရှိကြသည်။ စာရေးသူကိုယ်တိုင်လည်း ဝေလနိုင်ငံသို့ လန်ဒန်မှ သွားရောက်ခဲ့ခြင်းဖြစ်သည်။


ဝေလနိုင်ငံတွင် သိုးအုပ်များကို နေရာတိုင်းလိုလိုတွေ့နိုင်ပြီး လူများထက် သိုးများ ပိုများသည်။ နိုင်ငံတွင်း လူဦးရေ ၃ သန်းသာရှိသော်လည်း သိုးကောင်ရေ ၁၀ သန်းထိ ရှိပေသည်။ မြို့ခြောက်မြို့သာရှိပြီး အကြီးဆုံးမြို့နှင့် မြို့တော်မှာ ကာဒစ်ဖ်မြို့ဖြစ်ကာ လူဦးရေပေါင်း ၃၆၀,၀၀၀ ရှိသည်။ ဤမြို့သည် ၁၉၅၅ ခုနှစ်တွင်မှ မြို့တော်ဖြစ်လာခဲ့သဖြင့် ဥရောပတွင် သက်တမ်းအနုဆုံး မြို့တော်ဖြစ်သည်။ ၎င်း၏ ခမ်းနားထည်ဝါသော ဈေးဝယ်စင်တာများနှင့် သမိုင်းဝင်အဆောက်အအုံများစွာရှိကာ နိုင်ငံတွင်းအလှဆုံးရဲတိုက်ဖြစ်သည့် Cardiff ရဲတိုက်နှင့် ကာဒစ်(ဖ်) အမျိုးသားပြတိုက်လည်း ရှိသည်။ နိုင်ငံတွင်းရှိ အကြီးဆုံးပင်လယ်ကမ်းခြေအပန်းဖြေမြို့မှာ Llandudno မြို့ဖြစ်သည်။ St Davids မြို့သည် ဗြိတိန်တွင် အသေးငယ်ဆုံးမြို့ဖြစ်ကာ လူဦးရေ ၂၀၀၀ ထက်နည်းသည်။


ဝေလနိုင်ငံကို ၎င်း၏နာမည်ကျော် စောင်းဆရာများ၊ အဆိုပညာရှင်များနှင့် တစ်ကိုယ်တော် အနုပညာရှင်များကြောင့် ‘သီချင်းပြည်’ ဟု မကြာခဏ ရည်ညွှန်းလေ့ရှိသည်။ နိုင်ငံတော်အလံသည် အခြားနိုင်ငံတော်အလံများနှင့်မတူဘဲ တစ်မူထူးခြားကာ ဝေလနယ်၏ သင်္ကေတဖြစ်သည့် နဂါးကြီးတစ်ကောင် ရေးဆွဲထားသည်။


ဝေလနိုင်ငံတွင် စိမ်းလန်းသာယာသောရှုခင်းများပိုင်ဆိုင်ထားပြီး Pembrokeshire Coast အမျိုးသားဥယျာဉ်၊ Snowdonia အမျိုးသားဥယျာဉ်နှင့် Brecon Beacons အမျိုးသားဥယျာဉ်ဟူသော အမျိုးသားဥယျာဉ် ၃ ခုရှိကာ ၎င်းတို့မှာ နိုင်ငံ၏ ငါးပုံတစ်ပုံကို လွှမ်းခြုံထားသည်။ အမြင့်ဆုံးတောင်မှာ ပင်လယ်ရေမျက်နှာပြင်အထက် ၃၅၆၀ ပေ အမြင့်ရှိ Snowdon တောင်ဖြစ်ပြီး တောင်ထိပ်သို့ လမ်းလျှောက်တက်နိုင်သလို ရထားနှင့်လည်း တက်နိုင်သည်။ နိုင်ငံ၏အကြီးဆုံး သဘာဝရေကန်မှာ ‘ငြိမ်သက်ခြင်း၏ရေကန်’ ဟု အဓိပ္ပါယ်ရသော Llyn Tegid ရေကန်ဖြစ်သည်။ ယူနိုက်တက်ကင်းဒမ်းတွင် လာရောက်လည်ပတ်မှု အများဆုံးရေတံခွန်ဖြစ်သည့် Swallow ရေတံခွန်လည်းရှိသလို ဂရိတ်ဗြိတိန်ကျွန်း၏ အနက်ဆုံးလှိုဏ်ဂူလည်း ရှိသည်။


ဝေလနိုင်ငံသည် ကမ္ဘာပေါ်ရှိ မည်သည့်နေရာထက်မဆို တစ်စတုရန်းမိုင်အတွင်းရှိ ရဲတိုက်အရေအတွက် ပိုများသည်။ နေရာတိုင်းတွင် ရဲတိုက်များရှိသည်။ ဝေလပြည်နယ်တွင် ရဲတိုက်အချို့ ပြိုကျပျက်စီးနေသော်လည်း ယနေ့ထက်ထိ ရဲတိုက်ပေါင်း ၆၀၀ ကျော်ရှိနေသေးသည်။ Caerphilly သည် အကြီးဆုံးရဲတိုက်ဖြစ်ပြီး အင်္ဂလန်ရှိ Windsor ရဲတိုက်ပြီးနောက် ဥရောပတွင် ဒုတိယအကြီးဆုံးရဲတိုက်လည်းဖြစ်သည်။ ဥရောပတွင် ထိန်းသိမ်းမှုအကောင်းဆုံး အလယ်ပိုင်းခေတ် ရဲတိုက်တစ်ခုဖြစ်သည့် Caernarfon ရဲတိုက်ကြီး၊ Conwy မြို့ရှိ Conwy ရဲတိုက်ကြီးနှင့် Pembrokeshire ကမ်းရိုးတန်းရှိ Pembroke ရဲတိုက် တို့သည်လည်း ထင်ရှားသည်။


ထို့ပြင် တံတား သုံးခု ကပ်ရပ်တည်ရှိနေသည့် Devil’s Bridge၊ အီတလီ ငါးဖမ်းရွာလေးကဲ့သို့ ဖန်တီးတည်ဆောက်ထားသည့် Portmeirion ဟိုတယ်၊ ရှုခင်းလှပသာယာသည့် Beddgelert နှင့် Betws-y-Coed ရွာနှစ်ရွာ၊ အလှဆုံး ဥယျာဉ်တစ်ခုဖြစ်သည့် Bodnant ဥယျာဉ်ကြီး၊ Caernarfon ရှိ အမျိုးသားကျောက်တုံးပြတိုက်၊ ယူနက်စကို၏ ကမ္ဘာ့အမွေအနှစ်နေရာဖြစ်သည့် Pontcysyllte Aqueduct နှင့် Llangollen တူးမြောင်းတို့သည်လည်း ဝေလနယ်၏ နာမည်ကျော်နေရာများဖြစ်သည်။


ဒေါက်တာနုမြတ်သိင်္ဂ ီဦး

Myanmar’s Petra or မုံရွာက ရွှေဘတောင်

မုံရွာက ရွှေဘတောင်

မုံရွာက ရွှေဘတောင်ကို မြန်မာနိုင်ငံက Petra လို့ပဲ တင်စား ပလိုက်ချင်တယ်
ကမ္ဘာ့အံ့ဖွယ်တစ်ပါးဖြစ်တဲ့ ဂျော်ဒန်နိုင်ငံက ပီထရာမြို့ဟောင်းလိုပဲ ရွှေဘတောင်က ကျောက်တောင်နံရံတွေမှာ အဆောက်အအုံတွေကို ထွင်းထုထားတာ အရမ်းလက်ရာမြောက်တာပဲ

edf
edf

သူက ဖိုလ်ဝင်တောင်နားမှာရှိလို့ ဖိုလ်ဝင်တောင်နဲ့ တစ်ဆက်တည်းသွားလို့ရတယ်
ရိုးရိုးမြေနီလမ်းကြားလေးကနေ ကျောက်နံရံကြီးတွေကြားထဲဗြုန်းခနဲရောက်သွားတော့ အံ့အားသင့်စရာပေါ့
ကျောက်တောင်ကြီးတွေကို ထက်ခြမ်းပိုင်းထားသလိုဖြစ်နေတဲ့ ကြားထဲက ကျောက်လှေကားထစ်တွေအတိုင်း ဆင်းသွားတဲ့အခါ လှပတဲ့ အဆောက်အအုံ၂ခုကို တစ်ဖက်တစ်ချက်မှာတွေ့လိုက်ရတယ်

IMG_20170826_141309-01-01
ဆန်းတာက အဲ့အဆောက်အအုံတွေက ကျောက်တောင်ကြီးကို ထွင်းထုထားတာတဲ့
ပိုဆန်းတာက အဲ့လို လက်ရာမြောက် ကျောက်နံရံထွင်း အဆောက်အအုံကြီးတွေ အထဲမှာ အများကြီးပဲ
ဘုရားတည်ထားတဲ့ အဆောင်တွေ၊ ရဟန်းတွေ သီတင်းသုံးတဲ့ အဆောင်တွေ၊ လူတည်းမဏ္ဏပ်တွေ၊ မီးဖိုခန်းတွေနဲ့ ကျောင်းဝင်းကျယ်ကြီးတစ်ခုစာလောက်ကျယ်တယ်

ဆင်းတုတွေ၊ ရုပ်တုတွေ၊ ဆင်ဝင်တွေ၊ ကနုတ်ပန်းတွေနဲ့ မြင်မြင်သမျှအရာရာတိုင်းက ကျောက်တောင်ကြီးကိုထွင်းထုထားတာပါတဲ့
အနော်ရထာမင်းကြီးနဲ့ ခေတ်ပြိုင် ဗန္ဓဝမင်းကြီးလက်ထက်က ပန်းချီဝန် ဦးရွှေဘ ဦးစီးကာစိတ်ကူးပုံဖော်ထားလို့ ရွှေဘတောင်လို့ခေါ်တာပါတဲ့။

edf
edf

ဒီလောက် ဆန်းကြယ်လှပပြီး လက်ရာမြောက်တဲ့ သမိုင်းဝင်ရှေးဟောင်းနေရာက ဘာကြောင့်လူသိသိပ်မများရတာပါလိမ့်??
နိုင်ငံခြားမှာဆို ပြစားလို့ ကောင်းလိုက်မယ်ဖြစ်ခြင်း

edf
edf