ပန်ထွာဘုရင်မကြီးရဲ့ အမုန်းကျိန်စာပြည့်နေတဲ့ ဗိဿနိုးမြို့

ဗိဿနိုးမြို့ဆိုတာ….

ပန်ထွာဘုရင်မကြီးရဲ့မြို့…

အမုန်းကျိန်စာနဲ့ပြည့်နေတဲ့မြို့…

ရာဇဝင်တွေ စီးဆင်းခဲ့တဲ့မြို့…

နှစ်ပေါင်း ၂၀၀၀ ကျော် သက်တမ်းရှိတဲ့မြို့ …

ပျူယဉ်ကျေးမှုတွေ ထွန်းကားခဲ့တဲ့ပျူမြို့…

ကမ္ဘာ့အမွေအနှစ်အဖြစ် အသိအမှတ်ပြုခံရတဲ့မြို့ကြီးပေါ့….

ဒီဗိဿနိုးမြို့ဟောင်းကြီးဆီကို COVID 2nd Wave မတိုင်မီ သြဂုတ်လတုန်းက သရေခေတ္တရာမြို့ဟောင်းဆီသွားရင်း ဝင်လေ့လာဖြစ်ခဲ့ပါတယ်။

ကမ္ဘာ့အမွေအနှစ်ဒေသ

————————

ဗိဿနိုးက ယူနက်စကို (UNESCO) ကနေပြီး ကမ္ဘာ့အမွေအနှစ်ဒေသတွေအဖြစ် ၂၀၁၄ခုနှစ်မှာ အသိအမှတ်ပြုခဲ့တဲ့ ပျူမြို့ဟောင်း (၃)မြို့ထဲက တစ်မြို့ ဖြစ်ပါတယ်။ ဒီပျူမြို့ဟောင်း (၃)မြို့ကတော့ ဟန်လင်း၊ ဗိဿနိုးနဲ့ သရေခေတ္တရာမြို့တို့ပါ။ ဟန်လင်းက စစ်ကိုင်းတိုင်း ရွှေဘိုမြို့နားမှာရှိပြီး ဗိဿနိုးက မကွေးတိုင်း တောင်တွင်းကြီးမြို့နားမှာရှိကာ သရေခေတ္တရာကတော့ ပြည်မြို့နားမှာ ရှိပါတယ်။

ဗိဿနိုးမြို့က A.D ၁ ရာစုကနေ ၅ရာစု အတွင်း ပျူယဉ်ကျေးမှု ထွန်းကားခဲ့တဲ့ ပျူမြို့ဟောင်းတစ်မြို့ဆိုတော့ နှစ်ပေါင်း ၂၀၀၀ကျော် သက်တမ်းရှိနေပါပြီ။ မြန်မာ့ရိုးရာသမိုင်းကျမ်းတွေမှာတော့ အစောဆုံးပျူမြို့ဟောင်းအဖြစ် ဖော်ပြထားတယ်လို့ သိရပါတယ်။

ဘယ်မှာရှိတာလဲ

——————-

ဗိဿနိုးမြို့ဟောင်းကြီးက မကွေးခရိုင် တောင်တွင်းကြီးမြို့ အနောက်ဘက် ၁၂မိုင်ဝန်းကျင်မှာရှိပြီး အနီးဆုံးရွာကတော့ ကုက္ကိုခွရွာပဲဖြစ်ပါတယ်။ ဗိဿနိုးရှေးဟောင်းနယ်မြေထဲဝင်တဲ့ ဝင်ပေါက်က တောင်တွင်းကြီး-မကွေးကားလမ်းပေါ်မှာရှိပြီး ဒီကားလမ်းက ဗိဿနိုးမြို့ရဲ့ အရှေ့တောင်ထောင့်မှာ မြို့ရိုးနှစ်ဖက်ကို ဖောက်ထွင်းပြီး ဖောက်ထားတာပဲဖြစ်ပါတယ်။

ဘယ်လိုသွားရလဲ

——————-

ရန်ကုန်ကနေသွားမယ်ဆိုရင် လမ်းဟောင်းကနေပြည်ကို မိုင်၁၈၀ကျော်မောင်းရပြီး အဲဒီကနေ တောင်တွင်းကြီးကို မိုင်၁၀၀လောက် ထပ်မောင်းရပါမယ်။ အမြန်လမ်းကနေသွားမယ်ဆိုရင်တော့ နေပြည်တော်အကျော် မိုင်တိုင် ၂၂၀မှာ တောင်တွင်းကြီးလမ်းခွဲရှိပါတယ်။ အထက်အညာဒေသကနေသွားမယ်ဆိုရင်တော့ ကျောက်ပန်းတောင်း၊ မကွေးတို့ကနေပြီး လမ်းသင့်ပါတယ်။

ဗိဿနိုးကို ရန်ကုန်ကနေဆိုရင် ၇နာရီကျော် ၈နာရီလောက်မောင်းရပြီး သရေခေတ္တရာကနေဆိုရင်တော့ ၃နာရီခွဲလောက်မောင်းရပါတယ်။ နုမြတ်တို့ကတော့ ရန်ကုန်ကနေ သရေခေတ္တရာကို လမ်းဟောင်းအတိုင်း အရင်သွားပြီး အဲဒီမှာ တစ်ညအိပ်ကာ အရင်လေ့လာပြီး နောက်တစ်ရက်မှ ဗိဿနိုးကို ခရီးဆက်ခဲ့ကြတာပါ။ ဗိဿနိုးမှာ တစ်ညအိပ်ပြီး မြို့ဟောင်းထဲလေ့လာပြီးမှ အမြန်လမ်းအတိုင်း ရန်ကုန်ပြန်လာခဲ့တာပါ။

ပန်ထွာဘုရင်မ

—————-

ဗိဿနိုးအကြောင်းပြောမယ်ဆိုရင် ပန်ထွာဘုရင်မကြီးအကြောင်းကို ထိပ်ဆုံးကပြောပြရမှာပါ။ ပန်ထွာဘုရင်မက အလွန်ချောမောလှပတယ်လို့ နာမည်ကြီးပြီး ဗိဿနိုးတိုင်းပြည်ကို တစ်ဦးတည်း အုပ်ချုပ်ခဲ့တဲ့ ဘုရင်မပဲဖြစ်ပါတယ်။


ပန်ထွာဘုရင်မဟာ လူသာမန်မဟုတ်ပါဘူး။ မိခင်က စန္ဒမုခိဘီလူးမကြီးတဲ့လေ။ ဒဏ္ဏာရီတွေအရ မဟာသမ္ဘဝနဲ့ စူဠသမ္ဘဝ မျက်မမြင်မင်းသားနှစ်ပါးကို စက္ခုအလင်းရအောင် ကုစားပေးခဲ့ရင်း လက်ကိုကိုင်တွယ်မိလို့ ပဋိသန္ဓေတည်ရှိခဲ့တာတဲ့။ တောင်တွင်းကြီးမြို့ရဲ့ အနောက်ဘက် ၅ တိုင်ကွာဝေးတဲ့ တောအရပ်မှာ ပန်ထွာဘုရင်မကို ဖွားမြင်ခဲ့ပြီး ရသေ့တစ်ပါးရဲ့ မွေးစားခဲ့ပါတယ်။ ကြီးလာတဲ့အခါမှာတော့ သူ့ရဲ့ထက်မြက်မှုကြောင့် ရပ်ရွာက အကြီးအကဲတင်မြှောက်ကာ နောက်ပိုင်းမှာ တဖြည်းဖြည်းနဲ့ ဗိဿနိုးမြို့ကြီးကို တည်ထောင်ခဲ့ပါတယ်။ တချို့ကလည်း ဗိဿနိုးနတ်မင်းနဲ့ ရှေးဘဝက မောင်နှမတော်စပ်ခဲ့လို့ ဗိဿနိုးမြို့ကို ဖန်းဆင်းပြီး ပေးအပ်ခဲ့တာလို့လည်း ပြောကြပါတယ်။

စည်တော်ကြီးနဲ့ရန်ပယ်ချောင်း

———————————–

ဗိဿနိုးနဲ့ ပတ်သက်ပြီး ရန်ပယ်ချောင်းနဲ့ စည်ကြီးအကြောင်းလည်း ကြားဖူးကြမှာပါ။ မြို့ကို ရန်သူတွေလာတိုက်ခိုက်တိုင်း အတုလစည်တော်ကြီးကို တီးလိုက်တာနဲ့ ဗိဿနိုးမြို့ကြီးကို ဝန်းရံထားတဲ့ ရန်ပယ်ချောင်းက ရေတွေတလဟောစီးကျလာပြီး ရန်သူတွေရှေ့ဆက်မရအောင် တားပေးသတဲ့လေ။

ခုနောက်ပိုင်း ခန့်မှန်းကြည့်ကြတဲ့အရ ရန်ပယ်ချောင်းမှာ ရေတံခါးတွေ တပ်ထားတာဖြစ်ပါလိမ့်မယ်။ ဒါမှသာ ရန်သူတွေ ချီတက်လာတာကို မြင်တဲ့အခါ အတုလစည်ကြီးတီးပြီး အချက်ပြလိုက်တာနဲ့ ရေတံခါးတွေကို ဖွင့်ချလိုက်လို့ ရန်ပယ်ချောင်းမှာ ရေအရှိန်အဟုန်စီးဆင်းလာတာ ဖြစ်နိုင်ပါတယ်။

ဒွတ္တဘောင်မင်းကြီး

———————-

အဲဒီတုန်းက သရေခေတ္တရာမြို့ကို အုပ်ချုပ်ခဲ့တဲ့ ဒွတ္တဘောင်မင်းကြီးက အင်မတန်ဘုန်းတန်ခိုးကြီးလှပါတယ်။ ပန်ထွာဘုရင်မကြီးရဲ့ အလှအပအကြောင်းကို ကြားသိရလို့ ဗိဿနိုးမြို့ကို တိုက်ခိုက်ပြီး ပန်ထွာဘုရင်မကြီးကို မိဖုရားအဖြစ်သိမ်းပိုက်ဖို့ ကြိုးစားခဲ့ပေမဲ့ ဒီစည်တော်ကြီးရဲ့ အစွမ်းကြောင့် မအောင်မြင်ခဲ့ပါဘူးတဲ့။

အဲဒါနဲ့ စည်ကိုဖျက်စီးဖို့ သူတို့ဆီက သူလျှိုကို တန်ခိုးကြီးရသေ့အဖြစ် ဟန်ဆောင်စေပြီး စေလွှတ်ခဲ့ပါတယ်။ သူလျှိုရသေ့က ပန်ထွာဘုရင်မနဲ့တကွ ဗိဿနိုးပြည်သူပြည်သားတွေကိုပါ အယုံသွင်းခဲ့ပြီး စည်ကြီးကို ပိုအစွမ်းထက်အောင် ပြုလုပ်ပေးမယ်ဆိုလို့ အပ်နှံခဲ့ကြပါတယ်။ တကယ်တမ်းမှာတော့ စည်ကြီးကို ဖျက်စီးပြီး ထွက်ပြေးခဲ့လို့ သရေခေတ္တရာက စစ်တပ်ကြီးလာတိုက်တဲ့အခါ စည်ကြီးကိုတည်းလို့ အသံမထွက်တော့ပါဘူး။ အဲဒီအခါ ရန်ပယ်ချောင်းကလည်း ရေမကျလာတော့ တိုက်စစ်ကို အလူးအလဲခံခဲ့ရပါတယ်။ နောက်ဆုံးမှာတော့ ဒွတ္တဘောင်မင်းရဲ့လက်အောက်ကို ဗိဿနိုးမြို့ရော ပန်ထွာဘုရင်မပါ ကျရောက်ခဲ့ရပါတော့တယ်။

အမုန်းကျိန်စာ

—————-

ပန်ထွာဘုရင်မကြီးဟာ ဒွတ္တဘောင်မင်းကြီးရဲ့ မိဖုရားအဖြစ် သရေခေတ္တရာကို ပြောင်းခဲ့ရပြီး သားတော်ထွန်းကားတာတောင် အမုန်းမပြေနိုင်ဘဲ ဖြစ်နေပါတယ်။ လုပ်ကြံဖို့အတွက်ကလည်း ဘုရင်ကြီးက ဘုန်းတန်ခိုးကြီးလွန်းတော့ မကြံနိုင်ဘဲ ဖြစ်နေပါတယ်။ ဒါနဲ့ ထမိန်အောက်နားစ (တချို့ကလည်း သုသာန်ကအဝတ်လို့ပြောတယ်)ကို မျက်နှာသုတ်ပုဝါအဖြစ် ဒွတ္တဘောင်မင်းကြီးကို ပေးသုံးလိုက်တဲ့အခါ နှဖူးကမှဲ့ရှင်တော်ပျောက်ကွယ်ပြီး ဘုန်းနိမ့်ကုန်ရောတဲ့။ အဆိပ်ခတ်ထားတဲ့ ဖျော်ရည်ကိုပါ ဆက်ကပ်တဲ့အခါ ဒွတ္တဘောင်မင်းကြီးက သံသယဝင်လို့ ဖျော်ရည်ကိုမသောက်ဘဲ ပန်ထွာဘုရင်မကိုသာ မြည်းစမ်းပြခိုင်းခဲ့ပါတယ်။ အဲဒီအခါ ပန်ထွာဘုရင်မကြီးက ဖျော်ရည်ခွက်ကိုမြှောက်ပြီး “ ငါဒီဘဝမှာတော့ လက်စားမချေနိုင်တော့ဘူး။ နောက်ဘဝများတွင်သာ လက်စားချေနိုင်တော့မယ်။ လက်စားမချေရမခြင်း ဒီဒေသမှာရှိတဲ့ ပေပင်လေးတွေ ဆက်လက်ကြီးထွားခြင်းမရှိဘဲ ဒီအတိုင်းရပ်တန့်နေပါစေ”လို့ ကျိန်စာတိုက်ခဲ့ပြီး ဖျော်ရည်သောက်ကာ သတ်သေခဲ့ပါတယ်။ ဒွတ္တဘောင်မင်းကြီးလည်း ဘုန်းတန်ခိုးနိမ့်သွားတော့ နောက်ပိုင်း ဖော်တော်စီးပြီး အခွန်လှည့်လည်ကောက်ခံတဲ့အခါ ဖောင်နစ်ပြီး နတ်ရွာစံတော်မူသွားခဲ့ပါတယ်။

ဒါကြောင့် ဗိဿနိုးမြို့ဟောင်းရှိ ပေပင်တွေက နှစ်ထောင်ချီသက်တမ်းရှိပြီးဖြစ်တာတောင် မကြီးလဲ မကြီးထွား၊ အသီးလဲ မသီးကြပါဘူး။ ပန်ထွာဘုရင်မရဲ့ “ငါလာမှကြီး ငါလာမှသီး” ဆိုတဲ့ ဆုတောင်းစကားကြောင့် ဘုရင်မ လူပြန်မဖြစ်မချင်း ပေပင်တွေဟာ အသီးမသီးနိုင်၊ မကြီးထွားနိုင်ဖြစ်နေရတာလို့ ဆိုကြပါတယ်။

မြို့ဟောင်းထဲဘာတွေရှိလဲ

—————————-

ရှေးဟောင်းနယ်မြေထဲမှာ သရေခေတ္တရာလို ရွာတွေရှိမနေပါဘူး။ အင်းနားက အင်းရွာကြီးတစ်ရွာပဲ မြို့ရိုးနဲ့ ကပ်ပြီး ရှိနေတာပါ။ လူခေါင်သလို တစ်နေရာနဲ့တစ်နေရာကလည်း သိပ်မနီးတော့ လမ်းလျှောက်သွားလို့ အဆင်မပြေလောက်ပါဘူး။ ဆိုင်ကယ် (သို့) ကားနဲ့လာမှသာ အဆင်ပြေမှာပါ။

မုခ်ဦးကြီး

————

ဝင်ပေါက်မှာ “ဗိဿနိုး ရှေးဟောင်းယဉ်ကျေးမှုနယ်မြေ”ဆိုတဲ့ မုခ်ဦးကြီးကတော့ ထည်ထည်ဝါဝါရှိလို့နေပါတယ်။ ဗိဿနိုးပုံတွေတက်လာရင် ဒီမုခ်ဦးကြီးမှာ ရိုက်ထားတဲ့ပုံတွေများပါတယ်။ မုခ်ဦးတစ်ဖက်တစ်ချက်စီမှာ ပျူခေတ်မြို့စောင့်ရဲမက်ရုပ်တုကြီးနှစ်ရုပ်က လှံကိုင်ပြီး မြို့ကိုစောင့်နေသဖွယ် ရှိလို့နေပါတယ်။ မုခ်ဦးဘေးက မြို့ရိုးတွေရဲ့ အုတ်စီပုံကလည်း ရှေးခေတ်ကလို စပါးစေ့ပုံစံတွေနဲ့ပါ။ မြို့ရိုး အဝင်ဝနားမှာ ယူနက်စကိုက ကမ္ဘာ့အမွေအနှစ်အဖြစ် အသိအမှတ်ပြုထားတဲ့ ကျောက်တုံးဖြူဖြူကြီးကိုလည်း တွေ့ရမှာပါ။

မြို့ရိုး

——-

မြို့ကြီးက ပုံသဏ္ဏာန်အနေနဲ့ စတုရန်းမကျတကျပုံရှိပြီး ဧရိယာအနေနဲ့ကတော့ ၃.၃စတုရန်းမိုင်ကျယ်ဝန်းပါတယ်။ မြောက်ဘက်၊ အရှေ့ဘက်နဲ့ တောင်ဘက်တွေမှာ အုတ်မြို့ရိုးတွေရှိပြီး အနောက်ဘက်မှာတော့ မြို့ရိုးကို တူးဖော်တွေ့ရှိတာမျိုး မရှိသေးပါဘူး။ အနောက်ဘက်မှာ ရေကန်ကြီးနှစ်ကန်ရှိတော့ မြို့တည်ကတည်းက မြို့ရိုးမရှိခဲ့တာလည်း ဖြစ်နိုင်ပါတယ်။

မြို့ဝင်ပေါက်

————–

မြို့ရိုးတစ်ဖက်စီမှာ မြို့ဝင်ပေါက်တွေ သုံးခုစီရှိတယ်လို့ သိရပါတယ်။ တချို့မြို့ဝင်ပေါက်တွေက သေချာတူးဖော်ထားတော့ ရှင်းရှင်းလင်းလင်းမြင်ရပါတယ်။ မြို့ဝင်ပေါက်တွေက ပေ ၂၀ ကျယ်ပြီး ကတော့ပုံလို တည်ဆောက်ထားတာပါ။ ခပ်မြန်မြန် ပြေးဆွဲတဲ့ ရထားတွေ၊ လမ်းကွေ့မှာ အခက်အခဲ မရှိအောင် အခုလို လမ်းထောင့်တွေကို ခပ်ပြေပြေ ထောင့်ချိုးထားတာ ဖြစ်ပါလိမ့်မယ်။ သရေခေတ္တရာရဲ့ မြို့ဝင်ပေါက်တချို့ကလည်း အဲ့လိုမျိုးပါပဲ။

DCIM\101MEDIA\DJI_0072.JPG

ရှေးဟောင်းကုန်း

——————-

ဗိဿနိုးမြို့ဟောင်းကို ၁၉၀၅ခုနှစ်မှာ ကျောက်စာဝန်တော်စိန်ခိုက ပထမဆုံးစူးစမ်းလေ့လာခဲ့တာပါ။ ၁၉၅၉ခုနှစ်ကစပြီး မြန်မာနိုင်ငံ ရှေးဟောင်းသုတေသနဌာနမှ ရှေးဟောင်းသုတေသနပညာရှင်တွေက ဗိဿနိုးမြို့ဟောင်းကြီးမှာ ရှေးဟောင်းကုန်းတွေကို စနစ်တကျတူးဖော်ခဲ့ရာမှာ ၂၀၁၅ခုနှစ်အထိ ရှေးဟောင်းကုန်းပေါင်း (၆၇)ကုန်း တူးဖော်ပြီးဖြစ်ပါတယ်။ တူးဖော်ရရှိတဲ့ကုန်းတွေမှာ ဆိုင်းဘုတ်တွေသေချာစိုက်ပြီး အင်္ဂလိပ်လိုရော မြန်မာလိုပါ ရှင်းပြထားတာလည်း သိပ်ကောင်းပါတယ်။

ဗိဿနိုးမှာ မြို့ရိုးတွေ၊ မြို့ဝင်ပေါက်တွေအပြင် ဘာသာရေးအဆောက်အအုံတွေ၊ လူနေအဆောက်အအုံတွေနဲ့ နန်းတော်ရာကိုပါ တူးဖော်တွေ့ရှိထားကြပါတယ်။ တူးဖော်တွေ့ရှိထားသမျှထဲ အကြီးဆုံးကတော့ နှစ်ထပ်တိုက်လိုတိုက်တစ်ခုပါ။ လူနေအဆောက်အအုံဖြစ်မယ်လို့ ခန့်မှန်းရပါတယ်။

ရှေးဟောင်းသုတေသနပြတိုက်

———————————–

မြို့ဟောင်းကြီးထဲ ရှေးဟောင်းသုတေသနပြတိုက်ကြီးလည်းရှိပြီး ပြတိုက်ထဲမှာလည်း ပျူအရိုးအိုးတွေ၊ ဒင်္ဂါးပြားတွေနဲ့ ရှေးဟောင်းပစ္စည်းများစွာကို တွေ့နိုင်ပါတယ်။ နုမြတ်တို့ သွားတုန်းကတော့ ကိုဗစ်ကြောင့် ပြတိုက်ပိတ်ထားလို့ ဝင်လေ့လာလို့မရခဲ့ပါဘူး။

ပေပင်တွေ

————-

မြို့ဟောင်းကြီးထဲမှာ အိုးခြမ်းကွဲတွေ မတွေ့ချင်မှအဆုံးပါ။ ပန်ထွာဘုရင်မကြီးကျိန်စာတိုက်ခဲ့တဲ့ ပေပင်တွေကိုလည်း တကူးတကလိုက်ရှာခဲ့ရတာ အမှတ်တရပါပဲ။ ပေပင်တွေကို အင်းကြီးနားမှာ တွေ့ခဲ့ရပါတယ်။ တကယ်လည်း သေးနေပြီး လူတစ်ရပ်စာလောက်သာ ရှိပါတယ်။

မြို့ဟောင်းအထွက်နားမှာတော့ ရွှေရောင်တော်ဘုရားကို ဖူးမြော်နိုင်ပါတယ်။ ပန်ထွာဘုရင်မ မြို့ဦးစေတီအဖြစ်တည်ခဲ့တဲ့ ဘုရားဖြစ်ပြီး ရောင်ခြည်တော်ကွန့်မြူးလို့ ရွှေရောင်တော်လို့ အမည်တွင်ပါတယ်။ စေတီတော်မှာ ဗိဿနိုးပန်ထွာဘုရင်မကြီးရဲ့ ရုပ်တုတော်တွေကိုလည်း တွေ့နိုင်ပါတယ်။

အင်ကြင်းပွင့်

—————

ပြီးတော့ ဗိဿနိုးမြို့ဟောင်းမှာရှိတဲ့ အင်းကြင်းဥယျာဉ်မှာ မူလက အင်ကြင်းပင်မရှိခဲ့ပေမဲ့ ဗိဿနိုးနတ်မင်းကြီးရဲ့ အမိန့်ကြောင့် အင်ကြင်းပွင့်တွေက ဥယျာဉ်တော်အတွင်း အလိုလျောက်ရောက်လာတာတဲ့လေ။ အခုထိ ဘယ်ကနေရောက်လာမှန်းမသိတဲ့ အင်ကြင်းပွင့်တွေကို မကြာခဏတွေ့ရတတ်တယ်လို့ ပြောကြပါတယ်။ ရွှေရောင်တော်စေတီမှာဆိုရင်လည်း အင်ကြင်းပန်းတွေကို ဘုရားပန်းအဖြစ် လှူထားကြသလို ဘုရားရင်ပြင်တဝိုက်မှာ အင်ကြင်းပန်းတွေ ပြန့်ကြဲနေတာကိုလည်း တွေ့ရတတ်တယ်လို့ သိရပါတယ်။

ဗိဿနိုးမြို့ဟောင်းကြီးသမိုင်းက စိတ်ဝင်စားစရာကောင်းသလို ကမ္ဘာ့အမွေအနှစ်အဖြစ်လည်း အသိအမှတ်ပြုခံထားရတော့ ဂုဏ်ယူစရာပါ။ ပုဂံခေတ်ထက်ရှေးကျတဲ့ ပျူခေတ်အကြောင်းကိုလည်း တီးခေါက်မိစေပါတယ်။

နုမြတ်လည်း ဗိဿနိုးမြို့ဟောင်းကြီးအကြောင်းကို လေ့လာမိခဲ့သလောက် ကိုဗစ်ကာလမှာ ဗဟုသုတအနေနဲ့ တင်ပေးလိုက်တာပဲဖြစ်ပါတယ်။ တခြားစိတ်ဝင်စားစရာ ပြည်တွင်းပြည်ပ ဒေသန္တရဗဟုသုတတွေလည်း ဆက်ပြီးတင်ပေးသွားမှာဖြစ်လို့ ဒီ Nu Myat around the World page ကို Like နဲ့ See First လုပ်ထားနိုင်ပါတယ်နော်။

အားလုံး ဘေးရန်ကင်းကွာပြီး ကျန်းမာပျော်ရွှင်ကြပါစေ…

ချစ်ခင်လျှက်

Nu Myat

ကလောမှာ ဘယ်တွေသွားပြီး ဘာတွေ စားကြမလဲ

ကလောရောက်နေတဲ့သူတွေအတွက် နုမြတ်ရောက်ဖူးခဲ့တဲ့ ကလောက နေရာလှလှလေးတွေအကြောင်း ပို့စ်တစ်ခု တင်ပေးဖူးပါတယ်။ အခုက နေရာအသစ်တွေပေါ်လာလို့ ထပ်ဖြည့်ပြီး တင်ပေးလိုက်ပါတယ်။ ဒီပို့စ်မှာ သွားစရာနေရာတွေအပြင် စားစရာဆိုင်လေးတွေပါ သိသလောက် ထည့်ရေးပေးထားပါတယ်။

1. ကလောဘူတာ

—————————

သိပ်လှတဲ့ ကလောဘူတာရုံအဟောင်းလေးဆီတော့ ရထားစီးစီး မစီးစီးရောက်အောင်သွားခဲ့ကြပေါ့။ ဗုံးဒဏ်ကြောင့် အဆောက်အအုံ ၂ ခြမ်းကွဲတဲ့နေရာလေးကို ပြင်ဆောက်ထားတာကလွဲရင် ဟိုးအရင်ခေတ်ကအတိုင်းလေးပါပဲ။ ရထားလာတဲ့အချိန် ရထားပေါ်တက်ကြဆင်းကြနဲ့ ယောက်ယက်ခတ်နေတဲ့မြင်ကွင်းလေးကလည်း ရသတစ်မျိုးခံစားရမှာပါ။

2. နာရီစင်

—————————

ကလောမြိုရဲ့ နာရီစင်လေးကလည်း မြို့လည်မှာ ဝံ့ဝံ့ကြွားကြွားလေးနေရာယူနေတာဆိုတော့ ကလောသွားတိုင်း အမြဲဖြတ်သွားရတဲ့နေရာပါ။ ဓာတ်ပုံရိုက်မယ်ဆို ကားနဲ့ဆိုင်ကယ်ကြည့်ရှောင်ပေါ့နော်။ ဓာတ်ပုံထဲ လူရော နာရီစင်ရောပါချင်ရင် နာရီစင်နားကပ်မရိုက်ဘဲ ကားလမ်းဘေးကပ်ပြီး ခပ်ဝေးဝေးကရိုက်ပါနော်။

3. ထင်းရူးတော

—————————

ထင်းရူးမြို့တော် ကလောမှာ ထင်းရူးပင်တန်းကြီးတွေနဲ့ ဓာတ်ပုံရိုက်ချင်ရင် ဝေးဝေးလံလံ သွားစရာမလိုပါဘူး။ မြို့ထဲမှာတင်ရှိပါတယ်။ နာရီစင်ဘေး မေမြေဦး ပန်းခြံထဲက ထင်းရူးတောထဲ ဝင်ရိုက်လို့ရပါတယ်။ ဒီပန်းခြံက ကလောမြို့ မီးရှော်တိုင်ပွဲကျင်းပတဲ့ နေရာလည်းဖြစ်ပါတယ်။

4. Kalaw Heritage Hotel

———————————–

မြန်မာနိုင်ငံရဲ့ ဒုတိယသက်တမ်းအရင့်ဆုံး Kalaw Heritage ဟိုတယ်လေးကတော့ ဥရောပရောက်သွားသလိုပါပဲ။ အပင်လေးတွေတွယ်တက်နေတဲ့ နံရံစိမ်းစိမ်းလေးရှိတဲ့ ရှေးဟောင်းအဆောက်အအုံကြီးတွေရယ်၊ အရှေ့မှာ ပန်းခင်းဖြူဖြူလေးတွေခင်းထားတဲ့ ဘိုဆန်ဆန်တိုက်ဖြူဖြူလေးတွေရယ်နဲ့ သိပ်ကိုလှပါတယ်။ ညမအိပ်လည်း ကော်ဖီဝင်သောက် မုန့်ဝင်စားရင် ဓာတ်ပုံရိုက်လို့ရပါတယ်။

5. ရေယောင်းမ View Point

———————————–

အရမ်းလှတဲ့ ရှုခင်းတွေမြင်ရမယ့် View Point ပါ။ ကလောအတက်လမ်းဘေးချိုးလိုက်ရင် ရောက်ပါတယ်။ ဧရာမ လခြမ်းကြီးတွေ၊ အသည်းပုံတွေနဲ့ ဓာတ်ပုံရိုက်စရာနေရာတွေ ဖန်တီးပေးထားပါတယ်။

အဲဒီမှာ View Point ကြည့်ရမယ့်နေရာ ၂ ခုရှိပါတယ်။ ရှန်ဗဲလားကတော့ မူလလက်ဟောင်း လခြမ်းပုံကြီးရှိတဲ့နေရာပါ။ အထဲနည်းနည်းထပ်ဝင်ရပါတယ်။ သိရိစန္ဒာအပန်းဖြေစခန်းကတော့ လမ်းမနဲ့ပိုနီးပြီး ဝင်ရလွယ်ပါတယ်။

6. Kalaw City View စားသောက်ဆိုင်

———————————–

Kalaw City view လို့ခေါ်တဲ့စားသောက်ဆိုင်လေးက Sunset ကြည့်လို့လှတဲ့ နေရာလေးပါ။ Tree House လိုမျိုးလေးတွေ ဆောက်ထားပြီး ဓာတ်ပုံရိုက်စရာေနေရာလေးတွေလည်း ရှိပါတယ်။ ကလောမြို့ သုမောင်ထမင်းဆိုင်ဘေး သိမ်တောင်ပေါ် တက်တဲ့လမ်းကနေ သွားလို့ရပါတယ်။

7. နှီးဘုရား

—————————

ကလောရောက်ရင် နှစ်ပေါင်း (၅၀၀) ကျော်သက်တမ်းရှိတဲ့ နှီးဘုရားဝင်ဖူးခဲ့ကြပါဦး။ နှီးနဲ့ယက်လုပ်ထားတဲ့ ဘုရားဆင်းတုကြီးက သပ္ပါယ်လှပါတယ်။ နှီးဘုရားကို ရှမ်းလူမျိုးတွေပဲ ယက်လုပ်တတ်ကြပြီး ဘုရားဆင်းတုယက်လုပ်သူ အယောက်တိုင်းဟာ သတ်သတ်လွတ်စားပြီး အဓိဌာန်ဝင်ရပါတယ်တဲ့။

8. နှစ်တစ်ရာ သက်တမ်းရှိ Church ကျောင်း

——————————————————

ကလောမြို့က နှစ်တစ်ရာသက်တမ်းရှိပြီဖြစ်တဲ့ Roman Catholic Church ကျောင်းကြီးကလည်း ဖြူလွလွကျောက်တုန်းတွေစီထားတဲ့ နံရံံအမြင်ကြီးတွေ၊ ရောင်စုံမှန်ကူကွက်တွေနဲ့ အရမ်းလှတာပါပဲ။ ဘုရားကျောင်းဆိုတော့ အသံဆူညံလို့တော့ မရပါဘူးနော်။

9. လိမ္မော်ရောင်သော်ကပန်းရုံ

—————————

ပန်းချစ်သူတွေ ဓာတ်ဖမ်းနေကြနေရာလေး။ ရိုးရိုးနံရံမှာ တွယ်ကပ်နေတဲ့ ပန်းရုံဖြစ်ပေမဲ့ ဓာတ်ပုံရိုက်လို့ သိပ်လှလို့ ကလောရောက်သူတိုင်း လမ်းဘေးကားရပ်ပြီးဆင်းရိုက်လေ့ရှိကြပါတယ်။ Main လမ်းမကြီးပေါ်က Winner Hotel မျက်စောင်းထိုးမှာရှိတာပါ။

10. ရထားလမ်း

——————-

ဘူတာနားက မြို့ထဲ Pinewoods ဟိုတယ်လေးကပ်ရပ်က ရထားလမ်းလေးပါ။ ကြည့်လိုက်ရင် ရိုးရိုးရထားလမ်းလေးလိုပေမဲ့ အပင်တွေပါပါအောင် ရိုက်မယ်ဆိုရင် အပင်တွေ အုပ်အုပ်ဆိုင်းဆိုင်းနဲ့ ရထားလမ်းလေးက ပုံထဲမှာ လှသွားပါတယ်။

11. ကလောမြို့မဈေး

——————–

ကလောရောက်တိုင်း ကလောဈေး ဝင်ဖြစ်တယ်။ အဲဒီက မုန့်ဆိုင်တန်းက ရှမ်းခေါက်ဆွဲ၊ တို့ဖူးနွေး၊ ငါးထမင်းနယ်၊ တို့ဖူးကြော်တို့က သိပ်စားကောင်းလို့ပါ။ ဈေးကလည်း တော်တော်တန်ပါတယ်။ ကလောဈေးထဲ နေကြာစေ့၊ မုန်ညင်းချဉ်နဲ့ ဒေသစာတွေ အပြန်လက်ဆောင်အဖြစ် ဝင်ဝယ်နိုင်ပါတယ်။

12. Kalaw Pine Loft

——————————————

ကလောမှာ အခုနောက်ပိုင်း ဟိုတယ်တွေထက်စာရင် လုံးချင်းအိမ်လေး ငှားပြီးနေကြပါတယ်။ ကိုယ့်အိမ်လေးထဲ အပန်းဖြေနေရသလို ခံစားရလို့ပါ။ Kalaw Pine Loft ကတော့ ခုနောက်ပိုင်း ကလောရောက်တိုင်း နေဖြစ်တဲ့ အိမ်လေးပါ။ ထင်းရှူးတောထဲ မှန်အပြည့်ကာထားတဲ့ A ပုံစံအိမ်လေးက ချစ်စရာလေးပါ။ ထင်းရူးသား ထင်းရူးနံ့နဲ့ ကလောအငွေ့အသက်ကို ကောင်းကောင်းခံစားရတဲ့ အိမ်လေးပါ။

13. Pine Land Oasis Hotel

——————————————

Kalaw Pine Loft အိမ်ရှိတဲ့ Pinewood Villa အိမ်ရာနဲ့ တစ်ဆက်တည်းရှိတဲ့ ဟိုတယ်ဝန်းပါ။ ကလောမြို့မရောက်ခင် အင်းပြင်မှာရှိပြီး တောင်ကုန်းပေါ်ဆိုတော့ရှုခင်းလှပါတယ်။ ထမင်းဝင်စားရင်း ရှုခင်း ကြည့်နိုင်ပါတယ်။

14. Hill Top Villa Resort

—————————

ကလောမြို့ထဲ တောင်ထိပ်ပေါ်မှာရှိလို့ နေရာကောင်းမှာရှိတဲ့ ဟိုတယ်ပါ။ ဟိုတယ်ရဲ့ စားသောက်ဆိုင်ကနေ ကလောမြို့ကို လှမ်းမြင်ရပါတယ်။ View ကောင်းလို့ တစ်ခုခုမှာစားရင်း ရှုခင်းသွားကြည့်လို့ရပါတယ်။

15. Mobile Coffee ဆိုင်

—————————

ကားကော်ဖီဆိုင်လှလှလေးတွေကို ကလောမြို့နဲ့ အနီးတဝိုက်မှာ တွေ့ကြမှာပါ။ ကော်ဖီဝယ်သောက်ရင်း ဓာတ်ပုံရိုက်လို့လှတဲ့ကော်ဖီဆိုင်လေးတွေပါ။

16. မြင်းက

—————————

ကလောမြို့အဝင် မြင်းကမှာ ဆိုင်းဘုတ်နဲ့အတူ မြင်းစီးပြီး အမှတ်တရ ဓာတ်ပုံရိုက်လို့ရပါတယ်။

——————————————-

ကလောမြို့ အနီးတဝိုက် လည်စရာတွေ

——————————————-

1. ပန်းခင်း

—————

ဆောင်းရောက်ရင် ကလောတဝိုက် မျက်စိတစ်ဆုံးမြင်ရတဲ့ ပန်းနှမ်းခင်းတွေ ပေါပါတယ်။ မြင်းမူကုန်းနားမှာလည်း ရှိပါတယ်။ ပန်းခင်းတွေနဲ့ ဓာတ်ပုံရိုက်ရင် ပန်းတွေကို မခူးပါနဲ့။ အပင်တွေကိုလည်း မနင်းမိအောင် သတိထားပါ။ ပန်းပင်တွေ ပျက်စီးရင် စိုက်ခင်းပိုင်ရှင်တွေ ထိခိုက်လို့ပါနော်။

ဒါကတော့ မြင်းမူကုန်းနားမှာ ပန်းခင်းတွေ့လို့ ဆင်းရိုက်ထားတဲ့ပုံတွေပါ။

2. မြင်းမထိ သဘာဝလှိုဏ်ဂူ

——————————————

ကလောရောက်ရင် မြင်းမထိဂူလည်း သွားလို့ရပါတယ်။ နှစ်ဖက်ပွင့်ဂူဆိုတော့ အဝင်ကနေအထွက်ထိ ၁၀၂၈ပေရှိပြီး ၁၅မိနစ်လောက်လျှောက်ရပါတယ်။ လမ်းတလျှောက်မှာ လှူထားတဲ့ ဘုရားတွေအများကြီးပါပဲ။ ဂူထဲမှာလွန်ခဲ့တဲ့နှစ်ပေါင်း ၂၃၀၀ ကျော်က သီရိဓမ္မာသောကမင်းကြီးတည်ခဲ့တဲ့ ဥဏ္ဏလုံမွေရှင်တော် ရှေးဟောင်းစေတီလည်းရှိပါတယ်။ ဂူလေးက ခပ်ကျဉ်းကျဉ်းနဲ့ မျက်နှာကျက်တွေက နိမ့်နိမ့်လေးတွေပါ။ ဒါပေမဲ့ ၂ဖက်ပွင့်ဆိုတော့ လေဝင်လေထွက်ကောင်းပါတယ်။ ဂူတလျှောက်အရုပ်ပုံအမျိုးမျိုးဖြစ်နေတဲ့ ကျောက်တွေလည်း တွေခဲ့ရပါသေးတယ်။

3. ဗျိုက်တောင်

——————–

ကလောကနေ မြင်းမထိဂူသွားတဲ့လမ်းမှာ ကားလမ်းပေါ်ကနေလှမ်းမြင်ရတဲ့ သဲကျောက်တောင်ကြီးက အရမ်းလှတာပါပဲ။ မုံးဝံတောင်လို့ခေါ်ပေမဲ့ ဗျိုက်ကြော်ငြာတဲ့ Calsome ကွေကာကြော်ငြာ အဲ့မှာရိုက်သွားလို့ ဗျိုက်တောင်လို့လည်း သိကြတယ်တဲ့လေ။

ကလောကနေ ဟဲဟိုး၊ ရွာငံ၊ ပင်းတယ၊ တောင်ကြီး၊ အင်းလေး နေ့ချင်းပြန်သွားလည်လို့လည်းရပါတယ်။

——————————–

ကလောမှာ ဘယ်မှာစားမလဲ

——————————–

ဒီဆိုင်တွေကတော့ ကလောမှာ စားဖူးခဲ့တဲ့ဆိုင်တွေပါ။

ရှမ်းခေါက်ဆွဲ၊ တို့ဖူးနွေးစားချင်ရင် ကလောမြို့မဈေးထဲက ဆိုင်တွေမှာ စားပါတယ်။ Main လမ်းမကြီးပေါ်က #ပြည့်ပြည့် ဆိုင်မှာလည်း စားကောင်းပါတယ်။

မြန်မာစာစားချင်ရင် Main လမ်းမကြီးပေါ်က #သုမောင် စားသောက်ဆိုင်မှာ စားပါတယ်။ ကလောရဲ့ နာမည်ကြီးဆိုင်ပါ။

#အောင်ငြိမ်းချမ်းအောင် ဆိုင်မှာလည်း မြန်မာစာ၊ တရုတ်စာ အစုံရလို့ အမြဲစားဖြစ်ပါတယ်။ ဘူတာလမ်းမှာ ရှိပါတယ်။ ဈေးသင့်တင့်ပါတယ်။

ရှမ်းစာ၊ ဒေသစာကို အေးဆေးစားချင်ရင်တော့ #ThiriGayhar Restaurant (or) 7 Sisters Restaurant မှာ စားဖြစ်ပါတယ်။ ပြည်ထောင်စုလမ်းဘေးမှာရှိတဲ့ အဖြူရောင်ကျောက်တုံးအဆင့်ဆင့်နဲ့ အိမ်လှလှလေးပါ။ အရင်နေရာကနေ နေရာအသစ်ပြောင်းဖွင့်ထားတာပါ။

နောက် ကလောရောက်တိုင်း စားဖြစ်တဲ့ ဆိုင်ကတော့ #Everest Nepali Indian Restaurant ပါ။ ချာပါတီ၊ ပူရီ၊ နို့ခဲဟင်းအရမ်းအရသာရှိလို့ အမြဲစားဖြစ်တဲ့ဆိုင်လေးပါ။ မြို့ထဲ အောင်ချမ်းသာလမ်းထဲမှာ ရှိပါတယ်။

#Kalaw Bamboo House မှာလည်း စကောထမင်းဟင်းတွေ စားလို့ကောင်းပါတယ်။ ထမင်းကို အရောင်စုံမှာလို့ရတာ ဒိဆိုင်ရဲ့ ထူးခြားချက်ပါ။ နှီးဘုရားလမ်းမှာရှိတဲ့ ရိုးရာစားသောက်ဆိုင်ပါ။

နှီးဘုရားလမ်းမှာရှိတဲ့ နောက်တစ်ဆိုင်ကတော့ #Cafe_Kalaw ပါ။ ပီဇာ၊ ဘာဂါ၊ Sandwich ဘိုစာကောင်းသလို ရှမ်းစာလည်းရပါတယ်။ ဆိုင်ခွဲသစ်ဖွင့်ထားတဲ့ဆိုင်ဆို ကျယ်ပြီး ရှုခင်းကြည့်လို့လည်း ကောင်းတယ်။

Myanma

#Maluca Villa Restaurant and Bar ကတော့ ကလောက ဖန်လုံအိမ်လေးနဲ့ဆိုင်လေးပေါ့။ ဆိုင်ထဲဝင်လိုက်တာနဲ့ နိုင်ငံခြားရောက်သွားသလို ဘိုဆန်ဆန် အငွေ့အသက်ခံစား ရမှာပါ။ ဆိုင်ထဲမှာရော ခြံဝန်းထဲမှာပါ ဓာတ်ပုံလှလှလေးတွေ ရိုက်လို့ရတဲ့နေရာလေးတွေ အများကြီးပါပဲ။

Heritage Hotel နားက #Kalaw-ish နဲ့ ရွှေဥမင်လမ်းပေါ်က #Rangoon to Kalaw ဆိုင်လည်း မရောက်ဖူးပေမဲ့ မဆိုးဘူးလို့ ကြားတယ်။

ကလောမှာ ညဘက်ထိုင်ဖို့ ဘားလှလှလေးတွေလည်း ရှိပါသေးတယ်။ Hi Bar ၊ Red House၊ Heritage 21 ၊ 126 Bar၊ Chill Bar တို့ကတော့ ကိုယ်ကြားဖူးတဲ့ ကလောက ဘားတွေပါ။

ဒါကတော့ ကလောမှာ နုမြတ်ရောက်ဖူးခဲ့ပြီး အလွယ်တကူသွားလို့ရတဲ့ နေရာလေးတွေပါ။ တခြားနေရာလှလှလေးတွေ ရှိရင်လည်း ပြောပြဦးနော်။ နောက်တစ်ခါ ကလောရောက်ရင် ဝင်လည်လို့ရအောင်ပေါ့။

ချစ်ခင်လျှက်

Nu Myat

မီးရထားကြီးဂျုံးဂျုံးဂျက် ကျောက်ဆည်ဆီသို့ခရီးထွက် 

မီးရထားကြီးဂျုံးဂျုံးဂျက်

ကျောက်ဆည်ဆီသို့ခရီးထွက်

စနေတနင်္ဂနွေ ရုံးပိတ်ရက်မှာ ကျောက်ဆည်နဲ့ မန္တလေးကို ရန်ကုန်ကနေ ရထားကြီးစီးပြီး စားရိတ်သက်သက်သာသာ(၅သောင်းဝန်းကျင်လောက်)နဲ့၂ညအိပ်ခရီးထွက်ခဲ့တယ်ဆိုရင် ဘယ်လိုလည်း စိတ်ဝင်စားလား။ ဘယ်လိုသွားခဲ့လဲဆိုတာရယ်၊ ညရထားစီးတဲ့အတွေ့အကြုံတွေရယ်၊ ကျောက်ဆည်က အရမ်းစိတ်ဝင်စားဖို့ကောင်းတဲ့ ရှေးဟောင်းဘုရားတွေအကြောင်းရယ်ကို ပြောပြပေးထားတယ်နော်။ 

RTLD6566

ထူးထူးခြားခြား ဆင်ရုပ်ကြီးတွေနဲ့ ကပြပူဇော်တဲ့ ဆင်ပွဲကျင်းပရာ ကျောက်ဆည်…
ရှေးဟောင်းတန်ခိုးကြီးဘုရားစေတီတွေများစွာရှိတဲ့ ကျောက်ဆည်…
စွန်ရဲအင်း၊ နေကြာခင်းတို့နဲ့ လှချင်တိုင်းလှနေတဲ့ ကျောက်ဆည်….

အဲဒီလို အလှအပ၊ ယဉ်ကျေးမှုပေါင်းစုံတဲ့ သမိုင်းဝင်ကျောက်ဆည်မြို့ နဲ့ မန္တလေးကို စားရိတ်သက်သက်သာသာနဲ့ သွားချင်တယ်။ ရက်ကလည်း သိပ်မရှိဆိုရင် ဒီနည်းအတိုင်းသွားနိုင်ပါတယ်လို့။ ဘယ်လိုသွားခဲ့သလဲဆိုတော့ စနေနေ့ညနေမှာ ကျောက်ဆည်ကို ညရထားနဲ့သွား။ ရထားပေါ်ညအိပ်။ မနက်ကျတော့ ရန်ကုန်ကနေဖုန်းဆက်ပြီး ကြိုဌားထားတဲ့ မန္တလေးကကားကို ကျောက်ဆည် ဘူတာမှာလာစောင့်ခိုင်း။ Sunday တစ်နေကုန် ကျောက်ဆည်၊ မန္တလေး၊ အမရပူရ ဘုရားစုံဖူးပြီး အပြန်ကျတော့ မန္တလေးကနေ Express Bus နဲ့ ညအိပ်ပြန်ပေါ့။

တစ်နေကုန်ဆိုတော့ နည်းနည်းနေတော့ ပင်ပန်းနိုင်ပေမဲ့ နုမြတ်တို့ အဘိုး အသက် ၉၆နှစ်အရွယ်တောင် ဒီလမ်းကြောင်းအတိုင်း တစ်ကောက်ကောက်လိုက်နိုင်ပြီး နေရာစုံရောက်ခဲ့တာကြောင့် လူငယ်လူရွယ်တွေဆို နည်းနည်းတော့ အပင်ပန်းခံလိုက်ပါနော်။ (အဘိုးကိုတော့ ညကားစီးရင် အရမ်းပင်ပန်းမှာစိုးလို့ အပြန်ကို လေယာဉ်နဲ့ပြန်ခိုင်းလိုက်တယ်) စနေ၊ တနင်္ဂနွေ ပိတ်ရက်မှာ ငွေကျပ် ၅သောင်းဝန်းကျင်နဲ့ မြို့၃မြို့က နေရာစုံရောက်နိုင်တာမို့လို့ပင်ပန်းရကျိုးနပ်မှာပါ။ မြို့၃ မြို့ဆိုတာကျောက်ဆည်နဲ့ မန္တလေးအပြင် အမရပူရကိုပါ ဝင်လည်ခဲ့ကြတာကြောင့်ပါ။ Sunday တစ်ရက်ထဲနဲ့ ကျောက်ဆည်မြို့က မဟာရွှေသိမ်တော်ဘုရားကြီး၊ ရှင်ပင် ရွှေဆပ်သွားဘုရား၊ ကျောက်ဆည် ရှင်ပင်ရွှေတမုတ် ရွှေဂူကြီး၊ ကျောက်ဆည် ရှေးဂူဘုရား၊ မန္တလေးမြို့က မဟာမြတ်မုနိဘုရားကြီး၊ ကျောက်စိမ်းဘုရား၊ အမရပူရ ဦးပိန်တံတားပါ ရောက်ခဲ့ကြတယ်ဆို နည်းနည်းများလွန်သွားမလား။

received_10154983614097123-01

#ကုန်ကျစားရိတ်အကြမ်းဖျဉ်း

အပေါ်မှာပြောထားသလို ညရထားနဲ့ သွားပြီး ညကားနဲ့ပြန်မယ်ဆိုရင်၊ လူအုပ်စုလည်းတောင့်တယ်ဆိုရင် စနေသွား-တနင်္လာမနက်ပြန်အရောက် တစ်ယောက်ကို ၅သောင်း ဝန်းကျင်ပဲကျမှာပါ။
ရထားခ အိပ်စင် ၄ယောက်ခန်း တစ်ယောက် = ၁၀၀၀၀ကျပ်ဝန်းကျင်
ကားဌားခ ၁၀ယောက်စီး တစ်နေ့ ၁၂၀၀၀၀ ဆိုတော့ တစ်ယောက် ၁၂၀၀၀ (ကားကတော့ လူများမှ သက်သာမှာပါ)
အပြန်ကားခ – ၁၀၀၀၀ကျပ်
အစားအသောက်( လေးနပ်စာ) – ၁၅၀၀၀ ဝန်းကျင်

#ရထားစီးအတွေ့အကြုံ

ဒီတစ်ခေါက်ကျောက်ဆည်သွားတော့ ကားနဲ့ မသွားဘဲ ရထားနဲ့ သွားဖို့ ဆုံးဖြတ်ခဲ့တာက အမြန်လမ်းပေါ်ကကား accident သတင်းတွေကြောင့် အမြန်လမ်းကို ကြောက်တာ တစ်ကြောင်းရယ်၊ မစီးတာကြာတဲ့ ရထားစီးကြည့်ချင်တာ တစ်ကြောင်းရယ်ကြောင့်ပါ။

ညရထားမှာက ညနေ၃နာရီထွက်တာနဲ့ ညနေ၅နာရီထွက်တာဆိုပြီး ၂မျိုးရှိတယ်။ ၃နာရီရထားက လေအိတ်ရထားဆိုတော့ အရမ်းငြိမ်တယ်။ ကော်ဖီခွက်တင်တောင် မမှောက်ဘူးတဲ့။ သန့်လည်းသန့် သူခိုးလည်း မပေါဘူးတဲ့လေ။ ဒါပေမဲ့ ၃နာရီရထားက အိပ်ခန်းမပါတာရယ် ကျောက်ဆည်မှာ မရပ်ဘဲ မန္တလေးမှ ရပ်မှာမို့လို့ရယ်ကြောင့် ၅နာရီရထားနဲ့ပဲ သွားဖြစ်ခဲ့တာ။ ရထားလက်မှတ်ကို ကပ်မှဝယ်တော့ အိပ်ခန်းက တစ်ခန်းပဲရလိုက်တယ်။ အိပ်ခန်းက ၄ယောက်ခန်းပါ။ တစ်ဖက်ကို ၂ထပ်ကုတင်၁ခုစီပေါ့။ အိပ်စင်ပါပေမဲ့ ရထားကမှန်းထားသလောက်မတိုးတက်လာဘူး။ ဟိုးအရင်အရင်ကအတိုင်းပဲ။ သပ်ရပ်သန့်ရှင်းဖို့ လိုပါသေးတယ်။ နောက်ပြီး ရထားက လှုပ်တာတော့ တော်တော်လှုပ်ပါတယ်။ လှုပ်တာမှ ယမ်းခါနေတာပါပဲ။ ပြတင်းပေါက်ဖွင့်ထားရင် လေဝင်ပေမဲ့ လေနဲ့အတူ နွားချေးနံ့လိုလို မြေသင်းနံ့လိုလို အနံ့သင်းသင်းလေးတွေလည်း ပါလာတတ်တယ်။

ဒါပေမဲ့ အိပ်စင်နဲ့ဆိုတော့ ခြေလက်ဆန့်လို့ရတယ်။ ကားထက်စာရင် ကျယ်ကျယ်ဝန်းဝန်းရှိတယ်။ ကိုယ့်အခန်းနဲ့ကိုယ်ဆိုတော့ Privacy လည်းရှိတယ်။ သူငယ်ချင်းတွေ၊ မောင်နှမတွေသွားရင် ပျော်စရာကြီး။ ဂိမ်းတွေဆော့၊ စကားတွေပြောနဲ့ အချိန်တွေကုန်လို့ ကုန်သွားမှန်းတောင်သိမှာ မဟုတ်ဘူး။

အကြိုက်ဆုံးအချက်က ကြိုက်တဲ့အချိန် အိမ်သာထသွားလို့ရတာပဲ။ ကားတွေလို အိမ်သာရောက်ဖို့စောင့်စရာမလို။ ပေါက်တော တိုးစရာမလိုတော့ဘူး။ ဒီအချက်ကတော်တော်ကျေနပ်စရာပါ။ ကားပေါ်မှာ အပေါ့အလေးသွားချင်တာကို အောင့်ထားရတဲ့ ဒုက္ခကတော်တော် ခံရခက်မှန်း ကြုံဖူးသူတိုင်း သိကြမှာပါ။ အိမ်သာက အိပ်ခန်းနဲ့တွဲလျက်ပါတာတော့ မဟုတ်ပါဘူး။ ဒါပေမဲ့ ရထားအတွဲတိုင်းမှာတော့ပါပါတယ်။ ဘိုထိုင်ရော မြန်မာထိုင်ပါ တစ်လုံးစီပါပြီး အိမ်သာ မညစ်ပတ်တာနဲ့တင် ကျေနပ်စရာပါ။

ဒီတော့ နောက်တစ်ခါ ရထားစီးမလားဆိုရင်တော့ စီးဦးမယ်ပေါ့။ ရထားစီးရတာကို ကြိုက်တဲ့သူကိုး။ အတွေ့အကြုံ အသစ်ရဖို့ စီးကြည့်ပါလို့လည်း တိုက်တွန်းလိုပါတယ်။ စီးကြည့်ပြီးမှ ရထားလှုပ်တာကို မခံနိုင်လို့ မနုမြတ်ကြီး ဂျင်းထည့်တယ်တော့ ပြောနဲ့နော်။ ရထားကလှုပ်ပါတယ် ယမ်းပါတယ်လို့ အစကတည်းက ပြောပြီးသားပါဆို။

#ကျောက်ဆည်က တန်ခိုးကြီးဘုရားများ

ဒီခရီးစဉ်မှာက ကျောက်ဆည်ကို အဓိကသွားတာဆိုတော့ ကျောက်ဆည်မြို့က ထင်ရှားတဲ့နေရာတွေအကြောင်းနဲ့ ရှေးဟောင်းဘုရားတွေ အကြောင်းပဲ ပြောပြတော့မယ်နော်။

#မဟာရွှေသိမ်တော်ဘုရားကြီး

နုမြတ်တို့ ကျောက်ဆည်သွားရတဲ့ အဓိကအကြောင်းအရာက မဟာရွှေသိမ်တော်ဘုရားကြီးကို ဖူးမြော်ဖို့ပါ။ ဘုရားကြီးမှာ အဓိဌာန်အောင် ကန်တော့ပွဲပေးရင် အဓိဌာန်အောင်တယ်။ အရောင်းအဝယ်ကောင်းတယ်ဆိုလို့ အိမ်ရဲ့ အလုပ်အကိုင်ကိစ္စတချို့အဆင်ပြေဖို့ အဓိဌာန်ပွဲလာပေးတာလည်းပါတာပေါ့။ ဘုရားကြီးမှာ ကန်တော့ပွဲပေးထားကြတာ နည်းတာမဟုတ်ဘူး။ စေတီပတ်လည် ရင်ပြင်အပြည့်။ ကန်တော့ပွဲရောင်းတဲ့ဆိုင်တွေလည်း အများကြီး။ လာတဲ့ဧည့်သည်တိုင်းကို သူ့ထက်ငါ အလုအယက်ခေါ်နေကြတာ။ ဘုရားပွဲပေးရင် ပွဲကပ်ပေးတဲ့ ပုဂ္ဂိုဟ်တွေလည်း အများကြီး ရှိပါတယ်။ နေ့နံပြောပြလိုက်ရင် ဘုရားမှာ သေချာ ရွတ်ဖတ်ပြီး ကပ်လှူပူဇော်ပေးပါတယ်။

ရွှေသိမ်တော်မြတ်စွာဘုရားကို အနော်ရထာမင်းကြီးတည်ထားကိုးကွယ်ခဲ့ပြီး သိမ်သမုတ်တော်မူခဲ့တဲ့ ပုဂ္ဂိုလ်ဟာလည်း မင်းကြီးကိုးကွယ်ခဲ့တဲ့ ရှင်အရဟံ အရှင်မြတ်ပါတဲ့။ အနော်ရထာမင်းကြီးက ပထမ မြန်မာနိုင်ငံတော်ကို အောင်မြင်စွာ တည်ဆောက်နိုင်သူဖြစ်ပြီး အရည်းကြီးသာသနာကို ဖယ်ရှားပြီး ထေရဝါဒ ဗုဒ္ဓသာသနာကို ထွန်းကားစေခဲ့သူပါ။ ပုဂ္ဂိုလ်ထူးနှစ်ဦး ကိုးကွယ်ခဲ့တဲ့ သိမ်တော်ဖြစ်လို့ ဘန်းတန်ခိုးကြီးမြတ်တယ်လို့ သိရပါတယ်။

IMG_4628

#ရှင်ပင်ရွှေဆပ်သွားဘုရား

ဒီဘုရားက အတော်ဆန်းးကြယ်ပါတယ်။ လွန်ခဲ့တဲ့ ၁၀နှစ်က ရင်္သေ့ကြီး ဦးခန္ဒီတည်ထားတဲ့ ဘုရားဆင်းတုတစ်ဆူပဲရှိတယ်လို့သိထားကြတာ။ ၂၀၀၆ခုနှစ်လောက်က ဘုရားအောက်နားက လင်းနို့တွေ ဝင်ထွက်လေ့ရှိတဲ့ အပေါက်ကို မင်္သကာဖြစ်ပြီး တူးဖော်ကြည့်လိုက်တဲ့အခါကြမှ အထဲမှာ လှိုဏ်ခေါင်းနဲ့ ဘုရားတစ်ဆူရှိနေသေးတာကို ထူးဆန်းစွာဖူးမြော်ခဲ့ကြရတယ်။

IMG_7433

အဲဒီအတွင်းကဘုရားဆင်းတုရဲ့ ညာဘက်လက်မောင်းတော်မှာ ကြွက်ဝင်တဲ့အပေါက်ရှိနေလို့ ကြွက်သိုက်ကိုရှင်းလိုက်တဲ့အခါ ညာဘက်လက်မောင်းတော်ပြုတ်ကျပြီး အောက်မှာ ဘုရားအဆင့်ဆင့်ရှိနေတာကို ဆက်လက်ရှာဖွေတွေ့ရှိခဲ့ရတယ်တဲ့။ ၅ဆင့်တောင် ငုံပြီးရှိနေတာတဲ့လေ။ အံ့အားသင့်စရာကြီးနော်။ ပုဂံ၊ အင်းဝ၊ ပင်းယ၊ ညောင်ရမ်း၊ ကုန်းဘောင် ခေတ်၅ခေတ်အဆက်ဆက် ဘုရားဆင်းတု၅ဆူကို တစ်ခေတ်ပြီး တစ်ခေတ်ငုံပြီး တည်ထားခဲ့တာ တွေ့ရတာ အရမ်းဆန်းကြယ်ပါတယ်။

IMG_7434

YEQQ3632 (45)

ဘုရားဖူးပြီးတဲ့အခါ ဝင်ပေါက်မုခ်ဦးနား လမ်းတစ်ဖက်က နေကြာခင်းတွေမှာ ဓာတ်ပုံသွားရိုက်။ နေကြာခင်းက သိပ်လှတာပဲ။ နုမြတ်တို့သွားတုန်းကဆို နေကြာခင်းကြီးက မျက်စိတဆုံးပဲ။ ဝင်းဝါနေတာ။ လှမှလှပဲ။ ဒီတော့ ဘုရားလည်းဖူး လိပ်ဥလည်းတူး (ဓာတ်ပုံရိုက်တာပြောပါတယ်) ခဲ့တယ်ပေါ့။ ကိုယ့်ဟာကိုယ် နေကြာစေ့ကြော်ငြာရိုက်ကွင်းထဲ ရောက်နေသလိုလိုတောင် ထင်မှတ်မိစေမှာပါလို့။

#ကျောက်ဆည် ရှင်ပင်ရွှေတမုတ် ရွှေဂူကြီး

ဒီဘုရားကြီးလည်း အတော်ထူးဆန်းပါတယ်။ မူလကတောင်ပို့ကြီးလိုဖြစ်နေတာကို တူးဖော်ကြည့်လိုက်တဲ့အခါမှာမှ ဂူဘုရားကြီးပေါ်လာတာပါ။ ပွင့်ပေါ်လာတဲ့ ပုဂံခေတ်စေတီရဲ့ အပေါ်ကနေ ပင်းယခေတ်စေတီက ငုံထားတာပါ။ ဒီလိုငုံပြီးဆောက်ထားခဲ့လို့လည်း အတွင်းက ပုဂံခေတ်စေတီမှာ ပုဂံခေတ်ဗိသုကာလက်ရာတွေ၊ ဘုရားနံရံကဖောင်းကြွအရုပ်တွေ၊ ကနုတ်တွေ နဂိုအတိုင်း မပျက်မစီးရှိနေတာကို အံ့သြဖွယ်ရာတွေ့ရှိခဲ့ကြရတာပါ။ ပင်းယခေတ်ထပ်ဆင့်ငုံစေတီကြီးရဲ့ အတိုင်းအတာ၊ ပန္နက်ပုံနဲ့ ဖြတ်ပိုင်းပုံကို နှောင်းခေတ်သုတေသီတွေ သိရှိစေဖို့ မူလအခြေအနေအတိုင်း ချန်လှပ်ထားခဲ့တာကိုလည်းတွေ့ရပါတယ်။

IMG_4642

ဒီဂူဘုရားကြီးဆီရောက်တဲ့အခါ ထူးထူးခြားခြားအနေနဲ့ ပုဂံခေတ်ပုံစံ ဂူဘုရားနဲ့ ဘုရားပတ်လည်ပရဝုရ်ကို အမိုးတွေမိုးထားတာကိုတွေ့ရပါတယ်။ ရှေးဟောင်းအဆောက်အအုံတည်ရှိရာဇုံ (Ancient Monumental Zone)အဖြစ် ယဉ်ကျေးမှုဝန်ကြီးဌာနက ၂၀၁၅ခုနှစ် ဒီဇင်ဘာလသတ်မှတ်ခဲ့တာကြောင့် ရှေးလက်ရာတွေ မပျောက်ပျက်အောင်၊ လေဒဏ်မိုးဒဏ်ခံနိုင်အောင်၊ ဖူးမြော်သူတွေလေ့လာနိုင်အောင် လဟာပြင်ပြတိုက်သဖွယ် သေချာထိန်းသိမ်းပြသထားတာပါ။ အမိုးအောက်မှာ နေရာအနှံ့ မြှုပ်ထားတဲ့ပျူအရိုးအိုးတွေ၊ ပုဂံခေတ်ပန္နက်အုတ်ရိုးတွေ၊ ပြာကျင်းထဲ မြှုပ်နှံထားတဲ့ ပျူခေတ်အိုးခွက်ပုဂံတွေ၊ အင်္ဂတေဖျော်တဲ့ကန်၊ နှစ်၁၀၀၀ သက်တမ်းရှိ ရေတွင်းကြီး၊ နှစ်ဆင့်ပိုမြှင့်ထားတဲ့ စတုမုခနောင်တော်ကြီး ဂူဘုရား စတာတွေကို တူးဖော်စဉ်ကတွေ့ရှိရတဲ့အတိုင်း အမှတ်အသားပြုကာ ထားပေးထားပါတယ်။

ရှင်ပင်ရွှေဆပ်သွားဘုရားလိုပဲ ကျောက်ဆည် ရှင်ပင်ရွှေတမုတ် ရွှေဂူကြီးမှာ ပွင့်ပေါ်လာတဲ့ သုံးထပ်ဆင့်ရုပ်ပွားတော်ကိုလည်းတွေ့ရပါတယ်။ ပထမရုပ်ပွားတော်က လွန်ခဲ့တဲ့နှစ်ပေါင်း ၁၀၀၀ရှိ ဂုတ္ထခေတ်ဟန်ဖြစ်နေပြီး ၊ ဒုတိယရုပ်ပွားတော်က နှစ်၉၀၀သက်တမ်းရှိ ပါလခေတ်ဟန်ဖြစ်ကာ အပေါ်ဆုံးကငုံထားတဲ့ တတိယရုပ်ပွားတော်က နှစ်၈၀၀သက်တမ်းရှိ ပုဂံခေတ်ဟန်ဖြစ်နေတာကိုတွေ့ရပါတယ်။

IMG_4639

#ကျောက်ဆည်တောင်ပေါ်ဘုရားများ

မန္တလေးကို ဝင်လည်မယ်ဆိုရင်တော့ တောင်ပေါ်ဘုရားတွေ ဖူးဖို့ အချိန်ရှိမှာ မဟုတ်ပါဘူး။ အေးအေးဆေးဆေးသွားမယ်ဆိုရင် ကျောက်ဆာ်တောင်ပေါ်ဘုရားတွေဆီလည်း ဖူးသင့်ပါတယ်။ တောင်ပေါ်ကနေမြို့တစ်မြို့လုံးကို လှမ်းမြင်နိုင်သလို ရှုခင်းလည်းလှပါတယ်။ တောင်ပေါ်မှာ စေတီဘုရားများစွာတည်ထားတာလည်းတွေ့ရပါတယ်။ သင်္ဘောပုံဖြစ်နေတဲ့ကျောက်ပေါ်စေတီတည်ထားတဲ့ ကျောက်သင်္ဘောစေတီနားက သင်္ဘောကြီးပုံစံဆောက်လုပ်ထားတဲ့ အဆောက်အအုံကြီး၊ ပြည်လုံးချမ်းသာရွှေတိဂုံစေတီတော်၊ လေးမျက်နှာမူထားတဲ့ ဧရာမရပ်တော်မူရုပ်ပွားတော်များဖြစ်တဲ့ ဆုတောင်းပြည့် မဟာမြတ်လေးဆူ၊ ထုထည်ကြီးမားတဲ့ အဘယမုဒြာ ထိုင်တော်မူမြတ်စွာဘုရားကြီး၊ သေလာဂီရိရန်အောင်မြင်စေတီတော်နဲ့ ‘ထူပါရုံ’ စေတီတော်မြတ်ကြီးတို့ကို ဖူးမြော်နိုင်ပါတယ်။

20160821_175439-01

#စွန်ရဲအင်း

စွန်ရဲအင်းကတော့ အခုတစ်ယောက်မှာ မရောက်ခဲ့ရပေမဲ့ အရင်တစ်ခေါက်တုန်းက ရောက်ခဲ့လို့ သွားသင့်တယ် ဆိုတဲ့အကြောင်းလေး ထည့်ရေးချင်လို့ပါ။ တောင်တွေနောက်ခံနဲ့ ရေကန်အကျယ်ကြီးထဲ ကြာပန်းတွေ ကြာရွက်တွေကြား ပုသိမ်ထီးလေးနဲ့ လှေစီးထွက်တဲ့ ပုံလှလှလေးတွေ တစ်ခေတ်ဆန်းသွားတာ သိကြမှာပါ။ အဲ့လိုပုံလေးတွေနဲ့အတူ စွန်ရဲအင်းကလည်း နာမည်ကြီးလာတာပါ။ နုမြတ်တို့သွားတုန်းက လူတော့ သိပ်မရှိတော့ဘူး။ အခုလည်း စည်သေးရဲ့လားတော့ မသိဘူး။ ဒါပေမဲ့ အတွေ့အကြုံ သစ်ရသလို ပုံလှလှလေးလေတွေလည်း ရနိုင်လို့ သွားကြည့်သင့်ပါတယ်။ ကြာပန်းတွေကို လူတွေ ခူးပြီး ဓာတ်ပုံရိုက်လို့ ကြာပန်းလှလှလေးတွေ မရှိတော့ဘဲ အလှပျက်စေလို့ နုမြတ်တို့ သွားတုန်းက ဧည့်သည်တွေကို ခူးခွင့်မပေးဘူး။ ဒါပေမဲ့ လှေသမားတွေကကြာပန်းလှလှလေးတွေ ဆောင်ထားပြီး ဧည့်သည်ဓာတ်ပုံရိုက်တဲ့အခါမှာ ထုတ်ပေးတော့ အဆင်ပြေတယ်။ ပုသိမ်ထီးတွေကိုလည်း အလေးခံ သယ်သွားစရာမလိုဘူး။ သူတို့ဆီမှာ ဌားလို့ရတယ်။ အင်းစပ်မှာ အကြော်ဆိုင်တွေ၊ အအေးဆိုင်တွေရှိတော့ အစားအသောက်အတွက်လည်း အဆင်ပြေတယ်။ အခုအခြေအနေတော့ မသိတော့ဘူးပေါ့လေ။

IMG_20160822_102521-01

ဒါကတော့ ကျောက်ဆည်မှာ နုမြတ်သွားခဲ့ဖူးသလောက် နေရာတွေပါ။ ဘာသာရေးကိုင်းရှိုင်းပြီး သမိုင်းဝင်တဲ့ကျောက်ဆည်မှာ အခြားဘုရားစေတီတွေလည်း အများကြီးရှိပါသေးတယ်။ ကျောက်ဆည်နဲ့ပတ်သက်ပြီး သိတဲ့သူတွေရှိရင် ဗဟုသုတရအောင် ပြောပြပါဦးနော်။

နုမြတ်

Nu Myat around the World

ရေမြှုပ်နေတဲ့ စေတီတွေရှိရာ စံကားမြို့


အင်းလေးကန်ထဲမှာ ရေမြှုပ်နေတဲ့မြို့နဲ့ စေတီပုထိုးတွေရှိတယ်ဆိုတာသိကြလား????
ပုံစံအမျိုးမျိုးရှိတဲ့ ရှေးဟောင်းစေတီတွေ အင်းလေးရေပြင်ထဲမြှုပ်နေတာ သိပ်ကိုထူးဆန်းတဲ့မြင်ကွင်းပေါ့…
အဲ့ဒီမြို့လေးကတော့ စံကားဆိုတဲ့မြို့လေးပါ။ အင်္ဂလိပ်လိုဆိုရင်တော့ Sam Kar လို့ပေါင်းပါတယ်။ စကားလို့ အသံထွက်ပါတယ်။ စံကားမြို့လေးက အင်းလေးကန်တောင်ဖက်ပိုင်း အင်းလေးကန်ရဲ့ အရှေ့ဘက်ကမ်းမှာ တည်ရှိပါတယ်။ လူဦးရေ ၁၅၀၀ လောက်ပဲရှိတဲ့ မြို့သေးလေးတစ်မြို့ဖြစ်ပြီး ရှမ်း၊ ပအိုဝ့်၊ အင်းသားလူမျိုးတွေနေထိုင်ကြပါတယ်။ ဟိုးတစ်ချိန်တုန်းကတော့ ရှမ်းပြည်တောင်ပိုင်းမှာ အချမ်းသာဆုံး ဖြစ်ခဲ့ဖူးတယ်တဲ့လေ။


ဘာလို့ ရေမြှုပ်နေရသလဲ
၁၉၇၀ ခုနှစ်လောက်တုန်းက လောပိတရေအားလျှပ်စစ်စက်ရုံအတွက် မိုးဗြဲဆည်ကို တည်ဆောက်ချိန်မှာ ရေမြှုပ်သွားခဲ့တာပါ။ စံကား၊ ဖယ်ခုံအပြင် အင်းလေးတောင်ပိုင်းကရွာပေါင်းများစွာရယ် ဘီလူးချောင်းတလျှောက်က ရွာတွေရယ် ရေမြုပ်သွားတယ်လို့သိရပါတယ်။ ရွာမှာနေထိုင်သူတွေဟာ မိမိ အိုးအိမ်စည်းစိမ်တွေကို စွန့်လွှတ်ပြီး ရေလွတ်ရာကို ပြောင်းရွှေ့ကာ ရွာတည်နေထိုင်ခဲ့ကြရတယ်တဲ့လေ။ အခုလက်ရှိ စံကားမြို့ကတော့ အသစ်တည်ထားတဲ့ မြို့ကြီးပေါ့။
မြန်မာတစ်နိုင်ငံလုံးက မြို့ကြီးတွေ လျှပ်စစ်မီးရအောင် ရွာအမြှုပ်ခံကာ စတေးခဲ့ရပေမဲ့ သူတို့ကိုယ်တိုင်မှာတော့ အခုထက်ထိ လျှပ်စစ်မီးမရရှိသေးဘူးတဲ့လေ။ စိတ်မကောင်းစရာပဲနော်။


ဘာတွေလည်စရာရှိလဲ
စံကားလှေဆိပ်ရှိရာ ဘုန်းကြီးကျောင်းဝင်းမှာတင် ရှေးဟောင်းဘုရားတွေရယ်၊ ရေထဲမြှုပ်နေတဲ့ ဘုရားတွေရယ် တွေ့နေရပါပြီ။ လှေဆိပ်မှာ စားသောက်ဆိုင်ငယ်တွေရှိသလို ကမ်းနားက စားသောက်ဆိုင်ကနေ အင်းလေးကန်ရှုခင်းကြည့်ပြီးလည်း စားသောက်နိုင်ပါတယ်။
ကိုယ်တွေကတော့ လှေဆိပ်ကနေ လှေစီးလုံးငါးခ ၂၀၀၀၀ ကျပ်ပေးပြီး အင်းထဲက တာခေါင်မွေတော်ဘုရားနဲ့ နတ်တာရိုးတို့ကိုလည်ပတ်ခဲ့ကြပါတယ်။


တာခေါင်မွေတော်ဘုရား
တာခေါင်မွေတော်ဘုရားက မွေတော်ကက္ကူဘုရားတွေလို၊ ရွှေအင်းတိမ်ဘုရားတွေလို ပုံသဏ္ဏာန်အမျိုးမျိုးရှိတဲ့ ရှေးဟောင်းဘုရားတွေအများကြီး စီစီရီရီရှိနေတဲ့ စေတီစုပါ။ စေတီနားလှေကပ်လာတဲ့အခါမှာတော့ ရေထဲမြှုပ်နေတဲ့ စေတီတချို့က စီးကြိုလို့နေပါတယ်။ ကန်စပ်မှာရှိတဲ့ စေတီမုခ်ဦးဝက ခြင်္သေ့ကြီး၂ကောင်ကလည်း အင်းလေးကန်ကြီးကို လှမ်းမျှော်နေသယောင် မြင်ကွင်းက ဆွေးစရာပါ။


ရဲရဲနီအောင်ပွင့်နေတဲ့ပန်းခင်းတွေနောက်မှာတော့ စေတီတွေ၊ စေတီတွေ အများကြီး လှမ်းမြင်နေရပါတယ်။ စေတီပေါင်း ၂၃၆ဆူတောင်ရှိပြီး စေတီအများစုက လွန်ခဲ့တဲ့ နှစ် ၆၀၀ကျော်ကတည်ထားခဲ့တာတဲ့လေ။ အဲ့ဒီထဲကမှ နှစ်ပေါင်း ၂၀၀၀ ကျော်ကတည်ထားခဲ့တဲ့စေတီကြီးကတော့ ဗိသုကာလက်ရာကအစ ဆန်းကြယ်လို့နေပါတယ်။ အလောင်းစည်သူမင်းကြီးတည်ထားခဲ့တဲ့ ရွှေရောင်စေတီကြီးကတော့ ရှေးဟောင်းစေတီတွေအကြား သပ္ပါယ်စွာ ရှိလို့နေတာပေါ့။


နတ်တာရိုး
နတ်တာရိုးကတော့ အင်းလေးကန်အရှေ့နဲ့အနောက်ကို ကန့်လန့်ဖြတ်ထားတဲ့ သဘာဝကျောက်တံတိုင်းကြီးပါ။ လှေဆိပ်ကနေ မိနစ်၂၀လောက်လှေစီးရပါတယ်။ ဒီတာရိုးကြီးမှာ ပါးစပ်ရာဇဝင်တစ်ခုရှိပါတယ်။ ဒေသခ့တွေကတော့ နတ်တို့ဖန်ဆင်းထားတယ်လို့ ပြောစမှတ်ပြုကြတာပေါ့။ ဟိုးရှေးရှေးတုန်းက အင်းလေးကန်ရဲ့ အရှေ့ရေထွက်ပေါက်နဲ့ အနောက်ရေထွက်ပေါက်ကို နတ်သား၂ပါးနဲ့ နတ်သမီး၁ပါးတို့က ကိုယ်စီစောင့်ရှောက်ထားကြပါတယ်တဲ့။ နတ်သားထဲကတစ်ပါးက နတ်သမီးကို ချစ်ခင်စုံမက်လို့ သွားကမ်းလှမ်းတဲ့အခါ မိုးမလင်းခင် ရေထွက်ပေါက်၂ခုကို တံတားတစ်စင်း အပြီးဆောက်ပေးရင်လက်ခံမယ်လို့ ပြန်ပြောပါသတဲ့။ နတ်သားလည်း အားကြိုးမာန်တက်နဲ့ အပြီးဆောက်တာပေါ့။ ဒါပေမဲ့ နတ်သမီးလေးက လက်မဆက်ချင်တာကြောင့် ကြက်တစ်ကောင်ကို မိုးမလင်းခင် တွန်ဖို့စေခိုင်းခဲ့သတဲ့လေ။ ကြက်တွန်သံလည်းကြားရော မိုးလင်းပြီအမှတ်နဲ့ နတ်သားလေး လက်လျှော့သွားတာကြောင့် တံတားက မပြီးမပြတ်ဖြစ်နေတာတဲ့လေ။ ဒါကြောင့်လည်း တာရိုးက အနောက်ဘက်ကမ်းအထိမရောက်ဘဲ အင်းလေးကန်အလည်မှာ ပြတ်သွားတာကိုတွေ့ခဲ့ရပါတယ်။
ကိုယ်တွေရောက်တဲ့အချိန်က ရေတက်နေတဲ့အချိန်မို့လို့ ရေပေါ်ပေါ်နေတဲ့ တာရိုးပေါ်ထိတက်ကြည့်လို့ရပါတယ်။ နောက်ပိုင်းမှာ အသစ်အဆန်းအနေနဲ့ တာရိုးတလျှောက် ဝါးဖောင်နဲ့ သွားကြည့်လို့ရမယ်လို့လည်း သိရပါတယ်။


ဘယ်လိုသွားလဲ
-အင်းလေးဟိုတယ်ဇုံကနေ ရေလမ်းနဲ့ အင်းလေးကန်ထဲကသွားမယ်ဆိုရင် ၂နာရီခွဲလောက်မောင်းရပြီး ကားလမ်းနဲ့ဆိုရင်တော့ ၁နာရီကျော်ကျော်လောက်မောင်းရပါတယ်။
-ကားလမ်းနဲ့ဆို ညောင်ရွှေ- လွိုင်ကော်လမ်းအတိုင်း မောင်းရင် အင်းလေးအရှေ့ဘက် ဟိုတယ်ဇုံကနေ ၁နာရီကျော်လောက်ပဲမောင်းရပါတယ်။ ကိုယ်တွေသွားခဲ့တုန်းကတော့ Novotel hotel ကနေ အသွားအပြန် ကားဌားခ ၃၀၀၀၀ ကျပ်နဲ့ ရခဲ့ပါတယ်။

-လွိုင်ကော်ကနေလာမယ်ဆိုရင်တော့ ၂နာရီလောက်မောင်းရမှာပါ။
-မွေတော်ကက္ကူနဲ့လည်းနီးတော့ တောင်ကြီးကလာမယ်ဆိုရင် ညောင်ရွှေဖြတ်စရာမလိုဘဲ တောင်ကြီး-ကက္ကူ-ကျောက်တစ်လုံးလမ်းအတိုင်းလာလို့ရပါတယ်။ တောင်ကြီးကနေတော့ စံကားအထိ ၂နာရီ ကျော်လောက်မောင်းရမှာပါ။
အင်းလေးဟိုတယ်တွေကနေ ကားနဲ့သွားရင် အသွားတစ်နာရီ၊ အပြန်တစ်နာရီ၊ စံကားမှာ လှေနဲ့သွားလည်တဲ့ ၂နာရီဆို စုစုပေါင်း ၄နာရီကျော်-၅နာရီလောက်ပဲကြာတဲ့အတွက် နေ့ချင်းပြန်သွားလို့ရပါတယ်။


အင်းလေးမကြာမကြာရောက်ဖူးသူတွေအနေနဲ့ အသစ်အဆန်းနေရာအဖြစ်သွားလည်နိုင်ပါတယ်။ သမိုင်းဝင်ရှေးဟောင်းစေတီတွေ ရေထဲမြှုပ်နေတဲ့ တကယ်ထူးခြားလှတဲ့ မြင်ကွင်းပါ။ ဒါကြောင့်မို့လို့ စံကားမြို့က ရှေးဟောင်းသမိုင်းဝင်စေတီတွေကို အင်းလေးရောက်ရင် သွားရောက်ဖူးမြော်နိုင်အောင် ဖော်ပြလိုက်ပါတယ်နော်။


ချစ်ခင်လျှက်
မနုမြတ်

Nu Myat around the World

လည်မယ်ပတ်မယ် နေပြည်တော်ဝယ်

လည်မယ်ပတ်မယ် နေပြည်တော်ဝယ်


ရုံးပိတ်ရက်တွေမှာ နေ့ချင်းပြန်ဖြစ်ဖြစ် ညအိပ်ဖြစ်ဖြစ် ခရီးထွက်ချင်တယ်ဆိုရင် နေပြည်တော်ကိုလည်း မမေ့သင့်ပါဘူး။ နေပြည်တော်က အချက်အချာကျတဲ့နေရာမှာရှိလို့ ရန်ကုန်ကနေပဲသွားသွား၊ မန္တလေးကနေပဲ သွားသွား နီးပါတယ်။နေပြည်တော်က မြန်မာပြည်ရဲ့ မြို့တော်ဖြစ်သလို မြို့သစ်ကြီးလည်းဖြစ်တော့ နေရာတိုင်းက သန့်ပြန့်ခမ်းနားနေပါတယ်။ နေပြည်တော်သွားမယ်ဆိုရင် တစ်ညအိပ်ဆို ကောင်းကောင်းလည်လို့လောက်ပါတယ်။ အစုံလည်းရောက်ချင်ပြီး အေးအေးဆေးဆေး သွားချင်ရင်တော့ နှစ်ညအိပ်လောက်သွားရပါမယ်။

ဥပါတသန္တိစေတီတော်


နေပြည်တော်မှာ ဖူးမြော်နိုင်တဲ့ ဘုရားစေတီတွေအနက် ဥပါတသန္တိစေတီတော်ရဲ့ အနက်အဓိပါယ်က “ဖြစ်ပေါ်ကြုံတွေ့လာသည့် ဘေးအန္တရာယ်အားလုံး ငြိမ်းအေးစေခြင်း”ပါတဲ့။ စေတီတော်ကို ရန်ကုန်မြို့ကရွှေတိဂုံစေတီတော်မြတ်ကြီးနဲ့ ပုံစံတူ ဉာဏ်တော်အမြင့်အောက်(၁)ပေလျှော့ပြီး တည်ထားခဲ့တာပါ။ အရှေ့ဘက်မုခ်မှာ ဆင်ဖြူတော်တွေ မွေးထားပါတယ်။

မဟာသကျရံသီ ရုပ်ရှင်တော်မြတ်ကြီးကတော့ ဉာဏ်တော်အမြင့် ၃၂ပေရှိတဲ့ ရပ်တော်မူရုပ်ပွားတော်ကြီးဖြစ်ပြီး စကျင်ကျောက်ရပ်တော်မူ ဆင်းတုတော်ကြီးတွေထဲမှာ ဉာဏ်တော်အမြင့်ဆုံးပါတဲ့။ တောင်ပေါ်မှာရှိလို့ တောင်ပေါ်ကနေလည်း နေပြည်တော်ရှုခင်းတွေ လှမ်းမြင်ရသလို ညနေနေဝင်ချိန်ရှုခင်းလည်းသိပ်လှပါတယ်။

ဥပါတသန္တိစေတီတော်


ဒါ့အပြင် ရန်အောင်ချမ်းသာဘုရား၊ ထာဝရငြိမ်းချမ်းရေးစေတီတော်နဲ့ ရန်အောင်မြင်စေတီတော်တို့ကိုလည်း ဖူးမြော်နိုင်ပါတယ်။ နေပြည်တော်ပုဂံဆိုတာကတော့ ရှေးဟောင်းစေတီတွေ စုပြီးရှိတဲ့နေရာမလို့ နေပြည်တော်ပုဂံလို့ တင်စားခေါ်ဝေါ်ကြတာပါ။ ညောင်ပင်စု ရှေးဟောင်းစေတီတွေလို့လည်း သိကြပါတယ်။

နေပြည်တော်ပုဂံ

နေပြည်တော် ဗုဒ္ဒဂါယာကတော့ အိန္ဒိယနိုင်ငံ ဂါယာမြို့က ဗုဒ္ဒဂါယာအတိုင်း ပုံစံတူ တည်ဆောက်ထားတာပါ။ ဘုရားဝန်းထဲမှာ မဟာဗောဓိစေတီတော်မြတ်ကြီးအပြင် ဗောဓိပင်နဲ့ ရွှေပလ္လင်တော်နဲ့ စင်္ကြန်တော် အပါအဝင် သတ္တသတ္တာဟ (၇)ဌာနတို့ကိုလည်း ဖူးမျှော်နိုင်ပါတယ်။ နေပြည်တော် ဗုဒ္ဓဂါယာမှာ “ဖွား၊ ပွင့်၊ ဟော၊ စံ” စတဲ့ သံဝေဇနိယ လေးဌာနလုံးကို ပုံစံတူဆောက်ထားပါတယ်။ မဟာဗောဓိစေတီတော်မြတ်ကြီးကတော့ အဲ့ဒီလေးဌာနထဲက မြတ်စွာဘုရားပွင့်တော်မူရာ ပွင့်စေတီဌာနပါ။ ဓမ္မစကြာတရားဦး ဟောကြားရာ မိဂဒါဝုန်တော ဟောစေတီဌာန၊ ပရိနိဗာန်စံတော်မူရာ ကုသိနာရုံ အင်ကြင်းဥယျာဉ်နဲ့ စံစေတီဌာန၊ မြတ်စွာဘုရားဖွားမြင်တော်မူရာ လုမ္မနီဥယျာဉ်တော် ဖွားစေတီဌာနတို့လည်းရှိပါတယ်။


ဥယျာဉ်ကြီးတွေ အနေနဲ့ကတော့ ညနေတိုင်း မီးရောင်စုံ၊ တေးသံသာတွေနဲ့ ရေပန်းအကတွေ ကပြတဲ့ ရေပန်းဥယျာဉ်ကြီးက မြို့လည်မှာရှိပါတယ်။ ရေတံခွန်တွေ၊ မျှော်စင်တွေ၊ ကြိုးတံတားတွေနဲ့ သာယာလှတဲ့ ဥယျာဉ်ကြီးပါ။ အခုလောလောဆယ် မတ်လကုန်အထိ ပန်းပွဲတော် ကျင်းပနေလို့ သွားကြည့်သင့်ပါတယ်နော်။

အမျိုးသားအထိမ်းအမှတ်ဥယျာဉ်ကတော့ မြန်မာပြည်မြေပုံအတိုင်း မြောက်ဖျားကနေ တောင်ဖျားအထိ အထိမ်းအမှတ်နေရာတွေကို သေချာဆောက်ထားတာပါ။

တိရစ္ဆာန်လေးတွေ ကြည့်ချင်ရင် တိရစ္ဆာန်တွေကို သဘာဝအတိုင်း လွှတ်ထားတဲ့ နေပြည်တော် ဆာဖာရီဥယျာဉ်ကြီးနဲ့ နေပြည်တော် တိရစ္ဆာန်ဥယျာဉ်ကို သွားကြည့်နိုင်ပါတယ်။

အမျိုးသားပရဆေးဥယျာဉ်ကတော့ ဆေးဖက်ဝင်အပင်တွေ စိုက်ထားတဲ့ ဧက ၂၀၀ခန့်ရှိဥယျာဉ်ကြီး ပါ။ ကျောက်စိမ်းတွေနဲ့ အလှဆင်ထားတဲ့ ကျောက်စိမ်းဥယျာဉ်လည်း ရှိပါတယ်။

နေပြည်တော် ရေပန်းဥယျာဉ်ကြီး
နေပြည်တော် ရေပန်းဥယျာဉ်ကြီး
နေပြည်တော် ရေပန်းဥယျာဉ်ကြီး

လေ့လာစရာ ပြတိုက်တွေအနေနဲ့ကတော့ မြို့ထဲမှာဆိုရင် အမျိုးသားပြတိုက်နဲ့ မြန်မာ့ကျောက်မျက်ရတနာပြတိုက်တို့ ရှိပါတယ်။ တပ်မတော် စစ်သမိုင်းပြတိုက်က တိရစ္ဆာန်ဥယျာဉ်နားမှာရှိပြီး နက္ခတာရာပြခန်းကတော့ တိရစ္ဆာန်ဥယျာဉ်ထဲမှာရှိတာပါ။

နေပြည်တော် ဆာဖာရီဥယျာဉ်


အနီးအနားက အပန်းဖြေစခန်းတွေအနေနဲ့ ပျဉ်းမနား-ပင်လောင်းကားလမ်းပေါ် တောင်ကျရွာအနီးမှာရှိတဲ့ နေပြည်တော် ရေပူစမ်း၊ ပေါင်းလောင်းမြို့ ကနေ လှေစီးပြီးသွားနိုင်တဲ့ နမ့်မွန်ကြီးရေတံခွန်၊ နေပြည်တော်ကနေ နာရီဝက်မောင်းရင်ရောက်တဲ့ လှေခွင်းတောင်နဲ့ တောင်ခြေမြစ်ဘေးကမ်းခြေအပန်းဖြေစခန်းတွေနဲ့ ငလိုက်ကန်သာ အပန်းဖြေဥယျာဉ်စခန်းတို့ကိုလည်း သွားရောက်နိုင်ပါတယ်။

နမ့်မွန်ကြီးရေတံခွန်
လှေခွင်းတောင်ခြေမြစ်ဘေးကမ်းခြေအပန်းဖြေစခန်း

ဒေါက်တာနုမြတ်သိင်္ဂီဦး
Nu Myat around the World

Myanmar’s Petra or မုံရွာက ရွှေဘတောင်

မုံရွာက ရွှေဘတောင်

မုံရွာက ရွှေဘတောင်ကို မြန်မာနိုင်ငံက Petra လို့ပဲ တင်စား ပလိုက်ချင်တယ်
ကမ္ဘာ့အံ့ဖွယ်တစ်ပါးဖြစ်တဲ့ ဂျော်ဒန်နိုင်ငံက ပီထရာမြို့ဟောင်းလိုပဲ ရွှေဘတောင်က ကျောက်တောင်နံရံတွေမှာ အဆောက်အအုံတွေကို ထွင်းထုထားတာ အရမ်းလက်ရာမြောက်တာပဲ

edf
edf

သူက ဖိုလ်ဝင်တောင်နားမှာရှိလို့ ဖိုလ်ဝင်တောင်နဲ့ တစ်ဆက်တည်းသွားလို့ရတယ်
ရိုးရိုးမြေနီလမ်းကြားလေးကနေ ကျောက်နံရံကြီးတွေကြားထဲဗြုန်းခနဲရောက်သွားတော့ အံ့အားသင့်စရာပေါ့
ကျောက်တောင်ကြီးတွေကို ထက်ခြမ်းပိုင်းထားသလိုဖြစ်နေတဲ့ ကြားထဲက ကျောက်လှေကားထစ်တွေအတိုင်း ဆင်းသွားတဲ့အခါ လှပတဲ့ အဆောက်အအုံ၂ခုကို တစ်ဖက်တစ်ချက်မှာတွေ့လိုက်ရတယ်

IMG_20170826_141309-01-01
ဆန်းတာက အဲ့အဆောက်အအုံတွေက ကျောက်တောင်ကြီးကို ထွင်းထုထားတာတဲ့
ပိုဆန်းတာက အဲ့လို လက်ရာမြောက် ကျောက်နံရံထွင်း အဆောက်အအုံကြီးတွေ အထဲမှာ အများကြီးပဲ
ဘုရားတည်ထားတဲ့ အဆောင်တွေ၊ ရဟန်းတွေ သီတင်းသုံးတဲ့ အဆောင်တွေ၊ လူတည်းမဏ္ဏပ်တွေ၊ မီးဖိုခန်းတွေနဲ့ ကျောင်းဝင်းကျယ်ကြီးတစ်ခုစာလောက်ကျယ်တယ်

ဆင်းတုတွေ၊ ရုပ်တုတွေ၊ ဆင်ဝင်တွေ၊ ကနုတ်ပန်းတွေနဲ့ မြင်မြင်သမျှအရာရာတိုင်းက ကျောက်တောင်ကြီးကိုထွင်းထုထားတာပါတဲ့
အနော်ရထာမင်းကြီးနဲ့ ခေတ်ပြိုင် ဗန္ဓဝမင်းကြီးလက်ထက်က ပန်းချီဝန် ဦးရွှေဘ ဦးစီးကာစိတ်ကူးပုံဖော်ထားလို့ ရွှေဘတောင်လို့ခေါ်တာပါတဲ့။

edf
edf

ဒီလောက် ဆန်းကြယ်လှပပြီး လက်ရာမြောက်တဲ့ သမိုင်းဝင်ရှေးဟောင်းနေရာက ဘာကြောင့်လူသိသိပ်မများရတာပါလိမ့်??
နိုင်ငံခြားမှာဆို ပြစားလို့ ကောင်းလိုက်မယ်ဖြစ်ခြင်း

edf
edf

ဧရာဝတီမြစ်ဆုံဆီသို့

မြစ်ဆုံ တဲ့
❤️မေခနဲ့မေလိခဆုံတဲ့ နေရာလေး
❤️မြန်မာပြည်ရဲ့ အသက်သွေးကြော မိခင် ဧရာဝတီမြစ်ကြီး မွေးဖွားသန့်စင်ရာ နေရာလေး
❤️သဘာဝအလှတရားတွေ ပေါင်းစပ်ပြီး လှချင်တိုင်းလှနေတဲ့နေရာလေး
❤️” မေခနဲ့ မလိခဆုံတဲ့ ကမ်းနဘေးဝယ် အသည်းချင်းယှဉ်လျှက်တို့နှစ်ယောက်ချစ်ကမ္ဘာဝယ်” ဆိုတဲ့ ငယ်ငယ်ကကြားဖူးတဲ့ ပိုးဒါလီသိန်းတန် သီချင်းထဲက နေရာလေး
အဲ့နေရာလေးကို ၂၀၁၈ခုနှစ် နှစ်သစ်ရဲ့ ပထမဆုံးနေ့လေးမှာ သွားရောက်ခဲ့ရတယ်။ တကယ်အမှတ်တရပါပဲ။ Tango ရဲ့ မြစ်ကြီးနား-ပန်ဝါ-ထိန်ချုံး ခရီးစဉ်နဲ့အတူ ရောက်ဖြစ်ခဲ့တာပါ။


မြစ်ကြီးနားကနေ သွားကြမယ်

မြစ်ဆုံက ကချင်ပြည်နယ်ရဲ့မြို့တော် မြစ်ကြီးနားမြို့မြောက်ဘက် ၂၈မိုင်အကွာမှာ ရှိပြီး ကားနဲ့ဆို မြစ်ကြီးနားကနေ ၁နာရီကျော်လောက်မောင်းရပါတယ်။ ကားလမ်းကတော့ ဖြူးနေတာပဲ။ ကားလမ်းတလျှောက် ရွာတချို့နဲ့ မြစ်ဆုံစီမံကိန်းဝင်းကိုလည်း ကျော်ဖြတ်လာခဲ့ကြတယ်။ မြစ်ဆုံနေရာရောက်တဲ့အခါမှာ မြစ်ဆုံဆိုင်းဘုတ်နဲ့ အတူ စေတီတော်တစ်ဆူကိုလည်းလှမ်းဖူးမြော်ရပါတယ်။ ကားပါကင်ကနေတောင် မြစ်ဆုံကို အပေါ်စီးက လှမ်းမြင်ရတယ်။ တွေ့ရတဲ့မြင်ကွင်းက သိပ်လှတာပဲ။ မြစ်နှစ်ခုဆုံတဲ့ ကမ်းစပ်လေး မှာ ကျောက်စရစ်ခဲတွေအပြည့်။ ကျောက်စရစ်တွေပေါ် လူတွေကတော့ ဟိုတစ်စု ဒီတစ်စုနဲ့။ ကချင်ဝတ်စုံကိုယ်စီနဲ့ပေါ့လေ။


ကချင်ရိုးရာဝတ်စုံ
ကချင်ရိုးရာဝတ်စုံတွေကို မြစ်ဆုံကမ်းဘေးက စားသောက်ဆိုင်တန်းတွေမှာတင် ငှားရမ်းဝတ်ဆင်နိုင်ပါတယ်။ ငှားရမ်းခက တစ်စုံကို ၃၀၀၀ကျပ် ပဲပေးရတယ်။ သူတို့ဆီက ဓာတ်ပုံဆရာပါခေါ်ရိုက်မယ်ဆိုရင် ၂၀၀၀ ပဲပေးရတယ်။ ဝတ်စုံကို ဝတ်စုံပြည့် ငွေမောင်းတပ်ကတ္တီအ်အင်္ကျီအနက်ရောင်၊ ကချင်စကတ်တို့အပြင် ခါးကွင်း၊ ခေါင်းပေါင်း၊ ပလိုင်း၊ ဆွဲကြိုး အစုံအလင်ဆင်ပေးပါတယ်။ ကချင်စကတ်မှာ စကတ်အတို၊အရှည်၊ အလတ် အမျိုးမျိုးရှိတယ်။ နုမြတ်တို့က လူကများတော့ ရရာဆွဲဝတ်လိုက်တာ စကတ်လေးက နည်းနည်းတိုသွားတယ်။ နုမြတ်မေမေကတော့ စကတ်အရှည်လေးနဲ့။ ကချင်မကြီးနဲ့ ကချင်မလေး လှမှလှရယ်ပေါ့။ အဲ့မှာ ကိုယ်တွေဝတ်တဲ့ ဝတ်စုံအပြင် ဂါဝန်ကားကားလေးနဲ့ ချစ်စရာကောင်းတဲ့ လီဆူဝတ်စုံလည်းရှိပါတယ်။ ဘေဘီလေးတွေ ပဲများဖို့အတွက်လည်း မပူနဲ့။ ကလေးအရွယ် ကချင်ဝတ်စုံလေးတွေလည်း ရှိပါတယ်။


ဝတ်စုံဝတ်ရိုက်မယ်ဆိုရင်တော့ လူများရင်များသလို စောင့်ရပါတယ်။ ကိုယ်တွေတုန်းက လူများလို့ အော်ဒါအရင်မှာ စက်လှေအရင်စီးပြီး စောင့်လိုက်ရတယ်။ ပြီးတော့ ကိုယ့်ရှေ့ကလူတွေ ချွတ်တာနဲ့ တန်းဝတ်ရတာပါ။ ကိုယ်ကအသန့်ကြိုက်တယ်ဆိုရင်၊ ဒီထက်ပိုပြီးလှပသပ်ရပ်တဲ့ ဝတ်စုံပြည့်ဝတ်ချင်ရင် မြို့ထဲက ဆိုင်တွေမှာ တိုးဂိုက်ကို မေးပြီး ဌားလို့လည်းရပါတယ်။ ဌားခကတော့ ၁၅၀၀၀ လောက်ရှိတော့ မြစ်ဆုံကဆိုင်တွေမှာ ဌားတာထက် ၅ဆလောက်ပိုများပါမယ်။


သဘာဝပန်းချီကားချပ်

တစ်ဖက်မှာ မြစ်သုံးစင်းလုံးကို လှမ်းမြင်ရတဲ့ မြစ်ဆုံ၊ တစ်ဖက်မှာတော့ စိမ်းညှို့အုံ့မှိုင်းနေတဲ့တောင်တန်းတွေနဲ့ ရှုမျှော်ခင်း၊ အထက်မှာ ပြာလဲ့လဲ့မိုးကောင်းကင်၊ အောက်မှာတော့ ကျောက်စရစ်ကော်ဇောတွေခင်းထားတဲ့ သဘာဝရုပ်လုံးကြွ ပန်းချီကားချပ်ထဲ ဂျိန်းဖောတို့တတွေ ဓာတ်ပုံရိုက်မဆုံးဖြစ်နေကြတော့တာပေါ့။ မြစ်ဆုံရဲ့ ရေလေးတွေကလည်း ကြည်စိမ့်နေတာ။ မြစ်အောက်ကြမ်းပြင်တောင် လှမ်းမြင်ရတယ်။ ရေထဲ လက်နဲ့ ကိုင်ကြည့်လိုက်တော့ အေးစိမ့်နေတာပဲရော။ အင်းပေါ့လေ ရေခဲတောင်တွေကနေ စီးဆင်းလာတဲ့ ရေတွေပဲ။ ဒီလောက်တော့ အေးပေလိမ့်မပေါ့။


ဘယ်လိ ညာခ၊ မိနဲ့ဘ

“ဘယ်လိ-ညာခ”တဲ့ ဘယ်ဘက်ကနေ စီးဆင်းလာတာက မလိခဖြစ်ပြီး ညာဘက်ကနေ စီးဆင်းလာတာကတော့ မေခပါ။ အကယ်လို့များ မေခနဲ့ မလိခကသာ ဧရာဝတီရဲ့ မိဘ၂ပါးလို့ တင်စားမယ်ဆိုရင် မေခက ဖခင်၊ မလိခက မိခင်ဖြစ်လောက်တယ်။ ဘာကြောင့်လည်းဆိုတော့ မေခက ပိုကြမ်းပိုရမ်း ပိုရေစီးသန်တာကြောင့်ပါ။ မြန်မာနိုင်ငံမြောက်ဖျားက ဟိမဝန္တာရေခဲတောင်တန်းတွေကနေ တောင်စဉ်အသွယ်သွယ်ကျော်ဖြတ်ပြီး စီးဆင်းလာရတာခြင်းအတူတူ မေခမြစ်လေးက ပိုပြီး ရေစီးသန်ပါတယ်။ ဒါပေမဲ့ မြစ်ကြောင်း၂ခုပေါင်းဆုံရာ မြစ်ဆုံကနေစပြီး ဧရာဝတီမြစ်အဖြစ် တည်တည်ငြိမ်ငြိမ်လေး စီးဆင်းနေပါတော့တယ်။ နောက်ပိုင်းကျတော့ အဓိက ရေဝေမြစ်သုံးစီးဖြစ်တဲ့ ချင်းတွင်း၊ ရွှေလီနှင့် မြစ်ငယ်မြစ်တို့အပါအဝင် မြစ်လက်တက်တွေစီးဝင်တာကြောင့် အရှိန်အဟုန်ပြင်းလာတာပါ။


ဧရာဝတီ

ဧရာဝတီမြစ်က မြစ်စမြစ်ဆုံး မြန်မာနိုင်ငံတွင်းမှာပဲ စီးဆင်းလို့ ကိုယ်တွေချည်းပဲ သီးသန့်ပိုင်တဲ့ မြစ်ကြီးပါ။ မြန်မာနိုင်ငံရဲ့ အကြီးဆုံးမြစ်၊ အရှည်ဆုံးမြစ်ဖြစ်သလို အသက်သွေးကြောသဖွယ် တိုင်းပြည်ရဲ့အရေးအကြီးဆုံး ကူးသန်းရောင်းဝယ်ရေး ရေကြောင်းလမ်းလည်းပဲဖြစ်ပါတယ်။ နှင်းဖုံးတောင်လေးတွေကနေမြစ်ဖျားခံလာတဲ့ မြစ်လေး နှစ်စင်း ဆုံစည်းရာကနေ ဧရာဝတီမြစ်ကြီးက မြန်မာနိုင်ငံခလယ်ကနေ မြောက်မှတောင် မိုင်ပေါင်း ၁၃၀၀ ကျော်တိုင်တိုင် အားမာန်အပြည့်စီးဆင်းလာကာ နောက်ဆုံးမှာ အက်ဒမန်ပင်လယ်ထဲ စီးဝင်သွားတာ အံံအားသင့်စရာပါ။ ရာဇဝင်များရဲ့ သတို့သမီး ဧရာဝတီမြစ်ကြီး စတင်ဖြစ်ပေါ်ရာ မြစ်ဆုံနေရာလေးကို နှစ်သစ်ရဲ့ ပထမဆုံးနေ့လေးမှာ ရောက်ဖူးလိုက်ရတာ သိပ်ကျေနပ်မိပါတယ်။


၂၀၁၈ နှစ်သစ်မှာ Tango Travels & Tour -Myanmar နဲ့အတူ သွားခဲ့တဲ့ မြစ်ကြီးနား-ပန်ဝါ-ထိန်ချုံးခရီးစဉ် အကြောင်းမရေးခင် မြစ်ဆုံကပုံလေးတွေ လှလို့၊ ရိုက်ထားတာလည်း အများကြီးမို့လို့ မြစ်ဆုံကို ပို့စ်တစ်ခု သက်သက်ခွဲတင်လိုက်တာပါ။ မြစ်ဆုံအပြင် နှင်းတွေဖုံးလို့ နာမည်ကြီးလာတဲ့ တရုတ်နယ်စပ် ကချင်မြို့လေး ပန်ဝါနဲ့ လည်ပတ်စရာနေရာတွေ အများကြီးရှိတဲ့ ကချင်နယ်စပ် တရုတ်မြို့လေး ထိန်ချုံကိုပါ သွားလည်ခဲ့ပါသေးတယ်။ အဲ့ခရီးစဉ်အရှည်ကိုလည်း သေချာရေးပြီး အတွေ့အကြုံတွေ ဝေမျှပါဦးမယ်။


ချစ်တဲ့
နုမြတ်

အင်းလေးနားတဝိုက်က ဓာတ်ပုံရိုက်လို့ကောင်းတဲ့ ထူးထူးခြားခြားအိမ်(၄)အိမ်

အင်းလေးနားတဝိုက်က ဓာတ်ပုံရိုက်လို့ကောင်းတဲ့

ထူးထူးခြားခြားအိမ်(၄)အိမ်


အိမ်လေးတွေသာဆိုတယ် တကယ်က စားသောက်ဆိုင်နဲ့ ကော်ဖီဆိုင်လေးတွေပါ။ ဆိုင်နာမည်လေးတွေမှာ House တို့ အိမ်တို့ပါတာကြောင့် အိမ်လေးတွေလို့ ချစ်စနိုးခေါ်လိုက်တာပါ။ အဲ့ဆိုင်လေးတွေက ဆောက်ထားတာလည်းဆန်းလို့ ဓာတ်ပုံလှလှလေးတွေ ရိုက်ချင်တဲ့သူတွေအတွက်တော့ ပျော်စရာပေါ့။ ဒီအိမ်(၄)အိမ်အကြောင်းဖတ်ကြည့်ပြီး ဘယ်အိမ်အကြိုက်ဆုံးလည်း ပြောကြည့်ကြည့်နော်။

သစ်ပင်အိမ် (Little Tree House Restaurant)

စိတ်ကူးတွေထဲကလို သစ်ပင်အိမ်လေးပေါ့။ ဒါပေမဲ့ သစ်ပင်ပေါ်ဆောက်ထားတာမျိုးမဟုတ်ဘဲ သစ်ပင်ကြီးဘေးမှာ ဝါးတွေကိုသုံးပြီးဆောက်ထားတဲ့အိမ်လေးပါ။ အိမ်လေးက သဘာဝဆန်ဆန်လေးနဲ့ သိပ်ဆန်းတာ။ ထိုင်းဗိသုကာပညာရှင်တွေဆောက်ပေးထားတာတဲ့။ ဝါးအိမ်လေးက ၃ထပ်တောင်ရှိတာနော်။ အပေါ်ဆုံးထပ်ကတော့ ခပ်သေးသေးရယ်ပေါ့။ အဲ့ကနေ ရှုခင်းတွေကြည့်လည်းရတယ်။
အိမ်အပေါ်ထပ်ကို စားစရာတွေတင်တဲ့နည်းကလည်းမိုက်တယ်။ စက်သီးနဲ့ အတင်အချလုပ်တာ။ အစားအသောက်ကတော့ရောက်မှ ချက်ပေးတာဆိုတော့ နည်းနည်းတော့စောင့်ရမယ်။ စောင့်ရင်း ဟိုရိုက်ဒီရိုက်လုပ်ပေါ့။
အိမ်နားမှာ ဝါးနဲ့လုပ်ထားတဲ့ကစားကွင်းတွေလည်းရှိတယ်။ ဝါးလျှော၊ ဝါးဒန်း၊ ဝါးစီးဆောလေးတွေနဲ့ ပျော်စရာကြီး။ အနားမှာ ယက်ကန်းရုံလည်းရှိတော့ ယက်ကန်းခတ်တာလည်း တစ်ခါတည်းလေ့လာလို့ရတယ်။ ညမှောင်ရိပ်သန်းရင်မီးလေးတွေလင်းလာတဲ့အခါ ပိုတောင်လှသေးတယ်။ ပုံပြင်တွေထဲရောက်သွားသလိုပဲ။ အရမ်းသဘောကျတာ။
ညအိပ်ချင်ရင်တော့ သစ်ပင်အိမ်ဘေးက A Little Ecolodge ဟိုတယ်လေးမှာ တည်းလို့လည်းရတယ်။ လိပ်စာက ညောင်ရွှေမြို့ကနေ မိုင်းသောက်သွားတဲ့လမ်းပေါ် ညောင်ဖြူရွာနားမှာရှိပါတယ်။ ညောင်ရွှေမြို့ကနေ ၅မိနစ်လောက်သွားရင်ရောက်ပါတယ်။ အင်းလေးမြင်းစီးကွင်းသွားရာလမ်းမှာရှိတဲ့ A Little eco Lodge ဝင်းအတွင်းမှာပါ။ ဖုန်းနံပါတ်တွေကတော့ 09428363692 နဲ့ 09426649846 တို့ပါ။

လယ်တောအိမ် (La Rizieဲre Buvette)

လယ်တောအိမ်လေးကလည်း Tree House လိုပဲ ဝါးတွေနဲ့ဆောက်ထားတာ ။ စိမ်းစိုနေတဲ့စိုက်ခင်းတွေကြားက ဝါးနဲ့ဆောက်ထားတဲ့ နှစ်ထပ်အိမ်လေးကို သိပ်သဘောကျတာပဲ။ ဒါကကျတော့ ပြင်သစ်ဒီဇိုင်းလက်ရာလေးပါတဲ့။ ပြင်သစ်နာမည်လေးကတော့ La Rizieဲre Buvette Restaurant and Sunset Bar တဲ့။ လယ်တောအိမ်ဆိုတဲ့ဆိုင်းဘုတ်လေးအတိုင်း ဝင်သွားလို့ရှိရင် ဘယ်ဘက်မှာ ခေါင်မိုးချွန်ချွန်နဲ့တစ်ထပ်အိမ်တွေ့ရမှာဖြစ်ပြီး ဘယ်ဘက်မှာတော့ ဝါးလေးတွေနဲ့ဆောက်ထားတဲ့ နှစ်ထပ်အိမ်လေးရှိပါတယ်။ တစ်ထပ်အိမ်အလယ်မှာ Open Kitchen ကိုဝိုင်းထိုင်လို့ရတဲ့ Bar လေးရှိပြီး နှစ်ထပ်မှာကျတော့ ဝါးစားပွဲလေးတွေနဲ့ အေးဆေးစားလို့ရပါတယ်။ ဝါးနင်းသံတဂျွတ်ဂျွတ်နဲ့ ဝါးကြမ်းခင်းပေါ်ခြေပစ်လက်ပစ်ထိုင်ချပြီး တမျှော်တခေါ်မြင်ရတဲ့ စပါးခင်းစိမ်းစိမ်းစိုစိုကြည့်ရတဲ့ Feel က အရမ်းမိုက်တာနော့။ အစားအသောက်တွေကလည်း မှာမှ လတ်လတ်ဆတ်ဆတ်ချက်ပေးတာ။ ဒေသထွက်အသီးအနှံလေးတွေနဲ့ဖျော်ပေးတဲ့ Cocktail ကလည်း ကောင်းမယ့်ပုံပဲ။ Sunset လေးကြည့်ရင်း Cocktail လာသောက်ကြတယ်တဲ့လေ။ နုမြတ်တို့ကတော့ နေ့လည်ဘက်ရောက်သွားလို့ နေ့လည်စာဝင်စားခဲ့ကြတာ။
အဲ့မှာအကြိုက်ဆုံးက အိမ်သာလေးပဲ။ ဟိုးအစွန်ဆုံးက ခရုပတ်ပုံဆောက်ထားတဲ့ ဝါးအိမ်သာမှာတံခါးမရှိသလို ပြတင်းပေါက်လေးလည်းထားပေးတော့ စိမ်းစိမ်းစိုစိုရှုခင်းတွေကြည့်ရင်း အေးအေးဆေးဆေးထိုင်လို့ရတာပေါ့ 😂မိန်းမအိမ်သာဆီ အလွယ်တကူလာလို့မရအောင် ဝါးတံတားလေးကို ခြံတံခါးလို ပိတ်နိုင်အောင် ထွင်ထားတာလေးလည်း သိပ်သဘောကျတယ်။
လိပ်စာကတော့ အင်းလေးမရောက်ခင် ညောင်ရွှေကနေ ခေါင်တိုင်သွားတဲ့လမ်းလေးပေါ်မှာရှိတာပါတဲ့။ ညောင်ရွှေလှေဆိပ်မရောက်ခင်လေးတင်ပါပဲ။ ရှာမရရင် ဒီဖုန်း 09787230306 ကို ဆက်မေးကြည့်ပါ။

စက်ဘီးအိမ် (MOT Café)

ဒီအိမ်လေးကတော့ အပြာနုလေးတစ်အိမ်လုံးသုတ်ထားပြီး စက်ဘီးအဖြူလေးတွေနဲ့ တန်ဆာဆင်ထားတာ အရမ်းချစ်ဖို့ကောင်းတာပဲ။ ခြံစည်းရိုးမှာလည်း စက်ဘီးအဖြူလေးတွေ၊ အိမ်နံရံမှာလည်း စက်ဘီးအဖြူလေးတွေ၊ စက်ဘီးအဖြူလေးတွေကို ပဒေသာပင်လိုတောင် အဆင့်ဆင့်တင်ထားတာ။ သဘောကျလိုက်တာ။ ဆိုင်အပေါ်ထပ်တက်မယ့်လှေကားနားမှာလည်း ပန်းရောင်နဲ့ အစိမ်းရောင်သုတ်ထားတဲ့ ဆိုက်ကားလေးတွေထားပေးထားတယ်။
ဆိုင်အထဲမှာတော့ အစိမ်းနုရောင်အခန်းလေးမှာ ပန်းလေးတွေနဲ့ ဥယျာဉ်ထဲရောက်သွားသလို ချစ်ဖို့ကောင်းနေပြန်ရော။ အသေးစိတ်ကအစ သေချာပြင်ဆင်ထားလို့ အရမ်းကို ဓာတ်ပုံရိုက်လို့ကောင်းမယ့်ဆိုင်လေးပေါ့။
ဆိုင်နာမည်က MOT တဲ့။ ကိုရီးယားကလာဖွင့်ထားတာ။ သူက အနားက အသက်မွေးဝမ်းကျောင်းသင်တန်း ကျောင်းသူကျောင်းသားတွေအတွက် Charity သဘောမျိုးဖွင့်ထားတာတဲ့။ လာအားပေးတဲ့ ပိုက်ဆံတွေအကုန် ကျောင်းရန်ပုံငွေထဲ လှူပေးတာဆိုတော့ ကောင်းလိုက်တာနော်။ ဖွင့်တာတစ်ပတ်လောက်ပဲရှိသေးလို့ အစားအသောက်ကတော့မရသေးဘူး။ အအေးနဲ့ကော်ဖီပဲရပါသေးတယ်။
လိပ်စာကတော့ အင်းလေးအသွားလမ်း ညောင်ရွှေအကျော် မိုင်းသောက်တံတားမရောက်ခင် လမ်းဘယ်ဘက်မှာတင်ရှိပါတယ်။

ကော်ဖီအိမ် (Coffee House)


ဒီဆိုင်လေးလည်း ဖွင့်တာသိပ်မကြာသေးပါဘူး။ နေရာကလည်း Little Tree House အကျော်လေးမှာပါ။ Inle Horse Club မရောက်ခင်မှာရှိပါတယ်။
သူကတောင်ကုန်းလေးပေါ်မှာဆောက်ထားတဲ့ အိမ်လေးကို ကော်ဖီဆိုင်နဲ့ ဘားဆိုင်လေးဖွင့်ထားတာပါ။ အင်းလေးကန်ကို မြင်ရတဲ့ ရှုခင်းက သိပ်လှပါတယ်။ တစ်ဖက်မှာ ဆည်၊ တစ်ဖက်မှာ အင်းလေးကန်နဲ့ သိပ်ကိုကောင်းတဲ့နေရာမှာရှိတဲ့ အိမ်လေးပါ။ နေသာတဲ့နေ့တွေမှာ အဲ့အိမ်လေးကနေမြင်ရတဲ့ Sunset View လေးကလည်း သိပ်ကို မိုက်တာပဲတဲ့။
အဲ့မှာ ဝိုင်တွေကော်ဖီတွေအပြင် အစားအသောက်လည်းရပါတယ်။ နဂါးမောက်သီးဖော်ရည်ကတေ့ာ အရမ်းကောင်းပါတယ်။ စပျစ်ခြံနဲ့ နဂါးမောက်ခြံရှိတာဆိုတော့ ခြံထွက် စပျစ်ဖျော်ရည်၊ နဂါးမောက်ဖျော်ရည်က လတ်လတ်ဆတ်ဆတ်ပေါ့။
လိပ်စာကတော့ ညောင်ရွှေမြို့ကနေ မိုင်းသောက်သွားတဲ့လမ်းပေါ် ညောင်ဖြူရွာနားမှာရှိပါတယ်။ Inle မြင်းစီးကွင်းသွားတဲ့လမ်းမှာ Little Tree House အကျော် Inle Horse Club မရောက်ခင်မှာရှိပါတယ်။ ဖွင့်ချိန်က မနက်၉ကနေည၆နာရီထိပါ။ ဖုန်းနံပါတ် 09 787 230306 ကိုဆက်သွယ်နိုင်ပါတယ်။

ကဲဒီအိမ်လေးတွေကတော့ နုမြတ် 2018 က သွားခဲ့တဲ့ ညောင်ရွှေ-အင်းလေးခရီးမှာ သဘောကျခဲ့တဲ့ ဆိုင်လေးတွေပေါ့။ တခြားဓာတ်ပုံရိုက်လို့ကောင်းမယ့် စားလို့ကောင်းမယ့်ဆိုင်လေးတွေရှိရင်လည်း လမ်းညွှန်ပါဦးနော်။ ဒီဆိုင်လေးတွေကိုလည်း အကြိုက်တွေ့ရင် Like and Share လုပ်နိုင်ပါတယ်။


ချစ်ခင်လျက်
မနုမြတ်

ဆောင်နိုင်ကြီးရေတံခွန်နဲ့ ကျိုက်ထီးရိုး နေ့ချင်းပြန်ခရီး ( Golden Rock Pagoda, Myanmar)

ဆောင်နိုင်ကြီးရေတံခွန်နဲ့ ကျိုက်ထီးရိုး 

နေ့ချင်းပြန် Road Trip

ကျိုက်ထီးရိုးဘုရားရဲ့တောတောင်ရေမြေ သဘာဝအလှကတော့ ပြောစရာမလိုလောက်အောင်လှမှန်းသိပြီးသားပါ ဒါပေမဲ ကင်ပွန်းစခန်းနားက ဆောင်နိုင်ကြီး ရေတံခွန်ကိုတော့ ဒီလောက်လှမယ် မထင်ခဲ့ရိုးအမှန်ပါ။

IMG_6279-2-01

ရေတံခွန်ကြီးက အရမ်းကို အေးချမ်းသာယာတာပဲ။ တောထဲတောင်ထဲမှာ တသွင်သွင်စီးနေတဲ့ စမ်းချောင်းလေးတွေ၊ တဝေါဝေါကျနေတဲ့ ရေစီးသံလေးတွေနဲ့ အေးချမ်းလိုက်တာ။
ကျိုက်ထီးရိုးတောင်ခြေ ကင်ပွန်းစခန်းကနေ မြေနီလမ်းလေးအတိုင်း မိနစ် ၂၀လောက်မောင်းရင်ရောက်တော့ ကျိုက်ထီးရိုးဘုရားဖူးသွားရင်း ရန်ကုန်ကနေ နေ့ချင်းပြန်သွားလို့ရတယ်။

ဒီတော့ နေ့ချင်းပြန် ဘယ်သွားရမလဲ စဉ်းစားရကျပ်နေသူတွေအတွက် ကျိုက်ထီးရိုးဘုရားဖူးရင်း တောတွေတောင်တွေကြားက ရေတံခွန်လေးမှာ အေးဆေးအနားယူပြီး ရေဆော့နိုင်ပါတယ်လို့။ အချိန်ရရင် သုဝဏ္ဏဘူမိ Resort မှာ ကော်ဖီသောက်တာတို့ စိမ်းလဲ့တင် အပန်းဖြေစခန်းက Mini Zoo လေးထဲ အကောင်လေးတွေ သွားကြည့်တာတို့လည်း တစ်ခါထဲ လုပ်ခဲ့လို့ရပါတယ်။

ကျိုက်ထီးရိုး

ကျိုက်ထီးရိုးကတော့ ငယ်ငယ်လေးကတည်းကဖူးနေကြပါ။ ဒီတစ်ခါတော့ ၄နှစ်အရွယ်တူလေးလည်းပါတော့ တစ်ခါမှမရောက်ဖူးတဲ့ သူ့အစားရင်တွေခုန်နေပါတယ်။ ဟိုးအမြင့်ကြီးတောင်တွေပေါ်၊ တိမ်ပင်လယ်တွေကြားက ရွှေရောင်ဝင်းနေတဲ့ ကျိုက်ထီးရိုးစေတီကြီးက ဘယ်တော့ရောက်ရောက် ဖူးမဝ။ တောတောင်ရှုခင်းတွေဆိုလည်း ဘယ်တော့ရောက်ရောက်ကြည့်မဝ။

edf

edf

တောင်တက်ကားကြီးပေါ် တောင်အဆင့်အဆင့်ကွေ့ကာဝိုက်ကာ သွားရတာကိုလည်း အရမ်းသဘောကျတာ။ အခုတစ်ခေါက်မှာ ထူးခြားတာကတော့ တောင်တက်ကားတွေ အဆင့်မြင့်လာတာပါ။ ကားမှာ အမိုးတွေတပ်ထားသလို ထိုင်ခုံတွေမှာလည်း ခါးပတ်ကြိုးတွေတပ်ထားတယ်လို့။ တချို့ကားတွေဆို ထိုင်ခုံမှာ ဆိုဖာတပ်ထားတာတောင်တွေ့ရတယ်။ မဆိုးဘူးနော်။ Cable Car  နဲ့ ဆိုလည်း တောတောင်ရှုခင်းတွေ ပေါ်ကသွားရတာ အသည်းယားစရာလည်းကောင်း ပျော်စရာလည်းကောင်းပါတယ်။

20171031230200-01

20171031230301-01

နုမြတ်တို့က မနက်နောက်ကျမှ ၈ခွဲ-၉လောက်မှ ထွက်ဖြစ်တော့ ကင်ပွန်းစခန်းကို ၁၂လောက်မှရောက်တယ်။ တောင်ပေါ်မှာ ဘုရားဖူး ဓာတ်ပုံအေးဆေးရိုက် ထမင်းစားပြီးမှ ပြန်ဆင်းတာဆိုတော့ တောင်အောက်ကို ညနေ ၄ခွဲလောက်မှရောက်တယ်။ ကားကိုတော့ တောင်အောက် ကင်ပွန်းစခန်းက Feel စားသောက်ဆိုင် မျက်စောင်းထိုးက ဟိုတယ်ရှေ့မှာ ရပ်ထားခဲ့တယ်။ နေ့တဝက်ဆိုတော့ ကားရပ်ခ ၃၀၀၀ ပဲပေးရတယ်။

edf

 

ဆောင်နိုင်ကြီးရေတံခွန်

တောင်အောက်ပြန်ရောက်တော့ အဲ့မှာရပ်ထားတဲ့ကားပြန်ယူပြီး ဆောင်နိုင်ကြီးရေတံခွန်ဆီဆက်သွားခဲ့တယ်။ အဲ့ရေတံခွန်ကို ကင်ပွန်းစခန်းကနေ မိနစ်၂၀လောက် ကားလမ်းအတိုင်းသွားရင်ရောက်တယ်။ ကားလမ်းသိပ်မကောင်းသေးတော့ ကားကြီးနဲ့သွားမှအဆင်ပြေမယ်။ ကားပါမလာရင်တော့ ဆိုင်ကယ်ကယ်ရီနဲ့ တစ်ယောက် ၁၅၀၀ကျပ်နဲ့ ရေတံခွန်အရောက်လိုက်ပို့ပေးတယ်။

လမ်းမှာ ချောင်းတစ်ခုကိုတံတားနဲ့ဖြတ်ရတယ်။ အဲ့ချောင်းမှာတင် ခေတ်စကားနဲ့ပြောရရင် တစ်ကားရိုက်လို့ရတယ်။ ချောင်းဘေးမှာ တဲလေးတွေနဲ့ စားသောက်ဆိုင်လေးတွေ အစီအရီ။ ရေဆော့ဖို့ ဘောကွင်းတွေလည်း တွေ့ရတယ်။ တံတားပေါ်ဖြတ်ရင်း ဖြတ်ခနဲ လှမ်းကြည့်တာတောင် ရေအောက်ကကျောက်တုံးလေးတွေ လှမ်းမြင်ရလောက်တဲ့အထိရေကြည်တယ်။

20171031230337-01

အဲ့ကနေ တောလမ်းအတိုင်းဆက်မောင်းတဲ့အခါ ဝါးတိုင်လေးတွေ အစီအရီနဲ့ အဝင်ဝကို လှမ်းတွေ့ရတယ်။ အထဲမှာလည်း အလှဆင်ထားတာလေးတွေ ရှိတော့ ဓာတ်ပုံရိုက်လို့တော်တော်လှမယ်။ ကိုယ်တွေကတော့ နောက်ကျနေလို့ ရေတံခွန်ဆီပဲ တန်းသွားခဲ့ကြတယ်။ ရေတံခွန်ရောက်ဖို့ ကားပါကင်ကနေ တောလမ်းလေးအတိုင်း လမ်းလျှောက်သွားရတယ်။ လမ်းတလျှောက် စမ်းချောင်းလေးနဲ့ ရေတံခွန်အသေးလေးတွေနဲ့ အရမ်းသာယာတယ်။ စမ်းချောင်းဘေးမှာ ကျောက်တုံးတွေ ကျောက်ဆောင်တွေနဲ့ သဘောကျဖို့ကောင်းပါဘိ

edf

IMG_20171008_164822-01

ozedf

လျှောက်ရင်းလျှောက်ရင်း ဆိုင်တွေအစီအရီနဲ့ ရေဆော့တဲ့နေရာကိုရောက်ခဲ့တယ်။ အဲ့ဒီကနေ မိနစ်၂၀လောက်ထပ်လျှောက်ရင် ရေတံခွန်အကြီးရောက်မယ်တဲ့။ တောလမ်းကလည်းဖြစ် နောက်လည်းကျ ကလေးလည်းပါနေတော့ အဲ့အထိဆက်မသွားတော့ဘဲ လူအများရေဆော့တဲ့နေရာမှာပဲ ဆင်းဆော့ခဲ့ကြတယ်။

cof

အဲ့နေရာမှာတော့ လူရှင်းပြီး ဓာတ်ပုံရိုက်လို့လည်းလှတဲ့ အစွန်ဆုံးကိုသွားပြီး ရေထဲဆင်းဆော့ခဲ့ကြတာ။ ကိုယ်တွေဆော့တဲ့နေရာက ရေတံခွန်လေးတွေအများကြီးရှိပြီး တချို့နက်တဲ့နေရာက ရေတွေဆို စိမ်းပြာရောင်လေးတွေ ဖြစ်လို့ လှမှလှ။ တူလေးဆို ပျော်လွန်းလို့ ရေတွေနဲ့ လိုက်ပက်နေတာ။

IMG_6167

ချောင်းအလယ်က နေရာကို ရောက်ဖို့ ရေနည်းနည်းနက်တာကိုဖြတ်ရတယ်။ နက်တယ်ဆိုတာကလည်း ရင်ခေါင်းလောက်နက်တာပါ။ ရေတံခွန်အရှိန်နဲ့မျောမပါသွားအောင် ကမ်းတစ်ဖက်နဲ့တစ်ဖက် ကြိုးတန်းပေးထားတော့ သွားရအဆင်ပြေတယ်။ ရေတံခွန်တွေအလည်ရောက်တော့ ပျော်စရာပေါ့။

IMG_4355

အဲ့မှာသဘောကျတာတစ်ခုက ရေဆော့သူတွေ အန္တရာယ်မရှိအောင် ကမ်းစပ်မှာ ရွာသားတွေ စောင့်ပေးခိုင်းထားတာ။ ရေတံခွန်မှာကြိုက်တဲ့အချိန်ထိနေလို့ရတယ်။ ဧည့်သည်တွေပြန်မှ သူတို့လည်း ပြန်ရတာတဲ့လေ။

IMG_4360-2

အဲ့မှာရေဆော့ပြီး ပုံတွေအမုန်းရိုက်ပြီးတာနဲ့ မှောင်လည်း မှောင်စပြုလာပြီဆိုတော့ ရေစိုအဝတ်တွေလဲပြီးတာနဲ့ပြန်လာခဲ့ကြတယ်။ ညစာကိုတော့ ကျိုက်ထိုက Feel မှာပဲ ဝင်စားခဲ့ကြတယ်။ ည၁၁ နာရီလောက်ပြန်ရောက်ပါတယ်။

IMG_6123

ဒါကတော့ ကျိုက်ထီးရိုးဘုရားဖူးရင်း ဆောင်နိုင်ကြီးရေတံခါန်မှာ ရေကစားခဲ့ကြတဲ့ အတွေ့အကြုံတွေပါ။ တန်ဆောင်တိုင်ရုံးပိတ်ရက် အဲ့ဒီလိုလည်း နေ့ချင်းပြန်ခရီးထွက်လို့ရပါတယ်လို့။

ပျော်ရွှင်ချမ်းမြေ့ဖွယ်ရာ တန်ဆောင်တိုင်ဖြစ်ပါစေနော်။

ချစ်တဲ့
နုမြတ်

မုံရွာကို ပိတ်ရက်မှာသွားကြမယ် (Monywa, Myanmar)

မုံရွာက

လည်ပတ်စရာနေရာတွေ

🙏ကမ္ဘာ့အမြင့်ဆုံးရပ်တော်မူဘုရားရှိရာ ဗောဓိတစ်ထောင်
🙏ရပ်တော်မူရုပ်ပွားတော်နဲ့ ဘုရားဆင်းတုပေါင်း ၅သိန်းကျော် ရှိရာ မိုးညှင်းသမ္ဗုဒ္ဓေ
🙏နတ်မျောက်ပေါင်း အကောင်၇၀၀ ကျော်ရှိတဲ့ သမိုင်းဝင်ဖိုလ်ဝင်တောင်
🙏လက်ရာအရမ်းမြောက်တဲ့ ကျောက်နံရံထွင်း အဆောက်အအုံကြီးတွေရှိရာ ရွှေဘတောင်
🙏ဆုတောင်းပြည့် ကျောက်ကာရွှေဂူနီ
စတဲ့ တန်ခိုးကြီး ဘုရားတွေ၊ စိတ်ဝင်စားစရာနေရာတွေရှိရာ မုံရွာကို စနေတနင်္ဂနွေရုံးပိတ်ရက်မှာ ဘယ်လိုသွားကြမလဲ လမ်းညွှန်ပေးမယ်နော်

edf

🚐ဘယ်လိုသွားခဲ့လည်း

နုမြတ်တို့က မုံရွာ-စစ်ကိုင်း-မင်းကွန်း-မန္တလေး-ကျောက်ဆည် မြို့ငါးမြို့ကို သောကြာသွား တနင်္လာပြန်အရောက် ကိုယ့်ကားနဲ့ကိုယ် Road Trip ထွက်ခဲ့ကြတာပါ။
မေမေတို့နဲ့ အမတို့မိသားစုကတော့ သောကြာမနက်ကတည်းက ရန်ကုန်ကနေ ကိုယ့်ကားနဲ့ကိုယ်ထွက်ခဲ့ကြပြီး မုံရွာမှာ ညအိပ်ကြတာ။ နုမြတ်ကကျတော့ အလုပ်မပြီးသေးလို့ နောက်မှလိုက်သွားတာ။ ရန်ကုန်ကနေ မုံရွာကို တိုက်ရိုက်ရောက်တဲ့ ညကားနဲ့ သွားခဲ့ပါတယ်။ သောကြာညဘက် ၉နာရီထွက်တဲ့ကားနဲ့သွားတာ မနက်စောစော ၇နာရီလောက်ရောက်ပြီး စနေမနက်မှသူတို့ဟိုတယ်သွား join တာပါ။

စနေနေ့တစ်နေကုန် မုံရွာအနောက်ဘက်ခြမ်းကတောင်တွေနဲ့ မြို့ထဲ ဘုရားတွေဖူးခဲ့ပြီး မုံရွာမှာတစ်ညအိပ်လိုက်တယ်။
တနင်္ဂနွေကျတော့ မန္တလေးဘက်သွားမှာဆိုတော့ မန္တလေးသွားတဲ့ လမ်းကြောင်းမှာရှိတဲ့ ဘုရားတွေ ဖူးရင်း မင်းကွန်းစစ်ကိုင်းက ဘုရားတွေပါဖူးပြီး မန္တလေးမှာညအိပ်ခဲ့တယ်။
တနင်္လာကျတော့ မန္တလေးကဘုရားကြီးဝင်ဖူးပြီး အပြန်လမ်းမှာကျာက်ဆည်က ဘုရားတွေဝင်ဖူးပြီး ရန်ကုန်ပြန်ခဲ့ကြပါတယ်။ ဒီလိုသွားမယ်ဆိုရင်တော့ ၃ညအိပ်- ၄ရက်ကြာပါမယ်။

Weekend မှာသွားလည်မယ်ဆိုရင်

ဒီလိုမှမဟုတ်ဘဲ စနေတနင်္ဂနွေနှစ်ရက်ထဲနဲ့သွားလို့ရတဲ့နည်း ပြောပြပါမယ်။ ကားပေါ်မှာ ညအိပ်တတ်ဖို့တော့ လိုတာပေါ့နော်။ မုံရွာကို တိုက်ရိုက်ရောက်တဲ့ ညကားနဲ့ သောကြာနေ့ညဘက်အိပ်ပြီးလိုက်သွား။
စနေ၊ တနင်္ဂနွေ ၂ရက်စာ မုံရွာမှာ ကားဌားပြီး မုံရွာအနှံ့လျှောက်လည်ကြပေါ့။ စနေနေ့တစ်ရက်ပဲ မုံရွာမှာ ညအိပ်ရမှာ။ တနင်္ဂနွေညဘက်မှ ညကားနဲ့ ရန်ကုန်ပြန်လာ။ တနင်္လာမနက်ပြန်ရောက်တော့ အတော်ပဲပေါ့။
ရန်ကုန်ကနေ မုံရွာကို လေယာဉ်လည်း ပြေးဆွဲပါတယ်။ လေယာဉ်ကတော့ တစ်ပတ်မှာ သုံးရက်ပဲဆွဲတယ်လို့ ကြားပါတယ်။

🚌ဘယ်တွေသွားလည်ကြမလည်း

မုံရွာမှာက အနောက်ဘက်ခြမ်းကိုတစ်ရက် အရှေ့ဘက်ခြမ်းကိုတစ်ရက် နှစ်ရက်အပြည့်လည်စရာရှိပါတယ်။ ဒီ Post မှာတော့ နုမြတ်တို့သွားလည်ခဲ့တဲ့အစဉ်အတိုင်းရေးပြမယ်နော်။ နုမြတ်တို့က ပထမတစ်ရက်မှာ အနောက်ဘက်ခြမ်းမှာရှိတဲ့ တောင်သုံးတောင်နဲ့ မြို့ထဲဘုရားတွေ သွားဖူးခဲ့တယ်။ ဒုတိယတစ်ရက်မှာတော့ မန္တလေးသွားရင်း မိုးညှင်းသမ္ဗုဒ္ဓေနဲ့ ဗောဓိတစ်ထောင်ဝင်ဖူးခဲ့ပါတယ်။

🏞အင်ကြင်းတောင်

အနောက်ဘက်က တောင်တွေဘက်သွားလည်မယ်ဆိုတော့ လူသိပ်မရောက်ဖြစ်တဲ့ အင်ကြင်းတောင်ကို အရင်သွားခဲ့တယ်။ အင်ကြင်းကျောက်တောင်နံရံတွေ၊ ဂူတွေမှာ ဆင်းတုတွေ၊ ရုပ်တုတွေ အများကြီးတွေ့ခဲ့ရတယ်။ ကျောက်ကုတင်၊ ကျောက်ရေတွင်း၊ ကျောက်လိပ်၊ ကျောက်သပိတ်တို့လည်းရှိတယ်။ကျောက်ကုတင်နဲ့ ကျောက်နံရံထွင်းလျောင်းတော်မူဘုရားတို့ကတော့ ထူးထူးခြားခြားပါပဲ။

FB_IMG_1507109038081

🏞ဖိုလ်ဝင်တောင်

ဖိုလ်ဝင်တောင်ကတော့ နတ်မျောက်တွေအများကြီးရှိတဲ့တောင်ကြီးပါ။ ဘုရားပွဲရှိလို့ လူတွေများလာတဲ့အခါမှာ မျောက်တွေအလိုလိုပျောက်သွားကြတယ်။ ဘုရားပွဲပြီးမှ မျောက်တွေပြန်ရောက်လာကြတာ။ မျောက်ကောင်ရေပေါင်း ၇၀၀ ကျော်တောင်ရှိတာတဲ့လေ။ မျောက်ကြောက်တတ်ရင်တော့ မသွားသင့်ဘူး။ မျောက်တွေက အန္တရာယ်မပြုပေမဲ့ ဗိုက်အရမ်းဆာနေကြတာဆိုတော့ အစာအရမ်းတောင်းစားတယ်။ မုန့်မျောက်တွေက သိပ်လည်တယ်။ သူတို့ကို အစာကျွေးတဲ့သူကို မှတ်ထားတတ်ကြတယ်။ သူတို့ကိုကျွေးတဲ့သူနောက်လိုက်တောင်းတတ်ကြတယ်။

edf

ကားပေါ်ကဆင်းဆင်းခြင်းမှာတင် မျောက်လေးတွေကို စတွေ့နေရပြီ။ ကျောက်ပန်းခတ်သရဖူဆိုတာလေး လာရောင်းတယ်။ တောင်ပေါ်မှာပေါက်တဲ့ သစ်ခက်လေးတွေကို သရဖူပုံစံ သီထားပြီး ပန်းလှလှလေးတွေ ထိုးထားတာ။ တစ်ခုမှ ၅၀၀ ပဲ တန်မှတန်။ အမြင်လေးလည်းဆန်းတယ်။ တချို့ရာသီတွေမှ ရှိတာတဲ့လေ။

edf

ဖိုလ်ဝင်တောင်မှာ ကိုးနဝင်းကြေအောင် ကိုးဌာနက ဘုရားအဆင့်ဆင့်ကို တောင်တက်ပြီးဖူးရတယ်။ ကျောက်ကမ္ဘားယံတွေမှာထွင်းထုထားတဲ့ ဗုဒ္ဓရုပ်ပွားတော်ပေါင်း ၄၄၆၄၄၄ဆူ (၄သိန်း၄သောင်းကျော်)ရှိပါတယ်တဲ့။ မှတ်ရလွယ်အောင် ရွှေလသာဝါဝါ၀င်းလို့လည်း မှတ်ထားကြတယ်တဲ့။ မျောက်တွေတရုံးရုံးနဲ့ တောင်ပေါ်တက်ရင်းနဲ့ ကျောက်ဂူတွေထဲတည်ထားခဲ့တဲ့ ကျောက်ဆင်းတုတွေဖူးခဲ့ရပါတယ်။

edf

အဲဒိတောင်ကို ဝိဇ္ဇာဦးဖိုးဝင်းထွက်ရက်ပေါက်တဲ့ နေရာမို့လို့ အဲဒါကိုအစွဲပြုပြီး ဖိုးဝင်းတောင်လို့ခေါ်သလို ဖိုလ်ဝင်တောင်လို့လည်း ခေါ်ကြပါတယ်။ ဦးဖိုးဝင်း တရားထိုင်ခဲ့တဲ့ တောင်ပေါ်က ကျောက်ဂူထဲမှာ ဘုရားဆင်းတုတွေ တည်ထားကိုးကွယ်ထားပြီး ဆေးကျောက်ပျဉ်လည်းတွေ့ခဲ့ရပါတယ်။

edf

🏔ရွှေဘတောင်

မုံရွာက ရွှေဘတောင်ကို မြန်မာနိုင်ငံက Petra လို့ပဲ တင်စား ပလိုက်ချင်တယ်။ ကမ္ဘာ့အံ့ဖွယ်တစ်ပါးဖြစ်တဲ့ ဂျော်ဒန်နိုင်ငံက ပီထရာမြို့ဟောင်းလိုပဲ ရွှေဘတောင်က ကျောက်တောင်နံရံတွေမှာ အဆောက်အအုံတွေကို ထွင်းထုထားတာ အရမ်းလက်ရာမြောက်တာပဲ။ သူက ဖိုလ်ဝင်တောင်နားမှာရှိလို့ ဖိုလ်ဝင်တောင်နဲ့ တစ်ဆက်တည်းသွားလို့ရတယ်။

edf

ရိုးရိုးမြေနီလမ်းကြားလေးကနေ ကျောက်နံရံကြီးတွေကြားထဲဗြုန်းခနဲရောက်သွားတော့ အံ့အားသင့်စရာပေါ့။ ကျောက်တောင်ကြီးတွေကို ထက်ခြမ်းပိုင်းထားသလိုဖြစ်နေတဲ့ ကြားထဲက ကျောက်လှေကားထစ်တွေအတိုင်း ဆင်းသွားတဲ့အခါ လှပတဲ့ အဆောက်အအုံ၂ခုကို တစ်ဖက်တစ်ချက်မှာတွေ့လိုက်ရတယ် ။ ဆန်းတာက အဲ့အဆောက်အအုံတွေက ကျောက်တောင်ကြီးကို ထွင်းထုထားတာတဲ့။ ပိုဆန်းတာက အဲ့လို လက်ရာမြောက် ကျောက်နံရံထွင်း အဆောက်အအုံကြီးတွေ အထဲမှာ အများကြီးပဲ။ ဘုရားတည်ထားတဲ့ အဆောင်တွေ၊ ရဟန်းတွေ သီတင်းသုံးတဲ့ အဆောင်တွေ၊ လူတည်းဇရပ်တွေ၊ မီးဖိုခန်းတွေနဲ့ ကျောင်းဝင်းကျယ်ကြီးတစ်ခုစာလောက်ကျယ်တယ်။ ဆင်းတုတွေ၊ ရုပ်တုတွေ၊ ဆင်ဝင်တွေ၊ ကနုတ်ပန်းတွေနဲ့ မြင်မြင်သမျှအရာရာတိုင်းက ကျောက်တောင်ကြီးကိုထွင်းထုထားတာပါတဲ့။ အနော်ရထာမင်းကြီးနဲ့ ခေတ်ပြိုင် ဗန္ဓဝမင်းကြီးလက်ထက်က ပန်းချီဝန် ဦးရွှေဘ ဦးစီးကာစိတ်ကူးပုံဖော်ထားလို့ ရွှေဘတောင်လို့ခေါ်တာပါတဲ့။

🙏ရွှေတောင်ဦးဘုရား

ချင်းတွင်းမြစ်ကမ်းနဘေးတောင်ပေါ်မှာရှိပြီး ညနေစောင်းရှုခင်းတွေ သိပ်လှတယ်လို့ သိရပါတယ်။ မနက်ထွက်တာနောက်ကျတော့ တောင်သုံးတောင်ပြီးတဲ့အခါမှာ ညနေ ၃နာရီလောက်ရှိနေပါပြီ။ ဗိုက်ကလည်း အရမ်းဆာတာနဲ့ ဒီဘုရားက လမ်းကြုံနေပေမဲ့ ဝင်မဖူးဖြစ်လိုက်ရပါဘူး။

သတိထားရမှာက တောင်တွေဆီသွားမယ်ဆိုရင် မုံရွာမြို့ထဲကနေ ၁နာရီလောက်မောင်းရတာကြောင့် အသွားအပြန် ၂နာရီရယ်။ ဟိုမှာနေမှာက ၂-၃နာရီဆိုတော့ စုစုပေါင်း ၅နာရီလောက်မှန်းထားမှရမှာပါ။

🏞တွင်းတောင်

ဆေးဘက်ဝင် Spirulina စိမ်းပြာရေညှိထုတ်တဲ့ ရေအိုင်လို့ပြောတယ်။ ရေတွေက ကြည်မြစိမ်းစိုနေတာပဲတဲ့။ အဲ့နားက ရှုခင်းတွေလည်း သိပ်လှတယ်လို့ ပြောကြတယ်။ အဲ့ဘက်ကိုသွားမယ်ဆိုရင်တော့ အချိန်တော်တော်ပေးရမယ်။ နုမြတ်တို့ကတော့ရက်နည်းနေလို့ မရောက်ခဲ့ရပါဘူး။

🙏ကျောက်ကာရွှေဂူနီ

ထမင်းစားပြီးတာနဲ့ မြို့ထဲဘက်ပြန်ရောက်လာတော့ ကျောက်ကာရွှေဂူနီဘုရားပါ ဝင်ဖူးခဲ့ပါတယ်။ တကယ်က အရှေ့ဘက်မှာ ရှိတာဆိုတော့ နောက်ရက်မှ အရှေ့ဘက်သွားရင်းလည်း ဝင်ဖူးနိုင်ပါတယ်။ တန်ခိုးကြီးဘုရားမို့လို့ ရပ်ဝေးရပ်နီးက ဘုရားဖူးတွေနဲ့ပြည့်နေပါတယ်။ ဘုရားဝင်းထဲမှာ ကျောက်ပျဉ်နဲ့ သနပ်ခါးရောင်းတဲ့ဆိုင်တွေ အများကြီးမို့လို့ သနပ်ခါးချစ်သူတွေ အားပေးနိုင်ပါတယ်။ ယွန်းထည်တွေလည်း နာမည်ကြီးပါတယ်။

edf

🙏မြို့ထဲဘုရားများ

ညဘက်မှာတော့ မြို့ထဲနာရီစင်နားက ရွှေစည်းခုံဘုရားနဲ့ ဆုတောင်းပြည့်ဘုရားတို့ကိုလည်း ဖူးမြော်ခဲ့ပါသေးတယ်။

🙏မိုးညှင်းသုမ္ဗုဒ္ဓေ

ခေတ်စကားနဲ့ပြောရမယ်ဆိုရင်ဖြင့် ဒီဇိုင်းကာလာ အနေအထားဟာဖြင့် အတွဲအစပ် အလှဆုံး ဘုရားကျောင်းလို့ ပြောရမှာပါ။ ဘုရားမုခ်ဦး တစ်ဖက်တစ်ချက်မှာရှိတဲ့ အဆောက်အအုံနှစ်ခုမှာတင် တော်တော်ကို သဘောကျနေတာပါ။ လက်ရာမြောက်ကနုတ်တွေ၊ ချစ်စရာကောင်းတဲ့ ရုပ်တုတွေနဲ့ ပန်းနုရောင်၊ အစိမ်းနုရောင် အဆောက်အအုံတွေက ထူးခြားပါတယ်။ ဘုရားကျောင်းကြီးကလည်း လေးဘက်လေးတန်လျှောက်လမ်းတလျှောက် ပန်းနု၊ အစိမ်းနု၊ အဝါနုစတဲ့ အရောင်နုလေးတွေ စပ်ထားတဲ့ လက်ရာမြောက်ရုပ်တုတွေ၊ ကနုတ်ပန်းတွေနဲ့ တကယ်ကိုလှပါတယ်။ ဘုရားကျောင်းတွေမှာ တွေ့ရခဲတဲ့ အရောင်အတွဲအစပ်တွေပါ။ အရောင်နုနုလေးတွေကြိုက်တဲ့ ကျွန်မအတွက်တော့ ဘယ်နေရာကြည့်ကြည့်လှနေပါတယ်။

edf

ဘုရားဆောင်ကြီးထဲလည်းဝင်လိုက်ရော ပိုလို့တောင် အံ့သြဖို့ကောင်းနေတာကို တွေ့လိုက်ရပါတယ်။ ပတ်ပတ်လည်ကြည့်လိုက်ရင် ဝင်္ဂဘာလိုဖြစ်နေပြီး အပေါက်ဝတိုင်း ရပ်တော်မူဆင်းတုတွေ တစ်ဖက်တစ်ချက်ရှိနေတာ ဆန်းကြယ်လှပါတယ်။ နံရံနဲ့ မျက်နှာကျက်တွေမှာလည်း နေရာလွတ်မကျန် အုတ်ခွက်ဘုရားတွေ မြောက်များစွာထွင်းထုထားတာ တကယ်ကို အမြင်ဆန်းပါတယ်။ ဘုရားဆင်းတုပေါင်း ၅၇၃၈၈၈ဆူရှိတယ်လို့ သိရပါတယ်။ ၅သိန်း၇သောင်းကျော်တောင်ဆိုတော့ အများကြီးနော်။ ၁၀နှစ်ကျော်ဆောက်လုပ်ခဲ့ရတယ်တဲ့။

edf

🙏ဗောဓိတစ်ထောင်နဲ့ ရပ်တော်မူရုပ်ပွားတော်ကြီး

ကမ္ဘာ့အမြင့်ဆုံး ရပ်တော်မူ ရုပ်ပွားတော်ကြီး မြန်မာနိုင်ငံမှာရှိနေတာ ဂုဏ်ယူစရာပါ။ ဉာဏ်တော်အမြင့် ပေပေါင်း ၄၂၄ ပေမြင့်မားလို့ အရင်က အမြင့်ဆုံးဖြစ်ခဲ့တဲ့ ဂျပန်နိုင်ငံ “ယူရှီကူအမိဒ” ရပ်တော်မူဘုရားကြီး (ဉာဏ်တော်အမြင့်ပေ ၃၉၃ ပေ ၉ လက်မ) ကို ကျော်လွန်ပြီး ကမ္ဘာ့စံချိန် တင်ခဲ့တာပါ။ ဗောဓိတစ်ထောင် ဆရာတော်ဘုရားကြီးက ၁၉၉၅ ခုနှစ်ကနေ ၂၀၀၇ ခုနှစ် အထိ ၁၂နှစ်ကြာ တည်ဆောက်ခဲ့တာတဲ့။ ဗောဓိတစ်ထောင်မှာ အထပ်ပေါင်း ၂၅ထပ်ရှိပြီး ဓာတ်လှေကားရှိပေမယ့် ပျက်နေတာကြောင့် လမ်းလျှောက်တက်ခဲ့ရတယ်။ ငရဲအထပ်ထပ်၊ နတ်ပြည်အထပ်ထပ်ကို တစ်ထပ်ခြင်းဆီ နံရံပန်းချီများနဲ့ ရှင်းပြထားတာ စိတ်ဝင်စားစရာကောင်းလှပါတယ်။

oznor
ရပ်တောမူအပြင် ဧရာမလျောင်းတော်မူရုပ်ပွားတော်ကြီးလည်း ဖူးမြော်ခဲ့ရသလို ဧရာမထိုင်တော်မူ ရုပ်ပွားတော်ကြီး တည်ဆောက်ဆဲဖြစ်နေတာကိုလည်း တွေ့ခဲ့ရပါတယ်။ တည်ဆောက်ပြီးရင် ကမ္ဘာ့အကြီးဆုံးထိုင်တော်မူဘုရားကြီး ဖြစ်လာမှာပါတဲ့။

edf

ဗောဓိတစ်ထောင်ဝင်းထဲမှာ ဗောဓိပင်တစ်ပင်မှာ ဘုရားဆင်းတုတော်တစ်ဆူစီနဲ့ ဗောဓိပင်ပေါင်းတစ်ထောင်ကျော်နဲ့ဘုရားဆင်းတုတော်ပေါင်း တစ်ထောင်ကျော်ကို ဖူးမြော်နိုင်ပါတယ်။ အညာဒေသ မိုးခေါင် ရေးရှား ပြီး ခြောက်သွေ့တဲ့ ဒီလို နေရာမျိုးမှာ ဗောဓိတစ်ပင်ကိုပင် ရှင်သန်အောင် စိုက်ပျိုးဖို့ မလွယ်တဲ့ နေရာဒေသမှာ ဗောဓိပင်ပေါင်း ၁၀၀၀ စိုက်ပျိုးထားတာ မလွယ်ပါဘူး။

edf

ကျောက်နဂါးနဲ့ ကျောက်ကလေး

ဒီတစ်ခေါက်မှာတော့ အချိန်မရှိလို့ မရောက်ခဲ့လိုက်ရဘူး။ ဒီနေရာက မုံရွာ မန္တလေးအမြန်လမ်းကနေ မြောင်မြို့နယ် လမ်းခွဲမှာ ကျောက်နဂါး လမ်းညွှန်ဆိုင်းဘုတ်တွေအတိုင်း နာရီဝက်လောက် မောင်းဝင်ရပါတယ်တဲ့။ အဲ့မှာ ကျောက်နဂါးဆိုတာ အင်ကြင်းကျောက်ကြီးက တကယ်ကို နဂါးပုံဖြစ်နေတာ။ နဂါးမှ နဂါးအကြီးကြီး။ ပဌာန်းဆက်တွေနဲ့ လာရောက်လှူဒါန်းသူတွေ၊ အဓိဌာန်အောင်ပွဲပေးသူတွေ အများကြီးပဲတဲ့။ နဂါးဆက် သိုက်ဆက် ရှိသူတွေဆို ပိုပြီးထူးခြားသတဲ့လေ။

အဲဒီမှာ အနှီးပိုက်ထားတဲ့ ကလေးပုံ ကျောက်တုံးလေးလည်းရှိပြီး ကျောက်ကလေးလို့ခေါ်ပါတယ်။ ကလေးလိုချင်တဲ့သူတွေ၊ ကလေးနာမကျန်းဖြစ်နေရင် ကျောက်ကလေးကိုပွေ့ချီချော့သိပ်ပြီး ဆုတောင်းရင် ဆုတောင်းပြည့်တယ် ဆိုကြပါတယ်။ ကျောက်ကလေးအတွက် လာလှူဒါန်းထားကြတဲ့ ကလေးအရုပ်တွေလည်းအများကြီး။ ပုခက်ပေါ်မှာအပြည့်။ အရုပ်တွေကို အခန်းတစ်ခန်း သက်သက်ထားရတယ်လို့ သိရပါတယ်။

🏩ညအိပ်မယ်ဆိုရင်

နုမြတ်တို့ကတော့ မြို့ထဲက King and Queen Hotel မှာတည်းတာ။ အရမ်းကို အဆင်ပြေပါတယ်။ သွားရလာရ အဆင်ပြေပြီး အခန်းတွေလည်း သန့်တယ်။ ကျယ်တယ်။ မနက်စာလည်းကောင်းတယ်။
မြို့ထဲမှာ Hotel Chin Dwin ဆိုတာလည်းရှိတယ်တဲ့။ Win Unity Hotel မှာဆိုရင်တော့ ဘန်ဂလိုတွေလည်းရှိပေမယ့် မြို့နဲ့ နည်းနည်းလှမ်းပါတယ်။ အသစ်ဖွင့်ထားတဲ့ Shwe Taung Tan Hotel လည်း မြို့ထဲနဲ့ နည်းနည်းဝေးပါတယ်။

🍽အစားအစာစားမယ်ဆိုရင်

ညဈေးသွားပြီး ဒေသစာတွေမြည်းစမ်းကြည့်ပါ။ ချင်းနဲ့နီးတော့ ဆာဗူးတောင်း ချင်းဆန်ပြုတ်ဆိုတာလည်း စားလို့သိပ်ကောင်းတယ်။ ပြောင်းဆန်ကိုပြုတ်ထားတာ စေးစေးလေး။ သူ့ချည်းစားလည်းကောင်းတယ်။ အသားတစ်ခုခုထည့်စားရင်တော့ ရှယ်ပေါ့။ အသားမပါ ၅၀၀ကျပ်။ အသားပါရင် ၂၀၀ ထပ်ပေါင်း။ တန်လိုက်တာနော့။ သူနဲ့တွဲစားတဲ့ ငရုတ်သီးကိုတော့ အများကြီး မထည့်နဲ့ပေါ့နော်။ ငရုတ်သီးက အရမ်းအရမ်းကို စပ်လို့ပါ။ ညဈေးက မုန့်ပေါင်းနဲ့အကြော်၊ ထပ်တရာကိုလည်း စားဖို့ ညွှန်းကြတယ်။ နွားနို့ဆိုလည်း စစ်မှစစ်တဲ့။

ဒီခရီးမှာ အကြိုက်အတွေ့ဆုံးကတော့ စိမ်းဝါနီ မြန်မာဘူဖေးဆိုင်။ ဟင်းပွဲတွေ အများကြီးလာချပေးပြီး ကြိုက်တဲ့ ဟင်းကြိုက်သလောက်အဝစား။ တစ်ယောက်မှ၂၅၀၀ ကျပ်ပဲ။ စွန်းတန်လွန်းပါတယ်ကွာ…

FB_IMG_1507108977898
နောက်တစ်နေ့မှာတော့ ဗောဓိတစ်ထောင်သွားရင်း ဝင်ပေါက်က ရာမညထမင်းဆိုင်မှာ မြန်မာထမင်း၊ ဟင်း ဘူဖေးစားလို့ရပါတယ်။ ကြေးရုပ်နားမှာ ညနေလောက်မှဖွင့်တဲ့ နှင်းဆီခိုင်ဒန်ပေါက်လည်း ဒီက ဒန်ပေါက်နဲ့ မတူ သိပ်ကောင်းဆိုပဲ။ မုံရွာ ဝက်အူတောင့် (ဝက်အူချောင်း)ရယ်၊ ကျောက်ကာလမ်းပေါ်က တွတ်ပီဝက်သားတုတ်ထိုး Mini Pot လေးတွေနဲ့ထည့်ပေးတာရယ်လည်း စားလို့ကောင်းတယ်တဲ့လေ။

🛍လက်ဆောင်ဝယ်မယ်ဆိုရင်

အပြန်လက်ဆောင်ဆိုရင်တော့ သနပ်ခါးထွက်တဲ့ဒေသမို့လို့ သနပ်ခါးချစ်သူတွေ အကြိုက်ပါ။ သနပ်ခါးတုံးကြီးတွေ အကြီးကြီးတွေ။ အရမ်းလည်းတန်တယ်။ ကျောက်ပျဉ်ရောင်းတဲ့ဆိုင်တွေဆိုလည်း တကယ်အများကြီး။
ဘုရားတွေမှာ ကြယ်ပဲ၊ ခွေးလျားသီး၊ နေကြာစေ့၊ ကြက်ဥမြေပဲ၊ ဆီးထန်းညက်နဲ့ ဒေသထွက် အစားအစာတွေ အများကြီးရောင်းတယ်။

edf
မြိုကထဲကဆိုင်တွေမှာတော့ အိန္ဒိယကုန်စုံဆိုင်တွေမှာ ဆာရီစတွေ တန်မှတန်။ ဝမ်းဆက်တစ်စကိုမှ ၂၀၀၀ကျပ်ဝန်းပဲ။ ထမီနဲ့ အင်္ကျီချုပ်လို့ရတဲ့ အဆင်လှလှလေးတွေ အများကြီးပဲ။
ဒီလောက်ဆိုရင် မုံရွာအကြောင်း တစေ့တစောင်းတော့ သိပြီထင်ပါတယ်။ မုံရွာကို အလောင်းတော်ကဿပ သွားဖူးရင်းနဲ့လည်း ရောက်ဖူးကြမှာပါ။ ဒီ Post ကတော့ အလောင်းတော်ကဿပရာသိမဟုတ်ဘဲနဲ့လည်း မုံရွာကို ရုံးပိတ်ရက်တွေမှာ ဘယ်လိုသွားနိုင်သလဲဆိုတာ ပြောပြပေးထားတာပါ။

အားလုံးပျော်ရွှွှင်ချမ်းမြေ့ဖွယ်ရာ သီတင်းကျွတ်အခါသမယဖြစ်ပါစေနော်။
နုမြတ်

#HuaweiP10 #Leicadualcamera
#numyataroundtheworld #Monywa

အရှေ့တောင်အာရှရဲ့ အမြင့်ဆုံး မြေသားတောင် ခေါနူးစုမ် (ခေါ်) နတ်မတောင် (Chin Hills, Myanmar)

အရှေ့တောင်အာရှရဲ့ အမြင့်ဆုံး မြေသားတောင်
ခေါနူးစုမ် (ခေါ်) နတ်မတောင်

1104 Chin.jpg

မြန်မာပြည်တောင်ဘက်စွန်း မြိတ်ကျွန်းစုမှ နေသာသာ ရေပြာပြာ နေ့ရက်များ (Sunny days in Southernmost Part of Myanmar)

“မြန်မာပြည်တောင်ဘက်စွန်း

မြိတ်ကျွန်းစုမှ
နေသာသာ ရေပြာပြာ နေ့ရက်များ”

20161125_130117_017_mix01-01
Jumping on Satan Island

🌞မြန်မာပြည်ထဲမှာ အရမ်းလှတဲ့ ရေအောက်ရှုခင်းတွေ စရိတ်သက်သက်သာသာနဲ့ ကြည့်ခဲ့တယ် … 🌊စိမ်းပြာရောင်အသည်းပုံလေးဖြစ်နေတဲ့ ကျွန်းလေးထဲက အသည်းပုံပင်လယ်လေးထဲလည်း ရေဝင်ကူးခဲ့တယ်

🌞မြန်မာတောင်ဘက်အကျဆုံး ဘုရင့်နောင်အငူလည်းရောက်ခဲ့တယ် … 🌊ဖြူလွှနူးညံ့နေတဲ့သဲသောင် ကမ်းခြေလှလှလေးမှာလည်း ခုန်ပေါက်ခဲ့တယ် …

ဒီလောက်လှတဲ့ အရာတွေ မြန်မာပြည်တွင်းမှာ ရှိနေတာ ဂုဏ်ယူစရာပါ။ ကော့သောင်းခရီးစဉ်ကလည်း တကယ်ကို ပျော်ဖို့ကောင်းပါတယ်။ အဲ့အတွေ့အကြုံတွေကို ခုလို ဆောင်းပါးလေးရေးပေးထားတယ်နော့… စိတ်ဝင်စားရင် ဖတ်ကြည့်နိုင်ပါကြောင်း…
စာဖတ်ပျင်းသူတွေအတွက် ဆောင်ရန် ရှောင်ရန်နဲ့ သွားမယ့်လမ်းကြောင်းတွေ၊ အချက်အလက် အကျဉ်းချုပ်တွေပါ နောက်ဆုံးမှာ ရေးပေးထားတယ်။

DCIM100MEDIA
Underwater of Kyat Mout Island

🌞ပထမနေ့ (Day 1 )

(ရန်ကုန်-ကော့သောင်း-မလိဝမ်းရေတံခွန်- သဘာဝရေပူစမ်း- သူဌေးကျွန်း)
✈ဘယ်လိုသွားမလဲ
ရန်ကုန်ကနေဆိုရင် ကော့သောင်းကို လေယာဉ်နဲ့ သွားလို့ရပါတယ်။ Air KBZ, MNA စတဲ့ Airline တွေ ပြေးဆွဲလေ့ရှိပါတယ်။ ကျွန်မတို့ကတော့ စီစဉ်တာရက်ကပ်လို့ လက်မှတ်ရတဲ့ Air KBZ နဲ့ သွားဖြစ်ပါတယ်။ မွန်းတည့် ၁၂ထွက်ပြီး ညနေ၃နာရီမှာ ရောက်ပါတယ်။ ကြားမှာ ထားဝယ်နဲ့ မြိတ်တို့မှာ ၂ခါရပ်ပါတယ်။ ၁ခါရပ် ၁၅မိနစ်လောက်သာကြာတာပါ။ ခဏခဏ ရပ်ပေမဲ့ လေယာဉ်တစ်ခါတက်တိုင်း မုန့်နဲ့ အအေးတစ်ခါ ထပ်ကျွေးတော့ မစားနိုင်တော့တဲ့ အထိပါပဲ။
လေယာဉ်ပေါ်က မြင်ရတဲ့ ထားဝယ်ရှူခင်းတွေ မြိတ်ရှူခင်းတွေ ကလည်း သွားလည်ချင်စရာပါ။  ကော့သောင်းနားရောက်လေလေ လေယာဉ်ပေါ်က မြင်ရတဲ့ ရှူခင်းတွေက ပိုပို လှလာလေပါ။ တောင်တွေနားကပ်လာပြီး တောင်တွေ ကျော်လာတဲ့ အခါ မြင်ရတဲ့ ရှူခင်းတွေက အံ့အားသင့်စရာပါ။ စိမ်းပြာရောင်ရေပြင်ကျယ်ကြီးတွေ ကြားက ကျွန်းစုလေးတွေ ဟိုတစ်ကွက် ဒီတစ်ကွက်နဲ့ ဆင်းခါနီးလေ ရင်ခုန်လေပါပဲ။
🏡မလိဝမ်းရေတံခွန်နဲ့ ရေပူစမ်း
ကော့သောင်းလေဆိပ်ကို Grand Andaman Hotel က ကားနဲ့လာကြိုပေးပါတယ်။ လေဆိပ်ကနေ မလိဝမ်းကျေးရွာနားရှိ မလိဝမ်းရေတံခွန်ကို တန်းသွားပါတယ်။ မလိဝမ်းကို ကော့သောင်းကနေ ၁နာရီလောက်မောင်းရပါတယ်။ အစီအရီပေါက်နေတဲ့ ရာဘာတောကြီးတွေ၊ ဆီအုန်းပင်ကြီးတွေကို တရိပ်ရိပ် ဖြတ်ကျော်လာပြီးနောက်မှာ ရောက်ပါပြီ။ ရေတံခွန်ဆီ မရောက်မီ ရေတံခွန် အပေါက်နားကနေမြင်ရတဲ့ ကုန်းမြင့်စိမ်းလေးပေါ်က ဘန်ဂလို ဖြူဖြူလေးဆီ သွားတဲ့ လမ်းလေးက လှလွန်းလို့ ဓာတ်ပုံတွေ အပြိုင်အဆိုင် ရိုက်ကြပါရော။ ဂိတ်ဝ၊နားနေလေသာဆောင်၊ စားသောက်ဆိုင်လေးတွေ၊ တံတားလေးတွေ ဖြတ်ကျော်လာပြီးနောက် ရေတံခွန်အောက်ခြေနား ရောက်ပါပြီ။ ရေတံခွန် အသေးလေးတွေ ရှိနေတဲ့ ရေပြင်ထဲ ဘောကွင်းနဲ့ ရေဆော့သူတွေလည်း တွေ့နေရပြီ။ လှေနီနီလေးတွေလည်း စီတန်းထားရဲ့။ ကျွန်မတို့လည်း ဘေးနားက ကျောက်ဆောင်ပေါ်မှာဓာတ်ပုံလေးတွေ ရိုက်ကြ ရေလေးတွေကို လက်နဲ့ဆော့ကြပေါ့။ တကယ့်ရေတံခွန်ကြီးသွားမယ်ဆိုရင် မိနစ်၂၀လောက် တောလမ်းအတိုင်းလျှောက်ရမယ်တဲ့။ အဲ့နေရာက အများကြီး ပိုလှတာ ပုံတွေထဲ မြင်ဖူးပေမဲ့လည်း အချိန်မရှိလို့ မသွားတော့ဘဲ နောက်တစ်နေရာကို ကူးကြရပြန်ပါတယ်။

20161124_162218_mix01-01
Maliwun Waterfall gate
20161124_162358_mix01
Maliwun Waterfall , Myanmar
20161124_163735_mix01
Maliwun Waterfall Myanmar

မလိဝမ်းသဘာဝရေပူစမ်းက ရေတံခွန်နဲ့ ကပ်ရပ်မှာ မဟုတ်ဘဲ အဲ့ရောက်ဖို့ ကားနဲ့ ၁၅မိနစ်လောက်ထပ်သွားရပါတယ်။ ရေပူစမ်းကလည်း အံ့သြစရာပါ။ စက်ဝိုင်းပုံစံ ရေကန်ထဲ စက်ဝိုင်းအလည်ကို ဗဟိုပြုကာ အကန့် ၃ကန့်ခွဲထားပါတယ်။ ၁ကန့်နဲ့ ၁ကန့် ရေအပူချိန်မတူပါဘူး။ 40C 45C 55C ဆိုပြီး အပူချိန်ကွဲနေပါတယ်။ ကျွန်မတို့ကတော့ ခုမှရောက်လို့ 40C မှာသာ ခြေထောက်စိမ်ဖြစ်ပါတယ်။ ခဏတာသာ စိမ်ခဲ့ပေမဲ့ အညောင်းအညာတွေ ပြေသွားတာတော့ အမှန်ပါပဲ။

20161124_171401_mix01
Maliwun natural spring
img_20161124_205922
Rubber Trees near Kaw Thaung

မလိဝမ်းသဘာဝရေပူစမ်းက ရေတံခွန်နဲ့ ကပ်ရပ်မှာ မဟုတ်ဘဲ အဲ့ရောက်ဖို့ ကားနဲ့ ၁၅မိနစ်လောက်ထပ်သွားရပါတယ်။ ရေပူစမ်းကလည်း အံ့သြစရာပါ။ စက်ဝိုင်းပုံစံ ရေကန်ထဲ စက်ဝိုင်းအလည်ကို ဗဟိုပြုကာ အကန့် ၃ကန့်ခွဲထားပါတယ်။ ၁ကန့်နဲ့ ၁ကန့် ရေအပူချိန်မတူပါဘူး။ 40C 45C 55C ဆိုပြီး အပူချိန်ကွဲနေပါတယ်။ ကျွန်မတို့ကတော့ ခုမှရောက်လို့ 40C မှာသာ ခြေထောက်စိမ်ဖြစ်ပါတယ်။ ခဏတာသာ စိမ်ခဲ့ပေမဲ့ အညောင်းအညာတွေ ပြေသွားတာတော့ အမှန်ပါပဲ။

လှေဆိပ်ကနေ ကျွန်းပေါ်အဝင်မှာ လူဝင်မှုကြီးကြပ်ရေးဌာနတွေ့လို့လည်း အံ့သြမိပါရဲ့။ သူဌေးကျွန်းက ထိုင်းနိုင်ငံရနောင်းမြို့နဲ့လည်း နီးတော့ ရနောင်းကလာရင် ၇မိနစ်ထဲမောင်းရပါတယ်။ ထိုင်းတွေ မကြာခဏလာလည်လို့ လူဝင်မှု ကြီးကြပ်ရေးဌာန ထားပေးရတာပါ။ ဟိုတယ်က ထင်ထားတာထက်ပို ခမ်းနား ပိုပြည့်စုံနေတာ အမှန်ပါ။ ပင်လယ်ကိုလှမ်းမြင်ရတဲ့ ရေကူးကန်ကြီးကလည်း ဟိုတယ်ကြီးရဲ့ အလှကို ပံ့ပိုးနေလေရဲ့။ Dinner Buffet ကလည်း ကောင်းမှကောင်း။ ထိုင်းစာကြိုက်တဲ့သူတွေ အတွက်တော့ ရှယ်ပေါ့။ ပင်လယ်စာတွေကို ထိုင်းစတိုင်ချက်ထားတာ ပြန်တွေးရင်တောင် တံတွေးမြိုမိတဲ့အထိ။ ညစာ Buffet က ဘတ် ၃၅၀ပါ။
ဟိုတယ်က ၂ယောက်ခန်းကို ၁ညကို $120 ကနေ $400 ထိ အစားစားရှိပါတယ်တဲ့။
🌞ဒုတိယနေ့ (Day 2 )

(သူဌေးကျွန်း- မြင်းခွာကျွန်း-ကြက်မောက်ကျွန်း-စေတန်ကျွန်း-ဇာဒက်ကြီးကျွန်း )
🛥Speed Boat
ထိုင်းအချိန် မနက် ၉နာရီမှာ ကျွန်းလေးကျွန်းပတ် ထွက်ဖို့ Lobby မှာ လူစုပါတယ်။ ဟိုတယ်မှာ တည်းတဲ့သူတွေရော မတည်းတဲ့ သူတွေပါ သူဌေးကျွန်းလှေဆိပ်မှာ ဆုံပြီး ထွက်ရပါတယ်။ ကျွန်းလေးကျွန်းခရီးစဉ် Package ကို ဒီ Hotel ကပဲစီစဉ်ပြီး လိုက်ပို့ပေးတာမို့လို့ လှေဆိပ်မှာ လိုက်မယ့်သူတော်တော်များပါတယ်။ ကျွန်မတို့ထွက်မယ့်နေ့မှာ အယောက် ၁၀၀လောက်ရှိပါတယ်။ Speed Boat တွေ ၃စီး ခွဲပြီး သွားရပါတယ်။ ကျွန်းသွားတဲ့ Package ကို ဘတ် ၃၉၀၀ (ကျပ်၁သိန်းခွဲနီးပါး) နဲ့ ရောင်းပြီး ကျွန်းပေါ်က နေ့လည်စာ၊  ဟိုတယ်က ညစာ Buffet ရယ်၊ ဟိုတယ်ပြန်ရောက်တဲ့အခါ ရေကူးကန်သုံးခွင့် Sauna သုံးခွင့်တွေပါပါပါတယ်။ Speed Boat ခရော၊ Snorkeling လုပ်တဲ့အခါ အသုံးပြုတဲံ ရေအောက်ကြည့်မျက်မှန်၊ Life Jacket၊ နည်းပြ၊ ရေ၊ အအေး၊ သစ်သီး Facility အစုံပေးထားပါတယ်။ Speed Boat မှာ အိမ်သာလည်းပါလို့ အတော်အဆင်ပြေပါတယ်။

20161125_091022_mix01
Speed boat to go islands

အရင်ဆုံးသွားမယ့်ကျွန်းတွေနဲ့ ခရီးစဉ်ကို ဂိုက်က မြေပုံနဲ့ တကွ ရှင်းပြပေးပါတယ်။ သူဌေးကျွန်းကနေ အဲ့ကျွန်းတွေရောက်ဖို့ ၁နာရီလောက် မောင်းရပေမဲ့ အဲ့ကျွန်းတွေက တစ်ကျွန်းနဲ့ တစ်ကျွန်း Speed boat နဲ့ ၁၀မိနစ်လောက်သာ သွားရတာပါ။ အရင်ဆုံး စေတန်ကျွန်းမှာ ကပ်ပြီး Lunch စားဖို့ အတွက် ပြင်ဆင်ဖို့ ယူလာတဲ့ အစားအစာတွေ အရင်ချပါတယ်။ ပင်လယ်ကနေ လှမ်းမြင်ရတဲ့ ကမ်းခြေရှုခင်းက အတော်လေးလှပါတယ်။ ပြာလဲ့နေတဲ့ကောင်းကင်ပြင်ကြီး နောက်ခံမှာ စိမ်းညှို့နေတဲ့ တောအုပ်လေးရယ် သူ့ရှေ့မှာ ဖြူလွှလွှသဲသောင်ပြင်ရယ် စိမ်းပြာရောင် ကြည်လင်လှတဲ့ ပင်လယ်ကြီးရယ်နဲ့ လှချင်တိုင်းကို လှနေတာပါ။ စေတန်ကျွန်းလေးက ခုပဲ ပြေးဆင်းချင်လာအောင် ဆွဲဆောင်နေပေမဲ့ အရင်ဆုံး တခြားကျွန်းတွေမှာ Snorkeling လုပ်မယ်ဆိုတော့ ဆန္ဒတွေ ပြန်မျိုချခဲ့ရပါတယ်။

🏞မြင်းခွာကျွန်း
ပထမဆုံးသွားတာက မြင်းခွာကျွန်းပါ။ အဲ့ကျွန်းကမ်းခြေက မြင်းခွာပုံ ရှိနေလို့ မြင်းခွာကျွန်းလို့ ခေါ်တာပါတဲ့။ အဲ့ကျွန်းမှာ ကမ်းခြေဆီ မကပ်ပဲ ကျွန်းနားက ရေထဲ Snorkeling လုပ်ကာ ငါးကြည့်ဖို့ ရပ်ပေးပါတယ်။ ရေထဲမဆင်းမီ Snorkeling ရေအောက်ငါးကြည့်မျက်မှန်တပ်နည်း၊ ပါးစပ်နဲ့ အသက်ရှူနည်းတွေ သေချာသင်ပေးပါတယ်။ စစချင်းတော့ ခက်သလိုရှိပေမဲ့ အကျင့်ရှိသွားရင် ရှူရတာ လွယ်လွယ်လေးပါ။

received_1106252092762692_mix01
Horse shoe island

ရေမကူးတတ်သူတွေဆိုလည်း မပူပါနဲ့။ ဂိုက်က ရေကူးရေငုပ် ကျွမ်းကျင်ပြီး အသက်ကယ်အင်္ကျီအပို၂စုံလောက်ချပေးထားလို့ အဲ့ဒါကို ကိုင်ပြီး ရေပေါ်ပေါ်ကာ အသာလေး လိုက်သွားရုံပါပဲ။ ဂိုက်ကရေအောက် သန္တာကျောက်တန်းတွေ လှတဲ့ ဘက်ကို အုပ်စုလိုက် ဆွဲခေါ်သွားပေးတော့ ရေအောက် ရှူခင်းတွေ ကြည့်ပြီး အသာအယာ လိုက်ရုံလေးပါပဲ။ စစချင်းရေထဲဆင်းရင်တော့ ကြောက်လိမ့်မယ်။ ကိုယ့်အောက်က ကြမ်းပြင်ကြီးက အနက်ကြီးကိုး။ ရေတွေကလည်း ကြည်နေတော့ အောက်ထိ တိုးလျှိုပေါက် မြင်နေရတာ ရင်ထိတ်စရာပါ။ အဲ့ ကြောက်စိတ်လေးတွေ ဖျောက်နိုင်ရင်ရပြီ။ တချို့ဆို ဆင်းဆင်းချင်း တအားကြောက်ပြီး Speed Boat ပေါ် ပြန်တက်သွားတော့ ရေအောက်အလှတွေ မကြည့်ရတော့ဘူးပေါ့။ မတန်ဘူးပေါ့။ ဒါကြောင့် ခဏတာဖြစ်ပေါ်လာတဲ့  ကြောက်စိတ်လေးတွေ ဖျောက်ပြီး ပျော်ပျော်ကြီး လိုက်သွားကြပါလို့။ ရေမကူးတတ်တဲ့ သူတွေတောင် Snorkeling အရသာတော်တော်တွေ့သွားကြတယ်လေ။

screenshot_20161125-155804_mix01-01
Us underwater of Andaman Sea

ရေမကူးတတ်သူတွေဆိုလည်း မပူပါနဲ့။ ဂိုက်က ရေကူးရေငုပ် ကျွမ်းကျင်ပြီး အသက်ကယ်အင်္ကျီအပို၂စုံလောက်ချပေးထားလို့ အဲ့ဒါကို ကိုင်ပြီး ရေပေါ်ပေါ်ကာ အသာလေး လိုက်သွားရုံပါပဲ။ ဂိုက်ကရေအောက် သန္တာကျောက်တန်းတွေ လှတဲ့ ဘက်ကို အုပ်စုလိုက် ဆွဲခေါ်သွားပေးတော့ ရေအောက် ရှူခင်းတွေ ကြည့်ပြီး အသာအယာ လိုက်ရုံလေးပါပဲ။ စစချင်းရေထဲဆင်းရင်တော့ ကြောက်လိမ့်မယ်။ ကိုယ့်အောက်က ကြမ်းပြင်ကြီးက အနက်ကြီးကိုး။ ရေတွေကလည်း ကြည်နေတော့ အောက်ထိ တိုးလျှိုပေါက် မြင်နေရတာ ရင်ထိတ်စရာပါ။ အဲ့ ကြောက်စိတ်လေးတွေ ဖျောက်နိုင်ရင်ရပြီ။ တချို့ဆို ဆင်းဆင်းချင်း တအားကြောက်ပြီး Speed Boat ပေါ် ပြန်တက်သွားတော့ ရေအောက်အလှတွေ မကြည့်ရတော့ဘူးပေါ့။ မတန်ဘူးပေါ့။ ဒါကြောင့် ခဏတာဖြစ်ပေါ်လာတဲ့  ကြောက်စိတ်လေးတွေ ဖျောက်ပြီး ပျော်ပျော်ကြီး လိုက်သွားကြပါလို့။ ရေမကူးတတ်တဲ့ သူတွေတောင် Snorkeling အရသာတော်တော်တွေ့သွားကြတယ်လေ။

image-0-02-06-ac5133975a0c8c8c5d5f95ab4550ce6d306ea89aeb60a86548baded5dd6bb6a0-v_mix01
Heart shaped Island, Cock Island ၾကက္ေမာက္ကၽြန္း Myanmar Andaman Sea

ကျွန်းမှာ ကမ်းမရှိဘူး။ ကျွန်းလယ်က အသည်းပုံထဲ ရောက်ဖို့ ရေကျချိန်မှာ ကျောက်ဆောင်အောက် ကျောက်ဆောင်အောက်ကနေ ဝင်ရပါတယ်။ Speed Boat ကနေ ကျွန်းလယ်ထဲထိ ကြိုးဆွဲပေးထားလို့ ကြိုးကိုင်ပြီး သွားရတာလွယ်တယ်။ ရေကြောက်လို့ တခြားနေရာမှာ မဆင်းရဲရင်တောင် ဒီကျွန်းမှာတော့ ဆင်းကြည့်သင့်ပါတယ်။ ရေအောက်က သိပ်မနက်ဘူး။ အသည်းပုံထဲ တချို့နေရာတွေဆို အရပ်မြင့်သူတွေ ခြေဖျားထောက်လို့တောင်ရတယ်။ ချစ်သူ၂ဦးတူတူလာရင် တစ်သက်မကွဲဘူးတဲ့လေ။ Honeymoon ခရီးစဉ်မှာ အသည်းပုံကျျွန်းလေးဆီသွားရင် Very Romantic ပေါ့။ စိတ်ကူးယဉ်ကြည့်တာပါ 😀

received_1275602462535793_mix01_mix01-01
Going inside the heart

🏖စေတန်ကျွန်း
ကျွန်းတွေမှာ ရေငုပ် ငါးကြည့်ပြီးတော့ ဗိုက်တော်တော်ဆာနေပါပြီ။ စေတန်ကျွန်း Dunkin Island မှာ ကြိုဆင်းနေတဲ့အဖွဲ့က ထမင်းစားဖို့ အသင့်ပြင်ထားပေးတယ်။ အဲ့ ကျွန်းမှာ လူမနေတော့ အားလုံးက သဘာဝဆန်ဆန် အရိုင်းဆန်ဆန်လှနေတာ။ အမှိုက်တွေ ဆိုလည်း ဘာဆိုဘာမှမရှိ။ သန့်နေတာပဲ။ Grand Andaman ရဲ့ ဂရုတစိုက် ထိန်းသိမ်းမှုကြောင့်လည်းပါမယ်။ နောက်ပိုင်းမှာ အဲ့ကျွန်းမှာ Tent ထိုးပြီး အိပ်လို့ရအောင် စီစဉ်နေတယ်ဆိုပဲ။

အဲ့ကျွန်းမှာ အထူးခြားဆုံးကတော့ သဲသောင်ပြင်လေးပါ။ Speed Boat ပေါ်က ဆင်းဆင်းခြင်း သိသိသာသာကြီးကို သဲတွေ က အိစက်နေတာပါ။ တကယ်ကို မွမွလေးတွေ။ ပြောရမယ်ဆိုရင် ကရေကရာမုန့်က အမှုန်လေးတွေလို နူးနူးညံ့ညံ့လေး။ စားချင်စိတ်တောင်ပေါက်တယ်။ တကယ်။ 😛

20161125_140341_mix01-01
soft white sand of Dunkin Island Myanmar
20161125_130117_017_mix01-01
Happy Jump on Dunkin Island or Satan Island

သဲလေးတွေ မွမွလေးတွေဆိုတော့ ကလေးတွေလို ခုန်ပေါက်ချင်ပြီပေါ့။ ကျွန်မတို့ အရွယ်တွေတင် မဟုတ် အတူပါလာတဲ့ ၆၀ကျော် အရွယ် ဖေဖေတို့မေမေတို့ Uncle တို့စုံတွဲတာင် ခုန်ပေါက်ပြီး ဓာတ်ပုံတွေ အရိုက်ခံနေကြတာ တကယ် လူငယ်လေးတွေလိုပဲ။ သူတို့ကိုကြည့်ပြီး အပျော်တွေတောင်ကူးစက်မိတယ်။ တကယ်။ 😀
စေတန်ကျွန်းမှာ ကျောက်ဆောင်လေးတွေကလည်းလှ၊ သစ်ပင်တွေမှာ ဒန်းလေးတွေလည်း လုပ်ပေးထားတော့ ကျွန်မတို့လို ပဲမမတွေ အကြိုက်ပေါ့လေ

20161125_134736_mix01-01-01
Swing like an islander
img1480156513229-01
rocks on Dunkin Island

🏞ဇာဒက်ကြီးကျွန်း
ဒီကျွန်းကတော့ နောက်ဆုံးပိတ် အိတ်နဲ့ လွယ်ဆိုသလို ရေအောက်ရှုခင်းတွေ အလှဆုံးပါတဲ့။ ညွှန်းသလောက် တကယ်လည်း လှပါရဲ့။ ကျောက်ခတ်တွေ သန္တာကျောက်တန်းတွေဆို ကိုယ်နဲ့ နီးနီးလေးလိုပဲ။ ရင်သက်ရှုမော စရာပါ။

ဟိုတယ်ကို ပြန်ရောက်တော့ ညနေစောင်းပြီ။ ဟိုတယ်မှာ မတည်းတဲ့ သူတွေ ကိုပါ ကျွန်းခရီးစဉ်လိုက်ရင် ရေကူးကန်နဲ့ Sauna သုံးခွင့်ပေးထားတော့ အုံးအုံးကြွက်ကြွက်ကို စည်ကားနေတာ။ ရောက်ရောက်ချင်း ပင်လယ်ရေတွေ ဆေးချ ရေချိုးပြီး အညောင်းအညာပြေအောင် Sauna ထဲ ဝင်ထိုင် ပြီးမှ ရေတစ်ခါပြန်ချိုး အဝတ်အစားလဲပြီး ညစာ သွားစားကြတယ်။ Massage လုပ်ချင်ပေမဲ့ လူတွေ များနေတော့ မလုပ်လိုက်ရဘူး။ အဲ့နေ့ကတော့ တကယ်အိပ်လို့ကောင်းတယ်။
🌞Day 3 တတိယနေ့

(Grand Andaman Adventure Club- ကော့သောင်း-ဘုရင့်နောင်အငူ-ပြည်တော်အေးစေတီ-ငါးသုံးလုံးတောင်-ရန်ကုန်)
🏍Adventure Club
ဒီ Grand Andaman Hotel ကို ကြိုက်တဲ့ အချက်နောက်တစ်ချက်က နိုင်ငံခြားမှာလို Adventure တွေမျိုးစုံ လုပ်လို့ရလို့ပါ။ သူဌေးကျွန်းလယ်တောင်ပေါ်က Adventure Club ကို ကားနဲ့တက်သွားလို့ရတယ်။ အဲ့မှာ တာဇံလို အရှိန်နဲ့ ကြိုးခိုပြီး စီးရတဲ့ Zip Line ရှိတယ်။ အမြင့်ကြီးကနေ ဟိုး…မျက်စိတဆုံးအထိ စီးရတာနော်။  သစ်ပင် တစ်ပင်နဲ့ တစ်ပင် ကြိုးတံတားတွေ ဘောကွင်းတွေ ဘားတန်းတွေ နဲ့ အမျိုးမျိုး စွန့်စွန့်စားစား သွားရတာလည်းရှိတယ်။ ကိုယ့်အောက်မှာ တောအုပ်တွေဆိုတော့ ရင်တထိပ်ထိပ်ပေါ့။ ပင်လယ်ပြင်ရှုခင်းနောက်ခံပြီး စွန့်စွန့်စားစားတွေ လုပ်နေရတော့ တာဇံလိုလို၊ ကျွန်းပေါ်သောင်တင်နေသူလိုလို Feeling က တအားမိုက် 😀

img1480158362891-01
Adventure on Tha Htay Island
20161126_110506_mix01-01
Zipline Adventure

ကျွန်းအနှံ့ ဘီးအကြီးကြီးတပ်ထားတဲ့ တောနင်းယာဉ် (ATV) ကိုယ်တိုင်မောင်းလို့လည်းရတယ်။ မမောင်းတတ်ရင် သူတို့လိုက်မောင်းပို့ပေးတယ်။ ATV စီးပြီး View Point မှာ ရပ်ပေးတော့ မြင်ရတဲ့ ရှူခင်းက ရင်သပ်ရှူမောဖွယ်ရာပါ။ ကော့သောင်းမြို့အပြင် ထိုင်းနိုင်ငံဘက်က တောင်တန်းလေးတွေပါ ပြပြလေး လှမ်းမြင်နေရတာ… View Point နားက သစ်ပင်တွေကလည်း ထူးဆန်းတယ်။  သစ်ကုလားအုပ်လို ဖြစ်နေတာ။ Adventure Club မှာ Activities တွေ လုပ်မယ်ဆိုရင်တော့ ဘတ် ၁၅၀၀   (မြန်မာငွေ ၅သောင်းဝန်းကျင်လာက်) ကျပါမယ်။ ကျွန်းပေါ်မှာ Organic စိုက်ခင်းတွေလည်း ရှိပြီး နောက်ဆို Hotel မှာ ကျွေးတဲ့ ဟင်းသီးဟင်းရွက်တွေ၊ သုံးတဲ့ ဆပ်ပြာတွေ အကုန် ကျွန်းထွက် ပစ္စည်းတွေနဲ့ပဲ Organic လုပ်မှာတဲ့..

20161126_111519-01
Adventure club
20161126_103443_mix01-01
Grand Andaman Viewpoint

🏙ကော့သောင်းမြို့

Hotel မှာပဲ Buffet Lunch စားပြီးတော့ လေဆိပ်မဆင်းခင် ကော့သောင်းမြို့ထဲ သွားလည်ခဲ့ကြတယ်။ မြန်မာနိုင်ငံရဲ့ တောင်ဘက်အကျဆုံးကုန်းမြေဖြစ်တဲ့ ဘုရင့်နောင်အငူ (အရင် ဝိတိုရိယအငူ) ကိုတော့ မရောက်မဖြစ်ပေါ့။ ငါဟာ အမိမြန်မာပြည်ရဲ့ ခြေချောင်းထိပ်လေးဆီ ရောက်နေတာပါလားဆိုတဲ့ Feeling လေးက တစ်မျိုးလေးပါပဲ… ဒုတိယမြန်မာနိုင်ငံတော် တည်ထောင်ခဲ့တဲ့ ဘုရင့်နောင်ရုပ်တုကြီးကလည်း ငါတို့ မြေကို လာမထိနဲ့ ဆိုပြီး ပင်လယ်ဘက်ကို မျှော်ကာ ရန်သူတွေကို ကာကွယ်ပေးနေသယောင်ယောင် ထင်မှတ်မိလေရဲ့ …

ကျွန်မတို့က ၂ညအိပ် ၃ရက်ပဲ အချိန်ရတော့ ဒီနေရာလေးတွေပဲ လည်ဖြစ်ပါတယ်။ ဒီထက်ပိုပြီး အချိန်ရမယ် ဆိုရင် ကော့သောင်းမြို့နားက ပုလုံးတုံးတုံး ကမ်းခြေက တအားလှတယ်ဆိုပဲ။ ညောင်ဦးဖီးကျွန်းနဲ့ အနားတဝိုက်က ကျွန်းတွေကလည်း  သွားရတာ ဝေးပေမယ့် သာယာတယ်လို့ ဆိုကြပါတယ်။ ထိုင်းနိုင်ငံဘက်ကို ကူးပြီး ရနောင်းမြို့ သွားလည်လည်း ရပါတယ်။ တခြားလည်စရာ နေရာတွေ သိလည်း Comment မှာ အကြံပေးကြပါဦးနော်။

received_10154253854287123_mix01
Kaw Thaung

Tips!
-ရေမကူးတတ်လို့၊ ရေ ကြောက်လို့ဆိုပြီး ရေထဲ မဆင်းဘဲ မနေပါနဲ့။ ရေမကူးတတ်လည်း ဆင်းလို့ရပါတယ်။ မဆင်းလိုက်ရရင် နောင်တရနေမှာနော်

-ရေကူးတတ်ပေမဲ့လည်း ကိုယ့်ဟာကိုယ်ကူးမနေပဲ ရေငုပ်သမားခေါ်သွားတာနောက်လိုက်ပါ။ သူတို့က ဘယ်နေရာမှာ ဘာရှိလဲ ဆိုတာ သိနေတတ်လို့ပါ။ သူတို့တွေ ရေထဲ ငုပ်ငုပ်သွားတာ ကြည့်ရတာလည်း ဆပ်ကပ်ကြည့်နေရသလိုပါပဲ

-ထိုင်းတွေ အလာများလို့ ထိုင်းဘတ်တွေ သုံးပါတယ်။ ကိုယ့်မှာ ဘတ်ငွေတွေ ရှိရင် ယူသွားပါ။ သုံးလို့ရပါတယ်။ လက်ရှိ ဘတ်ငွေပေါက်ဈေး ၁ဘတ် = ၃၇ကျပ်

-အချိန်ကလည်း ထိုင်းနဲ့ နီးလို့ ထိုင်း အချိန်ကို ယူတတ်ကြပါတယ်။ ထိုင်းအချိန်က မြန်မာအချိန်ထက် နာရီဝက်စောပါတယ်။ ဥပမာ- မြန်မာမှာ မနက်၉နာရီဆို ထိုင်းအချိန်က ၉နာရီခွဲပါ။ ဒီတော့ အချိန်ပြောရင် ထိုင်းအချိန်လား မြန်မာ အချိန်လားဆိုတာကို သေချာအောင်မေးပါ

-ဖုန်းကတ်က MPT သာမိလို့ MPT card ရှိရင်ယူသွားပါ။ Ooredoo ကတော့ တစ်ခါတလေ မိပါတယ်။

-ရေအောက်ရိုက်တဲ့ ကင်မရာရှိရင် ယူသွားပါ။ ရေအောက်ရှုခင်းတွေ တအားလှပါတယ်။ ဖုန်းတွေကိုလည်း ရေစိုခံအိတ်နဲ့ ထည့်ထားပါ။

-နေအရမ်းပြင်းတော့ အသားနေမလောင်အောင် နေပူခံ ရေစိုခံ Sunscreen တွေ ဆောင်သွားပါ။

-Hotel က Thai Massage Spa မှာ နှိပ်တဲ့သူ ၄ယောက်ပဲရှိလို့ ကျွန်းသွားတဲ့နေ့တွေမှာ ပင်ပန်းပြီး အနှိပ်ခံတဲ့သူများလို့ လူကျတတ်တယ်။ Massage ကြိုက်ရင် ကြိုပြီး Booking တင်ထားပါ။

-Hotel မှာ တည်းရင် တစ်ရက်ကို ကျွန်းပတ်ခရီးစဉ်နဲ့ တွဲယူပါ။ ပိုသက်သာလို့ပါ။ ကျွန်းပတ်ခရီးစဉ်နဲ့တွဲယူရင် တစ်ယောက်ကို ဘတ် 1000 ပဲ ပိုပေးရတော့ ၂ယောက်ဆို ဘတ် 2000 (ကျပ် ၇၅၀၀၀ လောက်) သာကျမှာပါ။ ပုံမှန်က ဟိုတယ်တစ်ညကို $120 ( ကျပ် ၁သိန်းခွဲကျော်) ပေးရတော့ ထက်ဝက်ကျော်သက်သာလို့ပါ။

DCIM100MEDIA
DCIM100MEDIA

Quick facts
ကုန်ကျစရိတ် – ၂သိန်းကျော်မှ ၆သိန်းထိ

ခရီးစဉ်ရက် – ၂ညအိပ် ၃ရက် or 3ညအိပ် ၄ရက်

သွားသင့်သောနေရာများ

ကော့သောင်းမြို့ – ဘုရင့်နောင်အငူ၊ ဘုရင့်နောင်ရုပ်တု၊ ပြည်တော်အေးစေတီတော်၊ ငါးသုံးလုံးတောင်၊ ပုလုံးတုံးတုံးကမ်းခြေ

သူဌေးကျွန်း၊ ကြက်မောက်ကျွန်း၊ စေတန်ကျွန်း၊ ညောင်ဦးဖီးကျွန်း

မလိဝမ်းရေတံခွန်၊ မလိဝမ်း သဘာဝရေပူစမ်း

ရနောင်းမြို့

received_10154253857982123_mix01
Pretty Pink

ကော့သောင်းမြိတ်ကျွန်းစုလှတယ်သာသိတာ။ ဒီလောက် သွားလာရလွယ်မယ်။ တိုးတက်နေမယ်လို့ မထင်ထားတာ အမှန်ပါ။ ခုလို ပွင့်လင်းရာသီမှာ Honey Moon ထွက်လိုတာပဲ ဖြစ်ဖြစ်၊ မိသားစုလိုက် ပျော်ပျော်ကြီး သွားလိုတာပဲ ဖြစ်ဖြစ်၊ Anniversary ရက်တွေ တူတူ ဆင်နွှဲလိုတာပဲဖြစ်ဖြစ်၊ သူငယ်ချင်းတွေနဲ့ အတူတူကဲလိုတာပဲဖြစ်ဖြစ်၊ ပင်လယ်နဲ့ ကမ်းခြေကို ချစ်ပြီး ရေအောက်အလှတွေ မြင်တွေ့လိုတာပဲဖြစ်ဖြစ် နိုင်ငံခြားကို ဈေးကြီးပေးပြီး သွားစရာ မလိုဘဲ ကိုယ့်နိုင်ငံထဲမှာပဲ နိုင်ငံတကာ အဆင့်မီ သွားလည်နိုင်တာ ကျေနပ်စရာပါ။ နိုင်ငံခြားသားတွေတောင် တကူးတကလာပြီး Snorkeling လုပ်ရတယ်ဆိုတော့ စိတ်ကြီးဝင်မိပြီပေါ့။ တချို့ဆို တစ်ရက်နဲ့ မဝလို့ နောက်တစ်ရက်တောင် ထပ် Join တယ်ဆိုပဲ။ 😀

20161125_130233_011_mix01

အားလုံးပဲ ကျန်းမာပျော်ရွှင်တဲ့နေ့ရက်တွေ ပိုင်ဆိုင်နိုင်ပါစေနော်…
#NuMyat

https://www.facebook.com/numyataroundtheworld/
ဒီ Post ကို လွတ်လပ်စွာ Share နိုင်ပါတယ်။ ပုံနဲ့ စာတွေ ယူသုံးခြင်းတော့ ခွင့်မပြုပါ။

Drone ပုံတွေ အသုံးပြုခွင့်ပေးပြီး ကော့သောင်းမြို့ကို လာလည်ဖို့ ဖိတ်ခေါ်ခဲ့တဲ့ သွားခဲ့တဲ့ရက်တိုင်းမှာလည်း ဧည့်ဝတ်ကျေပွန်ခဲ့တဲ့ Grand Andaman Hotel မှ တာဝန်ရှိသူများကို ကျေးဇူးအထူးတင်ရှိပါတယ်။
All photos with Nu Myat around the World logo are taken and copyrighted by Nu Myat. Feel free to share this post. But not allow to use the photos and words without my permission.