သဘာဝရေပူစမ်းများရှိရာ

ဆလိုဗက်ကီးယားနိုင်ငံ (Slovakia)

ဆလိုဗက်ကီးယား (ခေါ်) ဆလိုဗက်သမ္မတနိုင်ငံသည် ဥရောပအလယ်ပိုင်းနိုင်ငံတစ်ခုဖြစ်ပြီး မြောက်ဘက်တွင်ပိုလန်၊ အရှေ့ဘက်တွင်ယူကရိန်း၊ တောင်ဘက်တွင်ဟန်ဂေရီနှင့် အနောက်တောင်ဘက်တွင် သြစတြီးယားတို့နှင့် နယ်နိမိတ်ချင်းထိစပ်နေပါသည်။ ၎င်း၏ဖက်ဒရယ်မိတ်ဖက်ဖြစ်သော ချက်သမ္မတနိုင်ငံမှာမူ အနောက်ဘက်တွင်တည်ရှိနေပါသည်။ အကျယ်အဝန်းအားဖြင့် စတုရန်းမိုင် ၁၉၀၀၀ ခန့်ရှိပြီး အများစုသည် တောင်တန်းများဖြစ်ပါသည်။ လူဦးရေမှာ ၅.၄ သန်းကျော်ရှိပြီး အများစုမှာ ဆလိုဗက်လူမျိုးများဖြစ်ကြပါသည်။

နဂိုက ချက်ကိုဆိုဗားကီးယားနိုင်ငံအဖြစ် ရှိခဲ့ကြသော်လည်း ကတ္တီပါတော်လှန်ရေးပြီးနောက် ဆလိုဗက်ကီးယားနှင့် ချက်သမ္မတနိုင်ငံတို့သည် ၁၉၉၃၊ ဇန်နဝါရီ ၁ ရက်မှစ၍ သီးခြားနိုင်ငံများအဖြစ် ခွဲထွက်ခဲ့ကြပါသည်။ မြို့တော်နှင့်အကြီးဆုံးမြို့မှာ ဘရတ္တစ်လာဗာ(Bratislava) ဖြစ်ပြီး သြစတြီးယား၊ ဟန်ဂေရီနိုင်ငံတို့နှင့် နယ်နိမိတ်ချင်းထိစပ်နေသဖြင့် နိုင်ငံနှစ်နိုင်ငံနှင့် နယ်နိမိတ်ချင်းထိစပ်နေသည့် ကမ္ဘာ့တစ်ခုတည်းသော မြို့တော်ဖြစ်ပါသည်။

ဆလိုဗက်ကီးယားနိုင်ငံသည် ဖွံ့ဖြိုးတိုးတက်ပြီး ချမ်းသာသောနိုင်ငံ ဖြစ်ပါသည်။ ၂၀၀၇ ခုနှစ်မှစ၍ လူဦးရေနှင့်ယှဉ်လျှင် ကမ္ဘာ့ကားထုတ်လုပ်မှုအများဆုံးနိုင်ငံဖြစ်လာပြီး ၂၀၁၁ ခုနှစ်တွင် ကားအစီးပေါင်း ၁သန်းကျော် ထုတ်လုပ်နိုင်ခဲ့ပါသည်။

ဆလိုဗက်ကီးယားသို့ ဧည့်သည်များ လည်ပတ်ရသည့ ်အဓိကအကြောင်းရင်းများမှာ ထူးခြားသော သဘာဝအလှအပနှင့် ရိုးရာသမိုင်းဝင်အဆောက်အအုံများကြောင့် ဖြစ်ပါသည်။ အမျိုးသားဥယျာဉ် ၉ ခုရှိသော ဆလိုဗက်ကီးယားသည် ခရီးသွားများအတွက် နိဗ္ဗာန်ဘုံဖြစ်သည်။ ပေ ၈၀၀၀ကျော် မြင့်သော တောင်များနှင့် ရေခဲမြစ်များရှိသည့် ဟိုင်းတက်တရပ်စ်(High Tatras) တောင်တန်းများသည် အလွန်လှပလှပါသည်။

ဆလိုလိုဗက်ကီးယား၏မြေအတော်များများမှာ ထုံးကျောက်များဖြစ်၍ ဂူများစွာရှိသလို လှပသောကျောက်ဆောင်များ၊ ချောက်ကြီးများနှင့် ရေတံခွန်များလည်း ရှိပါသည်။ ယခုအချိန်အထိ ဂူပေါင်း ၆၀၀၀ ကျော်ကို ရှာဖွေတွေ့ရှိခဲ့ပြီး အံ့မခန်းဖွယ်ရာ ဂူများကို Low Tatras၊ Slovak Paradise နှင့် Slovak Karst ဥယျာဉ်များတွင် တွေ့နိုင်ပါသည်။ Krasnohorska ဂူသည်လည်း ကမ္ဘာ့အမြင့်ဆုံးဂူတိုင်အဖြစ် ဂင်းနစ်စံချိန်တင်ခဲ့ပါသည်။

ဆလိုဗက်ကီးယားတွင် သဘာဝသတ္တုကြွယ်ဝသည့် ရေပူစမ်းပေါင်း ၁၃၀၀ ကျော်ရှိပြီး ကမ္ဘာကျော် အပန်းဖြေစခန်းအချို့မှာ ရေပူစမ်းစိမ်ကုသမှုများ၊ အပန်းဖြေမှုများ ပြုလုပ်နိုင်ပါသည်။ Košice မြို့အနီးရှိ ရေပူစမ်းမှာမူ ထူးခြားလှပြီး တစ်ရက်ခြားတစ်ခါ ၁၅မီတာအမြင့်ထိ ရေတွေပန်းထွက်လေ့ရှိပါသည်။ ထို့ပြင် သဘာဝရေချိုရရှိမှုများကာ ဘုံဘိုင်ရေကို တိုက်ရိုက်သောက်သုံးနိုင်သည်အထိ ရေသန့်စင်ပါသည်။

ဆလိုဗက်ကီးယားတွင် သဘာဝအလှတရားများတင်မက သမိုင်းဝင်အဆောက်အအုံများစွာလည်း ရှိလို့နေပါသည်။ လူဦးရေနှင့်ယှဉ်လျှင် ရဲတိုက်နှင့် အိမ်ကြီးအိမ်ကောင်းများ အများဆုံးရှိသည့်နိုင်ငံဖြစ်ပြီး Bratislava ရဲတိုက်၊ Bojnice ရဲတိုက်နှင့် Spiš ရဲတိုက်တို့မှာ အကျော်ကြားဆုံးဖြစ်ပါသည်။ ထို့ပြင် ဆလိုဗက်ကီးယားတစ်လွှား Gothic နှင့် Baroque မြို့များစွာလည်း ရှိပါသည်။

ဆလိုဗက်ကီးယားတွင် သစ်သားဖြင့်သာဆောက်လုပ်ထားသော ဘုရားရှိခိုးကျောင်းများနှင့် ကမ္ဘာ့အမြင့်ဆုံးသစ်သားပလ္လင် အပါအဝင် သစ်သားရိုးရာဗိသုကာလက်ရာများကို ကောင်းမွန်စွာထိန်းသိမ်းထားပါသည်။ Stara Bystrica ရှိ နက္ခတ္တဗေဒနာရီသည် ဆလိုဗက်ကီးယားနိုင်ငံ၏ အကြီးဆုံးသစ်သားရုပ်တုဖြစ်ပါသည်။ နိုင်ငံမြောက်ပိုင်းရှိ ခီချီမန်ကျေးရွာသည် ရိုးရာဗိသုကာထိန်းသိမ်းထားသည့် ကမ္ဘာ့ပထမဆုံးရွာဖြစ်ပါသည်။ တောင်များဝိုင်းရံထားသော ထိုရွာသည် ရိုးရာသစ်သားအိမ်များကြောင့် ကျော်ကြားပါသည်။