ပုံပြင်ထဲက မြို့လေးလား ထင်မှတ်မှားရသည့် ဥရောပမှ ရေပေါ်မြို့လေး (Bruges, a fairy tale town of Belgium )

  ပုံပြင်ထဲက မြို့လေးလား

ထင်မှတ်မှားရသည့်

ဥရောပမှ ရေပေါ်မြို့လေး

Bruges

နတ်သမီးပုံပြင်များထဲကလို ခမ်းနားလှသော မျှော်စင်ကြီးများ၊ ဘုရားကျောင်း များ၊ လက်ရာမြောက်အုတ်စီအိမ်လေးများ၊ ကျောက်ခင်းလမ်းများ၊ သာယာ လှပသော တူးမြောင်းများနှင့် ပန်းချီကားအလား ထင်မှတ်မှားရလောက်အောင် လှပသော ရှုခင်းများရှိသည့် မြို့လေးတစ်မြို့သည် ဥရောပအလယ်ပိုင်းခေတ် ဗိသုကာလက်ရာ အဆောက်အအုံတွေကြောင့် ကမ်္ဘာလှည့်ခရီးသည်များကြား ကျော်ကြားနေသော ဘရုရှ်(Bruges)မြို့ဖြစ်ကာ ဥရောပတိုက် ဘယ်လ်ဂျီယံနိုင်ငံ အနောက် မြောက်ဘက်မှာ တည်ရှိနေပါ၏။

ဥရောပတောင်ပိုင်း အီတလီနိုင်ငံရှိ ရေပေါ်မြို့ဗင်းနစ်ကဲ့သို့ မြို့အနှံ့တူးမြောင်း များဖောက်လုပ်ထားခြင်းကြောင့် “မြောက်ပိုင်းရှိ ဗင်းနစ်”လို့လည်း အမည်တွင် နေပါ၏။ ဥရောပမြောက်ပိုင်း၌ ဤသို့ မြို့တွင်း၌ တူးမြောင်းများ ဖောက်လုပ်ထား သည့် အခြားမြို့များမှာ နယ်သာလန်နိုင်ငံရှိ အမ်စတာဒမ်မြို့နှင့် ဆွီဒင်နိုင်ငံရှိ စတော့ဟုမ်းမြို့တို့ပဲ ဖြစ်သည်။ မြို့တွင်း၌ တူးမြောင်းများဖောက်လုပ်ထားသည့် အလျှောက် တံတားများလည်းရှိရာ တံတားပေါင်း ၈၀ ကျော်ရှိကြောင်း သိရပါ သည်။ ထို့ကြောင့်လည်းမြို့အမည်က တံတားဟုအဓိပ်္ပာယ်ရသော ရှေးဟောင်း ဒက်ချ်စကားကနေဆင်းသက်လာပြီး Brugesလို့ အမည်တွင်ခြင်းဖြစ်သည်။

ဘရုရှ်မြို့လေးကို ၉ ရာစုကတည်းက စတင်တည်ထောင်ခဲ့ခြင်းဖြစ်ပြီး ဆိပ် ကမ်းတည်ရှိခြင်းကြောင့် တစ်ခေတ်တစ်ခါက အဓိကစီးပွားရေးမြို့တော်ဖြစ်ခဲ့ကာ လွန်စွာကြွယ်ဝခဲ့ကြောင်း သိရပါသည်။ ၁၉၀၀ ပြည့်နှစ်ဝန်းကျင်တွင် စီးပွားရေး ကျဆင်းပြီး လူတွေရွှေ့ပြောင်းသွားကာ လူဦးရေ နှစ်သိန်းကျော်မှ ငါးသောင်း အထိ ကျဆင်းသွားခြင်းကြောင့် မြို့ကြီး ခြောက်ကပ်သွားခဲ့သည်။ ၁၉ ရာစုနှောင်း ပိုင်းမှ အလယ်ပိုင်းခေတ်မြို့များ တစ်ကျော့ပြန်ခေတ်စားလာကာ ကမ်္ဘာလှည့်ခရီး သည်များ မျက်စိကျရာမြို့လေးဖြစ်လို့လာခဲ့ပါသည်။ ၂၀၀၂ ခုနှစ်၌ ဘရုရှ်မြိုကို ဥရောပယဉ်ကျေးမှုမြို့တော်အဖြစ် သတ်မှတ်ရလောက်သည်အထိ ခရီးသွားလုပ် ငန်း၌ အရေးပါနေပါ၏။ ဘယ်လ်ဂျီယံနိုင်ငံ၏ ခရီးသွားများကို ဆွဲဆောင်ရာ အဓိကမြို့ဖြစ်ကာ မြို့တွင်းသို့လာရောက်လည်ပတ်သည့် ဧည့်သည်ပေါင်းမှာ တစ်နှစ်ကို နှစ်သန်း ကျော်ရှိကြောင်း သိရပါသည်။

ထိုနတ်သမီးပုံပြင်မြို့လေးသို့ စာရေးသူသည်မိသားစုနှင့်အတူ ယခုနှစ် သင်္ကြန်ရုံးပိတ်ရက်များ၌ သွားရောက်လေ့လာဖြစ်ခဲ့ပါ၏။ နယ်သာလန်နိုင်ငံ အမ်စတာဒမ်မြို့မှတစ်ဆင့် နေ့ချင်းပြန်သွားရောက်ခဲ့ခြင်းဖြစ်၍ ခရီးစဉ်အစအဆုံး မှာ ၁၁ နာရီခွဲလောက်သာ ကြာမြင့်ပါသည်။ အမ်စတာဒမ်မှ နေ့ချင်းပြန်ခရီးစဉ် များ ပြေးဆွဲလျက်ရှိပြီး သုံးနာရီနီးပါး ကားမောင်းရုံဖြင့် ဘရုရှ်မြို့သို့ ရောက်နိုင်ပါ ၏။ မြို့လေးမှာ ၅၃ ဒသမ ၄ စတုရန်းမိုင်သာ ကျယ်ဝန်း၍ လူဦးရေမှာ တစ်သိန်း ကျော်ရှိပါသည်။ စည်ကားသည့်မြို့လယ်မှာ ၁ ဒသမ ၆ စတုရန်းမိုင်သာ ကျယ်ဝန်း ပြီး လူဦးရေမှာ နှစ်သောင်းကျော်သာရှိသည်။ သို့သော်လည်း များပြားလှသည့် ကမ်္ဘာလှည့်ခရီးသည်များကြောင့် မြို့တွင်း၌ အထူးစည်ကားလျက်ရှိသည်ကို တွေ့ ရပါ၏။

ထိုခရီးစဉ်၌ မြို့တွင်းရှိ ခမ်းနားလှသည့် အဆောက်အအုံများကြား လမ်းကြို လမ်းကြားများလျှောက်ရင်း လှပသည့် ကျောက်ခင်းတံတားများ၊ တူးမြောင်းများပေါ် ဖြတ်ရင်း ဧည့်လမ်းညွှန်ရှင်းပြသည်ကိုနားထောင်ကာ မြို့အနှံ့ လမ်းလျှောက်ရသည် မှာ ကြည်နူးစရာ ကောင်းလှပါ၏။ မွန်းကျပ်လှသောမြို့ပြမှ ခဏတာရုန်းထွက်ကာ ရှေးခေတ်သို့ ပြန်ရောက်သွားသလို အေးချမ်းမှုကိုလည်း ခံစားရပါ၏။ မြို့ထဲရှိ အဆောက်အအုံများသည် တစ်ခုချင်းစီ၌လေ့လာစရာ ဗိသုကာလက်ရာများစွာ ရှိ နေတတ်သလို ခမ်းနားကြီးကျယ်လှသည့် အဆောက်အအုံကြီးများကလည်း မိုး ပေါ်ထောင်ထွက်လုနေပါ၏။ ထို့ကြောင့်လည်း ယူနက်စကိုကနေ ကမ်္ဘာ့သမိုင်းဝင် အမွေအနှစ်အဖြစ် ၂၀၀၀ ပြည့်နှစ်က သတ်မှတ်ပေးခဲ့ခြင်းဖြစ်သည်။

Tourist Attraction မြို့ဖြစ်သည့်အလျှောက် မြို့ထဲ၌ စားသောက်ဆိုင်ကြီး နှင့် အမှတ်တရပစ်္စည်းအရောင်းဆိုင်များ ပြည့်နှက်လို့နေပါ၏။ ထိုဆိုင်များနှင့်အ ပြိုင်ရှိနေသည်မှာ ချောကလက်ဆိုင်များဖြစ်သည်။ ဘယ်လ်ဂျီယံချောကလက်သည် ကမ်္ဘာပေါ်၌ နာမည်အကြီးဆုံးဖြစ်၍ ချောကလက်ဆိုင်များမှာ လက်ညှိုးထိုးမလွဲ ပင်ဖြစ်နေပါ၏။ ချောကလက်နည်းတူ ဘီယာနှင့် ဇာများသည်လည်း ဤမြို့လေး ၏ နာမည်ကျော် ထွက်ကုန်များဖြစ်သည်။ မြို့ထဲ၌ လမ်းလျှောက်လေ့လာနိုင်သလို မြင်းလှည်းများ၊ စက်ဘီးများစီး၍သော်လည်းကောင်း၊ တူးမြောင်းများအတွင်း၌ လှေ စီး၍သော်လည်းကောင်း လေ့လာနိုင်ပါသည်။ ကျွန်မတို့သည် ရောက်တုန်း ရောက်ခိုက် လှေစီးဖြစ်ခဲ့ပါ၏။ ကြာချိန်မှာ နာရီဝက်ကျော်သာဖြစ်၍ ကားလမ်း မရောက်နိုင်သည့်နေရာများကိုပါ ရောက်နိုင်သလို လှပသောမြို့ထဲ ဆန်းကြယ် သော အဆောက်အအုံများကြား လှေစီးရသည်မှာ တစ်သက်မမေ့နိုင်စရာပါ။

ထို့ကြောင့် ဘရုရှ်မြို့သို့ ရောက်ဖြစ်မည်ဆိုပါက လှေစီးရန်မမေ့ဖို့နှင့် ဖြစ်နိုင်ပါက မြို့အနှံ့ အေးအေးဆေးဆေးအနားယူကာ ညဘက်မြို့အလှကိုပါ ခံစားနိုင်ဖို့ ည အိပ်ခရီးစဉ်အဖြစ် သွားရောက်သင့်ပါကြောင်း ညွှန်းဆိုလိုက်ရပါသည်။

ဒေါက်တာနုမြတ်သိင်္ဂီဦး

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s