ကမ္ဘာ့အကျော်ကြားဆုံး ခရီးသွားနေရာတစ်ခု ဖြစ်လာသည့်ဥရောပရှိ မော်လ်တာကျွန်းနိုင်ငံ Malta

November 26, 2022March 2, 2023Posted in Europe, malta, Natural Wonder, Travel, UncategorizedTagged Europe, Heritage, malta, Natural wonderLeave a comment

မော်လ်တာနိုင်ငံသည် အီတလီနိုင်ငံတောင်ပိုင်း မြေထဲပင်လယ်ရှိ ကျွန်းပေါင်း ၅ ကျွန်းနှင့် ဖွဲ့စည်းထားသည့် ဥရောပကျွန်းနိုင်ငံဖြစ်သည်။ စတုရန်းမိုင်ပေါင်း ၁၂၂ မိုင် ကျယ်ဝန်းပြီး ကမ္ဘာ့ဒဿမအသေးဆုံးနိုင်ငံဖြစ်ကာ လူဦးရေအားဖြင့် ငါးသိန်းကျော်ရှိသဖြင့် ကမ္ဘာ့ပဉ္စမလူဦးရေသိပ်သည်းမှုအများဆုံးနိုင်ငံဖြစ်သည်။ လူဦးရေသိပ်သည်းမှုများသလို နိုင်ငံနေဦးရေထက် လာလည်သည့် ဧည့်သည်ဦးရေက သုံးဆပိုများသဖြင့် နိုင်ငံအတွင်း အမြဲလိုလို လူစည်ကားလျှက်ရှိပါသည်။ မကြာသေးမီက စာရေးသူတို့ မော်(လ်)တာနိုင်ငံသို့ ရောက်ခဲ့သည့်အခါမှာလည်း နွေရာသီဖြစ်သဖြင့် ကမ္ဘာလှည့်ခရီးသွားများ အထူးစည်ကားလျှက်ရှိသည်ကို မြင်တွေ့ခဲ့ရပေသည်။

မော်လ်တာနိုင်ငံ၏ စီးပွါးရေးသည် ခရီးသွားလုပ်ငန်းအပေါ် အဓိက မှီခိုနေပါသည်။ နိုင်ငံတွင်း သမိုင်းဝင်အဆောက်အအုံများရှိရုံသာမက နွေးထွေးသောရာသီဥတု၊ စိမ်းပြာလဲ့နေသော ပင်လယ်ပြင်တို့ကြောင့် ကမ္ဘာလှည့်ခရီးသည်များစွာလာရောက်လည်ပတ်လေ့ရှိကြသည်။ ထို့ကြောင့် နောက်ပိုင်းနှစ်များအတွင်း ကမ္ဘာ့အကျော်ကြားဆုံး ခရီးသွားနေရာတစ်ခုအဖြစ်သို့ မြန်မြန်ဆန်ဆန် ရောက်ရှိလာပြီဖြစ်သည်။

နိုင်ငံတွင်း ခရီးသွားများရသည့် အဓိကအချက်မှာ ရာသီဥတုမျှတခြင်းကြောင့်ဖြစ်သည်။ International Living ၏ မှတ်ချက်အရ မော်လ်တာနိုင်ငံသည် ကမ္ဘာ့ရာသီဥတုအမျှတဆုံးနိုင်ငံဖြစ်သည်။ တစ်နှစ်အတွင်း နေရောင်ခြည် နာရီပေါင်း ၃၀၀၀ ကျော်ရသဖြင့် မည်သည့်ရာသီဥတုမဆို လည်ပတ်ရ အဆင်ပြေသည်။

ဒုတိယတစ်ချက်မှာ ကြည်လင်သန့်ရှင်းသော ပင်လယ်ရေပြင်ရှိသောကြောင့်ဖြစ်သည်။ ကိုမီနိုကျွန်းရှိ ရေပြာအိုင်သည် အကျော်ကြားဆုံးနေရာတစ်ခုဖြစ်သည်။ ရေငုပ်ခြင်းအတွက် အထူးသင့်လျှော်ကာ မြေထဲပင်လယ်တွင်း ပင်လယ်အောက် ငါးများနှင့် သန္တာကျောက်တန်းများကြည့်ခြင်း၊ ပင်လယ်ထဲမြုပ်နေသော သင်္ဘောပျက်များ၊ လေယာဉ်ပျက်များကို ကြည့်ရှုခြင်းတို့ပြုလုပ်နိုင်ပါသည်။

တတိယတစ်ချက်မှာ ဥရောပနိုင်ငံသားများအတွက် သွားလာရလွယ်ကူခြင်းကြောင့်ဖြစ်သည်။ အီတလီနိုင်ငံမှ တစ်နာရီလောက်သာ လေယာဉ်စီးရသလို မည်သည့်ဥရောပနိုင်ငံကမဆို လေယာဉ်စီးချိန် သုံးနာရီအောက်သာ ကြာပါသည်။
စတုတ္ထအချက်မှာ ရှေးဟောင်းအဆောက်အအုံများစွာရှိသည့် သမိုင်းဝင်နေရာဖြစ်ခြင်းကြောင့် ဖြစ်သည်။ မော်လ်တာနိုင်ငံတွင် ၅၉၀၀ ဘီစီကတည်းက လူများအခြေချနေထိုင်ခဲ့ကြကာ မြေထဲပင်လယ် အလယ်တွင် တည်ရှိနေခြင်းကြောင့် ရေတပ်အခြေစိုက်စခန်း စခန်းချရာနေရာအဖြစ် အခြားနိုင်ငံများမှ ခေတ်အဆက်ဆက် မျက်စိကျခဲ့ကြသည်။ နှစ်ပေါင်း ၂၀၀၀ အတွင်း ရောမ၊ ဂရိ၊ အာရပ်၊ ပြင်သစ်၊ ဗြိတိန်အပါအဝင် နိုင်ငံခြားအုပ်ချုပ်သူပေါင်း ၁၁ မျိုးရှိခဲ့ပါသည်။ နောက်ဆုံး ဗြိတိန်လက်အောက်ခံနိုင်ငံအဖြစ် နှစ်ပေါင်း ၁၆၀ ကျော်ကြာ နေထိုင်ခဲ့ပြီးနောက် ၁၉၆၄ ခုနှစ်တွင်မှ လွတ်လပ်ရေး ရရှိခဲ့သည်။ နိုင်ငံတွင်း ရာစုနှစ်ပေါင်းများစွာ ဖြတ်သန်းခဲ့သည့် ကမ္ဘာ့အဆင့်မီ ဗိသုကာလက်ရာများစွာ ရှိလို့နေပါသည်။

မြို့တော် ဗလက်တာ (Valletta) သည် မြေထဲပင်လယ်ကမ်းရိုးတန်းတွင် ခံတပ်အခိုင်အမာ တည်ဆောက်ထားသော ရှေးဟောင်းမြို့ဖြစ်သည်။ European Union အတွင်း အသေးဆုံးမြို့တော်ဖြစ်ကာ ဥရောပတွင် ပထမဆုံး Plan ချခဲ့သည့် မြို့လည်းဖြစ်သည်။ ယူနက်စကိုကမ္ဘာ့အမွေအနှစ်နေရာအဖြစ် အသိအမှတ်ပြုခံရသည့် မြို့လည်းဖြစ်သည်။ ယင်းအပြင် Megalithic Temples of Malta နှင့် Half Saflieni Hypogeum မြေအောက်ဘုရားကျောင်းတို့သည်လည်း ယူနက်စကို ကမ္ဘာ့အမွေအနှစ်နေရာများဖြစ်ကြသဖြင့် မော်လ်တာတွင် ကမ္ဘာ့အမွေအနှစ်နေရာ သုံးခုရှိပါသည်။ ယင်းတို့အနက် လွန်ခဲ့သောနှစ်ပေါင်း ၅၀၀၀ ခန့်ကတည်းက ရှိခဲ့သည့် နာမည်ကျော် Megalithic ဘုရားကျောင်းသည် ကမ္ဘာ့သက်တမ်းအရင့်ဆုံး အလွတ်တည်နေသည့် ကျောက်တုံးအဆောက်အအုံများဖြစ်ကြပါသည်။

မော်လ်တာတွင် ခရစ်ယာန်ဘာသာဝင်များသလို ခရစ်ယာန်ဘုရားကျောင်းများစွာလည်း ရှိသည်။ နိုင်ငံသေးငယ်သော်လည်း ဘုရားကျောင်းပေါင်း ၃၆၅ ခုရှိသဖြင့် တစ်နှစ်ပတ်လုံး ဘုရားကျောင်းမထပ်ဘဲ နေ့စဉ်သွားရောက်နိုင်ပေသည်။ ယင်းတို့အနက် အကျော်ကြားဆုံးမှာ ဗလက်တာရှိ St. John’s Co-Cathedral ဘုရားကျောင်းဖြစ်သည်။ Sliema မြို့၊ ဒုတိယအကြီးဆုံး ဂိုဇိုကျွန်းပေါ်ရှိ ဗစ်တိုးရီးယားမြို့နှင့် Citadella ခံတပ်၊ Mdina ခံတပ်မြို့၊ Popeye ကျေးရွာ၊ Marsaxlokk ငါးဖမ်းရွာတို့သည် မော်လ်တာနိုင်ငံ၏ အထင်ကရနေရာများဖြစ်ကြပေသည်။ ဗလက်တာဆိပ်ကမ်းမှ လှမ်းမြင်ရသည့် Vittoriosa၊ Senglea နှင့် Cospicua မြို့သုံးမြို့သို့လည်း လှေစီးကာသွားရောက်လေ့ရှိကြပါသည်။

Nu Myat around the World

ကမ္ဘာ့အကြီးဆုံး ကျောင်းဆောင်ကြီး အန်ကောဝပ် (Angkor Wat)

April 30, 2022Posted in Asia, Heritage, TravelTagged angkor wat, cambodiaLeave a comment

အန်ကောဝပ်ဆိုတာ
⁃ ကမ္ဘာ့အကြီးဆုံး ဘာသာရေးကျောင်းဆောင်ကြီး
⁃ ကမ္ဘာ့ရှေးဟောင်းအံ့ဖွယ်ထဲကတစ်ခု
⁃ ကမ္ဘောဒီးယားနိုင်ငံရဲ့ Landmark
⁃ ခမာတို့ရဲ့အကောင်းဆုံး ဗိသုကာလက်ရာပါ
ကမ္ဘောဒီးယားနိုင်ငံရဲ့ အထွတ်အမြတ်ထားရာဖြစ်လို့ ကမ္ဘောဒီယား အလံမှာတောင် အန်ကောဝပ်ကျောင်းတော်ကြီးပုံကို ထည့်သွင်းပုံဖော်ထားပါတယ်

ကမ္ဘာ့အကြီးဆုံး ကျောင်းဆောင်ကြီး

ကမ္ဘောဒီးယားနိုင်ငံ ဆီယန်ရိ(ပ်) (Siem Reap) မြို့ရဲ့ လေးမိုင်အကွာမှာတည်ရှိတဲ့.. အန်ကောဝပ် (Angkor Wat) ဘုရားကျောင်းကြီးဟာ ကမ္ဘာ့အကြီးဆုံး ဘာသာရေးဆိုင်ရာအဆောက်အအုံကြီးပဲ ဖြစ်ပါတယ်။
အန်ကောဝပ် ဘုရားကျောင်းဝင်းက စတုရန်းမိုင်ပေါင်း ၂၄၈ မိုင်ထိကျယ်ဝန်းပါတယ်။ ကျောင်းတော်ကြီးဟာ ဘယ်လောက်တောင်ကြီးမားသလဲဆိုရင် တည်ဆောက်ခဲ့စဉ်က သဲကျောက်တုံး တန်ချိန် ၅ သန်းတောင် အသုံးပြုခဲ့ရပါတယ်။ ဒီပမာဏဟာ အီဂျစ်နိုင်ငံ ဂီဇာပိရမစ်ကြီး ဆောက်လုပ်တုန်းက အသုံးပြုခဲ့တဲ့ ပမာဏနဲ့အတူတူပဲတဲ့လေ။
ကျောင်းတော်ကြီးကို ခမာဘုရင် ဆာယာဗာမန် ၂ လက်ထက်မှာ အလုပ်သမားပေါင်း ၃ သိန်းကျော်၊ ဆင်စီးရေပေါင်း ၆၀၀၀ ကျော်နဲ့ စက်ပစ္စည်း အကူအညီတွေမပါဘဲ ၁၁၁၃ ခုနှစ်ကနေ ၁၁၅၀ ခုနှစ်အထိ ၃၅ နှစ်ကြာဆောက်လုပ်ခဲ့ရတာပါ။

ကမ္ဘာ့အမွေအနှစ်နေရာ

အန်ကောဝပ်က အစက ဟိန္ဒူဘုရားကျောင်းကြီးဖြစ်ပေမဲ့ ၁၂ ရာစုနှောင်းပိုင်းမှာ ဗုဒ္ဓဘာသာ ဘုရားကျောင်းကြီးအဖြစ် ပြောင်းလဲကိုးကွယ်ခဲ့ကြပါတယ်။ နဂိုကတည်းက လက်ရာမြောက်ခဲ့တဲ့ ကျောင်းတော်ကြီးမှာ ဗုဒ္ဓဆင်းတုတော်တွေ ထပ်မံထည့်သွင်းကာ အခုအချိန်အထိ ကိုးကွယ်နေဆဲဖြစ်ပါတယ်။ ဟိန္ဒူဘာသာရော ဗုဒ္ဓဘာသာအရပါ အရေးပါတဲ့ အဆောက်အအုံဖြစ်တာကြောင့် ၁၉၉၂ ခုနှစ်မှာ UNESCO က ကမ္ဘာ့အမွေအနှစ်နေရာအဖြစ် သတ်မှတ်ခဲ့ပါတယ်။

ခမာတို့ရဲ့အကောင်းဆုံး ဗိသုကာလက်ရာ

ဘုရားကျောင်းကြီးရဲ့ အောက်ခြေပင်မအဆောက်အအုံကနေ ကြာဖူးငါးဖူးထိုးထွက်နေသလို တိုင်ငါးတိုင်ထိုးထွက်နေပြီး ခလယ်ရှိအမြင့်ဆုံးတိုင်က အမြင့်ပေ ၂၁၃ပေရှိပါတယ်။ ဘုရားကျောင်းကြီးက လက်ရာမြောက်လွန်းတာကြောင့် ခမာဗိသုကာလက်ရာကို အကောင်းဆုံးကိုယ်စားပြုတဲ့ ကျောင်းတော်ကြီးလို့လည်း ပြောလို့ရပါတယ်။ ဘုရားကျောင်းနံရံတွေမှာ ဟိန္ဒူဘာသာရဲ့ ဇာတ်နိပါတ်တော်တွေကို ပုံဖော်ထုဆစ်ထားတာလည်းတွေ့ရပါတယ်။

အနောက်ဘက်ကို မျက်နှာလှည့်

ဒါ့အပြင် ကျောင်းတော်ကြီးဟာ ကမ္ဘောဒီးယားမှာရှိတဲ့ တခြားဘုရားကျောင်းတွေ၊ တခြား ဟိန္ဒူဘုရားကျောင်းတွေနဲ့ မတူဘဲ အနောက်ဘက်ကို မျက်နှာလှည့်ထားတာ တွေ့ရပါတယ်။ အနောက်အရပ် နတ်ဘုရားဖြစ်တဲ့ ဟိန္ဒူနတ်ဘုရား ဗစ်(ရှ)နူးကို ရည်ရွယ်ပြီး ဆောက်ထားတာကြောင့် ဖြစ်နိုင်ပါတယ်။ အနောက်ဘက်အရပ်ကို မျက်နှာမူနေတာကြောင့်လည်း ညနေစောင်း နေရောင်နဲ့ ပိုလှပခမ်းနားလို့ နေဝင်ချိန်မှာ ဧည့်သည်တွေနဲ့ အထူးစည်ကားလျှက်ရှိပါတယ်။

အန်ကောဝပ်အမည် အဓိပ္ပါယ်

အန်ကောဝပ် (Angkor Wat) ဆိုတဲ့နာမည်ကို ခမာဘာသာကနေ ပြန်ဆိုရမယ်ဆိုရင်
⁃ Angkor ဆိုတာ City
⁃ Wat ဆိုတာ Temple ဆိုတော့
“City of Temple (ဘုရားကျောင်းမြို့တော်)” လို့ အဓိပ္ပါယ်ရပါတယ်။ မြို့တော်ဆိုတဲ့အတိုင်း အန်ကောဝပ်ကျောင်းဝင်းကြီးကို ကျုံးတွေ မြို့ရိုးတွေ ပတ်လည်ဝိုင်းထားတာတွေ့ခဲ့ရပါတယ်။

နိုင်ငံတော်အလံမှာ ထည့်သွင်းထား

အန်ကောဝပ်က ကမ္ဘာလှည့်ခရီးတွေ ကမ္ဘောဒီးယားနိုင်ငံဆီလာရောက်လည်ပတ်ကြတဲ့ အဓိကအကြောင်းရင်းဖြစ်ပြီး နိုင်ငံသားတွေ အလွန်ဂုဏ်ယူလွန်းတာကြောင့် နိုင်ငံတော်အလံမှာ အန်ကောဝပ်အဆောက်အအုံပုံကို ထည်းထည်းကြီး ထည့်သွင်းထားပါတယ်။
အထင်ကရ အဆောက်အအုံပုံကို အလံမှာ ဒီလို ထင်ထင်ရှားရှား ထည့်ထားတာဆိုလို့ ကမ္ဘောဒီးယားနဲ့ အာဖဂန်နစ္စတန် နှစ်နိုင်ငံသာရှိပါတယ်။ San Marino၊ စပိန်နဲ့ ပေါ်တူဂီအလံတို့မှာတော့ ရဲတိုက်ပုံတွေ၊ မျှော်စင်ပုံတွေ ပါနေပါတယ်။

Dr. Nu Myat Theingi Oo

Nu Myat around the World

ကမ္ဘာ့မြောက်ဘက်အကျဆုံးမြို့တော် ရေခါဗစ်(ခ်)

March 24, 2022March 23, 2022Posted in Europe, Natural Wonder, Travel, Uncategorized1 Comment

ကမ္ဘာ့မြောက်ဘက်အကျဆုံးမြို့တော် ရေခါဗစ်(ခ်)

အိုက်စလန်နိုင်ငံသည် မီးတောင်ရှင်များ၊ ရေခဲမြစ်များ၊ ရေပူစမ်းများနှင့် မြေမျက်နှာသွင်ပြင် ဆန်းကျယ်လှသည်။ အိုက်စလန်နိုင်ငံ၏ မြို့တော်မှာ ရေခါဗစ်(ခ်) (Reykjavik) မြို့ဖြစ်ပြီး ကမ္ဘာ့မြောက်ဘက်အကျဆုံး မြို့တော်ဖြစ်သည်။ အာတိတ်စက်ဝိုင်းအောက် လတ္တီကျု ၂ ဒီဂရီသာ ရောက်သောကြောင့် ဆောင်းတွင် နေ့တာတိုပြီး နွေတွင် နေ့တာရှည်လျားလှသည်။ ဆောင်းတွင်းတွင် နေရောင်ခြည် လေးနာရီလောက်သာ ရပေမဲ့ နွေရာသီတွင်တော့ ၂၁ နာရီလောက်ထိ ရနေတတ်ပါသည်။

ရေခါဗစ်(ခ်)သည် မြို့တော်ဖြစ်သော်ငြား လူပေါင်း ၁သိန်း ၂သောင်းကျော်သာနေထိုင်သည့် မြို့ငယ်လေးဖြစ်သည်။ အိုက်စလန်နိုင်ငံတွင် လူဦးရေနည်းပါးပြီး တစ်နိုင်ငံလုံးမှာ လူဦးရေ ၃သိန်းခွဲကျော်သာရှိသဖြင့် မြို့တော်နေလူဦးရေမှာနည်းသော်လည်း တစ်နိုင်ငံလုံး၏ သုံးပုံတစ်ပုံရှိနေပါသည်။ ရေခါဗစ်(ခ်)သည် ရိုးရာယဉ်ကျေးမှုနှင့် ယဉ်ကျေးမှုပေါင်းစုံသောမြို့ဖြစ်သည်။ အခြားမြို့ပြများကဲ့သို့ပင် ရေခါဗစ်(ခ်)မြို့သို့ ကမ္ဘာအနှံ့မှလူများ လာရောက်နေထိုင်လုပ်ကိုင်ကြပြီး လူမျိုးစု ၁၃၁ စုရှိကာ မြို့နေလူဦးရေ၏ ၈.၅% ရှိသည်။

အိုက်စလန်က လူဦးရေနှင့်ယှဉ်လျှင် စာအုပ်အများဆုံးထွက်ရှိရာ နိုင်ငံဖြစ်ပြီး နိုင်ငံသားဆယ်ယောက်မှာ တစ်ယောက်လောက်က ဘဝတစ်သက်တာမှာ စာအုပ်တစ်အုပ်လောက်တော့ ရေးသားထုတ်ဝေဖူးကြသည်။ ထို့ကြောင့် မြို့တော် ရေခါဗစ်(ခ်)ကို စာပေမြို့အဖြစ် ယူနက်စကိုက အသိအမှတ်ပြုခဲ့ခြင်းဖြစ်သည်။ ထိုသို့အသိအမှတ်ပြုခံရသည်မှာ အင်္ဂလိပ်ဘာသာစကား မပြောသည့်နိုင်ငံများအနက် ပထမဆုံးဖြစ်သည်။

ရေခါဗစ်(ခ်) (Reykjavik) ဆိုသည့်အမည်မှာ “မီးခိုးအူသော ပင်လယ်အော်”ဟု အဓိပ္ပါယ်ရသည်။ ရေပူစမ်းများက ထွက်သည့် အငွေ့များကြောင့် ထိုအမည်တွင်ခဲ့ခြင်းဖြစ်မည်။ မြို့နှင့် ၃၁ မိုင်အကွာရှိ ရေပြာအိုင် (Blue Lagoon)က ခရီးသည်များအကြား ပေါ်ပြူလာဖြစ်ကာ ရေပူစမ်းစိမ်ရန် သွားလေ့ရှိကြပါသည်။

ရေခါဗစ်(ခ်)သည် ကမ္ဘာပေါ်တွင် သဘာဝပတ်ဝန်းကျင် အထိန်းသိမ်းဆုံးမြို့တစ်မြို့ဖြစ်သည်။ အိုက်စလန်၏ စွမ်းအင်လိုအပ်ချက်၏ ၈၅% ကို ပြန်လည်ပြည့်ဖြိုးမြဲစွမ်းအင် အရင်းအမြစ်များဖြစ်သည့် ဘူမိအပူစွမ်းအင် (၆၅%) နှင့်ရေအားလျှပ်စစ် (၂၀%) တို့မှ ရရှိသည်။

ရေခါဗစ်(ခ်)မြို့ကို ကြောင်များ၏မြို့တော်ဟုလည်း သိကြပါသည်။ အဘယ်ကြောင့်ဆိုသော် ၁၉၂၄ ခုနှစ်မှ ၁၉၈၄ ခုနှစ်ထိ နှစ် ၆၀ ကာလအတွင်း မြို့တွင်ခွေးများကိုပိတ်ပင်တားမြစ်ထားပြီး ၂၀၀၆ ခုနှစ်အထိ ပိတ်ပင်မှုကို လုံးဝမရုပ်သိမ်းသေးပါ။ ခွေးများကို ပိတ်ပင်တားမြစ်ထားသဖြင့် ကြောင်များကိုသာ မွေးမြူခဲ့ကြပြီး မြို့တွင်းကြောင်များစွာ ရှိလို့နေခြင်းဖြစ်သည်။
ရေခါဗစ်(ခ်)မြို့ကို ပက်ဖင်းငှက်များ၏မြို့တော်ဟုလည်း သိကြသည်။ အိုက်စလန်သည် အတ္တလန္တိတ်ပင်လယ်ပျော်ငှက် ပက်ဖင်းငှက်မျိုး၏ အကြီးမားဆုံးနှင့် အရေးအပါဆုံး အသိုက်နေရာ တစ်ခုဖြစ်ကာ ထိုငှက်အားလုံး၏ ခန့်မှန်းခြေ ၆၀% မှာ အိုက်စလန်တွင်နေထိုင်ကြသည်။ အထူးသဖြင့် ရေခါဗစ်(ခ်)မြို့ရှိ Faxafloi ပင်လယ်အော်တွင် အများဆုံးနေထိုင်လေ့ရှိကြသည်။ ထိုငှက်များသည် မြို့တော်သို့ ကမ္ဘာလှည့်ခရီးသည်များလာရောက်ရာ အဓိကဆွဲဆောင်မှုတစ်ခုဖြစ်သည်။

ရေခါဗစ်(ခ်)မြို့ရှိ အထင်ရှားဆုံးအဆောက်အအုံမှာ အမြင့်ပေ ၂၄၀ ပေရှိ Hallgrimskirkja ဘုရားကျောင်းဖြစ်သည်။ မီးတောင်မှထွက်သည့် ချော်ခဲတိုင်များကဲ့သို့ဆောက်ထားသည့် ထိုဘုရားကျောင်းကို ၄၁ နှစ်ကြာတည်ဆောက်ခဲ့ရပြီး ၁၉၈၆ ခုနှစ်တွင် ဖွင့်လှစ်နိုင်ခဲ့ပါသည်။ မြို့တွင်း အမြင့်ဆုံး အဆောက်အအုံဖြစ်ကာ တစ်နိုင်ငံလုံးတွင် ဒုတိယအမြင့်ဆုံးဖြစ်သည်။
မြို့ရှိ အခြားထင်ရှားသည့်အဆောက်အအုံဖြစ်သည့် Perlan သည် အပူချိန် ၁၈၅ ဒီဂရီဖာရင်ဟိုက်ရှိ ရေဂါလံသန်းတစ်သန်းကျော်ကိုယ်စီ သိုလောင်ထားသည့် ရေလှောင်ကန် ၆ခု ပေါ်ရှိ အမိုးခုံး အဆောက်အအုံဖြစ်သည်။ ထိုရေကန်များသည် မြို့အတွက် ရေထောက်ပံ့ပေးပြီး Perlan အမိုးခုံးပေါ်တွင် လည်နေသည့် မှန်များဖြင့်သာကားထားသည့် စားသောက်ဆိုင်တစ်ခုရှိကာ မြို့တော်၏ မြင်ကွင်းကျယ်ကို ရှုစားနိုင်ပါသည်။ အဆောက်အအုံထဲတွင် အိုက်စလန်အကြောင်းကောင်းစွာ လေ့လာနိုင်မည့်ပြတိုက်ရှိသလို လူလုပ်ရေခဲလှိုဏ်ဂူထဲသို့လည်း ဝင်ရောက်နိုင်ပါသည်။

မြို့ရှိအခြားထင်ရှားသော နေရာများမှာ Sun Voyager ရုပ်တု၊ ဂီတပွဲများကျင်းပရာ Harpa ခန်းမ အဆောက်အအုံ၊ ဆိပ်ကမ်းဟောင်း၊ အိုက်စလန်အမျိုးသားပြတိုက်၊ ရိုးရာအဆောက်အအုံများလေ့လာနိုင်သည့် Árbæjarsafn လဟာပြင်ပြတိုက်၊ ရေခါဗစ်(ခ်)ရေကြောင်းပြတိုက်၊ အိုက်စလန်သမိုင်းလေ့လာနိုင်သည့် Saga ပြတိုက်၊ အိုက်စလန်ဝေလငါးများပြတိုက်၊ Videy ကျွန်းငယ်၊ Tjörnin ရေအိုင်ပတ်လည်ရှိ အဆောက်အအုံများ၊ Nauthólsvík ရေပူစမ်းစိမ်ကမ်းခြေ၊ Bruarfoss ရေတံခွန်၊ Grotta မီးပြတိုက်တို့ ဖြစ်ကြသည်။

ထို့ပြင်မြို့မှတစ်ဆင့် သွားရောက်နိုင်သည့် ဥတ္တရအလင်းတန်းကြည့်ခရီးစဉ်၊ Golden Circle နေ့ချင်းပြန်ခရီးစဉ်၊ ဝေလငါးကြည့်ခရီးစဉ်၊ ပက်ဖင်းငှက်ကြည့်ခရီးစဉ်တို့ကိုလည်း သွားရောက်နိုင်ပါသည်။

ဒေါက်တာနုမြတ်သိင်္ဂီဦး

မြို့ထဲမှာ ကမ္ဘာ့အသေးဆုံးနိုင်ငံရှိနေတဲ့ ရောမမြို့

March 23, 2022August 7, 2022Posted in Europe, Heritage, Italy, TravelTagged culture, Europe, Nu Myat around the World, TravelLeave a comment

မြို့ထဲမှာ ကမ္ဘာ့အသေးဆုံးနိုင်ငံရှိနေတဲ့ #ရောမမြို့

ရောမ အင်ပါယာကြီးထွန်းကားရာ အီတလီနိုင်ငံ ရောမမြို့ကြီးက ရှေးဟောင်းအဆောက်အအုံတွေနဲ့ ထူးခြားနေပါတယ်။ ရောမမြို့ထဲမှာ နိုင်ငံတစ်နိုင်ငံပါရှိနေတယ်ဆို ပိုပြီးထူးဆန်းမနေဘူးလား

ဟုတ်ပါတယ်။ မြို့ထဲမှာ နိုင်ငံကြီးတစ်ခုလုံးတည်ရှိနေတာပါ။

အဲဒီနိုင်ငံကတော့ ဗာတီကန်စီးတီး (Vatican City) လို့ခေါ်ပြီး ကမ္ဘာ့အသေးဆုံးနိုင်ငံပါ။ ဘယ်လောက်သေးလဲဆိုရင် တစ်နိုင်ငံလုံးမှ ဝ.၁၇ စတုရန်းမိုင်သာ ကျယ်ဝန်းတာတဲ့လေ။ ပန်းဥယျာဉ်တစ်ခုစာလောက်ပဲရှိတာပေါ့။ လူဦးရေကလည်း ၁၀၀၀ တောင်မပြည့်ပါဘူး။

နိုင်ငံကသာ သေးတာ အဲဒီနိုင်ငံထဲက Saint Peter’s Basilica ဘုရားကျောင်းကတော့ ကမ္ဘာ့အကြီးဆုံး ဘုရားကျောင်းတဲ့လေ။ Vatican City နိုင်ငံအကြောင်းကို ပို့စ်သက်သက်တော့ တင်ထားဖူးပါတယ်။

ရောမမြို့မှာ ဒီအချက်အပြင် အခြားထူးခြားတဲ့အချက်တွေ၊ သမိုင်းဝင်အဆောက်အအုံတွေလည်း ရှိပါသေးတယ်။

နိုင်ငံထက် သက်တမ်းပိုရှည်တဲ့ ရောမမြို့

ရောမမြို့က ကမ္ဘာ့ရှေးအကျဆုံးမြို့တစ်မြို့ပါ။ ဘယ်လောက်တောင်ရှေးကျလဲဆိုရင် အခုလက်ရှိ အီတလီနိုင်ငံ (Republic of Italy) ထက်တောင် သက်တမ်း ၂၆၀၀ ကျော်ပိုရှည်တာပါ။ အီတလီနိုင်ငံကို ၁၈၆၁ ခုနှစ်မှ စတင်တည်ထောင်ခဲ့ပေမဲ့ ရောမမြို့ကိုတော့ ၇၅၃ ဘီစီက စတည်ထောင်ခဲ့တာတဲ့လေ။

တောင် ၇ လုံးပေါ်တည်ထားတဲ့ ရောမမြို့

ရောမတစ်မြို့လုံးက တောင်ကုန်း ၇ လုံးပေါ် တည်ထောင်ထားတာတာပါ။ Palatine တောင်ကုန်းပေါ်မှာ အရင်ဆုံးမြို့တည်ခဲ့တာလို့ သိရပါတယ်။

လမ်းများဦးတည်ရာ ရောမမြို့

ရှေးခေတ်ရောမလူမျိုးတွေက ရောမအင်ပါယာကို ချဲ့ထွင်ဖို့ အလွန်ကျယ်ပြန့်တဲ့ လမ်းကွန်ရက်ကို တည်ဆောက်ခဲ့ကြပါတယ်။ လမ်းကွန်ရက်ရဲ့အစက ရောမမြို့ဖြစ်လို့ “လမ်းအားလုံးသည် ရောမမြို့သို့ ဦးတည်သည်” ဆိုတဲ့ ဆိုရိုးစကားရှိခဲ့ပါတယ်။ ရောမအင်ပါယာအထွတ်အထိပ်ရောက်ချိန်က လမ်းကွန်ရက်ဟာ ၅၂,၅၈၇ မိုင် ရှည်လျားပြီး လန်ဒန်ကနေ အီဂျစ်အထိ ဖြန့်ကြက်ထားခဲ့တာတဲ့လေ။

လူနေထူထပ်တဲ့ ရောမမြို့

ရောမအင်ပါယာကြီးမားလာတာနဲ့အမျှ ရောမမြို့ထဲနေထိုင်တဲ့ လူဦးရေက တဖြည်းဖြည်းများလာပါတယ်။ ရောမမြို့က မြို့နေလူဦးရေ တစ်သန်းထိ ရှိလာတဲ့ ကမ္ဘာ့ပထမဆုံးမြို့ကြီးတဲ့လေ။ ရောမအင်ပါယာ လျှမ်းလျှမ်းတောက်ခဲ့တုန်းကဆို လူဦးရေ သန်း ၉၀ အထိတောင် နေထိုင်ခဲ့ကြတာပါ။ လက်ရှိမှာတော့ လူဦးရေ ၂.၈ သန်း နေထိုင်ကြပြီး အီတလီနိုင်ငံမှာ လူနေအထူထပ်ဆုံးမြို့ပါ။

ဧည့်လာများတဲ့ ရောမမြို့

ရောမမြို့ဟာ အီတလီနိုင်ငံမှာ ဧည့်သည်အလာဆုံးမြို့လည်းဖြစ်ပါတယ်။ ပုံမှန်အားဖြင့် တစ်နှစ်ကို ဧည့်သည် ၉ သန်းကျော် လာလည်လေ့ရှိကြပါတယ်။ ဥရောပမှာဆို လန်ဒန်နဲ့ပဲရစ်အပြီး တတိယဧည့်သည်အလာဆုံးမြို့ဖြစ်ပြီး ကမ္ဘာနဲ့ချီရင်တော့ နံပါတ် ၁၆ ချိတ်ပါတယ်။

မြေအောက်ရောက်နေတဲ့ ရောမမြို့

ရောမမြို့က အချိန်ကြာလာတာနဲ့အမျှ မြေအောက်ရောက်သွားပြီဖြစ်ကာ ယခုလက်ရှိ ထင်ရှားတဲ့ ရှေးဟောင်းအဆောက်အအုံတွေက ရောမအင်ပါယာရဲ့ အကြွင်းအကျန် အနည်းငယ်ပါ။ ရှေးဟောင်းရောမမြို့ရဲ့ ၁၀% ကိုသာ တူးဖော်တွေ့ရှိခဲ့တာဖြစ်ပြီး မြို့အများစုက မြေကြီးအောက်မှာ ကျန်ရစ်နေပါသေးတယ်။

ခရစ်ယာန်ဘုရားကျောင်းအများဆုံးရှိရာ ရောမမြို့

ရောမမြို့က ကမ္ဘာပေါ်မှာ ခရစ်ယာန်ဘုရားကျောင်းအများဆုံးရှိရာ မြို့ဖြစ်ပါတယ်။ ဘုရားကျောင်းပေါင်း ၉၀၀ ကျော်ရှိကာ အများစုက ခရစ်ယာန်ဘုရားကျောင်းတွေပါ။

ရေပန်းပေါင်း ၂၀၀၀ ကျော်ရှိတဲ့ ရောမမြို့

ရောမမှာ ရေပန်းပေါင်း ၂၀၀၀ ကျော် ရှိြပီး အများစုက သောက်ရေ အခမဲ့ပေးဝေနေတဲ့ ရေပန်းအသေးလေးတွေပါ။ လှပတဲ့ ရေပန်းကြီးတွေလည်းရှိပြီး နာမည်အကြီးဆုံးက Trevi Fountain နဲ့ Fontana della Barcaccia ရေပန်းတွေပါ။

ရောမမြို့ရဲ့ အထင်ကရနေရာများ

ရောမမြို့ထဲမှာ Vatican City နိုင်ငံနဲ့ ဘုရားကျောင်းအပြင် အခြား အထင်ကရနေရာတွေလည်း အများကြီး ရှိပါသေးတယ်။ အဲဒါတွေကတော့…

The Colosseum သားသတ်ကွင်း

The Colosseum သားသတ်ကွင်းက ရောမမြို့မှာ နာမည်အကြီးဆုံး အထင်ကရအဆောက်အအုံပါ။ ရှေးခေတ်အမိုးပွင့် ကဇာတ်ရုံကြီးဖြစ်ကာ ပွဲကြည့်ပရိသတ်ပေါင်း ၈၀၀၀၀ အထိ ဝင်ဆန့်ပါတယ်။ အဲဒီမှာ ငွေဝယ်ကျွန်တွေ အချင်းချင်းသော်လည်းကောင်း သားရဲတိရစ္ဆာန်တွေနဲ့သော်လည်းကောင်း တိုက်ခိုက်ခိုင်းတဲ့ Gladiator တိုက်ပွဲတွေ ကျင်းပလေ့ရှိပါတယ်။ Colosseum အကြောင်း ပို့စ်သက်သက်တင်ပေးပါဦးမယ်။

Pantheon ရိုမာန်ဘုရားကျောင်း

ရောမမြို့ရဲ့ အခြားထင်ရှားတဲ့ အဆောက်အအုံကတော့ Pantheon အမည်ရှိ ဧရာမရိုမာန်ဘုရားကျောင်းပါ။ နှစ်ပေါင်း ၂၀၀၀ ကျော်သက်တမ်းရှိကာ ယခုအခါ ကက်သိုလစ်ဘုရားကျောင်းအဖြစ် အသုံးပြုနေဆဲပါ။

The Roman Forum

The Roman Forum ကတော့ ရှေးခေတ်ရောမမြို့လည်ရှိ အဓိက ရင်ပြင်ပါ။ မူလက ဈေးအဖြစ်အသုံးပြုခဲ့ကာ အချိန်ကြာလာတာနဲ့အမျှ ရင်ပြင်တဖြည်းဖြည်းကြီးလာပြီး အထက်လွှတ်တော်နဲ့ စေတန်ကျောင်းဆောင်လို အဆောက်အအုံတွေတောင် တည်ဆောက်လာခဲ့ကြပါတယ်။ ယခုအခါ Roman Forum က အဆောက်အအုံတွေက ပြိုကျပျက်စီးနေပေမဲ့ ပြပွဲတွေ၊ ဟောပြောပွဲတွေ ကျင်းပနေဆဲပါ။

Trevi Fountain ရေပန်း

မြို့ထဲမှာရှိတဲ့ Trevi ရေပန်းထဲကို အနောက်ပြန်လှည့်ပြီး ရေပန်းထဲ အကြွေစေ့ပစ်ထည့်ကြပါတယ်။ ရေပန်းထဲ အကြွေတစ်စေ့ပစ်ရင် ရောမသို့ ပြန်လာရပြီး နှစ်စေ့နဲ့အထက်ပစ်ပါက ချစ်သူတွေ့မယ်ဆိုတဲ့ အယူရှိလို့ အကြွေစေ့တွေပစ်နေကြတာပါ။ ဘယ်လောက်တောင်လဲဆို ရေပန်းထဲ ပစ်ထည့်တဲ့အကြွေစေ့တွေပေါင်းရင် တစ်နှစ်ကို ယူရိုငွေ ၁.၃ သန်း တန်ဖိုးရှိတယ်တဲ့လေ။ အဲဒီငွေတွေကို လိုအပ်တဲ့နေရာတွေမှာ လှူဒါန်းပေးတယ်လို့ သိရပါတယ်။

ကမ္ဘာ့ပထမဆုံး ဈေးဝယ်စင်တာ

ရောမမြို့မှာ ကမ္ဘာ့ပထမဆုံး ဈေးဝယ်စင်တာလည်း ရှိပါတယ်။ ၁၁၀ အေဒီက တည်ဆောက်ခဲ့တဲ့ Trajan’s Market မှာ အထပ် ၂ ထပ်၊ ဆိုင်ခန်းပေါင်း ၁၅၀ ခန်းရှိခဲ့တာတဲ့လေ။

အားလုံးပဲ ကျန်းမာရွှင်လန်းပြီး ဘဝအမောတွေ ပြေပါစေ..

ချစ်ခင်လျှက်

Nu Myat

ဧရာဝတီမြစ်ဆုံဆီသို့

September 30, 2021March 2, 2023Posted in Asia, Kachin, Myanmar, Travel, UncategorizedLeave a comment

မြစ်ဆုံ တဲ့
❤️မေခနဲ့မေလိခဆုံတဲ့ နေရာလေး
❤️မြန်မာပြည်ရဲ့ အသက်သွေးကြော မိခင် ဧရာဝတီမြစ်ကြီး မွေးဖွားသန့်စင်ရာ နေရာလေး
❤️သဘာဝအလှတရားတွေ ပေါင်းစပ်ပြီး လှချင်တိုင်းလှနေတဲ့နေရာလေး
❤️” မေခနဲ့ မလိခဆုံတဲ့ ကမ်းနဘေးဝယ် အသည်းချင်းယှဉ်လျှက်တို့နှစ်ယောက်ချစ်ကမ္ဘာဝယ်” ဆိုတဲ့ ငယ်ငယ်ကကြားဖူးတဲ့ ပိုးဒါလီသိန်းတန် သီချင်းထဲက နေရာလေး
အဲ့နေရာလေးကို ၂၀၁၈ခုနှစ် နှစ်သစ်ရဲ့ ပထမဆုံးနေ့လေးမှာ သွားရောက်ခဲ့ရတယ်။ တကယ်အမှတ်တရပါပဲ။ Tango ရဲ့ မြစ်ကြီးနား-ပန်ဝါ-ထိန်ချုံး ခရီးစဉ်နဲ့အတူ ရောက်ဖြစ်ခဲ့တာပါ။

မြစ်ကြီးနားကနေ သွားကြမယ်

မြစ်ဆုံက ကချင်ပြည်နယ်ရဲ့မြို့တော် မြစ်ကြီးနားမြို့မြောက်ဘက် ၂၈မိုင်အကွာမှာ ရှိပြီး ကားနဲ့ဆို မြစ်ကြီးနားကနေ ၁နာရီကျော်လောက်မောင်းရပါတယ်။ ကားလမ်းကတော့ ဖြူးနေတာပဲ။ ကားလမ်းတလျှောက် ရွာတချို့နဲ့ မြစ်ဆုံစီမံကိန်းဝင်းကိုလည်း ကျော်ဖြတ်လာခဲ့ကြတယ်။ မြစ်ဆုံနေရာရောက်တဲ့အခါမှာ မြစ်ဆုံဆိုင်းဘုတ်နဲ့ အတူ စေတီတော်တစ်ဆူကိုလည်းလှမ်းဖူးမြော်ရပါတယ်။ ကားပါကင်ကနေတောင် မြစ်ဆုံကို အပေါ်စီးက လှမ်းမြင်ရတယ်။ တွေ့ရတဲ့မြင်ကွင်းက သိပ်လှတာပဲ။ မြစ်နှစ်ခုဆုံတဲ့ ကမ်းစပ်လေး မှာ ကျောက်စရစ်ခဲတွေအပြည့်။ ကျောက်စရစ်တွေပေါ် လူတွေကတော့ ဟိုတစ်စု ဒီတစ်စုနဲ့။ ကချင်ဝတ်စုံကိုယ်စီနဲ့ပေါ့လေ။

ကချင်ရိုးရာဝတ်စုံ
ကချင်ရိုးရာဝတ်စုံတွေကို မြစ်ဆုံကမ်းဘေးက စားသောက်ဆိုင်တန်းတွေမှာတင် ငှားရမ်းဝတ်ဆင်နိုင်ပါတယ်။ ငှားရမ်းခက တစ်စုံကို ၃၀၀၀ကျပ် ပဲပေးရတယ်။ သူတို့ဆီက ဓာတ်ပုံဆရာပါခေါ်ရိုက်မယ်ဆိုရင် ၂၀၀၀ ပဲပေးရတယ်။ ဝတ်စုံကို ဝတ်စုံပြည့် ငွေမောင်းတပ်ကတ္တီအ်အင်္ကျီအနက်ရောင်၊ ကချင်စကတ်တို့အပြင် ခါးကွင်း၊ ခေါင်းပေါင်း၊ ပလိုင်း၊ ဆွဲကြိုး အစုံအလင်ဆင်ပေးပါတယ်။ ကချင်စကတ်မှာ စကတ်အတို၊အရှည်၊ အလတ် အမျိုးမျိုးရှိတယ်။ နုမြတ်တို့က လူကများတော့ ရရာဆွဲဝတ်လိုက်တာ စကတ်လေးက နည်းနည်းတိုသွားတယ်။ နုမြတ်မေမေကတော့ စကတ်အရှည်လေးနဲ့။ ကချင်မကြီးနဲ့ ကချင်မလေး လှမှလှရယ်ပေါ့။ အဲ့မှာ ကိုယ်တွေဝတ်တဲ့ ဝတ်စုံအပြင် ဂါဝန်ကားကားလေးနဲ့ ချစ်စရာကောင်းတဲ့ လီဆူဝတ်စုံလည်းရှိပါတယ်။ ဘေဘီလေးတွေ ပဲများဖို့အတွက်လည်း မပူနဲ့။ ကလေးအရွယ် ကချင်ဝတ်စုံလေးတွေလည်း ရှိပါတယ်။

ဝတ်စုံဝတ်ရိုက်မယ်ဆိုရင်တော့ လူများရင်များသလို စောင့်ရပါတယ်။ ကိုယ်တွေတုန်းက လူများလို့ အော်ဒါအရင်မှာ စက်လှေအရင်စီးပြီး စောင့်လိုက်ရတယ်။ ပြီးတော့ ကိုယ့်ရှေ့ကလူတွေ ချွတ်တာနဲ့ တန်းဝတ်ရတာပါ။ ကိုယ်ကအသန့်ကြိုက်တယ်ဆိုရင်၊ ဒီထက်ပိုပြီးလှပသပ်ရပ်တဲ့ ဝတ်စုံပြည့်ဝတ်ချင်ရင် မြို့ထဲက ဆိုင်တွေမှာ တိုးဂိုက်ကို မေးပြီး ဌားလို့လည်းရပါတယ်။ ဌားခကတော့ ၁၅၀၀၀ လောက်ရှိတော့ မြစ်ဆုံကဆိုင်တွေမှာ ဌားတာထက် ၅ဆလောက်ပိုများပါမယ်။

သဘာဝပန်းချီကားချပ်

တစ်ဖက်မှာ မြစ်သုံးစင်းလုံးကို လှမ်းမြင်ရတဲ့ မြစ်ဆုံ၊ တစ်ဖက်မှာတော့ စိမ်းညှို့အုံ့မှိုင်းနေတဲ့တောင်တန်းတွေနဲ့ ရှုမျှော်ခင်း၊ အထက်မှာ ပြာလဲ့လဲ့မိုးကောင်းကင်၊ အောက်မှာတော့ ကျောက်စရစ်ကော်ဇောတွေခင်းထားတဲ့ သဘာဝရုပ်လုံးကြွ ပန်းချီကားချပ်ထဲ ဂျိန်းဖောတို့တတွေ ဓာတ်ပုံရိုက်မဆုံးဖြစ်နေကြတော့တာပေါ့။ မြစ်ဆုံရဲ့ ရေလေးတွေကလည်း ကြည်စိမ့်နေတာ။ မြစ်အောက်ကြမ်းပြင်တောင် လှမ်းမြင်ရတယ်။ ရေထဲ လက်နဲ့ ကိုင်ကြည့်လိုက်တော့ အေးစိမ့်နေတာပဲရော။ အင်းပေါ့လေ ရေခဲတောင်တွေကနေ စီးဆင်းလာတဲ့ ရေတွေပဲ။ ဒီလောက်တော့ အေးပေလိမ့်မပေါ့။

ဘယ်လိ ညာခ၊ မိနဲ့ဘ

“ဘယ်လိ-ညာခ”တဲ့ ဘယ်ဘက်ကနေ စီးဆင်းလာတာက မလိခဖြစ်ပြီး ညာဘက်ကနေ စီးဆင်းလာတာကတော့ မေခပါ။ အကယ်လို့များ မေခနဲ့ မလိခကသာ ဧရာဝတီရဲ့ မိဘ၂ပါးလို့ တင်စားမယ်ဆိုရင် မေခက ဖခင်၊ မလိခက မိခင်ဖြစ်လောက်တယ်။ ဘာကြောင့်လည်းဆိုတော့ မေခက ပိုကြမ်းပိုရမ်း ပိုရေစီးသန်တာကြောင့်ပါ။ မြန်မာနိုင်ငံမြောက်ဖျားက ဟိမဝန္တာရေခဲတောင်တန်းတွေကနေ တောင်စဉ်အသွယ်သွယ်ကျော်ဖြတ်ပြီး စီးဆင်းလာရတာခြင်းအတူတူ မေခမြစ်လေးက ပိုပြီး ရေစီးသန်ပါတယ်။ ဒါပေမဲ့ မြစ်ကြောင်း၂ခုပေါင်းဆုံရာ မြစ်ဆုံကနေစပြီး ဧရာဝတီမြစ်အဖြစ် တည်တည်ငြိမ်ငြိမ်လေး စီးဆင်းနေပါတော့တယ်။ နောက်ပိုင်းကျတော့ အဓိက ရေဝေမြစ်သုံးစီးဖြစ်တဲ့ ချင်းတွင်း၊ ရွှေလီနှင့် မြစ်ငယ်မြစ်တို့အပါအဝင် မြစ်လက်တက်တွေစီးဝင်တာကြောင့် အရှိန်အဟုန်ပြင်းလာတာပါ။

ဧရာဝတီ

ဧရာဝတီမြစ်က မြစ်စမြစ်ဆုံး မြန်မာနိုင်ငံတွင်းမှာပဲ စီးဆင်းလို့ ကိုယ်တွေချည်းပဲ သီးသန့်ပိုင်တဲ့ မြစ်ကြီးပါ။ မြန်မာနိုင်ငံရဲ့ အကြီးဆုံးမြစ်၊ အရှည်ဆုံးမြစ်ဖြစ်သလို အသက်သွေးကြောသဖွယ် တိုင်းပြည်ရဲ့အရေးအကြီးဆုံး ကူးသန်းရောင်းဝယ်ရေး ရေကြောင်းလမ်းလည်းပဲဖြစ်ပါတယ်။ နှင်းဖုံးတောင်လေးတွေကနေမြစ်ဖျားခံလာတဲ့ မြစ်လေး နှစ်စင်း ဆုံစည်းရာကနေ ဧရာဝတီမြစ်ကြီးက မြန်မာနိုင်ငံခလယ်ကနေ မြောက်မှတောင် မိုင်ပေါင်း ၁၃၀၀ ကျော်တိုင်တိုင် အားမာန်အပြည့်စီးဆင်းလာကာ နောက်ဆုံးမှာ အက်ဒမန်ပင်လယ်ထဲ စီးဝင်သွားတာ အံံအားသင့်စရာပါ။ ရာဇဝင်များရဲ့ သတို့သမီး ဧရာဝတီမြစ်ကြီး စတင်ဖြစ်ပေါ်ရာ မြစ်ဆုံနေရာလေးကို နှစ်သစ်ရဲ့ ပထမဆုံးနေ့လေးမှာ ရောက်ဖူးလိုက်ရတာ သိပ်ကျေနပ်မိပါတယ်။

၂၀၁၈ နှစ်သစ်မှာ Tango Travels & Tour -Myanmar နဲ့အတူ သွားခဲ့တဲ့ မြစ်ကြီးနား-ပန်ဝါ-ထိန်ချုံးခရီးစဉ် အကြောင်းမရေးခင် မြစ်ဆုံကပုံလေးတွေ လှလို့၊ ရိုက်ထားတာလည်း အများကြီးမို့လို့ မြစ်ဆုံကို ပို့စ်တစ်ခု သက်သက်ခွဲတင်လိုက်တာပါ။ မြစ်ဆုံအပြင် နှင်းတွေဖုံးလို့ နာမည်ကြီးလာတဲ့ တရုတ်နယ်စပ် ကချင်မြို့လေး ပန်ဝါနဲ့ လည်ပတ်စရာနေရာတွေ အများကြီးရှိတဲ့ ကချင်နယ်စပ် တရုတ်မြို့လေး ထိန်ချုံကိုပါ သွားလည်ခဲ့ပါသေးတယ်။ အဲ့ခရီးစဉ်အရှည်ကိုလည်း သေချာရေးပြီး အတွေ့အကြုံတွေ ဝေမျှပါဦးမယ်။

ချစ်တဲ့
နုမြတ်

ခရစ်ယာန်ဘာသာကို ပထမဆုံးကျင့်သုံးခဲ့သည့် အာမေးနီးယား Armenia

May 24, 2021August 7, 2022Posted in armenia, Asia, Heritage, Travel, UncategorizedTagged armenia, Asia, Europe, TravelLeave a comment

ခရစ်ယာန်ဘာသာကို ပထမဆုံးကျင့်သုံးခဲ့သည့် အာမေးနီးယား

Written and Photo by Dr. Nu Myat Theingi Oo

အာမေးနီးယားနိုင်ငံသည် ရှည်လျားသော သမိုင်းကြောင်း၊ လှပသောရှုခင်းများနှင့်ပြည့်စုံသည့် အာရှတိုက်အနောက်မြောက်ပိုင်းရှိ ကုန်းတွင်းပိတ်နိုင်ငံငယ်လေး ဖြစ်သည်။ အနောက်ဘက်တွင် တူရကီ၊ မြောက်ဘက်တွင် ဂျော်ဂျီယာ၊ တောင်ဘက်တွင် အီရန်၊ အရှေ့ဘက်တွင် အဇာဘိုင်ဂျန်၊ အနောက်တောင်ဘက်တွင် အဇာဘိုင်ဂျန်၏ကိုယ်ပိုင်အုပ်ချုပ်ခွင့်ရဒေသ Nakhchivan တို့နှင့် နယ်နိမိတ်ထိစပ်နေပါသည်။

အာမေးနီးယားသည် ကော့ကေးဆပ်တောင်တန်းကြီး၏ တောင်ဘက်တွင်တည်ရှိကာ တောင်ထူထပ်သောနိုင်ငံဖြစ်သည်။ ပျမ်းမျှအမြင့်သည် ပင်လယ်ရေမျက်နှာပြင်အထက် ပေ ၅၉၀၀ ဖြစ်ကာ မြေနိမ့်နိမ့်မရှိပါ။ တောင်ထူထပ်သောနိုင်ငံဖြစ်သည့်အားလျော်စွာ ရှုခင်းအမျိုးမျိုးနှင့် အသေးစား ရာသီဥတုအမျိုးမျိုးကို ဖန်တီးပေးနေသည်။ နိုင်ငံ၏အကျယ်အဝန်းမှာမူ ၁၁၄၈၄ စတုရန်းမိုင်သာ ကျယ်ဝန်းပါသည်။
အာမေးနီးယားသည် လူမျိုးစုတစ်စုတည်းဖြင့်သာ ဖွဲ့စည်းထားသည့် နိုင်ငံအနည်းငယ်အနက် တစ်ခုဖြစ်သည်။ လူဦးရေ၏ ၃% မှလွဲ၍ ကျန်လူဦးရေသည် အာမေးနီးယန်းလူမျိုးများဖြစ်သည်။ အာမေးနီးယားတွင် လူဦးရေပေါင်း ၃ သန်းရှိပြီး လက်ရှိတွင် နိုင်ငံတွင်းနေထိုင်သော အာမေးနီးယန်း လူမျိုးများထက် ပြင်ပသို့သွားရောက်နေထိုင်သူများ ပိုများပါသည်။ ၁၉၁၅ ခုနှစ် အာမေးနီးယား လူမျိုးတုံး သတ်ဖြတ်မှုတွင် အားမေးနီးယားလူမျိုး တစ်သန်းကျော် သေဆုံးခဲ့ပြီးနောက် ပထမကမ္ဘာစစ်အပြီးတွင် လူအများအပြားသည် နိုင်ငံတွင်းမှ ထွက်ပြေးခဲ့ခြင်းဖြစ်သည်။ အာမေးနီးယားလူမျိုးများသည် ချောမောလှပကာ ဆွဲဆောင်မှုရှိကြပြီး ကမ္ဘာကျော် ကာဒစ်ရှန်ညီအစ်မများသည် အာမေနီးယန်းသွေးနှောများဖြစ်ကြသည်။

အာမေးနီးယားသည် နှစ်ထောင်ပေါင်းများစွာ တည်ရှိခဲ့သည့် သက်တမ်းအရင့်ဆုံး ရှေးဟောင်းနိုင်ငံများအနက် တစ်ခုဖြစ်သည်။ အာမေးနီးယားတွင် တွေ့ရှိခဲ့သည့် ကမ္ဘာ့သက်တမ်းအရင့်ဆုံး သားရေဖိနပ်သည် ဘီစီ ၃၅၀၀ ကတည်းက ပြုလုပ်ခဲ့ခြင်းဖြစ်ကြောင်း သိရသည်။ အာမေးနီးယားသည် ခရစ်ယာန်ဘာသာကို ပထမဆုံးကျင့်သုံးခဲ့သောနိုင်ငံဖြစ်ပြီး ယနေ့ထိတိုင် ခရစ်ယာန်နိုင်ငံဖြစ်ဆဲဖြစ်သည်။ အေဒီ ၃၀၁ တွင် အာမေးနီးယား၌ ခရစ်ယာန်ဘာသာကို နိုင်ငံဘာသာအဖြစ် ပထမဆုံးသတ်မှတ်ခဲ့သည်။

ထောင်စုနှစ်များစွာသက်တမ်းရှိ ဘုန်းတော်ကြီးကျောင်းများမှသည် ပြိုလဲနေသော ဘုရားရှိခိုးကျောင်းများအထိ အာမေးနီးယားတွင် ခရစ်ယာန်ဘာသာ ဝတ်ပြုပူဇော်ရာ ကျောင်းပေါင်းများစွာ ရှိပါသည်။ ထို့ကြောင့်လည်း “ဘုရားကျောင်းများရှိရာမြေ” ဟုခေါ်ဆိုခြင်းဖြစ်ပေလိမ့်မည်။ ဘုရားကျောင်းများ အားလုံးသည် ခမ်းနားလှပလှပြီး ထိုဘုရားကျောင်းများအနက် ၉ ရာစုက ဆောက်ထားသည့် Tatev ဘုန်းကြီးကျောင်းမှာ လှပသည့်ရှုမျှော်ခင်းများ ဝန်းရံထားသည့် ရှေးဟောင်းအဆောက်အဦး တစ်ခုဖြစ်သည်။ ထိုဘုန်းကြီးကျောင်းနှင့် Halizor ရွာကို ဆက်သွယ်ထားသည့် ကောင်းကင်ရထားလမ်းသည် ကမ္ဘာ့အရှည်ဆုံး တစ်ဆက်တည်းသွားသော ကောင်းကင်ရထားလုံး အဖြစ် ဂင်းနစ်စံချိန်ချိုးထားပါသည်။

အာမေးနီးယားတွင် ကမ္ဘာ့အမွေအနှစ်နေရာသုံးခုရှိပြီး ယင်းတို့မှာ Geghard ဘုန်းတော်ကြီးကျောင်း၊ Sanahin နှင့် Haghpat ဘုန်းတော်ကြီးကျောင်းများနှင့် ကမ္ဘာ့သက်တမ်းအရှည်ဆုံး ဘုရားကျောင်း တစ်ခုဖြစ်သည့် Echmiadzin ဘုရားကျောင်း တို့ဖြစ်သည်။ အာမေးနီးယား၏ အမျိုးသားသင်္ကေတတစ်ခုဖြစ်ပြီး မြင့်မြတ်သည်ဟု ယူမှတ်ကြသည့် တူရကီနိုင်ငံရှိ အာရာရက်တောင်ရှုခင်းကိုကောင်းစွာ လှမ်းမြင်နိုင်သည့် Khor Virap ဘုန်းတော်ကြီးကျောင်းနှင့် Zvartnots ဘုရားကျောင်း၊ Garni ဘုရားကျောင်းနှင့် Noravnak ဘုန်းတော်ကြီးကျောင်းတို့မှာလည်း ထင်ရှားသည်။ အာမေးနီးယားတွင် ယူနက်စကို ယဉ်ကျေးမှုအမွေအနှစ်အဖြစ် စာရင်းသွင်းခံခဲ့ရသည့် အစားအစာလည်းရှိကာ အာမေးနီးယား ရိုးရာအစားအစာဖြစ်သည့် Lavash ပေါင်မုန့်အပြားဖြစ်ပါသည်။

အာမေးနီးယားတွင် ဆာဗန်အမည်ရှိ ရေကန်ကြီးက နိုင်ငံ၏ ၆ ပုံတစ်ပုံခန့်ကိုနေရာယူထားပါသည်။ စိမ်းပြာကြည်လင်နေသော ရေပြင်၊ ကမ်းခြေကဲ့သို့ဖြစ်နေသော မြစ်ကမ်းတို့ကြောင့် အာမေးနီးယားလို ကုန်းတွင်းပိတ်နိုင်ငံအတွက် ပင်လယ်သဖွယ်ဖြစ်နေကာ အပန်းဖြေသူများနှင့် စည်ကားလျှက်ရှိပါသည်။ တောင်များသည့် အာမေးနီးယားတွင် နှင်းလျှောစီးစခန်းများရှိပြီး နာမည်အကျော်ဆုံးမှာ Tsakhkadzor နှင်းလျှောစီးအပန်းဖြေစခန်းဖြစ်သည်။ Dilijin အမျိုးသားဥယျာဉ်၊ Aragats တောင်၊ Arpi ရေကန်၊ Shaki ရေတံခွန်တို့မှာ အာမေးနီးယားရှိ ထင်ရှားသည့် သဘာဝအလှတရားတချို့ဖြစ်သည်။

အာမေးနီးယား၏မြို့တော်မှာ ယာရာဗန် (Yeravan) မြို့ဖြစ်ကာ ကမ္ဘာ့သက်တမ်းအရှည်ဆုံး မြို့ကြီးများအနက် တစ်မြို့ဖြစ်သည်။ မြို့ထဲ အဆောက်အအုံအတော်များများက ပန်းရောင်သန်းသဖြင့် “ပန်းရောင်မြို့တော်”ဟုလည်း ရည်ညွှန်းကြပါသည်။ ရှေးဟောင်းအဆောက်အအုံများစွာရှိသည့် ဒုတိယအကြီးဆုံးမြို့ Gyumri၊ ရေပူစမ်းများစွာရှိသည့် Spa မြို့ Jermuk၊ အရသာရှိသည့်ဝိုင်များစွာ ထုတ်လုပ်ရာ Areni ရွာ၊ သက်တမ်းနှစ်ပေါင်း ၁၆၀၀ ရှိ အာမေးနီးယားအက္ခရာ အမှတ်တရအဖြစ် ဖန်တီးထားသော အာမေးနီးယားအက္ခရာပုံသဏ္ဏာန်ရုပ်တုများ၊ Amberd ခံတပ်ကြီး၊ ဗြိတိန်နိုင်ငံရှိ Stonehenge ကဲ့သို့ ကျောက်တုံးပေါင်း ၂၂၃ ခုကို စက်ဝိုင်းသဏ္ဏာန်ထောင်ထားသည့် Karahunj Observatory တို့မှာ အာမေးနီးယားရောက် ကမ္ဘာလှည့်ခရီးသည်များ သွားရောက်လည်ပတ်လေ့ရှိသည့်နေရာများဖြစ်ကြသည်။

ဒေါက်တာနုမြတ်သိင်္ဂီဦး

ကမ္ဘာ့အချမ်းသာဆုံး ရဲတိုက်နိုင်ငံငယ်လေး လူဇင်ဘတ် (Luxembourg)

May 17, 2021Posted in Europe, Heritage, Travel, UncategorizedTagged EuropeLeave a comment

ကမ္ဘာ့အချမ်းသာဆုံး ရဲတိုက်နိုင်ငံငယ်လေး လူဇင်ဘတ်

Dr.Nu Myat Theingi Oo

လူဇင်ဘတ်(Luxembourg) နိုင်ငံက ဥရောပက နိုင်ငံငယ်လေးဖြစ်ပေမဲ့ အထင်သေးလို့မရပါဘူး။ နိုင်ငံလေးသေးပေမဲ့ ကမ္ဘာ့အချမ်းသာဆုံးနိုင်ငံထဲမှာပါနေပါတယ်။ ဒီနိုင်ငံငယ်လေးကို 2019 နှစ်က ဥရောပနိုင်ငံတွေ သွားလည်ရင်း ဘယ်လ်ဂျီယမ်နိုင်ငံမြို့တော် ဘရက်ဆဲလ်(စ်) (Brussels)ကနေ နေ့ချင်းပြန်ခရီး သွားဖြစ်ခဲ့ပါတယ်။ ဒီ Day Trip က အသွားအပြန် ၁၁ နာရီလောက်ကြာပြီး Brussels ကနေ လူဇင်ဘတ်မြို့တော် အပြင် လမ်းမှာလည်း ဘယ်လ်ဂျီယမ် နယ်မြို့လေးတစ်မြို့ဖြစ်တဲ့ ဒီးနန့်(Dinant) မြို့လေးကိုပါ ဝင်ပေးပါတယ်။

ဘယ်မှာရှိတာလဲ
ကုန်းတွင်းပိတ်နိုင်ငံလေး လူဇင်ဘတ် (Luxembourg)က ဥရောပအနောက်ပိုင်းမှာရှိပြီးတော့ အနောက်နဲ့မြောက်ဘက်မှာ ဘယ်(လ်)ဂျီယမ်၊ အရှေ့ဘက်မှာ ဂျာမနီ၊ တောင်ဘက်မှာ ပြင်သစ်တို့နဲ့ နယ်နိမိတ်ချင်းထိစပ်နေပါတယ်။
လူဇင်ဘတ်မြို့တော်ကို Belgiumနိုင်ငံ Brussels မြို့ကနေ ၂နာရီကျော်ကျော်၊ ဂျာမနီနိုင်ငံ Frankfurt မြို့ကနေ ၂နာရီခွဲကျော်နဲ့ ပြင်သစ်နိုင်ငံ ပဲရစ်မြို့ကနေဆိုရင် ၃နာရီကျော်မောင်းရုံနဲ့ ရောက်ပါတယ်။

ဘာသာစကား ၄-၅မျိုးပြောတတ်တဲ့နိုင်ငံ
နိုင်ငံရဲ့ ယဉ်ကျေးမှုနဲ့ ဘာသာစကားတွေက အိမ်နီးချင်းနိုင်ငံတွေနဲ့ ရောယှက်နေကာ အထူးသဖြင့် ပြင်သစ်နဲ့ ဂျာမနီတို့ရဲ့ လွှမ်းမိုးမှုကို ခံရပါတယ်။ ဒါကြောင့် လူဇင်ဘတ်မှာ ရုံးသုံးဘာသာစကား (၃)မျိုးတောင်ရှိပါတယ်။ သူတို့ကိုယ်ပိုင် လူဇင်ဘတ်ဘာသာ၊ ဂျာမာန်ဘာသာ၊ ပြင်သစ်ဘာသာစတဲ့ ဘာသာစကားသုံးမျိုးအပြင် အင်္ဂလိပ်ဘာသာ (သို့) ဒတ်(ချ်) ဘာသာတွေပါပြောတတ်တော့ နိုင်ငံသားတိုင်းလိုလို ဘာသာစကား ၄-၅မျိုးလောက်ပြောတတ်ကြပါတယ်။ ကျောင်းတွေမှာဆိုလည်း မူကြိုကျောင်းတွေမှာ လူဇင်ဘတ်ဘာသာစကားနဲ့သင်ပြီး Primary ကျောင်းမှာ ဂျာမာန်ဘာသာနဲ့သင်ကာ Secondary ကျောင်းမှာ ပြင်သစ်ဘာသာနဲ့သင်ပါတယ်။

လူဇင်ဘတ်နိုင်ငံလေးကတော်တော်သေးပါတယ်။ အကျယ်အဝန်း စတုရန်းမိုင်ပေါင်း ၁၆၀၀ ကျော်ပဲလို့ ကမ္ဘာမှာ ၂၀မြောက် အသေးဆုံးနိုင်ငံပါ။ နိုင်ငံကသေးရတဲ့အထဲ သုံးပုံတစ်ပုံက တောတွေဆိုတော့ လူဦးရေလည်း နည်းပါတယ်။ တစ်နိုင်ငံလုံးရဲ့ လူဦးရေက ၆သိန်းကျော်ပဲရှိတော့ ရန်ကုန်မြို့လူဦးရေရဲ့ ၁၀ ပုံ တစ်ပုံပဲရှိပါတယ်။ အဲ့ဒီထဲကမှ တစ်ဝက်လောက်က တစ်ခြားနိုင်ငံကနေလာအလုပ်လုပ်တဲ့ လူမျိုးခြားတွေပါ။ လူမျိုးပေါင်း ၁၇၀လောက် အလုပ်လာလုပ်ကြပြီး ပေါ်တူဂီလူမျိုးတွေက အများဆုံးဖြစ်ကာ လူဦးရေရဲ့ ၁၅ရာခိုင်နှုန်းကျော်တောင်ရှိပါတယ်။ လစာကောင်းတော့လည်း အလုပ်လာလုပ်သူတွေများတာပေါ့။ ဥရောပမှာ လူမျိုးခြားတွေ အလုပ်လုပ်တဲ့ ရာခိုင်နှုန်း အများဆုံးနိုင်ငံပါတဲ့လေ။

ချမ်းသာတဲ့နိုင်ငံ
လူဇင်ဘတ်နိုင်ငံက နိုင်ငံသေးငယ်ပေမဲ့ ချမ်းသာပါတယ်။ လူတစ်ယောက်ချင်းစီရဲ့ GDP at Normina Values အရဆိုရင် ၂၀၁၉ခုနှစ်မှာ အမေရိကန်ဒေါ်လာ ၁၁၃၁၉၆ ဒေါ်လာရှိလို့ ကမ္ဘာမှာထိပ်ဆုံးကနေရာယူထားပြီး လူတစ်ယောက်ချင်းစီရဲ့ ဝယ်လိုအား GDP အရ ဆိုရင်တော့ ကာတာနိုင်ငံနဲ့ မကာအိုပြီးရင် ကမ္ဘာ့တတိယအချမ်းသာဆုံးလို့ပြောကြတယ်။ နိုင်ငံရဲ့ အဓိကစီးပွားရေးက ဘဏ်လုပ်ငန်းနဲ့ စတီးလုပ်ငန်းပါ။

လစာကောင်းတဲ့နိုင်ငံ
ဥရောပမှာ အနိမ့်ဆုံးလစာ အများဆုံးရတဲ့နိုင်ငံဖြစ်ပြီး ကမ္ဘာမှာဆိုရင် ဒုတိယအများဆုံးပါ။ နိုင်ငံတွင်းနေထိုင်သူတို့ရဲ့ အနိမ့်ဆုံးလစာက ယူရို ၂၀၀၀ ဝန်းကျင်ရှိလို့ မြန်မာငွေကျပ် သိန်း ၃၀ ဝန်းကျင်လောက်ရပါတယ်။ လစာကောင်းသလို ဥရောပတခွင်မှာ အလုပ်လက်မဲ့ဦးရေ အနည်းဆုံးနိုင်ငံလည်းပဲ ဖြစ်လို့နေပါတယ်။

Safe ဖြစ်တဲ့ နိုင်ငံ
အကုန်လုံးက ချမ်းသာကြတော့ လုံခြုံမှုအရှိဆုံး နိုင်ငံတစ်ခုလည်း ဖြစ်ပါတယ်။ ရဲပေါင်း ထောင်ကျော်သာရှိပြီး ရဲစခန်းကလည်း နှစ်ခုသာရှိပါတယ်။

ကားအများကြီးပိုင်တဲ့ နိုင်ငံ
ကမ္ဘာပေါ်မှာ ကားအများဆုံးပိုင်နှုန်းရှိတဲ့နိုင်ငံတွေထဲက တစ်နိုင်ငံလည်းပဲဖြစ်ပါတယ်။ လူအယောက်တစ်ထောင်မှာ ကား ၆၇၀စီးလောက်ပိုင်ပါတယ်။

ကမ္ဘာ့ပဉ္စမအကောင်းဆုံး Passport
၂၀၂၀ခုနှစ်မှာ လူဇင်ဘတ်နိုင်ငံသားတွေအနေနဲ့ နိုင်ငံပေါင်း ၁၈၇နိုင်ငံကို ဗီဇာမလို (သို့) ဆိုက်ရောက်ဗီဇာနဲ့ ဝင်ရောက်နိုင်တာကြောင့် လူဇင်ဘတ်ပတ်(စ်)ပို့က ကမ္ဘာ့အကောင်းဆုံး Passport ထဲပါနေတာပါ။

Grand Duchy နိုင်ငံ
လူဇင်ဘတ်က ကမ္ဘာပေါ်မှာတစ်ခုတည်းသော Grand Duchy နိုင်ငံပါ။ Grand Duchy က ဘာလဲဆိုတော့ ဘုရင်၊ ဘုရင်မတွေအစား သူကောင်းမျိုးနွယ်တွေက အုပ်ချုပ်တဲ့စနစ်ပါ။ အရင်တုန်းက တချို့နိုင်ငံတွေမှာလည်း ဒီလိုအုပ်ချုပ်တဲ့စနစ်ရှိခဲ့ပေမဲ့ လူဇင်ဘတ်နိုင်ငံတစ်ခုထဲမှာသာ အခုချိန်ထိကျင့်သုံးဆဲဖြစ်နေတာပါ။

ရဲတိုက်နိုင်ငံ
ခေတ်အဆက်ဆက်က လူချမ်းသာတွေနေထိုင်ခဲ့တဲ့ လူဇင်ဘတ်မှာ ခမ်းနားတဲ့ ရဲတိုက်တွေလည်း အများကြီးရှိလို့နေပါတယ်။ လူဇင်ဘတ်ဆိုတဲ့နာမည်ကိုက “ရဲတိုက်လေး” လို့ အဓိပါယ်ရနေတာပါ။ လူဇင်ဘတ်တစ်မြို့ထဲမှာတင်ရဲတိုက်ပေါင်း ၁၀၀ ကျော်ရှိခဲ့တာပါ။ အခုခေတ်မှာတော့ ရဲတိုက်(၇၅)ခုက မပျက်စီးပဲ ကျန်ရှိနေပါသေးတယ်။ ရဲတိုက်(၇)ခုကို တစ်စုတစည်းထဲတွေ့နိုင်တဲ့ ရဲတိုက်(၇)တိုက်တောင်ကြားဆိုတဲ့နေရာလည်းရှိပါသေးတယ်။

ကမ္ဘာ့အရှည်ဆုံးဝိုင်စာရင်းရှိတဲ့နိုင်ငံ
ကမ္ဘာ့အရှည်ဆုံးဝိုင်စာရင်းရှိတဲ့ စားသောက်ဆိုင်က လူဇင်ဘတ်မြို့မှာရှိနေပါတယ်။ Chiggeri စားသောက်ဆိုင်မှာ ဝိုင်အမျိုးအစားပေါင်း ၁၇၄၆မျိုးနဲ့ ၂၀၀၉ခုနှစ်မှာ ဂင်းနစ်စံချိန်တင်ခဲ့ပါတယ်။

လူဇင်ဘတ်မြို့တော်
လူဇင်ဘတ်နိုင်ငံမှာ မြို့ပေါင်း (၁၂)မြို့ရှိပြီး နုမြတ်တို့ရောက်ခဲ့တဲ့ မြို့တော် လူဇင်ဘတ်မြို့ (Luxembourg City) က ယူနက်စကိုက ကမ္ဘာ့ရှေးဟောင်းအမွေအနှစ်အဖြစ် အသိအမှတ်ပြုထားတဲ့မြို့ပါ။ မြို့ထဲမှာရှိတဲ့ ရှေးဟောင်းအဆောက်အအုံတွေ၊ ရဲတိုက်တွေနဲ့အတူ မ္ဘာ့အမွေအနှစ်မြို့တော်အဖြစ်အသိအမှတ်ပြုခံရတာပါ။ ဥရောပရဲ့ အလှဆုံးလသာဆောင်ကလည်း လူဇင်ဘတ်မှာရှိပါတယ်။ Corniche ဆိုတဲ့ လသာဆောင်ကနေ လူဇင်ဘတ်တစ်မြို့လုံးကို အမြင့်ပေ ၁၀၀ကျော်ကနေလှမ်းမြင်ရတာကြောင့်ပါ။

မြို့အောက်မှာ ကျောက်သားထုတစ်ခုထဲကို ထွင်းဖောက်ထားတဲ့ ၁၀မိုင်ခွဲအရှည်ရှိ မြေအောက်ဥမင်လှိုဏ်ခေါင်းရှိပါတယ်။ တချို့အပိုင်းတွေမှာဆို ပေပေါင်း ၁၃၀ကျော်တောင်နက်ပါတယ်။ Casemates လို့ခေါ်ပြီး ၁၇ရာစု-၁၈ရာစုလောက်က မြို့ကို ကာကွယ်ဖို့ခံတပ်အနေနဲ့ ဖောက်ထားတာပါ။ လူအယောက် ၃၅၀၀၀ ဆန့်ပြီး ကမ္ဘာစစ်တုန်းက ဗုံးခိုရာအဖြစ်အသုံးပြုခဲ့ကြပါတယ်။ အခုခေတ်မှာတော့ ဒီဥမင်လှိုဏ်ခေါင်းတွေကို အများပြည်သူလေ့လာခွင့်ပြုထားပြီး ယူနက်စကိုကမ္ဘ့အမွေအနှစ်နေရာအဖြစ် အသိအမှတ်ပြုခံထားရပါတယ်။

လူဇင်ဘတ်မြို့ရဲ့ အိမ်တိုင်းလိုလိုကလည်း အရောင်နုနု ဖျော့ဖျော့လေးတွေသာ သုတ်ထားပါတယ်။ ကျောက်စရစ်ခင်းတဲ့ လမ်းကြားလေးတွေ ဘေးတစ်ဖက်စီမှာ အရောင်နုအိမ်လေးတွေနဲ့ဆိုတော့ ဓာတ်ပုံလှလှရိုက်လိုသူတွေအကြိုက်ပေါ့။
လူဇင်ဘတ်မြို့ထဲမှာ ဘယ်နေရာပဲဖြစ်ဖြစ် စက်ဘီးကို မိနစ် (၃၀) အခမဲ့ပေးစီးပါတယ်။

မိုစတာမြို့၏ အထင်ကရ ရှေးဟောင်းတံတားကြီး

April 24, 2021Posted in Europe, Heritage, Travel, UncategorizedTagged Europe, Mostar, TravelLeave a comment

မိုစတာမြို့၏ အထင်ကရ ရှေးဟောင်းတံတားကြီး

ဒေါက်တာနုမြတ်သိင်္ဂ ီဦး

ကမ္ဘာပေါ်ရှိမြို့အသီးသီးမှာ မြို့သူမြို့သားတွေ ဂုဏ်ယူရတဲ့ စေတီ၊ ကျောင်းဆောင်၊ ရိုးရာဓလေ့၊ အစားအစာ စသဖြင့်ရှိနေတဲ့အထဲ ဥရောပမြို့လေး မိုစတာ(Mostar)ရဲ့ ဂုဏ်ယူရတဲ့ အထင်ကရနေရာကတော့ မြို့ကိုဖြတ်သန်းစီးဆင်းနေတဲ့ နာရီတာမြစ်ကို ဖြတ်ဆောက်ထားတဲ့ စတာရီမို့စ် (Stari Most) အမည်ရှိတဲ့ တံတားကြီးပဲဖြစ်ပါတယ်။ ဒီတံတားကြီးက မိုစတာမြို့ရဲ့ ရတနာတစ်ပါးဖြစ်လို့နေတာ နှစ်ပေါင်း ၄၀၀ ကျော်ရှိနေပါပြီ။ မိုစတာဆိုတဲ့မြို့အမည်တောင်မှ ဒီတံတားကနေရခဲ့တဲ့နာမည်တာပါတဲ့။ မိုစတာရီလို့ခေါ်တဲ့ တံတားစောင့်တွေကနေ ဒီမြို့အမည်တွင်ခဲ့တာပါ။

မိုစတာ (Mostar)မြို့ဆိုတာတော့ ဘောစနီးနဲ့ ဟာဇီဂိုဗီးနား(Bosnia and Herzegovina) နိုင်ငံမှာရှိတဲ့ မြို့လေးပါ။ ဥရောပတိုက် အရှေ့တောင်ပိုင်း ဘော်ကန်ကျွန်းဆွယ်မှာရှိတဲ့ နိုင်ငံတွေကို ဘော်ကန်နိုင်ငံ(Balkan) နိုင်ငံလို့ခေါ်ပြီး ဘေ့စနီးယားနဲ့ ဟာဇီဂိုဗီးနားကလည်း ဘော်ကန်နိုင်ငံတစ်ခုပဲဖြစ်ပါတယ်။ အသည်းနှလုံးပုံစံမြေပုံရှိတဲ့ ဒီနိုင်ငံက တောင်တန်းတွေများတဲ့နိုင်ငံဖြစ်ပြီး မြို့တော်ကတော့ ဆာရာဂျေးဗိုးပါ။ မိုစတာကတော့ မြို့တော်ဆာရာဂျေးဗိုးကနေ ပေါ်လ်စီမြို့ကိုပြေးဆွဲနေတဲ့ရထားလိုင်း လမ်းကြောင်းပေါ်မှာတည်ရှိကာ နိုင်ငံရဲ့ ပဉ္စမမြောက်အကြီးဆုံးမြို့ပဲဖြစ်ပါတယ်။ ရှေးတုန်းကတော့ ဟာဇီဂိုဗားနားရဲ့ မြို့တော်နဲ့ အချက်အချာကျတဲ့မြို့ဖြစ်ခဲ့ဖူးပါတယ်။

မိုစတာမြို့က ၁၄၅၂ခုနှစ်ကစပြီးသမိုင်းမှာစပါခဲ့ကာ ၁၆ရာစုမှာတော့ တူရကီတို့ရဲ့ အော်တမန်အင်ပါယာအောက်ကျရောက်ခဲ့ကာ တူရကီတို့ရဲ့ ခံတပ်မြို့ဖြစ်ခဲ့ပါတယ်။ ၁၅၆၆ခုနှစ်မှာ တူရကီတို့က မြို့လည်က သစ်သားတံတားကို ကျောက်ခင်းတံတားအခုံးအဖြစ် ပြောင်းလဲတည်ဆောက်ခဲ့ကြပါတယ်။ အော်တမန်တွေတည်ဆောက်ခဲ့တဲ့ စတာရီမို့စ်တံတားကြီးက ဘော်လ်ကန်နိုင်ငံမှာမြင်တွေ့နိုင်တဲ့ စံနမူနာယူစရာ အစ္စလာမ်ဗိသုကာလက်ရာတစ်ခုပဲဖြစ်ပါတယ်။ ဒီတံတားကြီးက မိုစတာမြို့ရဲ့ ရတနာတစ်ပါး ဖြစ်လို့နေတာ နှစ်ပေါင်း ၄၀၀ ကျော်ကြာနေပါပြီ။ ၁၉၉၃ခုနှစ်က ဘော့စနီးယားပြည်တွင်းစစ်မှာ ဗုံးထိလို့ပျက်စီးသွားပြီးနောက် ၂၀၀၄ခုနှစ်မှာ မူလအတိုင်းပြန်ဆောက်ခဲ့ကြပါတယ်။

တံတားကြီးက ၁၃ပေအကျယ်ရှိပြီး ၉၈ပေရှည်ကာ မြစ်မျက်နှာပြင်ကနေ အမြင့်ဆုံးနေရာအထိ ၇၉ပေနီးပါး မြင့်ပါတယ်။ တံတားပေါ်က ရေထဲခုန်ဆင်းတဲ့ ဓလေ့က ရှေးကတည်းကရှိခဲ့ပြီး အခုထက်ထိလည်း ရှိနေဆဲပါ။ နွေရာသီဆို တံတားကနေမြစ်ထဲခုန်ချတဲ့ အားကစား (Cliff Diving) လာလုပ်တဲ့လူငယ်တွေနဲ့ပြည့်နေပြီး နှစ်စဉ်နှစ်တိုင်း ဇူလိုင်လမှာ Cliff Diving ပြိုင်ပွဲကျင်းပလေ့ရှိပါတယ်။

တံတားနားတဝိုက်မှာလည်း စားသောက်ဆိုင်တွေ၊ ကော်ဖီဆိုင်တွေ၊ အမှတ်တရပစ္စည်းဆိုင်တွေနဲ့ စည်ကားနေပါတယ်။ ဒီဆိုင်လေးတွေက ရှေးမူမပျက်တဲ့ ဗိသုကာလက်ရာအစုံနဲ့ဆိုတော့ ရှေးခေတ်ပြန်ရောက်သွားသလို ခံစားခဲ့ရပါတယ်။ ဒါကြောင့်လည်း တံတားနဲ့ အနီးတဝိုက်နေရာတွေက ၂၀၀၅ခုနှစ်မှာ ယူနက်စကိုရဲ့ကမ္ဘာ့သမိုင်းဝင်အမွေအနှစ်စာရင်းထဲ ပါဝင်ခဲ့ပါတယ်။

မိုစတာမြို့နားမှာရှိတဲ့ အခြားအထင်ကရနေရာတွေကတော့ နိုင်ငံရဲ့ ဘာသာရေးအရအထွတ်အမြတ်ထားရာ Blagaj Tekija ဆိုတဲ့နေရာ၊ ခရာဗီကာ (Kravica) ရေတံခွန်ကြီး၊ ဥရောပရဲ့ အလှဆုံးရွာလေးတစ်ရွာဖြစ်တဲ့ Počitelj ရှေးဟောင်းရွာလေး၊ စစ်အထိမ်းအမှတ်ပြတိုက်နဲ့ ကျောက်တုံးတွေနဲ့ဆောက်ထားတဲ့ Hamam တူရကီရေချိုးအိမ်ပြတိုက်တို့ပဲဖြစ်ပါတယ်။ ဟာဇီဂိုဗီးနားမှာအလှဆုံးဖြစ်တဲ့ Koski Mehmed Pasha ဗလီလေးကလည်း မြစ်ကမ်းဘေး တောင်စောင်းပေါ်မှာရှိပြီး ဗလီမျှော်စင်ပေါ်ကကြည့်ရင် မြို့ဟောင်းတစ်ခုလုံးကို လှမ်းမြင်ရပါတယ်။

မိုစတာကို မြို့တော် ဆာရာဂျေးဗိုးကနေသွားနိုင်သလို အိမ်နီးချင်းနိုင်ငံဖြစ်တဲ့ ခရိုအေးရှား(Croatia) နိုင်ငံ ဒူဘရိုနစ်(ခ်)မြို့ (Dubrovnik) နဲ့ စပလစ်(Split)မြို့ ကနေလည်း နေ့ချင်းပြန်သွားနိုင်ပါတယ်။ စာရေးသူတို့လည်း ဒူဘရိုနစ်(ခ်)မြို့ကနေ နေ့ချင်းပြန် သွားခဲ့တာပဲဖြစ်ပါတယ်။

အင်းလေးနားတဝိုက်က ဓာတ်ပုံရိုက်လို့ကောင်းတဲ့ ထူးထူးခြားခြားအိမ်(၄)အိမ် 4 Unique Houses in Inle, Myanmar

April 23, 2021March 2, 2023Posted in Myanmar, Travel, UncategorizedTagged MyanmarLeave a comment

အင်းလေးနားတဝိုက်က ဓာတ်ပုံရိုက်လို့ကောင်းတဲ့

ထူးထူးခြားခြားအိမ်(၄)အိမ်

အိမ်လေးတွေသာဆိုတယ် တကယ်က စားသောက်ဆိုင်နဲ့ ကော်ဖီဆိုင်လေးတွေပါ။ ဆိုင်နာမည်လေးတွေမှာ House တို့ အိမ်တို့ပါတာကြောင့် အိမ်လေးတွေလို့ ချစ်စနိုးခေါ်လိုက်တာပါ။ အဲ့ဆိုင်လေးတွေက ဆောက်ထားတာလည်းဆန်းလို့ ဓာတ်ပုံလှလှလေးတွေ ရိုက်ချင်တဲ့သူတွေအတွက်တော့ ပျော်စရာပေါ့။ ဒီအိမ်(၄)အိမ်အကြောင်းဖတ်ကြည့်ပြီး ဘယ်အိမ်အကြိုက်ဆုံးလည်း ပြောကြည့်ကြည့်နော်။

သစ်ပင်အိမ် (Little Tree House Restaurant)

စိတ်ကူးတွေထဲကလို သစ်ပင်အိမ်လေးပေါ့။ ဒါပေမဲ့ သစ်ပင်ပေါ်ဆောက်ထားတာမျိုးမဟုတ်ဘဲ သစ်ပင်ကြီးဘေးမှာ ဝါးတွေကိုသုံးပြီးဆောက်ထားတဲ့အိမ်လေးပါ။ အိမ်လေးက သဘာဝဆန်ဆန်လေးနဲ့ သိပ်ဆန်းတာ။ ထိုင်းဗိသုကာပညာရှင်တွေဆောက်ပေးထားတာတဲ့။ ဝါးအိမ်လေးက ၃ထပ်တောင်ရှိတာနော်။ အပေါ်ဆုံးထပ်ကတော့ ခပ်သေးသေးရယ်ပေါ့။ အဲ့ကနေ ရှုခင်းတွေကြည့်လည်းရတယ်။
အိမ်အပေါ်ထပ်ကို စားစရာတွေတင်တဲ့နည်းကလည်းမိုက်တယ်။ စက်သီးနဲ့ အတင်အချလုပ်တာ။ အစားအသောက်ကတော့ရောက်မှ ချက်ပေးတာဆိုတော့ နည်းနည်းတော့စောင့်ရမယ်။ စောင့်ရင်း ဟိုရိုက်ဒီရိုက်လုပ်ပေါ့။
အိမ်နားမှာ ဝါးနဲ့လုပ်ထားတဲ့ကစားကွင်းတွေလည်းရှိတယ်။ ဝါးလျှော၊ ဝါးဒန်း၊ ဝါးစီးဆောလေးတွေနဲ့ ပျော်စရာကြီး။ အနားမှာ ယက်ကန်းရုံလည်းရှိတော့ ယက်ကန်းခတ်တာလည်း တစ်ခါတည်းလေ့လာလို့ရတယ်။ ညမှောင်ရိပ်သန်းရင်မီးလေးတွေလင်းလာတဲ့အခါ ပိုတောင်လှသေးတယ်။ ပုံပြင်တွေထဲရောက်သွားသလိုပဲ။ အရမ်းသဘောကျတာ။
ညအိပ်ချင်ရင်တော့ သစ်ပင်အိမ်ဘေးက A Little Ecolodge ဟိုတယ်လေးမှာ တည်းလို့လည်းရတယ်။ လိပ်စာက ညောင်ရွှေမြို့ကနေ မိုင်းသောက်သွားတဲ့လမ်းပေါ် ညောင်ဖြူရွာနားမှာရှိပါတယ်။ ညောင်ရွှေမြို့ကနေ ၅မိနစ်လောက်သွားရင်ရောက်ပါတယ်။ အင်းလေးမြင်းစီးကွင်းသွားရာလမ်းမှာရှိတဲ့ A Little eco Lodge ဝင်းအတွင်းမှာပါ။ ဖုန်းနံပါတ်တွေကတော့ 09428363692 နဲ့ 09426649846 တို့ပါ။

လယ်တောအိမ် (La Rizieဲre Buvette)

လယ်တောအိမ်လေးကလည်း Tree House လိုပဲ ဝါးတွေနဲ့ဆောက်ထားတာ ။ စိမ်းစိုနေတဲ့စိုက်ခင်းတွေကြားက ဝါးနဲ့ဆောက်ထားတဲ့ နှစ်ထပ်အိမ်လေးကို သိပ်သဘောကျတာပဲ။ ဒါကကျတော့ ပြင်သစ်ဒီဇိုင်းလက်ရာလေးပါတဲ့။ ပြင်သစ်နာမည်လေးကတော့ La Rizieဲre Buvette Restaurant and Sunset Bar တဲ့။ လယ်တောအိမ်ဆိုတဲ့ဆိုင်းဘုတ်လေးအတိုင်း ဝင်သွားလို့ရှိရင် ဘယ်ဘက်မှာ ခေါင်မိုးချွန်ချွန်နဲ့တစ်ထပ်အိမ်တွေ့ရမှာဖြစ်ပြီး ဘယ်ဘက်မှာတော့ ဝါးလေးတွေနဲ့ဆောက်ထားတဲ့ နှစ်ထပ်အိမ်လေးရှိပါတယ်။ တစ်ထပ်အိမ်အလယ်မှာ Open Kitchen ကိုဝိုင်းထိုင်လို့ရတဲ့ Bar လေးရှိပြီး နှစ်ထပ်မှာကျတော့ ဝါးစားပွဲလေးတွေနဲ့ အေးဆေးစားလို့ရပါတယ်။ ဝါးနင်းသံတဂျွတ်ဂျွတ်နဲ့ ဝါးကြမ်းခင်းပေါ်ခြေပစ်လက်ပစ်ထိုင်ချပြီး တမျှော်တခေါ်မြင်ရတဲ့ စပါးခင်းစိမ်းစိမ်းစိုစိုကြည့်ရတဲ့ Feel က အရမ်းမိုက်တာနော့။ အစားအသောက်တွေကလည်း မှာမှ လတ်လတ်ဆတ်ဆတ်ချက်ပေးတာ။ ဒေသထွက်အသီးအနှံလေးတွေနဲ့ဖျော်ပေးတဲ့ Cocktail ကလည်း ကောင်းမယ့်ပုံပဲ။ Sunset လေးကြည့်ရင်း Cocktail လာသောက်ကြတယ်တဲ့လေ။ နုမြတ်တို့ကတော့ နေ့လည်ဘက်ရောက်သွားလို့ နေ့လည်စာဝင်စားခဲ့ကြတာ။
အဲ့မှာအကြိုက်ဆုံးက အိမ်သာလေးပဲ။ ဟိုးအစွန်ဆုံးက ခရုပတ်ပုံဆောက်ထားတဲ့ ဝါးအိမ်သာမှာတံခါးမရှိသလို ပြတင်းပေါက်လေးလည်းထားပေးတော့ စိမ်းစိမ်းစိုစိုရှုခင်းတွေကြည့်ရင်း အေးအေးဆေးဆေးထိုင်လို့ရတာပေါ့ 😂မိန်းမအိမ်သာဆီ အလွယ်တကူလာလို့မရအောင် ဝါးတံတားလေးကို ခြံတံခါးလို ပိတ်နိုင်အောင် ထွင်ထားတာလေးလည်း သိပ်သဘောကျတယ်။
လိပ်စာကတော့ အင်းလေးမရောက်ခင် ညောင်ရွှေကနေ ခေါင်တိုင်သွားတဲ့လမ်းလေးပေါ်မှာရှိတာပါတဲ့။ ညောင်ရွှေလှေဆိပ်မရောက်ခင်လေးတင်ပါပဲ။ ရှာမရရင် ဒီဖုန်း 09787230306 ကို ဆက်မေးကြည့်ပါ။

စက်ဘီးအိမ် (MOT Café)

ဒီအိမ်လေးကတော့ အပြာနုလေးတစ်အိမ်လုံးသုတ်ထားပြီး စက်ဘီးအဖြူလေးတွေနဲ့ တန်ဆာဆင်ထားတာ အရမ်းချစ်ဖို့ကောင်းတာပဲ။ ခြံစည်းရိုးမှာလည်း စက်ဘီးအဖြူလေးတွေ၊ အိမ်နံရံမှာလည်း စက်ဘီးအဖြူလေးတွေ၊ စက်ဘီးအဖြူလေးတွေကို ပဒေသာပင်လိုတောင် အဆင့်ဆင့်တင်ထားတာ။ သဘောကျလိုက်တာ။ ဆိုင်အပေါ်ထပ်တက်မယ့်လှေကားနားမှာလည်း ပန်းရောင်နဲ့ အစိမ်းရောင်သုတ်ထားတဲ့ ဆိုက်ကားလေးတွေထားပေးထားတယ်။
ဆိုင်အထဲမှာတော့ အစိမ်းနုရောင်အခန်းလေးမှာ ပန်းလေးတွေနဲ့ ဥယျာဉ်ထဲရောက်သွားသလို ချစ်ဖို့ကောင်းနေပြန်ရော။ အသေးစိတ်ကအစ သေချာပြင်ဆင်ထားလို့ အရမ်းကို ဓာတ်ပုံရိုက်လို့ကောင်းမယ့်ဆိုင်လေးပေါ့။
ဆိုင်နာမည်က MOT တဲ့။ ကိုရီးယားကလာဖွင့်ထားတာ။ သူက အနားက အသက်မွေးဝမ်းကျောင်းသင်တန်း ကျောင်းသူကျောင်းသားတွေအတွက် Charity သဘောမျိုးဖွင့်ထားတာတဲ့။ လာအားပေးတဲ့ ပိုက်ဆံတွေအကုန် ကျောင်းရန်ပုံငွေထဲ လှူပေးတာဆိုတော့ ကောင်းလိုက်တာနော်။ ဖွင့်တာတစ်ပတ်လောက်ပဲရှိသေးလို့ အစားအသောက်ကတော့မရသေးဘူး။ အအေးနဲ့ကော်ဖီပဲရပါသေးတယ်။
လိပ်စာကတော့ အင်းလေးအသွားလမ်း ညောင်ရွှေအကျော် မိုင်းသောက်တံတားမရောက်ခင် လမ်းဘယ်ဘက်မှာတင်ရှိပါတယ်။

ကော်ဖီအိမ် (Coffee House)

ဒီဆိုင်လေးလည်း ဖွင့်တာသိပ်မကြာသေးပါဘူး။ နေရာကလည်း Little Tree House အကျော်လေးမှာပါ။ Inle Horse Club မရောက်ခင်မှာရှိပါတယ်။
သူကတောင်ကုန်းလေးပေါ်မှာဆောက်ထားတဲ့ အိမ်လေးကို ကော်ဖီဆိုင်နဲ့ ဘားဆိုင်လေးဖွင့်ထားတာပါ။ အင်းလေးကန်ကို မြင်ရတဲ့ ရှုခင်းက သိပ်လှပါတယ်။ တစ်ဖက်မှာ ဆည်၊ တစ်ဖက်မှာ အင်းလေးကန်နဲ့ သိပ်ကိုကောင်းတဲ့နေရာမှာရှိတဲ့ အိမ်လေးပါ။ နေသာတဲ့နေ့တွေမှာ အဲ့အိမ်လေးကနေမြင်ရတဲ့ Sunset View လေးကလည်း သိပ်ကို မိုက်တာပဲတဲ့။
အဲ့မှာ ဝိုင်တွေကော်ဖီတွေအပြင် အစားအသောက်လည်းရပါတယ်။ နဂါးမောက်သီးဖော်ရည်ကတေ့ာ အရမ်းကောင်းပါတယ်။ စပျစ်ခြံနဲ့ နဂါးမောက်ခြံရှိတာဆိုတော့ ခြံထွက် စပျစ်ဖျော်ရည်၊ နဂါးမောက်ဖျော်ရည်က လတ်လတ်ဆတ်ဆတ်ပေါ့။
လိပ်စာကတော့ ညောင်ရွှေမြို့ကနေ မိုင်းသောက်သွားတဲ့လမ်းပေါ် ညောင်ဖြူရွာနားမှာရှိပါတယ်။ Inle မြင်းစီးကွင်းသွားတဲ့လမ်းမှာ Little Tree House အကျော် Inle Horse Club မရောက်ခင်မှာရှိပါတယ်။ ဖွင့်ချိန်က မနက်၉ကနေည၆နာရီထိပါ။ ဖုန်းနံပါတ် 09 787 230306 ကိုဆက်သွယ်နိုင်ပါတယ်။

ကဲဒီအိမ်လေးတွေကတော့ နုမြတ် 2018 က သွားခဲ့တဲ့ ညောင်ရွှေ-အင်းလေးခရီးမှာ သဘောကျခဲ့တဲ့ ဆိုင်လေးတွေပေါ့။ တခြားဓာတ်ပုံရိုက်လို့ကောင်းမယ့် စားလို့ကောင်းမယ့်ဆိုင်လေးတွေရှိရင်လည်း လမ်းညွှန်ပါဦးနော်။ ဒီဆိုင်လေးတွေကိုလည်း အကြိုက်တွေ့ရင် Like and Share လုပ်နိုင်ပါတယ်။

ချစ်ခင်လျက်
မနုမြတ်

ကမ္ဘာ့အကြီးဆုံး ကိုယ်တစ်ပိုင်းရုပ်တုကြီးရှိရာ အိန္ဒိယမှာ ငြိမ်းချမ်းခြင်းကို ရှာဖွေတွေ့ရှိခဲ့ခြင်း…… Spiritual Unfoldment in Isha Yoga Center, India

November 23, 2019August 7, 2022Posted in Asia, Heritage, India, Travel, UncategorizedLeave a comment

ကမ္ဘာ့အကြီးဆုံး ကိုယ်တစ်ပိုင်းရုပ်တုကြီးရှိရာ

အိန္ဒိယမှာ
ငြိမ်းချမ်းခြင်းကို ရှာဖွေတွေ့ရှိခဲ့ခြင်း……

တောင်တန်းတွေ ဝန်းရံထားတဲ့ ကွင်းပြင်ကျယ်ကြီးထဲ အနက်ရောင် ကိုယ်တစ်ပိုင်း ရုပ်တုကြီးက အထင်းသားရှိနေပါတယ်။ နဖူးတစ်ဖက်မှာ လခြမ်း၊ ပုခုံးတစ်ဖက်မှာ ပါးပျဉ်းထောင်နေတဲ့မြွေရုပ်ကြီးနဲ့ နှုတ်ခမ်းကပြုံးနေပြီး မျက်စိကမှိတ်လျှက်သားရှိနေတဲ့ ရုပ်တုကြီးကတော့ ဟိန္ဒူဘုရား ရှိဗ(သိဝ)ရုပ်တုကြီးပါ။ အိန္ဒိယနိုင်ငံတောင်ပိုင်း ကိုအင်ဘတောမြို့နားရှိ အစ်ရှယောဂစင်တာ (Isha Yoga Center) ဝင်းကြီးမှာ တည်ထားကိုးကွယ်တဲ့ ဒီရုပ်တုကြီးက ကမ္ဘာလှည့်ခရီးသည်တွေအကြား ထင်ရှားလှပါတယ်။

ဒီယောဂစင်တာကြီးထဲ သွားရောက်ခဲ့ရာမှာ စိတ်ရော ကိုယ်ပါ ငြိမ်းချမ်းခဲ့တဲ့ ထူးခြားတဲ့ အတွေ့အကြုံအများကြီးရခဲ့လို့ ပြောပြချင်ပါတယ်။

ဘယ်နေရာမှာ ရှိတာလဲ
—————————
အစ်ရှယောဂစင်တာကို ဆာဒူးဂုရု ဂျက်ဂီဗာဆူဒိ (Jaggi Vasudev) တည်ထောင်ထားတဲ့ ဘာသာရေးဆိုင်ရာအဖွဲ့အစည်း အစ်ရှာဖောင်ဒေးရှင်း (Isha Foundation) ကနေ ဖွင့်လှစ်ထားတာဖြစ်ပါတယ်။ ဟိန္ဒူဘာသာဝင်တို့ ဆုတောင်းရာ၊ တရားကျင့်ရာနေရာဖြစ်ပြီး အိန္ဒိယနိုင်ငံတောင်ပိုင်း တမေးလ်နာဒူနယ် (Tamil Nadu) ကိုအင်ဘတောမြို့(Coimbatore) အနောက်ဘက် မိုင်၂၀အကွာမှာ ရှိပါတယ်။

Isha_Sadhguru_Centers_Adiyogi-Abode20150924_JAD_1330-e

ဘယ်လိုရောက်ဖြစ်ခဲ့လဲ
—————————
အဲ့ဒီနေရာကို နုမြတ်ရောက်ဖြစ်ခဲ့တာကတော့ အိန္ဒိယနိုင်ငံတောင်ပိုင်း ဘန်ဂလောမြို့(Bengalore)မှာ ဇွန်လ၂၁ရက်နေ့က ကျင်းပတဲ့ အပြည်ပြည်ဆိုင်ရာ ယောဂနေ့ပွဲတက်ရောက်ဖို့ သွားရင်းနဲ့ပါ။ အဲ့ပွဲအတွက် နိုင်ငံပေါင်း ၂၀ကျော်က မီဒီယာနဲ့ ခရီးသွားလုပ်ငန်းရှင်တွေကို ဖိတ်ကြားခဲ့ရာမှာ နုမြတ်ကိုလည်း မြန်မာနိုင်ငံ အိန္ဒိယသံရုံးကနေတဆင့် ဖိတ်ကြားခဲ့လို့ မြန်မာနိုင်ငံကိုယ်စားပြုအနေနဲ့ သွားရောက်ခဲ့တာပါ။ အိန္ဒိယတောင်ပိုင်း ၅ရက်တာခရီးမှာ ဘန်ဂလောမြို့အပြင် အူတီမြို့(Ooty) နဲ့ ကိုအင်ဘတောမြို့ (Coimbatore) တွေပါ သွားရောက်လေ့လာဖြစ်ခဲ့တာကြောင့် အစ်ရှာယောဂစင်တာကိုပါ လေ့လာခွင့်ရခဲ့တာပဲဖြစ်ပါတယ်။

ဒီခရီးစဉ်က အိန္ဒိယရဲ့ ယဉ်ကျေးမှုတစ်စိတ်တစ်ပိုင်းဖြစ်ပြီး နေ့စဉ်ဘဝမှာ အရေးပါတဲ့ ယောဂနဲ့ပတ်သက်ပြီး လေ့လာရတဲ့ ခရီးဖြစ်လို့ သွားရောက်ရတဲ့နေရာတွေကလည်း ယောဂနဲ့ ဆက်စပ်နေတဲ့ နေရာတွေ များပါတယ်။ အဲ့ဒီထဲကမှ ဒီယောဂစင်တာလေးက တစ်မူထူးခြားနေလို့ ပို့စ်သက်သက် ရေးတင်လိုက်တာပါ။

ဟိန္ဒူဘုရားတွေ
—————————
ယောဂစင်တာကြီးအကြောင်း မပြောခင် ဟိန္ဒူဘုရားအကြောင်း ပြောချင်ပါတယ်။ ဟိန္ဒူဘာသာမှာ တရိမုရတိခေါ်တဲ့ နတ်သုံးပါးအစုရှိပြီး အဲဒီနတ်ဘုရားသုံးပါးကတော့ လောကကို ဖန်ဆင်းသူ ဗြဟ္မာ၊ လောကကို ထိန်းသိမ်းစောင့်ရှောက်သူ ဗိရှနု(ဗိူနိုး)၊ လောကကို ဖျက်ဆီးပြီး လောကအသစ်တစ်ခုကို ထပ်မံဖန်ဆင်းသူ ရှိဗ(သိဝ)တို့ဖြစ်ကြပါတယ်။ ဒီနတ်သုံးပါးအနက် ဗြဟ္မာကို ပူဇော်ပသတဲ့ ဓလေ့ထုံးစံသိပ်မရှိလို့ အိန္ဒိယတစ်နိုင်ငံလုံးမှာ ဗြဟ္မာကို ရည်စူးပြီး ဆောက်လုပ်ထားတဲ့ နတ်ကွန်း အလွန်နည်းပါးပေမဲ့ ဗိရှနနဲ့ရှိဗကိုတော့ ခေတ်အဆက်ဆက်ကစပြီး ကျယ်ကျယ်ပြန့်ပြန့် ပူဇော်ပသလေ့ရှိကြပါတယ်။

Isha_Sadhguru_Centers_Adiyogi-Abode20150924_CHI_4406-e

ရှိဗရုပ်တုကြီး
—————————

ရှိဗကိုဘုရားကျောင်းတွေနဲ့ တည်ဆောက်ကိုးကွယ်လေ့ရှိပေမဲ့ ယောဂယဉ်ကျေးမှုမှာတော့ ရှိဗကို ဘုရားအဖြစ်ထက်စာရင် ပထမဆုံးယောဂီအဖြစ်သိထားကြပါတယ်။ ဒါကြောင့်လည်း အစ်ရှာယောဂစင်တာထဲမှာ ရှိဗရုပ်တုကြီးကို တည်ထားကိုးကွယ်ထားတာပဲဖြစ်ပါတယ်။ ၁၁၂ပေအမြင့်ရှိ ရှိဗရုပ်တုကြီးက စတီးနဲ့ထုဆစ်ထားတာဖြစ်ကာ ကမ္ဘာ့အကြီးဆုံးကိုယ်တစ်ပိုင်းပုံ ရုပ်တုကြီးပဲဖြစ်ပါတယ်။ ၂၀၁၇ခုနှစ်မှ စတင်ဖွင့်လှစ်ခဲ့တာဖြစ်ပြီး ဒီဇိုင်းပုံဖော်တာ ၂နှစ်ကြာကာ တည်ဆောက်တာကတော့ ရှစ်လပဲကြာခဲ့ပါတယ်။

ရုပ်တုကြီးက တောတောင်တွေ ဝန်းရံထားတဲ့ ကွင်းပြင်ကျယ်ကြီးထဲမှာ ထီးထီးကြီး တည်ရှိနေတာပါ။ ဟိုးအဝေးကြီးက လှမ်းကြည့်ရင်တောင်မြင်ရပါတယ်။ နဖူးတစ်ဖက်မှာ လခြမ်း၊ ပုခုံးတစ်ဖက်မှာ ပါးပျဉ်းထောင်နေတဲ့မြွေရုပ်ကြီးနဲ့ နှုတ်ခမ်းကပြုံးနေပြီး မျက်စိကမှိတ်လျှက်သားရှိနေကာ ဆံပင်တွေ လေထဲလွင့်နေသလိုမျိုးနဲ့ ရှိဗရုပ်တုကြီးက အသက်ဝင်လှပါတယ်။ ကားပေါ်မှာကတည်းက လှမ်းကြည့်စိတ်ဝင်စားနေကြပြီး ဓာတ်ပုံရိုက်ဖို့ ကင်မရာတပြင်ပြင်နဲ့ရယ်ပေါ့။ ကားဝန်းထဲ ရပ်သွားပြီးတဲ့အခါမှာတော့ အဝေးကတစ်ခါ အနီးကပ်တစ်ခါ ဓာတ်ပုံတွေ ရိုက်ကြတာပေါ့။

ရုပ်တုရှိရာရင်ပြင်ပေါ်တက်တဲ့အခါမှာတော့ ကိုယ်တွေဆီမှာလို ဖိနပ်ချွတ်ရပါတယ်။ ဒီရုပ်တုကြီးထဲကိုတော့ ကိုယ်တွေဆီမှာလို ဝင်လို့မရပါဘူး။ ရုပ်တုရှေ့ရင်ပြင်ပေါ်မှာ အဆောင်သေးသေးလေးရှိပြီး အဲ့အဆောင်ထဲမှာတော့ ဘုရားသီချင်းလိုမျိုး သီဆိုဝတ်ပြုနေကြပါတယ်။ လူတွေလည်း ဝင်ဝတ်ပြုလိုက် ထွက်လိုက်ရယ်ပေါ့။ ဆင်းတုကို ကန်တော့တာမျိုးမဟုတ်ဘဲ အဆောင်ခလယ်က ရုပ်တုတစ်ခုနား ဝိုင်းထိုင်ပြီး ဆိတ်ဆိတ်နေကာ ဝတ်ပြုတာမျိုးပါ။ အဲ့အဆောင်လေးထဲ ခဏသွားထိုင်လိုက်တဲ့အခါ စိတ်နှလုံးချမ်းမြေ့မှု ခံစားခဲ့ရပါတယ်။

မော်ဒန်နွားလှည်း
——————-
ရုပ်တုကြီးရဲ့ ကျောဘက်ကနေ ၁၀မိနစ်လောက်လမ်းလျှောက်သွားရင် ယောဂစင်တာဝန်းကြီးရဲ့ ဝင်ပေါက်ဂိတ်ကို ရောက်ပါတယ်။ တချို့ကလည်း လမ်းလျှောက်မသွားဘဲ နွားလှည်းနဲ့ သွားကြတယ်။ နွားလှည်းဆိုလို့ ကိုယ်တွေဆီက နွားလှည်းလို မထင်လိုက်နဲ့။ ဘက်ဂီကားလိုလို အမိုးနဲ့ ထိုင်ခိုင်နဲ့ ခေတ်မီနွားလှည်းကြီး။ ခုံ၂တန်းကို တစ်ဖက်တစ်ချက်ထားပြီး လူတွေက ဘေးတိုက်ထိုင်ရတာ။ ခုံတစ်တန်းကို ၅ယောက်ဆိုတော့ စုစုပေါင်း ၁၀ယောက်ဆန့်တဲ့ အမိုးတပ် နွားလှည်းပေါ့။ နွားတစ်ကောင်ထဲကမောင်းရပေမဲ့ ဘီးတွေက တာယာဘီးကို ၄ဘီးတပ်ပေးထားတော့ အရမ်းမလေးလောက်ဘူး ထင်ပါရဲ့။

Ishya ယောဂစင်တာ
—————————

ပါးပျဉ်းထောင်တဲ့ မြွေရုပ်ကြီးတွေနဲ့ ဂိတ်ဝကိုကျော်လိုက်တဲ့အခါမှာတော့ ထိုးထိုးထောင်နေတဲ့ ကွမ်းပင်တွေစီတန်းနေတဲ့ ကွမ်းတောကို တွေ့လိုက်ရပါတယ်။ မြို့သူမဆိုတော့ ကွမ်းပင်ကို ကွမ်းပင်မှန်းမသိ ဒီဒေသက အုန်းပင်တွေက ပိန်ပိန်သွယ်သွယ်နဲ့ စလင်းဘော်ဒီတွေပါလားလို့တောင် ထင်လိုက်မိသေး။ နောက်မှ မေးကြည့်မှ ကွမ်းပင်မှန်းသိခဲ့တာ။ 😛 ကွမ်းတော ဘေးလမ်းတလျှောက် ၁မိနစ်လောက်လျှောက်ပြီးတဲ့အခါမှာ နောက်တစ်ဂိတ်ကို ဝင်ရပြန်ပါတယ်။ အဲ့ဂိတ်ကစပြီး ဖုန်းလည်းပေးမသုံး၊ ဓာတ်ပုံလည်းပေးမရိုက်တော့ပါဘူး။

၁၅၀ဧကအကျယ်ရှိ ယောဂစင်တာဝန်းကြီးထဲမှာ ရှိဗရုပ်တုကြီးအပြင် တခြားထူးခြားတဲ့ နေရာတွေကတော့ လူပေါင်းရာချီတပြိုက်နက်တရားကျင့်နိုင်တဲ့ အမိုးခုံးအဆောက်အအုံကြီး၊ ကိုယ်လက်သန့်စင်အောင် ရေနှစ်ရတဲ့ ရေအိုင်တော်တွေ၊ လင်ဂါဘာဟီရာဗီနတ်သမီးရုပ်တုရှိရာ ဘုရားကျောင်း၊ စတုရန်းပေ ၆၄၀၀၀ကျယ်ဝန်းပြီး ဗိသုကာလက်ရာထူးခြားတဲ့ Spanda ခန်းမကြီးနဲ့ ရှိဗရုပ်တုငယ်ရှိရာ ဘုရားကျောင်းတို့ပဲဖြစ်ပါတယ်။ ဒါ့အပြင် ပန်းခြံကြီး၊ တရားထိုင်ခန်းမ၊ ယောဂကျင့်ရာအဆောင်တွေ၊ ညအိပ်ညနေတည်းခိုဆောင်တွေလည်းအများကြီးရှိပါတယ်။

ရေနှစ်တဲ့အတွေ့အကြုံ
—————————

အထဲရောက်တော့ ဟိန္ဒူအယူအရ ရေနှစ်တာကို လုပ်လို့ရတဲ့နေရာရှိတယ် လုပ်ကြည့်ချင်ရင် စာရင်းပေးပါဆိုတော့ ထိပ်ဆုံးကပေးဖြစ်ခဲ့ပါတယ်။ ရေနှစ်ခဲ့ရတဲ့ အတွေ့အကြုံကတော့ အတော်ထူးခြားပါတယ်။ ရေနှစ်တဲ့နေရာကိုခေါ်သွားပြီး ကိုယ်မှာဝတ်ထားတာတွေ အကုန်ချွတ် ရေချိုးသန့်စင်ပြီး သူတို့ပေးတဲ့ လိမ္မော်ရောင် ဂါဝန်ကြီးကိုဝတ်ရပါတယ်။ ရေနှစ်ရတဲ့နေရာကြီးက တော်တော့်ကိုထူးခြားပါတယ်။ အမိုးခုံးအမြင့်ကြီးရှိတဲ့ အဆောက်အအုံထဲ လှေကားထစ်တွေအများကြီးဆင်းသွားရပြီး အောက်ဆုံးမှာ ရေကန်ကြီးရှိနေတာပါ။ ရေကန်ကြီးကို လှေကားထိပ်ကနေလှမ်းမြင်ရပါတယ်။ ရေကန်တစ်ဖက်ကနေ တစ်ဖက်ကို လိမ္မော်ရောင်ဂါဝန်တွေ ဝတ်ထားတဲ့ အမျိုးသမီးတွေ တစ်ယောက်ပြီးတစ်ယောက်စီတန်းပြီး ရေကန်ကိုဖြတ်ကာ လျှောက်နေကြပါတယ်။ ရေကန်အနက်ကတော့ ခါးတဝက်ကျော် ရင်ခေါင်းလောက်ပေါ့။ ရေကန်အလယ်မှာ ကျောက်ရုပ်ကြီးတစ်ရုပ်ရှိပြီး တချို့ကအဲ့ကျောက်ရုပ်နေရာအရောက် ကျောက်ရုပ်ကို တစ်ပတ်ပတ်ဆုတောင်းပြီး အသက်အောင့်ကာ တစ်ကိုယ်လုံး ခေါင်းပါမကျန်ရေထဲနှစ်လိုက်ကြတယ်။ ရေကန်ရဲ့ အဆုံးမှာ ရေတံခွန်လို နံရံက စီးကျနေတဲ့ရေတွေလည်းရှိပြီး အဆောက်အအုံတစ်ခုလုံး တိတ်ဆိတ်ကာ အဲ့ဒီရေကျသံပဲ ကြားနေရပါတယ်။ ရေအိုင်ပေါ်က အမိုးခုံးကြီးက အမြင့်ကြီးဖြစ်သလို မျက်နှာကျက်ပန်းချီတွေ ရေးဆွဲထားတာ သိပ်ကိုလှပါတယ်။ အလေးအမြတ်ထားရာ ရေအိုင်တော်ဖြစ်ပြီး ခဏနေရင်ဝင်ရမယ့် တရားထိုင် အဆောက်အအုံထဲမဝင်ခင် ကိုယ်လက်သန့်စင်အောင် ဆေးကြောရတဲ့နေရာဖြစ်တယ်လို့ သိရပါတယ်။ ရှေးခေတ်ကို ပြန်ရောက်သွားသလို၊ သီးခြားကမ္ဘာထဲကို ရောက်နေသလိုနဲ့ ရေနှစ်တဲ့အတွေ့အကြုံက အတော်ကို ထူးခြားလှပါတယ်။

တရားထိုင်တဲ့ အတွေ့အကြုံ
—————————

ရေနှစ်ပြီးတဲ့အခါ ကိုယ့်အဝတ်အစားကိုယ်ပြန်လဲပြီး တရားထိုင်တဲ့နေရာကို သွားကြရပါတယ်။ တရားထိုင်ရတဲ့နေရာက ရိုးရိုးအဆောက်အအုံ၊ ရိုးရိုးအခန်းလို မဟုတ်ဘဲ ထူးခြားပါတယ်။ အုတ်ပေါင်း ၂သိန်းခွဲနဲ့ဆောက်ထားတဲ့ တိုင်မပါ အမိုးခုံးအဆောက်အအုံကြီးပါ။ လူပေါင်းရာချီ တပြိုက်နက် တရားကျင့်နိုင်ပါတယ်။ ဒီအဆောက်အအုံထဲမှာ အလှည့်ကျ တရားထိုင်ရတာပါ။ တစ်ခါထိုင်ရင် အနည်းဆုံး မိနစ်၂၀ပါ။ ဒီထက်ပိုထိုင်ချင်ရင်လည်း ရပါတယ်။ ကိုယ့်အသုတ်မရောက်ခင် အရှေ့ကအသုတ်ကို ရပ်စောင့်တဲ့အခါမှာလည်း အားလုံးတိတ်ဆိတ်နေကြရပါတယ်။ အရှေ့ကအသုတ်ထွက်ပြီးတဲ့အခါ အဆောက်အအုံကြီးထဲတန်းစီဝင်ပြီး နေရာယူကြရပါတယ်။

အဆောက်အအုံကြီးရဲ့ ဝင်ပေါက်ကတစ်ပေါက်ထဲပါ။ ပြတင်းပေါက်တွေလည်းမရှိဘဲ ပန်းကန်လုံးကိုမှောက်ထားတဲ့ ပုံစံဆောက်ထားတာပါ။ အလယ်မှာ ရုပ်တုကြီးတစ်ရုပ်ရှိပြီး အဲ့ရုပ်တုကို ဝိုင်းကာ တစ်တန်းပြီးတစ်တန်း ထိုင်ကြရပါတယ်။ အထဲမှာ ဝတ်ဖြူစင်ကြယ်ဝတ်ထားတဲ့ လူတစ်ယောက်က မိုက်နဲ့ ဥုံဆိုပြီး Mantra တွေကို သံစဉ်အလိုက် ဖြည်းဖြည်းကျယ်ကျယ် ရွတ်ဖတ်ပေးတာ တအားကို နားထောင်လို့ကောင်းပါတယ်။ လူပေါင်းရာချီရှိပေမဲ့ အားလုံးက ငြိမ်သက်တိတ်ဆိတ်နေကြပြီး အပ်ကျသံမကြားရအောင် တရားမှတ်နေကြပါတယ်။ မိနစ်၂၀ကြာခဲ့ပေမဲ့ ခဏလေးလိုပါပဲ။ အရမ်းကို အေးချမ်းတဲ့ စိတ်ခံစားမှုကို ခံစားရပါတယ်။ နောက်ထပ်ထိုင်ချင်ရင် အဆောက်အအုံထဲ ဆက်ထိုင်နေပြီး နောက်တစ်သုတ်နဲ့ ဆက် Join လို့ရပါသေးတယ်။ နောက်ထပ်ထိုင်ချင်ပေမဲ့လည်း ကိုယ့်အဖွဲ့နဲ့သွားလာရတာဆိုတော့ တစ်ကြိမ်ထဲနဲ့ အတွေ့အကြုံယူပြီး ကျေနပ်လိုက်ခဲ့ရပါတယ်။

လင်ဂါဘာဟီရာဗီနတ်သမီးကျောင်းဆောင်
——————————————–
ဝန်းထဲမှာ လင်ဂါဘာဟီရာဗီနတ်သမီးရဲ့ ဘုရားကျောင်းဆိုတာလည်း ရှိပါသေးတယ်။ ဒီယောဂစင်တာကို လာရောက်သူတိုင်း ဝင်ပြီး ဝတ်ပြုတတ်ကြပါတယ်။ ဒီမှာလည်း သူ့အသုတ်နဲ့ သူနေရာယူပြီး ဝတ်ပြုရပါတယ်။ လှူဖွယ်ပစ္စည်းတွေကို တစ်ခုပြီးတစ်ခု ဂါထာမန္တာန်တွေ ရွတ်ဆိုကာ ကပ်ပေးတာ နားထောင်လို့ကောင်း ကြည့်လို့ကောင်းပါတယ်။

Isha_Sadhguru_Centers_Linga-Bhairavi_20120219_CHI_0254-e

ယောဂကျင့်တဲ့အတွေ့အကြုံ
—————————

ယောဂစင်တာကို လာလေ့လာသူတွေအတွက် အခမဲ့ ယောဂသင်တန်းတွေလည်း ဖွင့်လှစ်ထားပါတယ်။ ဒီကို ရောက်လာသူတိုင်း လုပ်ကြည့်ကြပါတယ်။ ယောဂကျင့်ရတဲ့ အဆောက်အအုံတွေကလည်း အမိုးမြင့်မြင့်နဲ့ အုတ်စီအဆောက်အအုံတွေဖြစ်ပြီး ထူးခြားပါတယ်။ ယောဂကျင့်ဖျာတွေ အသင့်ခင်းထားပြီး နေရာယူရုံပါပဲ။ အင်္ဂလိပ်စကားပြော ယောဂဆရာမတစ်ယောက်ကနေပြီး အခြေခံကျတဲ့ ယောဂထိုင်နည်း ၅မျိုးလောက်ကို သင်ပေးပြီး လိုက်လုပ်ရပါတယ်။ နည်းမှန်လမ်းမှန်နဲ့ ကျင့်တတ်အောင် ရှေ့က TV ထဲမှာ မှားတတ်တဲ့ ပုံစံတွေကိုလည်း သေချာရိုက်ပြထားပါတယ်။ တော်တော်ကို အညောင်းပြေပြီး ခန္ဓာကိုယ်အတွက် အများကြီးအကျိုးရှိစေတဲ့ ယောဂထိုင်နည်းတွေပါ။

ညအိပ်ညနေတည်းမယ်ဆိုရင်
——————————-
ညအိပ်ညနေတည်းခိုကာ တရားထိုင် ယောဂကျင့်လိုသူတွေအတွက် အစားအသောက်အပါ စားရိတ်ငြိမ်း အစီအစဉ်တွေ ဝယ်ယူနိုင်ပါတယ်။ ကိုယ်တွေကို နေ့လည်စာနဲ့ ဧည့်ခံခဲ့တော့ သူတို့ဆီမှာကျွေးတဲ့ အစားအသောက်တွေ မြည်းစမ်းခဲ့ရတယ်။ သက်သက်လွတ်ထမင်းဟင်းတွေ ဖြစ်ပေမဲ့ အရမ်းကို လတ်ဆတ်ပြီး စားကောင်းပါတယ်။ တည်းခိုခန်းတွေကို ဝင်ကြည့်ရာမှာလည်း သန့်ပြန့်ပြီးအဆင့်မြင့်ပါတယ်။ ဟိုတယ်အငယ်စားလောက် Facility ပြည့်စုံပါတယ်။

နိုင်ငံတကာက လုပ်အားပေးတွေ
————————————

ယောဂစင်တာထဲ လုပ်အားပေးသူတွေအတွက်တော့ စင်တာထဲ ကြိုက်သလောက် စားရိတ်ငြိမ်းနေထိုင်ခွင့် ပေးထားပါတယ်။ စင်တာထဲနေရတာ အေးချမ်းလွန်းလို့ ကမ္ဘာတဝန်းကလာရောက်ကာ လုပ်အားပေးသူပေါင်း ၉သန်းကျော်ရှိပြီလို့သိရပါတယ်။ နုမြတ်တို့ သွားရောက်ခဲ့တုန်းက လိုက်ရှင်းပြသူတွေ၊ ယောဂဆရာမတွေဆိုရင် အမေရိကန်တို့၊ ဘရာဇီးတို့လို နိုင်ငံကြီးကလာသူတွေပါ။ ဒီမှာငြိမ်းချမ်းလွန်းလို့ တော်ရုံနဲ့ မပြန်နိုင်ကြဘူးလို့ဆိုပါတယ်။

အစ်ရှယောဂစင်တာကြီးက လူသားတွေရဲ့ အတွင်းစိတ် ငြိမ်းချမ်းဖို့၊ ကျန်းမာပြီး အေးချမ်းတဲ့ဘဝဖြစ်စေဖို့ တည်ဆောက်ဖန်တီးထားတာကြောင့် ကမ္ဘာအနှံ့အပြားက လူတွေကို ဆွဲဆောင်နေတာပါ။ အပတ်တိုင်း လူထောင်ချီလာရောက်ပြီး အတွင်းစိတ်ငြိမ်းချမ်းရာ ရှာကျတာတဲ့လေ။ ဒီလိုနေရာကို ရောက်ဖို့တောင် မပြောနဲ့ ရှိမှန်းတောင် မသိခဲ့တာပါ။ အခုမှသာ ရေစက်ပါပြီး ရောက်ခဲ့ရတာပါ။ ရောက်ခဲ့ရတဲ့ တစ်ရက်တာအတွင်းမှာလည်း ထူးခြားတဲ့ စိတ်ခံစားချက်တွေ၊ အတွေ့အကြုံတွေ၊ ငြိမ်းချမ်းမှုတွေကို ရရှိခဲ့ပါတယ်။

ပြောရမယ်ဆိုရင် ဒီနေရာက မြန်မာနိုင်ငံက တရားရိပ်သာတချို့နဲ့ ဆင်ပါတယ်။ ဒါပေမဲ့ သူတို့ဆီမှာကတော့ တရားထိုင်တာနဲ့ ယောဂကျင့်တာကို တွဲထားတာပါ။ အဆောက်အအုံတွေကို ရိုးရိုးအဆောက်အအုံတွေ၊ အခန်းတွေလိုမဟုတ်ဘဲတည်ဆောက်ထားပြီးတော့ နိုင်ငံတကာက ညအိပ်ညနေလာရောက် တရားထိုင်သူတွေအတွက်လည်း Facility အပြည့်ထားပေးထားပါတယ်။ ဒါကြောင့်လည်း နိုင်ငံတကာက လူတွေအများကြီး တကူးတကလာရောက်ကာ ငြိမ်းချမ်းမှုရှာကြတာပါ။

ဒီနေရာကို စိတ်ဝင်စားလို့ သွားချင်ရင် ဒီ link ထဲ ဝင်ကြည့်ပြီး စုံစမ်းကြည့်ပါနော်။ https://isha.sadhguru.org/us/en
အထဲမှာ ပုံတွေပေးမရိုက်လို့ပုံအတော်များများကိုတော့ အဲ့ဒီကနေပဲယူပြီး တင်ပေးထားပါတယ်။

ဒီအကြောင်းအရာကို စိတ်ဝင်စားရင် Like and Share လုပ်နိုင်ပါတယ်။ နောက်ထပ်စိတ်ဝင်စားဖို့ကောင်းတဲ့ နေရာတွေနဲ့ ခရီးစဉ်တွေအကြောင်း ပြောပြဦးမှာမလို့ နုမြတ်ရဲ့ Nu Myat around the World page လေးကို စောင့်ဖတ်နိုင်ပါတယ်နော်။

အားလုံးကျန်းမာပျော်ရွှင်နိုင်ကြပါစေ
ချစ်ခင်လျှက်
Dr.Nu Myat

ကမ္ဘာ့ဒုတိယ အကြီးဆုံးနိုင်ငံ ကနေဒါ (Canada, World 2nd Largest Country)

August 20, 2019April 20, 2021Posted in Canada, Travel, UncategorizedTagged Canada, ski, snow, Travel1 Comment

ကမ္ဘာ့ဒုတိယ အကြီးဆုံးနိုင်ငံ
ကနေဒါ 🇨🇦🌎🏔

ကနေဒါနိုင်ငံဆိုတာ ကမ္ဘာပေါ်မှာ ဒုတိယအကြီးဆုံးနိုင်ငံဖြစ်သလို အချိန် ၆မျိုးရှိတဲ့နိုင်ငံ၊ ကမ္ဘာ့စံချိန်တင်တဲ့နိုင်ငံ၊ စိမ်းပြာရောင် ရေကန်ကြီးတွေအပါအဝင် ရေကန်ပေါင်း၂သန်းရှိတဲ့နိုင်ငံ၊ဧရာမဥယျာဉ်ကြီးတွေရှိတဲ့နိုင်ငံ၊ လေထုသန့်ရှင်းတဲ့နိုင်ငံ၊ ရောကီးတောင်တန်းတွေရှိတဲ့နိုင်ငံ၊ Maple ပင်တွေ အများကြီးရှိတဲ့ နိုင်ငံ တစ်ခုလည်းပဲဖြစ်ပါတယ်။ နုမြတ်တို့ ကနေဒါကို ဒီ ဧပြီတုန်းက၂ပတ်တာ သွားရောက်လည်ပတ်ဖြစ်ခဲ့ပြီး ကနေဒါက ထင်ထားတာထက်ပိုလှ ပိုစိတ်ဝင်စားစရာကောင်းတာကိုလည်း တွေ့ခဲ့ရပါတယ်။ ကနေဒါက ဘယ်လိုတွေ ထူးခြားမှုရှိနေလဲဆိုတာ ဖတ်ကြည့်ကြပါနော်။

🌎ဒုတိယအကြီးဆုံးနိုင်ငံ

ကနေဒါနိုင်ငံဟာ ရုရှားနိုင်ငံပြီးရင် ကမ္ဘာပေါ်မှာအကြီးဆုံးနိုင်ငံကြီးပါ။ တတိယအကြီးဆုံးနိုင်ငံကတော့ တရုတ်နိုင်ငံပါ။ ကနေဒါနိုင်ငံကြီးက ဘယ်လောက်တောင်ကျယ်လဲဆိုရင် စတုရန်းကီလိုမီတာပေါင်း ၉.၉၈သန်း (စတုရန်းမိုင်၃.၈၅သန်း) နီးပါးကျယ်ဝန်းပါတယ်။ မြန်မာနိုင်ငံရဲ့ ၁၅ဆလောက်ကိုကြီးပါတယ်။ မြန်မာနိုင်ငံကတော့ ကမ္ဘာပေါ်မှာ ၃၉နိုင်ငံမြောက်အကြီးဆုံးနိုင်ငံပါတဲ့။

⏰အချိန် ၆မျိုးရှိတဲ့ နိုင်ငံ
ဧရိယာ ကျယ်လွန်းအားကြီးလွန်းလို့ တစ်နိုင်ငံထဲမှာတင် Time Zone ၆ခုတောင် ရှိနေပါတယ်။ တစ်နယ်နဲ့ တစ်နယ် အချိန်တွေ မတူကြပါဘူး။ အနောက်ဘက်မှာရှိတဲ့ Vancouver မြို့နဲ့ အရှေ့ဘက်မှာရှိတဲ့ St.John’s မြို့ဆို အချိန် လေးနာရီခွဲတောင်ကွာပါတယ်။ Time Zone အကြောင်းပြောရမယ်ဆိုရင် ကမ္ဘာပေါ်မှာ Time Zone အများဆုံးနိုင်ငံက ပြင်သစ်ပါတဲ့။ နိုင်ငံ သိပ်မကြီးပေမဲ့ နေရာအနှံ့က ကျွန်းတွေကို ပိုင်ထားတော့ Time Zone 13 ခုတောင်ရှိတာတဲ့လေ။ အကြီးဆုံးနိုင်ငံ Russia နဲ့ စတုတ္ထအကြီးဆုံးနိုင်ငံ USA ကတော့ Time Zone ၁၁ခုရှိတယ်။ တတိယအကြီးဆုံးနိုင်ငံ တရုတ်ကတော့ ထူးထူးခြားခြား Time Zone တစ်ခုပဲ သတ်မှတ်တယ်တဲ့။ ဧရိယာဘယ်လောက်ပဲကျယ်ကျယ် စံတော်ချိန်တစ်ခုထဲ သတ်မှတ်ထားတာပါ။

📰ကမ္ဘာ့စံချိန်တင်တဲ့နိုင်ငံ
ကနေဒါနိုင်ငံမှာ ကမ္ဘာ့စံချိန်တင်တဲ့အရာတွေလည်း များစွာရှိလို့နေပါတယ်။
ကမ္ဘာပေါ်မှာအရှည်ဆုံးလမ်းဟာ ကနေဒါနိုင်ငံ Ontarioပြည်နယ်မှာရှိတဲ့ Yonge လမ်းဖြစ်ပြီး မိုင်ပေါင်း၁၀၀၀ကျော် ရှည်လျားပါတယ်။
ဒါ့အပြင် ကမ္ဘာ့အရှည်ဆုံး ပင်လယ်ကမ်းရိုးတန်းလည်း ရှိလို့နေပါတယ်။ ကမ်းရိုးတန်းအရှည်က မိုင်ပေါင်း ၁သိန်းခွဲကျော်ထိရှိပြီး အတ္တလန္တိတ်၊ အာတိတ်နဲ့ ပစိဖစ်သမုဒ္ဒရာ ၃ခုနဲ့တောင် ထိစပ်နေတာပါတဲ့။
ကမ္ဘာ့အကြီးဆုံးကျွန်း ၁၀ခုအနက် ၃ခုကိုလည်း ကနေဒါနိုင်ငံက ပိုင်ဆိုင်ထားပါတယ်။ အကြီးဆုံးကျွန်းဆိုရင် Great Britain ထက် ၂ဆလောက်ကြီးပြီး နောက်၂ကျွန်းဆို အင်္ဂလန်နိုင်ငံ အရွယ် အစားလောက်ထိ ရှိပါတယ်။

🏞ရေကန်ပေါင်း၂သန်းရှိတဲ့ နိုင်ငံ
သဘာဝအလှတွေပေါကြွယ်ဝတဲ့ ကနေဒါဟာ ကမ္ဘာပေါ်မှာ သဘာဝရေကန် အများဆုံးလည်း ပိုင်ဆိုင်ထားပါတယ်။ ကမ္ဘာပေါ်ရှိ သဘာဝရေကန်ပမာဏရဲ့ တစ်ဝက်ကျော်က ကနေဒါမှာရှိပါတယ်။ တစ်နိုင်ငံလုံးမှာရေကန်ပေါင်း ၂သန်းနီးပါး ရှိပြီး အွန်တာရီယိုပြည်နယ်တစ်ခုထဲမှာတင် ရေကန်ပေါင်း ၂သိန်းခွဲရှိကာ ကမ္ဘာ့ရေချိုပေါင်းရဲ့ ၃ပုံတစ်ပုံကိုပိုင်ဆိုင်ထားတာတဲ့လေ။ ကမ္ဘာ့အကြီးဆုံးရေကန်ကြီးတွေထဲက ရေကန်၂ခုလည်းပိုင်ဆိုင်ထားပါတယ်။ တောတောင်တွေ ဝန်းရံထားပြီး ကြည်လင်လွန်းလှတဲ့ စိမ်းပြာရောင်ရေကန်ကြီးတွေက ကမ္ဘာကျော်ပါတယ်။

🌳ဧရာမဥယျာဉ်ကြီးတွေရှိတဲ့ နိုင်ငံ
သဘာဝရှုခင်းတွေအရမ်းလှတဲ့ ကနေဒါမှာ ကမ္ဘာကျော်ရုပ်ရှင်တွေအများကြီး လည်းလာရိုက်လေ့ရှိကြပါတယ်။ ကမ္ဘာ့သစ်တောတွေရဲ့ ၂၀ရာခိုင်နှုန်းက ကနေဒါနိုင်ငံမှာရှိတာပါ။ သစ်တောအကျယ်အဝန်းပေါင်း ၃၉၆.၉သန်း ဟက်တာရှိတဲ့ ကနေဒါရဲ့ အမျိုးသားဥယျာဉ်ကြီးတွေဟာ နိုင်ငံအတော်များများထက်တောင် ပိုကြီးနေတာကိုတွေ့ရပါတယ်။

🏕လေထုသန့်ရှင်းတဲ့ နိုင်ငံ
သစ်တောတွေ သစ်ပင်တွေ အများကြီးရှိလို့လည်း ကနေဒါမှာ လေကောင်းလေသန့်ရှူရှိုက်နိုင်ပြီး ကမ္ဘာပေါ် စတုတ္ထမြောက်လေထုအသန့်စင်ဆုံးနိုင်ငံအဖြစ် သတ်မှတ်ခံထားရတာပါ။

⛷နှင်းလျှောစီးနိုင်ငံ
ကနေဒါရဲ့ ရာသီဥတုကလည်း အမြဲလိုလိုအေးနေတတ်ပါတယ်။ ကျွန်မတို့မိသားစုအလည်အပတ်သွားခဲ့တဲ့ နွေဦးအစ ဧပြီလထဲမှာတောင် အတော်အေးတာကို တွေ့ခဲ့ရတယ်။ တောင်ထိပ်မှာ နှင်းတွေ အမြဲမပြတ်ဖုံးနေတဲ့ ရော့(ခ်)ကီးတောင်တန်းတွေရှိလို့ နှင်းလျှောစီးတဲ့နိုင်ငံအဖြစ်လည်း နာမည်ကြီးပါတယ်။

🇨🇦မေပယ်လ်ရွက်နိုင်ငံ
ကနေဒါအလံကိုမြင်ဖူးကြမယ်ထင်ပါတယ်။ ထူးထူးခြားခြားသစ်ရွက်ပုံပါတဲ့အလံလေးပေါ့။ အဖြူရောင်အောက်ခံမှာ အနီရောင် မေပယ်လ်ရွက်လေးထင်းနေတာ။ Maple ပင်တွေကို ကနေဒါက သိပ်တန်ဖိုးထားတာ။ နိုင်ငံရဲ့ National Tree အဖြစ်လည်း သတ်မှတ်ထားကြတယ်။ ကနေဒါမေပယ်လ်ပင်ကရတဲ့ သကြားရည် Maple syrup ဆိုလည်း အရသာအရမ်းရှိလို့နာမည်သိပ်ကြီးပါတယ်။

🏙လည်ပတ်စရာမြို့(10) မြို့

ကနေဒါနိုင်ငံမှာ လူဦးရေက စုစုပေါင်း ၃၆သန်းကျော် ရှိပြီး ၁.၄သန်းကပဲ ဒေသခံလူမျိုးတွေ ဖြစ်ပါတယ်။ လူဦးရေရဲ့ ၉၀ရာခိုင်နှုန်းနီးပါးက အမေရိကန်နဲ့ ကနေဒါ နယ်စပ်နားဝန်းကျင်မှာနေကြပါတယ်။ လည်ပတ်ရတဲ့ မြို့အတော်များများကလည်း နယ်စပ်နားမှာ ရှိတာများပါတယ်။ နုမြတ်တို့ ကနေဒါသွားလည်တုန်းက Tourist Attraction တွေရှိတဲ့ West Coast ရော East Coast ရော လည်ဖြစ်ခဲ့တယ်ပေါ့နော်။ ကနေဒါခရီးစဉ် စုစုပေါင်း ၁၄ရက်အတွင်းမှာ မြို့ပေါင်း ၁၂မြို့လောက် ရောက်သွားခဲ့တယ်။ အဲ့ထဲကမှ လည်စရာကောင်းတဲ့ မြို့ ၁၀မြို့ အကြောင်း ပြောပြချင်ပါတယ်။

🌇East Coast (၅)မြို့
(1) Toronto

ကနေဒါရဲ့ အကြီးဆုံးမြို့ကတော့ တော်ရန်တိုမြို့ (Toronto)ပါ။ အမေရိကန်နိုင်ငံနဲ့ နယ်စပ်မှာရှိနေပြီး ကနေဒါနိုင်ငံနဲ့ အမေရိကန်နိုင်ငံ ၂ခုကြားမှာ နိုင်အာဂရာရေတံခွန်ကြီး (Niagara Falls) ခြားထားပါတယ်။ ဒီရေတံခွန်ကြီးက အရမ်းကြီးပြီးလှလွန်းလို့ ကမ္ဘာကျော်လှပါတယ်။ အမေရိကန်ရောက်တုန်းက အမေရိကန်ဘက်အခြမ်းကနေ ရေတံခွန်ကြီးကို သွားကြည့်ခဲ့သေးတယ်။ ဒါပေမဲ့ ကနေဒါဘက်ကနေ မြင်ရတာပိုလှပါတယ်။ ရေတံခွန်ကြီးတစ်ခုလုံးကို အပေါ်စီးက မြင်ရအောင် Tower ပါဆောက်ပေးထားတော့ အရမ်းမိုက်ပေါ့။ ရေတံခွန်တစ်ဖက်ခြမ်းက အမေရိကန်နိုင်ငံကို ကနေဒါကနေ လှမ်းမြင်နေရတယ်။ တံတားနဲ့ဖြတ်ကူးလိုက်ရုံပဲ။ နီးနီးလေးပါ။

ပြီးတော့တစ်ချိန်တုန်းက ကမ္ဘာ့အမြင့်ဆုံး Tower ဖြစ်ခဲ့ဖူးတဲ့ CN Tower လည်း Toronto မြို့မှာရှိတယ်။ သူက ခုချိန်မှာတော့ Tower ထဲမှာ တတိယအမြင့်ဆုံး Tower ပေါ့။ ပေ ၁၈၀၀ ကျော် အမြင့်ရှိတဲ့ အထပ်ရဲ့ အပြင်ဘက် အစွန်းကနေ လျှောက်ရတဲ့ Edge Walk ဆိုတာ ရင်တထိပ်ထိပ်နဲ့ အကြမ်းစားကြီးသိလား။

(2) Montreal

ကနေဒါရဲ့ ဒုတိယအကြီးဆုံးမြို့ မွန်ထရီယယ် (Montreal) မြို့က ပြင်သစ်နိုင်ငံက ပဲရစ်မြို့ပြီးရင် ကမ္ဘာပေါ်မှာ ပြင်သစ်စကားပြောလူဦးရေအများဆုံးမြို့ပဲဖြစ်ပါတယ်။ သူက ပြင်သစ်ကိုလိုနီလက်အောက်ခံဖြစ်ခဲ့ဖူးတယ်ဆိုတော့ တော်တော်များများက ပြင်သစ်လိုပြောတတ်ကြတာပါ။

(3) Quebec City

Canada အရှေ့ပိုင်းမြို့လေး ကွေးဘက်စီးတီး (Quebec City )ကလည်း ပြင်သစ်မြို့လေးလိုပဲ။ အိမ်လေးတွေ လမ်းလေးတွေကတကယ် ဥရောပစတိုင်။ ပြင်သစ်လက်အောက်ခံ နယ်မြေဖြစ်ခဲ့ဖူးတော့ အဲ့ကလူတွေအကုန်လုံးလိုလို ပြင်သစ်လိုပြောတတ်တယ်တဲ့။ အဲ့မြို့လေးက မြောက်အမေရိကတိုက်မှာ မြို့ရိုးရှိခဲ့ဖူးတဲ့ တစ်ခုတည်းသောရှေးဟောင်းမြို့ဖြစ်ပြီး UNESCO World Heritage site အဖြစ် သတ်မှတ်ခံထားရပါတယ်။

ပြီးတော့Korea Drama ကား Goblin ဇာတ်ကားလေး လာရိုက်ခဲ့တဲ့မြို့လေးဆိုတော့ Goblin ထွက်လာတဲ့ တံခါးနီနီလေးကိုလည်း မရမကရှာပြီးရိုက်ခဲ့သေးတယ်လေ။

(4) Ottawa

ကနေဒါနိုင်ငံရဲ့ မြို့တော်နဲ့ အစိုးရရုံးထိုင်ရာမြို့ကတော့ အော်တဝါ (Ottawa) မြို့ပါ။ ဒီက နေပြည်တော်လိုပေါ့။ အဲ့ရောက်လို့ရှိရင် ဗိသုကာလက်ရာမြောက်တဲ့ အစိုးရရုံးတွေ ပါလီမန်အဆောက်အအုံတွေကို လေ့လာခဲ့ဦးပေါ့။

(5) Kingston

ကနေဒါအရှေ့တောင်ပိုင်းက ဆိပ်ကမ်းမြို့လေး ကင်စတန် (Kingston) ကတော့ သာယာအေးချမ်းလွန်းလို့ သက်ကြီးရွယ်အိုပင်စင်စားတွေ အေးအေးဆေးဆေးအခြေချ နေထိုင်ကျတဲ့မြို့လေးပါတဲ့။

🌃West Coast (5)မြို့

(6) Vancouver

ကနေဒါအနောက်ဘက် ကမ်းခြေမြို့ ဗန်ကူးဗား(Vancouver )ကတော့ ပင်လယ်တွေ၊ နှင်းတောင်တွေ ဝန်းရံထားလို့ လှပတဲ့ရှုခင်းတွေကြောင့် ကျော်ကြားတဲ့ မြို့ကြီးတစ်မြို့ပဲဖြစ်ပါတယ်။ Vancouver မြို့လေးက သိပ်သာယာတာပဲ။ နှင်းဖုံးနေတဲ့ ရေခဲတောင်လေးတွေကိုတောင် မြို့ထဲလမ်းတွေကနေ လှမ်းမြင်ရတယ်။ သမုဒ္ဒရာထဲရေဆင်းကူးမလား၊ နှင်းတောင်ပေါ်မှာ နှင်းလျှောစီးမလား၊ ပန်းခြံထဲလမ်းလျှောက်မလား။ ဒါတွေအားလုံးကို တစ်နေ့ထဲအပြီးလုပ်လို့ရတဲ့ မြို့လေးပေါ့။ ဒါကြောင့်လည်း ကမ္ဘာပေါ်မှာ နေပျော်စရာအကောင်းဆုံးမြို့လို့ သတ်မှတ်ခံထားရတာနေမယ်။

Vacouver တစ်မြို့လုံးကို လှမ်းမြင်ရတဲ့ Stanley Park ကလည်း ရေလည်သာယာတယ်နော်။ ရာသီဥတုအေးစိမ့်စိမ့်လေးမှာ ကောင်းကင်ပြာပြာကြီးရယ် တိုက်အမြင့်ကြီးတွေ ထိုးထောင်နေတဲ့မြို့ရှုခင်းရယ် နောက်ခံထားပြီး ပင်လယ်ကမ်းစပ်တလျှောက် လမ်းလျှောက်ကြသူတွေ၊ ပြေးကြသူတွေ၊ စက်ဘီးစီးကြသူတွေ အများကြီးပဲ။ အဲ့မှာသာဆို ကိုယ်လည်း နေ့တိုင်းစက်ဘီးတွေ စီးဖြစ်မယ်ထင်တယ်။ သာယာလွန်းလို့ သိပ်သဘောကျတာပဲ။

မြို့ထဲကနေ နာရီဝက်လောက်မောင်းရတဲ့ Capilano ကြိုးတံတားပေါ် သည်းထိပ်ရင်ဖိုဖြတ်ချင်လည်းရတယ်။ ကြိုးတံတားကအမြင့်ကြီးပဲ။ အောက်မှာ ချောက်ကြီးအနက်ကြီး။ စမ်းချောင်းလေးကလည်း တသွင်သွင်စီးနေတာ။ ချောက်ကမ်းပါးနံရံကြီးတွေနားကနေဖြတ်လျှောက်ရတဲ့ Cliff Walk လည်း လုပ်ခဲ့သေးတယ်။ သစ်ပင်ကြီးတွေကိုဆက်ထားတဲ့ ကြိုးတံတားလည်း လျှောက်ခဲ့သေးတယ်။

Vancouver International လေဆိပ်နားက Richmondမြို့မှာ ရှိတဲ့ Factory Outlet မှာလည်း Shopping ထွက်လို့ရသေးတယ်။ Coach, MK, Kate Spade, Nike စတဲ့ ကမ္ဘာကျော် Brand တွေကို တော်တော် သက်သာတဲ့ဈေးနဲ့ဝယ်နိုင်တဲ့နေရာပေါ့။

(7) Victoria

ကနေဒါနောက်ပိုင်းရဲ့ ရှေးအကျဆုံးမြို့ဟောင်း ဗစ်တိုးရီးယား (Victoria) မြို့ကို ဗန်ကူဗါးကနေ နေ့ချင်းပြန်သွားလို့ရတယ်။ ဗန်ကူးဗါးကနေ Victoria မြို့ကို ဘယ်လိုသွားခဲ့လည်းသိလား။ ပင်လယ်ကူးဇက်ကြီးနဲ့ပေါ့။ ဇက်ဆိုလို့ အထင်မသေးနဲ့ဆရာရေ။ Cruise လိုတောင်ထင်ရတယ် မိုက်မှမိုက်။ BC Ferry ဇက်သင်္ဘောကြီးက ၆ထပ်တောင်ရှိတာ။

အဲ့မှာမလည်မဖြစ်ကတော့ Hatley ရဲတိုက်ကြီးပေါ့။ လှလွန်းလို့ Batman ကား X Man ကားနဲ့ Hollywood ဇာတ်ကားအတော်များများ လာရိုက်ခဲ့တာတဲ့လေ။ အရင်က Sir တွေနေခဲ့တာဖြစ်ပြီး အခုတော့ University တစ်ခုကို လှူထားပါတယ်တဲ့။ ရဲတိုက်ကြီးရယ် မြက်ခင်းပြင်ကြီးရယ် ချယ်ရီပင်လေးရယ် ရေကန်ကျယ်ကြီးရယ် ရာသီဥတုအေးအေးလေးရယ် နေခြည်နွေးနွေးလေးရယ်နဲ့ ညနေခင်းလေးက တကယ်ကို Perfect ပါပဲ။

(8) Whistler

Vancouver ကနေ ၂နာရီလောက်မောင်းရင် ရောက်တဲ့ ဝှစ်စလာ (Whistler) မြို့လေးမှာ ပေ၆၀၀၀ မြင့်တဲ့ Blackcomb ရေခဲတောင်ရှိတယ်။ ၂၀၁၀ခုနှစ်တုန်းက Winter Olympic ကျင်းပခဲ့တဲ့ရေခဲတောင်တဲ့လေ။ တောင်ခြေကနေ တောင်ပေါ်ကို မိနစ်၂၀လောက် Gondola Ride နဲ့ တက်ရတယ်။ တောင်ခြေမှာကတည်းက Temperature က 2 ံC ဖြစ်နေပါပြီ။ ရေခဲတောင်ဆိုတော့ Ski စီးတဲ့သူတွေလည်း အများကြီးပါပဲ။

(9) Kelowna

ဗန်ကူးဗားကနေ Banff မြို့သွားတဲ့ လမ်းမှာရှိတဲ့ ကီလိုးနားမြို့(Kelowna) Okanagan ရေအိုင်ကြီးကလည်း ထူးဆန်းတဲ့ရေသတ္တဝါကြီးတွေ့ခဲ့ဖူးတယ်ဆိုပြီး နာမည်ကြီးပါတယ်။ Ogopogo လို့အမည်ပေးထားတဲ့ ဧရာမရေသတ္တဝါကြီးရုပ်တုကို ရေအိုင်စပ်မှာ ထုဆစ်ထားတာကိုလည်းတွေ့ရမှာပါ။ မြို့မှာရှိတဲ့ ဝိုင်ပြခန်းသွားပြီး ကနေဒါဝိုင်ကိုလည်း သွားရောက်မြည်းစမ်းဝယ်ယူနိုင်ပါတယ်။

(10) Banff

နှင်းတောင်တွေ ဝန်းရံနေတဲ့ ကနေဒါနောက်ပိုင်း ဘန့်ဖ် (Banff) မြို့လေးကတော့ အနီးအနားမှာရှိတဲ့ စိမ်းပြာရောင်ရေကန်တွေနဲ့ တောင်တွေကြောင့် သဘာဝနှစ်သက်သူ၊ စွန့်စားခရီးသွားတွေ အလာများတဲ့မြို့လေးပေါ့။ အဲ့မြို့လေးမှာ Hot Spring စိမ်ခဲ့သေးတယ်။ 0•C အေးစက်နေတဲ့ရာသီဥတုမှာ ရေခဲတောင်ကိုကြည့်ပြီး ၄၀ဒီဂရီ စင်တီဂရိတ်ရှိတဲ့ ရေပူစမ်းထဲက ရေနွေးနွေးလေးစိမ်ရတာ အရမ်းကိုနေလို့ကောင်းတာပါပဲ။

Canada နိုင်ငံရဲ့နာမည်ကျော် Lake Louise ကန်ဘေးက Fairmont Hotel ကလည်း ရေကန်ကြီးရယ် ရေခဲတောင်တွေရယ်လှမ်းမြင်ရတဲ့ ဒဏ္ဏာရီဆန်တဲ့ ရှုခင်းတွေကြောင့် ကျော်ကြားလှပါတယ်။ Lake Louise ရေကန်ကြီးက ရေလေးတွေစိမ်းပြာလဲ့နေလို့ နာမည်ကြီးတဲ့ ရေကန်ကြီးပေါ့။ ကိုယ်တွေရောက်တဲ့အချိန်မှာတော့ ရေတွေခဲပြီး ရေခဲပြင်ကြီးဖြစ်လို့နေပါတယ်။ ရေခဲတွေ၊ နှင်းတွေပေါ် လျှောက်သွားခဲ့တာ ရေကန်အလယ်လောက်ထိတောင်ရောက်သွားပါတယ်။

Lake Louise Ski Resort ရေခဲတောင်ပေါ်က နှင်းလျှောစီးစခန်းလည်းသွားခဲ့သေးတယ်။ ရေကန်ကြီးကိုလှမ်းမြင်ရပြီး တောင်ပေါ်မှာ နှင်းလျှောစီးသမားတွေနဲ့ ပြည့်နေတာ။ ကိုယ်တွေကတော့ ဓာတ်ပုံရိုက်သမားတွေပေါ့။ 😀

Banff အကြောင်းကို ပို့စ်သက်သက်ရေးပေးထားသေးတယ်။ ဒီမှာ ဝင်ဖတ်ကြည့်ပါနော်။

ဒါကတော့ Lake Louise Ski Resort ရဲ့ ပုံတွေပါ။

အစားအစာ

ကနေဒါအစားအစာတွေက ထွေထွေထူးထူးတော့ သိပ်မရှိပါဘူး။ Maple ပင်တွေတန်ဖိုးထားတဲ့ နိုင်ငံဖြစ်တော့ ပေါင်မုန့်တွေ Waffle တွေမှာ သုတ်စားတဲ့ သကြားရည်Maple Syrup ကို Souvenir အဖြစ်ရောင်းကြတယ်။ Maple Tea လဘက်ခြောက်တွေလည်း ဝယ်လာခဲ့သေးတယ်။ ဒေသစာအနေနဲ့ Poutine ဆိုတာ နာမည်ကြီးတယ်။ အာလူးချောင်းကြော်နဲ့ ချိစ်တွေကို အညိုရောင်အနှစ်စမ်းထားတာ။ အီတာတော့ အရမ်းအီတာပေါ့။ Salmonငါးပေါတဲ့နိုင်ငံဖြစ်လို့ Smoked Salmon လည်းနာမည်ကြီးတယ်။ ကော်ဖီကြိုက်သူတွေ ကနေဒါရောက်ရင် မသောက်မဖြစ်ကတော့ Tim Hortons ကော်ဖီပေါ့။ ကနေဒါမှာ Starbucks ထက်ပိုနာမည်ကြီးတယ်။ ဆိုင်ခွဲတွေလည်း နေရာအနှံ့မှာရှိတယ်။

ပိုက်ဆံ

ကနေဒါမှာ Canadian Dollar သုံးပါတယ်။ မြန်မာငွေနဲ့တွက်ကြည့်ရင် 1$ကို ၁၀၀၀ကျော်ကျော်ပဲဆိုတော့ တွက်ရအရမ်းလွယ်ပါတယ်။

🏔ဘယ်အချိန်သွားသင့်လဲ

Canada မှာ အလှဆုံးကာလကတော့ မေလအစကနေ ဇွန်လကုန်ထိပါ။ နွေရာသီဖြစ်တဲ့ မေလနဲ့ဇွန်လမှာ ရေကန်က ရေတွေ အရေပျော်နေတာမို့လို့ စိမ်းပြာရောင်ရေကန်တွေနဲ့အရမ်းလှတဲ့ ရှုခင်းကို မြင်ရမှာပါ။ ဆောင်းဦးဖြစ်တဲ့ စက်တင်ဘာနဲ့ အောက်တိုဘာလမှာလည်း ရွက်ဝါတွေနဲ့ အပင်တွေက အရမ်းကိုလှပါတယ်တဲ့။ ကိုယ်တွေသွားခဲ့တဲ့ ဧပြီလကလည်း နေသာနဲ့နေရာသာ ရေခဲတဲ့နေရာခဲနဲ့ လည်ပတ်ရအဆင်ပြေပါတယ်။

💵ဘယ်လိုသွားခဲ့လဲ ဘယ်လောက်ကုန်လဲ

ဒီဧပြီလတုန်းက သင်္ကြန်ပိတ်ရက်တွေမှာ သွားခဲ့တာပါ။ သုခလမ်းညွှန် ရဲ့ အစီအစဉ်နဲ့ ကနေဒါအနောက်ပိုင်းကိုလည်ပတ်ခဲ့ပြီး ကနေဒါအရှေ့ပိုင်းကိုတော့ ကိုယ့်အစီအစဉ်နဲ့ကိုယ် လည်ပတ်ခဲ့တာပါ။ ကုန်ကျစားရိတ်ကတော့ နည်းနည်းတော့များပါတယ်။ လေယာဉ်ခတင်ဈေးများနေတာဆိုတော့လေ။ Cathay Pacific လေကြောင်းလိုင်းနဲ့ ရန်ကုန်ကနေ ဗန်ကူးဗားမြို့ကိုဟောင်ကောင်ကနေတဆင့်ခံပြီးသွားခဲ့ကြတာပါ။ Package Tour က ကနေဒါအနောက်ပိုင်း ၁၀ညအိပ်-၁၁ရက်ခရီးကို တစ်ယောက်ကို စားရိတ်ငြိမ်း US$ 4700 ကျပါတယ်။ အရှေပိုင်း ကိုယ့်ဘာသာကိုယ် လည်ပတ်တာတွေနဲ့ ပေါင်းရင်တော့ တစ်ယောက်ကို US$ 6000 နီးပါး (မြန်မာငွေသိန်း၇၀ကျော်) ကုန်ခဲ့ပါတယ်။ တချို့က လေယာဉ်ခဈေးများတာရယ် လေယာဉ်အကြာကြီးစီးရတာရယ်နဲ့ ကာမိအောင် တလက်စတည်း အမေရိကန်နိုင်ငံကိုပါ ဝင်လည်ကြပါတယ်။

🌎Visa ဘယ်လို လျှောက်လည်း

မြန်မာနိုင်ငံမှာ ကနေဒါသံရုံးမရှိလို့ ဗီဇာကို သံရုံးမှာ သွားလျှောက်လို့မရပါဘူး။ ဒါပေမဲ့ ရွှေတိဂုံဘုရားလမ်းရှိ Prime Hill Business Square အဆောက်အအုံမှာရှိတဲ့ VSF Global Myanmar ရုံးကနေ Canada Visa လျှောက်လို့ရပါတယ်။ အဲ့ဒီရုံးမှာ Australia Visa တို့ UK Visa တို့လည်း လျှောက်လို့ရပါတယ်။ Canada Visa နဲ့ ကတ်သက်ပြီး လိုအပ်တဲ့အချက်တွေ သိချင်ရင် http://www.vfsglobal.ca/canada/myanmar/ မှာ ဝင်ကြည့်ပါ။ Visa က ခက်သလားဆိုတော့ မခက်ပါဘူး။ ဒါပေမဲ့ လွယ်တဲ့ထဲမှာလည်း မပါပါဘူး။ လိုအပ်တဲ့ ဖောင်တွေ စာရွက်စာတမ်းတွေပြရင် ရဖို့များပါတယ်။ ဒါပေမဲ့လည်း တခြားနိုင်ငံကြီးတွေ သွားထားဖူးမှ မြန်မာနိုင်ငံကိုပြန်လာမယ့်သူတွေဆိုတာ သေချာမှ ပေးတာပါ။ နုမြတ်တို့ဆို မိသားစု၅ယောက်လျှောက်တာ ၅ယောက်လုံးရပါတယ်။ အတူလျှောက်တဲ့ ကျန်တဲ့ သူတွေတော့ Visa မရပါဘူး။ နုမြတ်တို့ကိုတော့ ခရီးခဏခဏသွားနေတဲ့သူတွေမို့လို့လားတော့ မသိဘူး။ တစ်နှစ်အတွင်း စိတ်ကြိုက်သွားနိုင်တဲ့ Multiple Visa ကို မလျှောက်ဘဲနဲ့တောင် ပေးလိုက်တာ အံ့အားသင့်စရာပါ။ Visa လျှောက်ချိန်က ၄ပတ်ကနေ ၆ပတ်ကြား ကြာတတ်လို့ သွားမယ်ဆို စောစောလျှောက်သင့်ပါတယ်။

ဒီလောက်ဆို ကနေဒါနဲ့ ပတ်သက်ပြီး အတော်အသင့်သိလောက်ပြီထင်ပါတယ်။ ကနေဒါစားရိတ်ငြိမ်းခရီးစဉ်တွေကို သုခလမ်းညွှန် Travels & Tours – Outbound Dept; ဖုန်းနံပါတ် 09977906677 က စီစဉ်ပေးနေလို့ သွားလည်ချင်ရင် စုံစမ်းကြည့်ကြပါနော်။ ကနေဒါမှာက လည်ပတ်လို့ကောင်းတဲ့အပြင် ပညာရေးလည်း အရမ်းကောင်းပါတယ်။ ပညာရေးနဲ့ပတ်သက်ပြီး ကျောင်းတွေတက်ချင်ရင်တော့ ကနေဒါ ရောက် မြန်မာတယောက် PAGE မှာစုံစမ်းနိုင်ပါတယ်နော်။

ဒီပို့စ်ကိုနှစ်သက်သဘောကျရင် Like နဲ့ Share လုပ်လို့ရပါတယ်။ နောက်ထပ်လည်း စိတ်ဝ်စားစရာနိုင်ငံတွေ၊ နေရာတွေ၊ ခရီးတွေ အကြောင်း တင်ပေးဦးမှာမို့လို့ Nu Myat around the World page ကို Like and See First လုပ်ထားနိုင်ပါတယ်နော်။

ချစ်ခင်လျှက်
Dr. Nu Myat

လာအိုကို ဘန်ကောက်ကနေ ညရထားနဲ့သွားမယ် (Bangkok to Laos by Train)

August 20, 2019April 20, 2021Posted in Adventure, Asia, Travel, UncategorizedTagged adventure, Asia, food, laos, Nature, TravelLeave a comment

လာအိုကို ဘန်ကောက်ကနေ
ညရထားနဲ့သွားမယ်

ကိုယ်တွေရဲ့ အိမ်နီးချင်းနိုင်ငံလေး လာအိုဟာ နီးရက်နဲ့ဝေးနေတဲ့ နိုင်ငံလေးပါ။ သူ့ဆီ မြန်မာနိုင်ငံကနေ တိုက်ရိုက်လေကြောင်းလိုင်းမရှိတော့ လွယ်လွယ်ကူကူသွားလို့မရဘူးဖြစ်နေတာပေါ့။ လာအိုကိုသွားချင်ရင် တခြားနိုင်ငံကနေတဆင့်သွားမှ ရမှာပါ။ များသောအားဖြင့် ထိုင်းကနေ တဆင့်သွားကြပါတယ်။

ထိုင်းကနေ လာအိုဆီ လေယာဉ်နဲ့သွားနိုင်သလို ရထားရယ်၊ ကားရယ်နဲ့လည်းသွားလို့ရပါတယ်။ ကျွန်မတို့ကတော့ ထိုင်းနိုင်ငံ ဘန်ကောက်ကနေ ညအိပ်ရထားစီးပြီး လာအိုနိုင်ငံကိုသွားခဲ့တာပါ။ ဘန်ကောက်ရောက်တုန်း လာအိုဘက်ပါ သွားလည်မယ်ဆိုပြီး လာအိုမြို့တော်ဗီယန်ကျင်းမြို့နဲ့ Adventure တွေအများကြီးလုပ်လို့ရတဲ့ သဘာဝမြို့လေး ဗန်ဗီယန်းမြို့ကို သွားလည်ခဲ့တာပါ။

ညရထားအမျိုးအစားနဲ့ ဈေးနှုန်း

ဘန်ကောက်ကနေ လာအိုကို ရထားနဲ့သွားမယ်ဆိုရင် ထိုင်း-လာအိုနယ်စပ်မြို့ဖြစ်တဲ့ နွန်းခိုင်မြို့(Nong Khai) ကနေတဆင့် သွားမှရမှာပါ။ Bangkok – Nong Khai ရထားလက်မှတ်ကို ဘန်ကောက်မြို့ထဲက Hua Lumpong ဘူတာကြီးမှာ သွားဝယ်ရပါတယ်။ နုမြတ်တို့ကတော့ အဲ့တုန်းက Baiyoke Sky မှာတည်းတော့ ဟိုတယ်ဘေးက Travel Agent မှာ ဝယ်ခဲ့ပါတယ်။

နွန်းခိုင်သွားတဲ့ ရထားတွေထဲမှာ ညအိပ်စင်ပါတဲ့ ညရထား၂မျိုးရှိပါတယ်။ ည ၈နာရီထွက်တဲ့ Special Express အမျိုးအစား Number 25 က ပိုကောင်းပြီး ပိုသန့်ပါတယ်။ အဲ့ရထားလက်မှတ် မရှိတော့လို့ ည၈း၄၅ ထွက်တဲ့ Rapid အမျိုးအစား Number 133 ကိုပဲ စီးခဲ့ရပါတယ်။

ည၈နာရီထွက်တဲ့ ရထားမှာ ၂ယောက်သီးသန့် အိပ်ခန်း 1st Class ရှိပြီး အပေါ်ခုံ ၁၁၅၇ဘတ် (၄၆၀၀၀ကျပ်) အောက်ခုံ ၁၃၅၇ဘတ် (၅၄၀၀၀ကျပ်) ကျသင့်ပါတယ်။ 2nd class ကတော့ အိပ်စင်ပါတဲ့ ဘုံအခန်းဖြစ်ပြီး အပေါ်ခုံ ၇၄၈ဘတ်(၃၀၀၀၀ကျပ်) အောက်ခုံ ၈၃၈ဘတ် (၃၃၅၀၀ ကျပ်)ပါ။ အဲကွန်းပါပါတယ်။

ည၈း၄၅ထွက်တဲ့ရထားမှာတော့ အဲကွန်းပါတဲ့ 2nd Class အိပ်စင်ဘုံခန်းက အပေါ်ခုံဆို ၆၁၈ဘတ်(၂၅၀၀၀ကျပ်) နဲ့ အောက်ခုံဆို ၆၈၈ (၂၇၅၀၀ကျပ်) ဘတ်ပါ။ အဲကွန်းမပါတဲ့ ထိုင်ခုံတွဲတွေလည်းရှိပါတယ်။ 2nd Class ဆို ၃၄၈ဘတ် (၁၄၀၀၀ကျပ်) နဲ့ 3rd Class ဆို ၂၁၃ ဘတ် (၈၅၀၀ကျပ်) ပဲကျမှာပါ။

နုမြတ်တို့ သွားခဲ့တာက ၃ယောက်ဆိုတော့ 2nd Classမှာ အောက်၂ခုံ ပေါ်တစ်ခုံ ယူလိုက်ပါတယ်။ ၁ဘတ်ကို ၄၀ကျပ်နဲ့ တွက်မယ်ဆိုရင်တော့ အပေါ်ခုံက ၂၅၀၀၀ ကျပ်နဲ့ အောက်ခုံက ၂၇၅၀၀ ကျပ်ဝန်းကျင်လောက်ကျသင့်မှာပါ။

ရထားစီးအတွေ့အကြုံ

Hua Lumpong ဘူတာကြီးဆီကို မြို့ထဲ Pratunam ဝန်းကျင်ကနေသွားမယ်ဆိုရင် ၁၀မိနစ်လောက်ပဲကြာပါတယ်။ ၁နာရီကျော်လောက် ကြိုအရောက်သွားပြီး ကိုယ့်ရထားတွဲကို သေချာရှာပြီး ခုံတွေမှာနေရာချရပါမယ်။ ရထားပေါ်တက်တက်ချင်း ရိုးရိုးထိုင်ခုံတွေလိုပါပဲ။ ရထားမောင်းပြီး ခဏအကြာမှာမှ အိပ်ယာလာပြင်ပေးပါတယ်။ အိပ်စင်က အပေါ်နဲ့ အောက် ၂ဆင့်လိုဖြစ်ပြီး အပေါ်တက်ဖို့ လှေကားလေးတွေလည်းရှိပါတယ်။သဘောကျတာလေးတစ်ခုက ပြတင်းပေါက်ဘေးတင်မဟုတ် လျှောက်လမ်းဘေးမှာပါ လိုက်ကာလေးတွေ ကာပေးထားတော့ ကိုယ်အိပ်တဲ့အခါမှာ Privacy ရှိတာကိုပါ။

ရထားက ည၈နာရီရထားလောက်တော့ မသန့်ပါဘူး။ ဒါပေမဲ့ အဲကွန်းခန်းနဲ့ဆိုတော့ သူ့ဟာနဲ့ သူတော့ အဆင်ပြေပါတယ်။ Luggage တွေပါလာရင်လည်း ကိုယ့်အိပ်စင်နားမှာ ထားလို့ရတယ်။ ဖုန်းအားသွင်းဖို့ အပေါက်လည်းပါပါတယ်။ အိမ်သာကတော့ ဘုံအိမ်သာပေါ့။ ရေချိုးခန်းမပါပေမဲ့ ဘေစင်တော့ပါတယ်။ ရထားက အရမ်းမလှုပ်တော့ အိပ်ရတာအဆင်ပြေပါတယ်။

ရထားပေါ်မှာ ကိုယ်တွေဆီမှာလိုပဲ မနက်စောစောမှာ ဈေးသည်တွေတက်ရောင်းပါတယ်။ မနက်မှာလာရောင်းတဲ့ ကြက်ကင်နဲ့ ကောက်ညှင်းကောင်းမှကောင်းပဲ။ ကြက်ကင်အကြီးကြီး တစ်ကောင်လုံးမှ ဘတ်၆၀ပဲပေးရတယ်။ အရမ်းအရသာရှိတာပဲ။ သွားဖြစ်ရင် ဝယ်စားကြည့်နော်။

ထိုင်း-လာအိုနယ်စပ်

မနက် ၈း၃၅မှာ နွမ်းခိုင်မြို့ဘူတာကို ရောက်ပြီး ဘူတာကနေ ထိုင်းနယ်စပ်ဖြတ်ကျော်ဂိတ်ဆီ တုပ်တုပ် ၁၀မိနစ်လောက်စီးသွားရပါတယ်။ ထိုင်း Immigration Gate ကနေ Passport ပြပြီးထွက်ကာ ထိုင်း-လာအို ချစ်ကြည်ရေးတံတားဖြတ်သွားရပါတယ်။ ဒီတံတားဖြတ်ဖို့ ဘတ်စ်ကားတွေရှိပါတယ်။ ၅မိနစ်လောက် မောင်းရပြီး တစ်ယောက်ကို ဘတ်၂၀ ပေးရပါတယ်။ မြစ်တစ်ဖက်ရောက်တဲ့အခါ လာအို Immigration Gate ကိုဖြတ်ပြီး လာအိုကိုသွားနိုင်ပါတယ်။ လာအိုနိုင်ငံတွင်း ဝင်ရောက်ဖို့ Passport ပဲလိုပြီး Visa မလိုပါဘူး။

သတိထားရမှာကတော့ လာအိုကနေ ထိုင်းကိုပြန်ဝင်မယ်ဆိုရင် ကုန်းလမ်းကဝင်ရင် ထိုင်းဗီဇာလိုပါလိမ့်မယ်။ လေကြောင်းနဲ့ဆိုရင်တော့ မလိုပါဘူး။ ဒါကြောင့် လာအိုအသွားကို ကြိုက်သလို သွားလို့ရပေမဲ့ လာအိုကနေအပြန်ကတော့ လေယာဉ်ပျံနဲ့ဲပြန်တာပိုကောင်းမှာပါ။ ကုန်းကြောင်းက ပြန်ရင်လည်း ထိုင်းဂိတ်မှာ Re-entry Visa ပြန်လျှောက်ရင်ရပါတယ်။ ဘတ်၁၀၀၀ (၄၀၀၀၀ကျပ်) လောက်တော့ကျပါလိမ့်မယ်။ ကိုယ်တွေကတော့ အပြန်ကို လေယာဉ်နဲ့ပဲပြန်ခဲ့ပါတယ်။ Bangkok Transit ဖြစ်ပေမဲ့ ထိုင်းထဲမဝင်တော့ဘဲ ရန်ကုန်တိုက်ရိုက် ပြန်ခဲ့ပါတယ်။

လာအိုရောက်ပြီ

လာအိုနိုင်ငံ Immigration ကိုကျော်ပြီးတဲ့အခါမှာတော့ လာအိုနိုင်ငံတွင်းမြို့အသီးသီးဆီသွားလို့ရတဲ့ ကားဂိတ်တွေ တွေ့ရပါတယ်။ အဲ့ဒီကနေ ဗန်ဗီယန်းမြို့ကို ကားဂိတ်ကနေ တန်းသွားခဲ့ကြတာပါ။ နယ်စပ်ဂိတ်ကနေ ဗန်ဗီယန်းမြို့ကို ကားနဲ့ ၄နာရီလောက်ပဲမောင်းရပြီး ကားခ တစ်ယောက်ကို မြန်မာငွေ၈၀၀၀ကျပ်လောက်ပဲ ကျပါတယ်။ မြို့တော် ဗီယန်ကျန်းကိုဆိုရင် နာရီဝက်လောက်ပဲကြာမှာ ဖြစ်ပြီး လောင်ပရာဖန်ကို တန်းသွားမယ်ဆိုရင်တော့ ၈နာရီကြာမှာပါ။ နုမြတ်တို့ကတော့ ဗန်ဗီးယန်း မြို့ကို အရင်သွားခဲ့တယ်။ အပြန် ဗီယန်ကျင်းကနေ လေယာဉ်နဲ့ပြန်မှာဆိုတော့ စိတ်ချရအောင်ပေါ့။

Van Vieng မြို့

ဗန်ဗီယန်းက တကယ်တော့ တောတောင်တွေ ဝန်းရံနေတဲ့ နယ်မြို့သေးသေးလေးပါ။ မြို့ထဲမှာလမ်းဆိုလို့ လမ်းသုံးလမ်းရယ်၊ ဈေးရယ်၊ အဝေးပြေးဂိတ်ရယ်ပဲရှိလို့နေတာပါ။ ထူးခြားတာကတော့ အဲ့ဒီ နယ်မြို့သေးသေးလေးမှာ နိုင်ငံခြားသားတွေ ပြည့်နေတာကိုပါ။ အထူးသဖြင့် အနောက်နိုင်ငံသားတွေနဲ့ ကိုရီးယားတွေ အလာများပါတယ်။ ဧည့်လာများတဲ့မြို့ဖြစ်တော့ ဒေသခံတွေထက်တောင် ဧည့်သည်က ပိုလို့တောင်များနေပါတယ်။ မြို့ထဲဘာမှသိပ်မရှိပေမဲ့ အကောင်းစား ဟိုတယ်ကြီးတွေ၊ Resort တွေ၊ တည်းခိုခန်းတွေ၊ Backpacker တွေအတွက် Hostel အဆောင်တွေ၊ စားသောက်ဆိုင်တွေ၊ ဘားတွေနဲ့ ပြည့်လို့နေပါတယ်။

ဗန်ဗီယန်းကို ဧည့်သည်တွေလာကြတဲ့ အဓိကအချက်ကတော့ တောတောင်မြစ်ချောင်း သဘာဝတရားတွေကြောင့်ပါ။ ဧည့်သည်တွေက မြို့ကို ဖြတ်စီးနေတဲ့ နမ်ဆန်မြစ်ထဲ Kayak လှေလှော်ကြတယ်။ Tubing လို့ခေါ်တဲ့ ဘောကွင်းပေါ်ထိုင်ပြီး ရေစီးကြောင်းအတိုင်း မြောကျတယ်။ ဂူတွေထဲစီးဝင်နေတဲ့ ဂူအောက် မြစ်ထဲ ဘောကွင်းစီးကြတယ်။ ရေပြာအိုင်တွေထဲ ရေစိမ်ကြပြီး ရေပြာအိုင်ပေါ်အုပ်မိုးနေတဲ့ သစ်ပင်ရဲ့ သစ်ကိုင်းတွေပေါ်ကနေ ရေပြာအိုင်ထဲ တဗွမ်းဗွမ်းနဲ့ ခုန်ဆင်းကြတယ်။ ကျောက်တောင်တွေတက်ကြတယ်။ ကျောက်ဂူတွေထဲဝင်ကြတယ်။ စပါးခင်းတွေထဲလမ်းလျှောက်ကြတယ်။ စက်ဘီးလေးတွေ ဆိုက်ကယ်တွေကိုယ်တိုင်မောင်းပြီး ဟိုဒီလျှောက်သွားကြတယ်။ သစ်ပင်တစ်ပင်နဲ့တစ်ပင်ကြား Zipline တွေစီးကြတယ်။ မြစ်ကမ်းစပ်ကတဲလေးတွေမှာ အကင်တွေစားပြီး လေညှင်းခံကြတယ်။ သဘာဝတရားထဲ သဘာဝအတိုင်းပျော်မွေ့နိုင်ကြလို့ လူငယ်တွေ တအားကြိုက်ကြပါတယ်။

ညဘက်ဆိုလည်း မြို့ထဲဘားတွေ၊ ကလပ်တွေမှာ လူစည်လွန်းလို့ လူငယ်တွေပျော်မွေ့ရာ ပါတီမြို့၊ ကျောပိုးအိတ်တစ်လုံးထဲလွယ်ပြီးလျှောက်သွားကြတဲ့ လူငယ်တွေအလာများလို့ Backpacker မြို့၊ စွန့်စွန့်စားစားအရာတွေ လုပ်လို့ရလို့ Adventure မြို့လေး အဖြစ် လူသိများပါတယ်။

ဘာတွေလုပ်ခဲ့လဲ

နုမြတ်တို့ ဗန်ဗီယန်းမြို့လေးကို ညနေလောက်ရောက်တာဆိုတော့ ဟိုတယ်မှာ Check In ဝင်ပြီး အလင်းရောင်ရှိတုန်း မြို့ထဲ ဟိုကြည့်ဒီကြည့်လျှောက်ကြည့်ခဲ့တယ်။ ကိုယ်တွေတည်းတာ Grandview Riverside Hotel ပါ။ နာမည်က အပျံစားဖြစ်ပေမဲ့ မိုတယ်အဆင့်လောက်ပါပဲ။ မြစ်ကမ်းဘေး ၃ယောက်ခန်းကို US$ ၅၀ ကျော်လောက်ပဲကျတယ်ဆိုတော့လည်း သူ့ဈေးနဲ့သူ မဆိုးဘူးပြောရမှာပါ။ ဒါပေမဲ့ ဟိုတယ်ထဲဝင်ရင် ဖိနပ်ချွတ်ဝင်ရတာကတော့ တော်တော်မနိပ်ပါဘူး။ ဟိုတယ် Location ကောင်းလို့ရယ် Website က ပုံလေးတွေက မဆိုးတော့လည်း ရွေးဖြစ်ခဲ့တာပါ။ ဟိုတယ်ကမြစ်ဘေးတင်ဆိုတော့ မြစ်ထဲကရှုခင်းတွေကိုလည်း လှမ်းမြင်ရတာပေါ့။တောတောင်တွေနောက်ခံနဲ့ မြစ်ရှုခင်းကတော်တော်သာယာပါတယ်။ မြစ်ထဲမှာလည်း Speed Boat စီးတဲ့သူတွေ Kayak လှေလှော်သူတွေနဲ့ ပြည့်နေတာ။ မြို့ထဲစနည်းနာပြီး နောက်နေ့အတွက် Tour တွေစုံစမ်းနေတာနဲ့ နေဝင်ချိန်ကိုတောင်မခံစားလိုက်ရဘူး။ ဟိုရောက်ရင်လည်ပတ်ဖို့ စိတ်မပူနဲ့။ ဟိုတယ်ကထွက်လိုက်တာနဲ့ လမ်းဘေးဝဲယာမှာ Tour Agent တွေ တပုံကြီး။ ကြိုက်တဲ့ Activities လုပ်ဖို့ ကြိုက်တာရွေးဝယ်လို့ရတယ်။ နောက်နေ့ နေ့တဝက်နေမှာဆိုတော့ Half Day Tour ဝယ်လိုက်တယ်။ အဲ့ညမှာတော့ မြစ်တစ်ဖက်ကမ်းကို ဝါးတံတားလေးနဲ့ကူးပြီး မြစ်ဘေးက တဲလေးတွေမှာ အကင်စားပြီး အေးဆေးလေညှင်းခံခဲ့ကြတယ်။ တဲတွေမှာ လင်းထိန်နေပြီး သီချင်းတွေအကျယ်ကြီး ဖွင့်ထားတာ ပျော်ဖို့ကောင်းပါတယ်။ မြစ်ကမ်းဘေးမှာတော့ တချို့က မီးပုံးပျံတွေ လွှတ်တဲ့သူကလွှတ်ပေါ့။

နောက်တစ်ရက်မှာတော့ ဟိုတယ်ကို Tour က ကားနဲ့လာခေါ်ပြီး Activities တွေလုပ်မယ့်နေရာကို ပို့ပေးပါတယ်။ စစချင်း Cave Tubing လို့ခေါ်တဲ့ ဂူထဲဘောကွင်းစီးဝင်ခဲ့တယ်။ ဘောကွင်းပေါ်ထိုင်ပြီး ဂူအောက်မြစ်ထဲ ရေစီးအတိုင်းဝင်ရတာ။ မှောင်ထဲမဲထဲဆိုတော့ စိတ်လှုပ်ရှားဖို့တော့ကောင်းတာပေါ့။ ရေဆုံးတဲ့အခါ ဂူထဲ လမ်းလျှောက်ဝင်ရတယ်။ အစအဆုံးစီးရမယ်ထင်ပြီး ဖိနပ်ချွတ်ထားခဲ့မိတော့ ခြေထောက်တွေ အသေစူးပေါ့။အချိန်ရရင် မြစ်ထဲလှေလှော်တဲ့ Kayaking ပါလုပ်မယ့်ဟာကို မလုပ်လိုက်ရဘူး။ Cave Tubing မှာ ခေါင်းမှာတပ်ရမယ့် Headlight ကို သွားယူနေတာကို အကြာကြီးစောင့်နေရလို့ မလုပ်လိုက်ရတာ။

Blue Lagoon လို့နာမည်ကြီးတဲ့ ရေပြာအိုင်ရောက်ဖို့ ကားနဲ့နည်းနည်းသွားရတယ်။ ရေကတော့ တကယ်ပြာပါတယ်။ ပြာလဲ့နေတာ။ အေးလည်းအရမ်းအေးတယ်။ ဒါပေမဲ့ သူက ကားပါကင်ဘေးတင်ရှိတာဆိုတော့ အိုင်ဘေးပတ်လည်ကနေလူတွေထိုင်ပြီး ကြည့်နေကြတာ။ ရေပြာအိုင်ထဲကို သစ်ကိုင်းပေါ်ကနေခုန်ချတာကို အားပေးနေကြတာလေ။ မသိရင် ပွဲကြည့်နေသလိုပဲ။ ခုန်ချပြီးတာနဲ့ လက်ခုပ်တွေဝိုင်းတီးကြတာ။ သစ်ကိုင်းက ၂ဆင့်ရှိတယ်။ အပေါ်တဆင့်က တော်တော်မြင့်တယ်။ ရောက်လက်စနဲ့မထူးဘူးဆိုပြီး အားတင်းပြီး ခုန်ချခဲ့သေးတယ်။

ရေပြာအိုင်ထဲမှာ ဒန်းလိုမျိုးတွေလည်း လုပ်ထားသေးတယ်။ ကန်ဘေးကနေ ကြိုးတွေခုန်ပြီး ခုန်ချတာမျိုးလည်းလုပ်ကြတယ်။ ဒါပေမဲ့ လူအရမ်းရှုပ်လို့ အေးဆေးမနေရပါဘူး။ နောက်ထပ်ရေပြာအိုင်တစ်ခုကတော့ ပိုကြီးတယ်တဲ့။ ဒါပေမဲ့ အချိန်မရှိတော့ ဒီမှာပဲ ရေဆော့ခဲ့ရတယ်။ မြို့ထဲပြန် Lunch စားပြီးတော့ Vientiane ကို ကားနဲ့ဆက်ကူးခဲ့ပါတယ်။ ကားတွေက Hi Ace လိုကားမျိုးတွေမှာ တခြားလူတွေနဲ့ လိုက်စီးရတာပါ။ ကား ၄နာရီလောက်မောင်းရပါတယ်။

ဗီယန်ကျန်းမြို့

မြို့တော် ဗီယန်ကျင်း(Vientianne) ကတော့ ထိုင်းနိုင်ငံနယ်စပ်နားရှိ မဲခေါင်မြစ်ကမ်းမှာရှိပြီး စန္ဒကူးမြို့တော် (သို့) လမြို့တော်လို့အဓိပ္ပါယ်ရပါတယ်။ ၂၀၁၅ခုနှစ် စစ်တမ်းများအရ လူဦးရေ ၇သိန်း၆သောင်းကျော်ပဲရှိတဲ့ မြို့လေးပါ။ ကျွန်မတို့ရဲ့အကြီးဆုံးမြို့ ရန်ကုန်မှာ လူဦးရေ ၇သန်းကျော်ရှိတာဆိုတော့ ရန်ကုန်နဲ့ယှဉ်ရင် ၁၀ပုံ ၁ပုံလောက်ပဲရှိပါတယ်။

သမိုင်းတလျှောက်မှာ ဗီယန်ကျင်းမြို့က တစ်ချိန်က မြို့ပျက်ကြီး ဖြစ်ခဲ့ဖူးပါတယ်။ ၁၇၀၇ ခုနှစ်က လာအိုမင်းနေပြည်တော်ရဲ့ မြို့တော်အဖြစ်စတင်သတ်မှတ်ခံခဲ့ရပေမဲ့ ၁၈၂၇ခုနှစ်မှာ ထိုင်းလူမျိုးတို့ ကျူးကျော်သိမ်းပိုက်ပြီး ဖျက်စီးခဲတာကြောင့် မြို့ပျက်ကြီးဖြစ်သွားခဲ့ရပါတယ်။ ၁၈၉၃ခုနှစ်မှာ လာအိုနိုင်ငံ ပြင်သစ်ကိုလိုနီလက်အောက်ကျရောက်ပြီးနောက် ၁၈၉၉ခုနှစ်ရောက်မှ လာအိုနိုင်ငံရဲ့မြို့တော်အဖြစ် ပြန်လည်သတ်မှတ်ခံခဲ့ရတာပါ။ ပြင်သစ်ကိုလိုနီလက်အောက်ကျရောက်ခဲ့ဖူးလို့ အဆောက်အအုံတချို့က ပြင်သစ်ဗိသုကာလက်ရာတွေဖြစ်နေတာကို တွေ့ခဲ့ရပါတယ်။

သွားလည်ရမယ့်နေရာများ

ဗီယန်ကျင်းမြို့ရောက်ရင် မသွားမဖြစ်နေရာအဖြစ် အကျော်ကြားဆုံးကတော့ မြို့ထဲကနေ ၁နာရီလောက်မောင်းရတဲ့ Buddha Park (ဗုဒ္ဓပန်းခြံ) ပဲဖြစ်ပါတယ်။ ၁၉၅၈ခုနှစ်က လာအိုဘုန်းတော်ကြီးတစ်ပါးဦးဆောင်ပြီး ပန်းခြံထဲမှာ ဘာသာရေးဆိုင်ရာ ရုပ်တုပေါင်း ၂၀၀ကျော် ထုဆစ်ထားရှိခဲ့တာပဲဖြစ်ပါတယ်။ ဟိန္ဒူဘာသာနဲ့ ဗုဒ္ဓဘာသာ ဇာတ်နိပါတ်တော်တွေထဲက နတ်ဘုရားရုပ်တုတွေကို ထုဆစ်ထားရှိရာမှာ ၄၀မီတာအမြင့်ရှိတဲ့ လျောင်းတော်မူဘုရား၊ အဝင်ဝနားရှိ ဖရုံသီးသဏ္ဏာန် ၃ထပ်အဆောက်အအုံ၊ ဦးခေါင်းသုံးလုံးပါ ဆင်နတ်ဘုရား၊ ဦးခေါင်း ၁၂လုံးပါနတ်ဘုရားစတဲ့ ရုပ်တုတွေက ထင်ရှားပါတယ်။

မြို့ထဲရှိ ထင်ရှားတဲ့အဆောက်အအုံတစ်ခုကတော့ Patuxai Victory Monument မော်ကွန်းတိုင်ကြီးပဲဖြစ်ပါတယ်။ ပြင်သစ်နိုင်ငံ ပဲရစ်မြို့ရှိ နာမည်ကျော် Arc de Triomphe မော်ကွန်းတိုင်နဲ့ဆင်ပြီး ဟိန္ဒူနတ်ဘုရားရုပ်တွေနဲ့ ဒီဇိုင်းဆင်ထားတဲ့ လာအိုဗိသုကာလက်ရာတွေကိုပါ တွေ့မြင်နိုင်ပါတယ်။ စစ်ပွဲများမှာ ကျဆုံးခဲ့သူများကို ရည်စူးပြီး ဆောက်လုပ်ထားရှိခဲ့တယ်လို့ သိရပါတယ်။

လာအိုက ဗုဒ္ဓဘာသာကိုးကွယ်တဲ့ နိုင်ငံဖြစ်တဲ့အလျှောက် မြို့တော်ဗီယန်ကျင်းမှာ ဖူးမြော်စရာ ဘုရားစေတီတွေများစွာရှိပါတယ်။ တန်ခိုးအကြီးဆုံး နာမည်အကြီးဆုံးကတော့ That Luang စေတီပါ။ ရွှေရောင်လွှမ်းနေတဲ့စေတီက လာအိုဗိသုကာလက်ရာနဲ့ တည်ထားကိုးကွယ်ခဲ့တာဖြစ်ပြီး လာအိုနိုင်ငံရဲ့ အထင်ကရအဆောက်အအုံအဖြစ်လည်း ထင်ရှားပါတယ်။

အခုလက်ရှိ ထိုင်းနိုင်ငံဘန်ကောက်မြို့ရှိ နာမည်ကျော် မြဘုရားဆင်းတုကို အပူဇော်ခံထားရှိခဲ့ဖူးတဲ့ ကျောင်းတော်ကြီး Wat Ho Phra Keo ကတော့ မြို့ထဲမှာရှိပြီး လှပတဲ့ ရိုးရာဗိသုကာလက်ရာတွေကြောင့် ကျော်ကြားပါတယ်။ မြဘုရားဆင်းတုကို ထိုင်းနိုင်ငံမြောက်ပိုင်းကနေ လာအိုဘုရင်သိမ်းပိုက်ခဲ့စဉ်တုန်းက ထားရှိကိုးကွယ်ခဲ့တာဖြစ်ပြီး နောက်ပိုင်း ထိုင်းစစ်တပ်က ပြန်လည်ပင့်ဆောင်သွားခဲ့တယ်လို့ သိရပါတယ်။

လွန်ခဲ့တဲ့ နှစ်ပေါင်း ၄၀၀ကျော်က ဘုရားကျောင်းဆောင်တည်ဆောက်ရာမှာ ယာဇ်အပူဇော်ခံခဲ့ရတဲ့ ကိုယ်ဝန်ဆောင်အမျိုးသမီး ဆီမောင်းကို အစွဲပြုပြီး မှည့်ခေါ်ခဲ့တဲ့ Wat Si Muang ကျောင်းဆောင်ကလည်း ဘုရားဖူးသူတွေနဲ့ စည်ကားနေပါတယ်။

ထိုင်းကျူးကျော်ခဲ့စဉ်တုန်းက မပျက်စီးခဲ့တဲ့ တစ်ခုတည်းသောကျောင်းဆောင် Wat Si Saket ကတော့ နှစ်ပေါင်း၂၀၀နီးပါးသက်တမ်းရှိပြီး မြို့ထဲသမ္မတအိမ်တော်ရာနားမှာရှိကာ ဗုဒ္ဓဆင်းတုငယ်ပေါင်း အရွယ်စုံ ပုံစံစုံ ၆၈၀၀ကျော်ရှိလို့ ထင်ရှားပါတယ်။

ဘာတွေလုပ်ခဲ့လည်း

Vientiane မြို့ရောက်တဲ့အခါမှာတော့ မြို့ထဲက Khampiane Boutique Hotel မှာ Check in ဝင်ပြီး အနီးအနားက ဘုရားတွေဆီလမ်းလျှောက်သွားကြည့်ခဲ့တယ်။ ဒါပေမဲ့ ညနေစောင်းပြီဆိုတော့ ဘုရားတွေပိတ်နေပါပြီ။ လမ်းမှာလည်း လူတွေတအားရှင်းတာပဲ။ ကားဌားဖို့ Taxi လည်းမတွေ့။ တုပ်တုပ်လည်းမတွေ့။ လာအိုမြို့တော်ဖြစ်ပြီး လူရှင်းလိုက်တာလို့တောင် တွေးမိသေးတယ်။ ကံကောင်းချင်တော့ လမ်းအတော်လျှောက်ပြီးတဲ့အခါ တုပ်တုပ်တစ်စီးရပ်ထားတာတွေ့တာနဲ့ ဌားပြီး ကမ်းနားက ညဈေးထွက်ခဲ့တယ်။ ညဈေးနားမှာတော့ ကားတွေရော လူတွေရော စည်လို့ရယ်ပေါ့။ ထိုင်းက အဝတ်အစားတွေများပေမဲ့ ဈေးသက်သာတော့ ဝယ်ပျော်ပါတယ်။ နောက်တနေ့မှာတော့ နေ့တဝက်စာ ကားဌားထားပြီး မြို့ထဲကနေ ၁နာရီလောက်မောင်းရတဲ့ Buddha Park ရယ် လာအိုနိုင်ငံရဲ့ နာမည်အကြီးဆုံး That Luang စေတီရယ် Victory Monument ရယ်သွားခဲ့ပါတယ်။ ဘန်ကောက်ကို ထွက်တဲ့ Air Asia လေယာဉ်ချိန်က နေ့လည်၁း၄၅ဆိုတော့ နေ့လည်စာစားပြီး လေဆိပ်ထွက်ကာ ပြန်လာခဲ့ကြပါတယ်။

ခရီးစဉ်ဆွဲမယ်

ကိုယ်တွေသွားတုန်းကတော့ အချိန်မရှိလို့ တစ်မြို့ကိုတစ်ညနှုန်းနဲ့ နှစ်ညအိပ် နှစ်မြို့သွားခဲ့တယ်။ အချိန်ရရင်တော့ ၄ညအိပ်လောက်သွားသင့်တယ်။ အချိန်ပိုရရင်ရင်တော့ ၆ရက်လောက်နေပြီး လောင်ပရာဘန်မြို့ပါဆက်သွားလို့ရပါတယ်။ေ လာင်ပရာဘန်မှာဆိုလည်း လည်စရာ ရေတံခွန်တွေ၊ တောင်တွေရှိပါတယ်။ နောက်တစ်ခါသွားဖြစ်ရင်တော့ လောင်ပရာဘန်ပါရောက်အောင်သွားရမယ်။

ကုန်ကျစားရိတ်

ကုန်ကျစားရိတ်က ဘန်ကောက်ကနေ ရထားနဲ့သွား လေယာဉ်နဲ့ပြန်ခဲ့တာဆိုတော့ အားလုံးတွက်ကြည့်လိုက်တဲ့အခါမှာ ၂ညအိပ်ခရီးကို မြန်မာငွေ ၂သိန်းခွဲလောက်ပဲကျခဲ့ပါတယ်။ ထိုင်းမှာ ထိုင်းဘတ်သုံးခဲ့ပြီး လာအိုရောက်တဲ့အခါမှာတော့ လာအိုပိုက်ဆံ Kip ကို သုံးခဲ့ပါတယ်။ လာအိုပိုက်ဆံ 1000 Kip က မြန်မာငွေ 163ကျပ်နဲ့ ညီမျှပါတယ်။

လာအိုအစားအစာ

လာအိုအစားအစာက ထိုင်းမြောက်ပိုင်းအစာနဲ့ဆင်ပါတယ်။ Larb လို့ခေါ်တဲ့ အသားစင်းကောကို အရွက်တွေနဲ့ သုတ်ထားတဲ့ဟင်း၊ သင်္ဘောသီးထောင်း၊ ငါးပေါင်း၊ ကြက်ကင် စတာတွေကို ကောက်ညှင်းနဲ့တွဲစားလေ့ရှိပါတယ်။ ကောက်ညှင်းလေးကို လက်နဲ့ဖဲ့ပြီး အလုံးသေးသေးကျစ်ကျစ်လေးဖြစ်အောင် လုံးပြီးမှ ဟင်းတွေနဲ့တွဲစားတာပါ။ ပြင်သစ်လက်အောက်ရောက်ခဲ့တော့ ပြင်သစ်စာဖြစ်တဲ့ ပေါင်မုန့်လုံးလုံးရှည်ရှည်ထဲ အသားတို့ ဝက်ပေါင်ခြောက်တို့ကို အရွက်တွေ ရောညှပ်စားတဲ့ Baguette ဟာလည်း လာအိုလမ်းဘေးအစားအစာအဖြစ်ထင်ရှားပါတယ်။

လည်ပတ်ဖို့အကောင်းဆုံးအချိန်

လာအိုက မြန်မာနိုင်ငံနဲ့ရာသီဥတုဆင်တော့ လာအိုနိုင်ငံဆီ သွားရောက်လည်ပတ်ဖို့အကောင်းဆုံးအချိန်က နိုဝင်ဘာလနဲ့ ဧပြီလအကြား အေးမြတဲ့ရာသီဥတုမှာပဲဖြစ်ပါတယ်။

ဒီလောက်ဆိုရင်တော့ လာအိုအကြောင်း အကြမ်းဖျဉ်းသိလောက်ပြီထင်ပါတယ်။ လာအိုက ချစ်စရာကောင်းတဲ့ အိမ်နီးချင်းနိုင်ငံလေးပါ။ သဘာဝအလှတွေနဲ့ အေးချမ်းပါတယ်။ သွားလည်လို့လည်းကောင်းပါတယ်။ ဒါပေမဲ့ စိတ်မကောင်းတာက ကိုယ်တွေရဲ့ မြန်မာနိုင်ငံမှာ ဒီထက်ပိုလှတဲ့ ရှုခင်းတွေ၊ ပိုဆန်းကြယ်တဲ့ ရှေးဟောင်းသမိုင်းဝင်နေရာတွေ၊ ယဉ်ကျေးျွှုအမွေအနှစ်တွေ၊ လူမျိုးစုတွေ ရှိနေရက်နဲ့ ဒီနိုင်ငံသေးသေးလေးနဲ့ ယှဉ်လိုက်တဲ့အခါမှာ နိုင်ငံခြားခရီးသွားဝင်ရောက်မှုတွေ ပိုနည်းနေတာကိုပါ။ သူတို့ရဲ့ မြို့တော်က ပဲခူးမြို့သာသာလောက်ပဲရှိပြီး ခရီးသွားတွေ အမြဲမပြတ်စည်ကားနေတဲ့ ဗန်ဗီယန်းမြို့ဆိုရင်လည်း ကလောမြို့လေးလိုပါပဲ။ ဒီလို လည်စရာ ၃-၄မြို့ပဲရှိတဲ့ လာအိုက မြန်မာထက် ခရီးသွားပိုများနေတာ တကယ်စိတ်မကောင်းပါဘူး။ အဓိကကတော့ Tourist တွေအသွားများတဲ့ ထိုင်း၊ ဗီယက်နမ်နဲ့ ကမ္ဘောဒီးယားတို့ကနေ ကုန်းကြောင်းကနေ အလွယ်တကူဝင်ရောက်နိုင်တာကြောင့် ဖြစ်ပါလိမ့်မယ်။ သိပ်မကြာခင်မှာလည်း ကိုယ်တွေရဲ့ မြန်မာနိုင်ငံအလှနဲ့ ယဉ်ကျေးအမွေအနှစ်တွေ ကမ္ဘာကျော်လာပြီး ခရီးသွားအများကြီးဝင်ရောက်လာပြီး ခရီးသွားလုပ်ငန်းကြီး တိုးတက်လာမယ်လို့တော့ မျှော်လင့်ရတာပဲနော်။
ချစ်ခင်လျှက်

Dr.Nu Myat

Share this:

Like this:

ကမ္ဘာ့အကြီးဆုံး ကျောင်းဆောင်ကြီး

ကမ္ဘာ့အမွေအနှစ်နေရာ

ခမာတို့ရဲ့အကောင်းဆုံး ဗိသုကာလက်ရာ

အနောက်ဘက်ကို မျက်နှာလှည့်

အန်ကောဝပ်အမည် အဓိပ္ပါယ်

နိုင်ငံတော်အလံမှာ ထည့်သွင်းထား

Share this:

Like this:

ကမ္ဘာ့မြောက်ဘက်အကျဆုံးမြို့တော် ရေခါဗစ်(ခ်)

Share this:

Like this:

မြို့ထဲမှာ ကမ္ဘာ့အသေးဆုံးနိုင်ငံရှိနေတဲ့ #ရောမမြို့

ရောမမြို့ရဲ့ အထင်ကရနေရာများ

Share this:

Like this:

Share this:

Like this:

ခရစ်ယာန်ဘာသာကို ပထမဆုံးကျင့်သုံးခဲ့သည့် အာမေးနီးယား

Share this:

Like this:

ကမ္ဘာ့အချမ်းသာဆုံး ရဲတိုက်နိုင်ငံငယ်လေး လူဇင်ဘတ်

Dr.Nu Myat Theingi Oo

Share this:

Like this:

မိုစတာမြို့၏ အထင်ကရ ရှေးဟောင်းတံတားကြီး

Share this:

Like this:

အင်းလေးနားတဝိုက်က ဓာတ်ပုံရိုက်လို့ကောင်းတဲ့

ထူးထူးခြားခြားအိမ်(၄)အိမ်

သစ်ပင်အိမ် (Little Tree House Restaurant)

လယ်တောအိမ် (La Rizieဲre Buvette)

စက်ဘီးအိမ် (MOT Café)

ကော်ဖီအိမ် (Coffee House)

Share this:

Like this:

ကမ္ဘာ့အကြီးဆုံး ကိုယ်တစ်ပိုင်းရုပ်တုကြီးရှိရာ

အိန္ဒိယမှာငြိမ်းချမ်းခြင်းကို ရှာဖွေတွေ့ရှိခဲ့ခြင်း……

Share this:

Like this:

ကမ္ဘာ့ဒုတိယ အကြီးဆုံးနိုင်ငံ ကနေဒါ 🇨🇦🌎🏔

🏙လည်ပတ်စရာမြို့(10) မြို့

🌇East Coast (၅)မြို့ (1) Toronto

(3) Quebec City

(5) Kingston

🌃West Coast (5)မြို့

(6) Vancouver

(7) Victoria

(9) Kelowna

(10) Banff

အစားအစာ

ပိုက်ဆံ

🏔ဘယ်အချိန်သွားသင့်လဲ

💵ဘယ်လိုသွားခဲ့လဲ ဘယ်လောက်ကုန်လဲ

🌎Visa ဘယ်လို လျှောက်လည်း

Share this:

Like this:

လာအိုကို ဘန်ကောက်ကနေ ညရထားနဲ့သွားမယ်

ညရထားအမျိုးအစားနဲ့ ဈေးနှုန်း

ရထားစီးအတွေ့အကြုံ

ထိုင်း-လာအိုနယ်စပ်

လာအိုရောက်ပြီ

Van Vieng မြို့

ဘာတွေလုပ်ခဲ့လဲ

ဗီယန်ကျန်းမြို့

သွားလည်ရမယ့်နေရာများ

ဘာတွေလုပ်ခဲ့လည်း

ခရီးစဉ်ဆွဲမယ်

ကုန်ကျစားရိတ်

လာအိုအစားအစာ

Share this:

Like this:

အိန္ဒိယမှာ
ငြိမ်းချမ်းခြင်းကို ရှာဖွေတွေ့ရှိခဲ့ခြင်း……

ကမ္ဘာ့ဒုတိယ အကြီးဆုံးနိုင်ငံ
ကနေဒါ 🇨🇦🌎🏔

🌇East Coast (၅)မြို့
(1) Toronto

လာအိုကို ဘန်ကောက်ကနေ
ညရထားနဲ့သွားမယ်